لا يهم فهما الآن قرينان حميمان، يتكئ أحدهما على كتف الآخر فى حميمية سافرة، تمتزج فى لهاة كل منهما أغنيات بطعم الطين ونكهة الشمس الصبية التى تفتح فى كل صباح نافذتها الذهبية وتومئ بعينيها لتعلن افتتاح سيمفونية الضياء، أهى غواية ام هداية، تلك التى تخرج من بين القلب والروح لتسيح فى الطرقات غير آبهة بهتاف الطير وبسملة العابرين. يهمس الأزرق وهو مبتسم فى سعادة مشرعة، أن الإله وفى لحظة تجل خضراء، اهدى الأرض طفلة خضراء الدم واسعة العينين، وتخير لحظة ذلك القرآن الأبدى المقدس لتكون باحة لرقصها، وبعد أسبوع من تلك اللحظة المعطرة، قررت أن تسمى نفسها "توتى" ربما استشرافا لمقدم اؤلئك القوم بعد حين من الشوق، انصاف آلهة لا يأبهون كثيرا بنبوءات الوقت قدرما يعشقون خضرة الأرض، ويقال فى اساطير العاشقين، أن كل واحد منهم، يحمل نهره الخاص تحت جلده تحسبا لكل مواسم الجفاف المحفوظة عمدا فى كتب الوجل ومراسيل اليباس، قررت أن تسمى نفسها ذلك الإسم وكان القرينان شاهدى مسرة لا يملان النظر الى عينيها، وكأنهما مستودعان لأسرار الملائكة، كأنهما مأوى القادمين العاشقين، يهمس الأزرق فى كل أمسية بتلك الحكاية، ولا يمل الأبيض سماعها بل ينتظر بفارغ الحب أن تنتهى ليبدأ هو فى سرد اسفار السنين البيضاء التى لا تعشق سوى اللون الأسود، سيد الألوان وإمامها الوقور.
ترى متى التقيا؟
04-01-2015, 01:35 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
يقال أنهما وحين حانت ساعة اللقاء، ارتديا حللا مزينة بأسماء "الجروف" الحسنى كناية عن بطر المحبة فيهما وتعطرا بما تبقى من رائحة الطين السماوى، ذلك الذى أتى فى رفقة الأسماء حين هبوطها من عروشها البعيدة استحالت العروق شوارعا نبتت فيها أشجار المودة وتمايلت على جنباتها سنابل الحب تشهر تقاويم السنين وتؤسس ممالك الحياة، الحياة فى نسختها التى نقحتها ريشة الخالق ذات لقيا، ذات قران جاء القوم واندغموا مع حراس العرس يمينا وشمالا، ونادى مناد أن حى على البقاء، حى على المحبة والنماء، حضروا جميعا ليباركو ذلك القران البهيج، زرعوا الصلوات فى جسد الإبتهال وغرسوا الأغنيات عميقا فى مهجة المكان ومثل حبات مسبحة لا تمل من الصعود وهى تتأبط سامق الدعاء، ومن النزول وهى تدندن ببذخ وعلو الأسماء، كرت السنون وتسابقت الأيام صوب مشرق الأرواح ومقاعد القلوب المحتشدة بماء لا يظمأ بعده شهيق الأرض وزفير السماء ثم جاء من قلب الجزيرة نور يسعى، جلس ما بين القرينين وبدأ فى تلاوة اوراد الحضور وأناشيد الحبور المضيئ، جلست الأشجار مثل "حيران" تحتضن "ليحان" اخضرارها المكين، وبدأت تهتف: مدد مدد مدد يا خشن، مدد مدد مدد يا ارباب، وبدأ الأرباب يؤذن فى العالمين، فأتوه من كل فج عميق، من كل موئل رحيب، وتشكل جنين المحبة فى رحم الأرض، ليخرج بعد حين يكلم الناس فى الأرض، وضحك القرينان حتى ظهرت نواجذ موجهما، وتعانقا فى وصل ينهض من الأرض ليلامس بوابات السماء، يخبر العابرين ويمد لهم نارهم، دفئا وضياء
04-01-2015, 01:39 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
ثم نمت واستطالت غرسة الشغف الصبية وتفتحت فيها وردة اللقاء تداعبها الشمس فى كل صباح وتكتب على خديها تذكارا صباحيا بهيا تصحو الشارع والدروب ثم تحلق عاليا لتهمس أسرار العابرين فى اذن الغيمة، وتقفل عائدة من جديد لتمضى عميقاً فى خبايا الموئل الجديد بدت أقدام الخلق مثل أجنحة تلغى تماما لهف الخطوات لتتحول إلى احتضان الهواء وهى على يقين بأن الخطوات لا تقنع بما ييسره التراب من مواطئ حياة ما الذى يجرى هناك إذا؟ فى قلب التيه المسيطر وفى ما يسيل من فم الوقت من تزاحمت الأكتاف لتغمر عجلة الزمان وتروض وحشة المكان. تفتحت وردة النداء جرت مياه القرينين تعمد الأرض وتصادق السماء، سرت فى اوردة القادمين العابدين العابرين العاشقين وبدت كل الدروب وكأنها تفضى وتقود إلى قلب ال "يونيون جاك" ومن عجب فإنها تقودك إلى قلبه، حيث يجلس فى وقار "الجامع الكبير"، هكذا أرادها من لا تغيب شمس الكون عما ملكت يمين سطوتهم، أرادوها خريطة وربما لوحة تمجد تلك الحسناء التى لا تغيب شمس شبابها، ثم "تسودن" بطريقة غائرة المعنى، روح المكان وجسده. أربعة شوارع، كل واحد منها يبدأ من مفتتح الجهات الأربع، ليقود الى قلب المعنى هكذا أرادوا وهكذا فعلوا كان شارع "فيكتوريا" يبدأ مسيره من أمام القصر، وهو فى المبتدأ قصر، لا يهم ساكنه، سواء كانوا ثلة من "باشوات" أتوا على حين غرة وفى رحالهم كل شئ إلا المحبة، أو كان غوردون أو هوراشيو هربرت كتشنر أو من جاء بعدهم، هو قصر، ثم تنتهى مسيرة "فكتوريا" عند نصب كان فى هيئته مثل مركب لم يوسع الصانع فيه براح الجلوس، وفى وسطه مسلة قصيرة المعنى، تمجد قتلى حروب التى غابت شمسها الآن، بما فيهم أولئك "المشلخين" أفقيا ورأسيا، ثم يقف بعدها سور السكة الحديد فى وجهك، وما عليك سوى أن تقفز من فوقه ليسرى جسدك، فى الجهات الأربع أيضا
هكذا أريد أيضا للمعنى أن يتجسد
04-01-2015, 01:58 PM
Hololy Hololy
تاريخ التسجيل: 08-30-2006
مجموع المشاركات: 1266
فيسراه على اليمـــنى ويمناه على اليــسري فهذا الأزرق العاتــــــي تدفق خــــالدا حــــــــرا وهذا الأبيض الــهادي يضم الأزرق الصـــدرا لا انفصلا ولا انحــسرا ولا أختلفا ولا اشـتجرا ولا انكسرا ولا انحسرا ولا هذى ولا تـــــــــلك ولا الدنيا بما فيــــــها تساوى ملتقى النيلين في الخرطوم يا سمرا
ولا الكون كله يعادل الخرطوم
04-01-2015, 02:28 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
المتمرد او ما يعرف بعد قدلة طويلة شاقى السودان باسم النيل الازرق ويسميه اهل اثيوبيا ابباى .. الصوره من منبعه من بحيرة تانا يخرج ليقفز فى شلالات النيل الازرق لاهثا دون توقف وبلا كلل او ملل فى شوق الى تلك اللقيا وذلك العناق ليشهدوا رباطا كاثوليكيا وجرتق فى ربوع الخرطوم .. لا فكاك منه حتى المصب اواليوم الاخر وقيامته فى البحر المتوسط ..
-------------- ابا ذر يا جميل ... شكرا
04-01-2015, 02:47 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
أبوذر أنت نهر من الجمال يشق ظلماتنا ويهزم القبح المفروض علينا النيل ذلك المتمدد أمامنا كحقيقة ابدية يصبح مصدر إلهام وجمال وعذوبة ونقاء لشعبنا النيل ذلك المتمدد داخل شرايين بلادنا ، سهولها ، وديانها، شعابها ، هضابها هو أجمل من كل المخلوقات وهو الاصل في الخليقة النيل كونٌ من الجمال ليتنا كنا قدر النيل وجماله
04-02-2015, 05:59 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
ولايبتسم هذا الأزرق المتغطرس الا حينما يلتف حول خصر الحصاحيصا الأنثى !!!!
يلامس أهدابها وشعرها الغجري المنسكب حتى الخصر !!! يداعبها ويدغدغها حتى تئن !!! لايغادرها الا حينما يأخذ شيئاً من انفاسها فتراه يشهق ويترنح حتى ليكاد يضل طريقه لم أر نهراً بهذه الجرأة وهو يغازل هذه المدينة الأنثى يغازلها على مرأى من شرطة النظام العام ومتحديا المواد 149 163 162 والأدهى والأمر أنهم لايأخذوا الحصاحيصا الى مكاتبهم ولا يأخذوا النهر !!!
04-01-2015, 08:58 PM
قسم الفضيل مضوي محمد قسم الفضيل مضوي محمد
تاريخ التسجيل: 01-08-2013
مجموع المشاركات: 2608
صديقنا محمد عبد الله من نواحي أم روابة، وهو الآن بسلطنة عمان يعمل في إحدى كلياتها الجامعية ، إلتقى إبان دراساته في بريطانيا إحدى الحسناوات من كولومبيا ، فسألته ماذا تعرف عن كولومبيا ، أجابها بخبث ( فالديراما ) طبعا دا أشهر لاعب كولومبي .... (والمخدرات )..
قالت له : خلاص كدا إنت عرفت كولومبيا كلها ...
فرد عليها سائلاً: وأنت ماذا تعرفين عن السودان قالت ( Nile ).. قال لها... خلاص .. إنتي كدا عرفتي كل السودان ..
يكفى أنه نهر خالد ...
04-02-2015, 09:11 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
عارف يا أباذر الصورة دي الإسبوع الفات قبالة النيل الأزرق .. كل ما أمشي السودان عندي جلسة خاااصة مع النيل الأزرق بمشي أقعد براااي ..أطلب كباية الشاي وأقعد أعاين للنيل .. ما بنظّر ليك وأشبكك إني بقعد أفضفض أشكي همومي للنيل ووو.. أبداً لكن بقعد ساااي كده يا أباذر بشم الهوا النضيف وأقعد أعاااين في النيل .. الصورة دي يا أباذر عندي منها زي 24 لقطة كل واحدة كل واحدة في سنة مختلفة نفس المكان .. لمن أجي إجازة ناس بيتنا بيقولو لي الليلة عازمن شارع النيل..لقيتهم بيودوني حتة كده ما عندها علاقة بي النيل ..ضوضاء إزعاج..تفحيط..وماف نيل الغريبة!!! عارف الحاجة الوحيييدة البستصحبا معاي في عدتي البراي في النيل دي شنو؟؟ أغنية الكاشف المقرن في الصباح.. الأغنية دي فيها إعجاز علمي ووصفي وكوني وأيييي شي.. أبو الروس بااالغ فيها شديييد..ما عارف راسو قال ليهو شنو الزول ده ..والكاشف زاااتو ما نصيح لمن لحّنا ..
Quote: شوف توتي يا المحبوب بدت .. كالطفلة باكية تنهدت
ضماها ذا النيل الشفوق .. والطير عمل في نخيلا سوق
لاقاك وصف زي ده الله يسألك؟؟؟ فييي ذمتك ده وصف نصاح؟؟ الأغنية دي يا أباذر بتوتتترني رسمي والله .. بسمعا بي هيجان عديييل.. أغنية ما طبيعية ..
عشان كده مفروض لوحتك الفنية دي مفروض تكون خلفيتها أغنية المقرن في الصباح دي..
يا حبيبي قوماك ننفرد .. على مقرن النيل الظليل
الروض بسم .. والطير غرد .. والطقس لاحر لابرد
والشمس أبان الشروق .. هنا يا الحبيب نجلس نروق
نور الصباح بدأ وانتشر .. ومن المنام صحت البشر
أما السواقي بدت تسوق .. والشمس طلت نورا فوق
أجمل صباح زاد قلبي شوق .. أنت الحياة .. وأنا ليك عشوق
شوف توتي يا المحبوب بدت .. كالطفلة باكية تنهدت
ضماها ذا النيل الشفوق .. والطير عمل في نخيلا سوق
والقمري غنى بكل ذوق..
رحلتنا يا سيدي أنتهت .. لازم نعود عند الأصيل
04-02-2015, 07:54 AM
jini jini
تاريخ التسجيل: 02-05-2002
مجموع المشاركات: 30716
عباااس تلووودي.. الاغنية دي حققققتو.. رضينا ام ابينا غناها احسسسن من سيدا.. عارف يا عمك..انا صوت تلودي ده بيطربني جدددا..مع انو كتيريين عندهم راي فيهو لكن انا مصنفو فنان نخبة وفنان مهووول..بقعععد الغنا..
04-02-2015, 10:54 AM
عباس محمود عباس محمود
تاريخ التسجيل: 11-26-2004
مجموع المشاركات: 1441
عمر الفاروق....سلامت نمشي شوية بعيد من النيل عباس تلودي كنا بنسمعه كل أسبوع بس غنية واحدة أثناء حصة المكتبة في مدرسة الخرطوم القديمة ( القديمة ). وغنية واحدة بس ....أغنية يا نسيم أرجوك روح لها وحييها بتاعت رمضان حسن ....عارف ليه ...لأنه أستاذ المكتبة كان هو نفسه شاعر الأغنية الأستاذ الجليل عوض أحمد الحسين عليه الرحمة.
04-02-2015, 12:12 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عباس عباس والفضل فضل.. :) تلودي ده في أغنية الشعار بتاع سهرة نسايم الليل بيضرب أغنية نسايم الليل زززييي ما قال الكتاب.. انا بيعجبني الفنان البقعّد الغنا..وتلودي واحد منهم..
04-02-2015, 01:32 PM
حمد إبراهيم محمد حمد إبراهيم محمد
تاريخ التسجيل: 08-20-2009
مجموع المشاركات: 5198
الآن دعنى احدث النهرين عنهم وعنى، وليتهما يصدقان قولى وليتنى أصدق حديثك يا "معرى"، فليكن ذلك، وسأبدأ الآن فى تخفيف الوطء بذات الأقدام التى ما ملت التحليق، ذات الأقدام التى تقرأ فاتحة الدخول لتنهب المسافة بين "أتينيه" و "الكلوزيوم" وفى المخيلة تجلس ذات المسافة بين أثينا وروما، ونفس الشقة بين "السانت جيمس" و "الرويال" تلك التى تعادل ملايين السنوات الضوئية العجاف، فيا ايها المعرى، لا تحرجنى بتصديق كلامك، لا تحرجنى، فالخرطوم الآن قد إنتبذت أقصى ما فى المجرات الشائكة من أغوار، وابتعدت شفاه الرغبة عن حواف كأس التمنى والإرتواء ، دعنا نخفف الوطء لنقطع المسافة بين الخرطوم و الخضرة، ونتوهم المسير الى الجنة أو الجحيم، دعنا نتشح بمساء شتوى "لندنى" الملامح، لندلف "شارع البرلمان"، هو ايضا قصير النفس ولا تفتر الخطوات/الأجنحة من الغوص/التحليق فيه، هناك وأنت تيمم شطر الشرق منه، وفى وسط أخيلة النجيلة والنوافير الكسولة، بسطوا ساحة للشهداء، لم يخبرونا أى الشهداء هم، بل نصبوا فيها لإبنهم الغازى تمثالا ثم أزيل، وليتهم تركوه ليذكرنا بمعنى الإنتصار وطعم الهزيمة، لكى نتذكر دائما أن لا أحد يهزم أحدا، بل الناس هم الذين يهزمون ذاتهم بأنفسِهم، فالهزيمة فعل داخلى بينما الإنتصار عمل خارجى.
04-02-2015, 01:41 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
لو أردت الآن أن تلون وجه الغناء فى الخرطوم، فإنك فى حاجة الى كل الحدائق التى ترضى أن تهب ألوانها، فى حاجة الى كل الريح التى تنقل أنباء الأحزان وجميع الزغاريد التى تضمر الفرح لتنشره فوق أرض المساكين. لن ألوم الحبر حين يتوغل بعيدا فى دواة الدم، فأمام عتبات الإشتهاء تصلّى الشمس مواقيت الشروق، ولن أسير تحت سماء الواقع، فالخيال أرض تؤتى غرسها بشرا ومكانا يصارع تبريح التوهم لينيخ نوق الأخيلة. فالصورة أكبر من أن يحتويها إطار التراب، الضوء فيها غامض وخجول، لكن رغما عنه وعنى، سوف أحمله تحت القلب من الخرطوم، إلى الخرطوم. ما النهر سوى طائر مسافر إسمه الحنين والبيوت دموع تيبست وتجمعت حولها أفواج "اللبخ" مواسية، المكان إكسير الحياة. ولكن من هى هذه المدينة الآن ؟ هذى المدينة تحديداً
بماذا يبشر التراب؟
مدد يا سيدنا يا قطبنا الأرباب
مدد يا خرطوم
مدد يا نيل
04-02-2015, 01:43 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
ود بابكر ، ضيوفه الكرام - سلام .. أسف على التأخير - شغل الدنيا أم بنايا غش ..
ونهر النيل – بإلتقاء فرعيه – سوداني ومقرن النيلين – سوداني ونبي الله موسى عليه السلام - سوداني
وقديما عرف السودان باسم كوش او اثيوبيا. وهي المساحة الجغرافية التى تقع جنوب مدينة اسوان الحالية اى سودان اليوم.
اول ما ذكر عن السودان جاء فى توراة سيدنا موسى فى سفر التكوين الذى كتب في 1450-1410 ق.م والذى وصف فيه سيدنا موسى بداية الخليقة اذ خلق الله الانسان ووضعه فى جنة عدن والتى يخرج منها نهر وأحد هو نهر جيحون ( النيل) المحيط بجميع ارض كوش اى السودان.
لذلك وبحسب النص التوراتى فان السودان هو امتداد للارض التى تقع الجنة المخفية فى نطاقها من ضمن ثلاث دول منها اليمن والعراق ( التكوين 2:13).
ورد فى سفر العدد والذى هو احد الاسفار التوراتية ان سيدنا موسى (1526-1406) تزوج إمراة كوشية سودانية هي (صفوراء) ، ومن ثم دخوله للحصن المنيع في شمال السودان، وهي الزوجة الوحيدة لسيدنا موسى.
وكان سيدنا موسى اميرا فى مصر وقائد لاحد جيوش الفرعون الذى تربى فى قصره.
وان والد صفوراء، كاهن "مديان – مدين" كان رجل صالح يعرف الله الواحد.
والتداخلات اللغوية العبرية بلغات شمال السودان لا تعد ولا تحصى ومنها على سبيل المثال : حلفا : مشتقة من نبات الحلفا وهو النبات الذى خبئ فيه سيدنا موسى خوفا من بطش الفرعون ( سفر الخروج 2) . عبرى: كلمة عبرية معناها عبرانى وهى مدينة بالشمالية غنية عن التعريف.
سكوت: منطقة سكوت كلمة عبرية معناها ارض "المظال"، وفى هذه المنطقة اقام سيدنا يعقوب والد اسباط اسرائيل "ظل" له ولبهائمه تقيه اشعة الشمس الحارقة ، لذلك سميت سكوت.
علوة: كلمة عبرية ومعناها المنطقة العالية ، والمعروف ان وادى النيل الاعلى هو السودان والادنى هو مصر.
وقد حكم القطرين المصري والسوداني من وادي النيل ملوك سودانيين منهم: "تهراقا – بعانخي – كشتا" .
ثم أن ، الاستاذ/ اسحق احمد فضل الله يقول : تقول لي شنو... وتقول لي منو..!! > والناس..هم.. نحن.. السودانيين , > وأصل البشر.. نحن , > والانبياء.. نحن , > والحضارة الفرعونية.. هي نحن , > وهجرة الصحابة كانت لنا نحن , > وأصل اسماعيل عليه السلام .. هو هاجر.. وهاجر من مروي , > يعني اسماعيل جد النبي محمد صلى الله عليه وسلم «من اندنا» > وادريس النبي من الشمالية , > واسماعيل «ابو العربية» كان بالتأكيد يتحدث لغة امه هاجر /مثل كل طفل في الارض/ , > ويعني العربية والعربية «من اندنا» , > ومحمد فهمي خشيم.. الذي يصدر اضخم قاموس هيروغليفي/ عربي يثبت ان تسعة اعشار اللغة الهيروغليفية .. عربي , > و..و...
«2» > ونكتب لنقول ان السودان ينصح للدول العربية , > والردود/ التي تسخر بشدة/ تفزعنا بما تحمله من شعور بالذل , > وبروفيسور عبدالله الطيب يكتب منتصف الثمانينات ليقول ان موسى عليه السلام نوبي.. , > وان موسى تزوج «صفوراء».. من دنقلا.. , > ويقول ان هجرة الصحابة كانت إلى السودان «الحبشة كانت من اسماء الشمالية في السودان» , > واحمد سليمان يقول هذا . > وعبدالله الطيب يسكت الناس عنه لانه رهيب , > وعبدالله الطيب يدخل منتصف الثمانينات على بروفيسور علي عثمان محمد صالح «اضخم علماء الآثار» وعلى ورقة مقطوعة «مازال البروفيسور يحفظها» عبدالله الطيب يكتب له : الهجرة كانت إلى السودان.. اثبت!! > ومن يومها وبروفيسور علي عثمان ينقب.. والنتائج سوف تبدل التاريخ . > والباحث عباس الحاج يدير الرؤوس ببحث يدير رأسه هو نفسه حين يجد ان : نبي الله ادريس من السودان , > ونبي الله ادريس هو نبي الصابئة , > والصابئة كانوا ايام الفراعنة , > وان الصابئة الآن.. الذين يعبدون الشمس. صلتهم بالصابئة الاولين هي شيء يشبه صلة العرب الذين يعبدون الاصنام ويقولون انهم على دين ابراهيم , > والقرآن الكريم يقول «الذين هادوا والصابئين والنصارى من آمن بالله واليوم الآخر فلا خوف عليهم» , > القرآن يقول الصابئة ممن آمن بالله واليوم الآخر , > الصابئة مع الفراعنة.. والفراعنة كان مقرهم هو الشمالية «حيث بحيرة السد الآن» ,
«3» > والتوراة وابن كثير والالوسي وابن خلدون وكبار المؤرخين والمفسرين يقولون ان : اخنوخ.. المذكور في التوراة.. هو ادريس , > وادريس من الشمالية , > وهيرودتس, الذي يكتب قبل خمسمائة عام من الميلاد يحدد الجغرافيا .. والاسماء بدقة وهو يقول ان «ما يسمى اثيوبيا في التوراة هو النوبة السودانية» > ويقول عاصمتها.. عاصمة اثيوبيا هي.. > وتمهل في القراءة , > عاصمتها هي.. مروي . > ثم بحث عالمي جداً وحديث جداً ومدهش جداً وبعض اهله هو دكتور هاشم يوسف الحسن.. البحث هذا يقول «ان «أصل البشر هم السودان» > وانه , > : ما من امرأة في الارض الا وفي جيناتها السودان , > وان جينات المرأة السودانية متصلة منذ «مائة الف عام» , > والردود التي تنكر علينا قولنا ان السودان ينصح للعالم .. والخنوع والذل الذي نجده فيها.. يجعلنا ننطح الحائط ونكتب هذا... > نحن أصل الدنيا.. نعم > وأصل النبوءات .. نعم > وأصل اللغة العربية .. نعم > وأصل الحضارة .. نعم > و... > وتقول لي شنو وتقول لي منو ٭٭٭
صور المغربية دائما ساحرة وفيها حضور عجيب للشمس والظلال والألوان
المنطقة دى وين تحديدا ؟
المنطقة دي غرب النيل الازرق ... سوبا غرب (سوبا الحلة) ... جنوب الخرطوم ... والمنارة الطويلة والظاهرة في اخر الصورة ... بنوها الانجليز ... وهي عبارة عن مدخنة ... والمنارة دي بتقع تحديدا في مزرعة جامعة الخرطوم ... خلف مستشفى سوبا ...
المشكلة الناس القاعدين في السودان ما جايبين خبر اللحظات الشاعرية العجيبة دي ... ولقمة العيش مدبرسة بيهم ...
ــــــــــــــــــــ
عندي صور تانية في نفس اليوم داك ح انزلهم ليك هنا ان شاء الله ...
ــــــــــــــــــــ
الصورة الفوق دي يا ابا ذر ...
يخيل ممكن اخش بيها في مسابقة وتفوز :) ...
ولا رأيك شنو ؟؟؟
04-12-2015, 03:00 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
Quote: فى المنطقة دى كان فى مركز ابحاث بيطرية زمان وكان عندنا صاحبنا من ناس البيطرة بشتغل هناك
برضو كان فى مشروع طاقة شمسية قبل الناس فى العالم ما تعرف السولار انيرجى دى
بعدين المدخنة دى لو ما اخاف الكضب اقول انه فى الجزء الأعلى منها مكتوب تاريخ
1973
فعلا الابحاث البيطرية موجودة بالقرب من مستشفى سوبا ... وبرضو معهد أبحاث الطاقة موجود إلى الآن وهو مجاور للابحاث البيطرية ... بالنسبة للمنارة ما اعتقد هي الكانت في الكتاب داك ... لانها زي ما قلت ليك كانت عبارة عن مصنع فناجين في زمن الانجليز (زي ما بيقولوا أهلنا) ... وتبقى رواية ضعيفة ... الان المنارة مستخدمة في مصنع للطوب الحراري ...
ـــــــــــــــ
بالنسبة للصورة بتاعة الغروب ... الصورة درجة الوضوح حقتها ما عالية للدرجة البتخليها تنافس ليها في مسابقة ... بس الواحد حبا يشغالك شوية ... والمنطقة ديك يا ابا ذر لو لقت ليها مصور محترف ... بيطلع ليه بصور ممكن ينافس بيها في اي مسابقة محلية أو عالمية ...
معليش ... حرفنا البوست يمين شوية ...
ح ارفق ليك صورتين بعد شوية ان شاء الله ...
04-12-2015, 10:48 PM
قسم الفضيل مضوي محمد قسم الفضيل مضوي محمد
تاريخ التسجيل: 01-08-2013
مجموع المشاركات: 2608
ايوا ... يا ... ابا ذر ... صورة (يا بحر حلتنا) من تصميم العبد لله ... فكرة الكتابة على الرمل مأخوذة من موقع مصممة اسمها روز Rose ... وأنا كنت فتحت بوست وداير انزل فيه صور كتيرة من ضمنها الصورة دي ... لما ما لقيت تجاوب وتفاعل من الاعضاء وقفت البوست وخليتو يغرق في المنبر ... ههههههه
ــــــــــــــــــــ وبالمناسبة يا ابا ذر انتا الزول الفنان ... فعبارات زي (سرمدية العناق) و(ابدية اللقاء) والعنوان نفسه (انا اعطيناك النيل) عبارة عن لوحات لا تقل جمالا عن الصور المرفقة ... بل وتتفوق عليها ...
ــــــــــــــــــــ عندي صورة وممكن تكون الاخيرة ... ح ارفقها اسفل البوست وشكرا ليك على تحملنا ... وواصل في اكمال البوست وانا بساعدك بالصور :) وفي الاخير نحن الظاهر بيجمعنا عشق النيل (انا بعشق النيل الازرق تحديدا) ... وزي ما قلتا انتا فوق لي ود قاسم نحن فعلا الله بحبنا وادانا النيل هدية ... وما اعظمها من هدية ...
كن بخير يا صاحب ...
04-16-2015, 04:08 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
دا مشهد للنيل الازرق ... في فبراير 2014 في منطقة سوبا ... تضم الصورة ... شخصي واولاد اخواني واخواتي ... أنا لابس القميص الكاروهات ... هههههه المركب دي جات مارة بالصدفة وقلنا ليهم دايرين نتصور فيها ... بطيبة أهلنا ديك ... قالوا اتفضلوا ... ــــــــــــــــــــــــ
Quote: والله بالجد جملت لينا الفجة بإضافاتك المصورة السمحة
يا ابا ذر بوستيك دا ... تبيع ؟؟؟ ههههههههههه ...
بالجد بوستيك وقع لي في جرح ... و ما بستاهل يتزين بالصور الجميلة دي بس ... بوستيك يستاهل الضبيحة هههههههههههه
____________
اكرر اعتذاري لو حرفنا البوست عن أهدافه المرسومة ليه ...
04-16-2015, 05:59 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
تحياتي ابا ذر ... معليش الصور فوق ما نزلت ... فنزلتها في المشاركات التالية ... لسه مشكلة النت عندي ما اتحلت ... في مشاركات تانية ان شاء الله ... فترقبوها ....
ههههههههه
04-30-2015, 09:08 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
صديقي المطر..حبابك.. اووذري نيل..!! كنت زايغ ، لأنو لو جينا ، دميعات كتر ح تكب ..!
كتر خيرك على حفريات العبارة/الجملة/الإستلهام البليغة..!
ولكن سؤالي: ليه نحن بنضيق النيل الرحمة ، ونحصروا فقط في امسودان واشجان امسودان وذكريات امسودان؟.. النيل ، عندي يا صديقي ، وعند خلق كتيرة خلاس ..حداشر دولة.. أي والله.!
كنت ناوي اضيف شغل رووك اند روول ، قاعد يحتفي بالنيل.. لكن زغت ، لأنو ذائقة اهل امسودان ما ليها في الرووك اند روول ..حتى لو كان بيغني عن النيل..!
هنا يا صديقي ، ليك ، ولضيوفك..ولأصدقاءنا..عبد الله جعفر وجورج.. هنا النيل الرحمة.. حينما يصير مشروع ثورة ثقافية لم نعرف عنها نحن اهالي امسودان بعد..!
المجموعة دي اسمها (فرقة النيل) أو بكلام الخواجات (مشروع النيل)..وهي مجموعة موسيقيين وموسيقيات..زي الورد..وقدموا روحهم للعالم والعالم انبهر.. وشغالين على مستوى دول حوض النيل ، وعندهم مزعم انو النيل ده ياهو افريقيا كلها..!!
المادة حوار في اذاعة امريكية في ولاية سييتل..ودي فركة كعب مننا.. وطبعا ناس كتيرة بتعرف الولاية دي عن طريق اخر منتجات الكمبيوتر وشنو كده ما عارف..! المجموعة فيها ناس من امسودان (الفنانة السارا) ، كينيا ،اثيوبيا ، بورندي ، يوغندا ، ومصر..وامريكا..!
اول غنية (قرب لي) من اداء السودانية السارا..والغنية التانية من اداء الأثيوبية سلام (ويا ابوذر تابع غنية الحبيشية دي ، قريب من نهايتها شوف روح احمد المصطفى كيف واضحة وظاهرة).. والغنية التالتة للمغني البورندي (ودي فيها ايقاعات اهلنا ناس غرب امسودان: كرنك ، فرنقبية..الخ)..
اما قريبتي الكينية ، بتاعة الطبول ، طربانة بصورة ، أنا ذاتي طربت ليها في بت ام روحي دي..!!
عذاب شديد يا ابوذر..وهل جمال النيل و روح النيل ، حاجة غير العذاب؟..
اجمل ما عجبني التنظير..ياخي الشباب ديل فيهم نضج ما عادي..!!
اهو دي ، صورة تانية للنيل..صورة ما قاعدين نهتم بيها كتير..و يا ريت تعجبكم يااااخ..!
أجمل الناس دائما وفى كل مكان البتلقاهم مندغمين ومتوحدين وعاطنين روحهم فى الطبيعة
مش بس الزول يكون جزء من الطبيعة، المفروض يكون جزء متفاعل ومتوهط جواها يؤثر ويتأثر بيها
وبالطريقة دى يمين بالله الناس ممكن تعيش بشكل احسن وافيد واجمل كتير
الناس يا كبر "برات البلاد" على قول السيدة فيروز، يعملو فى المهرجانات والاحتفالات والأعياد من كل صنف ونوع ونحن فى بلدنا "نتكاتل" ونتماوت وكل زول ما داير التانى
غياب مستحكم للروح وللعقل وما بعده شى غير الفناء والضياع والقعاد فى آخر صف البشر
أكيد طبعا كل ناس حاسين ب "نيلهم" وخابرين موضوعه
كان بدينا من تالا الشمال تلقى قرايبنا الفراعنة ومن زمان من اول فتحة عين قالو بلدهم دى كان ما النيل ما بتكون ولا بتبقى والإغريقى هيرودوتس سماها ليهم هبة النيل
وانت جاى طالع وماش علينا جنوبا بتلقى الناس مدخلين النيل فى ادق تفاصيل حياتهم سيبك من العيشة والأكل والشراب والزراعة، ناسنا فى كل مناسبة سمحة لازم يدو البحر نصيبه من التقديس والمحبة كان فى الأعراس وكان فى طهور الوليدات وكان فى ربعنة المرأة الوالدة
وعريسنا ورد البحر يا عديله وكطع جرايد النخل يا عديله
ياخى الكلام كتير كترة شديدة والله وما ظنيتو ينتهى
لكين النجيك لى الناس الفنانين ديل بالله فى شى يستاهل الزول يغنى ليهو ويتسمى بى اسمه اكتر من سيدنا النيل ؟
زمان شيخنا التيجانى غنى النيل و قال ليهو يا سليل الفراديس
واختصر لينا اسامى ومعانى كتيرة
ويا ريت ناسنا الليله برضو يواصلو فرحهم بى نيلهم الفردوسى ويخلو انسداد العقل وجرح الروح وكراهية بعضهم البعض
ويشوفو الله ادانا شنو
انت عارف
ناسنا ديل بكونو نوع الناس الما بعرف قيمة الحاجة
إلا بعد ما يفقدها وتروح منه
والله يستر
مشكور يا كبر ياخى على تجميل النيل وتجميلنا كلنا بيك
وبى جيتك السمحة دائما
10-17-2015, 10:36 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
Hololy
جلالدونا
دينا خالد
ودقاسم
ابوحراز
قسم الفضيل مضوي محمد
عمر الفاروق
jini
عباس محمود
حمد إبراهيم محمد
عبد المنعم سيد احمد
showgi idriss
Kabar
MOHAMMED ELSHEIKH
فيس بوك
تويتر
انستقرام
يوتيوب
بنتيريست