(براءة من الله ورسوله ) .. بيان هام من لجنة الأطباء حول الطوارىء الطبية

Quote: أخى العزيز عاطف قريت البوست كاملا ...حسب ما جاء فى مداخلتك القيمة انت من وجهة نظرك ووجهة نظرى البتتفق معاك هنا عداك العيب... من ملابسات الموضوع السادة الاطباء ما فضلو حاجة فى قضيتهم بس زى ما قلت اضعفوها بالاضراب عن الطوارئ ودى نقطة يمكن ما حسبو حسابها .. أقتبست مدخل الأخ محمد قرشى عباس ( ونحن إذ يحال بيننا والنهوض لخدمتكم في الطواريء كمن حيل بينهم وبين مايشتهون .. فلقد أدّينا جميعنا قسما غليظا بأن نكون عند كل طاريء يلم بالعدو قبل الصديق .. و علينا اليوم أن نبرّيء ذمتنا أمامكم و أمام الله .. فاسمعوا قصّتنا واحكموا وكفى بكم وكيلا وحسيبا) حتة القسم ( كل طارئ يلم بالعدو قبل الصديق ) يعنى القسم هنا يا عزيزى الدكتور محمد كان من أجل المريض عموما" وهو هنا المواطن المغلوب على أمرو زيكم فى حالتكم دى ...وجهة نظرى تطابقت مع وجهة نظر الأخ العزيز عاطف هنا فقط ...يعنى المريض هو الهدف الأسمى من كل الحقوق اللى أنتو حاليا" بتطالبو بيها و الوزارة رافضة تلبيها ليكم .ما دخلت هنا عشان اشكر وزارة الصحة ولا القايمين على الأمر فى بلدى لانو صراحة مثلنا البلدى البسييييط بقول ( ما تشكر لى الراكوبة فى الخريف ..!!! ) و راكوبتنا هنا النصيحة ما بتتشكر لا فى الخريف ولا فى كل الفصول عاطف أتعامل بعاطفة مع موضوع اضرابكم عن الطوارئ زى معظمنا ...مطالبتنا ليكم بالنظرة المتجردة ما بتنفى قطعا" قناعاتنا بأسباب الاضراب الموضوعية ..بس كمان أسمح لى أقول ليك حتى الأطباء المفروض هم ملائكة رحمة فى بلدى معظمهم غير ذلك حتى هم يا سيدى ليهم ( قبحهم ) الخفى .الا من رحم ربى ..الحقل الطبى عموما اتردى بصورة مؤلمة ومؤسفة هنا كل الدكاترة بقو يميلو للخاص ..الدكتور بفضل يشتغل فى عيادتو الخاصة اكتر ، تعال شوف المستشفيات الحكومية مقارنة بالمستوصفات الخاصة خدمات 5 نجوم هنا وهناك صفر حتى فى الخاص بى حقك أحيانا" بكون فى مشاكل ... بقى مافى ذمة وضمير ولو ما معاك ما بتتعالج هل تتخيل أنى عملت عملية لوز بمبلغ وقدرو فى مستوصف خاص بالرغم من وجود مستشفى حكومى متخصص فى الحاجة دى ( جراحة الرأس و الأنف و الأذن والحنجرة) بس حتى هنا فى حق الحكومة العمليات ما free عرفت أنو فى خاص بى 500 جنية دا مع غرفة خاصة لعملية 24 ساعة فقط ..و العام حق الحكومة يعنى بى 300 بدون تأمين وبتقل القيمة مع وجود تأمين صحى ..!!! ..يعنى حاجة مجانى لله و للمواطن مافى ..!!! حتى الطوارئ الانتو بتقولو عليها دى بتمشى بتشترى الحقنة والشاش و الدرب وووو و الدكتور عليهو يكشف عليك ويديك الوصفة وبس ..!!! حتى البلاستر البلصقو بيهو الدرب بتشتريهو الاطباء حتى لو طلع فيهم المتجرد من نظرتو المادية الضيقة دى واخد المهنة كرسالة الدولة ما بتساعدو ...دورو بقيف فى الحتة القلتها ليك ..يفحص وبس لو نظرو بتجرد للقضية زى نظرتك دى كان ممكن يخلقو بيئة تتفهم وضعهم وسط المواطنين الغلابة ديل مع كل ما تعرضو له من عنف كان ممكن يعالجو الناس فى بيوتهم حتى لو بامكانياتهم البسيطة طالما أنو االمواطن هو البتكفل بمصاريف علاجو يعنى ممكن الطبيب منهم يأدى رسالتو فى اضيق نطاق واحلك الظروف لو خلى قدامو هدف انو المواطن هو رسالتو الاسمى من كل الحقوق. بس كمان برضو نرجع نقول اليدو فى الموية ما زى اليد فى النار ..نحنا ما عارفين ظروفهم الخاصة .وما كلهم مولودين وهم ما محتاجين لعائد الوظيفة يمكن فيهم الما بقدر يصرف على علاج اقرب الناس ليهو لو ما مرتبو دا على العموم الموضوع شايك وحاولت أكون منصفة ليهم شوية خلاصة الموضوع عندنا الفيصل المواطن المغلوب (ديشليون|صفر ) يلقاها من وين .؟؟ من ولاة أمرو الحيرو فى أمرو ولا منكم أنتو الأختاركم _بعد الله سبحانه وتعالى _ عشان تأخدو بيدو .؟؟ المهم يا أعزائي الدكتور محمد وبقية المتداخلين ..رأي ليس خلاف معكم بقدر ما هو أختلاف فى وجهات النظر و ارجو أن تتقبل قراتى لك بعاطفة مواطنة تتمنى أن تكون صالحة فى بلد غير صالح