اصحابى مجانين الافلام: نوبى, محمد يوسف زين, مريم, رجاء العباسي , د. امبده,مجاهد و كتيرين ممكن اكون نسيت اسماءهم (العفو)... ان شاء الله طيبين. احنا فى الصيف و بدا موسم الافلام فى هوليود. شاركونا بافلام جديدة او قديمة بتحضروا فيها الايام دى...
فلم ح ينزل غدا على السنمات (ذكرنى حبى للافلام) :Larry Crowne فيه توم هانكس و جوليا روبرت. توم هانكس كتب و اخرج و مثل فى الفلم.
من افلام السنة دى برضو...(نزل يوم 10 يونيو): Super 8 الفلم من انتاج اسبيلبيرق.... الفلم بيحكى عن اطفال كانوا بيحاول يصوروا فلم. اثناء التصوير بيحصل حادث لقطر و تبدا قصة الفلم
فى الصيف برضوا بتبدا مسلسلات (درجة تانية). مسلسلات ظريفه لكن ما ذي لوست و هاوس و الاسماء الكبيرة دى. لكن كتير منها بيستهل يتشاف. منها : Men of a Certain Age
True Blood
Rescue Me
The Closer
Warehouse 13
Falling Skies و ده من انتاج حبيبنا الاولانى Steven Spielberg
07-01-2011, 00:22 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
اي حاجة لسبيلبيرج ح اتفرجها طوااالي و من غير ريفيوز يا سمارت ياخ جيبي لينا اخبار مسلسلات رمضان و افلام رمضان، انا الحاجات دي لي منها طاشر سنة و دايرة اتابع مع الناس :) لكن عارفاك يخربك زيي، لوول
يا حليل نجوان، ان شاء الله تظهر مع هلال رمضان ده
07-01-2011, 00:39 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
يخربنى خراب الترب (ذى ما بيقولوا)...خاصة و ان الاعادى قطعوا منى الدش العربى. قبل ٨ شهور فتحت بوست لازعاج الشركة المقدمة لخدمة القنوات العربية فى امريكا ...عشان نخليهم يحنوا و يضيفوا النيل الازرق...الان محتاجه دعم داخلى عشان ارجّع (ان شاء الله ) الجزيرة بس فى البيت ....و كل محاولاتى تنتهى بالفشل. املك الوحيد نجوان
07-01-2011, 00:52 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
غايتو يا رحاب فتشت النت و لقيت الموقع ده...غايتو بيديك فكره الحاصل شنو. للاسف ما لقيت مسلسل للفخرانى. لكن فى مسلسلين لجمال سليمان. و ما شايف مسلسل تاريخى سورى. فى برضو مسلسل لرشيد عساف, بس كوميدى. ما اظن انه يكون لذيذ فى مسلسل كوميدى...غايتو نشوف.
ما قصرتي يا سمارتوز زمان يا حليل المسلسل الديني قبل الفطور نرجاه و ننبسط بيه و المسلسل المصري بعد الفطور و كان الله يحب المحسنين يمكن بعد التراويح الواحد يشوف ليه حاجة اجنبية كده ولا كده
07-01-2011, 05:29 PM
omer osman omer osman
تاريخ التسجيل: 06-09-2007
مجموع المشاركات: 15218
طبعن يا سمارت اخوك بقى زول كئيب في اذواقو، متفلهم في تعزّلو، منظراتي في تقييمو :)
طيب بالنسبة لـ 2011 لسة احلى فلم في السنة ما جى. نلاحظ السنة دي الفانتازيا كمية.. السيكول كمية برضو: ترانسفورمرز، ميشين امبيسبول، اكس مين، بايرتز اوف كاريبيان، هاري بوتر وكل الافلام البيض البتجيب قروش دي :)
بس في اشراقات وافلام جميلة برضو..
ان شاءالله نحاول في البوست نشوف افلام 2010 و2011 (الطلع منها نسخ دي في دي، لانو كما تعلمون نحن قوم مساكين)
___________
نبدأ بآخر فلم شاهدته..
Even The rain
انتاج 2010 فلم اسباني رائع جدن
سباستيان وكوستا شابان اسبانيان يقومان بمشروع تصوير فلم روائي تاريخي عن قصة احتلال اسطول كولمبوس للأرض الجديدة عبر تخليد قصة قس رفض استعباد الهنود الحمر وقال خطبة شهيرة من داخل كنيسة بنيت من غابات امريكا الجنوبية ووصلت الى ايزابيلا ملكة قشتالة وليون (اسبانيا)، يتم تصوير المشروع في ضواحي بوليفيا ويتم الاستعانة بممثلين من السكان المحليين وذلك لتقليل الميزانية والاستفادة من اجادتهم للغة الهنود القديمة. تذهب بالتوازي مع قصة الاسطول الاسباني وبحثهم عن الذهب في امريكا الجنوبية قصة واقعية ملحة وهي مشكلة شركات "مياه" بين سكان مدينة بوليفية في اعلى الجبال حيث يقيم فريق التصوير الاسباني وبين الحكومة البوليفية في لاباز. تنتهي الى ثورة شعبية بمعناها الحرفي. الفلم يحمل فلسفة عميقة جداً ستكتشفونها من خلال الفلم، ما اعجبني في الفلم كذلك الواقعية التي نجدها نادرة في افلام هوليود التي يميل أهلها الى التيمات المحفوظة في الافلام الروائية الهوليودية. وهو ما يميز افلام عظيمة انتجت خارج هوليود وتحرر مخرجوها من بعض القيود في الأعمال الامريكية. مثال لذلك الفلم الارجنتيني العظيم The secret in their eyes (2009 على كل حال ليست واقعية سوداوية مثل الفلم الاسباني الأسباني الآخر الذي نال شهرة عالمية هذه الأيام The beautiful 2010 والذي يصيبك بالاكتئاب تماماً من فرط اتقان سوداوية القصة!
طبعن ما شفت Cars 2 لسة، ادونا بس كم شهر لحدت ما تنزل النسخة الديفي دي او البلو راي. بالنسبة لافلام بكسار مافي كلام. نمرة واحد. ونفس الكلام ينطبق على كونق فو باندا 2 ، في انتظار النسخة
بس كمان...
Rango
رانجــو ياخ
زي ما اخترنا Despicable me السنة الفاتت كأجمل فلم انيميشن انا بختار رانجو دا
وذلك لعدة أسباب.. السحلية (او الحربوية) دا ماشة معاهو طحنية لمن غلط
بدا الفلم كسحلية رمتالي ومواطن مهمش لدرجة أنو ما عندو اسم حتى (اسم رانجو حينجرو بعد ربع ساعة من بداية الفلم)
الفلم معمول على أفلام الويسترن والكابويات الماكسيكان ما عارف.
والقصة ساحرة وساخرة لدرجة عجيبة.
في انتظار الانيميشن الضخم تين تان (تان تان) الاحتمال يطلع نهاية السنة دي او صيف 2012 والعملوهو الثنائي العمالقة بيتر جاكسون (مخرج لورد اوف ذا رينق) وستيفن سبيلبيرج (اللي هو ستيفن سبيلبيرج). وتان تان الفرنسي دا عندي معاهو قصة بحكيها ليكم لمن ينزل الفلم الجديد ان شاءالله :)
على العموم رانجو حيرفع ليك معنوياتك أكيد. الراجل كان حثــالة ياخ وبقى حاجة تانية
أما بالنسبة للإم بي سي إتش دي غايتو طلعو روحنا! ياهو بكري يفتل هنا وهم يفتلوا لينا الشاشة هناكـ! بقت تجيني الشاشة في النص بس .. يمين يسار أوت أوف فوووكس!!
07-05-2011, 11:32 AM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
كيف حالك يا عمر عثمان.? اصلاً الصوره دى عشان المسلسل القلت عليه ده. عندها مسلسل شغال الايام دى جميل جدا جدا اسمه brothers and sisters. ما اظن يجيبه فى اى قناة عربية لاسباب اجتماعية او اخلاقية.
ombadda ....ازيك? المجانين دى انا ما قاصده بيها اى حاجه ما كويسه..... انا ذاتى مجنونة افلام منتظرتك
وليد الطيب قسم السيد شكرا على الفلم...و شكرا على المرور...و شكرا على الكلمات الطيبه
bob الحمد لله ان الفلم عجبك. الفلم ظريف ...لكن فيه مشكلة واحده....ان الشخصيات مصقولة اكتر من اللازم...كانها واقعة من كتاب عن عالم مثالى...بجيك راجعه لانا قصدى شنو بالضبط و شكرا على الموقع and by the way there is an iphone app for this website
Osama Mohammed كيف حالك? cold case من المسلسلات السمحة جدا..كل ما اجى ماره و الاقي حلقة ما بقدر امشي من القناة من غير ما اتمها.......لكن انا غايتو تعبت من مسلسلات الجرائم...فى ذى مليون Law & Order ده غير cold case و The Closer و غيرهم كتييير.. شكرا على المسلسل
07-06-2011, 06:29 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
ود الصايم ....تجاهل شنو يا اخى? العفو. خلاص زهجت من بوست ال اى فون داك و قررت ما ارفعه لهذا الربع او اى ربع قادم. ممكن امشي افتش سؤالك و ارد ليك هنا او اى مكان اخر.
Quote: بعدين أفلامكـ التورنيت دي مترجمة ولّ نشتري معسل؟
اشترى معسل احسن...او خلى اساسي يترجم ليك
07-06-2011, 06:38 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: السيكول كمية برضو: ترانسفورمرز، ميشين امبيسبول، اكس مين، بايرتز اوف كاريبيان، هاري بوتر وكل الافلام البيض البتجيب قروش دي :)
ازيك محمد يوسف الزين ? صحبك توم كروز ده كان نطط ما ح احضر ليه MI تانى. انا راجيه Pirates of the Caribbean على احر من الجمر... هار بوتر ما شايلاه برضو....حضرت الاول بس و بعت القضية
بقيت حضر افلام اسبانية كمان ? تمام و الله. المرحلة الجاية انك تحضر افلام من هنك كونق....بالجد...عندهم افلام سمحة. لانى بثق فى زوقك...فلمك ده بحضره اليوم او بكرة...ان شاء الله
على كونق فو باندا 2 و لاحتى 1 ما حضرتهم......ما بطيق Jack Black...و لا حتى صواته
Rango و Despicable me الاتنين ما فيهم كلام صحبك جونى دب بخضر كل افلامه ...Alex in Wonderland قلبى وجعنى..و ما قدرت اتم الفلم...
Quote: الفلم ظريف ...لكن فيه مشكلة واحده....ان الشخصيات مصقولة اكتر من اللازم...كانها واقعة من كتاب عن عالم مثالى...بجيك راجعه لانا قصدى شنو بالضبط و شكرا على الموقع
ياريت تدينى فكره عن الكتاب شكلوا جدير بالقرائه المهم حا اكون فى الانتظار لبقية المعلومات.
Quote: and by the way there is an iphone app for this website
Only Sprint and, Only Palm :)
07-07-2011, 06:08 AM
هويدا شرف الدين هويدا شرف الدين
تاريخ التسجيل: 04-16-2008
مجموع المشاركات: 2068
سمارت اختي العزيزة الغالية التحية والتقدير عارف نحن في ال\دوحة الافلام يتشتغل عندنا قبل امريكا الفيلم الجديد بنزل في الدوحة يوم الخميس في امريكا بنزل يوم الجمعة الحكاية دي تخيل كانت في السودان الافلام بتشتغل لاول مرة في وقت واحد مع بيروت والقاهرة ولندن وامريكا وكانت السينما ليها برنامج شهري بالافلام تجي في موعدها وترجع في موعدها
سلامات يا bob القصة ما من كتاب...القصة من تاليف توم هانكس و هى من وحى دراسته لما كان صغير فى واحده من المعاهد الصغيرة دى او الكليات. ما قصدت اقوله عن الفلم انه ادى الموضوع بتاع الفصل من الشغل ده حبة بهية وردية. ده حقيقى ما حاصل فى الدنيا. فعلا اغلب الناس اللى اتفصلت من عملها بسبب الازمة الاقتصادية الحالية حاولوا يرجعوا تانى لمقاعد الدراسة...لكن على عكس بطل الفلم المتفائل ذوالروح الحلوة امورهم ما مشت كويس. قصدى ان الشخصيات كانت مثالية اكتر من الازم. التثيل كان كويس جدا (طبعا لازم يكون كويس... هانكس و روبرت) لكنه (بصراحة خسارة فى قصة ذى دى). الفلم فى النهاية ما كعب....ابدا الفلم لطيف جدا. بس انا كنت بتوقع يكون اجمل كده. و كما قال النقاد الفلم بيمهد الطريق لجوليا روبرت انها تتخطى مرحلة بطلة الافلام الشابه الوجيه اللى بتشبه الموديلز و تبقى نجمة فوق الاربعين ذى (حبيبة البى) Meryl Streep
Quote: Only Sprint and, Only Palm
Come on!!!!!!!!!!!!!!!!!!I
07-07-2011, 06:05 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات يا هويدا Greys Anatomy بدا بدايات قوية جدا و واصل كده لحدى الموسم التالت. بعد كده الحال اتدهور شديد. ما تفهمينى غلط ...لسه بحضره وما فوته و لا حلقة واحده (حتى الان). لكن الان وصلت مرحلة انى بقيت ما بقول انى بحضره فى المحافل العامة. بقى ذى guilty pleasure المثلين لسه حلوين غايتو...لكن القصص بالغوا فيها
اهلا اهلا بالاستاذ محمد سنى دفع الله بعد كده انا ح اتحسس انظر فى الدراما...
Quote: سمارت اخوي
معليش يا استاذ محمد ...لكن انا زمان كنت خاته صورة هاوس و كان كل الناس فاكرنى احد الاخوان. قمت غيرت الصورة لصورة الى مك بيل ...عسي و لعل...تقوم تجى تقول لى ....اخوى??? على العموم لى شرف اعتبارك اخوك
بختكم يا ناس قطر.. الافلام قبل امريكا !!!! فعلا الافلام هنا بتنزل (غالبا) يوم الجمعة. افلام قليلة جدا بتنزل يوم الاربعاء...و دى بتكون افلام كبيرة جدا جدا و بيكونوا عاوزين يبدوا بدرى عشان يقولوا عملانا قروش كذا فى اول ويك اند. انا بتذكر كويس جدا ان جدول السنمات زمان كان فى الجرايد...زمن.
محمد يوسف الزين
Quote: عارفة فولدري بتاع الكلاسيك موفيز وصل كم وستين قيقا :)
الاسماء لو سمحت. تعرف يا عابد فى خدمة هنا او موقع اسمه Netflex ...بتدفع اجار شهرى حوالى 9 دولار و ب القروش دى ممكن تحضر اى فلم حايم من لموقع بتاعهم. اللذيذ انك ممكن تحضر من التلفزيون لو وصلته باى واحده من الالعاب دى (بلى استين او اكس بوكس او Wii ). ممكن برضو تحضر الافلام (او المسلسلات) من ال اى فون او ال اى باد او الكومبيوتر. ممكن تحضر اى عدد من الافلام فى اليوم. و لان الموضوع قانونى تماما ...فالافلام بكولتى خرافية. تعرف فيه افلام مصرية و عربية و افلام اجنبية كتيرة غير الافلام الامريكية. ممكن تزيد دولار او اتنين و ممكن يرسلوا ليك (بالبريد) اى DVD انت عاوزه لما تحضره رجعه و هم ح يرسلوا ليك اللى بعده فى القايمة بتاعتك. اظن ان فكرة الموقع ده من اجمل الافكار اللى مرت على عالم الانترتينمت فى ال ١٠ سنوات السابقة
07-07-2011, 06:12 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
اكتر من انى اخت صورة جكس وجيه ذى Calista Flockhart ..ما عارفه اعمل شنو و الله. شكلو كده مهما عملتا (الاخلاق) اخلاق دبايب...كلو من عشرتكم فى البورد ده .
Quote: ياخ افلام شنو الجايين تقولو عليها - الناس في البوست ده يا متوفقين يا متوفقين ماف حلول تانية
من اللى بيكتب لنوبى!!!
07-08-2011, 03:38 AM
bob bob
تاريخ التسجيل: 03-03-2002
مجموع المشاركات: 3353
ما عارف جبته قصة انها كتاب من وين بس الشكر لنوبى الاستثانئ ..يعنى على الرغم من عدم المامى بالقصة الا من خلال الفلم بس بعتقد انو كان جميل ولطيف ذى ما زكرتى. وخاصة انو الفلم بمس عامل السن وعدم المقدرة على الحصول على career advancement بسب التعليم على الرغم من فترة الخدمه الطويله...والرجوع الى مقاعد الدراسة معا طلاب فى سن اصغر وما الى.... وحقيقه بعتقد انو القصه جات فى وقت مناسب من حيث الاشكالية بعتباره معاشه وبشكل كبير اليوم من تاثير الازمة الاقتصادية والقدره على المنافسه فى سوق العمل.
الصيف ده بالذات حضرته فيهو افلام كتيره من شهر تلاته تقريبا الى الان..حا اجى ازكرهم
Quote: Come on!!!!!!!!!!!!!!!!!!I
ــــــــــ I know but, It just their Data's plan is issue
07-09-2011, 07:28 PM
ombadda ombadda
تاريخ التسجيل: 10-10-2002
مجموع المشاركات: 6736
نترقب نزول فيلم Immortals نهاية هذا العام. وهو على نفس منوال فيلم 300 سبارطة. 300 سبارطة عند عرضه صادف وجودى فى القاهرة فى العام 2007 ثلاث ايام متتالية ادخل السينما للاستمتاع بمشاهدة الفيلم
اما فيلم Immortals فجهزوا شعوركم إذا بتريدوا. القصة مستوحاة من احدى اساطير اليونان Greek myth. ولكن افلام كتلك الاستمتاع بالتصوير والمؤثرات الصوتية والاثارة والخيال هى الاهم من القصة والحبكة الدرامية. بس مشكلتنا مع حكاية ال 3D الذى ظهرت مؤخرا. ولغاية شهر نوفمبر بتتحل
اختي الغالية وعزيزة بالله قلت ليك اخوي عديل كده سامحينا اصلو المسامح كريم ليك التحايا واجمل الامنيات وهاك الخبر ...: م إفتتاح أول سينما من نوعها في الشرق الأوسط في قطر، حيث أنها مخصصة للسيدات فقط.
وجهزت قاعة السينما تحت إشراف شركة قطر للسينما وتوزيع الأفلام التي أوضح ممثلون عنها أن القاعة مزودة بـ 154 مقعداً.
هذا ومن المفترض أن يعرض فيها ثلاثة أفلام كل خميس وجمعة وسبت، على أن يكون العرض الأول في تمام الثالثة عصراً، والثاني الخامسة بعد الظهر والثالث السابعة مساء.
ومن المقرر أن يتم أيضاً عرض أفلام خاصة بالأطفال في أوقات أخرى معينة، بحيث تصطحب الأمهات أولادهن معهن إلى القاعة، التي لا تسمح بدخول الرجال إليها!. النسوان يدخلوها مع الاطفال ولهن كامل الحرية في المشاهدة والشمارات
07-11-2011, 05:32 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
...bob سلامات منتظرين تحكى لينا عن باقى الافلام...
Quote: I know but, It just their Data's plan is issue
I know, they have a very sweet deal, but i love my iphone too much to change plans
ombadda
Quote: القصة مستوحاة من احدى اساطير اليونان Greek myth. ولكن افلام كتلك الاستمتاع بالتصوير والمؤثرات الصوتية والاثارة والخيال هى الاهم من القصة والحبكة الدرامية. بس مشكلتنا مع حكاية ال 3D الذى ظهرت مؤخرا. ولغاية شهر نوفمبر بتتحل
من غير اى اسباب منطقية عندى معزه خاصة للاساطير اليونانية... موضوع ال 3D ده ما فروض يكون مشكلة...كل الافلام بتطلع بنسختين. انا شخصيا ما بحضر فلم 3D بالساهل...ما بحب الحجات تجى طايره لى فى وشي. و انا نوع الناس اللى بيجيهم Motion sickness من ابسط حاجه. حتى الان حضرت فلم واحد 3D ...افتار. و السبب انه ما كان over the top فى الموضوع ده
عن Netflex ...اظن ان الموضوع زمن بس...الخدمة كانت متوفرة فى US فقط. قبل كم شهر امتدت لكندا...الاسبوع الماضي امتدت لامريكا للاتينية. اظنهم ح يحتاجو سنة و شوية عشان يمدوها لاوربا و الشرق الاوسط.
محمد سنى دفع الله العفو يا اخى...ما فى مشكلة
حكاية سنما للنساء فقط دى فكرة جيلة جدا جدا....و ياريت يعملوا واحده فى السودان. بس اناح تكون مشكلتى ان فردتى البيمشي معاى الافلام زوجى...و ما بيهون على احضر فلم من غيره..
الجمعة الفاتت (نص النهار...بعد صلاة الحمعة طبعاً ) تمكنت انى اشوف Horrible Bosses.. الفلم بيحكى عن 3 اصحاب: Kurt ....Nick ... Dale
مدير Nick طلع عينو فى الشغل بوعود بترقية كبيرة فى المستقبل القريب...شغل من دغش الرحمن لحدى انصاص الليالى.
Kurt ...يعمل فى شركة لتصنيع المواد الكيمائية.ابن صاحب الشركة و الوريث الوحيد مدمن مخدرات و ما شغال بالشركة...غاوز ينهب اى مليم و يخلص منها
Dale فنى الاسنان..مديرته عينها عليه و ما عاوزه يعرس خطيبته.
حالة صعبة.... لكن الاصاحب مستحملين ...لحدى ما يوم...مدير Nick اعلن انه ما فى ترقية...و صاحب الشركة البعمل فيها Kurt مات و الابن الوريث استلم المهام رسميا. و مديرة Dale هددته بانها ح تتبلى عليه و تفتنه مع خطيبته. و نظرا للظروف الاقتصادية الامريكية الجماعة ديل ما فى واحد فيهم ح يقدر يسيب شغله. فى لحظة تجلى و شراب ..فكر الثلاثه ان الحل لمشاكلهم فى موت المدراء الثلاثه.و لانهم شباب مساكين و اولاد ناس, قرر الاصدقاء تاجير زول للقيام بالعملية ...و منها بدت سلسلة المفارقات المضحكة جدا الفلم الفلم من اجمل الافلام الكوميدية اللى انا شفتها قريب. القصة كلها is just ok (قصدى حكاية زول عاوز يقتل مديره دى) لكن السناريو ذاتو مكتوب بطريقة جميلة جدا جدا جدا. و بيخليك تحس بكل الاحداث (رغم غرابتها) انها منطقية جدا. الفلم لا يصلح للاطفال (نهائي)...اللغة صادمة جدا. لكن الفلم بيستاهل المشاهدة. اظن ان الفلم ح يبقى من الكلاسك كوميديز ذى Office space و كده.
سلامات يا سمارات وباقى المتابعين .. شايفه انو السينما الامريكيه اتدهورت في الفتره الاخيره لدرجه الملل يمكن نحنا ما بتتاح لينا كل الافلام المميزه بس مرات بشوف افلام في التوب بوكس اوفس .. واحضرها يجيني احباط
في فلم سمعته بيهو من مريم الحسين وعجبني BAD TEACHER
08-05-2011, 08:08 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
عمار عبدالله عبدالرحمن ......رمضان كريم فلم هارى بوتر الجديد (يقال) بانه سمح شديد. انا شخصيا ما شايلة هارى بوتر. ما تفهمنى غلط...بحب افلام للخزعبلات جدا. بس ما هارى بوتر
حامد محمد حامد...و كل سنة وا نت بالف خير
Quote: بصراحة ما فى مزاج نوهائى.......
حالة عدم المزاج عامة. تتلف فى الدنيا تلاقى مصايب فلا كل مكان
Dalal Ezzaldin ازيك يا دلال???? وينك?
Quote: شايفه انو السينما الامريكيه اتدهورت في الفتره الاخيره لدرجه الملل
الغريبة العكس تماما حاصل. الافلام الايام دى جميلة جدا. و احتمال BAD TEACHER ده يكون من (اضرب) الافلام اللى نزلت قريب. ناس هوليود شادين حيلهم شديد الايام دى بسبب الحالة الاقتصادية فى امريكا. باختصار ...فى الصيف امريكا دى كلها بتركب عرباتها و تحوم. لكن بسبب الاقتصاد الناس قررت توفر ح البنزين والفنادق و تركلس. و هليود كانت جاهزة بالافلام السمحة عشان الناس ترفه محليا. من الافلام السمحة النزلت الصيف ده: The Help من الكتاب الشهير بنفس الاسم
Rise of the planet of the apes
The Smurfs
The Change Up
Captain America
CRAZY, STUPID, LOVE.
08-12-2011, 11:16 PM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
يا سادتي اعضاء النادي. انسوا كل حديث وكل بوست وكل سمارت :) ، اليوم لا شئ سوى الـ"سمارت"
من فيكم تابع مسلسل Breaking Bad الذي هو ليس بمسلسل وانما انفجار عقلي!!
لا لا. لا كلام ولا تعليق سوى أن هذا الابداع هو روعة الروائع ومنتهى الجنون وعمل الشياطين! كان هذا الفولدر مركوناً في ركن قصي من الهاردسك.. breaking bad.complete sesasons 1,2,3 ولعدة شهور. لا أتذكر حتى لماذا حملت هذا المسلسل في جهازي وكيف. والصدفة وحدها جعتلني ابدأ المشاهدة. لينفجر هذا المسلسل في وجهي من أول حلقة. في الحقيقة الحلقة الأولى (pilot) وحدها أفضل من معظم الأفلام التي شاهدتها ودعك من المسلسلات التلفزيونية. المسلسل جرعة هيروين من أنقى الأنواع ما أن تتعاطاها حتى تدمنها الى الأبد. هذا العمل هو أفضل ما قدم على شاشة وأفضل ما شاهدت من أعمال منذ فلم "إنسبشن"، والممثل بطل المسلسل قدم أفضل أداء تمثيلي أشاهده منذ أداء دانييل دي لويس في تحفته الفنية "ذير ويل بي بلود". ممثل مجهول لي تماماً وآخر المتعاقدين مع شياطين التمثيل. اسمه Bryan Cranston، يفعل كل شئ بوجهه..كل شئ. وآخر يقف وراء هذا العمل اسمه Vince Gilligan (كتابة، اخراج، انتاج). بعد بحث وجدت أنه كان يكتب بعض حلقات مسلسل إكس فايلس! وسيزون 4 انتهى قبل اسابيع. وسيزون 3 هو أجمل سيزون في تاريخ المشاهدة.
دكستر وبريكنق باد:
دكستر مورقان هو مسلسلي المفضل. متقن وتفاصيله المقنعة تدهشك بجودة صناعتها. فرحلة ديكستر الداخلية لفهم نفسه والعالم هي الأمتع. ومايكل سي هول قدم افضل شخصية في مسلسل. ولكن كل هذا الى حين. ووالتر وايت بطل حلقات بريكينق باد تم اكتشافه. الرجل لا يدهشك بتمثيله ولكن الرجل يسيطر عليك، يتلبسك ويستولي عليك. شيطان من الشياطين.
وولتر وايت مدرس الكيمياء في مدرسة ثانوية في سانت في - نيومكسكو. تشخص حالته بسرطان الرئة. له ابن معاق وزوجة حامل ومرتب محدود. نكتشف منذ البداية أن وولتر وايت هو عالم كيمياء في الحقيقة وليس مدرس ثانوية فقط!. يخبره الطبيب أن امامه عدة اشهر لكي يموت. ويبدأ البركينق باد من هنا..يتفق مع طالبه السابق جيسي بنكمان (تمثيل خرافي من جيسي بنكمان) ويبدآن بصناعة الكريستال ميث. نوع من المخدرات يستنشق بعد حرق بالبايب. ويصنع أنقى وافضل الانواع التي ظهرت في الشارع. كل هذا في الحلقة الأولى. لدرجة أني تصورت ان هذا المسلسل الذي لم يكن عندي أدنى فكرة عنه مجموعة قصص كل حلقة لوحدها. من فرط الشبع الدرامي في الحلقة الأولى. وخاتمتها التي تشبه خاتمة الأفلام العظيمة. وولتر وايت ربما متهور وربما ضعيف أمام حبه الجارف لعائلته ورغبته العظيمة في اسعادها. ولكن الرجل ملك "المخارجات" كما نقول بالسودانية. وهذه متعة اخرى في القصة. وولتر وايت ملك تعابير الوجه. يملك أيضاً منطق يستولى على عقلك. القصة مدهشة. وأفضل مافيها هي الاحتمالات الكثيرة التي يمكن أن تكون. كل ما اجتهدت في معرفة الخطوة الثانية يسلك الكاتب شارع آخر تماماً فتطير من المتعة. لأنه لم يحترم عقلك فقط ولكنه تحداك وكسب. والحوار كذلك ينافس القصة نفسها. ثم الاخراج.. الصحراء وصوت الصراصير وصوت محرك السيارة والكحة والهمهمة. اصوات مبالغ في عبقريتها. ثم الصورة..كاميرا مختلفة تماماً عن أي كاميرا رأيتها.
هناك اسلوب اخراجي في المسلسل غريب. لو تتذكرون مشهد كريستوفر وولتز في فلم تورنتينو الفانتازي: إنجلوريوس باستاردز (اوغاد مغمورون). حينما دخل على الاسرة في الريف الفرنسي والتي كانت تخبئ يهود تحت أرضية المنزل. هذه اللقطة الطويلة البديعة في فلم كوينتن تارنتينو هي أقرب مثال للقطات بريكينق باد الطويلة. والتي تبدو لك في الوهلة الأولى مملة. ولكن لأي شئ سبب ولكل حدث شئ يفسره. والرمزية عنوان للكثير من اللقطات. هناك ايضاً عملية مدهشة اخرى في المسلسل. افتتاحية الحلقات. والتي قد تكون أي شئ يعطيك مفتاح للاحداث القادمة!. الحوار 10/10 ، الاخراج 10 /10 ، التمثيل 10/10 ، القصة 10/10 ولا توجد حلقة أضعف. سيزون 3: 100/100 فاتني أن اقول لكم أن المسلسل يعتمد على خمسة ممثلين فقط يكملون دور وولتر وايت الخرافي. وباختصار تستطيع بعد مشاهدة هذا المسلسل أن تعتزل أي دراما تمثيلية أخرى. بس
ويظل شعارنا: القصة اذواق [
10-20-2011, 10:53 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
يا سمارت ياخ أنا ما عافي ليك ...... شبكتيني في المسلسل ده:
Quote: كيف حالك يا عمر عثمان.? اصلاً الصوره دى عشان المسلسل القلت عليه ده. عندها مسلسل شغال الايام دى جميل جدا جدا اسمه brothers and sisters. ما اظن يجيبه فى اى قناة عربية لاسباب اجتماعية او اخلاقية.
ومن ديك وانا شغال متابعة. بس لدهشتي، المسلسل عُرض أو لا زال يُعرض في قناة MBC ...... بس ما عارف بيكونوا بيسنسروا منو قدر شنو.
_______ يخيل لي سمارت خلّت البوست ده.
10-20-2011, 11:48 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
ازيكم يا شباب....ما سبت البوست يا جماعة بس متكلة عليكم فى الشغل فى البوست ده...
ابو الريش.....المسلسل ظريف جدا....لكن شكلو السنسرة بفهم لدرجة انو الناس ما ملاحظة الحاص شنو.... او انا براى المعقدة و متخيله الحاجه دى فوق العادة فى التلفزيونات العربية!!!!! ذى رامى ديل خبراء اجانب عديل كده ...لو رامى قال الفم ما خالص...ما فى كلام تانى.
د.امبدهThe Godfather من اجمل الافلام المنتجه. فى فترة كنت بتكلم بلغة الفلم. مرة قلت لزول going to the mattresses و الزول ما فهم انا بقول فى شنو و بقيت فى شرح و برنااامج
محمد يوسف الزين ...ما حضرتا اى حلقة فى Breaking Bad ...لكن سمعت انه سمح شديد.شكرا يا اخى على تحليلاتك اللى ما بتخرش الميه دلال...اصلى ما سمعت بيه الفلم ده!!!!! بفتشوا الليلة دى الصادق عوض فى مسلسلات كتيرى جديده طلعت السنة دى....بجيها راجعه بعد شويه
11-02-2011, 07:36 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
من الافلام المصريه الهادفه جداً ... فلميين بناقشوا مشكلات اجتماعيه
الفلم الاول عن التحرش الجنسي ,, تدور أحداثه حول أتوبيس نقل عام يحمل رقم 678 ، أغلب مشاهد الفيلم بداخله و من خلاله يتم عرض مشاكل الفتيات في وسائل المواصلات كالتحرشات الجنسية و التي تصل أحياناً الى الإغتصاب .
الفلم الثاني عن العنوسه ,, يصور الفلم على فترات متقاربه مشهد ضغط في احد المحطات البعيده ايل للانفجار ,, يروي الفلم كفاح فتاتين تواجهان أحداثً عدة في إطار دراماتيكي مشوق حيث يناقش الفيلم قضايا نسائية فكرية وعاطفية واجتماعية من خلال مجموعة من النساء العوانس وكيف يواجهن المجتمع .
لامثالي من ناس العالم 3 قناة بانورما اكشن , تتجاهل حقوق الملكية وتقدم اروع الافلام مباشرة تحميل من النت ,, طبعا الصورة ليست بالجودة العالية , والترجمة غير محترفة , ولكنها تقدم كل ما هو جديد
فتابعوها خاصة ان الفواصل الاعلانية قليلة مقارنة ب mbc2 و fox
11-02-2011, 09:26 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7161
من أجمل المسلسلات التى شاهدتها هو المسلسل المكسيكي "سحر الحب" بطولة الممثل المكسيكي القدير "ويليام ليفي" وبالجد مسلسل روعة ويُعرض حالياً على قناة أبو ظبي الأولى الساعة السادسة مساءً بتوقيت الخرطوم ويعاد مرة أخرى الساعة السابعة على قناة أبو ظبي الأولى +1 ومن فاتته الحلقات الأولى من المسلسل يمكنه مشاهدتها على الموقع الآتي: اضغط هنا لمشاهدة مسلسل سحر الحب
11-02-2011, 09:46 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
حنين يا اسمارت يا اختي العزيزة كلكم بتعرفو تان تان وفي بعض المجلات بكتبوه تم تم وهو في اصل الحكاية تن تن المخرج استيفن ايسبيلبرج عاودو الحنين لي الطفولة الزاهية وشركتو اشترت حقوق القصة لينزل فيلم جديد يوم 3 من شهر نوفمبر مبروك لاولاد دفعتنا الرجوع للطفولة الجميلة محبتي
11-02-2011, 09:54 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
Quote: ابو الريش.....المسلسل ظريف جدا....لكن شكلو السنسرة بفهم لدرجة انو الناس ما ملاحظة الحاص شنو.... او انا براى المعقدة و متخيله الحاجه دى فوق العادة فى التلفزيونات العربية!!!!!
ما بقدر أجاوبك، لأني ما شفتو في الـ MBC، بس عرفت إنهم عرضوهو. بشوفوا حالياً بالتنزيل في الكمبيوتر (تورنت)، وخلصت Season2 .... لكن طبعاً كلامك صحيح 100% ولا يمكن عرضه (كامل) في أي تلفزيون محترم.
في نفس الوقت، الأيام دي بشوف مسلسل إسمه (24)، رغم إني ما بحب أفلام/ مسلسلات الآكشن، لكن ده بعتبرو إستثنائي، يمكن لأنو بيدخل الواحد جوة غُرف صنع القرار الأمريكي و(الشمارات الرئاسية).
تحياتي.
11-02-2011, 01:57 PM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
عارفه رجالنا السودانين بتحسسوا من المسلسلات التركيه ((الرومنسيه))
لكن والله دا جدير بالمشاهده ويستاهل الـ 7 نجوم
مسلسل (( الف ليله وليله )) من افضل الدرما التركيه ,, مدبلج لللهجه السوريه ليصبح اسمه (( ويبقى الحب ))
المسلسل يجي فيه مية قصه معقده لكن البطوله لمهندستين وصديقتين تعملان لدى رجلا اعمال شركاء واصدقاء اول عقده في المسلسل ان الاصحاب يحبوا البطله الرئيسه ((شهرذاد)) ويحصل توتر في صداقتهم ومن ثم شغلهم شهرذاد اخفت عنهم انها كانت متزوجه ولديها ولد يعاني سرطان الدم ذلك لان قوانين الشركه تشترط التفرغ التام تحتاج لمبلغ كبير لاجراء عمليه جراحيه لابنها لكن لظروفها الماديه المتعثره تطلب قرض يرفضه (( انور )) ويستغلها لشئ في نفسه
حسيت اني بحكي في رواية عبير
المسلسل على قناتي الراي واللبنانيه الساعه 3 و4 عصرا بتوقيت مكه المكرمه
11-10-2011, 10:24 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات يا دلال شكرا على وصلا الافلام المصرية. فى افلام مصرية (و مسلسلات ) جميلة جدا. لكن.... ما تبالغى معانا كمان و تقولى لينا مسلسلات تركية ..... هسي استاذ السنى يقول علينا شنو???? و لا محمد يوسف زين??? و د. امبدة ??? ما صاح منك الكلام ده يا دلال. كلامك ليك برضوا يالنذير.... ممنوع المسلسلات الكسيكية و التركية
سلامات عمار ....شكرا على المعلومة....ان شاء الله يكونوا بيجيبوا افلام جديدية
استاذ محمد سنى دفع الله سلامات...وشكرا جزيلا على الخبرية...يااااه....ايام. i can't wait
ابو الريش...24 فعلا مسلسل جميل. لكن لو عاوز مسلسل يدخلك غرف صنع القرار الامريكي جد جد (من غير توم شمار الامؤكان بتاع طاخ طاخ ده) احضر the west wing
11-11-2011, 09:17 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
تحياتي يا اسمارت و كل سنة و أنت طيبة وعيد مبارك عليك
طبعا البوست دا انا طوالي بمر و بشوف الجديد فيهو و نحنا طبعاً بتجينا الافلام متاخرة شديد عشان كدا الواحد بس بتاع و ما بقدر يفتي في الجديد . لكن الليلة تحديداً قلته زي ما تجي تجي و اكتب عن فلم قديم جداً وعاجبني و هو فلم مات ديمون و بن أفليك الفلم اسمو غود ويل هانتينغ Good Will Hunting
الفلم دا انا عجبني جداً خصوصا دور روبن ويليامز الراجل دا فنان فنن شديد .
تاني في فلم حضرتو زماااان لسه بعتبره احسن فلم في الدنيا بالنسبة لي بس مشكلتي ما متذكر اسمو ولا متذكر اى بطل من ابطاله لكن القصة متذكره جداً جداً لو ممكن تعرفوهو لي طوالى بجي احكيها هنا زي ما هي .
تحياتي لكل اهل البوست .
11-12-2011, 09:09 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
هلا بالشباب هلا والله جاني مزاج الليلة بعد فترة طويلة اني اخش سينما مشيت لقيت immortals القال عليه امبدة فوق دخلت النسخة الـ 3 دي الزول البحب المعارك و الحركات بنفع معاه لكن غير كدة الفلم ضعيف في القصة وحتى في اداء الممثلين حتى الشخصيات المثلت دور الآلهة - العظماء يا قول ناس الترجمة :) - تعبانين وما بدوك احساس الهيبة بتاعة زيوس و بوسايدون وباقي الشباب حتى اثينا شينة وما عندها حكمة بتعريفة اضعف بكتير من 300 و من كلاش أوف ذا تايتنس ومن ثور لكن اهو بقضي ليك وقت عموما لا انصح بدخوله سينما او شراؤه او تأجيره ممكن يتنزل ملح وكان الله يحب المحسنين
11-12-2011, 10:02 PM
محمد يوسف الزين محمد يوسف الزين
تاريخ التسجيل: 02-08-2008
مجموع المشاركات: 1968
لكن ياخ إيييييك ياخ. تان تان دا مرات بحس اني حضرت زمنو في الاربعينات والخمسينات لحدت أواخر التمنينات تاريخ تعرفي على المجلة الفرنسية العظيمة. ما كنت بعرف كلمة كوميكس يعني شنو! لكن كان عندي كل المجلدات الوصلتنا من بيروت. من مكتبة "مكي" ربنا يزيد في عمرو. تان تان وزهرة اللوتس، تان تان والذهب الاسود.. اييييك ياخ ال###### سنو وعمك اب دقن القبطان اسمو منو! وعمك البرفسير اب صلعة. زمن والله. ومن القصص الظهرت على المجلة وقصص بروفسير تريك و القبطان كورتو ماتلس والمغامر برونو برازيل وكونان ودان كوبر وديفيد سبيد وحرب السيف كوريا واليابان والقصص الخفيفة ناس روبن..الخ
على العموم منذ الآن في انتظار فلم مجانين هوليود بيتر جاكسون وستيفن سبيلبيرج (ديل اتلمو كيف زاتو!) بس وجودهم الاتنين سوا معناهو في حاجة جديدة ماف شك وكل اللقطات حتكون مليانة تفاصيل. والانيميشن شكلهم شفوت برضو وعندهم رؤية جديدة واتخيل لي الانيميشن اتعمل على نظام التصوير بتاع البوينتس داك اسمو شنو؟ اللي هو الممثل بتتسجل حركاتو بعدين يمشو الكمبيوتر! وأكيد من الصور القصة في زمن تان تان زاتو ونستنى التفاصيل للحاجات القديمة ديك (أوروبا في التلتينات والاربعينات)
وحالياً انا رجعت طفل صغير واتهوست خلاص ولي يومين عامل الوول بيبر بتاعت الجهاز من البوستر بتاع الفلم. وكأني قاعد في قدام دولابي بتاع الخشب القديم داك واللامي فيهو المجلات.
كدي نلف ونجيكم بعد كم شهر بعد ما ننزل النسخة البلو راي
11-16-2011, 01:25 PM
محمد يوسف الزين محمد يوسف الزين
تاريخ التسجيل: 02-08-2008
مجموع المشاركات: 1968
Quote: دا مسلسل كل مشهد فيه دسم وعندو هدف ,, وبيني وبينك المسلسل دا فيه جنس بيوت وعربات وسماحة دلاقين وسماحة شفع
من ناحية انى مرات بحضر مسلسلات عشان اتفرج فى البيوت فانا Guilty العفش و البيوت... لكن عاد ما مسلسل كااامل....100+ حلقة
سفيان صحبى...كل سنة و انت و الاسرة طيبين. Good Will Hunting فعلا فلم لذيذ.... تعرف انا ذاتى زمان كنت بمشي السنما كل اسبوع...لكن بعد الاولاد و المشغوليات بقيت بمشي مره فى الشهرين او تلاته ومرات اربعة. و الاخبار غالبا من النت بس...خاصة و انى ما عندى اخلاق ذى ناس محمد يوسف انى افتش النت و انزل منها. عليك الله كان ما حكيت قصة الفلم....هسي بنجيب ليك خبره ده اى فلم
محمد يوسف الزين ...كل سنة وانت طيب. طبعا افلام وثائقية معانا....ليه لا. لكن افلام الامركان الوثائقية دى اغلبها فى النهاية بيجيك و جع قلب....اعمل حسابك
امس جبت تزاكر ل Wicked Musical ...العرض ح يكون فى شهر 6 السنة الجاية (لو ربنا احيانا)...لكن التزاكر بتتخاطف خطف. دى ح تكون اول Musical احضرها فى مسرح من زمن طويل جدا.
11-16-2011, 08:32 PM
ombadda ombadda
تاريخ التسجيل: 10-10-2002
مجموع المشاركات: 6736
يبدو أن فيلم Immortals لم ينل إستحسان النقاد. ساشاهد الفيلم لا لشىء سوى الاستمتاع بالمشاهد القتالية والتصوير والمؤثرات الصوتية. وهذا ما قلته فى مداخلتى اعلاه فى هذا البوست قبل عدة أشهر قبل إطلاق الفيلم. سأشاهد الفيلم فى أقرب فرصة واتيكم بانطباعى عنه. وكما قال محمد يوسف زين ان الحكاية اختلاف فى الأذواق. ولولا اختلاف الاذواق لبارت السلع. عندما كنت أشاهد فيلم ملك الخواتم Lord of the Rings بكل حواسى كان أحد زملائى جالسا بجوارى يتململ ويتثاءب.
أمر اخر هناك مدونة تحوى على مختارات من الافلام وتحوى تعليقات و reviews أكثر من جيدة وبلغة انجليزية رفيعة ومحترفة. المدونة لعضو معنا فى هذا المنبر وهو مصطفى مدثر. يمكنك متابعة المدونة للمساعدة فى انتقاء الافلام.
تمام اهو ح احكي الفلم ... الفلم بيحكي عن أسرة امريكية مكونة من أم و أب و بنت و ولد عايشين في مجتمع محلي بسيط وعادي جدا و كل المجتمع الحولهم معجب و متابع لمسلسل امريكي في التلفزيون و الأسرة بالطبع زيها زي الناس التانية برضو متابعه المسلسل دا بس بتهم بتكره المسلسل و بتحب القنوات بتاعة الأغاني و في الاساس البنت فاشلة اكاديمية و عايشه البهجة للطيش و الولد ناجح جدا جدا ... المسلسل الشاغل الناس ديل مسلسل ابيض واسود و يحكي المسلسل عن صراع بين مجتمعين مجتمع محافظ جداً و مجتمع متطلع للجديد و الحديث ... اها الفلم ماشي برتابه كدا البت في قصصه الفارغة و الولد في اجتهادو يقوموا يوم يتلاوى في الرمود بتاع التلفزيون الولد عايز يجيب المسلسل و البت عايزة تجيب قناة أغاني فجأة الولد يضغط قناة المسلسل يقوم اليحصل شنوووووو!!؟ البيحصل انو الأسرة دي كلها تتنقل داخل المسلسل و تكون هي الأسرة الوحيدة الملونة و سط خلق كلهم بالأبيض و الاسود و من هنا تبدأ الدراما الحقيقية البت تلقى و اقع جديد للصياعة و القصص بتاعته اها اي ولد من المجتمع دا يصادقه يقوم يتلون زيها ههههههه و الولد بيواصل قرايتو و يمشي يشتغل في محل فطائر الفلم دا بالجد قصتو طويلة وجميلة و المؤلف قدر سيطر تمام على ثلاثية الكتابة و الأبداع :- الدين السلطة الجنس انا عايز اسم الفلم دا لو في طريقة . معليش ما قدرته اتم بقية القصة لانها قصة عجيبة بالجد ورغم انها ما مبتذلة بس صعب اكتب عنها .
تشكرات من هنا لي عندك .
11-16-2011, 11:55 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
مسلسل The Killing من افضل المسلسلات التي حضرتها في حياتي
حيث لاول مرة نرى تحليل لمايحدث بعد الجريمة لاهل الضحايا
كيف ان مون روزي قلب حياة الاسرة تماما وقد افسح لهم مساحة كبيرة لمشاعر الاب والام والاخوة
على عكس من مسلسلات الجرائم الاخرى. اسرتني عبارة الام للبوليس حين نشرت بعض صور مسرح الجريمة في نشرة الاخبار ان ابنتها انسان تستحق الاحترام وهي ميتة كيف تنشر صورها وكأنها لا شيئ
الممثلة التي ادت دورالام كنت اتابعها في سنوات الثمانين في مسلسل Guiding Light
وهي ممثلة ممتازة المسلسل ايضا يعرض الحياة السياسية في المدينة) سياتل) والانتخابات ولاي مدى يمكن ان يصل الصراع.. تكتشف انه رغم الديمقراطية يمكن يكون هناك فساد واكاذيب وضحايا
المسلسل التاني the big c يحكي عن امرأة عرفت ان عندها سرطان لا يمكن علاجه وبدأت حياتها تتغير مسلسل ممتاز ومرح جدا الكاست فيه ممتاز جدا من اكثر المسلسلات التي اعجبتني مؤخرا.
11-18-2011, 08:42 AM
راشد يحى مدلل راشد يحى مدلل
تاريخ التسجيل: 08-22-2004
مجموع المشاركات: 338
فى ونسة مسائية مع عدد من الأصدقاء تكلمنا عن شغف كل واحد منا بشيء معين وادمانة احيانا عن نفسى صنفت نفسى مدمن افلام ( فلمنجى ) احب الحبكة الروائية فى افلام الاكشن القصة جيدة السبك فى الرومانسية السرد والتناول الموضوعى فى الأفلام التاريخة وعادة جداً ممكن احضر فيلم مرتين بدون ان يثير الامر استغرابى او يستدعى مللى افسر الامر بأنة احترام لى الموهبة مؤخراً أوصيت صديق كينى ان يشترى لى. DStv decoder بس عشان أشوف افلام غير معادة وممكررة وحديثة نسبيا اكتشفت ان هذا الدرب بجيب التورتر لدرجة مزعجة قلة الفنين المهرة لتركيب الجهاز ""شركات وكالة سودانية للشركات العالمية اقل مايمكن ان يقال عنهم انهم مستهبلين """الاشارة جات الاشارة قطعت """اتصل بى الشركة ""الليلة ويك اند .....الخ بس ربنا يعين لو فى زول عندو خبرة مع موضوع DStv خليهو بثقفنا شوية خاصة لو كان فى السودان الشقيق كسرة فى روايات كدة اتمنى ان أشوفها على شاشات السينما موسم الهجرة الى الشمال مائة عام من العزلة الخيميائى لباولو كوهيلو كدى لو فى زول عندو روايات يتمنى انو يشوفة فى السيما يتحفنا بى أساميها
11-18-2011, 09:59 AM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
يا اسمارت ياخ قسماً عظماً الفلام دا انا في يوم شاهدتو حضرته اعادتو تلاته مرات في يوم ونص و مشيت حكيت لي اصحابي كلهم لقيت و احد بس الحضروا زي كدا وبرضو عادوا . ياخ دا فلم من افلام الافلام الشاهدتها ابداع في كل شئ . ياخ شكراً انك ذكرتي الاسم و مجلبتي روابط و شكري لاخي محمد يوسف ايضاً.
Quote: وعادة جداً ممكن احضر فيلم مرتين بدون ان يثير الامر استغرابى او يستدعى مللى افسر الامر بأنة احترام لى الموهبة
سلام يا راشد و يا اسمارت تاني انا برضك (فلمنجي) و مش عادي بكرر الفلم لا لا اصلاً الفلم انا ما بشوفو كويس إلا احضرو كذا مرة ودي متعتي و اصلاً حاجة تزهجني مافي في الكلام دا . كنا مجموعة من الاصدقاء و الصديقات عملنا نادي مشاهدة للافلام الجميلة أو الافلام البتعجب واحد مننا و كان عندنا برجكتر و كل مرة ننقلوا من بيت لي بيت لانو المشاهدة حددنا انها تكون متجولة بين بيوتنا و معاها اعداد شاي شكلة بتاعة شباب و شابات فنانين و كنا نجتهد في مراسلة اصحابنا و صاحباتنا خارج السودان و تحديداً اروبا أن يرسلو لنا افلام جديدة و بشكل مستمر . و الله أياااااام يا ناس .
11-18-2011, 07:12 PM
راشد يحى مدلل راشد يحى مدلل
تاريخ التسجيل: 08-22-2004
مجموع المشاركات: 338
مساء الخير يانابرى اساسا لاتكتمل متعة مشاهدة فلم الا بعد المرة الاولى شفتة كيف فياصديقى هو فى شنو خلينا نشوف التصاوير لحياة جميلة لم نتمكن من عيشها ولقصص حب نتمنى ان نعيشها كل يوم وبيقيننا بى انتصار الخير دائماً على الشر وهذا اجمل مافى الأفلام انك تكون متأكدا من ان الخير منتصروالبطل مبتسم
11-28-2011, 08:38 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات د.نجاة....شكرا جزيلا على المسلسلات و اكيد بحكم تخصصك بتكونى بتتفرجى بعين مختلفة من عيونا The Killing سمعت بيه.....لكن ما حضرت فيه شيء.
راشد يحى مدلل....سلامات. فعلا الافلام ازواق... بالمناسبة كمان....الرويات الكبيرة دى دائما بتفشل كافلام. و (مئة عام من العزلة)...مثال قريب
سلامات يا سفيان...بختك و الله انو عندك اصحاب بيحبوا السنما. انا و زوجى كنا بنمشي السنما مع بعض طواالى...لكن بعد الاولاد و مشالهم بقينا كل زول بيمشي لوحده اعادة مشاهدة الافلام الجميلة ذى زيارة صديق قديم.....بترفع المعنويات. امس فى قعدة واحدة (تتخللها بريكات للاكل و عمله و الصلاة و كده)حضرنا ال 3 اجزاء بتاعة ملك الخواتم. it was fun
12-12-2011, 00:34 AM
محمد يوسف الزين محمد يوسف الزين
تاريخ التسجيل: 02-08-2008
مجموع المشاركات: 1968
سمارت أنا الشهيرة بـ"سمارط" من المقدرين لأعمال كريستوفر نولان. وسبق أن قلنا في مداخلات سابقة أن هوليود بعد الانجليزي كرستوفر نولان هي غير هوليود قبل كريس! لمحة تذكيرية سريعة لاعمال الرجل التي أخرجها وأذهل بها العالم:
فلم "ميمنتو" العام 2000 (بالاشتراك في الكتابة مع جوناثان نولان)
"باتمان بيقنز" 2005 (بالاشتراك في الكتابة مع جوناثان نولان، والمشاهد كلها مرسومة بواسطة فنان الكوميك العالمي "فرانك ميلر" صاحب قصة 300 و سن سيتي"
"ذا بريستيج" 2006 (بالاشتراك في الكتابة ايضاً مع الأخ الاصغر جوناثان)
"ذا دارك نايت" 2008 (الاصدارة الثانية لباتمان وايضاً جوناثان موجود)
"إنسبشن" 2010 (كرستوفر في الاخراج والكتابة لوحده، وهو يشبه تجربة ميمنتو حيث تم نقل الافلام الثلاث بينهما الى السينما أي screenplay)
تقريباً تحدثنا في السابق عن الأفلام أعلاه، واخترنا فلم "دارك نايت" في وقته كأفضل أفلام 2008 مناصفة مع فلم Gran torino لكلنت ستوود. واخترنا كذلك فلم انسبشن كأفضل فلم في 2010 وربما أفضل حبكة فلم أكشن في كل الأوقات. واعتبرنا كريستوفر كظاهرة إخراج عالمية من أفضل المخرجين الذين ظهروا في تاريخ هوليود. واخترنا كذلك شخصية "الجوكر" في فلم ذا دارك نايت كواحدة من أكثر الشخصيات تعقيداً.
دارك نايت - الجزء الثاني:
أولاً باتمان كشخصية بين أشهر ثلاث شخصيات كوميك سوبر هيرو قدمتها أمريكا واكتسحت العالم لم ترقى حقيقة لتلك المستوى. اعتمدت قصص باتمان بالكامل على سحر الشخصية نفسها وسحر أعداء باتمان نفسهم (الجوكر، الأحجية، ذو الوجهين..الخ). ولكن بين القصص الأخرى التي طالعناها ونحن صغار (النسخ المترجمة لمجلات الكوميك توزيع بيروت) لم تكن القصص هي الأفضل وكثيراً ما كان هناك نسخ غير أصلية لقصص لم يكتبها الملاك الحقيقيون للكاركتر. لذلك لم أفاجئ حينما جائت ثلاثية باتمان في التسعينيات دون المستوى (الى حد ما فلم تم بورتون الأول بطولة مايكل كيتن وجاك نيكلسون) كان جيداً وللأسف كان بسبب أداء جاك نكلسون ممثلي المفضل. أما الجزء الثاني فكان أشبه بقصص الاطفال حيث امتلأ بالسذاجة، فناً وتمثيلاً. الثالث (باتمان فور إيفر) مسلي الى حد ما مع وجود جيم كيري نجم الكوميديا في التسيعنيات الأوحد. ثم الكارثة الكبرى (باتمان آند روبن) الذي أعتبره مهزلة أضاعت فيها هوليود ما أضاعت!. وهذه الرباعية كان مسلسل الانيميشن "باتمان" انتاج "دي سي" الشركة المالكة للشخصية أفضل منها جميعاً. مضت سنوات وحمل كرستوفر نولان المشروع بعد أن وثقت فيه هوليود واصبح في استطاعته أن يجد المال الوفير ويصرفه كما يشاء على تقنيات الأنيميشن والتصوير الحديثة. وبدون ذكر تفاصيل كثيرة قصدت ان أقدم لقصة باتمان مع السينما في الفقرة السابقة لأريكم أهمية عمل نولان المتقن والذي لا يمكن نسيانه! مع تجاوز فلم "باتمان بيقنز" الذي غير نظرة مشاهدي الأفلام لسلاسل افلام منقولة من الكوميك بوكس، وألقت حمل ثقيل على كاهل من ينتجون نوعية هذه الأعمال (مثال لذلك الفلم الأخير من سلسلة سبايدر مان والذي حاولوا فيه أن يصبح عميقاً وسوداوياً كأفلام نولان في باتمان ففشلوا فشلاً ذريعاً واصبح امتداد لافلام سيئة وساذجة تقدم سبايدر مان). نتجاوز هذا الفلم ونجلس قليلاً مع الجوكر الذي أدى دوره الراحل هيث ليدجر (توفي 2008 في عمر 28 سنة).
الجوكر مثال لعمق كتابة نولان في افلامه: - الجوكر شخصية معقدة المنشأ مجهولة المنشأ. (الجوكر يخبرنا بقصتين تراجيدتين عن طفولته، والقصتين كذب، لأنه يحكيهما بنفس التأثير الدرامي)! - الجوكر واضح الهدف، ورغم أن هذا الهدف واضح وجلي الا أن تقنيات الوصول اليه معقدة. الهدف هو اثبات أن الشر موجود في كل البشر (يمثلهم سكان جوثام سيتي)، وعلى الجوكر فتح طريق للشر فقط ولا يقودك فيه.فقط يستمتع. وهو في هذا بعيد كل البعد عن "المجرم" التقليدي الذي غالباً عبر التاريخ يريد أن يشبع إما المال أو السطوة. الجوكر هنا بسخرية يشبه الشيطان في الديانات السماوية. (راجع حوار الجوكر مع باتمان داخل الزنزانة). - الجوكر أصبحت مهمته في النهاية ليست صعود الشر فقط وتعذيب البشر من الداخل وليس الخارج. ولكن كانت في اخراج شرور باتمان نفسه (لفهم هذه الرمزية راجع اللقطة الأخيرة عندما كان يمسك باتمان الجوكر في أعلى البرج)! المزيد من التعقيد موجود في الشخصية بالطبع. هيث ليدجر مات قبل عرض الفلم، وكريستوفر نفسه فكر في 2009 عندما بدأ مشروع الجزء الثاني الاستعانة بممثل كبير لأداء نفس الشخصية (كان هناك اقتراح بأن يؤدي الشخصية الممثل العظيم دانييل دي لويس)، ثم اتجه بعد ذلك (حسب مقالات منشورة في وقتها) في كتابة شخصية Mr.puzzle (الأحجية) وأن يسندها الى جوني ديب. وفعلاً بدأ هذا المشروع لدرجة أن هناك بوسترات رسمية نشرت تحمل الفكرة!.
الفلم الجديد:
يعود جوناثان رفيق درب كرستوفر والأخ الاصغر للمخرج العظيم في هذا الفلم. ويكتب معه القصة للسنما. تعود كات وومن الى افلام باتمان بالاضافة لأنه استعان كريستوفر هذه المرة بقصة جديدة منشورة في 93 ، أي بعد دخول باتمان الى السنما. وهي باتمان في مواجهة شخصية اسمها Bane (تعني الموت بالطبع) ظهرت بسذاجة تقريباً في فلم بات مان آند روبن الكارثي، يؤديها هذه المرة أحد الوجوه التي ظهرت في "انسبشن" توم هاردلي. ونحن نعرف بالطبع أن كرستوفر وفي لمن ينجح معه (ظهر كريستيان بيل في اربعة أفلام مع الرجل)، القصة الاصلية اسمها Knightfall وفيها يكسر Bane ظهر باتمان (فيزكلي وليس استعارة)، وبالاجمال تحكي القصة أو ما قرأته عنها أن باتمان واجه أشد اعداءه قسوة. في اعلان الفلم (Trailer) المفتش جيم جوردان صديق باتمان (والذي يؤديه دائماً الممثل العظيم قاري أولدمان) مكسور الظهر! ولكننا نعلم مسبقاً ان كريستوفر نولان السوداوي يعذب أبطال افلامه. الى أقصى درجة (راجع جميع افلام كريستوفر، جميعها). وباتمان بدأ أصلاً معذباً (Batman Begins) لذلك لا ننتظر كالعادة الصراع التقليدي الذي ينتصر فيه الخير على الشر! فالخير ينتصر في أفلام نولان بالطبع ولكن بعد معاناة طويلة وتعقيد هو اصل المتعة. ونهايات كنهاية فلم The prestige و Inception.
الله يحيينا لشهر 7
12-12-2011, 09:42 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
شكرا يا محمد يوسف على النقد الفنى الظريف و العميق فى نفس الوقت. بالمناسبة انا شايفه انك (عادى) ممكن تعمل ليك بلوق بتاع افلام ...اكتب فيه مرة فى الاسبوع او مرتين. و اوعدك انك ح تنجح نجاح كبير باذن الله
دارك نايت من الافلام القليلة جدا الى اجتهدت انى احضرها فى السنما فى الفترة الماضية (عهد بعد ما بقى عندى اطفال).
12-12-2011, 10:00 PM
محمد يوسف الزين محمد يوسف الزين
تاريخ التسجيل: 02-08-2008
مجموع المشاركات: 1968
الحقيقة يا باشمهندسة أن الأعمال العظيمة هي التي تفرض نفسها. ما يغيظني في الحقيقة أن هناك صرف بذخي في بعض الأفلام الساذجة والفقيرة من ناحية القصة أو الفكرة أو الحوار. الأمثلة كثيرة لهذا. أما حينما تتحد جميع العناصر (المال بالذات) في خدمة عمل يحترم العقول تصبح لوحة حقيقية.
هدية ليك مسلسل جديد كرت. جميل جدن وحضرت منو تلاتة حلقات الى الآن.
ويسترن زي الويسترن
خلي مسدسك معبى بس واربطيهو في الحزام كويس
12-13-2011, 11:11 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: ما يغيظني في الحقيقة أن هناك صرف بذخي في بعض الأفلام الساذجة والفقيرة من ناحية القصة أو الفكرة أو الحوار. الأمثلة كثيرة لهذا.
تعرف يا عابد موضوع صناعة السنما (و المسلسلات) ده محير جدا. دايما بفكر فى النقطة اللى ذكرتها فوق دى. ما اظن فى زول بيكون عاوز يصرف قروش فى فلم فاشل. اظن ان صناعة السنما ذى الطبيخ....."النفس مهم". شكلو كده المخرج و الممثلين ما بيعرفوا الفلم نجح او فشل الا بعد اول يوم فى دور العرض. شكلو الطاقم كلو لما يكون فى منتصف جوطة عمل الفلم ...ما بيكونوا فارزين الحاصل شنو. حقيقى انا ما عارفه ليه فى افلام بتنجح و فى افلام بتفشل. و فى افلام بتفشل فى السنما تماما لكن بتنجح نجاح خرافى فى الاسطوانات (بيع و اجار).
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
smart_ana2001
Rihab Khalifa
omer osman
ابراهيم احمد سليمان
ombadda
وليد الطيب قسم السيد
bob
Osama Mohammed
محمد يوسف الزين
محمد عبد الماجد الصايم
هويدا شرف الدين
محمد سنى دفع الله
فيصل نوبي
jamie-foxx.jpg)
عمار عبدالله عبدالرحمن
حامد محمد حامد
Dalal Ezzaldin
محمد أبوالعزائم أبوالريش
الصادق عوض
النذير حجازي
سفيان بشير نابرى
محمد البشرى الخضر
هشام المجمر
راشد يحى مدلل
فيس بوك
تويتر
انستقرام
يوتيوب
بنتيريست