كتب المهندس احمد فؤاد سلسلة من البوستات بعنوان نحن بنغرق ليه الجديد فيها انها اتكتبت بلغه بسيطة وغير معقده عشان الناس الغير متخصصين تكون ساهلة ليهم فالي المقالات
(1)
في البوست ده و الجايات ان شاء الله ها أحاول أتكلم عن الممارسات الحكومية البتؤدي للغرق السنوي. وها أحاول اكشف حقيقة انه الحكومة بعدد من الممارسات الغبية بتتسبب في غرق الناس والكوارث الخريفية السنوية. مش بي انها بتهمل تصريف المياه والاستعداد للخريف بل انها بتتسبب بالغرق بي انها بتقفل مسارات المياه الطبيعية وبترفع مستوى الموية بصورة مفتعلة لي درجة اغراق المواطنين.
ها اشرح ان شاء الله كيف السياسات الحكومية بتمنع المهندسين و المواطنين من اتباع المبادئ الأولية للهندسة وبتعيق اكتشاف الأخطاء الهندسية في المشاريع قبل ما الكوارث تحصل و بتساهم في تشتيت جهود الإنقاذ بعد ما الكارثة تقع.
الموضوع عنده علاقة بي تخصصات هندسية متعددة. انا ها أتكلم بس في تخصصي كمهندس مساحة وفي جزء من تجربتي القصيرة في شغل الطرق و الحفريات.
ها أحاول ابسط الشرح قدر الإمكان مع تقديم معلومات أولية مبسطة عن الموضوع قدر الإمكان.
أولا: الطرق:
تصاميم الطرق في السودان بتبدأ بارسال فريق مساحة لرفع محور الطريق ومستويات الأرض الطبيعية على جانبي المحور. بعد داك بيانات الرفع المساحي بتتسلم للمصمم البعمل تصميم الطريق: الارتفاعات على طول المسار و شكل المنحنيات و التقاطعات وووو. بعد داك الرسومات بتتسلم للمقاول المنفذ البيشتغل تحت اشراف الاستشاري و المالك المفروض الاتنين يتابعو التنفيذ و يشرفو عليه.
المشكلة دايما في التفاصيل!
الرفع المساحي: اول حاجة التصميم مفروض يتعمل على خريطة كنتورية كاملة للمنطقة مش رفع مساحي للمحور بس. لأنه رفع المحور فقط ما بيدي فكرة كافية عن منسوب الأرض في المنطقة أو كمية مياه الامطار أو السيول المطلوب تصريفها.
رابط صفحة الباشمهندس احمد
https://www.facebook.com/ahmed.fuad.akasha
08-18-2014, 05:31 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
المشكلة التانية عشان تربط بين الارتفاعات من الرفع المساحي و الخرائط الكنتورية الموجودة (أو منسوب النيل) لازم تسندهم لي مرجع رأسي مشترك. العملية دي بتتم عادة بربط كل الاعمال المساحية (و مراصد منسوب النيل) لنقاط معروفة الارتفاع (نقاط تحكم) المشكلة الأساسية انه الحكومة قررت انه قيم نقاط التحكم (والخرائط) في السودان تعتبر معلومات سرية ذات طبيعة امنية!! ومنعو تقديمها لأي مهندس حتى ولو كان بينفذ في مشروع للحكومة نفسها. مع العلم انه في العالم كله المعلومات دي متاحة للجميع. بل انه الشبكة الأساسية لنقاط التحكم في السودان تم انشاءها بالتعاون مع "نيما" وكالة التصوير والخرائط التابعة لوزارة الدفاع الامريكية. وانه التقارير و القيم للشبكة الاصلية كانت منشورة في كتاب نفد من الأسواق حاليا و بعد ده بعتبروها معلومات سرية!!
النتيجة المباشرة للموضوع ده انه الرفع المساحي بقى يتبني على ارتفاعات اختيارية: يعني المساح بيدق سيخة في الأرض و يفترض ليها قيمة 100 مثلا و يبني عليها شغلو. مع انه الارتفاعات في الخرطوم هي حوالي 382متر فوق سطح البحر في المتوسط.
الحركة دي بيترتب عليها انه المراجعة بتاعة الشغل المساحي بتبقى صعبة جدا. لأنه في الأحوال العادية بيكفي انك تقارن الرفع المساحي مع اقرب نقطة تحكم عشان تتأكد من صحته وهي عملية صعبة جدا لمن تكون الارتفاعات اختيارية و منسوبة لي "سيخة".
ولأنه المساح صعب عليه يتحقق من صحة شغله وبالتالي صعب على غيره كمان فاذا غلط أو "طبخ" الرفع المساحي فمن الصعب يتعرف. الموضوع ده تدريجيا أثر على جودة العمل المساحي في السودان و اندثرت كتير من التقاليد و الممارسات بتاعة ضبط الأخطاء و مراجعة الاعمال المساحية.
الملخص حتى الان: المساح بقدم للمصمم معلومات مشكوك في صحتها مبنية على افتراضات و هي على علاتها ناقصة و غير كافية للتصميم.
08-18-2014, 05:32 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
لحدت هنا المصيبة كبيرة! الأسوأ هو الطريقة البيتعاملو بيها المصممين مع الرفع المساحي. رغم انهم أصلا طالبين معلومات ناقصة فبعضهم "بيصمم" الطرق من غير ما يرجع للرفع المساحي أصلا. في أوائل ايامي في المساحة زارنا المصمم وهو مهندس "كبير" و مشهور و قال لينا انه مابيفهم الخرائط القدمناها ليه و انه هدفه أصلا انه يقدم تقرير عشان الطريق يتصدق و يبدا التصميم وانه لو "قال التكلفة مليار وطلعت تلاتة يعني شنو؟ أو قال خمسة و طلعت مليارين يعني شنو؟" وانه المهم "يورط" الوزير ويوافق على التنفيذ و بعد ما التنفيذ يبدأ ما ممكن يقيف! و انه كان في السعودية "بيورط الملك ذاتو". المهم بعد ما مرق نحن عملنا اجتماع و قررنا ما نشتغل بيه و نواصل في شغلنا البنعرفو. تاني يوم نحن شغالين جاء ماري فينا بي عربيته وكل مسافة بيقيف و يقيس المسافة بين البيوت و الشارع ويمشي بي عداد العربية ويقي فتاني و هكذا. بعدها بي أيام اكتشفنا انه سلم التصميم قبل ما نسلمه الرفع المساحي!!
الشارع اتصمم بالنظر!!
الملخص حتى الان: المساح بيقدم معلومات ناقصة مشكوك في صحتها للمصمم الاصلا بيهملها وبيصمم الطريق من راسو.
كسرة: في عصر الاوتوكاد و الرسم بالكمبيوتر انا شفت تصاميم بتاعة طرق مبنية على المركب الراسي فقط مرسومة باليد في ورق رسم بياني. والله العظيم!!
العلاقة بين الطرق و الغرق في البوستات الجاية ان شاء الله
08-18-2014, 05:45 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
نحن بنغرق ليه؟ (2) في البوست الفات اتكلمت عن مراحل تصميم الطرق في السودان. ووقفت في حتة انه الطرق في السودان بتتصمم بناء على معلومات ناقصة أولا و مشكوك في صحتها ثانيا و حكيت حالة حقيقية فيها التصميم اتعمل بدون معلومات أساساً. البوست كان فيه معلومات فنية حاولت ابسطها و أتمنى ما أكون صعبتها. جات بعض الأسئلة و حاولت ارد عليها في التعليقات.
المهم... البروسس الغلط مستحيل تطلع نتايج صحيحة!!
و بما انه التصميم بالطريقة الشرحتها مبني على بيانات معيبة أصلا فما في أمل الطرق يكون على مستوى مرضي في النهاية.
المشكلة للأسف الشديد أكبر من كدة!
في مرحلة التنفيذ التصميم (على علاته) بتشوه بصورة كبيرة جداَ.
في الموقع بكون التنفيذ مسئولية المقاول و الاستشاري بيشرف عليه و ممثل المالك بيستلم من الاستشاري. والمرحلة بتاعة التنفيذ دي هي المرحلة الغالية والمربحة في الموضوع ولحكمة بتكتر فيها الشركات ذات الأسماء الغريبة على وزن فاعلات، مفاعل وفُعل!!
بحجة معالجة مشاكل التصميم المهندسين في الموقع بقومو يعدلو في التصميم على حسب ما يشوفوهو مناسب. والحكمة التقليدية بتقول انه الشارع لازم يتعمل عالي عشان ما يمسك موية و الاسفلت يبوظ !! و للأسف الشديد ده البيحصل. بدل ما يحفرو لي عمق مناسب عشان الاساسات بتاعة الشارع تكون في مستوى الأرض الطبيعية أو الشارع القديم بيبدو يردمو و يبنو الشارع. و الحكاية دي بتتلاحظ كتير في الطرق الداخلية دايما بتكون اعلى من المستوى القديم و البيوت على جانبي الشارع بتبقى تحت مستوى الشارع بكتير و بتبقى عندها مشكلة تصريف في الخريف. الحكاية دي بتتلاحظ في البيوت القديمة في الخرطوم بتلقى مستوى الشبابيك القديمة بقى قريب جدا من مستوى الأرض. لأنه على الاغلب الشارع اتردم كم مرة.
اما الطرق الطويلة فمرات بتتردم حتى مستوى النظر.ودي مصيبة!!
08-18-2014, 05:47 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
الطرق العالية دي بتبقى كأنها سدود لمياه الامطار و الوديان الموسمية. و لأننا ساكنين على النيل ففي الاغلب مسارات الطرق دي بتكون موازية تقريبا لمجرى النيل. و مجاري السيول عمودية على مجرى النيل و بالتالي السد (أو الطريق) بيقطع مجرى السيل بزاوية قائمة. و زي ما وضحت في التعليقات على البوست الفات أصلا ما اتاخدت بيانات كافية في الرفع المساحي (ان صح)تكفي لتقدير كمية مياه السيل المتوقعة و بالتالي انشاء مصارف مناسبة تحت الطريق (أو السد).
السيناريو الفوق ده بالظبط هو الحصل في كارثة المرابيع و الكرياب سنة 2013.
المنطقة بيمر بيها وادي كبير اسمه وادي سوبا. مساحة الحوض بتاعه اكتر من ألف كيلومتر مربع ومصبه في النيل في المنطقة دي. المطر ملا الوادي والمويه المتجمعة من مساحة اكتر من الف كيلومتر مربع اتقفلت بي الشارع النازل من كبري المنشية و ماشي جنوب. مستوى الموية ارتفع شرق الشارع في ساعات قليلة جدا لحدت ما الموية دخلت البيوت والمواطنين بالكاد طلعو أهلهم قبل ما الموية تهدم بيوتهم و تحولهم لي مشردين في ليلة واحدة.
لو لاحظتو في الصورة الفوق في ناحية من الشارع جافة و دي جهة النيل و الموية اتصرفت فيها بصورة طبيعية و ناحية غرقانة و دي الناحية الشرقية و بيناتهم الطريق (السد) واقف كأعلى نقطة في المنطقة و الشريط الوحيد الجاف تماماُ.
الصورة في الاسفل فيها منظر جوي بعد كسر الشارع لتصريف المياه. للأسف المواطنين شافو بيوتهم بتقع قدام عيونهم بيت بيت لمدة 12 ساعة قبل ما يقدرو يكسرو الشارع و الموية تتصرف في خلال ساعتين فقط!!
في البوستات الفاتت اتكلمنا عن انه تصاميم الطرق بتتبني على معلومات ناقصة.
في الصورة دي بيظهر واحد من الطرق السفرية الشالتو الموية. لاحظو حجم الوادي وحجم مواسير التصريف. وفي الحالة دي بغض النظر عن المعلومات المتوفرة للمصمم أو المقاول لكن حجم الوادي مقارنة بالمواسير مضحك! أو مبكي.
المشكلة الأكبر انه الشارع ده مر على مهندس المقاول و مهندس الاستشاري و ممثل المالك (برضو مهندس) و كلهم وقعو بالموافقة و التسليم والتسلم!!
السبب الأساسي في حاجة زي دي في رأيي ما ممكن يكون الجهل أو ضعف التأهيل أو تدهور التعليم في البلد أو حتى المحسوبية. لأنه بصراحة انا ما متخيل أي بني ادم ممكن يعتبر التصميم ده مناسب أو عقلاني أو أنه الحصل في الصورة دي ما منطقي.
في البوستات الجاية ان شاء الله هاعلق على مجموعة من الصور البتدعم الكلام الذكرتو في البوستات الفاتت. بعدها هاتكلم عن طرق تانية للغرق على يد الحكومة.
08-18-2014, 06:06 PM
عبدالعزيز عثمان عبدالعزيز عثمان
تاريخ التسجيل: 05-26-2013
مجموع المشاركات: 4037
المحترم المهندس سامي ،،، هو ده الكلام المطلوب... تحياتي لك تنقل وتتابع وتشرح وتناقش هذه الماساة... لا اعتقد ان هناك الساعة اهم منها.. عندي اجازة اسبوع ساتابع هذا البوست معك... وكل ما يتعلق بالماساة... جلوس سيدي... الرجاء اذا امكن ذكر مناطق الصور..
08-19-2014, 04:51 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: المحترم المهندس سامي ،،، هو ده الكلام المطلوب... تحياتي لك تنقل وتتابع وتشرح وتناقش هذه الماساة... لا اعتقد ان هناك الساعة اهم منها.. عندي اجازة اسبوع ساتابع هذا البوست معك... وكل ما يتعلق بالماساة... جلوس سيدي... الرجاء اذا امكن ذكر مناطق الصور..
المشكلة يا عبد العزيز أخوي ما في زول بعدل العوج ونفس الاخطاء ستتكرر كل عام المشكلة مشكلة عدم وجود نظام او سستم في كل الدولة القائمة دي أي حاجة ماشة بالبركة وتسمع الخطة الربع قرنية والعشرية والخمسية ومجالس الجودة والاستراتيجية ولا تري طحيناً ومن اصغر غفير ولحدي أتخن وزير عارفين انهم ماشين بالبركة ، مافي زول بغلط بتتم محاسبتو او علي الاقل يقعدوا يدرسوا غلطوا ده عشان ما يتكرر تاني ، الزول المجتهد في عمله بيتم استبعاده لانو ما بمشي الامور صدقني بلدنا دي لو نزلوها الواطة ما بتنفع يتهد كل القائم ده وتتبني من اول وجديد غير كده ننتظر القيامة بس
08-19-2014, 09:49 PM
Safa Fagiri Safa Fagiri
تاريخ التسجيل: 08-10-2004
مجموع المشاركات: 3642
تسلم يا سامي يبدو لي إن هنالك معرفة بما يحدث مستندة على حقائق لذلك أعتبر هذا البوست بمثابة بحث مدعوم بوثائق مهم جداً لمعالجة هذه الإشكالات في المستقبل . الأمل هو الحل الوحيد لذلك أشجعك أن تواصل هذا البحث المثير . -صحي البتجي من السماء تتحملها الأرض- ولا يكون ذلك الا بالإستعداد والتهيؤ.
أتمنى من الله التيسير
08-19-2014, 11:19 PM
عبدالعزيز عثمان عبدالعزيز عثمان
تاريخ التسجيل: 05-26-2013
مجموع المشاركات: 4037
ياسامي واصل في ابو البوستات... درس عملي عن وعي الشعب... وتوعية وتبصير لنا وللجميع... اتمني لو الاخ بكري يعمل معروف كي ياخذ هذا البوست الهام ،،مايستحقه من الاهتمام... انا من المتابعين ارح سيدي قبل تكمل اجازتنا
08-20-2014, 04:11 AM
يوسف أبو صالح يوسف أبو صالح
تاريخ التسجيل: 03-03-2014
مجموع المشاركات: 635
شكرا يا باشمهندس على هذا العرض الجيد للممارسات الخاطئة التى أدت للغرق. يا أخى ذكرت الجملة التالية: مع العلم انه في العالم كله المعلومات دي متاحة للجميع. بل انه الشبكة الأساسية لنقاط التحكم في السودان تم انشاءها بالتعاون مع "نيما" وكالة التصوير والخرائط التابعة لوزارة الدفاع الامريكية. وانه التقارير و القيم للشبكة الاصلية كانت منشورة في كتاب نفد من الأسواق حاليا و بعد ده بعتبروها معلومات سرية!! سؤالى، هل فعلا كانت "نيما" مشاركة فى إنشاء الشبكة الأساسية لنقاط التحكم فى السودان؟ و ما إسم الكتاب الذى نفد من الأسواق ، و ما إسم مؤلف الكتاب؟ و شكرا، أخوك محمد جادكريم
08-20-2014, 07:29 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
أولاً مشكور يا باشمهندس علي تثبيت البوست ثانياً حابي أنبه لحاجة انو كاتب المقالات دي المهندس أحمد فؤاد وانا ما عندي غير أجر النقل ، عشان نحفظ للناس حقوقهم الأدبية
08-20-2014, 07:38 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: تسلم يا سامي يبدو لي إن هنالك معرفة بما يحدث مستندة على حقائق لذلك أعتبر هذا البوست بمثابة بحث مدعوم بوثائق مهم جداً لمعالجة هذه الإشكالات في المستقبل . الأمل هو الحل الوحيد لذلك أشجعك أن تواصل هذا البحث المثير . -صحي البتجي من السماء تتحملها الأرض- ولا يكون ذلك الا بالإستعداد والتهيؤ.
أتمنى من الله التيسير
تسلمي أختي صفاء علي المرور الحقائق دي أي زول اشتغل في المجال الهندسي في السودان بيعرفها بس زي ما قلت فوق اخونا احمد عرضها بأسلوب بسيط وساهل وبدون تعقيدات ومصطلحات ودعمها بالصور عشان الناس تعرف الحاصل وتعرف هي بتغرق ليه
08-20-2014, 07:42 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: ياسامي واصل في ابو البوستات... درس عملي عن وعي الشعب... وتوعية وتبصير لنا وللجميع... اتمني لو الاخ بكري يعمل معروف كي ياخذ هذا البوست الهام ،،مايستحقه من الاهتمام... انا من المتابعين ارح سيدي قبل تكمل اجازتنا
تسلم يا عبد العزيز اخوي الهدف زي ما قلت انو الناس تعرف وتفهم عشان لما يجي زول يغرقهم تاني يقولوا ليهو كفاية غرقنا بما فيه الكفاية والباشمهندس ما قصر ورفع البوست فوق عشان يصل لاكبر عدد من الناس
08-20-2014, 08:09 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: أقر نائب رئيس الجمهورية حسبو محمد عبدالرحمن بوجود أخطاء هندسية في تنفيذ طريق العوتيب شندي ووجه وزارتي الطرق والجسور والتخطيط العمراني بمعالجتها وفتح المعابر المواجهة لخط السكة حديد وتخطيط المنطقة وألزم حسبو الغرفة المركزية وشرطة الدفاع المدني بتوفير الاحتياجات الأساسية واستكمال الإيواء العاجل للمنهارة منازلهم والبالغ عددهم 86 متضرر، وأشار إلى تخصيص مبلغ 20 مليار لصندوق إعمار المناطق المتأثرة بالمحلية ودعا المواطنين إلى التعاون مع حكومة الولاية.
صحيفة الجريدة
في ذات الخصوص والاعتراف سيد الادلة
08-20-2014, 08:35 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
المرة دي ها أحاول افسر ليه المشاريع بتاعة الطرق تعتبر من المشروعات المفضلة للحكومة. لاحظو انه التفسير هنا من وجهة نظر محدودة و موضوع زي ده مفروض يتاخد من كل الجوانب.
تكلفة المشاريع بتاعة الطرق و التعاقدات بتاعتها بتكون مبنية على المواد + الزمن عادة (على الأقل في الشفتهم) و عادة الوحدة بتاعتها بالمتر المكعب: توريد المتر المكعب من الردميات بي كده. ترحيلو بي كده و ايجار الاليات الساعة بي كده.
التكلفة العالية في الطرق هي تكلفة الاليات و الردميات تحت الطريق (على الأقل في السودان) المواد بتاعة الردمية (التربة الحمراء المخلوطة بالحصحاص) أصلا بتكون مجانية من مناطق معينة حوالين العاصمة.
أول تكلفة بتكون في الحفر و تفكيك المواد من الأرض(حفار أو بلدوزر). ثم تكلفة رفعها في القلابات(لودر). بعد داك الترحيل(القلابات) و المعالجة في الموقع (بلدوزر، قريدر، درداقة).
التكاليف دي كلها مرتبطة بالكميات و عدد قليل جدا من الاليات بالساعة.
الكميات بتاعة المواد حجمها بتحسب على الفرق بين ارتفاع التصميم و الأرض الطبيعية(للتبسيط). ولو تتذكرو التصميم بتاعنا ضارب و المستويات بتاعة الأرض الطبيعية ضاربة.
أول "ضربة" في التكاليف بتجي في حساب الكميات الموردة. و دي بتتحسب بي "عد" القلابات الداخلة الموقع.
يللا كالعادة المصيبة في التفاصيل!
لمن المقاول يمضي عقد التوريد بيجيب القلابات بتاعتو و ملاحظ الموقع يقيس حجم الصندوق و يحسب سعته بالمتر المكعب. كعادة السودانيين المقاول بكون واقف ليه في حلقه و يغالطو في الحسابات و يحاول يزيد حجم القلاب و كعادة السودانيين يتدخلو الاجاويد و يخلو هنا و يقربو هنا ووو و القلاب يتحسب اكبر من سعته.
أو الملاحظ يكون "ظريف" و المقاول ما يقصر معاه و برضه القلاب يتحسب اكبر من سعته (بي كتير).
لاحظ انه أي زيادة في حجم القلاب بتكون مضروبة في عدد الأدوار البيعملها القلاب لحدت نهاية المشروع. بمعنى انه زيادة "محدودة" في سعة القلاب زي 10 في المية بتعادل زيادة (وهمية) عشرة في المية في كل الكميات الموردة و البيتحاسب عليها المقاول.
لحدت هنا دي ما الزيادة الحقيقية!
08-20-2014, 08:43 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
الفرق الكبير بيجي من افتراض انه الصندوق بتاع القلاب مليان 100%. و الحكمة التقليدية للسواقين بتوع القلابات انه القلاب ما المفروض يتملي 100% لأنه بيأثر على العربية و السسبنشن بتاعها (التعليق) بالتالي السواقين بيصرو على انه المواد تتحمل في شكل كوم فوق اللساتك الورانية. و مقدمة الصندوق و اخرو بيكون فاضي.
الملاحظ بيكون من مهامه انه يتأكد انه العربية محملة 100% و بيوقع على استلام العربية 100% أو بيعلق على تقديره لحمولة العربية و عدد الأمتار الموردة.
هنا بقى بيظهر الفساد: الملاحظ بحكم موقعه بيكون مسئول من التوقيع على استلام مئات الالاف من الأمتار المكعبة (ملايين في بعض الحالات. و شغله ما بيتراجع و المقاول مليان قروش. و الملاحظ أولا و أخيرا عامل بسيط (ولا حتى موظف) بياخد ملاليم و بيتحكم في مليارات.
بغض النظر عن الكلام بتاع الحكومة عن الضمير و الوازع الديني و الاخلاق ووو.... الموقع بتاع الملاحظ موقع حساس و مليان بالمغريات في بلد ما بترحم. وقبل ما زول يفكر انه الملاحظ مفروض يكون ملاك خلونا نتذكر انه ديننا بيأمرنا اننا نبتعد عن المغريات خشية الوقوع في الحرام و فقهائنا يقربو يحرمو الحلال "لسد الذرائع". فبعد داك نجي نخلي الملاحظ في نص المغريات و نديه مرتب لا يسد الرمق و نقول ليه خلي عندك ضمير!!
المهم واحد من الملاحظين عرض علينا انه يتصلح معانا مقابل الفين جنيه بالقديم. الوقت داك اقل من دولار.
خلينا من الملاحظ المسكين و ركز مع المقاول!!
المقاول مقابل سعر زهيد ممكن يزيد سعة عرباته بي حوالي عشرة في المية و يحملها اقل بي بما يمكن ان يصل إلى 50% على حسب علاقته بالملاحظ (الكمية الأقل بتقلل الاهلاك بتاع العربية و بتزيد سرعتها و بالتالي عدد الأدوار في اليوم) و من ناحية تانية بتزيد حجم المشروع لانه المواد "الأكلها" دي في الاخر هو زاتو هيوردها تاني.
طيب ليه الاستشاري ما هيقبض الزيادة الكبيرة في كميات المواد؟؟
المتعارف عليه في المشاريع المدنية عموما (في السودان) انه المشاريع دايما و أبدا بتتجاوز تقديراتها. فما مشكلة و ما ها حاجة جديدة.
السبب التاني انه الاستشاري ده نفسه هو نفس الاستشاري بتاع البوست الأول القال انه "لو قلت مليار و طلعو اتنين يعني شنو؟"
التالت انه ....
عرفتو ليه الناس المساكين بيشتغلو في الدهب و الجماعة بيشتغلو في التراب؟
08-20-2014, 11:20 AM
عبدالعزيز عثمان عبدالعزيز عثمان
تاريخ التسجيل: 05-26-2013
مجموع المشاركات: 4037
بوست جميل اخي سامي .. طرحك موضوعي ووذلك ينم على انك خبير في هذا المجال .. السؤال دا انا لي فترة بسألو الحكومة دي ما قادرة تحفر ليها مجرى .. ياخي خليهو المجرى ، ما قادرة تعمل متاريس .. معقول بس ..
واصل يا حبيب ..
08-20-2014, 01:53 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
السلام عليكم شيخنا يوسف ود ابوصالح تجارب أهل اليمن عريقة في التعامل مع السدود والمياه ويشهد علي ذلك سد مأرب أضخم مشروع مائي في العهد القديم كما أن طبيعة أرضهم الجبلية المتدرجة جعلتهم يبتكرون حلولاً تتفق مع طبيعة تلك الارض. بالنسبة لسؤالك حول قيام السدود والحفائر وهل يمكنها القضاء علي الفيضان فيجب اولاً ان نفرق ما بين الغرق من الفيضان وما بين الغرق من مياه الامطار فالفيضان هو ارتفاع مستوي مياه الانهار عن منسوب ضفتي النهر نتيجة لهطول امطار بكميات كبيرة عند منبع تلك الانهار او علي مسار النهر نفسه مما يتسبب في تدفق المياه خارج مجري النهر وغرق الاراضي المحيطة بمجري النهر أما الغرق من مياه الامطار فغالباً ينتج من سوء تصريف تلك الامطار اما لعدم وجود مصارف طبيعية او صناعية او انسداد تلك المصارف رغم وجودها ومعروف للجميع انو وجود المياه حول المباني وبوجود تربة تسمح بنفاذها للاساسات بيؤدي لتغيير سعة التحمل(Bearing capacity) لتلك التربة وبالتالي لسقوط ذلك المبني او هبوطه علي احسن الفروض والمشكلة الحاصلة الان في الخرطوم هي الغرق بسبب سوء تصريف المياه . السدود مهمتها الاساسية هي تخزين او تغيير اتجاه المياه بالاضافة للتوليد الكهربائي والحفائر كمان بتتخزن فيها مياه الامطار وانا بعتقد انو الحفائر والسدود بمختلف انواعها ممكن تساهم في حل مشكلة العطش في السودان خصوصاً في غرب السودان لكنها ما حتحل مشكلة الغرق في الخرطوم !
08-20-2014, 02:13 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: المقاول في تقديري لا يهتم بالسلبيات في التصميم
طيب هل يحق للاستشاري في مرحلة ما قبل بداية العمل ابداء ملاحظاته على التصميم ام عليه فقط ضمان التزام المقاول بالتصميم ؟
مولانا ود شيقوق خطوات أي مشروع كالاتي الجهة المالكة بتجيب ليها مكتب تصميم عشان يعمل ليها التصميم وجداول الكميات وبيتم طرحها في عطاء وممكن يتم طرح عطائين واحد للاشراف والتاني للمقاول ومن الافضل ان يكون الاستشاري هو نفسه المصمم حتي يتم معالجة أي قصور يظهر في التصميم اغلب الشروط الهندسية بتضع المسئولية علي المقاول في حالة أي خطأ في التصميم وتطالبه بالمراجعة والتأكد من صحتها قبل التنفيذ رغم انها مفروض تكون مسئولية الاستشاري " ام ضنباً مقطوع يحاحي ليها ربها "
08-20-2014, 09:21 PM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
Quote: شكرا يا باشمهندس على هذا العرض الجيد للممارسات الخاطئة التى أدت للغرق. يا أخى ذكرت الجملة التالية: مع العلم انه في العالم كله المعلومات دي متاحة للجميع. بل انه الشبكة الأساسية لنقاط التحكم في السودان تم انشاءها بالتعاون مع "نيما" وكالة التصوير والخرائط التابعة لوزارة الدفاع الامريكية. وانه التقارير و القيم للشبكة الاصلية كانت منشورة في كتاب نفد من الأسواق حاليا و بعد ده بعتبروها معلومات سرية!! سؤالى، هل فعلا كانت "نيما" مشاركة فى إنشاء الشبكة الأساسية لنقاط التحكم فى السودان؟ و ما إسم الكتاب الذى نفد من الأسواق ، و ما إسم مؤلف الكتاب؟ و شكرا، أخوك محمد جادكريم
سلام اخي محمد حولت سؤالك للباشمهندس احمد لانه في تخصصه وقد افاد بالاتي الكلام ده كان في الخمسينات
الشبكة بتاعة السودان جزء من مشروع انجليزي ايام الإمبراطورية. حسما للجدل حول الشكل الحقيقي للارض قررو يقيسو شكل الأرض و يعملو شبكة كنترول من الإسكندرية لي بورت إليزابيث في جنوب أفريقيا. وكل المسافة كانت في مستعمرات بريطانية.
في الخمسينات كانت الشبكة كلها اكتملت الا بين جبال النوبة و شمال يوغندا وهي أصعب جزء من الشبكة.
الامريكان كانو محتاجين للمعلومات بتاعة شكل الأرض و بالتالي شكل مجال الجاذبية حولها عشان برنامجهم بتاع الصواريخ. بالتحديد عشان الحسابات اذا قرروا يضربو موسكو بالصواريخ.
اتفقوا مع الانجليز و مسحوا الجزء الناقص مع بعض. والأمريكان استخدموا كمبيوتراتهم بتاعة الزمن داك عشان يعيدوا تحسيب الشبكة كاملة و يحسبو تصحيحاتها و كانت حدث الزمن داك. لي درجة انه كان في جهود من الاتحاد العالمي للمساحين لاعلانها كتراث انساني عالمي بمافيها عدد من النقط الفي السودان
التقرير بتاعة المسح اتنشر في اجزاء انا عندي منها اتنين.
08-20-2014, 10:34 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
لو نلقا منكم اتنين تلاتة اتا والمهندس احمد فؤاد داخل البلاد وفي مناصب مرموقة يشتغلوا بالنية السليمة ماكان جبلغ جبلغ ماتفرز الدغلوب من البريرة البارا الشايلا جناها وفارا ؟
08-20-2014, 10:55 PM
محمد جبره محمد جبره
تاريخ التسجيل: 01-12-2013
مجموع المشاركات: 940
Quote: السؤال دا انا لي فترة بسألو الحكومة دي ما قادرة تحفر ليها مجرى .. ياخي خليهو المجرى ، ما قادرة تعمل متاريس .. معقول بس ..
اخونا هشام عبادي الحكومة بتحفر المجري وبتعمل المتاريس بس ما بتعملهم بالمواصفات الصاح ولا في المكان الصاح وفوق كده بتجي تعمل شارع زلط تقفل بيهو المجري الطبيعي لمياه الامطار
08-21-2014, 11:20 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
التبرير الأساسي لإنهيار البيوت و الوفيات بين المواطنين هو انه المواطنين غلطانين و بيسكنو في مجاري السيول.
مع انه المواطنين ممكن يكون ليهم عذر في الموضوع باعتبار انه ما بتتوفر ليهم المعرفة الهندسية ولا المعلومات و الخرائط "السرية" بتاعة الحكومة. لكن الحكومة أصلا بتوزع قطع سكنية و أحياء جديدة كاملة في مجاري السيول و من غير أي دراسة للمنطقة الموزعة.
درسنا في الجامعة في المقدمة بتاعة التخطيط الحضري انه تخطيط امتدادات جديدة للمدينة أو أي مناطق عمرانية جديدة لازم تسبقه دراسات طويلة للتربة (هل بتصلح للبناء و بي ياتو طريقة و أي تكلفة و أي نوع من المباني مناسب) و مصادر المياه(الناس هتشرب من وين) و التصريف و الصرف الصحي و الطرق وكل الخدمات و المواصلات وكده. ده كله رغم اننا ما متخصصين و انا لي اتناشر سنة من الكلام ده.
في السودان معنى التخطيط هو تثبيت أربعة اوتاد في أركان القطع السكنية و بس!
08-21-2014, 11:21 AM
سامى عبد المطلب سامى عبد المطلب
تاريخ التسجيل: 01-11-2013
مجموع المشاركات: 1814
المخططات في امدرمان مثلا بتتكون من مربعات مكررة. كل مربع في نصه ميدان و كل كم بيت بيفتحو في ميدان اصغر. الشوارع مستقيمة و بتتقاطع في زوايا قائمة. بغض النظر عن المنطقة أو طبيعتها أو أي اعتبارات تانية بما فيها مجاري السيول و الانحدارات الطبيعية للمنطقة.
في وقت من الأوقات في زول صمم الشكل بتاع المربع و من يومها داك و الحكومة شغالة كوبي بيست في كل امدرمان.
كوبي بيست هنا ما تعبير مجازي. ده بالظبط البيحصل.
المهندس بيفتح الاوتوكاد بيعمل كوبي للمخطط من حي اتخطط سابقا و بيست على بعد 80 متر عرض الشارع البيناتهم وبعد داك التنفيذ على الطبيعة. والمواطن و حظه! قطعته تطلع في مجرى وادي أو حفرة أو نص شارع من الشوارع بتاعة الخلا ديك و هو وحظه. سنة سنتين من غير مطر السنة البعدها يجي السيل يشيلو برضو هو وحظه.
ياريت حتى لو الكوبي بيست بيتعمل بي اتقان. أتذكر شارع مفروض يكون 80 متر في أوله بدا كم و تمانين متر و انتهى بي كم و ستين.
المهندسين في الموقع مرات بحاولو يخففو من المصيبة و القطع الظاهر انها في مواقع خطيرة زي حفرة طلعة منها الردميات او مجرى موية ظاهر ما ببسلموها للمواطنين.
المشكلة انه الممارسة دي مجرد قرار فردي من المهندس في الموقع و ما مبني على أي دراسة أو تقديرات علمية أو بناء على خرائط المنطقة لأنه حتى مهندس التخطيط ممنوع من الاطلاع على الخرائط لأنها سرية.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سامى عبد المطلب
عبدالعزيز عثمان
Safa Fagiri
يوسف أبو صالح
الطيب شيقوق
هشام كمال عبادي
عبدالله ود البوش
محمد جبره
فيس بوك
تويتر
انستقرام
يوتيوب
بنتيريست