البروف المعز عمر بخيت مع الاحترام لحظة من فضلك !!!

Quote: الحبيب الرفاعي عبد العاطي، شكراً لهذا التساؤل الذي كنت أتمنى ان يسأله الآخرون قبل الشروع في التحليلات المختلفة وتدوين معطيات غير مبنية على أي حقائق. في الواقع أخي الرفاعي أنا لم ادخل في السباق ولم أترشح أصلاً. لقد قمت ومعي مجموعة من الشباب المتطلع بتكوين الحركة السودانية للتغيير ووضعنا لها برنامجاً طموحاً مبني على خطة استراتيجية لها رؤية محددة ورسالة وأهداف واستراتيجيات وخطة عمل لتنفيذ هذه الإستراتيجيات. كل ما يتعلق بالحركة موجود وموثق بموقعها على الإنترنت لكنه يخلص في بناء الإنسان السوداني وتحقيق الحياة الكريمة له من صحة وتعليم ومسكن ومأكل ومأمن وحرية وعدل وتنمية ورفاهية. وكنا نحسب في الحركة أننا بوصولنا للحكم عبر صناديق الإنتخابات يمكننا تحقيق ما نصبو إليه بالنهج العلمي. قمنا أولاً باستطلاع واستقراء احتمالات النجاح في الوضع الراهن فوجدناها جداً قليلة في عدم وجود دعم سياسي وتحالفات استراتيجية، وحتى لو دخلنا التجربة فهو سلاح ذو حدين. فقد يكون الدخول في المعركة الإنتخابية بحد ذاته تجربة وتمريناً لخوض انتخابات قادمة وهي خطوة هامة في طريق النجاح مستقبلاً، وقد يؤدي عدم النجاح حالياً للإحباط ووأد التجربة الوليدة، لذلك لم نشأ تعريضها للإحتمال الثاني وهي في بدايتها ورأينا أن نعمل من القاعدة والإلتصاق بالمواطن عبر العمل الطوعي الإنساني وبناء الثقة بيننا وبينه والتعريف بالحركة عبر عطائها وليس شعاراتها. وفي هذا الشأن قمنا بتكوين منظمة عمل مدني باسم تغيير للثقافة والتنمية وقد تم تسجيلها لنقتحم مجال العمل الطوعي والإنساني وهو أصلاً هدفنا. عبر هذا العمل يمكننا أن نؤدي رسالتنا ونعرف الناس بنا فإذا كان هناك حاجة لخوض الإنتخابات القادمة لتأسيس دولة التغيير الوارد في رؤيتنا كان لنا وجود في الساحة ودعم جماهيري وسياسي يمكّننا من خوض التجربة بقوة وثبات. وإن لم نر حاجة لخوض الإنتخابات نستمر مع الآخرين في عملنا الطوعي وتأدية واجبنا الإنساني. وهذا باختصار سبب عدم الدخول في سباق الإنتخابات والتي نتمنى أن تكون تجربة حقيقية تعيد للوطن عزته ووحدته وإنسانية بنيه. لك مودتي ومحبتي وشكري الجزيل ولك احترامي.

Quote: انت السودان دا يا تبقى رئيسو يا تهينو؟

Quote: لست بالذي يهين وطنه وامته وشعبه

Quote: تحياتي أخي الرفاعي.. و اسمح لي أن أستغل بوستك دا في طرح سؤال للبروف كنت أرغب طرحه في بوست منفصل غير أنني أشكو ضيق الزمن.. ... د.معز تحياتي.. و أتمنى أن يتسع صدرك لتساؤل ظل يلح علي منذ رأيت عنوان بوستك ..هل الحقد سوداني..و من شدة استيائي لم أرغب في دخوله مرة أخرى.. سؤالي يا دكتور.. لماذا نجاحاتك و إنجازاتك (شخصية).. و السالب من طباع البشر ..هو في نظرك بالضرورة (سوداني)؟؟؟؟؟؟!!!!!!!!! بمعنى.. كلما أنجزت شيئاً ما ..تأتينا به بعنوان (شوفوني عملت شنو ..أو كنت وين..) لكن ما بتجي تقول (شوفو حسدوني..) طوالي تختمها لينا في جنسيتنا السودانية.. و تلوم شعب كامل على ما قد يكون نالك من أفراد منه!!!!!! يا دكتور حصل لاحظت لكمية الناس الكانو بيتداخلو و يهنوك زمان.. و كميتهم هسة؟؟ حصل سألت نفسك بينك و بينها و حاولت تلقى تبرير غير انو نقّصهم الحسد؟؟ أنا واحدة من الناس كنت واضعة تصور جميل لشخصك.. ما قلل منو_ رغم انو أثار استغرابي_ ..كونك لم تكن أحد المهنئين رغم تواجدك بالبورد وقتها على الانجاز العلمي الذي حققه شقيقي و تحدثت عنه في بوست بعنوان فخر سوداني آخر..الدكتور أسعد خالد محمد علي ينال جائزة العلماء الشباب (باكستان) كنت أعتقد أنك ستكون أول المهنئين لأنه في البحث العلمي و الحقل الطبي تحديداً..هل منعتك جيناتك السودانية (كما تراها) وقتها..؟ لا يهم.. فهذا لم يؤثر كما اثر فيّ بوستك السابق لهذا و ربطت به الحسد و الحقد بالسودانيين؟؟ بالله يا دكتور معز..ليه ما حصل لفتّ نظر الجرائد البحرينية لأنها تكتب جنسيتك مع خبر تكريمك أو نجاحك..ليه ما حرقتك للسودان..انو كانوا يكتبو بالبنط العريض السفاح السوداني ..عن سفاح صنعاء.. و يتفادو أن يكتبو حتى بالبنط الصغير كلمة (العالم السوداني) لما يكتبو عنك؟؟ يا دكتور لي مداخلة في وقت ليس ببعيد في مكان ما في المنبر كنت وقتها لا زلت أحتفظ لك بقدر كبير من حسن الظن..أدعم فيها ترشيحك للرئاسة... و ظننت وقتها أنك الشخص الأنسب!! بالتأكيد محا بوستك الأخير حسن ظني هذا..و صدقني مهما علت شهاداتك.. و كبرت إنجازاتك الشخصية.. فنحن (كشعب)..لن نراك إلا بالعين التي ترانا بها... انت السودان دا يا تبقى رئيسو يا تهينو؟ و ما تصدق البيقولو ليك لا كرامة لنبي في وطنه.. فأنت لست نبي.. ليس لنا على أي حال!! و حواء السودانية واااااالدة و الله يا دكتور... و ربنا يكفينا جميعا شرور أنفسنا قبل شرور الغير!

Quote: وفي هذا الشأن قمنا بتكوين منظمة عمل مدني باسم تغيير للثقافة والتنمية وقد تم تسجيلها لنقتحم مجال العمل الطوعي والإنساني

(عدل بواسطة الرفاعي عبدالعاطي حجر on 02-11-2010, 10:51 AM)

Quote: [شكراً ليك يا سيد الناس وأنا والله سعيد بك وبكلماتك لأقصى حد.. القصيدة التي ورد فيها طائر البطريق هي رسالة من القطب الشمالي للوطن الغائب وتجدها على هذا الرابط بموقعي رسالة من القطب الشمالي للوطن الغائب أما التي ورد فيها يا قديسنا فهي قصيدة عذاب القبر في الخرطوم وتجدها على هذا الرابط عذاب القبر في الخرطوم وكل القصائد مهداة لشخصك الغالي

Quote: فكرت فى كتابة بوست بهذا الخصوص للدكتور ولكن لدرايتى بالعقلية السودانية الغير قابلة للنقد عدلت عن الفكرة

Quote: سلام يا قيقرواي.. و السلام المرة دي برضو (تحية و حالة داخلية..) أنا برضو زيك كان ممكن أدي دكتور معز رأسي و أنا مطمئنة ألف لو حصلت فيهو حاجة ..بعيد الشر عنك و عني :)).. لكن بعد مداخلتك دي حأخاف جداً..لأنو بقى زي الفيها إيحاء بإنو سناء دي و الله عندها معاك تار و لوم غير مؤسس.. و لا ما بتعرف تميز العظماء..و لا أي حاجة..و إنت كبير و إنت عظيم و ما تتلفت للحاقدين..أو كما أوحت مداخلتك!

.. تلقوا ليكم رئيس وين يسمع منكم ، و يقعد يناقشكم ؟
بعدين ما عشت لو قصدت اي حاجة من الذكرتيهو فوق دا !! . . كان ما المعزة ساي كان جليت مداخلتك عادي . . لكن بتهميني يا ستهن ، قلت نسقيك من نفس الكاس ، اها الطعم كيف ؟ . . يا زولة و الله اتنين منك و هي تعمر
لكن يا سناء بالجد - بعد الشكر الجزيل لخط الاستواء الحرر نفسك - المطلوب جنس كلامك الحراق دا ذاتو . . بس بإتجاهين
اصلو الجراحات حراقة و البلد الاشقاك حبو دا عللو كترت و على شفير الموت ، اها نلحقوا و لا نقعد نغني مع الخليل في :
نحن و نحن الشرف الباذخ ؟!
يعني عشان ما الناس يشيلوا حسنا نقعد نغش نفسنا ولا كيف ؟
قولي علي مجنون او بهذي او وصلت حد الزهج من كل الاشكال التقليدية و الصور المكررة و الاسطوانات المزيفة و المشروخة دي
او قولي حالم عديل ، لكن خلينا نجرب دولة الشعراء امكن يبنوا وطن للحب . . ما نجرب ياخ كإحتمال اخير ؟ . . ح نخسر شنو ؟

اها شوفي الكلام الببكي جد جد

مجانية أحلام هذا الشعب حين حملق في سقوف النخل
مجانية أحلامنا..
لو علقت بالنخل ما صمدت أمام الريح
و لو دست بإحكام تهاوت تحت أقدام الطغاة
و نحن الساكتون عن القضية كي نحوز على جواز الانتماء..
عاديون في أعيادنا...
متسامحون مع اللصوص...
نصلي صوب أحزان المساء
و نشرب في ليالي العرس نحلم بالبنات و ندعي مجدا من الأسمنت ,
أو طقسا من البارود, و الكرم المؤزر بامتلاك الأرض و الثروة
فلو كنا من الغابات حقا ..
لما تركت جموع الناس هذا العسكر المأجور- يرفل في الخضار بإسمنا
و لو كنا من الصحراء حقا ..
لقاتلنا الرعاة على جذوع النخل, ذدنا عن مياه النيل - آخر ما ادخرنا- للبقاء على مسارحنا
و لكنا كما نبدو هجينا نيئا لتلاحم الغابات و الصحراء, إذ يرتاح فوق رؤوسنا
التجار
و السمار
و الفوضى
و تحكمنا القبائل و الجنوووووووووود
تبا لهذا الإنطهاق المستفز
فهذا الخصي يشنق كل أحلام الطفولة
و هذا الوضع يتهمنا بالنضال و ينتهكنا واعيا بأزيزنا في الشارع المفقود
أين الشوارع كي نعلق معطيات المرحلة ؟
بل أين المراحل كي نفتش عن طريق لا يضل طريقه نحو السياسة ؟
إن المراحل تغتصبنا في الحروب لتشتري دخانها اليومي من سوق العساكر
إن العساكر باعة يتجولون على أزقتنا , يبيعون الدعارة للذين يراهقون بشعبنا
كانوا كهولا ملتحين و راهقوا
ربحت تجارتهم
و مات البائعون دماءهم من اجل أن نمشي على أقدامنا
و نحسها تمشي – فنمشي نحو أفق لا يصله الباعة المتجولون
دعارة أن تشتري من عسكر شيئا لتحكم دولة الجوعى
و دعارة أن تستبيح الوعي كي تسري إلى ثرواتنا ليلا
فلا مسجدا أقصى وصلت
و لا وحيا أتاك من البعيد
ولا ارتفعت بمستواك إلى القضية
إن القضية أن توازي ما علمت بما تمارس من سلوك
و أن تمشي إلى الأشياء و أنت تدرك أنها الأشياء
و أن تبقى مع صوت الحقيقة- أينما اتجهت - لكي تبقى دليلا للحياة

من نص " المشنقة "
تاج السر جعفر الخليفة
الخرطوم 1994 م


يا سناء يا اخية
ياخ انضمي لحملة رئيس شاعر و عالم . . فترنا ياخ من العساكر و غير المرهفين ديلاك . . كفاية ! . . كفاهم ياخ !!
يا سناء يا دفعة ياخ 16 و 21 سنة عساكر باقي كم من الـ 50 سنة ؟ الباقي سخف و كيزان و طائفية و فوضى احزاب . . حدو وين الكلام دا ؟!

يا سناء و الله سعيد بكتابتك هنا
و أعفي لي القلقلة و سهرك
و برضو مشتاقين

Quote: أرجوكم أن تتركوا لنا هذا العالم الجليل في حاله .. فهو طبيب يداوي جروح الجسد وجراح الروح .. وهو رمز نفخر به وينبغي أن يفخر به كافة السودانيين ..

Quote: لأخت سناء خالد .. لو عرفت شخص الأخ معز سوف تزداد تلك الصورة ألقاً.. أرأيت كيف كان رده جميلاًً على كلامك القاسي؟؟

Quote: العالم دي قدر ما تقرب ليها يشبكوك نرجسي وحب الذات وأنا وأنا.. تفوت فيهم وانت قافل القزاز نظام طناش يعني يقولوا ليك برج عاجي وشايف نفسوا وما بعرف شنو

Quote: العالم دي قدر ما تقرب ليها يشبكوك نرجسي وحب الذات وأنا وأنا.. تفوت فيهم وانت قافل القزاز نظام طناش يعني يقولوا ليك برج عاجي وشايف نفسوا وما بعرف شنو

Quote: الرمز في بروفايلك يقول أنك من جماعة.. سير سير يا بشير..

Quote: ما كنت بأتكلم بعاطفية .. كنت بأتكلم بوعي كامل أن للبشر سلبيات.. و لكن أرفض تنميط السودانيين تحت مصطلحات بغيضة مثل حقد.. و حسد.. و كسل!! هل انتو مقتنعين انكم بتعالجو في ظواهر..؟! الحسد ما ظاهرة ..و ما جديد.. الحسد مرض اجتماعي قديم قدم الخلق..منذ قتل قابيل هابيل و ليس محدود بوطن!! و لا له لون..

Quote: ترتيب المداخلة الصحيح..هنا! _______________ قيقا يا أخي.. كنت أتمنى أن يتسع صدر الدكتور معز أكثر.. حتى يكون حقاً في محل العشم.. عشمكم في أن يكون استثناء لقاعدة هشام زي ما سميتها.. و عشمي ..في أن يرى ما نراه ينتقص من كفاءته.. فيعالجه لكن قعدتو تقولوا شوفوه صبر عليك.. و شوفيهو استحمل النقد.. و صدره واسع!! لحدي ما حسستوه انو عمل حاجة خارقة و اتنازل كتير و كدا كفاية ..!! دكتور معز لم يتحمل النقد.. و لا صمد لحوار.. فقط أغلقه بطريقة مهذبة.. و التهذيب ليس بغريب.. و لا كثير منه.. هذا أقل ما يتوقع منه.. دا الحد الأدنى مش بس كسياسي يجب أن يتحلى بالدبلوماسية.. لأ.. كطبيب. كعالم.. كأديب.. بل كإنسان .. إنسان سوي جداً ... أنا ما جيت بأمل في حوار صحي.. أنا جيت بأمل في مستقبل صحي.. بأمل في رئيس ما يسمع كلام البيضحكو.. في رئيس ينشد الكمال الإنساني.. و لا يعتقد أبداً أنه وصل إليه! ..... ما كنت بأتكلم بعاطفية .. كنت بأتكلم بوعي كامل أن للبشر سلبيات.. و لكن أرفض تنميط السودانيين تحت مصطلحات بغيضة مثل حقد.. و حسد.. و كسل!! هل انتو مقتنعين انكم بتعالجو في ظواهر..؟! الحسد ما ظاهرة ..و ما جديد.. الحسد مرض اجتماعي قديم قدم الخلق..منذ قتل قابيل هابيل و ليس محدود بوطن!! و لا له لون.. ...... أخرجو السالب تحت ضوء الشمس و عالجوه.. لكن لا تمنحوه جنسية.. صدقوني إن فعلتم.. سيقيم بينكم حينها للأبد!!

Quote: كلام في سرك... تاج السر خليفة لو ينزل.. أنا أول متطوع في حملة الرئيس الشاعر!

حباب الاسرار . . سرك في بير تب . . انت عارفة اخوك سواط

عشان صيدلي ؟
اها دايرنو محاسب . . عشان يحسبا كويس ياخ !


---------------

اعذريني على التأخر في الرد . . و امسحيها في وش الزمن المشحتف خلقة دا