|
|
 قصــة حبــي... لي..حيــاة طلســـم
|
الولد وقت دابو يبلغ... اهلنا بيقولو شمّ صُناحو.... علاقة تيسية...واضحة.....
لما كنت مراهق.... ويا دوب تتيست...مغرم بالمسللسلات....زي وزي باقي خلق الله...المسلسلات المصرية..... حبيت واحدة ممثلة... واتكسرت فيها..... والغريبة كنت من صثحي مكسر.... مي عبد النبي..... زات الشعر الكورية....مكفي فوق راسا.... تشبة البليه.... حاجة صغيرونة كدا ولزيزونا....عيونا يبقن سمحات لما تتطيرين....وطيّرت عيونا دي هي زاتا الخلت عقلي يطير......اتكسرت فيها...وبديت احضر نفسي للزواج منها.....ياهو دا عرس ابدردوق للقمرا..... لكن البيقول لي الكلام دا ..مستعد اخد فيهو اعدام.....حدست امي..امي حلفت بجميع اسيادا.... انها ما بي تناسب الحلب.....قعدت حردان الاكل في البيت تلاتة يوم..مكسور الخاطر...
فجاة لقيت نفسي بعد سهرة تلفزيونية مع البلابل.... اني حبيت البلبلة الصغيرة....بس يا سجيمان دي زولتك زااااااتا.... مالك مسوي نفسك في سفر وغربة..وتمشي تجري ورا مي عبدالنبي ..مي طايرة في بلد الله....حياة... حبيتا وحبيت سنها المخلفا.... ولما تضحك...انا بجاي اتجهجه واتلولو زي الدبيب....كتبت لها جواب.... اكتبو واقطعو يمكن عشرة مرات...قلت باللوال ادخل عليها بكلام حلو يفتح نفسا....وبعدين ننضم في العرس.......الجواب كان:-
"يا ام جضيمن بلا بسم الله
يضوي...............بق
حبك دخل قلبي من جوا
زي ضبن ضهبان ولقى الشق
سمحة وشايله المنقة
والبنات غيرك شايلات النبق
.....الله يشوفك هادي انتي يا حياة..... من يوم شفتك في التفلزيون... انتي واخياتك الاتنين..انت اصلكن يا بنات طلسم قاعدات تشبهن بعض... يا عاملات امي زي الجراد كلو يشبه بعضو..... من شفتك ضاقت بي الوسيعة...وريدتك.. ريدة الجداد للكوش..وريدةالمعزة لي جناها....وقلت خلاص انا وقعت فوق نصي التاني .. انا وانتي فولة وقسموها نصين...طورية ولقت عودا.... انتي الطورية وانا العود...شفتك في التلفزيون... يا عاجب لك نحن عندنا تلفزيون.. واحد وعشرين بوصة.... جايبو ابوي من السعودية... ابوي شغال هناك.... يعني من ناحية هدوم ونعلات.... وشيلة عرس؟....ما تشيلي هم تب......وبعدين انا حدست امي بي دوارتي ليكي....وقالت موااافقة موااافقة.... بس علا دايرا تعرف شي واااحد.... دايرة تعرف انتي بتعرفي تعوسي ولاّ لا؟....خلي بالك امي ما بتدور المرا المبوجنة والخمجانة..انا غايتو من حسي حدستك......وانتي بعدين مخيرا...
اها نحن حسي... دايرين نحدس ابوي....زنجي نقابل عمنا طلسم... عشان يدوروكي لي....... علا البيت ماني عارفنو؟
حبيبك سجيمان"
كنت مكجن بشير عباس...واسعل الله كل صباح يقوم لو حبن في شلاليفو..عشان ما يقدر يصفر ويخلي مبارات البنيات ديل وخصوصا... حياة
مكجن برضو ابوعركي.... مسوي شنبو دا....يومي المشيت اودي الجواب لي حياة.... لقيتو قاعد في نصهن في ضل ضحى في الاذاعة..ويتونس وحياة تضحك معاهو....زعلت وغدبت جنس غدب... لكن قلت بعد اعرسا.... ان شافا تاني يشوف قعر اضانو....
وقفت زين ...مسافة..... قلت... كان حياة دي تجي ماشة بي عندي...وارمي قداما الجواب....واستناها....... حياة جات..ماشا.. انا اتكبكبت....ودخلت يدي في جيبي....وجدعت قداما........ كيس الصعوط.......
|
|
 
|
|
|
|
|
|
|
|
Re: قصــة حبــي... لي..حيــاة طلســـم (Re: سجيمان)
|
صديقي عادل
ودعمتنا عبد الباقي ...أبوه إمام الجامع ...كان يدرس في جبل أولياء 40 كيلو من قريتنا ...وعادة الطلبة لا يحضرون الي القرية إلا بعد مرور شهر أو شهرين على حضورهم الى المدرسة .....إغتنم عبد الباقي فرصة زيارة أحد الأقارب له.... حيث طلب منه توصيل رسالة الى أهله يطالب فيها بمده بمصروف إضافي لتغطية إحتياجات أيام الإمتحانات القادمة ... ......وبعد أن ودع قريبه و تأكد بأن اللوري قد تحرك متوجه الى القرية الحبيبة ...رجع عبد الباقي الى محل سكنه ...تذكر بأنه قد كتب رسالة مماثلة في نفس الليلة لحبيبته قد سكب فيه شعوراً وليس حروفاً كتب لها كأنما لم يكتب من قبل .....فتح الرسالة وقلبه يخفق بعنف وتتوارى له عيون حبيبته الساحرة ....صعقة كهربائية لامست رأسه عندما وجد رسالتة الى أبيه لم تبارح جيبه .......ورسالة حبيبته هي التى أودعها جيب قريبه....حينها تأكد أن هذه الجريمة عقوبتها على اقل تقدير حرمانه من المصروف ....وحرمانه من العودة إلا بعد ذهاب الخجلة ....بطول المدة
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: omer almahi)
|
سي جي الحبيب
( مي عبد النبي..... زات الشعر الكورية....مكفي فوق راسا.... تشبة البليه..)
في واحد قال ( راسا يشبه الحنة الفي الأصبع الكبير ) 
بعدين ( نحن و البلبل في عطبرة كنا جيران حيطة بالحيطة ) .. لو كلمتني كنت إتوسطت بدل ما تخش في رمي أكياس الصعوط
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: ابو جهينة)
|
ياسجيمان انت مصيبتك انتهت لكن مصيبتي انا بدات انا بحب تماضر شيخ الدين لي بعدين اي حاجة تكتبها تماضر انا بخش بقراها,تماضر اسمها تماضرشيخ الدين جبريل, وقريبك حاسب تماضر جبريل , ماهي تماضر شيخ الدين واقوم اخش لفت في تماضر بي تلفون الساعة اربعة ونص صباحا اصحي الزولة من النوم.واقول ليها انتي منو يا اختي, حلها الجليل الرحيم مني,لكن تاكدت من انها زولتي تب, لكن مارميت كيس تمباك قطعت ليها نومه سمحة تكون بدعي فيني ليوم الله
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: omer almahi)
|
عمر الماحي
| Quote: ....حينها تأكد أن هذه الجريمة عقوبتها على اقل تقدير حرمانه من المصروف |
وعلقة......انا زمان اخدت علقة..... لما ااديت الجواب لاخوي الصغير بدل ما يديهو ليها..اداهو اخوها الكبير..واخوها العوير جابو لابوي... ونحن قاعدين نتغدى بملاح اسود... لي يومك دا انا مكجن ملاح الاسود
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: بلدى يا حبوب)
|
| Quote: كنت مكجن بشير عباس...واسعل الله كل صباح يقوم لو حبن في شلاليفو..عشان ما يقدر يصفر ويخلي مبارات البنيات ديل وخصوصا... حياة |
انت آ سجيمان اخوى ,بشير عباس دا ليه دايما ماسك عودو بى يدو , و ملبب البنيات ديل كدى؟
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: Saifeldin Gibreel)
|
حبيبنا سجيمان..
كلامك الكتبتو دة كلو انا بى ضبانتو حأنقلو لى عثمان جمال الدين,ويمكن تكون عارف منو يطلع عثمان جمال الدين بى عيونو الحمر ديك وشنبو الزى الرباط..عشان اوريك انو انا فتان قدر شنو...اصلى شايل وزعلان منك شديد خلاس من ما خذلتنى مع قونقوليزا..وهسى وكت انتقامى الرهيب جا(سارتانا لا يرحم ياسجيمان)..ويلا شد حيلك .
مع تحياتى.
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: Saifeldin Gibreel)
|
سجيمان :
يعني كيس الصعوط دا معاك من الزمان داك ؟؟؟؟؟؟؟.
عليك الله يا قشيران ياخوي زول شايلو كيس صعوط قدر دا يقوم
ما يحب الا البت دي ؟؟؟؟؟؟؟.
لا ...... وشنو ؟؟؟؟؟؟؟ حياة طلسم شخصيا قال !!! .
أحسن تشوف ليك ست عرقي بدل تمشي تبهدل نفسمك مع بنات طلسم ديل !!!
وحياة دي اخير تشوفها بس في التلفزيون .. طبعا دا كان فعلا
عندك تلفزيون ذاتو!!!!!!!!!.. يعني اخير يكون حب بالريموت !!!.
خضر عطا المنان
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: خضر عطا المنان)
|
خضر عطا المنان
Quote: وحياة دي اخير تشوفها بس في التلفزيون .. طبعا دا كان فعلا
عندك تلفزيون ذاتو!!!!!!!!!.. |
شفتها في التفلزيون وبرا التفلزيون....زي بعضن الخالق الناطق.....وكان عندنا تلفزيون واحد وعشرين بوصة توشيبا...موبيليا كمان ان ما عجبك
| |
|
|
|
|
|
|
|
|
|
Re: قصــة حبــي... لي..حيــاة طلســـم (Re: سجيمان)
|
ياجماعه سؤال انتو ابو عركي اتزوج حياة .... غايتو انا بتذكر حاجات كده .... وبعدين يا دكتور بالله انته من زمن جكسا في خط سته.... بالله شوف الزول ده بالله.... لوووووووووووووووووول @ سجيمان
| |
|
|
|
|
|
|
| |
سجيمان
abas
omer almahi
ابو جهينة
saif massad ali
walid taha
محمد الامين احمد
بلدى يا حبوب
Saifeldin Gibreel
قلقو
manubia
خضر عطا المنان
لؤى
willeim andrea
فيس بوك
تويتر
انستقرام
يوتيوب
بنتيريست