العايز يعرس.. برعاية خالات البورد

Quote: سلامات يادكتورة .. ماعارف ليييه متخيل لي اني الوحيد البكون جادي في الناس ديل كلهم .. المهم العمر ... 31 سنة الطول .... 182 سم الوزن ... 84 كجم الحالة الاجتماعية ... اعزب واعزب شديد كمان التعليم ... شهادة جامعية في المحاسبة وشغال محاسب في الامارات بعد الزواج غالبا بيكون الاستقرار في الامارات ثم انو دي حاجة قابلة للاتفاق بعد داك الهوايات .. القراءة كتب كتيرة روايات شعر وكتب علمية ووو الاخوات عددهم 4 والاخوان 5 انا اصغر الاولاد واصغر مني بنت معلومات اضافية ... الحالة الصحية جيدة والحمد لله الشكل العام مقبول والحمد لله وبشكل عام كده انا زول الحياة معاهو ممكنة لحد كبير كوني متفهم ومرن لدرجة كبيرة وعايز حقيقة اعيش حياة مستقرة وافتح بيت مستقر ومافيهو مشاكل واربي اطفال في جو صحي نضيف مواصفات الزوجة المطلوبة ... اظن معظمها مكتوبة في المداخلة السابقة لكن بس عايز اركز علي فكرة كونها عندها استعداد تشتغل ماعشان العائد المادي ولكن بس مهم بالنسبة لي انها يكون عندها حياة وطموحات وحاجات عايزة تحققها لي نفسها يعني يكون عندها حياة تانية غير حياة البيت عارفو طلب غريب لكن وفكرة عجيبة لكن بالجد بتغيظني المرة البتكون قاعدة في البيت وماعندها شغلة تعملها وبالجد بشيل همها واحساسها بالزهج وعدم الموضوع وخايف اجي من الشغل اكون مرهق او زهجان وما اقدر اسليها وتقوم تزهج زيادة ونقوم نتشكل او ما شابه ذلك ... وبرضو عايز اركز علي انها تكون جمييييييييييييلة جمييييييييييييلة شديد لوووووووول وعشان اكون واضح من الاول انا بحب الجمال شديد فأخاف يعني تكون البت ماحلوة شديد اقوم اعاين للبنات في الشارع ودي حاجة ماحلوة ولا بتدل علي استقرار وانا زاتي ماعايزها لكن خايف اضطر ليها فليتها كانت حلوة شديد وبتعرف كيف تخليني ما اعاين لي غيرها رغم اني مقتنع انو دي مامهمتها وحدها ويجب اني اوطن نفسي علي كونو دي قسمتي ولا يجب ان انظر لغيرها واخيرا كده يعني حقيقي حاسي بي اني بلغت مبلغا صعبا كوني بعبي في طلب زواج وجادي الجدية دي كلها معليش يعني لكن ده يأس مابعده يأس