|
|
 المعاهو قزاز ... العندو قزاز ... المعاهو قزاز
|
02:24 PM Sep, 25 2015
سودانيز اون لاين
salah awad allah-
مكتبتى فى سودانيزاونلاين
المعاهو قزاز ....
العندو قزااااز......
المعاهو قزاز ....
وصوت (عمنا أحمد الحلبى ) وهو يصيح من على حماره اﻻبيض فى صباح كل جمعه ..يتصاعد ... يعلو ويهبط ، ثم يتصاعد تارة أخرى ....
يصول ويجول فى شوارع الحله الجديده بترنيمته الحلوة ..... المعاه قزاز ...
ذات الصوت بكامل بهائه يخترقنى ....، يرن فى طبلة أذنى ...
تفتح البيوت الطينيه ابوابها الصغيره ويهرول الصغار نحوه ..هاك ياعم أحمد قزازة بيره بى قرش ..يرد :- ﻻ بتعريفه .، يصيح آخر هاك اتنين شرى ابو بت .....
ﻻ أدرى لماذا يرن فى أذنى صوت عمنا أحمد ويترأى لى مشهد الصغار حوله ..وصوته يتصاعد بنوتاته الخمس فخيما مختلطﻻ بأصوات الباعه المتجولين وكماسرة الحافﻻت ..
لفه لفه الكلاكله اللفه على جنيهين لفه ...
اﻻن ﻻ أدرى .....
إﻻ أنها حالة اﻻغتراب المكانى
أن تهاجر الى منفى وأنت داخل وطنك
وبين أهلك وأحبابك
وطنك منفى
والمنفى وطنك ...
---------------------------
الخرطوم منتصف نهار 20 سبتمبر 2015
|
|
 
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
ياما لمينا الفاضي وشمينا ثم غسلناهو وبعنا
ودبّرنا حق السينما (ستة وستة ونص قرش)
لكن دا ربط عجيب يا صلاح بين أصوات المنادين في محطة المواصلات وصوت أحمد الحلبي
سنوات طويلة عاثت فيها الأصوات عواسة شديدة في اسماعنا: شيء غنا وشئ قرآن شيء نبذ وشئ كلام غزل
وهتافات مظاهرات ونواح نائحات وقوووون.
وأحيانا برضو رائحةٌ ما، ترجّعك لسنيين عددا وتذكّرك بما لا علاقة له بها.
والشوف كذلك.. رؤية وجه في زحام يطرّيك زول (من أهلو غاب)
وأيضا طعم فول يعود بك إلى قعدة قدام دكان الزين مخلوطة بي غبار العايدين من السينما أو رابطة-هلال
اذن: السمع والشم والبصر والتذوق..
إلا اللمس ياخ ما عندو ذاكرة أبداً
هسي في لمسة بتذكّرك أول سلام على أول غرام؟
بس حاسب ما ينشلوك في موقف الكلاكلة وانت سارح كدا
و.. دمت يا صديق الصبا
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: معاوية الزبير)
|
سلام ,, صاحب البوست وضيفه ودالزبير
إنت ياود الزبير مالك الوحيد القاعد فى البوست
جاى تلِم الفاضى؟ وش محمِّر من الشربوت
ياصلاح بوستك ده ذكرنى يوم عرسى
اهلى جايين من الفاضلاب واستقبلناهم فى بيت
عمنا فى امبده ,, المغرب اتحركنا كلنا فى بصات
السيرة قاصدين اهل العروس فى الحارة عشرين الثورة
الباصات تلف وتخيِّت فى شوارع امدرمان ,, نامن جينا
ودنوباوى ,, معاى ود عمتى فى البص ,, لقا اللفلفة
كِترت فقال لى : إنت ياعبدالعزيز نسابتك ديل عِرفتهن كيفن؟
كنت بتصَلِّح عناقريب؟
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: ناذر محمد الخليفة)
|
Quote: اهلى جايين من الفاضلاب واستقبلناهم فى بيت
عمنا فى امبده ,, المغرب اتحركنا كلنا فى بصات
السيرة قاصدين اهل العروس فى الحارة عشرين الثورة
الباصات تلف وتخيِّت فى شوارع امدرمان ,, نامن جينا
ودنوباوى.. |
إنتو القشرة ليكم شنو يا بتاعين الفاضلاب جايين شاقين امدرمان
كان تطلعوا للعشرين بالخلا.
شوف ود عمك ود بادي طلّع من الفاضي دا شنو يا عبد العزيز
ماعون الويسكي الأحمر
علب البيرة الصايدر
مصو الخبث الراكد فيهن
سماً يعشرق ونحنا أدونا الفاضي هدية
يقعد في شمس الله تلات أيام
بطهر منو السيئة
نسلخ منو الدمغة الوصفت عينتو والكمية
تمشي أم أحمد تغسل بطنو وضهرو
ما لازماها وصية
بعضاً ينفع دلو نشال
في بير أم تسعة رجال
تقدلبو بنيتاً سمحة مع الشهلال
تسقينا حلال وزلال
الفاضي الكان مليان أحزان
وأطرافو تسيل
إتحول كوب معقود فوق قلة
تنقع وراقدة سبيل
وسبيل مسروف مكتوف بمحاية
علي سيالة وراقدة ضليل
الغاشي الماشي الراحل
ونوّخ دابو ودلّ الشيل
الطير الطاير فوق بلداتنا
وناوي رحيل
الولد السادر فوق مشهاد
البرق الشايل
ودربو طويل
وعموم الناس
الفرع الصايدو يباس
وكلاب الحر وبنات الريل
بتشيل بتبل الريق
الموية نواحي السافل موية نيل
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
ذكريات عبقة.. ودائما كمان ذكريات الطفولة لا تنمحي من الذاكرة ابدا....
وكمان جبت ليكم قصيدة ود بادي من بدايتها:::
يا سكان القصر العالي سلام
يا سادات البرج العاجي سلام
ها نويسات البلد الغادي سلام
تبقى مصيبة إن كان السُنة
إنعدمت بين الناس
تبقى مصيبة إن كان
القرش الأحمر قسم الخلق
أجناس أجناس
يا ماليين الكأس من دم الخلق
الشربت عرق الفأس
يا الشرف البدري إنداس
والبلد الظالم شالكم فوق الرأس
أدواركم طعنت كبد السحب البكايات
وقار الليل سالباهُ كهارب الهجعة الضوايات
قايمين الليل الكأس مليان
الجوف مليان
اللحم الطازج راقد بالعينات
وغفيركم نوم نجم القبلة
أم رأس قوي
وجنبو كلابو الهوايات
يا سادات البذخ الباذخ
يا بعض كروش مليانة فتات
يا نجس الأرض المدعية
يا نسل الأمم المدعيات
| |
|
|
|
|
|
|
|
|
 Re: المعاهو قزاز ... العندو قزاز ... المعاهو قز� (Re: سلمى الشيخ سلامة)
|
غايتو أفعال حبوبتك دي يا بت الشيخ وقّعت لينا معنى الآية "يسألونك عن الخمر والميسر قل فيهما إثم كبير ومنافع للناس..".
الزوله دي كان قاعدة لي هسي يا سلمى أو عندها وريثة، نمشي نجيب لينا حباية (STILL GOING STRONG) مخصوص ونفضيها بمعرفتنا (إن شاء الله في جوفنا دا) من أجل منافع الناس 
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: سلمى الشيخ سلامة)
|
فعلا سلمي
والدي تاجر في السوق بشتري القزاز بيرة ابوجمل وغيرو .. وبعبي فيهن السمن والزيت والقطران .. وفي قزاز سمح وشكلو مختلف .. لكن قزازة البيرة ابوجمل دي بقت مقاس للسمن .لي اليوم بقولو قزازة سمن واستعاضوا عنها بالوزن رطل وربع ممكن يدوك ليها في كيس لكنها قزازة .. في قزاز امتن واجمل تاني بحفظو فيها الخمرة والدلكة .. ودة اغلي شوية ..
النسوان في البيت مستفيدات من بقايا سهر ازواجهن .. واحد بتاع حمار في كوستي غجري هو البجي يكورك المعااااا قزاز
وبرضو القزاز المكسر بنفع بعملوهو مع الاسمنت في الحيطة من الحرامية قبل اكتشاف السلك الشايك
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
حليل زمن المعاهو قزاز وزمن بتاع الجاز والله كانو مترادفين بتاع المعاهو قزاز مع الصباح وبعده بياع الجاز حليل هذا الزمن نحن غايتو حصلنا من شيئ المشكلة الجيل الما شاف الخرطزم بالليل وجمال النيل في حدائق مايو والسينما ايام صفحة في جريدة ان تسهر هذا المساء سبحان الله البلدي كلها تسكر وما سمعنا بي مصايب الزمن دا من اغتصاب اطفال وتحرش بالاطفال ياخي في حلتك ما تقدر ترفع عينك على بت من حلتك تشوف شكلها كيف زي ماقال ود بادي كل الناس اهل
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
اخي صلاح انقرض وليس تآكل حتى الاحياء الشعبية فقدت التوداد والتراحم نشائنا في الحاج يوسف في السبيعات البيوت شكلها واحد اللبس واحد صينية الاكل واحد الان اختلفت بعض الجيران تطاولوا في البنيان بين هذه البيوت المتشابهة حرموا الجيران حرية التحرك بمنزلهم وممكن بقية الاحياء التي كانت تعرف بالشعبية نحن لا نجحر على حرية احد لكن على الاقل اشتري في الدرجةالاولى وابنو ناطحة سحاب بس خلو العشرة والجيرة هي الباقية
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: عز الدين ادريس محمد)
|
حرموا الجيران حرية التحرك بمنزلهم وممكن بقية الاحياء التي كانت تعرف بالشعبية نحن لا نجحر على حرية احد لكن على الاقل اشتري في الدرجةالاولى وابنو ناطحة سحاب بس خلو العشرة والجيرة هي الباقية
>>>>>>> <<<<<<<<<
عزيزي الفاضل عز الدين
وفعلا هذا ما لاحظناه عند زيارتنا للخرطوم .. فتجد في الاحياء الشعبية الناس يتطاولون في البنيان وتلقى عمارة من خمسة طوابق
وجيرانهم بيت من طابق واحد وفيه غرفتين وحوش كبير .. والناس كانت متعودة تنوم في الحوش .. ولكن بعد ما قامت العمارات
الشيطانية دي اضطر الجيران في النوم داخل الغرفتين حتى ولو ماتوا بالسخانة لان حوشهم مكشوف للناس الساكنيت في الطوابق العليا..
ومش في الخرطوم وبس ولكن في كل المدن الكبرى في السودان وفي بعض القرى..
.. وانا سمعت بانه زمان كان في قانون يمنع بناء العمارات في الأحياء الشعبية ..ولكن يبدو الآن لغوا هذا القانون....
. وبعدين سؤال تاني.. هل ظاهرة بيع القزاز الفاضي هي ظاهرة خلاص انثرت واختفت ولا موجودة في بعض المدن والقرى..
وتسلمي يا اختي سلمي بت الشيخ ..حكاياتك تفتح النفس للقراءة بمتعة..
ودمتم بالف خير وصحة وعافية
بسمات الشيخ
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
والله يا بت الشيخ كلو اندثر وقت امجادنا كانوزمان وكانو زمان لكن حقيقة رغم عن ذلك مازال الانسان السوداني وهو افضل السئيين من خلال معاشرتنا للاجناس الاخرى لاكثر من ربع قرن مازلنا نحن الافضل وربنا يرفع البلاء عن السودان حتى نعود كما كنا اهل شيم واخلاق ونخوة وسوف نظل افضل شعوب العالم بدون مبالغة رغم ان سنوات الاغتراب لعدد كبير منا حولنا مع بعض ابنائنا الى مسخ مشوه لصورة ذاك السوداني العظيم
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: عز الدين ادريس محمد)
|
السلام عليكم يا استاذ صلاح
باااااااالغت ..
مشتا قين يااااخ .. كيفك وكيف الجميع
طبعا نحن كنا قريبين من محل القزاز .. ههههها وبنعزل الكبار اللى بيودى السينما ودار الرياضه
وبنخلى الباقى الصغار داك لناس معاوية الزبير .. لانهم كانو بعيدين شوية من مواقع الحدث ههههها
ود ابو سن غايتو كان قريب شوية بيلقى نصيبو بس كان لدار الرياضه والبطيخ .. ممكن نضيف ليهو العنكوليب ..
يا سلام يا ابو صلاح يا حليلكم وحليل بابا سامى
...
لكم جميعا محبتى الخالصة
..........
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: ANWAR SAYED IBRAHIM)
|
يوم واحدة قريبة جيرانا جات من الشمالية كرت ..
طلعت مع النسوان للاتبراوي في نزهة عصرية وكده
المسافة بين البيوت والاتبراوي كانت مرتعا لمدمني كريستال البلح الاصلي، والمجكسين وقت المسلسلات
زولتنا لقت قزازة مسدودة بفلة متكية مع العارضة حقت ميدان الكورة شالتها براااحة ودستها في توبها
قعدت بعيد من صاحباتا وجغمت جغمة كبيرة وقااالت كده نزلت البحر .. جابوها فوق كارو لحدي البيت
ما صحت الا اليوم التاني ... واولاد اهلها شايلين السيطان فوق راسها .. ياولية هببتي شنو امس ..
قالت .. والله لقيت قزازة كنت قايلاها حقت عصير قلت اتغاتت واجغمها مرة واحدة .. لكن الظاهر في واحد ختا فيها شيتا تاني
ود جيرانا قال لي خطيبها حلف الا يفسخ الخطوبة
| |
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: حيدر حسن ميرغني)
|
يا اخونا حيدر سلامات ... كتلتنى بالضحك يا زول ..
كيفك يا رجل .. سلام كتير كيمان كيمان
الحكاية شنو يا ابو النسب
انت ود اخوى فتحى عباس .. علمك الزوغان .. والله من ديك الايام ( وكت اسمى كان معرّب طبعا ) هههها تانى ما سمعت صوتو
شكلو بلم الدراهم
لك منى الود وكل التحايا
انور
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
قريبة صاحبي شديييد حلبت غنمها في مراح بعيد شوية عن البيت
في الطريق لاقتها واحدة قريبتها بتجهز لعرس ولدها حلفت الا تدخل بيتها
قدمت ليها شراب الدكاي على سبيل الضواقة لابداء رأيها فيه
قووومي اشفطي الجك لي نصو
خرجت قاصدة بيتها والغبار يحوم حولها متل دخان القطر
كل خطوتين تصدر ريح كأنه خارج من عادم فيسبا قديمة
وقفت بعد مسافة ،، شطفت كرعيها باللبن ودخلت البيت خطوتين ورا وخطوة قدام
راجلا لي هسع بتعالج بالرقية الشرعية
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: salah awad allah)
|
والله ياحيدر الطشمة لدي لها نكهة في السودان ياخي زمان الناس كلها ترقص في حدائق مايو بي فلاش وابو بنت والسايدر وابو جمل وتمرنا الناس زمان كانت حلوة بالله زمان السكران في ابورجيلة والفيات شخصية معتبرة الناس تقف ليهو واي واحد يسعى لي رضائها والناس كلها تضحك الان لو سلمت على واحد ساكت سكين على طول جرائم عجيبة والله الان بطلنا لكن لو عادت الخرطوم كما كانت عدنا كما كنا بالله زمان تكون قابض الراتب بالنهار قبل تمشي البيت تغشا اقرب بار تكون محترم لزوم الخوف من ناس البيت تشرب علبه سايدر وعلبة داب وتتوكل على المواصلات تحس انك ملكت الدنيا
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: عز الدين ادريس محمد)
|
Quote: قريبة صاحبي شديييد حلبت غنمها في مراح بعيد شوية عن البيت
في الطريق لاقتها واحدة قريبتها بتجهز لعرس ولدها حلفت الا تدخل بيتها
قدمت ليها شراب الدكاي على سبيل الضواقة لابداء رأيها فيه
قووومي اشفطي الجك لي نصو
خرجت قاصدة بيتها والغبار يحوم حولها متل دخان القطر
كل خطوتين تصدر ريح كأنه خارج من عادم فيسبا قديمة
وقفت بعد مسافة ،، شطفت كرعيها باللبن ودخلت البيت خطوتين ورا وخطوة قدام
راجلا لي هسع بتعالج بالرقية الشرعية |
عليك الرسول ياحيدر كان ما جيتنا فى البوست ده
فنجان جبنة ولمة ناس حلوين
فنجان جبنة ولمة ناس حلوينفنجان جبنة ولمة ناس حلوين
ياخ انت زولنا طااااب
| |
|
|
|
|
|
|
|
|
|
Re: المعاهو قزاز ... العندو قزاز ... المعاهو قز� (Re: عبدالعزيز الفاضلابى)
|
يعني شنو يا ود الفاضلاب\زز انت عاوز تسرق زبائن بوست الاستاذ صلاح وتحولهم
لحوشك ؟؟.. غايتو صلاح كان ما زعل منك الا يكون من طينة ناس ود البوش وود شيقوق وود ابوسن وود المنسي
لكن كان كمان اذا جينا للصراحة حيدر ده لقطة في الحكاوي السمحة وعندك حق تعزمو يشرب فنجان جبنة بهناك
ويا ريت كان قبل الدعوة..
وانت عارف يا ود الفاضلاب هو لقطة لشنو؟ عشان هو برضه شارب من الاتبراوي .. وانت كمان شارب من الاتبراوي
واكيد حيزورنا..
والله يا صلاح بوست المعاهو قزاز بقى بوست جاذب شديد وبقينا نفتش ليهو اول ما نفتح المنبر العام في الصباح وقبال ما نمشي المحاضرات.
ودمتم بالف خير وصحة وعافية
| |
|
|
|
|
|
|
| |
salah awad allah
معاوية الزبير
عبدالعزيز الفاضلابى
ناذر محمد الخليفة
عبدالحفيظ ابوسن
سلمى الشيخ سلامة
عز الدين ادريس محمد
ANWAR SAYED IBRAHIM
حيدر حسن ميرغني
الطيب عباس
فيس بوك
تويتر
انستقرام
يوتيوب
بنتيريست