|
Re: شغل الراتب والعمل الحُر أحلاهما مُر (Re: عبد العزيز محمد عمر)
|
يا عمك .. صباحاتك ورد
قريبي عندو شركة مقاولات ما شاء الله شغال مية المية .. قلت ليهو ياخي نحن الموظفين اي مجهود بنعملو بمشي دخل اضافي لي صاحب العمل ، وصاحب العمل اي مجهود بعملو بمشي في جيبو.. ضحك وقال لي ونحن اصحاب العمل اي مصيبة كمان بتجي فوق راسنا ما فوق راس الموظف .. شنو ليك؟
| |
|
|
|
|
|
|
Re: شغل الراتب والعمل الحُر أحلاهما مُر (Re: عبد العزيز محمد عمر)
|
هلا عبد العزيز
طبعا الحر ما في شك بس العمل الحر عايز فهم لطبيعتو وللمشاكل البتحيط بيهو
لقدام بنجيب أمثلة
وطبعا يا عبد العزيز في ناس أصلا ما بشتغلوا براتب من فتحوا عيونهم وهم في العمل التجاري وفي ناس من اتخرجوا مشوا اشتغلوا في المكاتب والمدراء كسروا عينهم من بدري ولهسة خائفين يخلوا الوظيفة
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
في طريقة للمجانسة بين الإثنين تكون عندك اعمال حرة وإنت شغال بمرتب
مع أن هناك من يقول لو ما بذلت 100% في العمل الحر ما بيجيب نتيجة
ممكن الواحد لو حوش قروش يدخل نصها في مشروح عمل حر والنص التاني يعيش بيه لحدي ما مشروعه ينجح
تحياتي حمد وضيوفك الكرام
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
حبيبنا حمد نحن السودانيين جبناء في الاستثمار و العمل الحر و خنوعين جدا بالوظيفه طبعا العمل الحر هو الخيار الافضل و ما في انسان عمل ثروة من وظيفه كل الاثرياء اصصحاب اعمال خاصه لكن فقط البدايه تعمل في مجال بتفهم فيهو جيدا وثانيا راس المال المناسب لبداية اي مشروع وطبعا هناك مخاطر كبيره في الاسثمار في السعوديه و الخليج لعدم وجود ضمانات و الامثله كثيره
| |
|
|
|
|
|
|
Re: شغل الراتب والعمل الحُر أحلاهما مُر (Re: طارق عبد اللطيف نقد)
|
هلا فرانكلي
Quote: في طريقة للمجانسة بين الإثنين تكون عندك اعمال حرة وإنت شغال بمرتب |
احيانا تنجح واحيانا لا لأنك مضطر تسلم الشغل لزول تاني وهنا الاعتماد بيكون عليهو لو زول كويس أمورك بتمشي ولو فاشل بفشلك
أنا جربت حاجة زي دي في السودان ونجحت بسرعة خيالية بس النجاح دا دخل فيني طمع وخلاني أتهور وأخلي الوظيفة واتوسع طبعا أتت الرياح بما لا تشتهي مركب رأسمالي الصغير دا ودقيت الدلجة وقعدت ألف سورو وما لقيت خيار إلا الكي بالنار بتاع الإغتراب دا - ببساطة عشان تنجح في تجارة لا بد من ممارسة طويلة تسمح ليك بالقراءة الجيدة لإتجاهات السوق ولا بد ليك من ضهر يسندك لما تقع .
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
مرحبا طارق نقد Quote: نحن السودانيين جبناء في الاستثمار و العمل الحر و خنوعين جدا بالوظيفه طبعا العمل الحر هو الخيار الافضل و ما في انسان عمل ثروة من وظيفه كل الاثرياء اصصحاب اعمال خاصه لكن فقط البدايه تعمل في مجال بتفهم فيهو جيدا وثانيا راس المال المناسب لبداية اي مشروع
|
تصور ما جبناء في الشغل الخاص ولا بنخاف منو لكن بنخاف من الشماتة يقعدوا يتحكوا بيك ويشربوا بيك الجبنة حاجة تانية في الخليج دا لو لقيت خطوة حلوة الشغلانة ما بتاخد معاك كتير بتلقة نفسك مرتاح بس التهور والتوسع ما كويس بلفت عليك الإنظار تلعب زي المسمي ليك مربوطة بدون آسات تقصقص بجاي وبجاي لحدي ما تجيب مربوطتك
شنو حفلة البورداب الجاية متين
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
Quote: وطبعا هناك مخاطر كبيره في الاسثمار في السعوديه و الخليج |
طارق انت قلت المختصر المفيد ابدا لا يمكن ان تتوفر ضمانات لا الانسان الخليجي يوفر هذا الامان و لا الدولة تنتصر لك ممكن ان تعمل في فترة وجيزة اذا عرفت السوق ملايين لكنها ممكن ان تذهب في مهب الريح ام بأن يجد من يقول له من بني جلدته ده مالك او بموت الشريك لذا الاستثمار مشاركة معهم مما يترب عليه مخاطرة ممكن توديك التوج تحياتي مع تمنياتي للجميع برزق وفير و استثمار آمن
| |
|
|
|
|
|
|
Re: شغل الراتب والعمل الحُر أحلاهما مُر (Re: احمد عمر محمد)
|
حمد سلامات وتحايا وضيوفك الكرام... الراتب لو دق السماء هو في النهاية معلوم القيمة سلفا، وثابتا في واقع متحرك، وزيادة سعر السلعة لا يتناسب مطلقا، وزيادة الرواتب.... العمل الحر هنا دونه الصعوبات كلها.... في السودان كمان المشكلة اضرط واضل.... العمل في مجال المبيعات وبنسبة، يظل خيارا افضل، ويظل ما زي ابوك لكن بعشيك؛ وغني عن القول ان المبيعات تحتاج لمواصفات شخصية ومزايا، وحس، ومقدرات، ووو ، تلك المقدرات هي موهبة فقط قد تتوفر عند هذا الشخص وليس ذاك، ........................
| |
|
|
|
|
|
|
Re: شغل الراتب والعمل الحُر أحلاهما مُر (Re: وليد التلب)
|
مراحب يا خليل
Quote: بيع واشتري وما تنكري
|
مثل يشير إلى الحالة بدقة متناهية ويشكل مع المثل التاني : نحن اسياد بلد نقعد نقوم على كيفنا ، خارطة طريق جيدة للانعتاق من قيود الراتب وأوامر رؤساء العمل ياخ نحن انكرينا لما اتهرينا بس مشكاتنا هنا ما اسياد بلد
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
هلا أحمد محمد عمر
Quote: مما يترب عليه مخاطرة ممكن توديك التوج |
الاستثمار والعمل التجاري عموما محاط بالمخاطر في أي بلد وزي ما قالوا سفرة تودر الجمل ولا القعدة أم بوم صحيح ناس كتير مشوا التوج لكن برضو في كتيرين لقوا مخرج ومخارجة لما جنوه من أموال الخطورة في إنك تدخل في التزامات مالية بأسمك والعائد يدخل في حساب الشريك هنا لو الشريك غدر بيك ياهو التوج عشان كدا الحذر والحرص مهمة يعني ما تسلم رقبتك لزول
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
احد الاصدقاء (الان طبيب) قال لي لما دخلت كلية الطب كان ولدي كبير في السن لأنني ابنه من المراة الثانية ، و كلما ارجع من سنة دراسية يقول لي اها خلاص انتهيت من القراية؟ اقول ليهو باقي لي شوية..قال لي و انا في خامسة طب سالني قلت ليهو باقي لي سنة واحدة بعد السنة دي..ابوهو قال ليهو اها بعد تخلص المرتب كم؟ قلت ليهو تقريبا 300 الف جنيه قال ابوي قال: يا ولدي بعد القراية دي كلها 300 الف؟ يا ولدي الزول كان ما شغل الرجال ما ببقى غني!
| |
|
|
|
|
|
|
Re: شغل الراتب والعمل الحُر أحلاهما مُر (Re: الحاج حمد الحاج)
|
الأخ حمد التحية لك ولزوارك الكرام في الحقيقة لدي الكثير لأقوله هنا فتجربتي شملت الاتنين وبالطبع لم يحالفني الحظ في أغلب أوقاتها ولكني سعيد بكل يوم عشته في حياتي القصيرة هذه (كل زول وحسب تقديره للعمر) جربت العمل الحر وأنا طالب في الصف الرابع الابتدائي فقد أتاح لي الوالد هذه الفرصة أمام متجره في شارع الزريبة بسوق أمدرمان ... وانتظرت بفارغ الصبر انقضاء سنوات الدراسة الجامعية لابدأ مشوار العمل وبالفعل بدأت فيه حتى قبل استلام الشهادة الجامعية ... واستمرت التجربة سنين عددا ... حتى اغتربت بالصدفة وفي الغربة قضيت أكثر من ثمان سنوات وأنا أعمل عملا حرا فيه ارتفاعات وانخفاضات بعدد شهور السنة ولله الحمد وها أنا أختم حياتي من ذوي الرواتب ... وأمر المؤمن كله خير الخلاصة أن التجارة شطارة وبعض الناس لا يصلح لها لأنها تتطلب تركيبة نفسية ومهارات شخصية خاصة والحظ أحيانا يلعب دوره من تجربتي هذه اكتشفت أن العمل بالراتب وبدوام محدد يمنحك فرصة أكبر لقضاء أوقات سعيدة مع أسرتك ويرفع الكثير من ضغوط البزينس عن كاهلك
| |
|
|
|
|
|
|
Re: شغل الراتب والعمل الحُر أحلاهما مُر (Re: جعفر محي الدين)
|
تحياتي لا لا مش كده
Quote: قالوا سفرة تودر الجمل ولا القعدة أم بوم |
للوظيفة متطلبات يلزم توافرهاوليست أي وظيفة!، فبلوغ درجة المهنية والممارسة الراشدة تؤهل للإبداع، وبالتالي الدخل الموصل للكفاية كحد أدنى للعيش بسلام، فإن بلغت بك الوظيفة ذلك فإصبر وأشكر... أما اي وظيفة تعبانة لا تمثل إلا كالمستجير من الرمضاء بالنار فلا مبرر للإستكانة لها .... سوق الله أكبر .. هنا وهناك بداية من كوم الليمون... وإنتهاء بأي تجارة بما فيها ( السمسرة) ... أراضي .. سيارات.. محاصيل.. كل شئ منقول أو مأكول. بس إن حدثت الرسملة المناسبة فلا بد من التخطيط الجيد والمتابعة ... ثم التقييم الدوري... فترات شهرية.. ربع سنوية.. ألخ.... الخلاصة والوظيفة والتجارة كلها أوعية للدخل فأيهما وفر الدخل المناسب فهناك ( أبرك)......
| |
|
|
|
|
|
|
Re: شغل الراتب والعمل الحُر أحلاهما مُر (Re: Hafiz Bashir)
|
والله إنك حماااااااااااااااااااار !!!!!
أنا بوظيفة حكومية منذ أكثر من عشرين سنة سوا بالسودان أو الغربة فصلت بينهما سنة واحدة عملت فيها مهندس زراعي بشركة عراقية وتخلل ذلك الكثير من التحصيل الأكاديمي في الادارة والاعلام والحاسوب مهنتي بالاقامة مهندس زراعي ولكن أؤدي وظائف اخرى بنفس الجهة في الادارة والحاسوب والاعلام مكتبي مستقل ومجهز بكل ما يخطر على بال اي انسان ومنهم من يشتاط غضبا ويقول لي دا مكتب وللا وكالة فضاء !! جاءني قبل فترة في مكتبي صديق زوج اختي وكان يريد ان اتوسط له لحل مشكلة في الجوازات وهو يعمل في تجارة الثياب السودانية ما بين السعودية والسودان أمي لايقرأ ولا يكتب ولكن يحسب الريالات بطريقة تحسده عليها الآلات الحاسبة !!! سالني الرجل عن وظيفتي وعن ما اتقاضاه من راتب وقد هاله المكتب وطبيعة العمل 00 او هكذا بدأ لي المهم بعد أن أجبته على اسئلته الحائرة قال لي : الكلمة التي بدأت بها حديثي في السطر الأول آآآآآآآآآآآآآآآآآآي والله قالها حتى بدون ان يفكر !!!! وزاد قائلا وسط دهشتي انا مهنتي عامل تربية مواشي واتاجر مابين السودان والسعودية وشهريا لاتقل ارباحي عن 20 الف ريال !!!! والله فكرت لحظتها ان اغير مهنتي آآآآآآآآآآآآآآي اغيرها عديل كده من مهندس الى راعي ضااااااااااااااااااااااااان !!!! هو مش مهندس { زراعي } { وراعي } قريبان من بعض !!! للحكي بقية 00 حان وقت صلاة المغرب !!!! قال مهندس زراعي قال !!!!
| |
|
|
|
|
|
|
Re: شغل الراتب والعمل الحُر أحلاهما مُر (Re: ابوحراز)
|
هلا عبد المنعم كيفك
Quote: العمل في مجال المبيعات وبنسبة، يظل خيارا افضل، ويظل ما زي ابوك لكن بعشيك؛ وغني عن القول ان المبيعات تحتاج لمواصفات شخصية ومزايا، وحس، ومقدرات، ووو ، تلك المقدرات هي موهبة فقط قد تتوفر عند هذا الشخص وليس ذاك، |
راتب ونسبة أحيانا تبدو أفضل ولكن احيانا كتيرة أخير منها راتب معقول لأنو برضها عندها مشاكل مرات يربطوها ليك بالسداد ومرات ياكلوك فيها عديل يطلعوها ليك كسور وبواقي دا غير صعوبة وارهاق المبيعات نفسها والغلاط الفيها والتنازلات المطلوب منك تقديمها كبائع والبيع الآجل والتوتر في إنك تصل الحد المستهدف للمبيعات وهلمجرا
القضية إنو الدخل المحدود، مثل الراتب وما في حكمه، مهما زاد تلقاه متآكل من الأطراف ومهدد بالإنقراض مع عدم الرقابة الفي السوق واستغلال عجلة الناس ومسابقتها للزمن مافي زول عندو وقت عشان يفاضل بين الأسعار عشان كدا القدامك بتشتريهو وفي نهاية الشهر تلقى فرق الأسعار آكل من دخلك قريب 1000 -1500 ريال وانت ما شاعر بيها
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
مراحب الحاج حمد الحاج
Quote: يا ولدي الزول كان ما شغل الرجال ما ببقى غني! |
بالضبط تماما لأنو الشغل تحت الرجال لا بودي لا بجيب
ببساطة لو أي واحد حسب مجموع راتبو طول حياته العملية حيلقاه مبلغ كبير جدا لكن راح وين ما تعرفو
نفس المبلغ دا لو لقيتو بضربة واحدة كان ممكن تعمل منو حاجات كبيرة
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
هلا جعفر محي الدين
Quote: لخلاصة أن التجارة شطارة وبعض الناس لا يصلح لها لأنها تتطلب تركيبة نفسية ومهارات شخصية خاصة والحظ أحيانا يلعب دوره من تجربتي هذه اكتشفت أن العمل بالراتب وبدوام محدد يمنحك فرصة أكبر لقضاء أوقات سعيدة مع أسرتك ويرفع الكثير من ضغوط البزينس عن كاهلك |
التجارة في هذا الزمن غير الشطارة تحتاج لجرأة وخلع لقميص التعامل المثالي وحسن النية (ليس مطلقا) وأي زول كان موظف صرف لما يلجأ للتجارة تلقاهو فاشل في بدايتو لأنو عايز يتعامل بضمير وأخلاق المهنة الكان شغال فيها بس يا جعفر الراتب لو ما كان ممهول شديد بدخل الواحد في حسابات تانية وخصوصا وإنو العمر بيتقدم والإلتزامات في تزايد مخيف رغم إنو كما ذكرت بخليك لصيق باسرتك واحتياجاتها اليومية
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
مرحب حماد الطاهر
Quote: للوظيفة متطلبات يلزم توافرهاوليست أي وظيفة!، فبلوغ درجة المهنية والممارسة الراشدة تؤهل للإبداع، وبالتالي الدخل الموصل للكفاية كحد أدنى للعيش بسلام، فإن بلغت بك الوظيفة ذلك فإصبر وأشكر... |
أنا ما عايز أدحض رأي أي زول دخل هنا اراء الناس دي كلها أنا متفق عليها بس توجد بعض الأشياء الناس لازم تختها في الحسبان
مثلا يا حماد مرات الحظ بدخل كعامل حاسم في إيجاد الجهة المحتاجة فعلا لإمكانياتك المهنية
انهيار القطاع البشمل وظيفتك بالتأكيد حيأثر سلبا على أوضاع جميع العاملين في هذا القطاع بالتالي الشركات حتكون في أوضاع تبحث فيها عن البقاء لذلك سوف تتجه لذوي الخبرات أقل برواتب أقل تاني الحد الأدنى للعيش بسلام دا فيهو اختلاف كبير في بعض الناس لو لقى راتب 6000 ألف كلامو بتغير لأنو عارف حيوفر منها 4000 وفي ناس 20000 ألف تلقاه في ضائقة مالية كلما كبر الراتب كلما ظهرت المصروفات المؤجلة أقول ليك حاجة كان معانا موظف في الشركة راتبو 70.000 (سبعين ألف ريال) يوم جاب لي السيرة الذاتية بتاعتو قال لي شوف لو فيها أخطاء طباعة بعد خلصت قلت ليهو السيرة الذاتية عايز بيها شنو قال لي في شركة جديدة عايزة موظفين ورواتبهم ممكن تكون أكبر من الشركة دي ما سألتو بعد طلع قطعت في نفسي كف لحدي الكرسي ما دور بي ليه نحن خانعين كدا ؟
أنا لو راتبي بقى 70000 لو قالوا لي تعال أبقى سكرتير الأمم المتحدة ما أمشي ليهم
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
Quote: راتب ونسبة أحيانا تبدو أفضل ولكن احيانا كتيرة أخير منها راتب معقول لأنو برضها عندها مشاكل مرات يربطوها ليك بالسداد ومرات ياكلوك فيها عديل يطلعوها ليك كسور وبواقي دا غير صعوبة وارهاق المبيعات نفسها والغلاط الفيها والتنازلات المطلوب منك تقديمها كبائع والبيع الآجل والتوتر في إنك تصل الحد المستهدف للمبيعات وهلمجرا |
يا زول كلامك دا كلام زول اشتغل مندوب عديل كدة، او لعلك قريب من المناديب... وفي كمان غتاتات، وحسادات وشماتات، وحاجات، تانية حامياني.... وكمان ليس للمندوب دوامات، فتلفونه مفتوح على مصرعيه على مدار الساعة، والاتصالات ترن بمناسبة او بدونها، واكان اتطانشت المكالمة، مشكلة كبيرة... في شركتنا كل الموظفين على الساعة اربعة ما تلقى طافي النور، وقسم المناديب مليان فل، فلسوت، كلهم قاعدين....
| |
|
|
|
|
|
|
Re: شغل الراتب والعمل الحُر أحلاهما مُر (Re: احمد سيد احمد)
|
مرحب حافظ بشير
Quote: عشان نقدر نقارن ورينا العمل الحر طبيعتو شنو و براس مال كم و برضو من الجانب التاني الوظيفة نوعها شنو و الراتب كم و أين موقع الجوب ساتيسفاكشن من المقارنة؟ |
مافي حدود أو قوالب معينة يا حافظ بتعتمد على طموح وإمكانيات كل فرد حكاية الراتب دي قلتها فوق بس حتة الجوب ساتيسفاكشن دي بتشكل منحى تاني جميل في الموضوع انت عايز تفصل بين إنو أي زول يشتغل أي تجارة وبين صاحب مهنة محددة يشتغل تجارة في مهنتو طبعا إلى زمن قريب* كانت النظرة لعمل الجامعيين في التجارة سلبية ومحل استهجان حتى لو عملوا في مجال مهنتهم الاستثناء الوحيد كانوا الأطباء في عياداتهم الخاصة وحتى الأطباء ما كانت النظرة ليهم ولا هم ماخدين المسألة كتجارة بحتة وإنما أداء لعملهم بنفس القيم والتقاليد والأخلاق البيؤدى بيها وهم بمارسوا في وظائفهم الحكومية ومجرد زيادة دخل ليس إلا
بعدها تغيرت المفاهيم وانفتح باب التجارة على مصراعية خصوصا مع ضعف الرواتب بس كان في الأول بتصاحبها نغمة "شغال تجارة لكن في مجالو" معروف إنو العمل في نفس مجال التعليم بيوفر ليك راحة نفسية وتآلف مع النشاط بس بتبقى وسائل أداء العمل هي المحك لأنو أي نشاط ما بصطحب معاه قيم وأخلاق المهنة ما بيوفر ليك الجوب ساتيسفاكشن الأنت قاصدوا . بل قد تدخل في نزاع داخلي مع نفسك حول صحة ما تقوم به من نشاط إذا كنت صاحب ضمير صاحي
هل وضع التجارة في الوقت الحالي بيسمح إنك تكون سليم 100 %؟
* زمن قريب دي ممكن تكون من نهاية السبعينات لحد بداية الثمانينات وانت نازل
| |
|
|
|
|
|
|
Re: شغل الراتب والعمل الحُر أحلاهما مُر (Re: وضاحة)
|
أبو حراز كيفك يا رجل
Quote: وزاد قائلا وسط دهشتي انا مهنتي عامل تربية مواشي واتاجر مابين السودان والسعودية وشهريا لاتقل ارباحي عن 20 الف ريال !!!! والله فكرت لحظتها ان اغير مهنتي آآآآآآآآآآآآآآي اغيرها عديل كده من مهندس الى راعي ضااااااااااااااااااااااااان !!!! |
زي دا كتيرين وفي ناس بيدخلوا أكتر من كدا ياخ أنا عندي قريبي في ضربة حديد خردة واحدة بس لاقي ليهو 400000 ريال (والله صحي) وقت كانت الأمور مفكوكة وتم عليها وقلب مستثمر وهسة بفكر يعمل مصنع (هنا طبعا) وزمااااان خلى ركوب البرادو والفورشنر هسة بقى يركب من تاهو وأنت طالع تقول لي مهندس زراعي غيّر ياخي وخليك مع الزمن
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
Quote: يا زول كلامك دا كلام زول اشتغل مندوب عديل كدة، او لعلك قريب من المناديب... |
أبدا يا عبد المنعم بس مرة لقيت نفسي في وضعية قريبة من دي ومرتبطة بمندوبين مبيعات لذلك عارف مشاكلهم
شفت الوظيفة الوحيدة الأنا ما بقدر عليها ياها مندوب مبيعات دي ما عندي أخلاق للغلاط الكتير ومستحيل أجي لزول أقول ليهو الحاجة دي كويسة اشتريها وأنا عارفها ما كويسة وتانيا جني وجن زول يشيل مني حاجة ويقول لي قروالقروش بعدين عشان أقعد أسك فيهو مساككة لقروشي ويكون في زول خانقك خنق عشان تسترد الفلوس دي
لكن ممكن أبيع لمصلحتي ما عندي مشكلة لأني صاحب القرار في مسألة التسليف والسداد دي
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
هلا أحمد سيد أحمد عساك طيب
الرابط ما فتحتو لسه لكن ضروري حافتحه
Quote: وانا عارف في ناس طموحين وما عندهم سقف لطموحاتهم...لكن المال في وجهة نظري البسيطة مفروض يكون عندك ليهو رؤية وسقف لانك حتتعب شديد لو ما عارف انت عايز منو كم. ..لو اتلقت سترة الحال والامور ماشه انا بشوف مافي داعي للتلتله...غايتو بشف انك قبل تبدا عملك الخاص تحدد انت عايز تغنى ولا عايز شي يستر حالك ويكون وسط...على ضوء الاجابة بتكون رؤيتك واضحة
|
كلام جميل جدا وخارطة طريق بالفعل وحقيقة ما ممكن من عدم تقول أنا عايز بعد سنة أكون ملياردير تحديد الهدف مهم جدا لتحديد سبل تحقيقه
وأقول حاجة أنا قناعتي الراسخة دوما إنك ما تخاف من يوم بكرة لأنو يوم بكرة من ضمن ما فيهو ممكن يكون مغادرة الدنيا
بس ربنا قال لقد خلقنا الإنسان في كبد واقع الحال بحتم على الإنسان إنو يكابد ولا يركن للحياة
| |
|
|
|
|
|
|
Re: شغل الراتب والعمل الحُر أحلاهما مُر (Re: حمد عبد الغفار عمر)
|
وضاحة يا فجر المشارق ينعم صباحك خير
Quote: صباحاتك ندية حمد الكلام دا وين فى السعودية ولا السودان علشان بتفرق ؟؟
فكرت فى مستقبلك ومستقبل عيالك لو صحيت الصبح وقال ليك كفيلك خلاص يا حمد مابدى اجدد ليك عقدك شنو البدايل؟ |
الكلام دا لافي السعودية لأن كلاهما تحيط به المخاطر بالنسبة للأجنبي
لو كفيلي قال لي خلاس خليك فاتحة الماسنجر لأنو حارسل ليك ترسلي لي فيزا قطر السودان دا ما بتباصر لينا بعد دا لا بنقدر على تماسيحوا دي ولا بنقدر على وظائفو
| |
|
|
|
|
|
|
|