يا لصفاقتـك ووقاحتـك ووساختـك يا والـي الخرطوم .. يا لعـارك .. !!

Quote: يا ميادة .. البتعملي فيو ده بيشبه انو زول يكون ماشي فوق الرصيف يجي واحد يطلع فيو بعربية يهرسو .. الناس تكورك في السواق تجي انت تقولي المرحوم كان سكران. أها السكران ده يعني يدقشوهو بالعربية فوق الرصيف ؟ محاولة تجريم الفتاة و ابراز صحيفة سوابق لها هي محاولة غير منطقية لسحب التضامن معها. لأنو الناس ما تضامنت لأنها بريئة .. الناس تضامنت ضد وحشية المنظر الشفناهو ده. و أقول ليك بصراحة و دوغري : هذا الفيديوالذي رأته عينيّ لو كانت البنت التي فيه تم القبض عليها بتهمة الزنا في قلب المسجد الحرام في نهار رمضان و شهد عليها جبريل و ميكائيل عليهما السلام و كانت ترتدي حين القبض عليها قلادة كتب عليها : أعل هبل. و ملابسها المنزوعة جوارها من جلد الخنزير و متعطرة بخمر معتق من عنب مسروق و مهنتها في البطاقة : مشعودة و ساحرة في مؤسسة الصد عن سبيل الله الشيطانية و في حوزتها أوراق و مراسلات سرية مع الموساد و السي أي إيه و المحفل الماسوني و تعتقد أن حلايب مصرية. بعد كل هذا فإن ما حدث في حقها جريمة و وحشية و حقها لا يسقطه أي جرم ارتكبته. فلو عندك تهم أكتر من دي ممكن تبيح تعذيب البنت بهذا الشكل و أن يستمتع جلادوها بضربها يمنة و يسرة و يضحكو و يتمازحو و هي تصرخ مستنجدة فجيبيها. ــــــــــــــــــ ميادة .. تحسسي انسانيتك. لو كانت المجلودة جولدا مائير لاقشعر لصراخها البدن.