|
|
 يا ريس سلام الله
|
يا ريِّس سلام الله
يا ريِّس سلام الله من زولاً هجر بلدو
يا الولوك أمر الناس و وصوك على خلقو
يا السموك على زولاً عظيم سمح إسمو
الفاروق عمر العرفوه بخوف الله فى خلقو
العدل ليهو صفة و نصر الضعيف همو
يسير الليل يتفقد فقير محروم يزيل غمو
بالإنصاف يقيم الحق يثبت للرضيع حقو
عشان اسمك حدانا أمل التاريخ يعيد نفسو
الفاروق يعود يعدل يقيم شرع الله فى أرضو
بجيتك صبحنا نقول بلدنا قريب يعود مجدو
و فضلنا منتظرين إصلاحك يحين وكتو
و زاد حبل صبرنا متر لما إصلاحك بِعِد أجلو
و لما حالنا وقف قلتوا العدو الحصار فرضو
بعد سنوات صبرنا نفد لما الحال فضل ياهو
و فى الآخر حصدنا سراب و فيك رجانا خيبتو
لما هجرتوا درب الله و درب الفانية تابعتو
تجمعوا فى منافع الدنيا و حصاد الآخرة ناسينو
نهبتوا خيرات البلد لي قوت الشعب هاضمينو
بسياسة التمكين حللتو مال الدولة و الباقى غانمنو
الخزينة العامة صبحت مستباحة و الفيها شايلنو
تجنيب مال و محسوبية لا بتختشو لا الله خايفنو
رشوة و اختلاس و نصب و تقولوا شرع الله قايمنو
فساد طايل مرافق الدولة و رجال السلطة حامينو
و لما ينكشف الفساد و يبين بفقه السترة لامينو
و الفاسد بطل يتكرم و فوق مراتب الخدمة رافعينو
و عديم الذمة صادق و على حق الشعب آمنينو
و الجانى حر يتضرع فوق دم الضحية سايبنو
العدالة موقوفة و شرع الله على جنب راكنينو
طلاق و حليفة فى الفارغة و أساس الدولة هاملينو
بعدم الكفاءة و ضيق الأفق عمارنا الباقى خربتو
مشروع الجزيرة الكان عماد بسوء الإدارة دمرتو
لما البترول طلع و اتصدر نصيب الشعب صادرتو
بعوايد البترول زاد غناكم و فقر الشعب ضاعفتو
استأثرتوا بخير البلد و غيركم ليهو الفتات سيبتو
من كتر الجشع و النهب خط هيثرو البعيد بعتو
لجان تحقيقو الكتيرة لليلة ما ورتنا خبرو شنوو
بالجبايات و الأتاوى الظالمة زيت الشعب طلّعتو
بالضرايب و دمغات الجريح فى عيشو ضايقتو
بفرض الزكاة الما حال حولها فى العيشة كرهتو
و لصالحكم العام كم كادح من عملو شردتو
و لما الشعب إحتج لحستو كوعو و دمو أهدرتو
متهمش و حقو مهضوم و السلاح لرفعو أجبرتو
و السودان كبير أفريقيا اتقسم و نصو ضيعتو
خربتوا البلد الشعب صبح فقران و بؤسو فاقمتو
الكوادر هاجرت من الضنك و الباقى راجى اقامتو
كم من عزيز ذل فى عهدك المظلم و اتهانت كرامتو
لو ود أصول ما بترضى الذلة لزول مرفوعة هامتو
لكنك فى الرقيص غارق ما داري بالبلد القامت قيامتو
و البطانة يقولوا لك الشعب مبسوط و يفديك بسلامتو
لكن بلدنا مستهدف أعداه قصدوا تحطيمو و اهانتو
أما رافع السلاح فعميل يستاهل الموت شان خيانتو
أئمرنا يا ريِّس ساعة الدواس تلقانا جن جوادو حاملو
جنجاويدك لا فرزوا متمرد و لا مسكين عايش بسلامتو
داسو الخلق هلكو الزرع سلبو الفريق أمنو و سعادتو
كم نفوس طاهرة راحت فى دواس ما دخلوا ساحتو
إنقاذك المنحوس دمر بلد و شعب مشهود بشهامتو
المرض و الجوع صبح عنوان بلدنا و الإهمال علامتو
و الشعب متشرد غاية رجاه مأوى يحفظ ليه كرامتو
السودانى فى الخارج صبح مذلول و انحطت مكانتو
مبروك نجاحك يا الخليت وطنك خراب شارف نهايتو
معقولة أنتو تقيموا شرع الله يا الخاينين امانتو ؟
معقولة يا ريس تكون سمى الفاروق العالية قامتو ؟
ياخ منو إتعلم عساك يوم الحشر تحشر فى خانتو
خاف الله فى شعبك و رجع ليهو حريتو و كرامتو
إتذكر يوم يواروك التراب و تلقى ربك يوم قيامتو
لا علم نافع لا قراية طه ينجوك من هولو و جسامتو
لا القالوا ليك سير يفدوك يوم يشيّب الولدان إقامتو
محمد ابراهيم شمو
|
|
 
|
|
|
|
فيس بوك
تويتر
انستقرام
يوتيوب
بنتيريست