|
|
 المدرســة الشــلوفيـة واثـرها في تطور الغنــاء السوداني
|
احيانا اصل لي مرحلة من التبلد الحسي والعاطفي....لمن اشفق علي نفسي... الحالات دي قاعدة تنتابني لما اكون بسمع في غنية..ولاّ اكون في حفلة..لماالغنا ما يعجبني.... القى نفسي طنشت الغنا وقعدت اتأمل في الغناي القدامي....اكتشفت انو الشلاليف والحنكات ليها دور كبير في انك تكون مطرب ناجح...نظرية الشلاليف دي اثبتت انها حقيقة عند فنانين الشلاليف.... وعلى راسهم المرحوم خضر بشير...والمرحوم ابو داوود....والمرحوم احمد الطيب ابو الفنان غصبا عننا عماد احمد الطيب... اعتقد انها دي مرحلة من مراحل تطور فن الغناء في السودان...المرحلة الشلوفية..وافرزت المدرسة الشلوفية...وهناك فنانين المدرسة الحنكية التي تزامنت مع المرحلة الاولى...واكتر فنان حنكي ....ما بتعرفو قاعد يغني ولاّ ياكل....هو المطرب اطال الله عمرو...ويديهو الصحة عشان يلف في السعودية..من دار لي دار...المطرب زكي عبدالكريم...وبرضو في الزول القاعد يحاكي ابو داوود داك...هو من رواد المدرسة الحنكية والعضلية...لانو يتخيل لي قاعد يهرش مقدمين البرامج....وعينو حمرا وشرارة.....
المدرسة الشنبية....والتي يلعب الشنب فيها دور كبير... ورائدها الاول هو المرحوم النعام ادم...وعلي ابراهيم اللحو......
وايضا المدرسة النخرية....التي تتحكم النخرة فيها في مخارج الحروف...ودي رائدها بدون منازع المرحوم حسن عطية...
ظهرت مدرسة جديدة ورائدها الفنان الشاب الموهبة رشاش محمد رشاش..... ونصيحة لوجه الله تعالى..مافي زول يقعد قدامو.. لا في حفلة لا في حافلة لا في تربيزة اكل.... دا مطرب في سنونو خمستاشر فلجة...الناس عندها فلجة واحدة دا عندو خمستاشر.....لما يتكلم او يغني...يرش... يرش.. وما بيخاف الله لا في طفل ولا بيحترم كبير.... القدامو يرشو...في الحفلة بتاعتو بيجيبو معاهو عشرين قناية طول القناية اربعة امتار... عشان لو في زول عاوز يبشر فوق الفنان... يمسك القناية من طرف والطرف التاني يختو في كتف الفنان..ويبشر... دا كلو اتقاء لشر الحروف التي تتحول بقدرة قادر الي بصاق....وجعلنا من الماء كل شي حي....
هذا المطرب مفخرة السودان اضاف باجتهادو..حرف تامن للحروف الموسيقية..حرف تُف.... اصبحت الحروف الموسيقية دو...ري...مي...لا...فا...صول.....سي....تُف
|
|
 
|
|
|
|
|
|
|
 Re: المدرســة الشــلوفيـة واثـرها في تطور الغنــاء السوداني (Re: سجيمان)
|
الاخ سجيمان
تحياتي ...
قالو ابو داؤود مشى بيت فرح على اساس احياء حفل ،
لكنه وجد الفنان القدير المرحوم / خضر بشير واقف على المسرح ويغنى
ومعروف المطرب خضر بشير انه ينفعل مع الغناء
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلان جدا ، وكان قدامو شافع واقف يشاهد فى المطرب خضر بشير
قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك
الرحمة للفنانيين ابوداؤد وخضر بشير
| |
|
|
|
|
|
|
|
|
|
Re: المدرســة الشــلوفيـة واثـرها في تطور الغنــاء السوداني (Re: سجيمان)
|
| Quote: وايضا المدرسة النخرية....التي تتحكم النخرة فيها في مخارج الحروف...ودي رائدها بدون منازع المرحوم حسن عطية |
لاننا لا يمكن ان نسى مجهود الفنان ابو عركي الذي خلط بين المدرسة النخرية والحنكية؟؟؟؟؟ ما تعمل زغبير!!
كما اقترح اضافة مدرسة الاستاذ (كرفاس) مؤسس فن كرفسة الوش في الغناء السوداني!!! وشيل شيلتك!!!
| |
|
|
|
|
|
|
|
|
|
Re: المدرســة الشــلوفيـة واثـرها في تطور الغنــاء السوداني (Re: alfatih)
|
ياخي المدرسة الشلوفية دي متين فتحوها ؟؟
انا بعرف المرحوم بابكر بدري و بخت الرضا
وبخت الجابوا ليه بنت في الزمن دة
لكن عمري ما سمعت بي مدرستك دي...يا زول
انت بتاع ميك اب واللا شنو؟؟ شوف بطل الامور
دي وخليني اديك فكرة عن المدرسة القدومية
في تاريخ الاغنية السودانية......اها جيب
ورقة وقلم سررررريع...................
طبعا المدرسة دي من اول الذين تغنوا بها
المرحوم الطاهر قديديم ودة كان من سكان
الخشيم أبو رسمة...بالقرب من الزمام ابو
رشمة... واول ما تغني ازكر انا كنت في
رحلة ومعاي المرحوم عوض شمبات وعشة الفلاتية
وفي الرحلة ديك تغني الطاهر قديديم بي أغنية
القدم قدم لي قدام قدام حبيب نورة العريس
ما يضوق الندم ... اها من ديك كان كل زول
عايز يكتب ليه قصيدة طوالي مدّ قدومو وكدة
تجي تقول لي شلاليف ونضمي ما عندك ليه قدرة
| |
|
|
|
|
|
|
| |
سجيمان
abas
Al-Shaygi
Wadmirghani
دورنقاس
بت قضيم
omer almahi
زوربا
محمد عبدالرحمن
alfatih
حبيب نورة
فيس بوك
تويتر
انستقرام
يوتيوب
بنتيريست