|
|
 زغــاوة....... يـا رســـول الله
|
شهادات الدكتوراة.... بقت الكوم بي قرش و الدُقة بلاش.....بقى عدد حملة الدكتوراة يساوي عدد المغتربين...وعدد الناس العندهم ملاريا مزمنة.. واكتر من سواقين الركشات...خير ان شاء الله..... قلت يا ولد يا سجيمان في الهيصة دي.... ما تسوي لك دكتوراة...... عشان تحسن وضعك العملي....وتلقالك زيطة وزمبليطة....وتقعد كل يومين تقد الناس في التلفزيون....وتقول كلام في الحب والرياضة..... والعلاقة الموسيقية الجدلية بين.....بتاع الترمس والكبكبي وموشحات الاندلس.. والعلاقة الحركية المسرحية الساكنة بين بتاع العناقريب وعازف البيانو.. وصوت الحمار والات النفخ الموسيقيةوالحكمة الفلسفية ورا محبوبي الجندي بالليل يا ناس ونقلوهو شندي.....وليه نقلوهو بدون ترقية؟...وليه ما نقلوهو كاب الجداد.؟...والتفرقة الطبقية بينو وبين محبوبي الضابط وبالليل يا ناس ونقلوهو طابت بالليل يا ناس.وانبثاق الرؤية الفكرية من ورا النقل بالليل.. وليه ما يكون نصة نهار؟.....واتشوبر شوية...وافند نظرية انشتاين النسبيه...واثبات انو لا توجد أي مسافة في الواقع الملموس. نتيجة لتزاوج السرعه والزمن....واتربع وارفع حواجبيني.. وأشر بايدي وكرعي... واثبت صحة كلامي ضارب مثلا بي الدكتور قريب محمد راجع..... لانو اصلا محمد دا ما قطع أي مسافة حيث لاتوجد مسافة في الواقع المادي..وازح علي علاقة الشملة والخُرُج.....وضفائر شعر بادي محمد الطيب...ايوا واكون لابس بدلة فل سوت. لونها بمبي...وكرفتة حمراء.... وسفنجة القمر بوبا.....واربط اصبع كراعي الكبير بي دلقان عشان اوري انو مجروح من الغرام. واقعد انضم في السياسة... وكيف انو الزغاوة مهضومة حقوقهم والدليل انهم تجار صغار .... في الكناتين.... في العاصمة ومناطقها المهمشة..ومن حقهم يصبحو تجار جملة زيهم وزي الباقين .وكيف انهم محرومين من المواصلات العامة لدرجة انو كل واحد فيهم مسكين راكب جيب لاندكروزر.....والجعلين مسيطرين علىسوق الحليفة بالطلاق في الفارغة والمليانةوبرضو مسيطرين علي صناعة تربية الشنب وكل واحد عندو اربعة وخمسة شنب وهم مساكين الواحد فيهم قدر ما يكرد في شعرو ما قامو لو شنب..... وليه الرباطاب والمناصير مسيطرين على مقدرات وثروة البلد من حرجل وحمريب.... وحبال ودا سبب كافي انهم يطالبو بالمساواة....وكيف انو الاضطهاد وصل درجة انو الفنان احساس هو الفنان الوحيد القاعد ينطط في التلفزيون والباقين ما قاعدين ينططو.. وما مدنو أي فرصة للظهور مسكين غير مرة واحدة بس في اليوم كل يوم لمدة سنة.ولازم يفتحو لو قناة تلفزيونية براهو.....وتخلي المتفرجين فاتحين خشومهم من الدهشة....والانبلاج
|
|
 
|
|
|
|
|
|
|
|
Re: زغــاوة....... يـا رســـول الله (Re: ترهاقا)
|
العزيز سجيمان انا من المتابعين لبوستاتك وهي تمنحني فرح خاص ... واعتقد ان وجودك يضفي على البورد نكهة الضحكة ..
لكن دعني اقول لك شيئ هنالك قضايا لا تخضع للسخرية .. انت تسخر من قبيلة كاملة .. وتسخر من مئات القبائل المهمشة والتي لها قضية حقيقية سواء كان الاخرين مهمشين ام لا .. علينا توخي الحذر في حالة الخوض في مثل هذه الامور .. لا اشك في انك تحاول ان تدخلنا من زاوية الفرح ... لكن ارجوا ان لا تمس الاخرين وتصورهم كانهم بلا قضية .. احذر
اما يا دكتور تيراب انا اقول ان مثلك لا يتأثر بمثل هذه الاحاديث .. انت اكبر ووجودك ضرورة تقتضيها ظروف وواجب يفرضه عليك وطنك ونحن .. ارجوا ان لا يكون قرارك نهائي .. ولا اتوقع ذلك ..
بعدين ما ، ده سجيمان ساي ... زي ما بقولوا اهلنا ما مؤآخذ
( سجيمان ما تزعل .. انا والله ما جبت حاجة من عندي انت القلت عن نفسك كدة ) ياخي ما تكون زي شخصية الزين في رواية الطيب صالح
وما تكون ضحكتنا بدل ما تزعل الدكتور ..
لكم حبي
| |
|
|
|
|
|
|
|
|
|
Re: زغــاوة....... يـا رســـول الله (Re: ابنوس)
|
وجئتك زائرا .....
فوجدت الباب موصدا
الا من وردتين
تعبقان الياسمين
وقد اعود
ونوافذك مشرعة
و زراعيك
لتضمني كل
المحبة لك
و الوداد
عدت
ومعي تيراب
...
حتي .. اللحظة
اهدنا البنفسج
سارحل باكرا
الي خدر امي
واقاسمها ما اهديتني
لتمسح ... الدمع
نجدد حبنا
| |
|
|
|
|
|
|
|
|
|
Re: زغــاوة....... يـا رســـول الله (Re: ابنوس)
|
ابنوس.......حبابك.... انا ما قلت ما عندهم قضية..... يمكن عندهم لكن الكلام القالوهو في التلفزيون امبارح دا..... يوري انو ما عندهم قضية...... لانو المبررات القالوها عشان يتمردو ....كل السودان يعاني منها....وفي ناس في العاصمة يعانو منها.....قالو دايرين مدارس ومستشفيات...ومشاريع انمائية..وبس تاني ما في اي حاجة.....بالله لو كل ناس ما عندهم مدرسة شالو السلاح..... اتخيل كيف يكون البلد.....وبعدين تيراب لو زعلان في موضوع الدكتوراة..... يعلم الله انا ما بعرفو عشان اعرف عندو دكتوراه ولا ما عندو.... خلاص ولا يزعل يا سيدي.... الدكتوراة بتاعتو علي راسي من فوق
| |
|
|
|
|
|
|
|
|
|
Re: زغــاوة....... يـا رســـول الله (Re: سجيمان)
|
سجيمان
عندما عرفت نفسي اول مرة لم اكتب بأني دكتور ,بل الح بعض الاخوة ان اذيل لاحقا لقبي
لست في حاجة ان تذكر انت او غيرك لقبي عند مخاطبتي ,
ولست من يقيّم جهد سنيني ونصف عمري
وارجوا ان تحترم ولو قليلا ما كُتب ,ومن يكتب بمن فيهم نفسك
وارجوا ان نتناول ما هو جاد بالجد
وللهزل اوقات ومواضيع ومواضع
| |
|
|
|
|
|
|
|
|
|
Re: زغــاوة....... يـا رســـول الله (Re: maia)
|
مايا...... انا لما ابقى دكتور.... حاعمل الحلقات في بيتنا....مفروض التلفزيون والمشاهدين..... يرتفعو لي مش انا انزل لهم.........النضم كتير علا حسي قدامي فطوري .... فول زهجان كدي...... وشايفو زهجو زاد.... عمرك شفت فول زهجان..... الله لاوراك......الغريبة هو زهجان مني وانا بريدو........ مرة كنت عيان... مشيت الدكتور قال لي ما تاكل لحم ولا جداد ولا سمك ولا بيض.....بين وبينك انا اتبصطت للوصفة دي.......وشكرت الدكتور دا.... لكن شكيت انو يكون شغال في البنك الدولي... وبيطالبني بان احسن من ادائي الاقتصادي......وهو الغشيم ما عارف انا وضع زاتو ما عندي عشان احسنو..............
| |
|
|
|
|
|
|
|
|
|
Re: زغــاوة....... يـا رســـول الله (Re: سجيمان)
|
اخ د.تيراب تحيه
أخي الموضوع هنا موضوع ساخر وسيجمان اذا مالقي واحد
يسخر منه يبقي يسخر من نفسه
ولكن يا اخوانا حكايه الزغاوه والتهميش دايره
وقفه الزغاوه كانوا ضمن القبائل والمناطق المهمشه
وعانوا مثل غيرهم من ضعف الخدمات العامه ،،تعليم،صحه
وخلافه،ومن التعالي العرقي والجهوي....ولكن الان اصبحوا
يملكون الثروه بالاضافه روح الجماعه والتكاتف صعدوا
في السلم الاجتماعي ثم صاروا ينصهرو في بقيه نسيج
المجتمع بالنسب والزواج من دون عقد وحساسيات من
جانبهم ...اذن الزغاوه انتزعوا النديه مع الاخريين
بدرجه كبيره وصارت النظره لهم تتبائن بين العجب والحسد
والتوجس... اذن حكايه تهمييش الزغاوه اصبحت ما
مهضومه خصوصا لمن نزحوا منهم نحو المدن
وربما نسمع بعد قليل من يأتي ويضعهم مع من يتحكمون
في مصائر البلد ويشكي من تهميش الزغاوة لهم...
كل ما أرجوه أن نبتعد في مثل هذه المنابر عن ما
يثير العنصريه والجهويه ويؤجج النيران فلندع ما يجمع
لا ما يقسم..
كمال
| |
|
|
|
|
|
|
|
|
|
Re: زغــاوة....... يـا رســـول الله (Re: kamalabas)
|
اخي العزيز تيراب
لك التحية
اخي الكريم هنا مكان عام يعني زي اي زقاق تلقى الصالح والطالح والسفهاء كثر ... لكن هناك حقيقة واحد ... العارف عزو مستريح ... وقالوالكلب ينبح والجمل ماشي وقالوا كمان القلم ما بيزيل البلم .... مالك محرق روحك بكلام لا يودي ولا يجيب
| |
|
|
|
|
|
|
|
|
 Re: زغــاوة....... يـا رســـول الله (Re: BousH)
|
العزيز دكتور عادل الصادق الصديق
يا اخي ما قلته عين الحق
ولكن دوماً تجد من يطلب منك زر الرماد علي عينك
حتى لا ترى الحق ولا تدل عليه
نعم هناك من هم دون بعض القبائل التي تدعي التهميش من القبائل الأخري... ومنهم من ذكرت واضف الشوايقه والمحس والحلفاويين اهل المظلمه الكبري
لا ادري ماذا يريد البعض من دولة اضناها الفقر والعوز
وقد كانوا جزء من اسبابه بحملهم السلاح
-----
امضي اخي في تشريحك لموضع الألم
فانت تضع يدك في المكان الصحيح
ولا تكترث لمحاولة التكميم
ولا تخف في قول الحق لومة لائم
| |
|
|
|
|
|
|
|
|
 Re: زغــاوة....... يـا رســـول الله (Re: HOPELESS)
|
هناك حقيقة واحد ... العارف عزو مستريح ... وقالوالكلب ينبح والجمل ماشي وقالوا كمان القلم ما بيزيل البلم .... مالك محرق روحك بكلام لا يودي ولا يجيب
مـــا عــهدتك هــكذا يا اخ بوش وده كلام ما مفروض يقولو واحد مثقف زيك تيراب زِعل يعنى شنو ؟ وكلمة القلم ما بيزيل بلم كان توجه لحضرة الدكتور اللى عمل من الحبة قبة.
| |
|
|
|
|
|
|
|
|
|
Re: زغــاوة....... يـا رســـول الله (Re: ترهاقا)
|
الاخوة الاعزاء
تحياتى
لو الواحد عاوز يزعل من سجيمان حقو يزعل من بداية المنبر او من حين سجيمان سجل فى المنبر
الذى اتى جديد فى المنبر فرجاء ان يراجع بوستات سجيمان من اولها حتى يتمكن من نقد او فهم كتابات سجيمان...لانه يكتب بسخرية
قبل شهر كنت فى دورة مصغرة من قبل الشركة فى الرياض وكان المحاضر دكتور فى الاتصالات من اصل عربى ومحاضر فى جامعة الملك سعود ولكن هذا الدكتور خاوى من تخصصه حتى وكل ايدورته كان نكات عن السودنة والاجانب لما اغضب جميع الحاضرين وقالو ليه يادكتور نحن جينا نستفيد مش نسمع نكات.كلام سجيمان صاح كترت درجات الدكتوراه وكتر حاملوها انا بعرف معنا من على المنبر من لا يحمل دكتوراه ولكنه مفيد ومفيد جدا فى كتاباته حتى فى نقضه لى مواضيع الاخر
افرض ان سجيمان اساء فى نقضة لفئه من الناس او لى شخصيا انا ارد عليه
بنفس الاسلوب يعنى احاول ان اناقش المادة التى عرضها ولكن ليس هنالك من يستوجب الزعل والاعراض وترك البورد ..ليس هنالك كلب وليس هنالك جمل..هنالك مادة عرضت تناقش بنفس بارد واحترام وتقدير
الدكتوارة..التى صارت فى متناول اليد
التهميش
وتشكرو جميعا
| |
|
|
|
|
|
|
|
|
|
Re: زغــاوة....... يـا رســـول الله (Re: ترهاقا)
|
ترهاقا...... لك التحية........ انا شايف اخونا بوش مبسوط من جملو..... كل زول حر في جملو. قال الجمل ماشي ابو القدح....لكن كمان ما يقول الباقين كلاب........ بعدين انا ما شايف في حاجة بتزعل تيراب........الا يكون زول بس داير يحرد ساكت..... وبعدين ان قعد البورد شغال في امان الله وان حرد .....البورد شغال في امانتين الله....... والنصيحة لك يا الله..... انا اول مرة اشوفو في البورد.....وما خلاني شوفتو عديل وقال انا حردان
| |
|
|
|
|
|
|
|
|
|
Re: زغــاوة....... يـا رســـول الله (Re: kamalabas)
|
كمال عباس شكرا لك.......المصيبة انو بيجي واحد بيقول نحن ما عندنا مدارس وما عندنا.... مستشفيات عشان كدا شلنا السلاح.......وقال بالحرف....انو كل الحكومات الحكمت السودان ما انصفتنا......كل الحكومات.وكل الحكومات دي خت تحتها مليون خط..... لانو كل الوان الطيف السياسي في السودان اخدت فرصتها في الحكم.....وحيكونو جزء من دورة الحكم الجاية..... يعني نحن حنحارب حنحارب.. يعني بالواضح كدا...الموضوع ما موضوع مخاصمة نظام قائم....... ولا مطالبة بمساواة سياسية ودستورية...... طيب يا اخي انتو عاوز مدرسة وانتو ناس عندكم المال....... والحكومة مطنشاكم... القروش الجيبتو بها السلاح دا..... ابنو بيهو مدرسة.... مستشفى...ومافي داعي للموت والقتل...انا ما ممكن اقتنع انو زول عشان ما عندو مدرسة يشيل سلاح ويشتريهو بالشي الفلاني عشان يحارب ويجيبو ليهو المدرسة... الناس ديل على الاقل السمعت كلامهم ما عندهم رؤيا سياسية واضحة......بل ما عندهم من اساسو......اي مظلمة احسبها في دائرة السياسة...... الموضوع والله اعلم وراهو ما وراهو........والله يكضب الشينة
| |
|
|
|
|
|
|
|
|
|
Re: زغــاوة....... يـا رســـول الله (Re: سجيمان)
|
الاخ / سجيمان
ان تسخر فاسخر بعيدا عن القبائل
فالقبيلة عند البعض انتماء حقيقى والقبيلة اسرة مصغرة
وهذا يعلمه لكل من له قبيلة وهناك من يدفع حياته ثمنا للدفاع عن
قبيلته وهذا يعرفه الكل
فلاتسخر من اى قبيلة مهما كان ولاى سبب
كان
هذا الذى تكتب فيه انت هى عين الفتنة
وهذا هو الذى يؤدى بالبلاد الى الهلاك
| |
|
|
|
|
|
|
|
|
|
Re: زغــاوة....... يـا رســـول الله (Re: شدو)
|
اخوي شدو........انا من قبيلة عرضة للسخرية...من المجتمع....... وكل النكات عليها لو كانت صحيح او كذب......انا بقصد الرباطاب...... والشارع كلو ينكت فيهم..... ليه ما جا واحد قال يا جماعة دي قبيلة وناس يتعتز بيها.....قبل كدا انا كتبت بوست عن الدناقلة....واتصفحوهو اكتر من ماتين....واحد.....مافي زول جا قال لا ما تسخر من الدناقلة ودي قبيلة...ناس بيعتزو بالانتماء ليها......ومافي دنقلاوي حرد البورد.... عشان اتكلمت عنو... ولاّ القبايل الشمالية....مهدور دمها...... ولما نجي نغرب والله نمشي للصعيد..... الدنيا تقوم
.......وما تقعد.... ويقولو عاوزين فتن..
بصراحة الفبائل الشمالية.... اهلها ما بيزعلو لية؟ لانهم واثقين من نفسهم...... والبيزعلو ديل ما عندهم ادنى ثقة في نفسهم....ولمتين نقعد نحن ..... نتحمل عشانهم.... لمتين؟....... ونحنس فيهم.... ونقدم تنازلات اكتر من اللازم...... الفبائل الشمالية ليها الحق برضو تعيش كويس.......وترتاح... برضهم سودانين...وكتير من حقوقهم مهضومة.......
| |
|
|
|
|
|
|
|
|
|
Re: زغــاوة....... يـا رســـول الله (Re: سجيمان)
|
اخى سجيمان
السخرية كمبدا مرفوضة
اذا كان موجهة للرباطاب او الزغاوة
الا المحير انك تقول عانت القبيلة التى انت تنتمى اليها وتمارسها
مع الاخرين
بمعايير ومنطلقات مختلفة
ولا ادرى ماذا تقصد بعدم الثقة
هل من ايضاح ؟
| |
|
|
|
|
|
|
|
|
|
Re: زغــاوة....... يـا رســـول الله (Re: شدو)
|
العـــزيز شـــدو
ارجــو ان ننظر إلى السودان كجسم واحد وليس بالنظرة القبلية فلا ارى اى مساس لى إن إنتقدنى سجيمان او اى شخص اخر فى الجزء الذى اقطن فيه من السودان لانى ارى السودان جنوبا وشمالا وغربا وشرقا كتلة واحدة وما يمس اخى فى الغرب او الشرق او الجنوب يمسنى تماما ، وكلمة زغاوة يا رسول الله بدأت من المنطقة التى اقطن فيها حيث كانوا يقولون برابرة يا رسول الله ومرات دناقلة يا رسول الله فارجو يا اخى ان لا ننسب انفسنا إلى كتل قبلية وننظر إلى السودان كجسم واحد
ودمت اخى
| |
|
|
|
|
|
|
| |
سجيمان
Ahlalawad
ترهاقا
BousH
Mohammed Tirab
ابنوس
hamid hajer
kamalabas
abuguta
فيس بوك
تويتر
انستقرام
يوتيوب
بنتيريست