|
Re: عندما تعثر على (شئ) ضاع منك 20 عاما .. (Re: Kostawi)
|
الجمال صناعة البحث عنه موهبة المثابرة على ايجاده تزيد الجمال القا عن ايجاده مرتضى مازالت ترن عبارتك المكتوبة في اذني وانا حديث عهد بالباكستان اتلمس طرياق جديدا لكسب العيش عبر دراسة ظننت انها ستفيد بلدي يوما ( وهذا ما قاله لي استاذي اباكستاني العالم الجليل الان انت تخرجت كيف ستفيد بلدك من علمك ) ولم يدري ذلك المتفائل انه في نفس سنة تخرجي اختطف مغول القرن العشرين بلادي ففعلو فيها كما فعلا اجدادهم في بغداد كانت عبارتك الجميلة والصداقة والحافرة في الوجدان ( زمان كنا ما شايلين هم ولا عارفين بكرة الراجينا ) ياخ انعن اي حاجة كعبة
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: الطيب شيقوق)
|
Quote: أغلقت باب مكتبي واتصلت ب(بطرس) ، قلت له : معاك محمد المرتضى وبقيت بعدها فترة أخرسني فيه الحال وغالبني دمع أترع أودية البين وغسل خطيئة ألا تثابر في معرفة حال أحبابك..
فيصل الخليل ، لاتدع الأيام تسرقك وكافح لأجل الخُلَّص من رفاق يتوهطون في الخاطر ويتسكعون في شوارع القلب.. |
بلحيل يا ود المرتضى أما الذين رحلوا... فيكفيهم جمالاً أنهم ليسوا هنا الآن في هذا الزمن القبيح
مودتي يا رجل
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: حمد عبد الغفار عمر)
|
الأستاذ / محمد المرتضى سلام يغشاك وضيوفك الكرام نعمة الأصدقاء نعمة كبيرة لا نحسها إلا إذا تباعدت ببعضنا السنون لم يتبقى لنا من متاع هذه الدنيا سوى الأصدقاء نهرع إليهم كلما أصابنا جفاف فنبلل أحساسينا ببعض حديث وكثير ذكريات
Quote: ليست حقيقة الانسان بما يظهره لك، بل بما لا يستطيع أن يظهره، لذلك إذا أردت أن تعرفه فلا تصغ إلى ما يقوله بل إلى ما لا يقوله.
|
مقولة الرائع جبران دي وقعت لي في جرح كبير فكثيرا ما تهرب الكلمات لأنها تحس فعلا أن الموقف لا تستوعبه كل الحروف
شكرا سعادة المستشار
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: Kostawi)
|
Quote: طيب نحن نقول شنو? معثور عليه قبل مليون سنة و أصبحنا حفريات للخواجات لصناعة الخرافات و التاريخ |
والمهندس الجيولوجي كوستاوي الموظف الفيدرالي لإدارة أوباما حالة حيّة لغياب فاجر بيننااستطال لعشرين عاما ونهض بيننا (ألف باب) كان آخر لقاء بيننا بواشنطون في نهاية 1988 ، هو رفيق الطفولة منذ الصف الخامس الإبتدائي بمدرسة أمدرمان الأهلية الثانوية العامة و د. أحمد طراوه لاعب فريق المدرسة حضور ود. محمد الفاتح إبراهيم حارس المرمى يومها، باعدت بيننا السنوات التي حكى عنها يوسف في رؤيا ملك مصر. ثم التقينا بعد عقدين في 2009 في المهجر الأمريكي اللئيم فكانت السبع السمان.
يا كوستاوي، ياخ ما زلنا عنوان للشباب فتاني ما تحكي عن القفر اليباب.
.
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: د.محمد حسن)
|
Quote: يوسف الحبوب كما هو نحيف وفي اثوابه اسد هصور |
الذي يقف في يسار الصورة هو الشاب نصر الدين عبدالحفيظ وداعة الله هجام المعروف في نواحي المنبر ب (كوستاوي) رغم أنه أمدرماني قح سكن قلب أمدرمان من جماعة قدله يا مولاي حافي حالق ( ولعلمك "حافي" يعني عامل حواف بالموس للحلاقة مش حفيان راكب الظلط...) صديقي يوسف محمد عبدالقادر الحبوب الرهيف الحريف بخير وبالطبع يشبه هجام في كثير من تفاصيله ،المروءة والقلب الحار. ربنا يحفظم..
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: محمد المرتضى حامد)
|
Quote: النافذة دي هواها سخن ولو بدينا في البكاء ما بنقيف |
عارفا يا حمد، عارفا كويس.. في زول قابل زولتو الكانت أيام الجامعه بعد غياب مليون سنه ضوئية في مطار الفواجع المسمى الخرطوم.. كانت متجهة إلى الخليج وهو كطير الوروار بتاع فيروز داك في طريقه إلى أمريكا اللديحه النافست الخليج في شفط أولادنا الدرر كما لو كانت ثقبا أسودا.. إتصل بي عند وصوله ليحكي لي عن تجربة الإكتوبلازم والخروج من الجسد والحياة بعد الموت.. تقول لي بكا وهوا سخن؟
بمناسبة أغنية ( من أجلك) الموفقة الناجحه داير اقول ليك.. أغنية تغنت بها هاديه طلسم ما تجيبا بصوت زول تاني.. لأنو بالطريقه دي ستدور ( دورة الأيام ونحن مع الزمن أغراب) .. تسلم من الغياب وسموم الهوا الساخن يا حمد..
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: محمد المرتضى حامد)
|
( ، لاتدع الأيام تسرقك وكافح لأجل الخُلَّص من رفاق يتوهطون في الخاطر ويتسكعون في شوارع القلب.. )
..... يا سلام عليك يا أستاذ محمد بس الزول يسوي شنو مع البعاد الطويل ده ؟ يا محمد أنا لمان مشيت السودان بعد 12 سنة .. كان جد خايف . أمي وأخوي الكبير وخالي ماتو وأنا مافي . حقيقة حالتي كانت صعبة . عندي عمي عمرو 85 حلف الا يقابلني في البنطون . سألني مالك يا ولدي حالتك كعبة كدي ؟ قلتلو في سري .. حالي سببو موت الأهل وموت الأصدقاء وأنا في الغربة .
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: Osman Musa)
|
Quote: انا غايتو اليوتيوب عندي ما شغال في المكتب لكن مكان جاب فيسل هليل دا قطع شك بيكون فيهو خريف |
شيقا.. فيصل موجات استقبالو عندي وكذا الإرسال.... يا الطيب ، هل حصل رجعت في إجازه وفتحت مخزن البيت وفي حقيبة أو كرتونه لقيت ليك جواب غاب منك ذات صبا بخط شين سماحة الصح؟ اليوتيوب يا شيخ العرب فيهو غنية من عيار فيصل وكثير من رفاق يختصروا ويوفروا عليك ما يحتاج مجلدات لشرحه.. نوع من الناس تقول ليهو كلمه واحده بس فيعرف ما وراءها من كتب وتجارب وذكريات ولواعج وصلوات وأناشيد ودروب (مشتاق يفتش ليهو دير)..
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: محمد المرتضى حامد)
|
ا الطيب ، هل حصل رجعت في إجازه وفتحت مخزن البيت وفي حقيبة أو كرتونه لقيت ليك جواب غاب منك ذات صبا بخط شين سماحة الصح؟
لا لا يا تضى نحن زمان بنحمل الرسائل دي في عيونا ونتبادل الرسائل بعيونا وتجسد هذه التحايا الحارة و القلبية بمصافحة معاها ..............
هييييييييييييييييع كع
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: الطيب شيقوق)
|
Quote: أما الذين رحلوا... فيكفيهم جمالاً أنهم ليسوا هنا الآن في هذا الزمن القبيح |
يا معاويه .. كلامك البحرِّق دا أعزي به النفس حين يجتاحني الشوق لأناس تركوا الحياة الأرضية وانعتقت أرواحهم اللطيفة من إسار الجسد المرهق كثير المطالب.. ذهبوا إلى حيث البصر الحديد وبلغوا الحقيقة وتركونا لجهلنا بين مخلوقات لا نعرف موقعها في مملكة الحيوان أو الشيطان ، الأبرار السمحين الذين ضحكوا من أسطورة الخوف من الموت .. الخوف من الموت الذي قالت عنه مستغانمي أنه موت قد يمتد مدى الحياة.
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: محمد المرتضى حامد)
|
Quote: نعمة الأصدقاء نعمة كبيرة لا نحسها إلا إذا تباعدت ببعضنا السنون لم يتبقى لنا من متاع هذه الدنيا سوى الأصدقاء نهرع إليهم كلما أصابنا جفاف فنبلل أحساسينا ببعض حديث وكثير ذكريات |
والقال ( جيتك بانبساط صاحبي المتمم كيفي) قال كلامو دا مازح يا جعفر؟ ، الزول الفيهو ثبات عقلي ودرقتي وسيفي سترة حالي في نساي وجناي وضيفي مطمورة غلاي مونة خريفي وصيفي دا زول حكومه كاملة وراشده.. حقيبة الصحة والدفاع والمالية والشئون الاجتماعية.. والفنون معاهن يا جعفر.. الصاحب الزي دا نعمه إلهية يزيل عنك وعثاء السفر وكآبة المنظر وأدران الحاكمين والأيام.. أفقدو ، اسأل منو، ما تنتظرو يسأل لأن جبران قال في الصمت كلام..Quote: Quote: Quote: ليست حقيقة الانسان بما يظهره لك، بل بما لا يستطيع أن يظهره، لذلك إذا أردت أن تعرفه فلا تصغ إلى ما يقوله بل إلى ما لا يقوله. |
مقولة الرائع جبران دي وقعت لي في جرح كبير فكثيرا ما تهرب الكلمات لأنها تحس فعلا أن الموقف لا تستوعبه كل الحروف |
لكن تقول لمنو يا ود محي الدين... في ناس عايزنها كاش داون..
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: hassan bashir)
|
Quote: بس الزول يسوي شنو مع البعاد الطويل ده ؟ يا محمد أنا لمان مشيت السودان بعد 12 سنة .. كان جد خايف . أمي وأخوي الكبير وخالي ماتو وأنا مافي . حقيقة حالتي كانت صعبة . . |
يسوي شنو؟ رحم الله الراحلين إلى دار البقاء وجعلهم في عليين.. عارف يا عثمان اخوي، جل المهاجرين والمغتربين يتعاملون مع الأمر كما لو أنهم حتما سيلتقوا يوما بمن تركوهم في الوطن والكلام دا ما صاح؟ العمر ما أردب سمسم يا عثمان.. لاتظنن أنك ستلتقي الأحباب في الوقت الذي تقرر.. دي زي اعتقادنا أننا في لهاثنا اليومي في طريق إلى محطة (السعادة) وهي محطة متوهمة ولاتوجد إلا في خيالنا المتفائل.. المحطة هي الآن ، هي القطار الذي نركبه الآن.. الآن صل أحبابك اهلك وأصحابك وكن باراً بهم لايوجد شئ في المستقبل.. بازرعه قال ليها ( قبلي ثغري الظامئ فقد لاتنفع الذكرى).. والخواجيه المدردحه قالت : Boy drop the world And love me now Let's not wait for tomorrow وفيروز قالت ( الآن الآن وليس غدا).. كل العام وأنت بخير يا عثمان..
| |
|
|
|
|
|
|
Re: عندما تعثر على (شئ) ضاع منك 20 عاما .. (Re: حمد عبد الغفار عمر)
|
تحية..
دفء اللحن وعذوبته يصور بلا شك المشاعر التي تمور...تجسد حالة الشتات التي تلف الكثيرون منا....والبعد عن اصدقاء الحياة ....تشتتهم في بلاد الله الواسعة..منهم من انتقل الي الدار الاخرة ومنهم من ينتظر... تتلقفهم بلاد الله الواسعة ...المنافئ الباردة او الدافئة ...لا حياة في تقديري دون صديق وفي... يقرأني ويهدي الي عيوبي..اجد فيه ملاذا لحيرتي وسندا لمصاعبي..ولكن..هل نستطيع الاحتفاظ بالماء علي راحة ايادينا؟..
جادك الغيث ...محمد المرتضي... ويبقي السؤال بقاء التذكار القديم المتجدد..
| |
|
|
|
|
|
|
|