كيف نحمي { أولادنا } من ماكينة النقود الحمراء

Quote: من بين لاعبي الهلال الحاليين: في الموسمين الأخيرين فقط، سعى المريخ جادا -كما قرأت لكتاب مريخيين- لضم كل من المعز محجوب، ، كرنقو، عمر بخيت، حمودة، مهند الطاهر وقودوين. وسعى قبل ذلك لضم كل من أبوبكر الشريف، ريتشارد جاستن وهيثم مصطفى. ولو وجد سبيلا لضم كل من يوسف محمد وكلتشي لما توانى

Quote: هؤلاء اللاعبون ال10 ظهرت نجوميتهم في الهلال، ولو كان المريخ قد ضم بعضهم عقب شطبهم من الهلال، فهذا يعني أنه لو وجد سبيلا لضمهم أثناء لعبهم للهلال لما تأخر. وأنت تعلم ما يعنيه مصطلح "الضربة أو الخبطة الإدارية" في صحافتنا الرياضية.

أحمد الريح .. إنت جادي في كلامك ده ؟؟
كيف بعضهم .. يااخ والله لو قلت ( أغلبهم ) برضو ظلمت المريخ
الريح كاريكا جانا من امريكا .. جمال سانتو شطبتوهو .. الرشيد فيصل من الخرطوم تلاتة .. البلدوزر من الكاملين من منازلهم
هيثم طمبل من جنوب أفريقيا.. مجاهد من جزيرة الفيل .. البقية إتنين والله ماليهم إسم ولا شهرة
ده كلو وبرضو بعضهم يا احمد الريح ؟؟ الفضل منو ما بعضهم ؟؟
الدحيش جابو قون سامي ( قون جوبا ) وشكلة الكراسي مع السماني ويعميني مادردق كورة مع المريخ
بس السجلتوهو إنتو من المريخ ( مبااااااااشرةً ) كلو كان بلعب أساسي .. صح ؟؟
وبعدين تشطبو اللاعب أو يسجل في فريق تاني ونسجلو برضو بكون حقكم ؟؟
مفروض لما نسجل هيثم من اورلاندو ولا مجاهد جزيرة الفيل نجي نتفاوض معاكم مش ؟؟
يا احمد اللاعب عندا ينتقل او يشطب من فريق تنتهي علاقته بذلك الفريق

Quote: إنت لو قلت "ربما" يكون المريخ عاوز حمودة وعمر بخيت ومهند وجوليت، ونحن عاوزين الهلال يحافظ على اللاعبين ديل وغيرهم... المشكلة شنو

وبعدين أنا قلت ( ربما) ما عارف لو دي جبتها من وين ؟؟ وربما دي مهمة زي ( مباشرةً )
مافي مشكلة والله تحافظو على لعيبتكم .. وده من حقكم بل من واجبكم
بس المشكلة ما تتهموا بيهم المريخ بالكذب .. إنتو البتسجلو لعيبة المريخ
ويجي ياسر يقول ( كيف نحمي أولادنا من ماكينة النقود الحمراء )
وتجي إنت تقول ( ضرورة الاحتفاظ بهذه القائمة أمام التطلعات المشروعة لفرق أخرى من بينها المريخ )
يمكن يكون يااسر قااااصد بماكينة النقود الحمرااااااء .. مريخ بورتسودان والميرغني كسلا ونيل الحصاحيصا
يكون ياااربي واحد من الفرق دي ناوي يسجل عمر بخيت ؟؟

Quote: يعني يا أخي لو عاوز الهلال يحافظ على لاعبيه -زينا كده-: ألف مرحب بيك، ولو عاوز تثبت "حاجة تأريخية"، من الممكن تخصيص مقالات أخرى، مع وافر احترامي لوجهات نظرك وحقك في التعبير عما شئت، متى شئت.

دي بااااالغت فيها يا احمد الريح
نزلت إنت بوست بعنوان ( أتوقع هجمة مريخية على لاعبي الهلال )
شاركتك فيهو قلت مشاركتك دي ما محلها .. مع إني ما إتكلمت عن إنتشار الكوليرا في شمال أثيوبيا
شاركت في نفس الموضوع وبنفس الفكرة البتقول
مافي سبب يخلي الهلال يخاف من أن يخطف المريخ بعض لاعبيه
لآن الهلال هو الفريق الذي إعتاد خطف وتسجيل لاعبي المريخ وقد عددتهم لك .
قلنا يمكن أحمد الريح ما قاصد الكلام الفي عنوان البوست .. وسكتنا

ياسر قام قال ( كيف نحمي أولادنا من ماكينة النقود الحمراء )
جينا قلنا المريخ أقل مطاردة للاعبي الهلال مما يفعل الهلال ..
برضو تجي تقول لي التاريخ ما بنفع وماعارف شنو ؟؟
إنت مشاركتي دي عاوزني أكتبها وين ؟؟ أشارك بيها وين ؟؟ في عرس المعز

عموماً البورد مكان ومجال للنقاش وهلال مريخ نكهتها المناكفة
وأفعال السودانيين هي دائماً تنتج عن رغبة في ردة فعل ومن ثمّ تتراكم .
لذلك نتحدث عن تاريخكم في خطف وتسجيل لاعبي المريخ
وسوف لن نسكت مالم توقفوا هجمتكم المضللة والتي لا تستند للحقائق
وبعدين أنا قلت حاجة غلط ؟؟ مش كل اللاعبين الأنا ذكرتهم ديل سجلتوهم من المريخ و ( مباااااشرةً ) ؟؟
إستحملوا الحقيقة يا أحمد الريح .. وبطلو إتهامات بدون أساس ( ضربني وبكى مابتوكل عيش )
وأنا أتمنى أن لا يسجل المريخ أي لاعب من الهلال .. بس خايفكم السنة دي تسجلو بهاء الدين



كان حري بكاتب البوست أن يعنونه كالتالي
( كيف نوفر المزيد من النقود الزرقاء لشراء اللاعبين الحمر )
ساعتها كنت سأنحني لك وله .. لأنكم ساعتها تكونون قد نطقتم بالحق

في الختام لك المحبة والمودة والسلام