|
Re: ما يختص بدفن الفيتورى وموقف المغرب. وكضب ا (Re: معاوية عبيد الصائم)
|
تحياتي معاوية ..
منقول من صفحة طارق جبريل من الفيس بةك ..
حكاية يوم طويل حزييييين حزيييييين.. الساعة اربعة الا ربع تقريبا مساء الامس كنت انتهيت من الصفحة الاولى ورتبت الارشيف وحولت صفحات الجريدة لقسم الموقع في النيت عشان ينزلوا المواد ويعلنوا عن عدد الغد.. بعديها كان عندي اجتماع انا والمدير عشان اول الشهر مفروض ننزل بي شكل جديد للجريدة مع تبويب جديد وكنت وضعت التصميم والتبويب وكان مفروض نتناقش فيه سوا.. جاني تليفون لمن عاينت للتليفون لقيت «madam alfaitoury».. قلبي انقبضت قبل ما ارد لانه قبل يومين حالته كانت اتدهورت شديد واصبح تقريبا لا ينوم وكان محتاج عناية مركزة شديد وانا كنت عارف انها ممكن ما تكون نامت ليها يومين خصوصا انه نقلوهوا مع طلحة لي مستشفى الشيخ زايد وانا كنت معاهم بالتليفون لحدي ما رجعت من الشغل ومشيت عليهم.. - ألو يا مدام ان شاء الله بخير انت والاستاذ - خوي طارق اجاركم الله ابوكم و«صاحبكم» الفيتوري في «يد» الله - لا حولة ولا قوة الا بالله العلي العظيم.. كيف ومتين كنت مهجوم وعقلي ما قادر يركز وما مستوعب الحاصل - الحمد لله يا طارق على امر الله انا هسي معاه جوة الغرفة وكلموني الدكاترة هسي - لا حولة ولا قوة الا بالله الدوام لله ............ ختيت ايدي في راسي وقعدت في المكتب ما فاهم حاجة وما عارف اضرب لي منو ولا حا ابكي مع منو ولا حا امشي وين ولا حا اعمل شنو.. كان مفروض اضرب للاخ محمد عبد اللطيف الجاء في زيارة للمغرب على اساس انسق معاهو يمشي يزور الفيتوري.. قعدت لي خمسة دقايق خاتي يدي في راسي كدة وما مستوعب الحاصل.. شوية تليفوني ضرب «طلحة أخوي».. - ألو - يا طارق الدوام لله الفيتوري ذهب الى ربه الآن - لا حولة ولا قوة الا بالله.. كلمتني زوجته هسي - ايوة انا برضو ضربت لي هسي انا وصلت المستشفى حاول تحصلني سريع عشان نعمل الاجراءات ونشوف موضوع الدفن - اوكي انا طالع هسي مشيت علي المدير قلت ليه ياخ نخلي الاجتماع للاحد بعد ننتهي من العدد لانه الفيتوري اتوفى ولازم ارجع الرباط هسي.. اترحم عليه وقال لي قبل ما تطلع اديهم الخبر عشان ينزل في الموقع ونعمل عليه بكرة بروفايل في صفحة الثقافة.. مشيت للصديق محجوب فريات اديته المعطيات قام عزاني وبدأ يكتب ونزلت مشيت علي محطة القطار.. ركبت القطر من الدار البيضاء للرباط... المسافة ساعة تقريبا.. جاني الف تليفون شي من المغرب شي من خارج المغرب ما قدرت ارد علي اي تليفون وكنت حزين جدا قعدت في مقعد في آخر القطار وتكيت راسي في القزاز وبديت اتذكر في اول يوم لاقيته واتعرفنا علي بعض ومشى عربيته جاب دواوينه اهداها لي وبعديها بي اسبوع قابلته في نفس المكان «في مقهى باليما» واتونسنا وقال لي اشتهى الاكل السودان وقلت ليه ابشر ياخ الحاجة (رحمها الله) معاي وبكرة السبت تجي تتغدى معاي لانه طلحة ذاته بيجي مع اولاده يتغدوا معاي من طبيخ الحاجة.. اتذكرت ونسته مع الحاجة وضحكهم والكسرة والشطة... اتذكرت لمن كنت بمشي ليه في البيت ويصر يقول لي: لا تعال اقعد جمبي هنا ويطلب الشاي واقول ليه ياخ انت الدكتور موش منعك من السكر والخبيز يضحك ويقول لي ياخي حاجة بسيطة وزوجته «رجات» تشاكله وانه بوظ «الرجيم» الليلة وعاملني انا وطلحة سبب... لمن وصلت الرباط ضرب لي طلحة قال لي ما تمشي المستشفى انا عملت كل الاجراءات تعال لينا في بيته طوالي.. سوقتة عربيت ومشيت.. أول ما شافتني زوجته مسكت فيني وقعدت تبكي هي واختها وانا كنت منهار من جوة بس متماسك عشان كان همي بته «اشرقت» لانها ممتحنة شهادة ولازم نطلعها من مود الحزن دة باسرع ما يمكن.. طلعنا عندها انا وطلحة في غرفته مسكت طلحة واترمت في حضنه هديناها وقلنا ليه دة امر الله ويمكن يكون راحة ليه اكتر من المرض.. صراحة انا ما قدرت اتحمل منظرها خليت طلحة معاها ونزلت تحت واسيتهم وانا ما لاقي اليواسيني دون اشعر حسيت في دمعة نزلت غضبا عني مسحتها ما قدرت اعاين في وش زوجته.. طلحة جاء نازل قال انه اشرقت هدأت وخلوها تاخد ليها نومة او على الاقل ترتاح وطفى عليها النور ونزل.. اتكلمنا مع زوجته واختها في تفاصيل الدفن.. عرفت من طلحة انه اتصل بوزير الثقافة واخبره بالأمر.. الوزير تأسف للموضوع وقال لي طلحة ادينة ربع ساعة برجع ليك عرفنا انه اتصل بوزير الداخلية و«سلطات عليا» وقالوا ليه المغرب يسقيم له تشييعا رسميا.. بعد عشرة دقايق رجع لينا وقال انه عنده تعليمات واضحة جدا ان يتم التشييع بشكل يليق به.. بعديها اتصل بينا والي «محافظ» الرباط وقال انه وصلته تعليمات من وزارة الداخلية بالتكفل بالتشييع الرسمي.. اتفقنا نتقابل الصباح في المستشفى لاخراج الجثة واجراءات الغسل.. اتلاقينا في الصباح في المستشفى لقينا «حسونة» مراسل الشروق والاخ «عمر زكريا» رئيس الجالية السودانية.. بدينا الاجراءات.. بعد شوية «حسونة» جاهو تليفون من السفير السوداني انه هناك قرار من رئاسة الجمهورية بارسال طائرة لنقل الجثمان للخرطوم... حصل نوع من الربكة خصوصا السلطات المغربية اتصلت بطلحة وقالوا ليه عملنا اجراءاتنا على اساس الدفن بعد صلاة الظهر.. اتصل السفير بطلحة على اساس نقل الجثمان طلحة قال ليه ياخ دة قرار ما حقي دة قرار حق زوجته وبنته لكن انا بوصل ليهم المعلومة... اتصل طلحة بارملة المرحوم ورفضت رفضا قاطعا وقالت ليه حرفيا: كانوا وين لمن كان عيان ومحتاج ليهم ومحتاج لي دعمهم هسي بقى مهم يعني علي جثتي ما يمشي أنا زوجي يدفن في المغرب ودي وصيته لانه قال لي ادفنوني محل اموت وانا عايزاهو يندفن في حتة اعرف امشي اترحم عليه فيها انا وبنتي... الامور اتوترت جدا جدا.. انا وعمر زكريا اتناقشنا انا قلت ليه كدة اي كلام تاني ما عنده معنى دي الزولة العندها الحق في الفيتوري بعدين بنته من زوجته الفلسطينية اتصلت وحا تصل الساعة وحدة مع الدفن... عمر زكريا كان رأيه انه اكرام الميت دفنه.. عدة تليفونات من هنا وهنا الامور جاطت جدا جدا.. زوجته واخوها جوا من البيت وجاء السفير مع مجموعة من موظفي السفارة دخلوا في نقاش حاد مع زوجته.. - يا مدام انا عندي تعليمات من رئاسة الجمهورية عشان انقل الجثمان الخرطوم ويلقى التشييع البيليق بيهو - يا سعادة السفيرة رئاسة الجمهورية علي راسي من فوق.. لكن انا زوجي يندفن في المغرب - نحن عارفين شعورك ومقدرين دورك ياخ بس دي تعليمات من الرئاسة انا لازم انفذها - الرئاسة دي كانت وين ليها اربعة سنين وهو راقد حق الدواء ما كان عندنا.. كانت وين من زمان أنا كان ما «...» و«....» وعشاق الفيتوري كان نزلت الشارع اشحد انا راجلي يندفن هنا - واحدة من النسوان الكانوا مع السفير: انت مشكورة دورك انتهى وقمت بيه كويس والفيتوري دة حق الشعب السوداني - اخو زوجة الفيتوري: كيف انتهى يعني دي زوجته والفي البيت ديك بنته حصلت جوطة كدة ادخل طلحة وساق زوجة الفيتوري بعيد كدة اتكلم معاها لمن جوا راجعين طلحة قال ليهم: يا جماعة الاور كدة بقت واضحة المدام عايزاهو يندفن هنا وقالت دي وصيته «ادفنوني محل متة» - السفير: ياخي دي تعليمات رئيس الجمهورية - طلحة: هسي دة ما موضوع تعليمات - السفير: لا انا بتهمني رئاسة الجمهورية وتعليماتها - طلحة: ياخي رئاسة الجمهورية دي انا ما بتعني لي اي حاجة - السفير: انا بهمني رئيس الجمهورية - طلحة: وانا رئيسكم دة ما بيعنيني نهائي شوية ادخل الرجل الثاني في السفارة وهدأ النفوس مدام الفيتوري انفعلت: ياخي موش الجواز دة هاكم ليه انا حا ادفن زوجي بدون جوازكم دة انا سوقتها بعيد وهديتها والرجل الثاني شاق طلحة واتناقشوا ورجعوا لينا وقال يا جماعة خلونا بس نخبر الخرطوم بالحاصل هنا ونعتذر ليهم.. طلحة قام قال ليه: طيب المغاربة ديل القالوا انه حا يعملوا ليه تشييع رسمي موش عيب انه بعد ترتيباتهم دي وانه «القصر» متابع الموضوع موش عيب دبلوماسيا انه نخلق الاحراج دة للناس ديل القبلوا اقامته من غير اوراق وكمان هسي عايزين يعملوا ليه تشييع رسمي هنا زوجته انتفضت وهي بتبكي: يا طارق وطلحة انا حا امشي اشيل زوجي البيت ونغسله مع اهلي وندفنه رجل السفارة الثاني هدأ النفوس ومشى السفير ورجع لينا تاني وقال انه الخرطوم اتفهمت الموقف لكن السفير اخد في خاطره طلحة قال ليه ما مشكلة جهده مقدر لكن نحن هسي زمنا ضيق جاء السفير واتكلم مع زوجة الفيتوري وانا وطلحة وعمر زكريا مشينا المشرحة وخلنا مع الزول الحا يغسل الجثمان وطلعوا لينا المرحوم وانا والمغربي بدينا نغسل في الجثمان لمن انتهينا «والله وشه كان صافي ومبتسم وزوجته قالت لي آخر حاجة هي والدكاترة واقفين جمبه قال ليها سامحونا» خلينا وشه مكشوف جات زوجته باست راسه هي واختها وبنتها انهارت طلعناها كملنا الكفن ونزلناه لي عربية الاسعاف واتجهنا لي مقابر الشهداء وصلينا عليه وكانت في اكثر من عشرة قنوات تلفزيونية ووسائل اعلام اخرى.. مشى الفيتوري وحيدا سمحا جميلا ربنا يرحمه ويدخله فسيح جناته.. ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ - كان متابع معاي طيلة «معركة الدفن» الاستاذ محمد طه القدال وكان رافض جدا انه يتم «سرقة» الجثمان عشان الشو الاعلامي والمآرب الاخرى: يا طارق اوعكم تسلموهم ليه دة حقكم انتو وحقنا ما حقهم - خالد عويس ياخي تسلم البطن الجابتك ياخ وحا اجيكم واشكر ليكم احكي ليكم خالد دة عمل شنو - في ناس كتار ضربوا ما قدرت عليهم لانه كنت مرهق جدا جدا فارجو انهم يقبلوا اعتذاري - المغاربة ديل اجمل ناس شعبا ودولة «اتحاد كتاب المغرب» «بيت الشعر» اتحاد كتاب تمارة.. الصحافيون المغاربة والمصورون المغاربة والاصحاب المغاربة من كل الاطياف... ياخ ما عرفت اقول ليكم شنو مضطر اقيف هنا لانه في «معركة» تاني ماشي اخوضها هسي في بيت الفيتوري انتهي واجي احكيها ليكم - الناسا المرسلين لي في الخاص اعذروني ياخ والله منهك جدا جدا - الفيتوري ترك لينا وصية وامانة «اشرقت» اها يا ناس «الذين يتسولون باسم الفيتوري» و.... و،.... و... كدي ورونا مروءتكم ياخ... وبرضو راجع ليكم بي مزااااااااااااج وحا احكي كل الحاصل من خمسة سنين
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: طارق عمر مكاوي)
|
رحم الله الفيتوري
Quote: اتصل طلحة بارملة المرحوم ورفضت رفضا قاطعا وقالت ليه حرفيا: كانوا وين لمن كان عيان ومحتاج ليهم ومحتاج لي دعمهم هسي بقى مهم يعني علي جثتي ما يمشي أنا زوجي يدفن في المغرب ودي وصيته لانه قال لي ادفنوني محل اموت وانا عايزاهو يندفن في حتة اعرف امشي اترحم عليه فيها انا وبنتي...
|
فعلاً كانوا وين في فترة مرضه وحوجته ؟؟ هدا ديدنهم ودينهم،، حتى الموت يتاجرون به وما وفاة الحوت ببعيدة وغيره وغيره....
الشايقي http://www.youtube.com/watch?v=WjNosdjuv7shttp://www.youtube.com/watch?v=WjNosdjuv7s
.
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: سيف الدين محجوب)
|
تحياتنا يا مواطن وضيوف البوست والله العظيم ولا أنا كنت ح اتداخل يا سيف عارف لأنو الواحد في لحظات زي دي بكون عايش في عالم لا يسمح له بالكتابة البتة وها أنذا أفعل ، ما فهمت قصدك مع إنو الجانب الاول او بالأصح سؤالك كان صريح : ماذا قدم الفيتوري للسودان ؟ لكن جيت راجع وقُلت في إنتظار المُتباكين على عدم دفنه في السودان ..... أولاً أنا ما من المتباكين على عدم دفنه في السودان لكن الناس المتباكية علي عدم دفنه في السودان ما بهمهم سؤالك دا !! ليه لأنو إذا ما قدم للوطن فما ح يكون هاميهم إنو يندفن فيه من الأساس . لكن حسب السؤال أقول لك يا أستاذ أمثال الفيتوري يرفعون أسماء بلدانهم فالسودان الذي أنجب الفيتوري شاعر افريقيا وذو العربية الفصيحة وحمل هم الوطن وجُرد من الهوية الورقية إتبان حكم طاقية ذهب إلى لقاء الله لأسباب وطنية وقد كان وأن أصبح صبح الوطن في أبريل المجيدة لا سجن فيه المُعذبون قد كان " برميزة التعذيب " ولا سجان وجدنا . وبالمعنى دا يا سيف جميعنا لم يقدم للوطن شيئ ونحن العلي الدوام بنقول أبداً ما هنت يا سوداننا يوماً علينا وبالتالي لا نستحق ان نلقى فيه قبر كي نُكرم فيه إذا شاء لنا الله أن نموت في غُربتنا " وما تدري نفس بأي أرض تموت " . رحم الله الفيتوري وأسكنه فسيح جناته مع الصديقين والشهداء والصالحين وحسُن أولئك رفيقا اللهم أرحمنا إذا ما صرنا إلى ما صار إليه " إنا لله وإنا إليه راجعون "
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: سيف الدين محجوب)
|
وانت القاليك منو في زول فاضي عشان يدخل معاك في مهاترات امرك عجيب والله تقول انا منتظر طيب ما عايز تدخل في مهاترات منتظر شنو باقة ورد يعني المهم منو القال ليك هناك متباكين على عدم دفنه في السودان ؟؟؟؟؟؟؟؟؟؟؟؟ بل هناك زعلانين حد القرف يا زول من عفن الكيزان ومحاولتهم سرقة الجثمان من جل مكاسب رخيصة بس التحية لناس طارق جبريل واسرة الراحل المقيم وبكل تاكيد لو ما كانوا هم بهذه المواقف القوية كان حيكون في سودانين غيرم ورحل شرفة التاريخ يا راية منسوجة من شموخ النساء وكبرياء الرجال وسيظل الفيتوري العنفوان وصوته حاضراً وروحه المثقلة بالغضب كل طاغية صنم دمية من خشب وما حفرنا له قبراً فقط توارى جسداً اما عن ما قدمه الفيتوري للسودان الشرفاء وحدهم من صافح وجدانهم هذا الشاغر الفذ النبيل وليس انصار الديكتاتوريات والمرجفين ومن في نفوسهم شي من نقص لا يبارحهم حتى لحظة هيبة الموت معاوية عبيد ومن اتى من بعد لكما التحيييييييييييييييييييييييييييية
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: عبدالكريم الاحمر)
|
فيتوري .. تبكيك قصائدك وحروفك الأنيقة التى لامست وجدانا نبكيك إنتظار من أجل أجمل اللقاء علي الوعد تحت شجرة الروح حيث قناديلك تلقي في مسامعنا ما لم يكتب بعد حملته خطواتك ورحلت به عن فوضى الاشياء يا أبن من صحراء ونيل فيتوري يا أب ولدته أرضي ... يا أيها القديس الراحل في صمتنا وفخرنا .. لغداً مشرقاً سنكون علي بابك أيها السلطان نطرقه في ثواني العمر يا تشكل الروح ها نحن إنتظاراً لتلعب بنا الاقدار مجدداً بين خميلة ومرجاحة من عبق الروح
......................
لكم التحية يا أبناء وطن مسلوب الأرض غير مسلوب الضراع ونخوة الرجال شكراً بعظم التحايا أبناء جبريل .. طلحة وناصر وطارق يا رجالاً من بيض الوجوه والأيادي عزاً يفتخر بكم الوطن في ظل ناهب وسادن وشكر عطائكم المتدفق لمحبة والسلام والتأخي
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: عادل البراري)
|
أصبح الصبح
للشاعر السودانى محمد مفتاح الفيتورى
أصبح الصبح ولا السجن ولا السجان باق واذا الفجر جناحان يرفان عليك واذا الحزن الذي كحل تلك المآقي والذي شد وثاقا لوثاق والذي بعثرنا في كل وادي فرحة نابعة من كل قلب يابلادي أصبح الصبح وها نحن مع النور التقينا التقى جيل البطولات بجيل التضحيات التقى كل شهيدبشهيد لم يزل يبذر في الأرض بذور الذكريات أبدا ما هنت يا سوداننا يوما علينا بالذي اصبح شمسا في يدينا وغناء عاطرا تعدو به الريح فتختال الهوينى من كل قلب يا بلادي فرحة نابعة من كل قلب يابلادي قهر الظلم ومات
--------------------------------------------------------------------------------
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: GAAFER ALI)
|
Quote: وماذا قدم الفيتوري للسودان ؟؟
وفي إنتظار رد المتباكين على عدم دفنه في السودان !!!!!!!!!
مع العلم بعدم رغبتي في الدخول في مُهاترات مع أي كان |
حالفك سوء التقدير يارجل ..
يلزمك اعتذار للوطن وللمواطنين وعشاق هذا الشاعر السودانى العملاق
احترامى
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: GAAFER ALI)
|
ولم يقف دور الفيتورى عند ذلك الحد ولكن حفلت كتب المدارس الإبتدائية والثانوية ومقررات الجامعات فى الأدب والشعر بأشعار الفيتورى مشارا إليه بالشاعر السودانى، فى مصر ولبنان والعراق وسوريا واليمن والكويت والمغرب وتونس والجزائر والصومال ونيجيريا وموريتانيا. فمن غيره أعطى للسودان مثل هذا الألق وسط أمم العالم. >>>>>>>>>>>>>>>>>>>>>>>>>>>>>>>>>>>>
هذه الفقرة وحدها تكفي للإجابة على اي سؤال عن الشاعر الفيتوري.. يرحمه الله ودمتم بت اتبرة- بسمات
| |
|
|
|
|
|
|
Re: ما يختص بدفن الفيتورى وموقف المغرب. وكضب ا (Re: امجد الجميعابى)
|
مقتل السلطان تاج الدين
-1- فوق الأفق الغربى سحاب أحمر لم يمطر و الشمس هنالك مسجونة تتنزَّى شوقاً منذ سنين و الريح تدور كطاحونة حول خيامك يا تاج الدين *** يا فارس سرج جوادك ليس يلامس ظهر الأرض و حسامك مثل البيرق يخترق الظلمات يا فارس مثل الصقر اذا ما أنقض بيتك عالى الشرفات نارك لا تخبو .. لا تسود و جارك موفور العرض يا فارس.. حتى مات!
-2- كان السلطان يقود طلائعنا نحو الكفار و كان هنالك بحر الدين و اطل بعينه كالحالم.. ثم تنهد: (( الحرب الملعونة (( يا ويل الحرب الملعونة ((أكلت حتى الشوك المسود لم تبق جدار لم ينهد (( و مضى السلطان يقول لنا و لبحر الدين: - هذا زمن الشدة يا أخوانى هذا زمن الأحزان سيموت كثير منا و ستشهد هذى الوديان حزن لم تشهده من قبل ولا من بعد *** و أرتاح بكلتا كفيه فوق الحربة و رنا فى استغراق نحو وجوه الفرسان كان الجو ثقيلا، مسقوفا بالرهبة و بحار من عرق تجرى فوق الأذقان و سيوفهم المسلولة تأكلها الرغبة و الخيل سنابكها تتوقد كالنيران و مضى السلطان يقول لنا و لبحر الدين: - هذا زمن الشدة يا أخوان فسيوف الفرسان المقبوضة بالأيادى تغدو حطبا مالم نقبضها بالإيمان و السيف القاطع فى يد الفارس كالفارس يحلم بلقاء الفرسان *** و ترجل تاج الدين جبل يترجل مزهواً من فوق جبل و ترجل بحر الدين و حواليه عشرة الاف رجل سجدوا فوق رمال((دروتى)) لله معه و أطلَّت كل عيون الطير المندفعة فى هجرتها من أقصى الغرب لتاج الدين فعلى أفق الوادى الغائم تتمدد رؤوس و عمائم و بيارق يشبهن حمائم ... ثم إرتجفت أفواج الطير وراء السحب المرتفعة
-3- - يا تاج الدين الأعداء أمامك.. فارجع لهب..و قذائف حمر.. و خوذات تلمع و الحربة مهما طالت لن تهزم مدفع لن تهزمهم يا تاج الدين بسلاح كزمانك مسكين و كعاصفة سوداء تلفت تاج الدين فى سخط الجبارين تلفت تاج الدين و أطل على وجه القائل و كانت شفتاه رعودا و زلازل و كانت كلمات السلطان سلاسل - يا ويلك لو لم تك ضيفى يا عبدالله ما اقبح ما حركت به شفتيك ما أبشع ما منيت به عينيك عار ما قلت.. و عار أن نستمع اليك فأثن زمام جوادك و خذ الدرب الآخر يا بحر الدين اعده للدرب الآخر
-4- و تدفقت الرايات و غطى الأفق صهيل الخيل و ((دروتى)) العطشى مازالت تحلم بمجئ السيل و تحدر من خلف الوديان المحجوبة علم قانٍ..و مدافع سبعٍ منصوبة و حرائق و ضجيج شياطين هاهم قدموا يا تاج الدين فانشر دقات طبولك ملء الغاب حاربهم بالظفر، وبالناب طوبى للفارس إن الموت اليوم شرف داسوا عزة أرضك هتكوا حرمة عرضك عاثوا ملء بلادك غازين غرباء الأوجه سفاكين فاضرب..اضرب..يا تاج الدين اضرب..اضرب..اضرب..
-5- - يا مولاى السلطان سلام الله عليك قتلى أعداؤك مطروحون لدى قدميك أسرى مغلولون و خدَّام بين يديك أكلت نيران مدافعهم نيرانُك انت بالسيف و بالحربة وبإيمانك قاتلت يا فارس تسحق أعداءك أنى أقبلت حين استبقوا نحوك بإسم بلادك ناديت ((لن يحجبنى عن حبك شئ)) ((إنك ملء دماى و عينى)) ((يا دار مساليت أنا حيّ))
-6- و هجمت فأجفل قائدهم و انشق ستار كان ستار الرصاص كان ستارا من نار نصبوه فى وجهك صفين كى لا ترى قائدهم بالعين لكنك يا فارس أقدمت فوق المدفع بالسيف مشيت ولحقت بقائدهم فانهار القائد ذو الجبروت انهار ذو المركبة النارية و الخوذات انهار أحنى رأسا ماتت فى عينيه الرغبات مدَّ يديه يبكى فى حشرجة الأموات عرَّ صدراً دموياً أعشب فيه العار هذا الصدر العارى المنهار من قبل لقائك زانته نياشين الأكبار لكنك يا فارس آليت أن لا تهب الكافر صفحك أن تسقى من دمه رمحك أن تصلبهم عبر الفلوات أن تجعل موتاهم مثلاً لزمان عبر زمانك آت
-7- تحت الراية غرقت رأس القائد فى الدم أرخى عينيه فى رعب.. ثم أستسلم سلمت كفك يا تاج الدين فأقض على احلام الباقين صاروا بعد القائد قطعان غنم طاردهم بجنودك عبر الفلوات عبر ((دروتى)) عبر الآكمات قتلاك من الاعداء مئات و الأسرى ملأوا الساحات و القائد ملقى فى الطرقات سلمت كفك يا تاج الدين
-8- لكن الشمس المسجونة و الريح الحبلى الملعونة مازالت مثل الطاحونة تجرى.. تجرى حول خيامك تجرى من خلفك و امامك - يا تاج الدين - يا تاج الدين مازال عداتك مختبئين ايديهم راعشة..و رصاص بنادقهم يتزاحم فى بطء نحو جبينك يا فارس خذ حذرك من طعنات طعينك يا فارس خذ حذرك يا فارس خذ حذرك ليتك لا تتحرك فبنادقهم لا زالت راكضة إثرك أترى تثقب رأسك أترى تثقب صدرك يا فارس خذ حذرك ليتك لا تتحرك ..و تحرك تاج الدين كانت عيناه حينئذ تقفان على جرحاه و الراية فى عينيه قد لطخها الدم و أتت ريح خريف تتراكض خلف خطاه و تجهم وجه ((دروتى)) بالسحب و أظلم و أتت بضع رصاصات خجلات مضطربات أقبلن من الظلمات فرأينا تاج الدين يبدو و كأنْ قد مات يا تاج الدين سلمتْ مزق أستار الصمت عد من وديان الموت أو تذهب حتى أنت و تساقط تاج الدين لم يقو الفارس أن يرجع لبكاء الشعب عليه فرصاصات خمس صدئات تسكن فى عينيه لكن أحداً لم ير رايته تسقط من كفيه
كتب هذه القصيدة مؤرخا لدحر الفرنسيين فى غرب السودان دار مساليت
| |
|
|
|
|
|
|
|