|
|
 اخي الشايــقي...... ارفــع شلوخــك أنت أمريكي
|
محمد صالح ود ابحراز... صاحبي وقاعد اريدو واريد ونستو....وزول وناااس.... مشي امريكا جاهو لوتري....وقابلتو في الاجازة...وبعد السلام وحق الله بق الله..... بدات الونسة وقدامنا ترمس شاي سعة اربعتاشر برميل.....نكب في الشاي ونشرب وهو يحكي قال لي..... يا سجيمان اخوي... سافرنا من هنا فينا خمسين شايقي... واتلمينا علي بعضنا هناك...وسكنا في حي واحد.. سميناهو حي اللوتراب...عشان في الشوايقة الما جو باللوتري والزايغين ساكت ديل قاعدين في حي براهو.... سميناهو حي الزايغاب....لكن يا سجيمان لا بيعرسو مننا لا بنعرس منهم.... نحن اللوتراب ديل جننا وجن اللولوة والجهجه...البي يدي بنتو منو لي زايغابي ؟.... نهارة باكر يسفروهو ويسفروها معاهو...مننا ناس يا سجيمان يا مؤمن يا مصدق....مننا ناس سكنو في واشنطون..ديل اسمهم الواشينطوناب...وفي ناس مشو لي عن تكساس ديل التكساساب..وفيهم المشو لي بنسلفينيا... ديل السليفيناب....وناس مشو سان فرانسيسكو...ديل السان فسواب.....اما الكنداب ديك مرقو من امريكا ومشو كندا...علا ديل قلال ما هم كتار.....
قال لي كب اشرب شاي يا سيجمان قلت لو لي حسي يا زول شارب لي خمسة كبابي.... عاين لي وضحك وقال لي لا لا اصلك شربت ستة كبابي.....انت طمستك دي ما بتخليها؟....
سمعني شريط كاسيت اول ما دخلو قال لي اسمع الزول دا...دا فنان هناك علا زايغابي... الله يصرفو....وبدا الشريط
قامو زيارة لي تكساس
...... يا ناس
اتعبوني....... خلاس
قال لي عارف المطرطش دا يا سجيمان كان داير لو بنت من بناتنا اللوتريات...وقدر ما جرا وراها ابت تب تجيب خبرو...يا زول البتعرس لها زايغابي منو؟......مسوي لها الغنية دي وقت سافرت تزور خالتا معرسا واحد من التكساساب
اها...... نحن حسي فينا ناس مقدمين للجنسية الامريكية.... علا يا سجيمان اخوي الشلوخ....باقي لنا مشكلة.... الامريكان قالو شلوخنا الراقدة دي علا نوقفاعلي حيلا حتين يدونا الجنسية....اها شيخ اللوتراب... مسوي حملة توعية... ومسوي شعارا.... اخي الشايقي ارفع شلوخك انت امريكي.
|
|
 
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
الله يديك العافية يا دكتور...
لكن الجيل الجديد المامشلخ ده.. ما مصنف.. جعلي .. ولا شايقي... ده يكون شنو يا ربي؟ ولا نمشي نكوس لينا شلوخ على آخر عمرنا...
بعدين أنا أبوي جعلي.. وأمي ركابية... ديلك بيتشلخوا بالطول... وديل بالعرض... أبقى شطرنج أنا.. خاصة مع رايي في الانتماء إلى القبليتين...
بنت الحسين
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: دورنقاس)
|
دورنقاس..
الله يجازيك... والله فكره... لكن... الشطرنج برضها موضه حلوه.. الناس تاني يلعبوا في جضموا.. سفرجت...
عندي أخوي الصغير.. كان لما حبوبتي الله يرحمها تكون قاعده بتاكل معانا.. بيتغتي بي توب أمي ويقول ليها... "بخاف منها"... ده مروان.. كبر.. وبقى زول عاقل.. جا الأصغر منّه اسمه محمود.. ده كمان أخير مروان.. ده بقول لي أمي.. الناس ديل كلهم مشخبطين كده ليه!!!
بنت الحسين
| |
|
|
|
|
|
|
|
|
 Re: اخي الشايــقي...... ارفــع شلوخــك أنت أمريكي (Re: سجيمان)
|
الأخ سجيمان تحياتي الخالصة لك ولكل الشوايقية لكن قصة الموازين دي عندك عايزة مراجعة والشاي الشربتوا دة سادة والله اسكت كب
| Quote: سميناهو حي اللوتراب...عشان في الشوايقة الما جو باللوتري والزايغين ساكت ديل قاعدين في حي براهو.... سميناهو حي الزايغاب....لكن يا سجيمان لا بيعرسو مننا لا بنعرس منهم.... |
والمقطع دة أحسن تحسبوا قبل ما ينطوا عليك مناهضي العنصرية من الزايغاب لأنو دة تحريض عديل من صاحبك على العنف و غايتو اعمل حسابك نحن كلمناك.
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: maia)
|
سي جي العزيز
أحكي ليك قصة ( حصلتْ ) بالفعل في عطبرة و حكاها لى أحد أبطالها من أهلنا الشوايقة اللذاذ :
الأب و أولاده الأربعة بيشربوا بيرة أم جمل ، أيام البيرة أم جمل.
أها الأربعة أولاد تابوا لله و راحوا الحج و رجعوا و قالوا لأبوهم : يا يابا ، كفاك شرب البيرة ، توب لله و روح الحج و إستغفر ربك.
قال ليهم : و الله الجمل دة الواقف في نص القزازة ، إن ما برك ، أصلو ما بقيف من الشراب.
يعني زولنا دة مبيت النية على عدم التوبة النصوح ،، دحين الأمريكان ديل عارفين الشلوخ دي ما بيقدروا يوقفوها حيلها ،، زى الأمريكان مع اللوتراب ديل ،، الظاهر ما عندهم نية تجنيسهم.
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: maia)
|
انحنا كمان اسمنا السناقلة... على جدنا الكبير "سنقل" single
واولادنا فيهم التين teenagersوفيهم الزيتون
اها التين ايجرز ديل اسمهم التناجرة...وبى كده النطريه تكون كل التناجرة سناقله لكن ما كل السناقلة تناجرة
ومشكلة السناقلة كان عرسوا بمرقوهم من الملة وببقوا ما سناقلة..ببقوا مزوزاب ...لانو الواحد بكون متزوزو.. بعد الزواج..
وقلت لى ناس سان فرانسسكو اسمهم شنو؟؟
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
" نحن اللوتراب ديل جننا وجن اللولوة والجهجه...البي يدي بنتو منو لي زايغابي ؟"
عنصـريـة..
أطـالب بتنفيــذ قوانين البـورد على سـجيمـان الذى أفـرد بوستــه لنشــر هـذه النعـرات العنصــريـة..
ويجب أن تعـرف يا سجيمـان، ان الرجل لا يقيـم بإقـامتـه، وإنما بأخلاقـه، ودينـه.. فكم من لوتـراب لا يعـرفـون التـراب ولا الرمـاد.. وكم من زايغابى، رتب أموروا وعمل أوراق..
وأنا أعـرف واحـد طال بيـه الزوغان.. بس حسـى وين.. سوشال سيكيورتى، رخصـة سواقـة، وشئ قرين كارد.. يعنى جهــة ما تعاين يقولوا ليك دا كرتـو!
أها رايك شنــو؟
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
هناك قبائل أخـرى لم تورد فى تحليلك.. وسـوف أتطوع و أشـرحها هنا:
1- الرافضــة
2- طالبان
3- المتخلفـون
4- القاعـدة
والأن للشــرح:
1- الرافضــة:
هم أولائك الذين قـدمـوا إلى أمريكا بعـد كولمبـوس، ورفضـوا أن يغادروها تحت أى ظـرف.
2- طالبان:
وهـذه القبيلـة تتمـركز فى الجامعـات وأماكن الرعى الإلكتـرونى.. والواحـد فيهـم عنـدو بقـرة إسمهـا كمبيـوتـر، لو جاهـا وجـع دسـك سـاكت، تلقاه ما بنوم لحـد ما يعالجهـا.
3- المتخلفـون:
وهـم مجمـوعـات من الذين يتخلفـون عن الوفـود الرسميـة، أو الفنانين الزائـرين، أو البعثات.. وهـم لهـم علاقات نسب بالزوغأب.
4- القـاعـدة:
وأخيــرا، فإن هـؤلاء هـم الذين قعـدوا فى دكاكين اليمانيـة بالسنين، وحلفـوا بالخلقهـم، إنهـم ما يطـوروا لحـد ما يتطـور أبواليمن.
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
لووول سيجمان
ناس عقد الجلاد سمعتو انو الكمره صورتهم في شارع علي عبد اللطيف اليهو بالمناسبه ملك حر للحكومه الامريكيه و الشعب الامريكي
يعني لا تسري عليه القوانين الجنائيه السودانيه المعدله لعام 73
دي بالجد
و السي اي ايه بتفتش عليهم يمكن مرحلنهم غوانتانامو
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: Amjed)
|
حبيبنا الدكتور سجيمان.
باقى ليك قلب الشلوخ يدى الجنسية الامريكية.
و ايه رايك ناس تايوان تسميهم شنو.
و تسلم اخوى .
بينى و بينك فى واحدة فى المنبر دا قلت ليها ياختى
الكلمةدى جابت لى هوا.
وبعدين اخوى قريت ردك
فى بوست بكرى الا الصوت مش هبشنا قل بداء بينا.
ربنا يستر الواحد يلمم دلاقينو و يشتت ولا رايك
شنو؟
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
عوجي عاد ياسجيمان
تعرف !! شلوخ الشايقي مابترفعن او يقومن الا بعد رقاده (كب يقيفن)
وبما انه بوستك دا مكتوب في زمن (الإنبطاح) نحن في دار شايق بنعتبره مؤامرة كبرى ... ونشجب وندين ونستنكر 
اسمع دي ...
قالو الشايقي في اى مكان تلقاه
والطنبمور دا في اى بلد يرن ليك جوا قلبك
اها قالو حتى ان مشيت لندن تلقى الخواجي والخواجية الشوايقة قاعدين يتونسو كدا
- جورجي.. جورجي ، كان يو سنغي
- يس اى كان (بجرة الشوايقة ديك)
- سنغ (على وزن غن اى غني)
- يمسك ربابته والشايقى الانجليزى الماخمج
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
يا زول انت مالك حومقي كدي؟.... الزول اصلو ما يهزر معاك؟
السجيمـان،
ياخى مالك ياخ
ما تخليك فى سجمك ورمادك دا..
إنت أقول ليك كلام مفيـد.. ليك ولى يومك
ناس الشــرق، وأخـوان الكاشـف من الحلفاويين، مفرادات لغتهـم قليلـة جـدا جـدا.
عشـان كدا فى الشــرق يتمـوا الكلام بحاجـات تانيـة..
الشــوتال، والكولاى، والسـفــروق..
واخوان الكاشـف يتمـوه بالتقـريق والإسـتهـزاء..
لاكين إنتـو..
الكلام بتعملـوا بيـه أى حاجــة..
البلـد زاتا تطـوروهـا بالكلام..
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: سجيمان)
|
حبيبنا سجيمان
اخيرا لقيتك ياراجل ياسمح ياقيافة..ياخوى انا من زمان كايس لى زول لوترابى اصلى والحمدلله لقيتو وطلع بلدياتك والحقيقة انا مغرود فيه شديييييييد وبى اختسار كدة انا دايرو يتوسط لى للبنية الأسمها قونقوليزا رايس اصلو اخوك مكتول فيها شديد وليك على لو تم المراد الا اتوسط لك انا لى مادلينا اولبرايت ..قصرت معاك ؟
| |
|
|
|
|
|
|
|
|
|
Re: اخي الشايــقي...... ارفــع شلوخــك أنت أمريكي (Re: قلقو)
|
قلقو.......مشتاقين
Quote:
اخيرا لقيتك ياراجل ياسمح ياقيافة..ياخوى انا من زمان كايس لى زول لوترابى اصلى والحمدلله لقيتو وطلع بلدياتك والحقيقة انا مغرود فيه شديييييييد وبى اختسار كدة انا دايرو يتوسط لى للبنية الأسمها قونقوليزا رايس اصلو اخوك مكتول فيها شديد وليك على لو تم المراد الا اتوسط لك انا لى مادلينا اولبرايت ..قصرت معاك ؟ |
باقي لك النسوان القلتهن ديل فايقات لنا ولا فاضيات....ديل نسوان حوامات..وما بيقعدن في البيت.....انا غايتو ماني داير واحدة فيهن..... علا كان لقيت جانيت بت جاكسون ما باباها
| |
|
|
|
|
|
|
| |
سجيمان
Amjed
طيفور
abas
alsngaq
مريم بنت الحسين
دورنقاس
انور الطيب
ابو جهينة
Tumadir
حبيب نورة
هاشم نوريت
ملكة سبأ
قلقو
فيس بوك
تويتر
انستقرام
يوتيوب
بنتيريست