|
|
 البــوبــار.....فــي..... بيــوت الايجــار
|
من صغير كنت بريد البوبار... اتبوبر باي شي.... المهم الزول البتبور ليهو دا يكون ما عندو..... البوبار موهبة... ويجب صغلها..بالتمارين والمواظبة....اول ما اتعلمت الانكليزي.... كنت اطلع في راس بيتنا واقعد اذاكر الانكليزي بي صوت عالي...عشان ناس الحلة كلهم يسمعو.... ويفتحو خشومهم اندهاشا.... لهذا الانكليزي....سعد الله كان برضو معاي في نفس الفصل.... ومرة من الصباح مشى لبتاع الدكان الزهجان وقرفان....وقول كدي يا سعد الله غُز كوعك وقول لسيد الدكان... قووود مورنيق.... سيد الدكان عاين لو وقال لو يا ولد."......." بالنار....والبين قوسين دي لو النار وصلتا...سعد الله علا يفتحو لو بالجنبة....هو سعد الله زاتو القدقيد عليهو شنو؟ كان مو بوبار ساكت.......
اول ما سافرت القشورية..... دي... كنت فرحااان ومتبوبر بيها..... انا وامي الاتنين....لما ارجع اجازة.... امي موصياني....اول ما تجي من السفر اوعك تجي البيت في الليل تعال بالنهار والعين تشوف...عشان ناس الحلة يشوفوك وانت جايي.....كنت اول ما التاكسي يقيف...وامي تجي مارقة تديها تلاتة زغريتات من النوع السلمو سباعي.... ويجن نسوان الحلة للسلام وكل واحدة تزغرت...والما بتزغرت نحاربا ونخاصما انا وامي الاتنين ليوم القيامة المرا الحاسدة ام قلبن اسود.....يفرشو لي العنقريب في نص الحوش العصرية....وانا اجيب تربيزتين واحدة... للمسجل..والتانية لي صندوق البينسون والنضارات البيرسول...والولاعه والبوم الصور حقتي...وكلو وانا يا راكب السيارة وماسك الدركسون ولازم امسك الدركسون .. حيعرفوها كيف بتاعتي لو ما مسكت الدركسون؟.. يا واقف جنبها وعاوز افتح الباب . يا انا قاعد اكل لي في جدادة اصلو ناس حلتنا الجداد علا بشوفوهو في كوش الثورة حايم...والملاية وكيس المخدة من الجبتهن انا من الحجاز.....ويجو الناس يتونسو...وانجعص انا...واتنفخ وابدا اتبوبر...بعد السلام.... والمطايبة...البس النضارة البيرسول... بدون ايك يا سبب....واكفف ايد الجلابية التترون عشان الساعة السيكو تظهر....كل مرة اقعد اعاين لها...واشوف الساعة كم؟ برضو بدون ايك يا سبب.....وابدا الونسة...... اول حاجة اقولها" يا سلااااااااام.....والله نحن هناك زي المواعيد دي......"..حينط واحد ويقول لي ...اها؟......واتفتح انا واتبوبر لمن الله يغفر لي.... شي صُح وشي كضب.....وهكذا كل فوج يجي للسلام.....وانجعاص وبوبار وفشخرة....
امي بهناك برضو.... تفرج في النسوان في صوري.... والما تقول صلاتي علي النبي تحدرا وتصر ليها...ويا نسوان هووووووي صلن علي الرسول.....وبعد شوية تكورك لي عشان اجي واسلم....واجي انا واسلم....ووامي توصيني قبل ما ادخل اسلم لازم انضب سعودي.... عشان حاجة خديجة جوا والمرا دي قاهراها وغايظاها... حياكي الله يا خالة؟.... ايش لونك ولون العيال ولون كل الناس....ايش لون كلبتكم لبهو؟.وانتو يا خالة للحين تاكلون الكسرة؟ ليش ما تاكلون الخبز؟.....واعاين لي امي القاها في غاية الاحساس البوباري....ومبتسمة....وتقول للمرا شفتي صلاتي علي النبي....سجيمان جا كيفنو؟...اريتو حال وليداتكن يا يمة...... جا ابيض ومنيفيخ من اكل الجداد يا اختي.......امي تقدم الحلاوة للنسوان.... ماكنتوش..... وتحلف علي الواحدة علا تفتح طرف توبا....وتكب العلبة زي ماهي للواحدة.....وديك تصر الحلاوة في طرف التوب وتمشي اهلا..... وان المرا حلفت وقالت لا.... امي تحلف عليهاو تقولها.. لا لا يا حبيبتي..... سجيمان جايبن تلااااااتة شوالات حقات ماكنتوش....
|
|
 
|
|
|
|
|
|
|
|
Re: البــوبــار.....فــي..... بيــوت الايجــار (Re: سجيمان)
|
سجيمان
حياك الله عسى ما شر يعطيك العافية .
انا طبعا مسمياك فراج الهموم والبوست بتاعك
الوحيد البدخلوا جارية جرى
سجيمان المتبوبرين ليها شنو نحن ناس الخليج
ديل نسكت نحشى خشمنا ده بتراب الواطة
ونخلى البوبار لناس السويد وامريكا وهولتدا
يتبوبروا فوق عديلهم .
امال
ام وضاح
| |
|
|
|
|
|
|
|
|
|
Re: البــوبــار.....فــي..... بيــوت الايجــار (Re: essam&amal)
|
البــوبـــار...بعد...الرجوع من السفر
انا جيت جارى جرى وقلت اشوف البوبار فى بيوت الايجار دى شنو
الواحد بكون راتبه 2000 وبدوه بدل سكن 6 الاف بقوم يسكن فى العليا والملز ب 20 الف وتعال شوف الوليه تتبوبر نحن ابونا راتبه 10 الاف
وبدل سكن 30 الف...وايدنا مليانة من دهب البطحاء داك المطلى
ولو نزلت السودان تقوم تجمع دهب جاراتها وتنزل بيه...
دا طبعا بوبار الاسر...
وتسلم ياسجيمان
| |
|
|
|
|
|
|
|
|
|
Re: البــوبــار.....فــي..... بيــوت الايجــار (Re: سجيمان)
|
يا دكتور
هناك إثنين ما بتلحقوا الأول عجوزا ما ليهو نديد والثاني كضاباً أهلو بعيد. لكن أظن يا سجيمان الزمن غير ملامحنا وبقى المغترب وغير المغترب زي بعض يعني الكتوف إتلاحقو وفي مواضع كده غير المغترب بقيف في حته عالية وبكون كتفو فايت كتف المغترب ، ونحن يا دكتور خلاص عاصمتنا أصبح فيها المول والمس كول
| |
|
|
|
|
|
|
|
|
 Re: البــوبــار.....فــي..... بيــوت الايجــار (Re: سجيمان)
|
انت عارف يا سيجمان البوبار دا حلو شديد لكن للعندو والما عندو حقو راح بتعب شديد لانو الناس
بتفتكر القبة تحتها شيخ، ذكرتني بي واحدة زميلتنا في الجامعة طبعاً ديك كانت ام البوبار وهي
ساكنة في الديم وطبعاً الديم والعمارات زي ما بقول فرق الشارع وكنت انا والزملاء والزميلات
المعاي لما نوصلها بي عربيتي تقول نزولني في الشارع العام وتدخل قصاد بيتهم بس على العكس في
العمارات مش في اتجاه الديم وطبعاً عربتي دي برضو بوبار مني لانو اصلاً في الوقت داك ما كنت بحلم
انو اركب مع صاحبي عربيتو لمن جينا السعودية واتبوبورنا هنا وركبنا العربات والمكيفات والراحات
المهم ما علينا خلينا في الزوله دي هي اصلا كانت مفهمانا أنو ساكنه العمارات ما ساكنه الديم
والمصيبة الكبرى انو نحن كنا عارفين كل شئ بس خالينها في الوهم دا عشان ما تتصدم وكنا نشاغلها
نقول ليها ماشين معاك البيت وهي طبعاًعذرها على طول حاضر مرة ناس البيت مافيشين ومرة تقول لا
والله انا ما ماشه البيت غاشيه صاحبتي ومرة ومرة لحدي ما يوم نزلت من البص ولاقتها صاحبتها جنب
الباب وزولتكم ماشه علي العمارات تقول ليها الليلة مالك ماشه وين وعشان تصرف الموضوع تقول
ماشه البيت وديك تقول ليها بيتكم عاد يا بت امي بيجي انت الليلة مالك تقول ليها مالي قال ليها
ايوه ما بيتنا في الشارع التاني بس قلت انزل اتمشى ساكت قعدت المدرجات والله تعبت ضهرنا وفي
النهاية بعد اصرار شديد منها واجهناه بالحقيقة رغم انها مصره لحدي ما وقفنا ليها في حلقها
وقلنا ليها الليلة لازم نمشي معاك البيت ورضت بالامر الواقع في النهاية.
والله بالجد البوبار كعب ومكلف شديد والامثال كثير يا سجيمان
وليد
| |
|
|
|
|
|
|
|
|
|
Re: البــوبــار.....فــي..... بيــوت الايجــار (Re: بارعة)
|
سجيمان
كان لرجل ظريف مغنيتان احداهما حاذقة حسنة الغناء والاخرى متخلفة لايحب ان يسمع لها صوتا وكان اذا غنت الاولى طرب واشتد به الطرب حتى انه ليشق قميصه ويمزقه من فرط التأثر والاهتياج فاذا اخذت الاخرى تغني قعد يخيط قميصه ويرتق ماتمزق منه
| |
|
|
|
|
|
|
|
|
|
Re: البــوبــار.....فــي..... بيــوت الايجــار (Re: Adrob wad Elkhatib)
|
Quote: سجيمان
كان لرجل ظريف مغنيتان احداهما حاذقة حسنة الغناء والاخرى متخلفة لايحب ان يسمع لها صوتا وكان اذا غنت الاولى طرب واشتد به الطرب حتى انه ليشق قميصه ويمزقه من فرط التأثر والاهتياج فاذا اخذت الاخرى تغني قعد يخيط قميصه ويرتق ماتمزق منه |
قصتك دي قدر ما قلبت فيها....ما عرفت فيها شي...انا فهمي تقيل شوية يا اخوي
| |
|
|
|
|
|
|
|
|
 Re: البــوبــار.....فــي..... بيــوت الايجــار (Re: سجيمان)
|
الغالى سجيمان
بوبارك دا ذكّرنى قصة قالا أخونا الشاعر خفيف الظل محمد حسن حدباى
عن زوجة مغترب زيك كِدا قادّة الناس بالبوبار و أول ما رجعوا من
الإجازة الكمـّلت فيها كل مخزون زوجها أكان المسكين (فـّنشوهو)
رجعوا بى إيد ورا و إيد قِـّدام و حالتم بالبلا المهم مشت لى
جارتا تشحدا ويكة قالت ليها بالله ما عندكم بودرة بامية ؟
و طبعاً الجارة شامّـاها شمّة شديدة فردت عليها أبداً يا يمة
إنشاالله يبقى لى بى خروج نهائى
ولك خالص الود
| |
|
|
|
|
|
|
| |
سجيمان
zola123
bushra suleiman
طيفور
Elmosley
haneena
مريم الطيب
ABU QUSAI
essam&amal
abuguta
ولياب
almulaomar
waleedi399
omer almahi
Osman Hamad
ود العجمى
Raja
بارعة
Adrob wad Elkhatib
طه حسن عبدالله
الزنجي
smart_ana2001
ايهاب
فيس بوك
تويتر
انستقرام
يوتيوب
بنتيريست