|
|
|
 Re: وأما قبل .. مشهد جانبي!! (Re: محمد حيدر المشرف)
|
حمدلالك بالسلامه
ناس المرور ديل في واحد شقاني عديل بالزعل
Quote: (الناس تحسدك دائما على شيء لا يستحق الحسد لأن متاعهم هو سقط متاعك. حتى على الغربة يحسدونك كأنما التشرّد مكسب وعليك أن تدفع ضريبته نقدا وحقداً)
احلام مستغانمي
القصة دي حصلت لي وانا في طريق العوده للسودان بحرا وبرا الشهادة لله نقاط القبانه والتفتيش والمرور كلهم ناس محترمين وبادب بقولو ليك امشي براحه واعمل حسابك الشارع مازي شوارعكم في السعوديه
واحد فقط من ديل رفع الضغت معاي وخلاني اسب واطلع من طوري ونبزتو في امو ومعاو الريس بتاعو تتخيلو نزلت القزاز واديتو اوراق المرور والتربتك قالي قزازك ده مظلل قتا ليو العربية دي (خطين تحت العربيه ماسياره اييييي ) مظلله من وكالتا فطوالي قالي انتو الواحد فيكم يمشي بره يغير كلامو ولسانو وتجونا هنا تتدلعو هناك بدقوكم بالعقال اللحظة دي الضغت عمل مية وسبعين على مية وعشرة والعيون زغللن واللسان اتعبا زفاره باقي انا لساني فيو شقين واحد من عسل ولبن وواحد خرا بعيد عنكم طوالي لمبات الخرا ولعن وقتا ليو ان............... امك ومعاك الختاك هناك والبشير ظاتو تعال دقني واتخيلو المنظر سواقيين الديانات والباظات والترلات وكلهم جو يحاجزو بيني ورجل المرور طبعا التخصص غايب فرجل المرور بفتكر نفسو مباحث جنائية او وكيل نيابه او حتى قاضي مقيم فبلدنا مستقبلا مع الغبينه البرا سبب دي حيكون داعشي جدا جدا وسلامتكم
كنا بنجي بلدنا لصلة الارحام الظاهر تاني الدايرنا يجينا هنا |
| |
 
|
|
|
|
|
|
|
|
Re: وأما قبل .. مشهد جانبي!! (Re: حامد بدري)
|
حامد سلامات وكيف الحال ..
| Quote: حتى على الغربة يحسدونك كأنما التشرّد مكسب وعليك أن تدفع ضريبته نقدا وحقداً |
الغلط غلط فولتير .. والله صحي ؟!!
ياهو الطلق في الناس فكرة انو الغربة فيها كعك لمن قال (خبز الوطن خير من كعك الغربة)
اها أي زول في السودان ما راضي بي خبز الوطن المافي وفاكر انو في الضفة الأخرى في كعك !!
سوء الإدارة هو التجلي المشترك الأعظم في كل شبر من ذلك الوطن الحزين ..
سوء الإدارة وغرائبية الشخصية السودانية لو شئنا الدقة ..
يأتيك أحدهم من آخر الحلة يسعى بي قمامته عشان يختها قدام بيتكم ..
تسألو ليه ؟!
يقول ليك دي الكوشة !!
يا زول !!
منو الاعلن قدام بيتنا ده كوشه ؟!!
يقول ليك ما عارف والله لكن بنختها هنا وبجو ناس النفايات يلموها ..
- بلموها كلو كم ؟!
-ولله مرات كل أسبوعين ومرات كل 3 أسابيع ..
- طيب معقولة تخت ######ك بتاع 3 أسابيع قدام بيتي ؟!!
- اختو وين يعني ؟!
- ختو قدام يتك .. ال###### ده مش ######ك انت ؟!
- ايوه
- طيب ختو قدام بيتك ..
..
بصورة عملية جدا ..
أقترح تفعيل نظام الزبالين الفي مصر عندنا في السودان ..
كل حي يكون عندو الزبال بتاعو ..
يمر كل يوم يجمع الزبالة من امام المنازل بعربة كارو ذات صندوق مصمم لهذا العرض (من الجيد ان يتم تصميمه من قبل الشئون الهندسية في الولاية او المحليه)
وبدلا من دفع رسوم نفايات لي ناس لا يقومون بعملهم ..
يتفق اهل الحي على منح زبالهم رسوم نفاياتهم ..
النتيجة حي خالي من الكوش والزبالة المتراكمة والذباب والبعوض .. النتيجة بيئة صالحة إنسانيا للسكن !!
يمكن تنفيذ الفكرة بطرق أخرى !!
| |
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
عزيزنا ود المشرف
سلامات
بقوليك : والله العظيم يا ود المشرف سنة 1963 ونحن في قرية .. كان مرور بتاعين الصحة
في القري والحضر مرتين في الأسبوع .
جمكسين للبيوت وتزفيت لي أي بركة وأي جدول ورش للزراعة .
وكنا بناكل العنب والتفاح الشامي مع الاحتفاظ بي كورية السبروق للضهرية ونحن سارحين بي الغنم .
ونحن في رعيتنا دي كنا متابعين الحاصل في جبال الروكي وفي جزر الهند الغربية .. صحة وعافية وأحلام وردية .
لا في مزارع عندو موية مكسورة في شارع ولا في زول بجدع ######و في كوشة بدون ما يحرقو .
البلد كانت خالية من الملاريا لا ناموس لا باعوض ولا لحمة حمير .
وقالوا يا ود المشرف يوم دحشة عمنا صباح الخير سعرت وكجمت غنماية ناس عم عطاي أهلك الانجليز
جابوا خبر سعر الدحيشة في لندن . هسع الليلة منو الماهو سعران ؟
كانت عندنا بلد محترمة وكان عندنا جنيه يعادل 3 دولار وربع .. القصة يا أخوي محتاجة خجة 9 درجات بي مقياس ريختر .
تحياتي
| |
|
|
|
|
|
|
|
|
|
Re: وأما قبل .. مشهد جانبي!! (Re: Osman Musa)
|
صديقي المقترح الاجمل عثمان موسى ..
لك العتبى حتى ترضى ثم ترضى ..
لم أنتبه لمداخلتك الجميلة الا الآن !!
Quote: دحشة عمنا صباح الخير سعرت وكجمت غنماية ناس عم عطاي أهلك الانجليز
جابوا خبر سعر الدحيشة في لندن . هسع الليلة منو الماهو سعران ؟
|
يموت مرضى الغسيل الكلوي من سعار الاسعار .. 350 الف للغسلة الواحدة وبمعدل 3 غسلات في الاسبوع يتم لواحده في اغلب الأحيان.. معدلات السرطان مخيفة بالمناسبة, الموضوع يحتاج لدراسة.. هناك نقص حاد في الادوية الكيماوية الاساسية, وحتى لو توفرت فهي اعلى بكثير من متناول يد المرضى , اطفال اللوكيميا لا أجد ما قد يصف احوالهم .. لا احد يهتم على الاطلاق الا بعض المبادرات غير الحكومية ..
يا الله يا عثمان ..
ا"السودان, موت حلم" كما كان عنوان ذلك الكتاب
| |
|
|
|
|
|
|
|
|
 Re: وأما قبل .. مشهد جانبي!! (Re: محمد البشرى الخضر)
|
Quote: معاناة مغتربين ظااااااااااااهرة
|
بالله شوف عدم نكهة هذا الرمادي في زمن الوضوح ..
ازيك يا صديقي وعامل والاسرة كيف !!
وأما قبل !!
سوء الإدارة هي التجلي المشترك الأعظم في كل شبر من ذلك الوطن الحزين ..
لاحقا .. وأعني في هذا البوست .. سنتكلم عن نوعية الدولة السودانية, الشخصية السودانية, ومتلازمات الفشل
الا أن حقارتك بالزبال لا تليق بخريج جامعي بالمناسبة "وش غتيت غتاتة أولاد امدرمان"
ركب الريس جاهزة موية ونور !!
| |
|
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
هههههههههههههه
يا دكتور اكيد شفت فيديو مصنع الزيوت و قبله مسالة لحوم الحمير و الدواء منتهي الصلاحية وغيرها وغيرها
فا خمسمية متر غير مرصوفة او زبالة تراكمت اسبوعين تلاتة أو زحمة الشهداء و شارع الاسبتالية دي حنكشة مغتربين ساي :)
الجماعة هناك بدوسوها وهم ماشين
جيب من اللحم الحي وسيب منك الفوق فوق يا ود المشرف :)
| |
|
|
|
|
|
|
|
|
|
Re: وأما قبل .. مشهد جانبي!! (Re: حمد عبد الغفار عمر)
|
حمد لبد " او كما تشير دينا خالد ..
كيفك وكيف كيفك يا صديقي ..
Quote: شنو مشيت ليك إجازة عايز تشغل الناس من همومها بموضوع النظافة دا
انت ذاتك لو قعدت ليك سنة حتشوف الموضوع دا عادي (أعني الزبالة القدام البيوت)
|
تعرف يا عزيزي !!
بحسبي, فاكيها في نفسي عديل كده, أرى تطور ملحوظ بالنسبة لي في التعاطي في السلطوي/السياسي .. وبحيث تجاوزت تماما الاستغراق في ملاحقة الاخبار وتحليلها واستقرائها في مظان الخلاف والاختلافات العظيمة ..عدت يا صديقي أكثر تركيزا في محاولة فهم الشخصية السودانية لايماني الحديث نسبيا بأن هناك خللا كبيرا يعتور تكوين هذه الشخصية .. وبحيث تكون هذه الشخصية صاحبة القدح المعلى في افرازات الواقع الوطني. جذران أساسيان للمشكلة الوطنية يشكلان جوهرها .. جذر إجتماعي/اقتصادي وجذر ثقافي/تربوي/أخلاقي .. وهما كانا عماد كل المشاريع السلطوية الفاسدة في السودان وسر استمرارها كذلك ..
لماذا هذا المدخل اذن ؟!
مدخل القمامة المتراكمة ومظاهر الفوضى العارمة في كل شبر من ذلك الوطن الحزين ؟!!
لانو ده المدخل الوحيد والذي قد يفسر فكرتي؟!
ما هو يا انو طبيعة الانظمة الديكتاتورية بتنتج الكلام ده .. يا طبيعة أهل السودان ؟!
لا اعتقد أن الديكتاتورية مسؤولة عن ذلك .. فنماذجها على قفا من يشيل ..
الا ان ما يحدث في السودان أن الديكتاتورية هي جزء اصيل جدا من الشخصية السودانية .. عمر البشير ليس صدام تشاوشيسكو او ستالين او هتلر في نهاية المطاف .. سوداني يدمن الرقص على ايقاع السيرة وفاقد لاي حس عام ووطني وأخلاقي ومبدئي يقوده نحو ممارسة مسؤولياتو (الديكتاتورية) تجاه الوطن زي ما كان حسني مبارك وبن علي .. وحتى القذافي على الرغم من التقارب الشديد في الشخصية الا أنه كان أكثر مسؤولية في التعامل مع مسؤولياتو الديكتاتورية في ليبيا ..
هناك خلل كبير جدا في الشخصية السودانية يجب الانتباه له جيدا ..
لا اعتذر عن طرح تداعياتي الشخصية وتفاكيري الغلط والصالح ..
فقط يجب توضيح انها لا تتنزل عن نزق زول مغترب مترف يتأفف من انتماءاته ..
علما باني ملم تماما بكل تفاصيل ما يحدث .. بما في ذلك ضرب آخر المعاقل السودانية المتماسكة حتى الان .. وأعني الجماعات الصوفية وادخالها في انفاق مظلمة تشبه تلك ادخلو فيها الاحزاب السياسية .. تصور !! هي تداعيات متفرقة ليس الا !
ودي وتقديري
| |
|
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
| Quote: هناك خلل كبير جدا في الشخصية السودانية يجب الانتباه له جيدا |
سلام ود المشرف
حمد على العودة ، المهم تساؤلك هذا يدور فى نفس تساؤلاتى منذ كان العود اخضر .
وهو ليس ببعيد من بوست الاستاذ حرسم. (بتاع مؤتمر الخرجين ) ،
واكتفى بهذا ، ومتابع و متداخل فى (المستقبل )
------------
| |
|
|
|
|
|
|
|
|
|
Re: وأما قبل .. مشهد جانبي!! (Re: هاشم احمد ادم)
|
يا مشرف
| Quote: بحسبي, فاكيها في نفسي عديل كده |
ما فاكيها في نفسك ولا حاجة كل ما في الأمر انت (مقارنة بهم) ما زلت محتفظ بأهمية النظافة كسلوك يستوجب على الجميع ممارسته وزادت هذه الأهمية بوجودك في دولة تصر إصرارا على ممارسة هذا السوك ولديها الإمكانيات لذلك
هناك ما عاد أمر النظافة يعني شيئا في إنعدام أساسيات أخرى (المأكل والمشرب والملبس) واحيانا المأوى . هل سيلزم المشرد مثلا نفسه بنظافة مدينة لا يملك فيها غير ثيابه البالية التي تكاد تكسو جسده .
أنا مريت بنفس موقفك دا في آخر إجازة لي وبديت في التصحيح كل يوم وأنا طالع أشيل معاي الأكياس القدام بيتنا وأوديها الكوشة الكبيرة (مشوار بالمناسبة) قالو لي تاعب نفسك في شنو
خليها بكرة أو بعد بكرة العربية بتجي تشيلا يعني الناس وصلت نقطة اللا عودة
الناس انتهت ياخ
| |
|
|
|
|
|
|
|
|
|
Re: وأما قبل .. مشهد جانبي!! (Re: معاوية الزبير)
|
لقد دمرت سياسة "إعادة صياغة الإنسان السوداني" الأركان والأرضية الـوطيدة التي نشأ عليها واستمر
المجتمع السوداني في تاريخه الحديث، بما في ذلك المفاهيم الخاطئة.
بعد أن نعترف بأن نظام الإنقاذ (الترابي-البشير) استطاع تدمير بنية المجتمع ودك قيمه وأخلاقياته،
علينا أن نسأل: ماهي الآليات التي فعل بها ذلك ولماذا
كيف ولماذا استجاب الناس ورضخوا بسهولة لآليات تدميرهم وإعادة صياغتهم
هل كان البنيان هشا لهذه الدرجة بحيث يتهاوى في خمس أو عشر سنوات من حكم نظام معتوه شرس وقاس
ما حقيقة الأمجاد والطبائع السودانية التي ظللنا نرددها ونتغنى بها ولها لعقود تمتد إلى أكثر من قرن
هل كل ذلك مجرد أوهام؟ وإذا كانت كذلك، من ذا الذي رسخها في وجداننا ولماذا ؟
في البداية هل نحن (معارضون ومؤيدون وبين بين) نقر ونلمس الخراب الكبير الذي حدث ؟
فلا بد لمن يريد الإصلاح أن يعترف ببؤس الواقع ووصف أعراضه وتشخيصها ومعرفة الأسباب ومن ثم وضع العلاج.
ولتحقيق ذلك يجب -وفورا- وقف والتخلص من هذه المهازل وأمثالها:
- أوهام الحر والعبد والفروخ (القبلية والعصبية والولاءات التي لم تعصمنا من الخراب)
- عقلية هلال مريخ (مصطفى سيد أحمد ومحمود عبد العزيز)
- سقف رمزية جدودنا زمان وحقيبة الفن
- تفاهة ثقافة زين وسوداني و MTN المنتشرة في بلدنا
- أغلال الأحزاب التي تقيد طاقات المفكرين في اتجاه صمد مسدود
وهنا في هذا المنبر كم من طاقات مضيعة في تدوير نقاش الآفات المذكورة!
فهلا سمونا عن كل ذلك وشرعنا بعقول حرة ونيات مخلصة في نقاش تشخيص وعلاج
علات هذا الوطن المهدور من حلفا إلى نمولي
هل السودان بحاجة إلى معارضين سياسيين
http://www.sudaneseonline.com/board/460/msg/1390552130.html
| |
|
|
|
|
|
|
|
|
|
Re: وأما قبل .. مشهد جانبي!! (Re: معاوية الزبير)
|
تحياتي يا دكتور وحمدلله على السلامة ..
لا حل الا بنقل "كرش الفيل" الى مكان اخر..
فالعاصمة اصبحت لا تطاق.. وام درمان اضحت كحائط الضانقيل القديم المتهالك .. غطاها الغبار ودخان العوادم وعكر صفوها هدير محركات الركشات والمركبات قديمة الطراز..
كثيرين ممن عادوا من الاجازة للدوحة كانوا في قمة الاستياء من الوضع البيئي المتردي ..
شوارع متربة وارجل كادحة وغبار عالق واطعمة مفروشة ولحوم على الشناكل ودخاخين متصاعدة ومشروبات ملوثة ..
ولكن ما يحير ان المنظر مختلف تماما في مناطق اخرى .. مركبات فارهة وبترينات زجاجية للعرض ومحلات ماركات عالمية ووجوه لامعة ..
ولكن يقيني الذي لا يتزحزح : اننا اذا اردنا ان نغير الواقع فيجب ان نغير ما بانفسنا..
فنحن .. سياسيين ومثقفين وعموم السودانيين .. نحتاج لتغيير "البيئة الداخلية" لنا اولا ثم نتجه لـــ"البيئة الخارجية" ..
تحياتي واحتراماتي
| |
|
|
|
|
|
|
|
|
|
Re: وأما قبل .. مشهد جانبي!! (Re: معاوية الزبير)
|
حمدلله على السلامة الاستاذ المشرف
نعم العلة قد تكمن في الشخصية السودانية لكن ما تنسى ان الاخوان المسلمون اشتغلوا عليها ربع قرن كامل وقد ما أشرت الى ما يحيق بكل ما يقع في يد هذه المافيا حينما تحدثت عما بدأ يصيب الصوفية
المواطن غلبان ومعذور ركز لينا بس في شيطنة الكيزان
وتفضل بقبول الشكر على البوست الرائع
| |
|
|
|
|
|
|
|
|
|
Re: وأما قبل .. مشهد جانبي!! (Re: حمد عبد الغفار عمر)
|
حمد عبدالغفار ..
صباحط زين اينما كنت يا عزيزي ..
ذاهلون تماما عما يحدث او بفعل ما يحدث يا حمد ..
تراهم كالسكارى وما هم بسكارى !!
مستسلمون تماما لواقعهم ..
لاول مرة يا حمد أرى آثار الضنك في وجوه بعضهم ممن كانوا -فيما مضى- في شريحة الاسر المتوسطة ..
تحدث الاشياء حولهم دونما سبب ودونما انتباه .. ولا تحدث كذلك ودونما سبب ودونما انتباه منهم كذلك ..
الا أن الشاهد في الموضوع أن الأمور التي تحدث او لا تحدث لا تعنيهم في شيء على الاطلاق..
يتلاعب بمصائرهم الساسة والتجار والشرطة والمحلية وبتاع النفايات ..
ثم ولا يهتز لهم جفنا .. وهكذا
وكأنما هو داء السهوم الذي اجتاح الخرطوم والشبية بذلك الارق الذي اجتاح موكندو!!
| |
|
|
|
|
|
|
|
|
|
Re: وأما قبل .. مشهد جانبي!! (Re: هاشم احمد ادم)
|
عزيزي هشام احمد آدم ..
تحياتي ..
اتمني ان اجد موضوع الصديق العزيز "حرسم" ..
وسانضم اليكم بالتاكيد لمحاولة فهم سلوك جاري العزيز وهو يقطع كم مربوع محتقبا قمامته ليكبها كبا امام منزلي ورضاه التام بمصيرها المحتوم في مستقرها ذلك لمدة اسبوعين او تلاته كمرتع للامراض والحشرات والقطط الضالة والكلاب .. او لفهم سلوك الشرطي الذي يتغاضى تماما عن مخالفات عظيمة ومؤثرة جدا وتتعارض مع مصالح الناس والعباد ومشوهه جدا لوجه المدينة وهو في قمة انتباهه لتصيد مخالفة عدم ربط الحزام !!. والاهم من كل ذلك وذلك هو القبول بمثل هذه الممارسات وما يماثلها وباعتيادية فائقة ودونما حتى طرح الاسئلة حولها ؟!!
لكل ذلك, بالمناسبة, لم ينتبه الناس هناك كثيرا لمناسبة مرور عام على هبة سبتمبر وتضحياتها تلك الجسيمة والفادحة .. للموضوع صلة وصلات يا عزيزي .. حتى انني اول من انتبهت عند دخولي لهذا المنبر بعد مرور 35 يوم .. انتبهت لحقيقة أن هذا المنبر ذاكرة حية و وواعية جدا بذلك الوطن الحزين عند مشاهدتي كل تلك العناوين عن انتفاضة سبتمبر !!
| |
|
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
Quote: في شارع العرضة يا معاوية الزبير يا صاحبي ..
هناك حوالي 500 متر تقريبا ..
من نهاية استاد المريخ ولغاية لفة السوق الشعبي ..
هذه الخمسمية متر دي لو راكب دبابة ما تتخطاها بي اخوي واخوك ..
باقي شارع العرضة كلو كويس ( حغرة او اتنين هنا وهناك) ..
اللهم الا هذه ال 500 متر دي ..
|
ود المشرف سلامات وعوافي وكيفك يا حبيب
الخمسمية متر البتقولا دي ليها سنين وحا تظل بنفس حالتا
الى ان تحصد بعض الارواح
حصلت لي قصة في السنة قبل الماضية في شارع الخرطوم الجبل وتحديداً في منطقة الكلاكلات
وانت ماشي من اتجاه الخرطوم الى الجبل بعد سوق اللفة توجد محطة وقود بشاير وامام هذه
المحطة على الطريق توجد حفرة في الاسفلت حميقة وكبيرة على المسار الايمن وانا ماشي في هذا المسار
وامامي رقشة وبجانبي على المسار الايسر بص سياحي ضخم ماشي الابيض. المهم بتعاع الرقشة القدامي
فجأة زاغ ناحية اليسار وصدمه الباص السياحي الضخم وكان من نصيبي انا السقوط في الحفرة بعد فرامل قوية جداً
لتفادي الرقشة التي انقلبت بصاحبها على جانب الطريق . المهم يا زول وقفت ونزلت وكنت اول الواصلين لي صاحب
الرقشة وكان قد طاااار من رقشته وسقط على طرف الاسفلت ولقيتو بيتأوه سالته انت شايفني يا زول نظر الي واجابني بآهة
وسالتو تاني سامعني فهز راسه بالايجاب المهم انا ما عندي معرفة بالاسعافات عشان كدا ما حاولت احركو من مكانو لانو امكن
اتسبب في الضرر وفجأة ناس الحارة جو وواحد دفرني هنااااك وقال لي انت الزول عايز يموت جنبك بتتفرج عليو ّّّ!!!
وطوااالي خمشو ليك الزول واحد من اكتافو واحد من كرعيو وفي واحد كان مقبقبو وبمجرد ما القو به في مقعد العربية
العايزين يودوهو بيها المستشفى فاضت روحه الى بارئها وتوفى في الحال . وانصرفوا جميعاً يضربون يداً باخرى قائلين
سبحان الله يومو تامي ولكل اجل كتاب . قدرو كدا الله يرحمو . لكن لو انهم صبروا قليلاً كان من الممكن اسعافه ولكن
ربنا قال وجعلنا لكل شيئ سببا. اللهم ارحمه وتقبله واسكنه جنات النعيم.
هل تصدق يا ود المشرف في الاجازة الاخيرة دي في عيد الفطر مشيت ولقيت نفس الحفرة في نفس المكان
وكمان زادت عمق وزادت اتساع ههههههههههه والله صحي
مقولتك في الخلل الاداري بليغة وتوصف حال البلد بالظبط
وسلامات ومتابعين
| |
|
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
الاخ الفاضل عبيد الطيب ..
تحية واحترام ..
نعم, ومذ خيمت الديكتاتورية الانقاذية فوق بلادنا وهي تستمد وجودها من عمليات ضرب النسيج الاجتماعي .. انظر للثنائية جلابي/غرباوي .. بل و غرباوي/غرباوي وجعلي/شايقي .. ثم انظر لعمليات تقسيم الكيانات السياسية .. لا اعلم عدد الكيانات المشتقة عن حزبي الامة والاتحادي على سبيل المثال .. والآن تمدد الأمر لتطال يد الدكتاتورية الكيانات الصوفية !!
Quote: المجتمع السوداني إتركش تب وكوَّع ياود المشرف......
آخر إجازة لي قبل سبعة أشهر
وجدت البادية ماها البادية ..
أهلها الكانوا بياض النيّة لقيتهم كلامهم أحرش وشوك شوك
والمحنة خلاااااس بقت شويّة ..........
المحنة من الحنان والحنية والتكاتف والترابط والتراحم........
السودان الدخلتوا دي تاني مابتمرق........!
|
نعم يا صديقي ولكن يحق لنا أن نتساءل عن هشاشة هذا المجتمع إبتداء والطيعة جدا ازاء عمليات التلاعب والتشويه من قبل الانظمة الشمولية .. نعم للسلطة تأثيراتها الفظيعة وآلياتها القاهرة ولكن .. للمجتمعات مكنيزماتها الدفاعية كذلك !!
مودتي الفائقة
| |
|
|
|
|
|
|
|
|
|
Re: وأما قبل .. مشهد جانبي!! (Re: محمد حيدر المشرف)
|
Quote:
في البداية هل نحن (معارضون ومؤيدون وبين بين) نقر ونلمس الخراب الكبير الذي حدث ؟
فلا بد لمن يريد الإصلاح أن يعترف ببؤس الواقع ووصف أعراضه وتشخيصها ومعرفة الأسباب ومن ثم وضع العلاج.
ولتحقيق ذلك يجب -وفورا- وقف والتخلص من هذه المهازل وأمثالها:
- أوهام الحر والعبد والفروخ (القبلية والعصبية والولاءات التي لم تعصمنا من الخراب)
- عقلية هلال مريخ (مصطفى سيد أحمد ومحمود عبد العزيز)
- سقف رمزية جدودنا زمان وحقيبة الفن
- تفاهة ثقافة زين وسوداني و MTN المنتشرة في بلدنا
- أغلال الأحزاب التي تقيد طاقات المفكرين في اتجاه صمد مسدود
|
معاوية مرة أخرى وأجمل ..
هناك مسالة هامة جدا في الطريق للانعتاع من هذا الواقع .. الا وهي الحد من غلواء السياسي في دواخلنا .. جميعنا وكما ذكرت انت معارضون وثلة المؤدون وجمهور البين بين .. بذلك نستطيع وجميعا تشخيص الواقع بدقة دونما حمولات تأريخية في المع والضد وتلك الهلاريخية المأزومة جدا .. لا مجال لتجميل الواقع او تشويهه بصورة قصدية .. بل يجب ان يتم ذلك بذهنية نقدية فاحصة .. ساتوسع قليلا في هذا المفهوم لاهميته ولكنه ذو صلة بتساؤلك حول مدي حوجتنا للسياسيين ..
| |
|
|
|
|
|
|
| |
محمد حيدر المشرف
عبد المجيد محمد
حامد بدري
معاوية الزبير
Osman Musa
محمد البشرى الخضر
حمد عبد الغفار عمر
هاشم احمد ادم
عبيد الطيب
عادل ابراهيم احمد
مهدي صلاح
فيس بوك
تويتر
انستقرام
يوتيوب
بنتيريست