|
طـــلاق ام العيــال و كشـــف الحــال
|
اهداء
الي كل زوجة باقية عشرة في راجلا
الي كل زوج باقي عشرة ونص في مرتو
مدخل ___
البوست غير موجه وان شاء الله اتسخت وابقى قرد في ابيي واتجهجه وما اعرف انا مع منو كان انا قاصد زول......
دخل علي زهجان .... شايلو كراس ابو مائة صفحة فاضي...صاحبي سعد الله لا بيقرا ولا بيكتب...لكن زول بتاع مشاكل.... كورك لي وقال لي تعال....وجيب قلم.. جيت وجبت القلم وقلت لو ان شاء الله خير.... قال لي انا طلقت المرا ....وداير ارفع قضية في اهلها يعوضوني خسارتي الخسرتها فيها عشرة سنوات وانا اصرف عليها... ودايرك تكتب التكاليف كلها في الكراس دا......قلتو سمح اها؟ قال لي اولك بالتبادي.... الاكل والشراب..... اكتب عندك
لوري ونص لوري عيش
نص لوري قمح
بوكسي دقيق فينو
تلاتة لواري فحم.... انت عارف يا سجيمان المرا دي كانت كل ما تحمل وتتوحم تقع في الفحم اكل وقرميش
تريلة ملوخية
تريلة رجلة
تلاتة بكاسي قرع
اتنين بوكس جرجير
اربعة لواري بصل....من الله خلقك شفت زول قاعد يتفرج في التلفزيون ويقزقز بالبصل؟...وبصل ناشف....تاكل وتتمخت بي طرف جلابيتا
فنطاظ صلصة
فنطاظين زيت سمسم
فنطاظين زيت الاكل داك
اربعة فناطيظ لبن
برميلين ودك
برميلين كركار
اربعتاشر تور..... كانت يا سجيمان في الفطور نص كيلو لحم وفي الغدا برضو نص كيلو.... جبتها من اهلها زي القشة حسي شوفا يا الله ويا امين ماشة علا يدردقوها
تلاتاشر خروف وغنماية
..... اها يا سجيمان نجي للعلاج والحكماء والزي منو
اربعة جركانات دواء حق حقن حقات موراريا
اربعتاشر جركانة حقت دواء حق اسهال...ديييييييييييييمة ...ديمة...اااااه خلها علي الله
تلاتة شوالات حبوب وجع راس
شوالين حبوب حقات استلهابات....طوااااااااالي مستلهبة
تاني يا سجيمان نجي للهددم....
اربعة طاقات تيبان
ستة طاقات قماش فساتين
خلاص يا سجيمان كل ما اتذكر شي بجيك راجع تاني..... قلت لو ياسعد الله اخوي الهدوم كلهن كانن تيبان وفساتين وبس؟...والهنايات ديك؟..... قال لي ... لا الهنايات ديك اراح معاي البيت عندي ستاشر مخدة.... امسك لك سكين وافتح اي مخدة وشوف البلاوي البتجي ناطة منها..... وانا يا سجيمان اخوي اتوسد مخده مخده... وانوم الهلاويس كان جاتني خاتية؟......وبعدين الهناي ما ياخد عندها اسبوع تلقاهو اتهرد واتقطع ... المرا تقول بطارية عربية؟
|
|
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
وحدات القياس السجيمانية
اللوري لقياس العيش و القمح و الفحم و البصل
البوكسي لقياس دقيق الفينو و القرع و الجرجير
التريلة لقياس الملوخية و الرجلة
الفنطاظ لقياس الصلصة و زيت السمسم و زيت الاكل و اللبن
البرميل لقياس الودك و الكركار
التور لقياس اللحم
الخروف لقياس اللحم
الغنماية لقياس اللحم
الجركان لقياس الدواء
الشوال لقياس حبوب وجع الراس و الحبوب حقات استلهابات
الطاقة لقياس التيبان و الفساتين
المخدة لقياس الهنايات ديك و بطارية العربية
| |
|
|
|
|
|
|
Re: طـــلاق ام العيــال و كشـــف الحــال (Re: Osman Hamad)
|
سجيمان يا خوي انت عم شوقي بدري هرشك قلت داير معاو عصراوية نكت ليك الناس الكان بقيل معاهم مخخنجية و ربابيط و اتخلعت و هلوس معاك جلال و حقك الضائع، عشان كدا مرقت لينا بالبوست دا و رغم دمو خفيف لكن كمان يا حبة زودتها حبتين و اللبيب بالاشارة يعمل ما فاهم. اطيب التحايا و الود و الاحترام و اخيرا ان شاء الله بوستك دا ما يجيبليك هواء ادارة او زوار و كان لاموك الزملاء او لفتت الادارة نظرك خير و بركة و انا عارف صدرك واسع، و كمان لو البوست جاب معجبين و كلامي دا طلع هواء فامسحوا لي في وشي دا. وجهة نظر اخ لاخ كريم و ما لامك الا حبيبك.
| |
|
|
|
|
|
|
Re: طـــلاق ام العيــال و كشـــف الحــال (Re: حمزاوي)
|
يا حمزاوى اخوى اهو سجيمان رد ليك...القطن للمراتب واللحافات ...والله اليومين دى الواحد بقى يكتب وقلبو فى يدو....خايفين من اللبس.
اخوى حمزاوى عليك الله ماتزعل منى والله العظيم انا ماعندى معاك اى مشكلة...بس اليومين دى الناس بقت حساسة شديد..لابتفرق بين هزار وللاجد...والزول يكون قاصد حاجة...يلقى الناس فهمت حاجة تانية.
غايتو ياجماعة اعفو مننا لله الرسول..انا غايتو ماعندى مشكلة مع زول...ولا عاوز لى مشكلة مع زول...وكرهتى فى الدنيا دى المشاكل...دحين كان فهمتونا غلط العفو والعافية...وكان جرحنا لينا زول بالغلط برضو العفو والعافية.والصدر رحب لاستقبال اى تنبيهة
| |
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
يا سجيمان تحياتي الحارة لك ولمن معك
Quote: البوست غير موجه وان شاء الله اتسخت وابقى قرد في ابيي واتجهجه وما اعرف انا مع منو كان انا قاصد زول...... |
يا سجيمان غايتوا شيل شيلتك لو ما اتسخت وبقيت قرد ناس ابيي ما بخلوك وغايتوا مسمار جحا لو مع ديل ووب ولو مع ديل ووبين
طبعا سعد الله بتاعك دة لقى أياموا وعايز يحاسب كمان دة كان زمان وزمان برضوا النسوان مساكين لو طلقوهن بشيلن اولادن ويمشن أهلن لكن أسة كان طلقوهن صاحبك سعد الله دة بشيل الأولاد هو وبيمشي بيهم وين عاد ما بكرة بس بجيب المرة ثاني وخصوصا لو كان في واحد برضع أو واحد عكليتة وجنوا اسئلة .
ولك تحياتي
| |
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
سـجـيـمـان ســــلام
يـاخـــوي صـاحـبـك دا كـــتـب كـــل المـصـاريـف اللي لــيهـــو
طــيــــب المــصـــاريـــف اللـي عـلـيـهـو ويـنــــي ؟؟؟؟؟؟؟
ما تـسـألنــي هـــي شـــنــــو عـلـشــان ............ بوســتـــك دا ما
إبـــقـــى فــي خـــبـــر كـــان
و المــخـــدات دي إتـمـلـت بــي شـــنـــو ؟؟؟؟؟ يعني بطارية العربية دي هي
براها يا خوي إنت مالك زول ظـــلامــي كـــدا و صـاحـب فـكـر ذكـــوري
؟؟؟ خليك إنـسـان عــــادل
| |
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
سي جي العزيز
صاحبك سعد الله دة لو أنا محامي و قامت زوجتو وكلتني أرفع عليهو قضية ،، و الله يشرب ما يروى. أها نجيك لتفنيد مطالبو : 1. جابليها الفحم في الوحم بدل ما يجيب ( طين بحر ) ،، و دة يعتبر تزوير في ( فحمات رسمية ). 2. جاب ليها بصل للقزقزة أمام التلفزيون بدل ما يجيب ليها ( مكسرات ) ، و دة كمان سبب الإسهال المتواصل. 3. حبوب وجع الراس و كميتها ثلاث شوالات ،، و السؤال هنا : ما السبب في وجع الراس ؟ 4. شوالين حبوب حقات إستلهابات ، طوالي مستلهبة . سعد الله هو سبب الإستلهابات و هو الستين مستلهب ،، ما يقعد يستلهب في المرة ساكت و يسجل الحبوب على حسابا هي. و الله مرتو بت أصول ،، لو كانت دايرة تفضحو كانت تقول سببو. قول ليهو يسحب الشكوى ،، و إلا و الله عندنا مستمسكات ضدو توديهو التوج. قلت لى بطارية عربية ؟
| |
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
سجيمان انت ما قلت البوست داك طرفك منو. مالك جيتوا صادي، معقولة فكي و فقير زيك يكضب ويستهبل و لا داك كان كلام زعل ساكت، و بعدين تعال النسعلك شابكنا خسارتو و المحامي بهناك خسارتها و لسان الحال يقول: خسارة قلبي في حبك وا خسارة... لك الود و التقدير و نرجو تورينا بتكتب بالاحمر لية و كيف.
| |
|
|
|
|
|
|
Re: طـــلاق ام العيــال و كشـــف الحــال (Re: سجيمان)
|
تتبارك ما تتشارك يا شيخنا دا اول تمرين عملي و شكرا و كتر خيرك. طيب، نرجع لحبك للون الاحمر و انت قلت حب البتيخ. و حب الناس مذاهب دي مفروض تتغير حب الناس فواكه.. و لا شنو. انا طبعا بحب اللون الاحمر لاني مريخابي، و دي ما منعت انو لوني المفضل الازرق و تلاتة ارباع هدومي زرق فاتح و غامض و سماوي و لبني و كحلي. ثالثا انت كان مفروض تكون شفاف و تقول بتحب الكتابة باللون الاحمر عشان هو لون الدم، الضحية، بالروح بالدم، عشان الريد اختلط بالدم،
| |
|
|
|
|
|
|
Re: طـــلاق ام العيــال و كشـــف الحــال (Re: دورنقاس)
|
و الله البتيخ على عينا و على راسنا من فوق، البتيخ الخدار الطاعم داك، لكن ياخوي كمان كان عندكم بتيخ تاني مع فلان و علان نحن برة الموضوع دا، لكم بتيخكم و لنا بطاطسنا و لا كيف. اها ما نوصيك ما تستعجل في البتيخ التاني قطعوا بمهلة و اديو الفريزر عشان يكون شغل مثلج.
| |
|
|
|
|
|
|
|