|
|
 محن سودانية العشر القام ليه شوك مصطفي عثمان شحادين/شوقي بدري
|
محن سودانية العشر القام ليه شوك
مصطفي عثمان شحادين
الله يبارك فيك يا ابو الدرش . تاني حيرتني . بس حأكون شاكر جدا لو اديتني الرابط وعنوان الكورس . قصدي كورس قوة العين والبجاحة والغلاط عينك عينك . ما بترمشوا . زمان لمن يسألوا ,,فلان ده بيكذب ؟,, يقولون. ما برمش . كلكم يا ناس الانقاذ نجحتو في الكورس ده بمرتبة الشرف . وانت يا ابو الدرش عينوك معيد .
في نهاية الخمسينات جاء الفريق عبود الي حفل في القصر الجمهوري وكان يقف في الصفوق الخلفية . واصطدم بالخال عبد الكريم ميرغني . فأعتذر بأدب . فحياه الخال بأسمه فأستغرب ، وقال الخال ما انت رئيس جيشنا وبالسؤال عرفه الخال بنفسه ، وانه سفير . فسأل عبود ببرائة . السفير شغله شنو بالظبط ؟. فاراد الخال ان يهون الامر فقال , السفير ده الزول البترسلو حكومته عشان يكذب .وضحك عبود .
بعد ان استلم عبود السلطة ذهب في جولة طويلة . وفي بكستان حصلت فاولات . وكلف عبد الرحمن مختار بأن يكتب خطبة بالانجليزية , وتعليم عبد الرحمن مختار لم يتعدي مدرسة شيخ الشبلي والمدرسة الوسطي . وكانت فضيحة . والدبلوماسية علم يا مصطفي يدرس في الجامعات . مش زول يكون فاتح كبوت زول وقابض مدربيته يقرقر في سنون . يغسل ايدينوا ويعملوا وزير خارجية . الدستور الامريكي بيقول اذا مات الرئيس او نائب الرئيس الحيكون مسئول هو وزير الخارجية .
عبود لم يكن يفهم الكثير في ادارة الدولة والدبلوماسية . وعندما ذهب الي الهند ، كان رئيس الوزراء العالم جواهر لال نهرو والد انديرا غاندي وجد الرئيس راجيف غاندي . وكان يقال قديما ان احسن من يتكلم اللغة الانجليزية هما تشيرشل ونهرو .
واراد الخال عبد الكريم ميرغني ان يزيل فضائح باكستان والتصريحات التي استغلها ايوب خان وزير خارجية باكستان ، والتي تضر بالعلاقة السودانية الهندية . ووقتها كانت الناس تخطب ود السودان . وصار عبود يقول للخال ,, ياخي انت مش قلت لي السفير ده هو الزول البلده بترسلو عشان يكذب . طيب ما تشوف موضوع الهنود ده . الله ينعل الهنود في المذاهب السبعة ,, والخال يذكره بان المذاهب هي اربعة وان هنالك حدود حتي في العمل الدبلوماسي .
قبل ايام البوليس الامريكي في شارع 45 نيويورك وقف كرتي وزير الخارجية وممثل السودان في الامم المتحدة ، ونزلهم من العربية،ذيهم وذي اي لوري قصب . وفتش العربية الدبلوماسية ام بيرق بالكلاب ذي ايي خانة .و انت قاعد تدبج المقالات وتهاجم الفارس السفير علي حمد ابراهيم من مضارب دار محارب في النيل الابيض .
ابو الدرش السفير والوزير عبد الكريم كان بيهظر. انتو اخدتوا الموضوع جد . انت بالذات بقيت تكضب اكتر مما تتنفس . ياخي ارفع رجلك من الابنص شوية . انت ما فاعد تتكلم في قيدومة . لمن تقول فلان سرق ، لازم كمسئول تدينا رقم البلاغ ، المبلغ كم ؟؟ وهل كان في حرز مثل خزينه مثلا . ولاكان في طربيزة ومكشوف . وهنالك تهمة اسمها السرقة من الشارع وهذه من الجنح . واذا اخذ بدون وجه حق . فهذه مشكلة ادارية . واذا اخذ باعطاء بينات او وثائق كاذبة فهذا تزوبر. واذا اخذ المال بالرضاء ولم ينفذ المطلوب او العقد فهذه خيانة الامانة . اما اذا اشهر مسدس فهذه سرقة بالاكراه والعقوبة في امريكا قد تصل الس 90 سنة وتعتبر من الجرائم الكبري ,,فلاني ,, . انت وزييييير . وانا عتالي سابق . ممكن تشرح لي اي نوع من السرقة قام به السيد السفير .
و الله يامصطفي الانقاذ دي عينها قوية وسنها ملوية ، ذي ما بقول المثل . زوجة كرتي السفيرة من منازلهم ، قالت ناس الانقاذ ديل ناس اتقياء يحسون ويتعاطفون مع معاناة الشعب . لهذا تأكل وابنائها اللحم خمسة ايام في الاسبوع فقط . يعني لو ما بتحسوا كان حتاكلوا اللحم تسعة يوم في الاسبوع . انتا وكرتي وبقية الجوقة زمان كنتوا بتاكلوا اللحم ده وين غير ربع الكيلو في حلة الملاح البياكلها كل البيت السوداني . انا سمعتا في الستينات الناس في الجزيرة القريبة دي تقول الليلة عندنا ملاح لحم . وفي امدرمان الناس بتاكل ام بقبق و البصارة بدون لحم . والناس مرتاحة ورضيانة .لحد ما جيتوا انتو.
بالمناسبة كترة اكل اللحم مضرة . انا لي اكتر من عشرين سنة حارم نفسي من اكل اللحم . يوم بشوي في اللحم ، اتذكرت حكومتكم وقلت احرم نفس من الشوائات واللحوم لحد ما تقطعوا وشكم ولسه منتظر . وقريبا حأجي السودان واضبح دعول . وكمان بسرح في الشعر . قمت كردته قلت عشان كل يوم اتذكر لؤم الانقاذ .
انا الآن متأكد من انك تعاني من مركب نقص من الاخ علي حمد . علي حمد دخل وزارة الخارجية بي ضراعه . فديما كانوا يقبلون اولاد العوائل . وكان الامر يحتاج الي الواسطة علي واسطته كان علمه وشخصيته .. انا درست مع علي في مدرسة ملكال الاميرية , وكن نسكن في الداخلية . نأكل نفس الطعام ونتنفس نفس الهواء كان درة المدرسة . كانت له شخصية اكسبته احترام مدرسيه قبل زملائة . لم يحدث ان عوقب او و بخ لتفصير . كانت له جريدة حائطية . وهو في الصف الثالث . وكان يشبد بها الاساتذة . وفبل بجدارة في مدرسة خور طقت . وقديما كانت هنالك ثلاث مدارس ثانوية في كل السودان . ومن هنالك انتقل لجامعة الخرطوم ، كما كان متوقعا له . ,هوطالب في الجامعة كانت مواضيعه الادبية تزين الصحف اليومية .
شخص آخر يمكن ان اذكره لك ذهب الي الخارجية وهوالسفير عبد الباقي محمد الحسن وهو من دفعة علي . اتي من الزومة دهاسير ويحمل شلوخ الشايقية . انه شخص رائع جدا جدا . لم يكن عنده كبير ولم يحتاج لواسطة . شاركته السكن لخمس سنوات . ودرسنا العلاقات الدولية . هذا الانسان كان سفيرا ودبلوماسيا بحق . اما انتم يا مصطفي ، فقد اتي بكم بدو ن وجه حق يعد ان سرق الترابي السلطة بليل . وانت بنفسك كنت مستغربا من احضارك . دعني اقولها لك الآن . السبب ان الترابي يكره احمد عبد الرحمان الذي كان كبير العسس عند نميري ووزير داخليته لدستة من السنين . يعرف اسرار الجميع
علي يا مصطفي فارس . ويترك بصماته في اي موقع يعمل فيه . انه الرجل الذي وقف ضد استخدام الاطفال السودانيين في سباق الهجن ، وتعرضهم للاصابة والموت . كان دائما السفير ابن الشسعب . وانتهي استغلال الاطفال عالميا . وعندما كان سفيرا كان سفير السودان . والانقاذ لم تاتي به من الشارع مثلك يا مصطفي . هل اي جراح او طيار يعمل ، هوجراح الانقاذ ؟؟ ام هل سيستقيل كل الجراحين بعد الانقاذ ؟؟
اذا سمعت ان شوقي كان نشال في الدلالة او كان بيقطع المفاحض ٌقد اصدق انا هذا . ولكن اذا اتي من اقسم بأن علي يسرق لما صدقت لقد كتبت من قبل انني والحمد لله لست من الجبناء وعندي بعض الاطلاعات ,لقد اصدرت رواية وانا في العشرين ولكن اقولها مرة اخري علي خير مني كأنسان واشجع واعلم وافيد لوطنه . ولو سلم حكم السودان لوقفنا خلفه .
انتوا نسيتو ام شعيفة وام تكشوا والسبروق والكجيك والمندجي . قلتوا زمان بانكم تفتخروا انه مافيكم واحد من العاصمة . وكتين سكن العاصمة ده بيشتموا بيه . ما ترجعوا للاقاليم الحلوة دي .لكن اتعلمتوا علي الراحات . علي ترك الراحات وذهب لاجئا في امريكا . وعمل في مهن بسيطة . وعاش علي الكفاف . والغريبه مصطفي يتكلم عن السرقة .
يا مصطفي في ليلة قدر بتجي بالكربون ؟ كلكم ناس الانقاذ تجيكم ليلة القدر مرة واحدة . مافي زول يجلي . هو السرقة دي الا يدقوا ليها طار . انا هني اتحداك تطلع اي وصل انك دفعتا ضرائب او رسوم او جبايات اوعتب او حتي وصل مرور او عبور . وتقول زوجة زميلك ، حاسين بي معاناة الناس . انتو ذي ما بقول المثل الزرزور يتقلا والصياد يتفلا . . الزرزور هو الشعب السوداني الوقع في شبكة الانقاذ . والانقاذ ما هاميها تفلي في قملها .
زمان وصفت الشعب السوداني بالشحادين . بقيت شحاد فضائي . زمان كان في نكت عن ناس البادية عتدمل يجو العاصمة . السواق بيفتح الشباك وبيمد ايده ويأشر . واحد عريبي سأل رفيقه عن تلك الضاهرة . التاني نحت مخه وقال ليه . ده بكون شحاد افرنجي . أٍسي انت يا ابو الدرش بتكون بقيت شحاد فضائي . وذي الدلالية في اخر الشهر . النسوان بدسو منها في لفة البرش . قالوا الناس بقت تدسي منك ووليد السعودي لمن يسمع بيكم جايين بيصاب بشزفرينيا ام برد .
ياخي انت شريك في عصابة قال عنها رئيسك بي عضمة لسانه انها قتلت النفس التي هي عند الله اصعب من هدم الكعبة . وعندك نفس تتهم الناس بالسرقة . موت الاطفال والشباب اليوم ما حركك ولا حتي كذب حكومتك وادعائها بأن المئات الذين قتلوا بالرصاص هم ضحايا المعارضة . معني كده الحكومة فاشلة ولا تستطيع ان تحمي الموا طن حتي قي عاصمتها . والمعتلين الآلاف ديل برضوا في حراسات المعارضة . شو ف يا مصطفي فيديو . واسمع كلام بنتنا سمر التي ضربت بواسطة زبانيتكم وسحلت . وجرت بي الارض من شعرها . هل تقبل لاختك بمثل هذا .
الزول لمن يكون اسمه حسن بقولوا ليه ابو علي وعباس بقولوا ليه عبس او ركس ومصطفي ابو الدرش . الله يدرش الانقاذ .انا والله خايف علي مصطفي ده . لانه سنة ناعمة جدا . بعد سقوط الانقاذ دي الناس حيكون عندها مشكلة . القذافي كا بيكورك حرام عليكم . مصطفي بيشبه و ذكرني زول في امدرمان كان عامل فيها بطل , بقعد مع الجماعة في الرفيرة ويشلع ويضرب السجارة . مرة قال ممكن يمشي بانت يجيب الدخانة . داير يمشي بالظلط قالوا ليه بي خور ابو عنجة اقرب . والخور باليل يمكن يكونوا فيه رباطين . الجماعة انتظروه في حافة الخور شدر ود قلين . الراجل ظهر غاذي سجارة في خشمه وسجار في كل ايد . والايدين مفرورات . والراجل بتكلم مع تفسه ويرد بي صوت عالي ومرة مرة بديها ضحكة . علشان لو رباط شافو يفتكرو مجموعة ناس . اخونا ده بقي يعرف بتلاتة حمرة . لان السجارة العادية بتعرف بالحمرة .
لمن انقاذ دي تروح با مصطفي انت عاوز 8 سجارات . لكن حنشهد انك ما كنت دموي وانك سنة ناعمة بس الشحدة والعمولات والمخصصات ويمكن تصليح ساعات .
التحية
ع . س . شوقي بدري
|
|
 
|
|
|
|
فيس بوك
تويتر
انستقرام
يوتيوب
بنتيريست