|
|
 الفريق النسـائي السوداني.......لكرة القدم
|
هذه سكينة حامداهو...تحيكم من استاد الخرتوم...وتنقل لكم مباراة فريق نسوانا القومي ضد فريق نسوان مصر القومي....الكورة عند فريقنا.... عزيزة سُكسُك... الظهير الايمن ...تشوت شوتة طويله.... تستلم الكورة زينب غنمي.... زينب غنمي طالعة بالكورة...وتباصيها لي مريم الراجل....مريم الراجل طويلة لي سميرة العمارات... سميرة العمارات تشوت في القون... الله الله الله ا... شوته باردة يا سميرة....عاد يا بت امي بالغتي عديل كدي.... ما عندك أي عزر...الوحيدة المطهره طهارة سنه في الفريق دا.....مالك ما بتشوتي زي الناس؟..... شايفه.... سعدية ليمونة...رافعه ايدها للحكم..... ايوا ..ايوا.....الحكم يتكلم مع سعدية..... يهرج معاها شايفاهو..... يا اخواتي الراجل دا فقر خلاس.... مالو بي ينهر في مرة الناس... شايفه واحدة من الادارة شايله شافع وداخله الميدان..... وسلمتو لي سعديةليمونة....سعدية ليمونة تتفرجخ في الواطة....وتمرق شطرها الايمن وترضع الشافع حي يا يمة الشافع قلبو اتقطع من الجوع..... اجي اجي اجي الحكم يرفع كرت احمر لي سعدية..... اجي اجي اجي يا بنات امي المرا قبيل قالت دايرة تمرق ترضع ولدها وترجع...وسمع اضاني الشافع داير يتفقع من البكا..تجي حسي تطردها والله جنس تحكيم.؟غايتو قادر الله في حُكامُو.. سامعه الجماهير تهتف ....تحكيم فاشل تحكيم فاشل.. تستأنف المباراة......الكورة عند الجناح الايمن للفريق المصري.... سوسو العتبة.....والله يا اخواتي حلاتن عليها....سوسو تشوت قدام.... تستلمها فيفي ضراع......فيفي تشوت من بعيد وووووقوووووووووون....قوووووون ليه يا حارس المرمى.... ليه يا نفيسة دفار... نفيسة دفار حارس مرمى فريقنا القومي.....ليه؟ كورة جاياكي في ايدك عديييييييييل؟....لكن انتي ما كنت فاضية ترفعي في سروالك كل مرة ينصل..... انا قبيل اصلي عارفاهو صُلبك دا ما صلب حارس مرمى علا المدربة........ نسوي عليها كيفن يا بنات امي؟غايتو الليله يا نسوان ما عجبتني كلو كلو..... المديدة البتشربن فيها في المعسكر شهر كامل ما نفعت فيكن
الكورة....في السنتر... صفر الحكم......زينب غنمي طالعه بالكورة...تشوتها لي حواء كادقلي....حواء تباصيها لي مريم الراجل الكورة تتقطع من مريم...مريم عملت فاول..... لا لا يا مريم يا بت امي.... انامن هنا شفتك قرصتي بت الناس في وركها....ويا مريم اصلو لعبك خشن انا عارفاكي.....وسعدية لاعبة الموردة لي حسي راقدة مستشفى ... عاد السويتيهو عليها يا يمه تخجلي........انتي...... الحكم يدي مريم الراجل كرت اصفر......مريم تبرطم.....اخلاق اخلاق يا نسوان اخلاق اهم حاجة الاخلاق في الرياضة........وب علي وب علي.... الكورة عند فيفي ضراع فيفي تشوت.....وقوووووون قوووون تاني... تاني قون.... يا جماعة ما معقول غيرو حارس المرمي..... يا تغيروها يا تغيرو لها لباسها المرا تمسك الكورة ولا تمسك اللباس ما يتملص..... يا بنات امي عاد؟.... يانفيسة دفار يا بت امي.... تاني ان دايرة تلعبي مبارة..... واحد في الاتنين... يا انتي...... يا صُلبك........واحد فيكم..... يجي يلعب...وحات الرسول دا ما سروال اللبساهو... ملبسنك عراقي محل السروال يا نفيسة يا اختي.
اها..اها...... اجي يا سعاد جلع.بالغتي والله...عاد في نص الميدان يا بت امي؟.... سعاد مرقت مرايتها وعدة المكياج من سدرها.....وقاعدة تتضرب في شلاليفها.....وتتمنضر.... يا جماعه يا ادارة..... نحن قلنا لكم النسوان ديل..... ما يجن يلعبن بالستيانات....حسي زي سعاد دي... سدرها دا ان دست فيهو زول بي حالو في زول بيعرفها؟... شايله لها سدر اربعة ضلف......
الحكم يصفر نهاية المباراة...... ونسوانا مغلوبات اتنين صفر......ومعليش يا حريم...... تعوضن في مباراة العودة....... الجماهير الوفية زعلانة.......وتهتف .......
يا ادارة.... يا تعيسة
غيرو سروال نفيسة
|
|
 
|
|
|
|
|
|
|
|
Re: الفريق النسـائي السوداني.......لكرة القدم (Re: سجيمان)
|
أخي سجيمان .. لك كل الود .. وصفك لسير المباراه كان مضحكا .. لكن ما تخلله كان مبكيا .. تخلله الكثير من الأوصاف او الكلمات الجارحه , أخي .. اسمح لي ان أقول لك ان في وصفك شىء من المبالغه .. والغرض منها اضحاك الناس وخاصه الرجال .. لماذا يا أخي ؟
الى متى ستظل صوره المرأه السودانيه بهذه البشاعه في عقولكم.. الى متى ؟
اعذرني أخي ان قلت ما لا يعجبك لكن هذا رأي الشخصي .. اتمنى ان تتقبلوه .. وأتمنى ان تكون هناك سعه صدر لتقبل النقد لا أن يتحول لحرب كلمات كما اصبح يحدث الأن .
لك كل الإحترام ,
وتســـلموا
| |
|
|
|
|
|
|
|
|
|
Re: الفريق النسـائي السوداني.......لكرة القدم (Re: Sakotaweya)
|
ترهاقا.....ايش معنى الفريق الطبي؟
الاخت سكوتاوية........فعلا انا لا انكر انو الموضوع مقصود منو الاضحاك....وبرضو... نقد بعض السلبيات الاجتماعية...والمرأة عمود فقري للمجتمع...وعند محاولة علاج اي نواقص اجتماعية لابد من الوقوف عند محطة المرأة كثيرا......حسب حجم دورها في المجتمع..... لانها هي البتربي وهي البتاثر في اشياء اجتماعية كتيرة..... ابداءا من الطهارة.....وانتهاءا بالوفاة وعادات العزاء والبكاء والسكلي......وانتي عاد شوفي الفي النص....ليس المقصود التقليل من شان المرأة.... ولو حاولتي تقري الموضوع بنظرة محايدة غير متوترة....... حتصلي لاشياء كتيرة غيبها الزعل عنك
ولك مودتي
| |
|
|
|
|
|
|
|
|
|
Re: الفريق النسـائي السوداني.......لكرة القدم (Re: سجيمان)
|
أخي العزيز .. أحيي فيك روح المناقشه التي أصبحت معدومه نوعا ما حاليا .. و ما وصفته في المباراه وصف انو المرأه السودانيه على نياتها .. ونوعا ما ما بهمها زول و الكثير من الحاجات الحاصله فعلا.. لكن العديد اتخد الموضوع مضحكه من غير النظر لماأشار اليه البوست او ما أشرت اليه انت ..
لكن انا اعتراضي على اسلوب الوصف.. يعني بعض الكلمات كانت جارحه يا أخي .. الا تظن ذلك .. هذا هو ما استفزني .. لكنى أعلم ماترمي اليه و هو بعض من ما هو سائد هناك .. اتمنى انو الناس تتحرك لايجاد حل جذري لهذه الحالات .
و لك كل الإحترام
و تــــسلموا
| |
|
|
|
|
|
|
|
|
|
Re: الفريق النسـائي السوداني.......لكرة القدم (Re: سجيمان)
|
سيجيمان.
أنا لا أدري السبب الاساسي لمقالتك هذا, لكني حبيت الفكرة جداً علشان على الاقل يهزموا لينا الفريق المصري ده, الفريق اللي فشلنا في هزيمته من زمان. إذا فشلوا الرجال خلونا نجرب النسوان يمكن يكونوا أحسن من الرجال.
دينق.
| |
|
|
|
|
|
|
|
|
|
Re: الفريق النسـائي السوداني.......لكرة القدم (Re: Deng)
|
دينق....... صديقي العزيز....... لينا زمن نفتش ليك وجيتنا الليلة كايسنا...... دي بيقولوها لزول تكون لابد ليهو يغلط.....وتجي ناطي لو في حلقو وتتفشا فيهو.....مش قال لها الدكتور وردي... لي نميري.... وبعدين وردي بقى يكوس في التخارجو من ابعاج.......شوف انا قلت الدكتور وردي خليك شاهد..... ما يقوم يطلع لينا حسي ويقول لي بجي اكسرك.......... شرفت بيتنا يا دينق
| |
|
|
|
|
|
|
|
|
|
Re: الفريق النسـائي السوداني.......لكرة القدم (Re: سجيمان)
|
الاخ سجيمان........التحيات الطيبات
اعتقد ان مقالك به سرد ووصف درامى جميل وممتع
و لا اكذبك قولا ان قراءة موضوعك اخرجتنى من حالة الجدية و الملل الى حالة من الضحك المتواصل
من زاوية اخرى موضوعك يعالج لمحات اجتماعية عن المرأة السودانية رضينا ام ابينا هى جزء الان من حياتنا الاجتماعية فالافضل لكل المعترضين على موضوعك ان يتمعنوا بهدوء و روية الى اى مدى تختلف الصورة الواقعية التى رسمتها مع رؤاهم و احلامهم فى تغير المرأة السودانية و كيف يمكن تغير هذه الصورة نحو صورة اكثر اشراقا و جمالا
| |
|
|
|
|
|
|
| |
سجيمان
حسن الجزولي
aba
،
خالد
ترهاقا
Sakotaweya
Deng
yumna guta
بدرالدين شنا
فيس بوك
تويتر
انستقرام
يوتيوب
بنتيريست