غندور مسكين ذي عروس المغترب موصية ومحرشة/شوقي بدرى

مرحبا Guest
اخر زيارك لك: 03-19-2024, 06:35 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف اراء حرة و مقالات
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
02-18-2014, 06:36 AM

شوقي بدرى
<aشوقي بدرى
تاريخ التسجيل: 10-26-2013
مجموع المشاركات: 973

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
غندور مسكين ذي عروس المغترب موصية ومحرشة/شوقي بدرى

    غندور مسكين ذي عروس المغترب موصية ومحرشة

    البت البعرسها المغترب بتتعب من الحريش والوصايا . لاتستمتع بي حياتا ولا تريح راجلا . غندور ده جا يدلك الدرب علي قول حبوبتنا مدينة ام جدودنا . ما حيعمل حاجة . ولا هو جاي عشان يعمل حاجة . هو نافع الاشطر منو واقوي منو واشد حقدا وسواد قلب وكره للبشرية ، ما طربقوا ليه اتفاقيته علي دنقوسو . خلوه يتلفت ذي الزول الورقو زايد . وفي الآخر قالوا ليه ادينا عرض اكتافك .

    وغازي ختوه في الرف عشان بياكل بي ايده الشمال ؟؟ ما عشان طلع من وصايا ام العروس وخالاتا . قالو الصراع بعرفو الزول القاعد . والزول القاعد بيدي نصايح . حنكل ليه . امسكه من نصو سردب ضهرك . لكن لم القاعد ينزل الصراع الفصاحة كلها بتروح . الزول البيفاوض بيواجه بحقائق ومنطق حتي لو كان حجر حيتأثر وحيتراجع امام الحق .

    لمن علي عثمان احس بأنه قد دني قطوفها . اتحزم واتلزم وطلع غازي من اللين علشان يدخل التاريخ ويمكن ياخد جائزة نوبل للسلام . وبعد ما ظهر انو نيفاشا كانت سنما غشاشة . بدا الناس في البحث عن كبش فداء . مين البصم ومين الوقع وضحك مع جون قرنق ؟؟. وجاء جون قرنق الخرطوم وطلعت اكبر مسيرة في تاريخ السودان . مين المسعول ؟؟ علي عثمان . وما نفعت حنكة ولا دهاء ولا التظاهر بالطهر والتجرد والفقر والذهد . كله ما نفع التنظيم العالمي للاخوان عاوز دم . فلا يسلم اللؤم الاخواني حتي يراق امامه الدم . اي دم ، مش مهم دم غندور ولا عصفور . فيا غندور بل راسك حيزينوك حيزينوك .

    عروس المغترب بيملوا راسها بي اوعك وحزارك ثم حزارك ، تقعدي تضحكي للراجل وتوافقيه في كلامه . وكان زعل ما ترضيه . هو البحنسك وهو البرضيك . وانت ابدا يا ست ابوك ما غلطانة . والراجل ده ما جابك من الشارع . وبيت ابوك فاتح خيلانك بيسدوا عين الشمس . واعمامك فرسان . وتحمدي الله من صغيرة الناس بيخطبوا فيك , وشنو الناقص في بيت ابوك ؟ . وما تخليه يسمع كلام امو . واوعي تخلي امو تجيكم . ما عندها بناتا ما تمشي ليهم ، تجيك انتي هاملة . القروش تمسكيها انتي دي . في راجل بيخلوا ليه الفلوس ؟ شن عرف الرجال بي مسك الفلوس ؟. واخوك تعملي ليه اذن عمل يجي يشتغل معاكم عشان نصلح البيت . وبت خالتك شوفي ليها عريس يكون غنيان , ياريت تكون امو ميته وزول الله . دي وصايا الانقاذ لي غندور . لكن يا غندور ما كل الطير بيتأكل لحموا . في مغترب بيرجع البت لي بيت ابوها .

    الظاهر غندور وصوه يشتري وقت لحد ما يفتحو سباليق الاستثمار والقروض الربوية . وربنا يفتن المعارضة والفقرا تبرك وتعمل ليهم معجزة ذي موتة جون قرنق وتحلهم ، ذي خضوع حزب الامة ومشاركة الميرغني . ومين عارف الجنوب يحرق ويحتاجوا لي ملاليم ويقبلوا مرور البترول بي 80 دولار للبرميل .

    بس يا غندور امشي وما تدي اي حاجة والعبره في القدامك غازي نافع وعلي . فتح عينك ذي الريال ابعشرين . شفت قوش عملوه صبي سمكري بس يسخن القلفونية ويلم القصاصة . بعد ماكان فاكر نفسوا سيد الجلد والراس . وفكر في انو بيت الانقاذ لازم يتزبل قبل المطر . والعيد بقي يجي في الخريف يعني زبالة وجير من الداخل . وكلم احمد عمر وكلم عمر ابراهيم وكلم ابراهيم غندور وكلم غندور القط وما فهم القط الكلام . وزعل ياسر عرمان وترك البكان . وخاف غندور من الامريكان لكن التنظيم العالمي حردان . الدود فوق العود . هل الوطواط يطير ؟ هذه اسئلة كتاب المطالعة في الاولية . يمكن تساعد . عروس المغترب موصية ومحرشة . وبت خالتها عاوزة عريس هين ولين وامه ميتة واخواتو صغار.

    ولكن الناس العاقلة عرفت من الحصل لي كل زول اتفق مع الانقاذ من الشيوعي سبدرات وريك مشار ومناوي والصادق والميرغني كلهم طلعوا بي قد القفة . والسعيد البشوف في غيرو والشقي بيشوف في روحو .

    وكمان اخيرا ظهر الغول وكيل ابليس في الارض ، الترابي . وده فام بعاتي مش محرش بس ، ده حاقد عديل . حيرقد للناس شعرة جلدا لكن البكجموا الا حمار الوادي يهنق . وان كان البشير ما نسي وصية جعفر نميري لمن رجع السودان . تفك الترابي حتلقي نفسك ذي حالتي دي ما عندك شغلة غير تمشي لي بيوت البكيات علشان تقابل الناس .

    في النهاية الانقاذ كالعادة حتعمل بي سياسة ضربني بكي وسبقني اشتكي .وحتشغل اعلامها وكنكوجا الما بتعب ولا

    بينقرش . وتحلف بكل مقدس بأنها كانت جاية بي نية صافية بس التانين كالعادة نيتهم ما سليمة . و حتقول علي كل حال الانتخابات بيناتنا وانحنا اصلوا بنموت في الديمقراطية , والماتو في سبتمبر قتلتهم الفئة الباغية لانها خدعتهم واخرجتهم ضد اولي الامر .

    ع . س . شوقي








    أنتم أنا
    للشاعر / حسن الأفندي
    قد جئت في دمعي بشعر رددا

    سوداننا مليون ميلا مذ بدا

    هلا عرفتم من قديم خريطة

    ما باله مسخا مشوّه قد غدا

    هل هان سودان الجدود عليكم ُ

    فكرهتمُ ألا يكون موحدا ؟

    منقو أخي منذ القديم ولم يزل

    ولي العديد تفرّدا وتوددا

    إن أنَّ في ملكال ديفيد صارخا

    لبست له الخرطوم ثوبا أسودا

    النيل يروينا وتربة أرضه

    غذت الجميع مع الترابط سؤددا

    صاغوه سودان الجمال قصائدا

    حفرت دواخلنا جمالا مفردا

    ولنا, لكم قربى وطبع أماجد

    كيف الجفاء يصير فينا سيدا

    أنتم أنا وأنا لكم , ما بالنا

    كل تنكر للعلاقة بددا؟

    تلك الخريطة في جمال حدودها

    تأبى تفارق ناظري على المدى

    أنا من رواني النيل منذ طفولتي

    حبا لأهلي الطيبين وأنشدا

    لا عاش من يسعى يمزق ربعه

    أو عاث في ظل التناحر مُرعدا

    سيسطر التاريخ عنا سوءة

    كبرى تلاحقنا وتسألنا غدا

    أين التلاحم من قديمٍ أين ما

    كان البطولة والرجولة والفدا؟

    بل أين ( عزة ) في هواها كان من

    ودٍ قديم صاغ شعرا أخلدا

    اللهَ يا سودان إني عاجز

    وقصير باع ليس يملك موردا

    عاش الحياة بفقرها وضياعها

    وأبت حظوظ أن تمد له يدا

    اللهَ يا سودان ماذا في يدي

    حتى أسوقك للسماء الفرقدا

    حتى أراك عظيم مجد في علا

    ك حنى لك التاريخ رأسا مجّدا

    حتى يعود بنوك في رشد لهم

    وبمثلما كانوا المعارف والندى

    كانوا الإباء وشامخات من علو

    مٍ من ثقافاتٍ ومن نور الهدى

    كانت لنا الخرطوم لاءات النضا

    ل فكيف ضاع حصاد سادتها سُدى؟

    أمن السياسة أن نعيش تمزقا

    بئس السياسة أن تكون المفسدا

    أنا لا أطيق سوى خريطتك التي

    منذ الولادة أرتضيها مرقدا

    كانت بعيني في جمال مفرط

    كانت لي الزهو الجميل المسعدا

    والله ما برحت حدودك لحظة

    طرفي ولا سئمت عيوني مشهدا

    في خضرة النيلين عشت مراتعي

    وعشقت ليلى والكنار مغردا

    واليوم أبكي أن أراك كما ترى

    حزني يُورّثني السقام معددا

    انفض سامرنا وينعق بومنا

    ما عاد من رأي نقيم مسددا

    قتلوك هم , وأدوك هم , يا جرمهم

    ما بالهم باتوا طغاة حُسّدا

    كم مرة قد قلت فيك قصائدي

    وبثثت من درر الكلام الأجودا

    وطني وضوء الشمس أنت ودفئها

    في يوم حالكة وليل برّدا

    لو أبدلوني حرَّ شمسك بالنعيـ

    ـم وعن رمالك أو حجارك عسجدا

    ما اخترت إلا أن أكون بأرضكم

    وأموت فيها ثم أدفن سيدا

    ولغيركم لا ما عشقت ولا أنا

    غيّرت جلدي ذات يوم جاحدا

    سبعون من عمري تمر وديدني

    صبر على الأيام أرقبها المدى

    حتى إذا ما زلزلت خطواتنا

    جئناك شعرا بالمرارة منشدا



























                  


[رد على الموضوع] صفحة 1 „‰ 1:   <<  1  >>

تعليقات قراء سودانيزاونلاين دوت كم على هذا الموضوع:
at FaceBook




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de