|
قـــــررت.......ان......اعـمـــل.... شــحــاد
|
شغل قريب العشرين سنة... وجاري ريقي ناشف...والحال ياهو زاتو الحال... الفقر لاصق فوقي.... لصقة عدوك.....قلنا نغير شغلتنا دي ما منها فايدة وما جايبه همها.... ندخل سوق الله اكبر..... لكن ما عندي راس مال.....الحل شنو؟..... اشتغل شحاد... ما دايرة راسمال ولا حاجة.....ولا ضرائب....ولا في زول يقول داير منك حاجة...وحيدور شنو من شحاد.....؟.. لكن لابد من خطة عمل.....واضحة المعالم والاهداف....اختيار مواقع الشحدة مهم جدا جدا... الصباح... كباري امدرمان...اقيف برا الكبري واشحد الله تحصل زحمة او اكون اتفقت مع بتاع الحركة وليهو عشرة في المائة من المحصول بس هو يعطل الحركة...والف انا على العربات عربية عربية....دفار لا.... امجاد لا... حافلة لا....موديلات قديمة لا.... لحدي الساعة تسعة صباحا.... بعد كدا اتجه الي السوق.....الخرطوم السوق العربي... لحدي الساعة واحدة ونص وامشي اربط في الكباري برضو بالاتجاه العكسي لحدي الساعة تلاتة ارجع لوليداتي محمل مكمل...... اسلوب لشحدة حيكون.... ادرار الشفقة... ثم الترهيب والترغيب.... حيكون في شكل مدايح نبوية...... للفت الانتباه اكتر......يعني مثلا.... اقف جنب عربية والله دكان واقول..............
البيدي بالدولار
يا الله تتم ليه
اللي نبيهو زار يا الله تتم ليه
المابيركب حمار يا الله تتم ليه
اب جضوما كبار يا الله تتم ليه
طبعا زولنا في اللحظة دي يكون اتنفخ واتبسط... ويحلف حرام الا يديني بالدولار.. وقت انا عشمت فيهو كدي.....ويناولني.. وهو يقول لي الله يفتح عليك يا شيخ سجيمان..ودعواتك معانا عليك الله...........طبعا ما كل الناس حتدي.......في ناس جلود وقحوف....وديل استعمل معاهم الارهاب المديحي....واول ما يقول لي الله يدينا ويديك وينهرني....... طوالي اقلب المدحة......
علم السلب والنصب
لغة السوق... العربي
المضارع و... الماضي
يا المنفوخ في الفاضي
باكر تقيف قدام القاضي
وتتعلم .......... الادبي
علم السلب... والنصب
لغة السوق.... العربي
حرف العلـــــــــــة
يا........ علــــــــة
انت اريتك.. بالعلة
ما بتدينا انت ان شاء الله
بالقمل....و..... الجربي ..... برضو النسوان ليهن ... نصيب ....والواحدة فيهن ان سخت.... بتدفع صاح.....واي واحدة حاركز في المدحة على انها ضغيرة...وسمحة...واي زول ممكن يتكسر فيها......
قالو النور....... قطع
وانتي جضمك ولع
ضرسي الزاد وجع
في ريدك قلبي وقع
وسط اخواتها ما بتجعجع
للمال.....ما..... مابتجمع
حلقها.... تريان ما لعلع
وللقراصة ...ما..... بلع
ويا هووووووووووووووي هووووي
في ريدك قلبي وقع................
قالو النور قطع ....................... ..................... ..................... واستمر في المديح....واشكرها لمن تفتر.... و تناولني ...الفيهو النصيب وتقولي لي.... اديني فاتحة مجيهة كدي.... انو ربنا يحقق لي الفي مرادي....وانا اقرا الفاتح واعاين للقروش في ايدي واقلبن عشان اشوفن كم......... برضو في نسوان ....ما بيدن....ولا مليم...وكعبات ويجيبن الفقر.... للقرن الافريقي كلو...... زي دي اول ما تقول لي الله يدينا ويديك.. والله تطنش وتعمل نفسها ما شايفاني... اقلب علي مدحة السوق العربي...........
علم السلب... والنصب
لغة السوق .... العربي
نون النسوة... يا انتي
شحت الله... يا انتي
يالبتشبهي..... القرنتي
انتي............ تسختي
..و يقوم......... لك ضنبي... . علم السلب.. والنصب
لغة السوق....... العربي
تاء التأنيث.... يا كروره
يالما ضقتي عرس الكورة
ان شاء الله تلم فيك.... بورة
والزمن يديكي..... بالكعبي
.................................. وطبعا لازم تنوع في المدايح...وكل يوم شكل جديد... وحاكون مشهور جدا......كاحسن شحاد للالفية التالتة.....وفي الخرطوم بالذات.....وبعد شوية ما حاحتاج امدح زاتو .... لانو الناس اول ما يشوفوني طوالي حيدوني.....ويمكن كمان يرسلو لي حقي وانا نائم عند اهلي ووسط ووليداتي.....ولازم احاول اطلع تسريح....بمزاولة المهنة رسميا......واقوم بعمل اللازم لحماية نفسي من الناس النفسهم صغيرة......ويكون عاوزين ينتهجو نفس المنهج ويشحدو زيي..... مافي مشكلة بس انا كمؤسس لهذه الطريقة.... لابد من دفع مبلغ معلوم... كل يوم..... لي....واعمل نقابة... شحادين السودان.....وشعارها حيكون القرعة.... واكون انا اول نقيب للشحادين في السودان......الله يقدم ما فيهو الخير
|
|
|
|
|
|
|
|
Re: قـــــررت.......ان......اعـمـــل.... شــحــاد (Re: سجيمان)
|
السيد نقيب شحادي السودان
ارجو منك التكرم والنظر لطلبي هذا بعين الاعتبار والشفقه الرجاء ضمي لنقابتكم في اسرع وقت
عشان عندي باقي يناء بدور اكملو يا ريس
انت عارف يا شيخ المداحين انت كدا بتعادل رئيس الدوله لانك نقيب الشعب السوداني كلو
هو في سوداني ما بيشترك في النقابه دي والله انا خايف عمنا عمرو ينافسك في الشغلانه دي
| |
|
|
|
|
|
|
Re: قـــــررت.......ان......اعـمـــل.... شــحــاد (Re: سجيمان)
|
سجيمان ....اقول ليك حاجة... إنو في منظمة الله كريم الدولية وصلت اسهما 73000000 وعشان ناس هوب ليس ما يشوفوك احسن تسرب ليهو معلوماتك تحت تحت و اوصيك ابعد من البت الشريرة المهترشة شيري ...دي بتعرف ناس المنظمه كلهم
اخيرا ....خليني امسك ليك العصاية
ابو القدح بعرف محل بعضي اخو
| |
|
|
|
|
|
|
Re: قـــــررت.......ان......اعـمـــل.... شــحــاد (Re: alfatih)
|
سجيمان والله انت متفائل ربنا يديك العافية الظاهر عليك نسيت ناس الضرئب والجمارك والزكاة والحاجات الكتيرة ديك لكن تعرف عشان برامج الشحدة ده يكون ناجح لازم تشوف ليك زول عندو ضهر في الحكومة دي عشان يعمل ليك اعفاء جمركي وضريبي ويديك حق الاحتكار
| |
|
|
|
|
|
|
Re: قـــــررت.......ان......اعـمـــل.... شــحــاد (Re: alfatih)
|
الفاتح اخوي
شكلك والله اعلم ماقريت المؤسسين لمنظمه الله الكريم الدوليه كويس
دي انت عارف رئيسه منو...؟ دا ما انا بس طبعا داخل عليهم اندر كفر
ودا كلام تحت تحت ما يتسرب بالله عشان زولك يلمها ويجييبه للفيل يطاها ويطاهم معاها
وطبعا اخر السنه ارباحهم حتكون الله كريم وربنا يفرج هموم المسلمين..والله يدينا ويديكم
في ارباح احسن من الدعوات دي اها ماعندك قريشات تجينا بيهن..؟
| |
|
|
|
|
|
|
Re: قـــــررت.......ان......اعـمـــل.... شــحــاد (Re: سجيمان)
|
سجيمان كالعادة نبحث عن الجمال عندك لك الود والسلام
الا ياخوي الفقر لامن يلصق بالذات في بعض الناس مش كان اغتربوا والله اشتغلو شحادين مابنفك من رقبتم والله كان لميتا بلايين تلم فيها مصيبة تفرزعا واسع عليك الله مع الشحادين الملو البلد تلقي ليك حتة تقيف فيها وين والله انا خايف وقفتك يجو يشحدوك
غايتو الا كان تمشي الاقاليم والله اقولك احسن تجرب دفتر دبلكيت وكربون و حكاية عندنا جامع داير نبنيهو ودي ممكن تبداها من محلك وتواصل في السودان بس اهم حاجة الجلابية والعمة التمام والدقن الكبيرة
لك الشكر عبدالله جعفر
| |
|
|
|
|
|
|
Re: قـــــررت.......ان......اعـمـــل.... شــحــاد (Re: سجيمان)
|
سجيمان دي شديدة كم كرت عليك الله مبالغة انت اقول ليك حاجة انت عسل والله العظيم وفاهم كل شي لكن عامل لينا فيها سجيمان والله انت مجيه جيها يعلما الله شكرا ليك وربنا يخلي ليك البجيبو الكلام دا طالع من راسك اب تلاتة اضنين دا قول لي اخبار تالتة اخواتة شنو
| |
|
|
|
|
|
|
|