|
عبد الناصر الطائف احمد !!!
|
ماوصف لي اعرابي قط وتمنيت ان ألتقيه اكثر من هذا الرجل. دعوة لسلمى الشيخ سلامة وأصدقاء عبد الناصر الطائف لاستكتابه في المنبر.
|
|
|
|
|
|
|
|
Re: عبد الناصر الطائف احمد !!! (Re: معاذ حسن)
|
عبد الناصرالطائف كاتب ساخر من اشهر اعماله المسلسل الاذاعي (الحاج مذكر) المسلسل التلفزيوني أقمار الضواحي أفلام فيلم الضفة الاخري للصيف وفيلم (الجراح والسوار) و( لاتصفعوا الابواب عند الغضب) وفيلم (العودة)
ولد في قرية بنواحي المناقل. زاملني في الجامعة صديق ينتمي الى ذات النواحي ذات مرة من الامارير اصر على دعوتي لزيارة قريتهم القريبة من مسقط راس كاتبنا بعد رحلة طويلة من المعناة وصلنا القرية قبل الغروب والحقيقة تقال فقدكانت القرية تعسة جدا لدرجةانك لو مررت على مرمى حجر منها ليلا فلن يتبادر لذهنك على الطلاق انه ثمة قرية بالجوار. اول ماواجهنا في القرية كان سرادق عزاء علمنا ان احد صبيان القريةقدقضى قبل وصولنا بيوم واحد اثر لدغة ثعبان!! وفي صباح اليوم التالي ونحن جالسون داخل سرادق العزاء اذا بثعبان ضخم يتجول في الجوار بحرية شديدة ولكنه لم يفلت من نشامى القرية. لا ارى حاجة لاخباركم بانني فور رؤيتي الثعبان(ونحن في سرادق العزاء للفتي الذي توفي اثر لدغة ثعبان )فكرت جديا ان اولى الادبار وقد هممت بذلك ولكن الحمد لله تمت السيطرة على الوضع. رغم تعاسة القريةاشهد ان اهلوها من اكرم من عرفت ومن اظرف الناس في الدنيا لم يسمعوا بالحكومة وربما انها ايضا لم تسمع عنهم.
| |
|
|
|
|
|
|
Re: عبد الناصر الطائف احمد !!! (Re: معاذ حسن)
|
ونسة مع الحاج متذكّر
جمال عبد الرحمن: مشكلة الحاج متذكر الفلس والنسوان البعرسهم
مسؤولين كبار بشبهوا الحاج متذكر..
جمال عبد الرحمن كوميديان اشتهر بعدة أدوار في المسرح والتلفزيون والاذاعة.. مع فرقة الاصدقاء المسرحية وغيرها.. لكنه مؤخرا لمع مع اخرين عبر السلسلة الاذاعية «الحاج متذكر» والتي خرجت من استديوهات الاذاعة السودانية الى أشرطة الكاسيت.. اكثر من ثلاثمائة حلقة واربعة أشرطة كاسيت انتجها جمال مؤخرا مسرحية كوميدية.. التقيناه ليحدثنا عن المسرحية التي كتبها عبد الناصر الطائف واخرجها للمسرح محمد نعيم سعد.. وتحاورنا عن علاقة الشخصية بالممثل وتطرقنا لاشياء اخرى.. اليوم يرفع الستار عن المسرحية ونرفع هنا الستار عنه.. جمال والحاج متذكر.. * الحاج متذكر شنو؟ - الحاج متذكر مشاكل كتيرة.. مشاكل انسان الوسط المسكين المتطلع.. والانسان المسكين العندو مشاكل مع العولمة والتكنولوجيا والمواصلات ومشاكلو الاساسية مع نسوانو.. * عندو مشاكل مع المرأة؟ - كتيرة.. الحاج متذكر يقول انو اتزوج 80 واحدة نسوان وواحدة بس حنكوشة.. وعندو مشاكل مع صاحبو منوفلي. * ده بمثلو الفنان عبد العظيم احمد عبد القادر؟ - ايوه.. والحاج متذكر عندو قولة ثابتة انو لو زال منه الفلس ومنوفلي ما بتكون عندو مشكلة. * كبير في السن؟ - يعني هو حوالى 60 - 70 سنة لكنه متطلع لدنيا جديدة.. وبحب يدخل مغامرات مع العمل والمرأة. * ابرز مشاكلو؟ - الاختيار.. ما بعرف يختار مثلا في النسوان بختار العروس العندها قروش ودايما النسوان ما بقعدو معاه بطفشن. * والسبب؟ - هو.. ياخي ده زول مرض.. عمك الحاج متذكر مرض.. * .............؟ - هو زول فقير والمرأة عندها قروش عشان كده القرار لمن يملك المال هنا.. * لكنه زول مثقف؟ - يعد من المثقفين ثقافة سماع.. راديو.. او ونسة مثقفين. * لقيت ناس زي الحاج متذكر في الحياة واللا بس في خيال عبد الناصر الطائف المؤلف للسلسلة دي في الاذاعة.. والمسرحية دي؟ - دي شخصيات موجودة كتير جدا وما في وسط السودان بس لكن هنا في الخرطوم كتير جدا.. بشبهوا الحاج متذكر والغريب لقيت مسؤولين كبار بشبهوا الحاج متذكر ودي عاملة لي اندهاشة.. * في شنو بشبهوه؟ - يعني ممكن ألاقي مدير ما قادر يطلع قرار.. ده الحاج متذكر ذاتو.. بخاف من الزول الاكبر منو.. الحاج متذكر لو متزوج ما بقدر يطلع قرار الا اذا اتخذت القرار ده مرتو.. الحاجة الثانية الحاج متذكر يفتي في حاجات ما بعرفها يكون سمعها ساكت لقيت مسؤولين كبار بقوموا بالافتاء في حاجات هم ما بعرفوها.. * المسرحية دي نكتة اتمسرحت او مجموعة نكات مسرحتوها؟ - لا دي دراما عديل كده من بداية ووسط ونهاية. * بشبهك في شنو؟ - كتير من المواقف بتحصل لي وهي ذاتها بتكون حصلت للحاج متذكر لغاية ما بقيت اخاف. * لدرجة انك تلاحظها؟! - ايوه.. غير كده يا خليفة انا قدرما حاولت اضحك ضحكة الحاج متذكر بره استديو الاذاعة او في خشبة المسرح غلبتني.. واحد قال لي الضحكة دي بجيبها ليك الشيطان. * علاقتك قديمة بالحاج متذكر. - أيوه 300 حلقة في الاذاعة وجات عليها المسرحية. * مرات بتتقمص شخصيته بره الاذاعة والمسرح؟ - لا والله.. بتنتهي في الاذاعة والمسرح لدرجة انو في ناس بقولوا انا زول بايخ وثقيل مقارنة بالحاج متذكر.. لانه بكونوا دايرين اعلق على المواقف في الحياة زي ما بعمل الحاج متذكر.. وبكتشفوا انهم قاعدين مع زول ساكت ساي الا اذا سألوني أجاوب. * أجمل ما في الحاج متذكر؟ - ما شايل هم للدنيا.. ما شاغلاه.. ده زول آخرة.. أصلو ما بتلقاه زهجان.. أي مشكلة عندهم بتنتهي في حتتها.. يعني لو عنده مشكلة مع خليفة مثلا بخلي المشكلة قبلها وبمشي ما بنقلها معاه لمكان تاني.. ودي انا استفدت منه فيها.. يعني لو عندي مشكلة في الشغل بمشي البيت واقفل مفتاح المشكلة وانوم.. الصباح أصحى اطلع من البيت افتح مفتاح المشكلة. * جمال ما شاغلاك الدنيا زي الحاج؟ - لا ما زيه.. ده ضارب بيها عرض الحائط..
http://www.alsahafa.info/index.php?type=3&id=2147502725
| |
|
|
|
|
|
|
|