Quote: وكل مرة أفشق زيادة لامن بقيت علي البرجل في شكل زاوية منفرجة.. ولابسلي تموت تخلي يشيل ويخم في التراب بس الكـــــــــــلب القام بال وبقى بي كرعينو يدفن في البول.. أصلي لامن وصلت البيت عضام ضهري كلهن يطقطقن من الفنسة.. وإن ما كضبت باقيلي قلم الرصاص قرب يفقشلو حاجة..
بس بعد الحالة دي ... وجدان ترد عليك كيف ...
===================== ان شاء الله قرفتك وقفلتك ... ما تفك .. اذا بطلع جنس ده ... اسعدتنا ... ياخ ....
01-23-2013, 07:32 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
سكلنس يا كافى البلا من شارع القومية لغااااااااية لكوز كدارى وكمان سكلنس ليكم حق كان بتغنوا ما بتقدر تتوب يا قلبى المودر يالطول عمرك عطوف واصلك ما بتقدر من لفحة نسيم تتلبش تودر
دى لمن الرشيد كان بيغنيها نجاة حوفى كانت بتتضارى ورا زينب التيجانى
زينب التيجانى ارجعى للبوست بسرعة , مشتاقين ليكى
01-23-2013, 12:20 PM
محمد صديق
محمد صديق
تاريخ التسجيل: 05-03-2009
مجموع المشاركات: 3990
مهداه لناس البركل عناية طارق ود جبرين في المرحلة المتوسطة (بأثر رجعي)
غناء الفناء محمد ميرغني
شوف كم زمن ما شلنا هم ولا عشت يا قلبى العذاب و سرحت فى ليل الشجون ما عرفت لى دربك مااب الحب طريق محفوف صعاب وانت لسه فى اولو ما قلنا ليك الحب طريق قاسى و صعيب من اولو ما رضيت كلااامنا و جيت برااك اهو دا العذاب اتحملو..
يا قلبى قالوا الحب عذاب و افراحو حافيها الالم فى ظلو ما بنخشى المصير فى صفاءهو ما نفقد عشم صدقنى مهما ليك ظلم ما اظن حنانو تبدلو مرت سنين الشوق معااك ولا هلا فى دنياك ربيع عانيت جحيم الحب وفاء قاسيت حلاوة الريد دموع راضى سعيد فى الويل تضيع و سير طريق ما بتوصلو
01-23-2013, 12:36 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
Quote: يا قلبى قالوا الحب عذاب و افراحو حافيها الالم فى ظلو ما بنخشى المصير فى صفاءهو ما نفقد عشم صدقنى مهما ليك ظلم ما اظن حنانو تبدلو مرت سنين الشوق معااك ولا هلا فى دنياك ربيع عانيت جحيم الحب وفاء قاسيت حلاوة الريد دموع راضى سعيد فى الويل تضيع و سير طريق ما بتوصلو
مهداة لود المهدى وكمال الشادى وقيس جمال الدين ,
01-24-2013, 05:53 PM
محمد صديق
محمد صديق
تاريخ التسجيل: 05-03-2009
مجموع المشاركات: 3990
صباح تحيه عيدنا ايوه دا بحر الشمال وفي ايام التلج اكتر مكان امان للجري ولعب الكوره هي رمال (قال حلتنا) ياكوتش والله التلج دا انا عايزو لمنصور عشان يوصفوا لينا ابوعمار نعمل شنو لازم الاولاد يلعبوا وحياتنا تستمر ونتاقلم على كل الطقوس( فرحنا بيك كل الطقوس) الطيب قال لي كنت بتلعب بالثلج في سودان؟ تلج ايه كنا بنلعب بالطين طين يعني شنو؟ يا ولدي دا تلج سودان مطره مع تراب! بيكون لونه شنو ياولدي سبحان الخالق كل ناس تلجهم زي لونهم! ااه انا فهمت. ياكوتش ماتنسى مع البودره رسل لينا عينة طين سوداني خالص. من نعم ربنا الان نازله مطره بتذوب في التلج العطل جزء كبير من الحركه.
01-27-2013, 06:33 AM
جلال عثمان
جلال عثمان
تاريخ التسجيل: 09-13-2008
مجموع المشاركات: 1735
برررررررررررررررررررررررررررررررررررد جد يا عمر عليك امان الله بقيت ارجف يا رجل نحن 6 درجات من فترة كدة كانت عايزة تلحقنا امات طه هذا طبعا مع شوقنا الكتير الدافئ . اها وكمان ابشرك الوزن نزل 4ك واللياقة تمام التمام والتمارين رغم انها غير دورية لكن اقلها 3 مرات في الاسبوع شكرا ياحبيب على الدعم اللوجستي والمعنوي وتحياتي للعيال وامهم -------- وتحية للريس والريس والكوتش وجبريلا ومنص و رش و عيد و ابوالزوز والجميع بدون فرز ------------- وهذا على سبيل (فاتحتكم) وعذرا على الغياب ... ودعواتكم يا شباب بالله
01-27-2013, 07:40 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
قال الله تعالى: "وَمَا كَانَ اللّهُ لِيُعَذِّبَهُمْ وَأَنتَ فِيهِمْ وَمَا كَانَ اللّهُ مُعَذِّبَهُمْ وَهُمْ يَسْتَغْفِرُونَ" {سورة الأنفال/33}. قال فضيلة الشيخ مشهور بن حسن آل سلمان في مجلس فتوى بتاريخ 25/1/2013: قال بعض السلف: "كيف تهلك أمة وفيها أمانان إلى قيام الساعة".. الأمان الأول: أن يكون رسول الله صلى الله عليه وسلم فينا، والأمان الثاني: الاستغفار، متى أخطأنا استغفرنا..
****************************************
منقول من موقع روّاد التميّز.
01-27-2013, 08:05 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: اها وكمان ابشرك الوزن نزل 4ك واللياقة تمام التمام والتمارين رغم انها غير دورية لكن اقلها 3 مرات في الاسبوع
كلام جميل وربنا يمتعك بالصحه. الان رغم المطر والبرد والتلج جريت واتمرنت تمريني اليومي ما في طقس بيوقفنا مادام ربنا حافظ الصحه. استغفر الله العظيم واتوب اليه. سبحان الله ياجله الان براجع في البوست وجدت مداخله منك تخصني عذرا للتاخر ادلل وانا طوع بنانك.
01-27-2013, 10:50 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
ياريس زممممان في السودان كل يوم بنلعب دافوري لما المطره تملاء الميدان بيكون مافي طريقة لعب . بيتنا واقع بالظبط عند تقاطع شارع مدني الخرطوم مع مدني سنار، وكل اللواري المحمله بالخضروات بتمر من التقاطع وقبل دخول اللوري شارع الخرطوم بتوقف عشان يكشف الشارع ، بنكون عاملين لينا كميه من حجارة الطين وبكل ادب وتحانيس بنطلب من المساعد بطيخه او شمامه او اي حاجه، اذا اعطنا نودعه بالبوسات والدعوات اما اذا رفض يودع بكميه من الطين تكفي لتحرير فلسطين. والله متعه اللعب مع الاولاد في التلج تعال لينا وجرب
01-28-2013, 10:29 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
قال رجل ;حد الحكماء : كم آكل؟ .. قال فوق الجوع ودون الشبـــع فكم أضحك؟ .. قال حتى يسفر وجهك و يعلو صوتــــك ؛ فكم أبكي؟.. قال تمل من البكاء من خشيـــــة الله ؛ فكم أخفي عملي الصالح ..؟ قال ما استطعت، … فكم أظهر منـــــه؟.. قال مقدار ما يقتدى بك، فكم أفرح اذا مدحني الناس؟ .. قال على قدر ظنك أراضي الله عنك أم غاضب. فكم أحزن إذا ذمني الناس .. ؟ قال وما يضرك أن تكون مذموما عند الناس إذا كنت محمودا عند الله ..
جلوسي أمام مرآة الحلاق الكبيره قبل يومين... جعلني أمر أمام محل الكنافة النابلسية عدة مرات دون أن تحدثني نفسي بالدخول اليه... فالوقت الذي أخذه الحلاق في محاولة اعادة اعمار وجهي... كان أكثر بكثير من الوقت الذي أخذه في حلاقة شعري... وكنت كلما أنظر الى المرآة يتسرب الى نفسي شعور بفشل محاولات الحلاق.... ها هي اللحية تغطت بالزغب...و الرموش اتخذت شكل الفراغ... و أنا مقياس رسم للتواصل و الرحيل... و أنا الآن الترقب و انتظار المستحيل... بل هي سابع المستحيلات اعادة ذلك الوجه الى ما كان عليه قبل سنوات.... فالزمن يعمل بمطرقته و ازميله راسما علاماته الغائرة كل سنة.... و عندما أيقنت بأن الحلاق يضيع في زمني بمحاولاته تلك... طلبت منه التوقف و الاهتمام بشعر الرأس فقط و ترك الشعر الأبيض كما هو... صبر شويه أرباب...هكذا خاطبني الحلاق... شوف أخوي انت يشيل شعر أبيض بكره زياده يجي.... كانت تلك كلماتي اليائسة و التي أوقفت تماما محاولاته اليائسة.... و لكن مروري أمام محل الكنافة دون الدخول اليه فتلك مسألة أخرى.... فالجلوس امام تلك المرآة الكبيرة الصادقة التي لا تخفي سرا ... يجعلك تكتشف أشياء غابت عنك بسبب التعليقات المضللة من الأصدقاء.... عندما أكون مرتديا البنطلون الواسع و القميص الواسع... تسمع تعليقات مثل ياخي وزنك نزل كتير قاعد تعمل شنو... و الواقع ان وزني لا نزل و لا حاجه و لكني أصدقهم.... مرة كنت أزور أخي محمد بعد عودته من السودان فطلب مني البقاء للغداء.... فأعتذرت له و قلت له..أنا ياخي ما قاعد أتغدى بكتفي بطبق من السلطة الخضراء... فاذا بابنه مصطفى يقول لي ...عشان كده بقيت سمين و لابس نضارات.... فضحكت ضحكة اهتزت لها أرجاء كرشي... فمصطفى ابن أخي و مرآة الحلاق يتساويان في الصدق و اظهار العيوب.... الغريب انه كلما زاد عدد الممنوعات في قائمتي كلما زاد وزني.... قائمتي التي تشمل المشروبات الغازية كلها حتى الباربيكان.... و الحلويات كلها حتى الاسنكرز الاختراع الرهيب الذي لا يقاوم.... و في كل مرة أجلس فيها أمام مرآة تزيد القائمة و لا تنقص... حتى ختمتها بالكنافة النابلسية و امتناعي عنها الذي هو أشبه بالفطام.... و قدمت التماس لست بيتي بعدم استفزازي بالملاح القرين و الكسره.... و أن تجتنب الحلويات ما أمكن ذلك...و لا مانع من مرة أو مرتان في الشهر... و ذلك حتى لا يشعر العيال بالحرمان و يتهمونني و أمهم بالبخل و الجلدنه... و أتمشى ما تسنى لي ذلك حتى و لو لعشرة دقائق في اليوم.... و لكني ما أن أجلس أمام مرآة الحلاق حتى أحبط احباطا شديدا... و أكتشف ان كل ما فعلته و أفعله بدون فائدة تذكر... حتى قررت أن لا أدخل دكان حلاق قط بعد اليوم و ان دعا الأمر أن تحلق لي ست بيتي.... حتى و ان أصبحت لا أعرف أين يتجه وجهي بعد أن تفرغ من الحلاقه....
01-29-2013, 09:14 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
واحد: لا تنتف الشعر الابيض ... وعليك بالصبغ الاسود ... فانه يرفع المعنويات ....
اتنين: لا تحرم نفسك من شئ ... وانت مشتهيه ... أي نفسك داخلة فيه .... ولكن كل القليل منه ... لان تمنع نفسك من شئ ونفسك تريده باستمرار ... فان جسمك يفرز نفس العصارات عند الشهوه ... بالتالي وزنك ...بزيد انت ما جربت منع نفسك من اشياء ... ومع ذلك وزنك زاد ... وتيب .... اذن ياصديقي كل القليل ... ولا تحرم نفسك تماما لان النتيجة هنا احسن (شويه)
تلاتة: في هذا العمر صادق ... مادون العاشرة ... لانهم في الصدق ... سيم سيم المرآة ..
Quote: و أكتشف ان كل ما فعلته و أفعله بدون فائدة تذكر..
أرى كل إنسان يرى عيب غيره ،،، ويعمى عن العيب الذي هو فيه الحقيقة مثل النحلة تحمل في جوفها العسل وفي ذنبها الإبرة وليس المهم أن يكون كلامك مقبولا المهم أن يكون صادقا
يخوي كلنا في الهوى سوى ---- المهم الصحة والعافية ونقول الحمد لله الصلعات مالحقتنا ---- ألم ترى بعض صلعات الإخوة وصلت لين المؤخرات
01-29-2013, 10:00 AM
أحمد إسماعيل
أحمد إسماعيل
تاريخ التسجيل: 09-10-2009
مجموع المشاركات: 1375
س : - طيب حاجه سودا طايرة فى السما وتقوول مياووووو ، أيه هيه ؟ ج : - غراب بيستهبل على القطه البيضاء ههههههههههههههههههههههههه
س : - طيب حاجه زرقا طايره فى السما ،، أيه هيه ؟؟ ج : -دبانه لابسه بنطلووون جينز أزرق.
س : - طيب حاجه سودا وفيها خط أحمر وطايره في السما من الشرق الى الغرب، أيه هيه ؟؟ ج : - دبانه لابسه فستان وحاطه روج أحمر ، ورايحه جواز وحده من صحاباتها .
س : - طيب حاجه سودا وفيها خط أحمر وطايره فى السما من الغرب الى الشرق،، أيه هي ؟؟ ج : - نفس الدبانه نسيت حاجه في البيت وراحت تجيبها .
س : - نقطة سودا على الحيطه أيه هيه ؟؟ ج : - دبانه.
س : - و نقطتين سود على الجدار ايه هما؟؟ ج : - أكيد فيشه.
العنوان شكله مستفز شوية.. لكن والله لي كم سنة كدة محتار جدا جدا.. في حوار وونسة مع شيخ الطيب رحمه الله قال لي حرفيا: يا ولدي أنا لا كاتب ولا روائي ولا حاجة قلت ليه يا شيخ الطيب ياخي صلي علي الحبيب دة كلام شنو.. قال لي: يا ولدي أنا كتبت بدافع الحنين لا أكثر حسيت إنه أنا اتنكرت للبيئة الأنا جيت منها ما كان في أي سبب يخليني أطلع من الحتة الأنا حبيتها بي عمق كبير.. جيت عشت في عالم ما حقي.. في بيئة بعيدة من الحاجة الكنت عايش فيها ياخي عشان كدة لمن بدأ الحنين يتعبني بديت أكتب من «نخلة على الجدول» وإنت ماشي أبدا ما كنت بكتب من أجل الكتابة... كنت بحاول أكتب كنوع من مد الجسور مع عالم جميل أو ممكن تقول فردوس كنت أنا بحبه جدا.. عالم كنت منغمس فيه بكل حواسي ووجداني وما كان في سبب منطقي واحد بيخليني أهرب أو أبعد منه.. فكل ما كتبت يا ولدي هو كان عبارة عن جسر لهذا العالم.. كنت كأنه بخاطب البيئة الأنا جيت منها.. عشان كدة ما بكون مستمتع بالإطراء والنقد والهيلمانة العاملنها الناس دي فيما كتبت على علاته الحاجة دي كنت بحس إنها فيها نوع من التقريع... جواي كان في نوع من ألم الحنين.. عشان كدة لو لاحظت لي ما بحب أقعد في الجلسات الأدبية وجلسات النقد.. بحس بنوع من الألم كدة.. هذا الكلام قاله لي الطيب صالح شخصيا ولحسن الحظ عندي مسجل.. نفس الفكرة ذكرها لي محمد شكري رحمه الله.. اذكر كنت بعمل ليه في تصميم لي كتاب «زمن الأخطاء».. فقال إنه كتب بعد ما حس إنه ما يحمله جواهو اتعبه جدا جدا انا يا حبيبي لم أعش حياة.. كانت مأساة.. مأساة موغلة في الألم.. عشت على الهامش وهامش الهامش من الحياة.. حسيت انه أنا مخنوق يا طارق.. ولكي أعيش كان لازم إنه شخص ما يحمل عني هذا الألم لذا فكرت في إنه أفضل حاجة أكتب عشان أوزع هذا الألم على الكون كله وكان سيفيض يا ابني.. بعد ما كتبت مأساتي حسيت إنه أنا ارتحت نوعا ما.. ما عاشه شكري صك اتهام كبير للإنسانية جوانا.. السؤال الذي خامرني وودت ان نشترك في الإجابة عليه جميعا.. هل الكتابة مرتبطة بنوع من الألم جوانا؟؟ يعني لولا الآلام دي ما كان حا تكون في كتابة؟؟ لولا ألم الجغريو مثلا ما كنا حا نستمتع بـ«أنا حاولت أنساك قلبي زاد في جروحو»؟؟
01-30-2013, 01:35 PM
منصور عبد الرازق
منصور عبد الرازق
تاريخ التسجيل: 05-03-2009
مجموع المشاركات: 2360
زيك يا مسيخيت , اما الكتابة , فهى ضرب من ضروب التنفس , ولكنها تنفس عكسى فى اوقات عديدة , فما كل ما يدخل الى الجوف اكسجين , وما كل ما يخرج منها ثانى اكسيد كربون , وعمليات الايض والأحتراق الداخلى الناتجة من تنفس الكتابة يا طارق , عمليات معقدة جنس تعقيد , ما شفت ليك ناس قدر ما ياكلو و عاملين زى دعاية الجوع , كما ان بعضنا و الزبادى ده يعمل فيهم عمايل , لكن معايير النجاح للشىء المكتوب ده , تدخل فيهو عوامل كتيرة جدا , اهمها هو من يقرا نفسه , كيف يقرا ولماذا يقرا ومتى يقرا , سبحان الله , عندما تبلغ قمة انسجامك مع ما تقرا , وهى لحظات بتاعت تناغم خرافية يا طارق , تشبه - فيما تشبه- عملية تنفس جماعى , مواده الداخلة واحدة , ومواده الناتجة كذلك , لذا ما تستغرب لمن تصل الحتة دى , تشعربى نفسك انت مش الكاتب زاتو بس , لا بل وتزيد على ذلك بتخيل انك شخوصه وامكنته وزمانه لا بل وشعوره كمان , واضح ان الطيب صالح كتب فى محاولة تشبه استعادة الزمان والمكان الماضى , تشبه تشظى البنى آدم الى اتنين , واحد هسى وواحد زمان , واحد نايم وواحد صاحى , واحد حالم وواحد واقعى , واحد لابس بدلة تلاتة قطع , طالع من ثنايا زول ما بيعرف غيرالعراقى , دكتورجيكل ومستر هايد للى عندهم حدود خيال بيشوفو بعدها اى زول اتخطاها , مصاب بشيزوفرينيا من نوع مختلف , نوع يخليك تنفصم مع نفسك , ضدها ومعاها وبموازاتها , وبعد داك ابداعك الناتج ده , كل يراه بعين نفسه وحالته يا حبيب , الكتابة عمل ابداعى -هكذا يراه كل الناس - غير ان منتج هذا الأبداع المولود , لا يراه , الا كما قال لك الطيب صالح , هسى انتا ذااااتك ده , تجقلب لينا ما بين حفرالدخان وريحة الطلح , ثم بين دهاليز حبوبتك وعمتك , وذكريات مدرستك الوسطى وجامعتك الزقازيقية العشتا فيها بيطرى بتاع انتى بايوتيكس , الى كونك (فوتو شوبر) درجة اولى , يخطط لى اخبار اليوم شكلها بتاع كل يوم , ويصمم اغلفة لى ناس محمد شكرى , ويصلح سراير ويجلد عناقريب ويكسر طلح ومحل ما يمشى الهبوب تباريهو , امشى كده عامل راسك الدلجة وكرعينك المكعوجات ديل
* ولقيت شنو فى المرايا ؟؟؟ * مرة سبعتاشر ومرة اتناشر؟؟مش على كيفو ؟؟؟
01-30-2013, 09:12 PM
عمر نملة
عمر نملة
تاريخ التسجيل: 11-08-2009
مجموع المشاركات: 2550
Quote: تشبه تشظى البنى آدم الى اتنين , واحد هسى وواحد زمان
اقابلك في زمن ماشي وزمن جاي وزمن لسه اشوف الماضي فيك باكر اريت باكر يكون اسه
Quote: واحد نايم وواحد صاحى ,
انت صاحي ولانايم ولا انسان انت حكمه ولا ايه ولا طرفك من طبعه نعسان
Quote: واحد حالم وواحد واقعى
بحلم معاك انه الحزن سكة سفر راحت بعيد
Quote: واحد لابس بدلة تلاتة قطع , طالع من ثنايا زول ما بيعرف غيرالعراقى
الناس في العروض مابيقسوها بي تيبانا لا يغرك لباسه والعروض عريانه ناس الحقيبه وعمر الطيب الدوش وابونا الصالح طيب ومنصور وودجبريل وكله الكتيبه الزقازيقيه عباره عن نقطه بتتوسع ودوامه بتبلع من يدخلها سواء برضاه او عدمه. مش برضوا قال مصطفى سعيد ان يجنب الاولاد السفر لانه مرض عضال.
01-31-2013, 07:34 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: السؤال الذي خامرني وودت ان نشترك في الإجابة عليه جميعا.. هل الكتابة مرتبطة بنوع من الألم جوانا؟؟ يعني لولا الآلام دي ما كان حا تكون في كتابة؟؟ لولا ألم الجغريو مثلا ما كنا حا نستمتع بـ«أنا حاولت أنساك قلبي زاد في جروحو»؟؟
يا حبيب : الكتابة فضْفَضة ...
وقال أحدهم ...وأظنّه النضيف :
" يُولَدُ الإبداع من رحم المعاناة "
وأشد الآلام هى آلام النفس ......
************************************
زمااااااااان ....فى شقة الفلسطينى لما ( يحرقك ) بالليل..مش
كنت بتفتش الأوضة المُضاءة بالشمع ( وتِنْبَهِلْ ) ما شاء الله لك .
01-31-2013, 07:56 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: زيك يا مسيخيت , اما الكتابة , فهى ضرب من ضروب التنفس , ولكنها تنفس عكسى فى اوقات عديدة , فما كل ما يدخل الى الجوف اكسجين , وما كل ما يخرج منها ثانى اكسيد كربون , وعمليات الايض والأحتراق الداخلى الناتجة من تنفس الكتابة يا طارق , عمليات معقدة جنس تعقيد , ما شفت ليك ناس قدر ما ياكلو و عاملين زى دعاية الجوع , كما ان بعضنا و الزبادى ده يعمل فيهم عمايل , لكن معايير النجاح للشىء المكتوب ده , تدخل فيهو عوامل كتيرة جدا , اهمها هو من يقرا نفسه , كيف يقرا ولماذا يقرا ومتى يقرا , سبحان الله , عندما تبلغ قمة انسجامك مع ما تقرا , وهى لحظات بتاعت تناغم خرافية يا طارق , تشبه - فيما تشبه- عملية تنفس جماعى , مواده الداخلة واحدة , ومواده الناتجة كذلك , لذا ما تستغرب لمن تصل الحتة دى , تشعربى نفسك انت مش الكاتب زاتو بس , لا بل وتزيد على ذلك بتخيل انك شخوصه وامكنته وزمانه لا بل وشعوره كمان , واضح ان الطيب صالح كتب فى محاولة تشبه استعادة الزمان والمكان الماضى , تشبه تشظى البنى آدم الى اتنين , واحد هسى وواحد زمان , واحد نايم وواحد صاحى , واحد حالم وواحد واقعى , واحد لابس بدلة تلاتة قطع , طالع من ثنايا زول ما بيعرف غيرالعراقى , دكتورجيكل ومستر هايد للى عندهم حدود خيال بيشوفو بعدها اى زول اتخطاها , مصاب بشيزوفرينيا من نوع مختلف , نوع يخليك تنفصم مع نفسك , ضدها ومعاها وبموازاتها , وبعد داك ابداعك الناتج ده , كل يراه بعين نفسه وحالته يا حبيب , الكتابة عمل ابداعى -هكذا يراه كل الناس - غير ان منتج هذا الأبداع المولود , لا يراه , الا كما قال لك الطيب صالح , هسى انتا ذااااتك ده , تجقلب لينا ما بين حفرالدخان وريحة الطلح , ثم بين دهاليز حبوبتك وعمتك , وذكريات مدرستك الوسطى وجامعتك الزقازيقية العشتا فيها بيطرى بتاع انتى بايوتيكس , الى كونك (فوتو شوبر) درجة اولى , يخطط لى اخبار اليوم شكلها بتاع كل يوم , ويصمم اغلفة لى ناس محمد شكرى , ويصلح سراير ويجلد عناقريب ويكسر طلح ومحل ما يمشى الهبوب تباريهو , امشى كده عامل راسك الدلجة وكرعينك المكعوجات ديل
* ولقيت شنو فى المرايا ؟؟؟ * مرة سبعتاشر ومرة اتناشر؟؟مش على كيفو ؟؟؟
الْلّهمّ اجعلها أمطار خيرٍ وبركة .
01-31-2013, 08:01 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
الحمد لله واهب النعم ... له الحمد والمنة ... حيث انضم مصطفى الى اسرتنا الصفيرة ونورها بميلاده في يوم الخميس 19/ربيع الاول الموافق ل 31/01/2013 في تمام الساعة التاسعة مساء ... الوالدة و مصطفي والحمد لله بخير وصحة وسط حفاوة واستقبال كبير من اخوانه
الف مبروك يا جلال ويتربى في عزكم
ربنا يديم لكم الصحة ولأمه ويديكم طولة العمر
لتشاهدوا هذا الفارس الجديد كبر وصار رجال كبير
02-02-2013, 11:52 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
الحمد لله واهب النعم ... له الحمد والمنة ... حيث انضم مصطفى الى اسرتنا الصفيرة ونورها بميلاده في يوم الخميس 19/ربيع الاول الموافق ل 31/01/2013 في تمام الساعة التاسعة مساء ... الوالدة و مصطفي والحمد لله بخير وصحة وسط حفاوة واستقبال كبير من اخوانه
سلام ياشباب نرجو التوضيح من الذي رزق بمولود ولدنا جلال عثمان لا اب شنب (زهير الزناتي) .... كما كتب في الفيس بوك ...
عموما مبروك الفارس الجديد ... يتربي في عزكم ...
02-03-2013, 07:16 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
مبروك يا جلــــة المولود يتربى فى كنف العائلة و عزك والف الف حمد الله على سلامة المدام
وربى ما تحرم بيت من الاطفال
بس كنت عاوز ارشح ليك شوية اسماء من عندنا تبدأ بحرف الميم زى ميسرة او منصور او محمد الهادى او محمد ادم
وحتى محمد عيد .....
،،،،
يا نجيلة جاتنى الرسالة من جلال مساء الخميس و باصيت الرسالة للريس ميسرة موقعة باسم جلال عثمان .... اتصل قال لي مبروك المولود ... ضحكت قلت ليهو انا جابو لي مولود قبل 6 شهور ، كيف نجيب تانى بالسرعة دى .....
02-03-2013, 08:23 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
لكن يا اب شنب الكمين بتاعك ده ... انا ماقربت اقع فيهو عموما ألف مبروك لولدنا جله السكر يتربي في عزكم.... انا قلت اب شنب "كسر" يد ابتهاج وبتنا حامل ؟؟؟؟!!! طبعا قاصد زمان ايام عيد الاضحي ... عشان مايجي واحد مخلوع يكفر ليها تاني ... ده لو حصل ماكان جبنا جداد الوادي ينتف ليك شنبك صوفه ... صوفه ... مبروك مرة ثانية ... المولود ابن النيل الازرق ...
تسلم ياريس وياريس والحمد لله رزقنا بمصطفي وانضم عضو جديد لامبراطورية ميم تسلموا اخوتي من كل بلاء ونسأل الله ان يمنحنا الصحة والعافية لنقوم بتربيتهم على اكمل وجه -----------
Quote: بس كنت عاوز ارشح ليك شوية اسماء من عندنا تبدأ بحرف الميم زى ميسرة او منصور او محمد الهادى او محمد ادم وحتى محمد عيد .....
عبدالدائم ... مباركتك ما بناباها لكن الفيك اتعرفت دايرني اقنع من الولد ولا شنو .... قال محمد الهادي او محمد آدم هذا فيما يخص المدعويين اما ميسرة ومنصور والله لينا الشرف محمد عيد خلي يشوف طريقة يتخارج بيها من الخروف المحمدو --------- ابوالزوز ... يا بتاع الكمين ووقع موسى في الكمين ... لو ما جى حكى فتوا بالله
02-04-2013, 09:15 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
أشكركم جميعا بدون فرز على السؤال.... موجود و بكثرة و الله..... و لكن خلوني أكلمكم بصراحة حقت آخر الليل... كنت أكتب الموضوع و أقوم أنزله في البوست هنا و مربع كاي و الفيس بوك في نفس الوقت.... مربع كاي يحظى بقراء ثابتين يبلغ عددهم تقريبا ال20 يوميا أو يزيدو... دون أن يتداخلوا لأنهم غير أعضاء في المنبر... هذا العدد ثابت و أنا أكتب لهم دون انقطاع الا في بعض الأحايين للانشغال... هنا قد تجد تعليق أو اثنين على الموضوع...رغم ميزة بقاء الموضوع لفترة طويلة.... و أحيانا يمر الموضوع دون أي تعليق مما يسبب احباط شديد... صحيح ان المواضيع هايفه و لا تسمن أو تغني من جوع.... و لكنها تبقى محاولات لكسر الجمود و تحريك البوست.... في الفيس بوك تنزل الموضوع بالصباح آخر الليل تجده حقق أرقام قياسية من المداخلات.... حتى تلك التي أكتبها على حائطي و أخص بها أقرب الناس تحقق أرقام قياسية.... و ان كانت المداخلات على سبيل المجاملة الا انها شيء مشجع و تدفع لمزيد من الكتابة... بمقارنة بسيطة نجد أن الفيس بوك أصبح أكثر جذبا و تحفيذا رغم سرعة ايقاعه... و رغم ان المواضيع لا تبقى أكثر من يومين.... و كنت أعتقد انه مكان للبوستات السريعة و للشات أكثر منه للمواضيع الطويلة... و لكنني وجدته يحتمل كل ذلك بوستات طويلة و أخرى سريعة و ثالثة (تيك أوي).... لذك تجدني أصبحت أقضي وقت أطول هناك مع من يتجاوبون معي... و أمر هنا من وقت لآخر بسبب الانتماء لهذا المكان الذي انطلقنا منه أول مرة.... و للمجاملة بسطر أو سطرين و حتى لو نزلت سطور كتيرة لا أهتم كثيرا بما يأتي بعدها... هذا الشعور ينتابني منذ فترة طويلة و أكتر من مرة أكتب هذا الكلام ثم أمسحه و أخرج.... خوفا من أن يفهم خطأ و يحمل أكثر مما يحتمل... أو يظن انني أتطلع الى أمر شخصي بأن يأتي الناس و يمدحوا كتاباتي.... و لكن الأمر ليس كذلك انما حبيت أقول ليكم بصراحة و شفافية شديدة جدا.... أنا لا أشعر بنفس تلك المتعة التي كنت أشعر بها هنا من قبل... و أمر من هنا من أجلكم أنتم فقط....
أرجو أن لا أكون قد كنت جارحا فيما قلت بشفافية و صدق....
02-05-2013, 09:48 PM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
والله يا رشدي عايز اعلق لكن شهادتي مجروحة في الموضوع ده بإعتباري من أنصار الفيس بوك .. رغم اني شايف البوست في الفترة الأخيرة بقي مشجع وفيه مداخلات كتيرة .... وأعتقد أن النقاش في الموضوع لا يسبب جرح أو احراج لأي شخص في النهاية ليس الهدف البوست أو القروب وإنما الهدف هو اللمة الحلوة والعلاقة الجميلة بين الناس ....
02-06-2013, 05:34 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
مافي شك يالرشيد الواحد لما يكتب مداخلة بفرح لتداخل وتعليقات الآخرين ... والفيس بوك يرضي الناس من هذه الناحية ... ولكن هذا البوست لو تداخلت الناس زي الاول ... ولم يهجر سوف يكون له رونقة ومتعته الزمان ... اضف لذلك عملية التوثيق .. فكل مايكتب هنا موثق وموجود يمكن ان ترجع له بسهولة ... لو انت هجرت المكان مثل غيرك ... او تكتب باحباط ولا تهتم بالرجوع والتعليق ... فمن ينهض بهذا البوست ... كلكم تعبتم وحفرتم بالصخر حتي كانت لنا كينونتنا في سودانيزاولاين ... وصار لنا نافذة ثابتة ... بفضل جهودكم وتضافركم ومشاركاتكم ... بدل هذا الاحباط ... يارشيد القوم حفز من تعرفهم ... وابدأ بست بيتكم ... خليهم يعملو مداخلة واحدة حتي لو في الاسبوع ... وشوف متعة التواصل والونسة هنا ....
عندي شوية محاولات ومفاجاءات .... قريبا ...
احبائي حفز الحوليك والبتعرفهم بالتداخل قدر الامكان هنا ... وسوف تتولد متعة التواصل ... والونسة الجميلة بكل ضروبها ...
هنا حوشنا ... هنا دارنا .... هنا الامان والاطمئنان ... هنا التوثيق الحقيقي ...
تسلمو كلكم .....
02-06-2013, 06:52 AM
عمر نملة
عمر نملة
تاريخ التسجيل: 11-08-2009
مجموع المشاركات: 2550
Quote: وأعتقد أن النقاش في الموضوع لا يسبب جرح أو احراج لأي شخص في النهاية ليس الهدف البوست أو القروب وإنما الهدف هو اللمة الحلوة والعلاقة الجميلة بين الناس .
فعلا اللمه الحلوه او الانسحاب والصراحه ومايكون في اي اخد في الخاطر . ومن تجربه هناك كثر انسحبوا من البوست سواء بسب او غيروا .
Quote: مافي شك يالرشيد الواحد لما يكتب مداخلة بفرح لتداخل وتعليقات الآخرين ... والفيس بوك يرضي الناس من هذه الناحية ... ولكن هذا البوست لو تداخلت الناس زي الاول ... ولم يهجر سوف يكون له رونقة ومتعته الزمان
الرونق ياابو عمار بيرجع واكتر بس تصفى النفوس اول باول ومايكون في تراكم لانه خط الرجعه بينقفل تخريمه حاولت مع كل العرب والاتراك عشان اخد سر مهنة الخبز العربي والتركي لكنهم قفلوا كل الابواب في وجهي . وفتشت في الانترنت وقدرت حسنت من المهنه لكن سمح القول في خشم سيدوا. ساعدوني في التواصل مع اصحاب المخابز الشاميه والتركيه. اكيد بحبكم
02-06-2013, 07:29 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: و لكن الأمر ليس كذلك انما حبيت أقول ليكم بصراحة و شفافية شديدة جدا.... أنا لا أشعر بنفس تلك المتعة التي كنت أشعر بها هنا من قبل... و أمر من هنا من أجلكم أنتم فقط....
أرجو أن لا أكون قد كنت جارحا فيما قلت بشفافية و صدق....
يجب أن نتوقع هنا جميعاً ولنتحدث بصدق وشفافية كاملة
وبدن رتوش ،،،،
أولاً كلام رشيد القوم مخيف كثير ومقلق أكثر ،،، لماذا؟؟؟؟
لأن الرشيد من الأعمدة الثابتة والمريحة في مجال الكتابة في البوست
أو في المنبر الخاص بناس الزقازيق سوى كان الناس قرأت وأنبسطت فقط
أو تداخلت بالكتابة لأن التوثيق والأرشفة التي يقوم بها ناس الزقازيق
ومن ضمنهم الرشيد هي لنا حاضراً وللأجيال القادمة من أبناء الزقازيقاب
تخيل ربنا مد في عمرك ووصلت الثمانين وأصبحت جلكين وعندك فراغ كبير
وأولادك وبناتك في مشغولياتهم الجديدة وأنت تتكي على وسادة وتفتح
مربع كاي أو لمن فاتهم الإستماع بالله كيف تكون المتعة وتمضية الوقت؟؟؟
*************************************
لنعود ونتكلم بأكثر شفافية
02-06-2013, 07:53 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
%100 يا ريس يا أصلي ... كلنا مسؤولين من البوست ده ... ومشاركاتنا هي روح البوست ... واي عزوف من المداخلات لأي سبب ... فحتما هي وأد لهذا التلاقي الجميل ...
================================ غايتو يا نملوز ... والله انا البعرفو ... انو الريس ميسرة بتاع خرفان ولحوم ... رشيد القوم بعرف الحلاقين وبتاع المكتبة ... انا بتاع طوب واسمنت ومقاولين ... الكوتش بتاع قطرات ... عبد الدايم بعرف البصارين ..(جمع بصير بتاع الكسور ووجع العضام ... غايتو خباز دي كدي شوف محمد عيد ولا اب شنب (ديل بشترو عيش كتير ...
جايكم تاني ....
02-06-2013, 11:07 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: والله يا رشدي عايز اعلق لكن شهادتي مجروحة في الموضوع ده بإعتباري من أنصار الفيس بوك .. رغم اني شايف البوست في الفترة الأخيرة بقي مشجع وفيه مداخلات كتيرة .... وأعتقد أن النقاش في الموضوع لا يسبب جرح أو احراج لأي شخص في النهاية ليس الهدف البوست أو القروب وإنما الهدف هو اللمة الحلوة والعلاقة الجميلة بين الناس ....
زماااااااااااااااااااان كان فى فنّان بيغنى بالرِّقْ ...ومعاهو كورس ...
بيقول :
هم السبب فى أزايا .
الكورس بيردد بعدو :
هم السبب . ************************* دى الفكرة .
02-06-2013, 12:12 PM
منصور عبد الرازق
منصور عبد الرازق
تاريخ التسجيل: 05-03-2009
مجموع المشاركات: 2360
أحي صمود الكوتش في هذا البوست أحي صمود رشيد القوم وهو يكتب في كل الإتجاهات أحي صمود ود جبرين وهو يشتت المداخلات يمنه ويسرى كيفما تتفق أحي صمود منصور عبدالرازق وهو كاتب كبير ومشارك في كل المواقع أحي صمود الريس ود نجيلة ودفعة البوست إلى الأمام أحي صمود نملوز والذي تحمل معنا إجحاف كثير من الزملاء بحق ابوهم الكبير هذا البوست أحي صمود عبدالدائم النضيف الظريف وهو يقاتل هنا وهناك أحي صمود محاولة أختنا إحسان عبدالعزيز للتواصل من داخل السودان(أحسن من ناس أم صيقعون الجاك) أحي صمود ومناوشات مبارك ود جادين من مكمنه في الجنوب أحي صمود فنانا الكبير والعلم المؤثر في الداخل والخارج محمد ود عيد أحي صمود كثير من رجالاتنا الأشاوش وخاصة ناس الرياض
**************
أحي هروب كثير من فلذات أكبادنا ورجالنا المؤثرين وتزوجوا بالمدعو الفيس بوك مع العلم بأن الشرع حلل أربعة
02-06-2013, 01:19 PM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: أحي صمود نملوز والذي تحمل معنا إجحاف كثير من الزملاء بحق ابوهم الكبير هذا البوست
ياريس يا كبيرنا ان شاء الله ما نعدمك وعلمنا وادي الناس الهارب من حبنا بالحته الفيها الشكولاته. اما نملوز امسكه من اضانه وقول ليه شمال يمين بس اعمل حسابك ماتفكه بجري بسرعه 18 كم/س. اسمع القصه دي عن من تحب وعن من يحبك. مؤذن المسجد ماشي عشان يؤذن لصلاة الصبح وقبل مايصل المسجد حصل واحد سكران راقد في الواطه وبيقول اللهم صلي وسلم على سيدنا محمد، على طول ضربه برجله وقال ليه: دا فم يذكر الرسول صلى الله عليه وسلم؟! وصل المؤذن المسجد وقبل مايؤذن لصلاة الصبح غفا وشالته نومه شاف فيها رؤيه فيها الحبيب عليه افضل الصلاة والسلام وقال ليه: ياهذا انت تحبنا وذاك نحبه. شفت كيف المكانه . تخريمه
Quote: يا نملوز ...ما تسأل النسوان الجاريات وراك ديل . الصورة دى ذكرتنى ستات الودع ... اتخيل ست الودع تقول ليك يا نملوز يا ولدى بنات الصُّرة ديل مالِن جاريات وراك؟
ياكوتش خلي ابوعمار يرسل ليك السباق الاصلي عشان ست الودع تقول لي يا ولدي الصره ولا صمة الخشم!!
Quote: الكوتش بتاع قطرات ...
ابو عمار اعمل تحديث لمعلوماتك القطرات بقت بدره.
Quote: أكتب يا رشيد يا عظيم والله نحب نحبك في الله
وانا زاتو ياجماعه شوفوا لي تلفون الخباز والحلويات نملوز ناوي يفتح المحل واخترت اسم مكاموكا. ومنتظر المصمم ابو عيد. طيب ياابوعمار خليناك من الاتراك شوف لينا الانجيره والكسره. تضحك ضمنتها وجيتك في التخصص المباشر تقول سيخ ومقاولات قول الكلام لواحد ماعندو صره.
02-06-2013, 09:24 PM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: أحي هروب كثير من فلذات أكبادنا ورجالنا المؤثرين وتزوجوا بالمدعو الفيس بوك مع العلم بأن الشرع حلل أربعة
لا فض فوك يا ريس ميسرة ريحتنا ... اوفيت وكفيت اوجزت فاختصرت الوضع في السطرين ديل ...
هنا زي حوش ابونا وامنا (حوش الاسرة الكبير) مهما كبرنا او تشتت بنا السبل لابد ان نتلاقي هنا ... زي لمة الاسرة يوم الجمعة دايما بتكون وين .... وتيب ...
ونقول للحلوين الجافونا ...
غيب وتعال تلقانا نحنا يانا نحنا ما غيرتنا ظروف ولا هزتنا محنه كم بعنا في الغرام وإشترينا غير هواك ما ربحنا يا حبابنا يا شبابنا يارباطنا يا سمحنا
غيب وتعال تلقانا بي نفس الايادي الراجفه مشتاقه في ساعة سلامك غيب وتعال تلقانا بي نفس المشاعر الطيبه الديمه تطرب من كلامك غيب وتعال تلقانا بي نفس القلوب الياما حزنت لما فقدت إبتسامك
والله في بعدك يا غالي لا غنينا ولا إنشرحنا يا حبابنا يا شبابنا يارباطنا يا سمحنا تعال لي ليالينا البواكي الكانت بتطرب يا زين يوم تجينا بالخطى الواعده ورزينه
لا نسيناك وإسترحنا لا لقيناك وفرحنا غيب وتعال تلقانا نحنا يانا نحنا
ان شاء الله يطيب ... بس انت كتر من الزي ... ده .. يسلم قلمك البنقط عسل ... يا كوتش ..
==================================
Quote: ياجماعه شوفوا لي تلفون الخباز والحلويات نملوز ناوي يفتح المحل واخترت اسم مكاموكا. ومنتظر المصمم ابو عيد.
يا نملوز ... أحييك على صمودك في البوست ... والحياة والله فرحان ليك شديد ... خططت ... فتعبت ... ونفذت ... ونسأل الله ان تحصد نجاحات تعبك ... الصمود والطموح الزي ده ... بعجبنا بالحيل ...
Quote: طيب ياابوعمار خليناك من الاتراك شوف لينا الانجيره والكسره. تضحك ضمنتها وجيتك في التخصص المباشر تقول سيخ ومقاولات قول الكلام لواحد ماعندو صره.
هاهاهاهههه ... انا من يسأل عن الانجيرة ... وعندك مساي يازول اضرب تلفون او تعال بالباب لرشيد القوم ... يوصف ليك الانجيرة مع سلطة الاسود ... باصولا ..
او اقول ليك الكلام الصاح .. سوق اخوك منصور وامشو اديس ... احتمال كبير تفتح المحل هناك ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة