|
عوض كريمة وخريطة الريدات في الحلة
|
00:45 AM Aug, 30 2015 سودانيز اون لاين طارق جبريل-المغرب مكتبتى فى سودانيزاونلاين
مرة أنا وعوض كريمة جينا من «كمبلت» قمنا اتشطفنا في ماسورتهم الجمب الباب والدنيا اجازة كدة.. قام ابو عويض قال لي ياخ ارحكا حيطة ناس «ستنا» نخت البنابر ونعاين بهناك.. - نعاين في شنو - تهاني ما عرسها قرب والمرة الغليدة ديك أم جبون قاعدة تجي تعلمها رقيص العروس - وإنت شوفت جبونها وين - ياخ ما لمن تهاني ما تعرف تتني ولا ترقص بتقوم تقلع توبها وتقوم من الدلوكة وترقص وجنها جبونات أم استك ديك زي البتوسي بيهم حبوبتي سكينة لباساتها ديك البطيرها الهبوب - أيوا.. اها وكان شافونا - ما يشوفونا ما بيقولوا حاجة ياخ أنا طوالي بكشف ليهم لكن عندهم حبوبة فقر كدة قالوا جاية من سنجة - مالها - طوالي شايلة صوت عنج مرة شافتني قربت تمحطني لمن وقعت من البمبر - ههههههههههه اها لو شافتنا - ياخ انت كشف بس لو جات دنقر راسك اها مشينا وختينا البنابر وفوق منها عِلب «فورموست» عشان ما بنقدر نحصل الحيطة اها وصلنا في «اغنية عيني يا عيني» وكان فيها وقعة للعروس قام عوض قال لي: - هنا العروس حا تقع هم كلموها كدة عشان يدفع قروش أنا حا اكلمه - كيف - لمن يبدأ الرقيص حا امشي اجره من جلابيته واكلمه - ليه - عشان ابت تعرس حسن كان بيشتري لي حلاوة حربة وشلن طحنية عشان اوصل ليها الجوابات - وانت ما كنت بتخاف - لا ما بخاف ياخ بعدين طحنية دكان النعيم كانت دسيسة ياخ - بتديهو ليها كيف - ما هي العصر كدة بتقوم تقش الحوش وبتكون ماسكة فستانها كدة ولا بتدخله في اللستك وبتغني «باب الريدة وانسدة» أها أنا بمد راسي واكشف كويس لمن ما يكون في زول بقول ليها: تهاني براحة كدة وارمي ليها الجواب - ديشاااااك وكان قبضوك - ياخ ما بقبضوني وبمشي لي حسن اكلمه وبيشتري لي داندورمة كمان بتاعة عرديب - شوف حنان ديك بتحمر لينا ياخ - اعمل نفسك ما شايفها ياخ بت فقر وبتاعات جاكات - عملت شنو - مرة لقتني جمب الباب ونقنقت لي في اضاني وقالت لي اودي جواب لي عمر ود حاجة خادم الله - اها ووديتو - مرة واحدة وديتو ياخ دقسوني ياخ - كيف - هي قالت لي بديك شلن وهو لمن اديته الجواب وقفت مسافة قال لي شكرا يا ابوعويض لا داندورمة ولا طحنية.. طلع عنكوليب ياخ ما فيه موية سكر - وهي هسي بتحمر لينا كدة ليه - عشان ابيت اجيب ليها الرد من عمر ياخ... لا طحنية دسيسة ولا داندورمة - عجيب يا ود كريمة لكن - يا زول ما تبقى فارة ما تشوف الحلة دي كدة انا عارف ريداتهم كلهم - ياخي - اسامة تنقم بخت الجوابات لي احسان في مزيرة المدرسة وجعفر ابو علي كل يوم يقول لي امه عايزين فسيخ عشان يمشي يجيب فسيخ من ناس خالتي سهوة ولمن يمشي يدق الباب بتفتح ليه سمية وبيخت ليها الجواب في البستلة.. - وانت نقشته كيف - مرة امي رسلتني عندهم في المطبخ هو طلع كيس من نص الفسيخ فيه جواب اماني ما كنا مستفيدين هههههههههههههههههههههههههههههههههههههه
إنا لله يا عوض كريمة ياخ
|
|
|
|
|
|
|
|
Re: عوض كريمة وخريطة الريدات في الحلة (Re: عبدالحفيظ ابوسن)
|
Quote: مافي كلام قراية ممتعة وراقية زمن الجبون والكزاكة معليش في ملاحظة لا تنقص من النص وروعته لكن حسكنت لي مفردات ديسيس ... جاكات ... كشف ليها كلمات حديثة لا تناسب سردية الحديث المتبادل تشكر ودجبريل ان كل ظلام العالم عاجز عن اطفاء نور شمعة
|
هوووي يا ود ابو سن انت قايلني قدركم دسيس دي ياها حقت زمنا ياخ ههههههههههههههههههههههههههههههه
| |
|
|
|
|
|
|
Re: عوض كريمة وخريطة الريدات في الحلة (Re: طارق جبريل)
|
تعرف يا طارق ..... انا عندي ذكريات زي دي كتيرة لكن الذكريات دي أهمها إني أنا عرفت منو الألفت سمسم القضارف تصدق ؟؟ عرفت الألفتها ... وكمان ألفتها في منو !!!\ الزمن داك أنا في الخلوة ... كلمت أمي عليها السلام أدتني علقة بسير المحفضة ما بنساها وقالت لي "
لو مشيت قلت الكلام دا لي زول بقطع لسانك
أها من ديك...!!!
تحياتي
| |
|
|
|
|
|
|
|