|
|
 حنـانـة....... نســى اهلــو...ما نســانا...... فقــري دا
|
حنانة....نسى اهلو ما نسانا..فقري دا
دي حتكون النغمة بتاعت الموبايلات بتاعتنا انا وانتي يا ام الخير.....اصلي عقبال عندك داير ابقى حنانة...واحنن النسوان....
ام الخير عليكي الله ما تصري لي وتحدريني كدي.... انتي عارفة وقت تصري لي قاعد يجيني حبس بول.....واتكرفس وابقى قصيّر.....ما تخافي انتي حتكوني معاي مساعدة حنانة....حنانة اسيستانت..... يا ام الخير لقمة العيش بقت قاسية وصعيبة.... وانا شايف الحنانات ديل عندهن قروش...ما شفتي علوية الحنانة قالت لك عندهم عمارتين وتلاتة حافلات ....؟وانا وانتي مصاقرين بعضنا ما عندنا التكتح....بعدين الحنة مالا؟ فن..وذوق...وكل يوم الزول مقابل كريعات النساوين..اشكال والوان...وبعدين انا ح احنن النسوان من ورا حجاب.... المرا تتكبّت تحت بطانية وتمرق لي ايدا ...ولاّ كراعا الدايرة تحننا.....وانتي حتكوني معاي الحجل بالرجل لحام يعني..بس يا ام الخير نحن لازم نطور المهنة...ونخلي بصماتنا فيها واضحة.... اول حاجة يا ام الخير انتي تتعلمي تشكري ايدن وكريعات النسوان... عليك الله اكل العيش ما فيهو حسادة...ان بقيت انا قاعد احنن في خنفسانة انتي تشكريها.... تكون كراعا كراع عنقريب برضو شكريها.... تشكريها بالبنينة.... تبننني وانا اكون قاعد احننن.. يعني لو كنت بحنن في كراع واحدة.... انتي تقولي صلاتي علي النبي..وطوالي تزغرتي
ايويييييييي يوي يييييييا
يا بنينة هي يي ي يي ي
وبنا بينا وبنا بين يا بينا
بنينة هي ي ي ي ي
بطن كراعيك الملكدمة.....
بطن كراعك الملكدمة زي المخدة
حاشاها ما كشتت وحامت بي شوااااارع امبدة
يا بنينة هي ييي ي ي
وبنا بنا بين يا بينا وبنينة هي يييي
اصبع كراعك الكبير........
اصبع كراعك الكبير يا ام عجن
واقف عود وباقي الاصابعين ما اتعفصن
يا بنينة هي ييييي
وبنا بنا بين يا بينة وبنينة هي ي ي ي ي
....وبعدين يا ام الخير لازم ننوع في محلات الحنة.... ما نقيف علي الكرعين والايدين... الرقبة نحننا والفقهة برضو نحننا....وبعدين اي حتة تانية تختارا المتحننة ما عندنا مانع....وليس في الحنة حياء يا ام الخير!!!!!
واهم حاجة التوقيع يا ام الخير... لازم يكون عندنا توقيع واضح وغير قابل للتقليدونسجلو في وزارة التجارة.... زي توقيع الخطاطين في اليافطات مش بيكتبو الخطاط وسيم...والخطاط نسيم...والخطاط عبدالله؟.. نحن نكتب الحنانة\ سجيمان وشركاؤه ... شركاؤة دي انتي... ودا يكون في الفقهة وبرضو يكون بالحنة.... عشان التقليد.... وما تجي حنانا من المتصلبتات في الحنة ديل تقول دي الحنة رسمتها انا...طوالي نحن في حالة الغُلات.....ندنقر للمرا المتحننة رقبتا ونرفع شعرا ونكشف عن توقيعنا... ماركة مسجلة
|
|
 
|
|
|
|
|
|
|
|
Re: حنـانـة....... نســى اهلــو...ما نســانا...... فقــري دا (Re: سجيمان)
|
عاد يا سجيمان اكان داير تسوق ام الخير براها
ما بوريك بكان الحنة الغااالية ام الف درهم
ولغاية خمسة الاف وكان دخلتنى مساعدة حنانة رقم اتنين
اها امانة ما الف بيك الامارات السبعة وكل بكان اغلى من
التانى والبناين دى ما تديك الدرب .
شى بالعربى وشى بالعجمى وشى بالايرانى وشى باليلوشى
اها بالسودانى ده ما يديك الدرب بناينا تيمان عطبرة يقصروا
اما الختم ده قلبت فيه الهوبة عدييييييييييييل كدة
الله يديك العافية يا سجيمان يا اخوى
امال
ام وضاح
| |
|
|
|
|
|
|
| |
سجيمان
essam&amal
Osman Hamad
ابو جهينة
الطيب بشير
طه حسن عبدالله
Elkalakla_sanga3at
omer almahi
HAMZA SULIMAN
فيس بوك
تويتر
انستقرام
يوتيوب
بنتيريست