|
|
|
 Re: الناحــــر فؤادي ... والنوم إنحجــــــر (Re: خالد علي محجوب المنسي)
|
الناحر فؤادي
كلمات الشاعر ودالرضي
النَّاحر فؤادي ... مُولع جوفي حَر
أَضْرم نار وَجدي ... نَسَّام السَحر
دَامع لجَّ طرفي ... يَا أبْ طرفاً سَحر
والبَسَمْ المفلج ... للأكباد نَحر
لايَبرد حَميمي ... لَوْ أحْسي البَحَر
دَاري وماك مِداري .. ياسمح النحر
ما أطراك حِبيبي ... إلا وقلبي فَرْ
أتلظَّى وأكظم ... الغيظ الوَفر
ينعِش رُوحي طيبك ... لَو مَحيك سَفَرْ
زي مابيَّ تفعل ... ذَنبك مُغتفر
أدري البيَّ ... يامَن ساقيني الجُرر
إني المن غرامك ... عُرضة لكُل ضرر
شاغل غير شاغل ... بي سُوحك مَرر
عَلِّي أَسمَعَنَّ ... مِن فاهك دُرر
أبصر طَرفي طرفك .. حكى طرفي المطر
وقلبي كأنو طيرة ... خافق وإنفطر
أحذروا يا أحبة ... حُب الريم خَطر
يكفي البي حاصل ... مِن حالي الفطر
بان لي عيني شخصك ... والنوم إنحجر
والمايق تملَّى ... دون خاطر إنفجر
مِن فولاذ قليبك ... وكبدك من حَجَر
ما أحلاك عِندي ... إن زُر أو هَجَر
كُل أذاي يا طبيبي ... في جوفي انحسر
حُبك خلَّ عَقلي ... والعود أنهصر
مَالي إليك إلا ... قولاً مُختصر
والعند الله أقرب ... مِن لمح البصر
شادي الحفلة طَنَّ ... والأكليل سَفر
والنشاب تواتر ... لللفاطر غفر
ظبي الريم تبختر ... للأساد ظفر
معنى الحفلة كاين ... في واحد نفر
ورَّينا النشاهد ... لي دارة القمر
وأتكي في المبنى ... ولوليبو الثمر
والجيدالمحزز ... نسّفبُو العَمر
مّرة ومرة أجدعو ... في طي الضَّمر
الكتف المهدّل ... والجِسم إنتبر
والصاد والمزمزم ... والغيم والتبر
والضهر المتنّى ... والتيه الأبر
دا الخلاني ساهر ... ماء عيني تَبَر
لَاحم كتفو كفلو ... ماج جيدو الوفر
عمعم ديسو درعو ... في بعضو إنضفر
حَاكي الغيم تنقل ... يا غالي النفر
قُول للوزة غُوري ... في عَنيك ضفر
| |
  
|
|
|
|
|
|
|
|
Re: الناحــــر فؤادي ... والنوم إنحجــــــر (Re: يحي قباني)
|
Quote: والله قويه يا ود المنسي
دي بالخميس كلو
تشكر علي الجمال ده |
عباس عباسُ إذا الليل أليّل
وكيف له ولنا إن كان فيه نحر لقلوب
والعين تصرع ذا اللب
حتى لا ترى حِراك له
وتصدق يا عباس هنَّ اضعف خلق الله إنسانَ
لكن بتجيب خبر الاسود عيون الغزلان
عباس شكراً كتير على المرور البهي
تحياتي ومودتي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: بصوت المرحوم المبارك حسن بركات
مع رمية ...
تحياتي خالد و عباس ... |
قباني صاحب المزاج الحلو
وما أجمل القول من خشيم مبارك حسن بركات
عضة طرية الحروف تخرج منه
وشفت عليك الله حلاوة الرميات
حديث ناساً عَشقوا وإتقنوا فن العشق العفيف
خليك قريب يا صديقي العزيز
يسعدني وجودك يا قباني
تحياتي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
الحُب
كلمة جوفاء أصبحت لا معاني لها
في ظل تسارع الزمن ونحن نلاحق الجري نلهث وراءه لا نحن لحقنا الزمن
ولا نحن عرفنا معنى تلك الكلمة
الأحساس بالحُب من أجمل ما خلق الله
الحب كلمة شاملة
حبنا لاي شئ
حُب الله
حُب رسوله
حب الوالدين
حُب الأبن والضنى
حب الأخوان
حب الحياة
حب الناس
حب شئ بعينه أكثر من غيره
وفي الأخر الحب اللذي نقصده هنا
( حُب المحبوبة )
لو عرفنا قداسة الحُب ماعرفنا غير السعادة
مشكلتنا إننا نربط الحب بالزواج
فنلحب من أجل الحب
حُب وبس
نصدق في حبنا
نصدق في مشاعرنا
نتجرد لها
نعشها
نسعد بها وفي ندوب
نرشف .. نغوص .. نسبح في بحر سعادة الحُب
وهوانا بحري
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
نعود لأغنية
الناحر فؤادي
كلمات الشاعر محمد ودالرضي
وعلى ما يبدو من صياغ القصيدة أنه نظمها في صبية
أحبها كثير ونظم هذه الأغنية بالذات في ليلة شافها في حفل
لا أتقول عليه لكن من صياغ المفردة تستدل
قد يكون ما زعمت خطأ لكن هذا لا يؤثر ولا يهز شعرة من مفردات القصيدة التي تسمو بك
في فضاء كله حُب وعشق مفرط
ولا ننسى أن الشاعر ود الرضي قد كان له السبق بين الشعراء في تجريد محاسن المرأة
ووصف دقيق في كل تفاصيل جسدها وجماله
ولنعش بين معاني مفردة ود الرضي
في ذلك اليوم ( يوم الحفل ) ورقصة الصبية التي عشقها وهزت كُل مشاعره وسمحت بخروج أحرف ومفردة
أصبحنا نحدوا بها نسامر ما عشقنا
تواسي الذي أخفق منا
تؤنس البحب وبعيد من حبيبته
لله درك الشاعر ود الرضي وعليك رحمة الله
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
النَّاحر فؤادي ... مُولع جوفي حَر
أَضْرم نار وَجدي ... نَسَّام السَحر
الناحر
من ينحر .. نحر
والنحر هو قطع الوريدين ( الذبح )
وعملاً النحر غير الذبح
نقول ذبح الخروف ونحر الجمل
وفي الحالتين
نقطع الوريدين الفرق الأول يكون راقد والذباح ممسك بالسكين يتل الرأس ممسك بالحنجرة ليقطع الوريدين
وفي حالة النحر وعادة يكون في الجمال تقرز السكينة في الوريد والجمل واقف وبعد أن يصرع يكمل ذبحه
أي النحر يكون قبل الذبح
وهذا ما ذهب له الشاعر ود الرضي ان حب المحبوبة نحر الوريدين في قلبة ( وعندما نقول الوريدين نعني الشريان والوريد )
الناحر فؤادي ومُولع جوفي
يا من نحرتي بيدك وريدي فؤادي ( بدأ مطلع القصيدة يخاصب خِلها ورفاقه وقد يكون قصد الخطاب لها أيضا )
الناحر فؤادي
ومولع جوفي حَرْ
اي يا من اشعلت في جوفي حرارة أشد علي لهيبها وما أدارك بنار الحُب عندما تتقد في الجوف
تخليك بين السماء والأرض مددل داري وماكَ داري شو حصلك
نار الحًب وللحب نار كما له نشوة تسعد
أَضْرم نار وَجدي ... نَسَّام السَحر
ووقت السحر وقت عبادة عندما تتقلب الجنوب عن المضاجع وكذلك هو وقت تتقد فيه نار المحبوبة البعيدة
معنى وفعلا ( بعيدة بقلبها أو بعيدة مسافة وحرمت العين منها )
وفي الحالتين الألم كبير والشوق لها كم
ويدخل العاشق في ليلي بعدها والشوق لها
وتتقد وتولع في جوفه نار الحُب يذكيها نسام السحر الهابي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
دَامع لجَّ طرفي ... يَا أبْ طرفاً سَحر
والبَسَمْ المفلج ... للأكباد نَحر
لايَبرد حَميمي ... لَوْ أحْسي البَحَر
دَاري وماك مِداري .. ياسمح النحر
قبل الولوج في خِضم موج بحر هذا المقطع .. نناجي الحبيبة ونقول لها لك السلام
السلام يا روح البدن
يا غُصين النَّقا يا لدن
في المقطع الأول من قصيدة الناحر فؤادي
يحكي عن حاله الشاعر وهو في شوق دوام للمحبوبة ( قريب وبعيد )
يقول
دامع ودموع الرجال تجوز هنا
لكن نداري لاينزل الدمع جهارة لكن تحس الدمع في المايك ( العين ) تحبسه نخوة رُجولتنا وطبيعة خلقنا
دامع لَجَّ طرف
ولجَّة الطرف بتجيب لوعة
يا ابو طرفاً ساحر وسحر العيون في مُقل الصبايا
ولها وقع في النفوس
وعيوني عينك أسباب لوعتي
عيونك زي سحابة صيف
تجافي بلاد وتسقي بلاد
وأجمل عيون عندك
يا أجمل الحلوين
نجدة غريق ومنار
برجع التايهين
لديارهم الطيبة
ووحات الله ورسول مكـــة
عيونك سمحة يا ملكـــة
شعرك منتظم زي السلاسل فتلو
عينيك تكسر الحجر إن بقت شافتلّو
الطاؤوسة قاصده مشيكي ماعرفتلّو
وأعصاب من رأاك إتكهربت تلفتلّو
وقد قيل الكثير في العيون ومن العيون ما قتل
ومنها الشهلاء والعسلية والزرقاء والخضراء
والبَسَمْ المفلج ... للأكباد نَحر
البسم زينة الفم ودق وردت كلمة فاطر أو فاطرك في كثير من الشعر في بلادنا
وتعني البسمة عندما تنفر تزين الفم
الفلج : هي مساحــة صغيرة بين الاسنان الأربع في الفك العلوي وهنا جمالها
لكن لما تكون صغيرة وهذا البسم الملفج هو الذي كان نحراً في أكبادنا
ويعجبني كثيراً قول كير الدامر في
الناس عيدّت مرقت علي أصحابا
وأنا فريت علي الجاهلة السمح تِرحابا
فاطراً يحكي براق البدودّي سحابا
ولفّت قلبي زي لف طرحتا اللافحابّا
إتمنى الدهب لو لونو إشبه لونك
إشتهت الدّرر لو هيَّ تبقى سنونك
مجنون ليلى حالتو أقل من مجنونك
ما دام ليلى كانت في المحاسن دونك
لايَبرد حَميمي ... لَوْ أحْسي البَحَر
ومن الطرف الساحر ... والبسم المفلّج كان سهري وأذايَّ
وولع في جوفي حر وما ببرد الحميم الذي أتقد في جوفي وإن شرفت كُل ماء البحر
وانت ساهي لاهي وما جايب خبر
دَاري وماك مِداري .. ياسمح النحر
اي انك تدري أني بموت فيك وبحبك موت والحكمة ماك مداري اي تبوح بها وتقول عارف انو بحبني
وهنا تبدو وتظهر عفة حب ود الرضي الذي قال في نهاية البيت يا سمح النحر
لم يلومه على ذلك
داري وماك مِداري ( يا سمح النحر )
والنحر هو الجيد ( الرقبة )
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
سلام يا خالد وضيوفك الكرام
لحن الأغنية عند إبراهيم خوجلي يختلف عن لحن مبارك بركات
عند مبارك يشبه لحن الشاغلين فؤادي
وعلى الأرجح الشاغلين فؤادي جات بعدها
لكن اشتهرت أكتر منها
على العكس من كلامك بتاع إنو مبارك بركات بيديك طعم الأصالة في أداء الأغنية
أحس إنو أداء إبراهيم هو الأقرب الى الأصل
الغنية دي اللحنا منو ؟؟؟
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: بدرالدين بابكر مصطفى)
|
| Quote: سلام يا خالد وضيوفك الكرام |
وعليك السلام الفاضل
بدر الدين
Quote: لحن الأغنية عند إبراهيم خوجلي يختلف عن لحن مبارك بركات
عند مبارك يشبه لحن الشاغلين فؤادي |
مبارك حسن بركات غنى الأغنية كما غناها الجيل والرعيل الأول
كرومة وسرور والناس دي زمان مابتدي الأغنية زول يلحنها
بمسكوها براهم طق طق بخيطوها لذا تجد جُل اغاني الحقيبة تنهج نفس الوتيرة في اللحن إلا ما ندر
فناني الفن الحديث لو تأملت مسيرة كُل فنان تغنى بأغنية او أكثر من أغاني الحقيبة
وقد أداها بالطريقة تتماشى مع الأوكسترا هذه الأغنية أعتقد أن الفنان خضر بشير أول من تغنى بها مع الأوكسترا
ومن بعده إبراهيم خوجلي
Quote: وعلى الأرجح الشاغلين فؤادي جات بعدها
لكن اشتهرت أكتر منها
على العكس من كلامك بتاع إنو مبارك بركات بيديك طعم الأصالة في أداء الأغنية
أحس إنو أداء إبراهيم هو الأقرب الى الأصل |
أنا والحبيب يحى قباني قصدنا الطعم الأصل
في المفردة وقولنا هذا مسنود إلى أن مبارك ابن منطقة العيلفون التي هي دار الشاعر
ود الرضي
ولو لاحظت أخي الفاضل بدر الدين الكثير من الأغاني عندما يغنيها الفنان الذي حصل عليها من الشاعر
مفردة يغنيها بمفرداتها الأصلية دون اي تشويه
رغم أني أرى أن خضر بشير غنانها بنفس المفردة وإن غير في موضع أو أثنين فقط
لكن لو تأملت الأغاني التي يتغنى بها جيل اليوم
تجد تحريف بدرجة كبيرة في مفردة القصيدة ومش كدا وبس وبعض منهم يدخل مفردة مكان المفردة الأصلية
ويكون أن يقلب المعنى رأس على عقب
أعطيك مثال
في أغنية او قصيدة الشاعرة زينب في أخوانها
أنا فوقهم بجر كلام
البيت الأصلي يقول
عمار سوقك .. مبدر
مجرجر توبك مسبل
سبل الثوب اي جعله يتدلى ليجر بالارض وكان الثوب المسبل مدعاة للفخر
وقد نهى دينا الحديث أن يسبل الرجل ثوبه
فترى الكثير منهم يغنوها
مجرجر توبك مشبل
مكبل
وموش عارف ايه
وهنا أنظر كيف شوهوا المعنى
البيت الاصل بقول
أنا غنيت جبتَّ كلــ بو
كضبو القالوا قصوا دربو
ديل رازوهو وشافوا ضربو
زي السندالة قلبو
والسندالةهي حديد تغرز في الارض يستخدمها السمكري أو الحداد لتسوية الحديد بعد أن يحرقه في النار
التسوية بتكون ضرب حديد مسنود في حديد ( السندالة )بطلع منها صوت كبير
الشاعرة قصدت ان قلبه ثابت مثل السندالة عندما يضرب فيها الحديد
لكن ماذا قالوا هم ( اقصد من تغنوا بها في الايام دي )
ديل رازوهو وشافوا ضربو
دق السندالة قلبو
وكما قلنا صوت السندالة كبير ودقة قوية
البدق قلبه بشدة وقت الشدة والحرب دا شنو يا بدر الدين ؟؟؟؟
دا الجبـــ ان انظر كيف تغير المعنى المقصود
لذا كان قولنا من مبارك فيها طعم الأصل مفردة كما قالها الشاعر ود الرضي
| Quote: الغنية دي اللحنا منو ؟؟؟ |
لا علم والله يا بدر الدين
لكن ممكن الجميل قباني يفيدنا في هذه الناحية
لكن بالطريقة التي تغنى بها خضر بشير اكيد هو الذي أدخل تعديل على اللحن القديم ليتماشى مع الاوكسترا
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
ما أطراك حِبيبي ... إلا وقلبي فَرْ
أتلظَّى وأكظم ... الغيظ الوَفر
ينعِش رُوحي طيبك ... لَو مَحيك سَفَرْ
زي مابيَّ تفعل ... ذَنبك مُغتفر
وهل تغيب ذكرى المحبوب عن الفؤاد لحظة
حتماً لا وألف لا
لكن نشغل نفسنا عنوة بأحداث اليوم لكي نتناسى ذكراه
ذكراه مؤلمــة لما يهجر ويبتعد أو لما داري بحبنا وما مِداري أنو عارف اننا بنحبه
هنا تطفر الذكرى التي تؤلم شوقاً له عندمانأوى للمضاجع ويتباعد الرمش عن أخيه وت سهران
تهاتي وطول تنادي علي الحبيب الراحل اللذي سلب روحك وقلبك
وتناديه يازاهي يا لاهي قلبي الشلتو جيبة
وما أطارك حِبيبي
وفي حِبيبي حنية أكبر من حَبيبي
إلا ولبي فر
فرة القلب تراه كأنه ينخلع من مكانه
فجاءة تتذكر المحبوبة وجفاها ينقزك قلبك نقزة تخاله قد فارق مكانه
وبعد الذكرى تكون تلك الحالة التي مرَّ او يمر بها كل من عشق صادقاً ولم يوفق في حبه
أتلظَّى وأكظم ... الغيظ الوَفر
ولظى : أسم لنار جهنم
أتلظى اي أتحرق وأحس حميمها ( نار لظي موقدة في حشاي )
وأكظم : الغيظ الوافر وكبير في نفسي إني فقدتك يا محبوبة وأنت ليست لي
ورغم هذا لو بدأ أو نظرت محياك افيق منتلك الحالة التي كُنت عليها
وكيف لا وأنت روحي ونفسي
ينعِش رُوحي طيبك ... لَو مَحيك سَفَرْ
زي مابيَّ تفعل ... ذَنبك مُغتفر
أهجرني .. أحرمني من رؤياك أفعل ماتفعل بي
سوف تظل أنت الحبيب للقلب والعين ما بتعلى على الحاجب وحبيب الروح ما بتعادّى
افعل ما تفعل ذنك مغفور منا
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: لَاحم كتفو كفلو ... ماج جيدو الوفر
عمعم ديسو درعو ... في بعضو إنضفر
حَاكي الغيم تنقل ... يا غالي النفر
قُول للوزة غُوري ... في عَنيك ضفر |
خالد والضيوف سلام
والله ده تطريب مترف ونضم شحمان، كدى عاينوا للمقتبس الفوق ده
واتخيلوا رقيص فاتنه تثنت حتى لاحم الكتف الكفل وعادت كالعرجون القديم
او قولو كحرف الجيم(ج) وكساها شعرها الفاحم المسدل حتى لم يبقى موضع فى
الاكتاف يرى بالعين المجردة وغيرها من الاشعه تحت الحمراء وفوق البنفسجية
وتنقلت مثل الغيم استصحبوا قول شيخنا ود الرضى واعقدوا مقارنة بين تنقل التخايات
عند ود الرضى وبين قول امرؤ القيس:
كأن مشيتها من بيت جارتها مر السحاب لا ريث ولا عجل
هذه المشية المتخنتله الموقعه وصفها ود الرضى بالتنقل وقال عنها امرؤ الغيث مشية الاتروا ان
التنقل مدوزن اكثر من المشى العادى؟
هذا التنقل فى الرقيص يبذ اجعص وزة او وزينة كما نقول بدارجيتنا المعربة فلتغور الف وزة ووزة
وليظهر الحسد على عيونها وتتوارى خجلاً وتنزوى وتخلى الساحة لى وزة الله الرسلها هلاك للعباد ديل..
انى امنت بود الرضى من فحل مجود وشكرا يا خالد على هذا الالق المبذول هنا سلمتم،،،
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: صديق الموج)
|
العزيز صديق الموج صاحب القدح المُعلى في هضم معاني الشعر
لك السلام مطبوق ورحمة من الله وبركاته
Quote: والله ده تطريب مترف ونضم شحمان، كدى عاينوا للمقتبس الفوق ده
واتخيلوا رقيص فاتنه تثنت حتى لاحم الكتف الكفل وعادت كالعرجون القديم
او قولو كحرف الجيم(ج) وكساها شعرها الفاحم المسدل حتى لم يبقى موضع فى
الاكتاف يرى بالعين المجردة وغيرها من الاشعه تحت الحمراء وفوق البنفسجية |
اي والله ودوام نجد البديع وجميل في مفردات الشعر للشاعر ود الرضي الوصف الدقيق لمحاسن النساء
وكونه يلامس الكتفين الكفل في رقصتهاهذا في حد ذاته كناية عن لادنة جسدها ولينه في التثني
تنثني وتثني قلوب الخلق مع الإنفداعة والناس تقول الخلاء ولع وهييييييع الجسد اللدن صفة مطلوبة في المرأة
وشن بدور بها صبية ضهرها سيخة
وانظر ماذا قال الشاعر
لما أتاها صراخ طفلها
مالت إليه بشقٍ ...
وشقها الأخر تحتي لم يحولِ
اخي صديق كنت أظن الدروع في المرأة هي الأرداف لكن قولك قد صحح لي معلومة ولك عليها الشكر أجزله
أن دروع المرأة هما كتفيها
Quote: وتنقلت مثل الغيم استصحبوا قول شيخنا ود الرضى واعقدوا مقارنة بين تنقل التخايات
عند ود الرضى وبين قول امرؤ القيس:
كأن مشيتها من بيت جارتها مر السحاب لا ريث ولا عجل
هذه المشية المتخنتله الموقعه وصفها ود الرضى بالتنقل وقال عنها امرؤ الغيث مشية الاتروا ان
التنقل مدوزن اكثر من المشى العادى؟ |
أنظر ايضاً ماذا قال عكير الدامر أخي صديق ( الناس دي التقول مسكنونة بقولوا كلام ما يخطر على العقل )
أخدر ليهو ضُل وفوقو المحاسن شرّن
أفلج فاطرو زي برق السواري القرّن
يتقاسم مقاطع في المشي وإتحرّن
زي فرخ القطا الأماتو ركّن وفرّن
Quote: هذا التنقل فى الرقيص يبذ اجعص وزة او وزينة كما نقول بدارجيتنا المعربة فلتغور الف وزة ووزة
وليظهر الحسد على عيونها وتتوارى خجلاً وتنزوى وتخلى الساحة لى وزة الله الرسلها هلاك للعباد ديل..
انى امنت بود الرضى من فحل مجود وشكرا يا خالد على هذا الالق المبذول هنا سلمتم،،، |
ولك الشكر أجزله أخي صديق الموج على هذه الروعة في تبسيط معاني ود الرضي الحلوة
وخليك قريب مننا لتداول معاني تسمو بنا مع مفردة ود الرضي شيخ الشعراء
وقول لي الوزة غــــوري
أعجبتني كثير هذه المفردة التي أستخدمها ( غوري )
ولها معاني اكبر من اي مفردة أخرى لو كان أستخدمها في مكانها
تسلم يا ود الموج ولك الشكر اجزله
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: أعجبتني كثير هذه المفردة التي أستخدمها ( غوري )
ولها معاني اكبر من اي مفردة أخرى لو كان أستخدمها في مكانها
تسلم يا ود الموج ولك الشكر اجزله |
انت عارف يا خالد عمك ود الرضى ده عميق لدرجة الادهاش فى اختيار مفرداته.
ولكأنى به يغسل الحروف قبل ان يضمنها القصيدة او كأنه يستعمل حروف غير الثمانية
وعشرون التى نعرف، فالرجل يخيط الحروف على قدر قدود المعانى.
يعنى غورى دى معناها انصرفى الى غير ما عوده وهى غير تورى وزحى وفوتى
وامشى وامضى واذهبى وغادرى وانصرفى التى كان من الممكن استعمال ايهن
ويستقيم معها المعنى ولكن ود الرضى المشوطن و المفوه اختار غورى بحذاقة بالغة
ووضعها لتوضح المعنى المراد تماماً.
مره سألت عم محمد ود الرضى ده قلت ليه ياعم محمد انت فى قصيدة السلام ياروح البدن
بتقول:
النسيم سارقنى وركن لى تسرب نيد ( العكن ) انعشانى وهاج من سكن والعيون لا اشعر بكن
فما معنى العكن؟
قال لى: يا الصديق يا ولدى العكن ده فرتان الدلكه المتساقط من جسد المرأة بعد التدليك
يعنى عمك ده ما قال تسربت الى رائحة الدلكه ولكن قال تسربت اليه رائحة الدلكة بعد ان
خالطها العطر الطبيعى الذى يتضوع من جسد هذه الفاتنه الملهمة فزادت من ارج الدلكة عطراً
على عطرها وشذى على شذاها، فهل هنالك وصف يفوق هذا الوصف؟
يا زول ما تخلينا ننوم بسلام ياخى!!!!!!!!!!
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: صديق الموج)
|
Quote: انت عارف يا خالد عمك ود الرضى ده عميق لدرجة الادهاش فى اختيار مفرداته.
ولكأنى به يغسل الحروف قبل ان يضمنها القصيدة او كأنه يستعمل حروف غير الثمانية
وعشرون التى نعرف، فالرجل يخيط الحروف على قدر قدود المعانى.
يعنى غورى دى معناها انصرفى الى غير ما عوده وهى غير تورى وزحى وفوتى
وامشى وامضى واذهبى وغادرى وانصرفى التى كان من الممكن استعمال ايهن
ويستقيم معها المعنى ولكن ود الرضى المشوطن و المفوه اختار غورى بحذاقة بالغة
ووضعها لتوضح المعنى المراد تماماً. |
ايوا يا أخي صديق
وأنا يعجبني العمق في الشاعر
يا أخي الكلام لما يكون عادي مستحيل نسمي شعر
تعرف يا صديق للأتراك لفط قد يستخدم بمعنى امشي خلاص لكن طريقة قولها أو لفظها نفس الكلمة يمكن
أن تكون بمعنى غور ( اغرب عن وجهي )
العمق يسمو بك أن تقرأ نص القصيد
أنظر ماذا ابتدر القدال مسدار ابو السرة لليانكي
أماتي القبيل
بي حنهن لجني
كرفة وقلدة
كيف شوق اللبن رجني
كرفة وقلدة
لو قال حضنة وشمَّ ما كان لها وقع في النفس كما قوله ( كرفة وقلدة )
عمق المفردة واختيارها له الأثر الكبير في جماليات الشعر
وما دونه يمكن أن نطلق عليه مفردات منظومة لكن تفقد رنين الجرس الجمالي في المفردة التي تسمو بالشعر درجات
Quote: مره سألت عم محمد ود الرضى ده قلت ليه ياعم محمد انت فى قصيدة السلام ياروح البدن
بتقول:
النسيم سارقنى وركن لى تسرب نيد ( العكن ) انعشانى وهاج من سكن والعيون لا اشعر بكن
فما معنى العكن؟
قال لى: يا الصديق يا ولدى العكن ده فرتان الدلكه المتساقط من جسد المرأة بعد التدليك
يعنى عمك ده ما قال تسربت الى رائحة الدلكه ولكن قال تسربت اليه رائحة الدلكة بعد ان
خالطها العطر الطبيعى الذى يتضوع من جسد هذه الفاتنه الملهمة فزادت من ارج الدلكة عطراً
على عطرها وشذى على شذاها، فهل هنالك وصف يفوق هذا الوصف؟ |
نعم يا صديق لحظت أن الشاعر او بالاصح شيخ الشعراء ود الرضي له المفردة الخاصة به
العكنة : هي اي شئ تحس به لو لامسه جسمك
ضربني كعنة شدرة اي فرع طالع منها
رقدت لي في كعنة اي شئ جامد
لكن ود الرضي طوّع مفردة عكنة وقصد بها فتات الدلكة
لم اسمع من قبل من استخدم مفردة صاد ( يرمز بها للعين غير ود الرضي )
الصاد والمزمزم
ذكر لي الصديق الشاعر الدسوقي خالد وهو رجل شاعر ويتذوق الشعر ( شقيق الشاعر الجميل عليه
رحمة الله عثمان خالد شاعر يا قلبي المكتول كمد )
أن الصاد قصد بها العين وذلك من شكل رسم حرف الصاد
وأذكر أن قال لي الدسوقي بتكون عين جميلة هذه التي شبهها بالصاد
بالذات لو خطها تلميذ مبتدئ في الصف الاول ( لانه بكتب دائرة الصاد كبيرة هههههه )
لله درك شيخ الشعراء ود الرضي
| Quote: يا زول ما تخلينا ننوم بسلام ياخى!!!!!!!!!! |
ههههههههههههه
خلاص امشي نوم وأكرف العكن
لكن أوعدني ماتغيب على هذا البوست تنفحنا بالجميل من جرابك يا جميل
لك الشكر على القول السمح البطير النوم من العين
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: صديق الموج)
|
Quote: انت عارف يا خالد عمك ود الرضى ده عميق لدرجة الادهاش فى اختيار مفرداته.
ولكأنى به يغسل الحروف قبل ان يضمنها القصيدة او كأنه يستعمل حروف غير الثمانية
وعشرون التى نعرف، فالرجل يخيط الحروف على قدر قدود المعانى.
يعنى غورى دى معناها انصرفى الى غير ما عوده وهى غير تورى وزحى وفوتى
وامشى وامضى واذهبى وغادرى وانصرفى التى كان من الممكن استعمال ايهن
ويستقيم معها المعنى ولكن ود الرضى المشوطن و المفوه اختار غورى بحذاقة بالغة
ووضعها لتوضح المعنى المراد تماماً. |
ايوا يا أخي صديق
وأنا يعجبني العمق في الشاعر
يا أخي الكلام لما يكون عادي مستحيل نسمي شعر
تعرف يا صديق للأتراك لفط قد يستخدم بمعنى امشي خلاص لكن طريقة قولها أو لفظها نفس الكلمة يمكن
أن تكون بمعنى غور ( اغرب عن وجهي )
العمق يسمو بك أن تقرأ نص القصيد
أنظر ماذا ابتدر القدال مسدار ابو السرة لليانكي
أماتي القبيل
بي حنهن لجني
كرفة وقلدة
كيف شوق اللبن رجني
كرفة وقلدة
لو قال حضنة وشمَّ ما كان لها وقع في النفس كما قوله ( كرفة وقلدة )
عمق المفردة واختيارها له الأثر الكبير في جماليات الشعر
وما دونه يمكن أن نطلق عليه مفردات منظومة لكن تفقد رنين الجرس الجمالي في المفردة التي تسمو بالشعر درجات
Quote: مره سألت عم محمد ود الرضى ده قلت ليه ياعم محمد انت فى قصيدة السلام ياروح البدن
بتقول:
النسيم سارقنى وركن لى تسرب نيد ( العكن ) انعشانى وهاج من سكن والعيون لا اشعر بكن
فما معنى العكن؟
قال لى: يا الصديق يا ولدى العكن ده فرتان الدلكه المتساقط من جسد المرأة بعد التدليك
يعنى عمك ده ما قال تسربت الى رائحة الدلكه ولكن قال تسربت اليه رائحة الدلكة بعد ان
خالطها العطر الطبيعى الذى يتضوع من جسد هذه الفاتنه الملهمة فزادت من ارج الدلكة عطراً
على عطرها وشذى على شذاها، فهل هنالك وصف يفوق هذا الوصف؟ |
نعم يا صديق لحظت أن الشاعر او بالاصح شيخ الشعراء ود الرضي له المفردة الخاصة به
العكنة : هي اي شئ تحس به لو لامسه جسمك
ضربني كعنة شدرة اي فرع طالع منها
رقدت لي في كعنة اي شئ جامد
لكن ود الرضي طوّع مفردة عكنة وقصد بها فتات الدلكة
لم اسمع من قبل من استخدم مفردة صاد ( يرمز بها للعين غير ود الرضي )
الصاد والمزمزم
ذكر لي الصديق الشاعر الدسوقي خالد وهو رجل شاعر ويتذوق الشعر ( شقيق الشاعر الجميل عليه
رحمة الله عثمان خالد شاعر يا قلبي المكتول كمد )
أن الصاد قصد بها العين وذلك من شكل رسم حرف الصاد
وأذكر أن قال لي الدسوقي بتكون عين جميلة هذه التي شبهها بالصاد
بالذات لو خطها تلميذ مبتدئ في الصف الاول ( لانه بكتب دائرة الصاد كبيرة هههههه )
لله درك شيخ الشعراء ود الرضي
| Quote: يا زول ما تخلينا ننوم بسلام ياخى!!!!!!!!!! |
ههههههههههههه
خلاص امشي نوم وأكرف العكن
لكن أوعدني ماتغيب على هذا البوست تنفحنا بالجميل من جرابك يا جميل
لك الشكر على القول السمح البطير النوم من العين
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: لم اسمع من قبل من استخدم مفردة صاد ( يرمز بها للعين غير ود الرضي )
الصاد والمزمزم
ذكر لي الصديق الشاعر الدسوقي خالد وهو رجل شاعر ويتذوق الشعر ( شقيق الشاعر الجميل عليه
رحمة الله عثمان خالد شاعر يا قلبي المكتول كمد )
أن الصاد قصد بها العين وذلك من شكل رسم حرف الصاد
وأذكر أن قال لي الدسوقي بتكون عين جميلة هذه التي شبهها بالصاد
بالذات لو خطها تلميذ مبتدئ في الصف الاول ( لانه بكتب دائرة الصاد كبيرة هههههه )
لله درك شيخ الشعراء ود الرضي |
انت عارف يا خالد عمك ده استعمل الصاد ايضاً بمعنى العين فى قصيدة تلفان
ولكنه تلاعب بالجناس فى صاد لما قطعها النفس فتأمل يا رعاك الله فى قول شيخنا ود الرضى:
والع الفصاد والاحور صاد جيداً جام
قبل صاد للبيهن صاد قلباً هام
صاد الاولى بمعنى العين وصاد الثانية بمعنى رجع وصاد الثالثه من اصطاد
غايتو شيخنا ده بجهجه باكات اللغه وباكاتنا بطريقة مذهله وعنده كمية من كيمياء التطريب
بالكلام بعرفها برااااااااهو رحم الله شيخنا ود الرضى،،،
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: BALLAH EL BAKRY)
|
Quote: انت عارف يا خالد عمك ده استعمل الصاد ايضاً بمعنى العين فى قصيدة تلفان
ولكنه تلاعب بالجناس فى صاد لما قطعها النفس فتأمل يا رعاك الله فى قول شيخنا ود الرضى: |
يا صديق موج بحر خِضم
والله سكبت على البوست جمال من روعة تسر
أعجبتني قطع نفسها ( خلي يقطع نفس الصاد ونحن الصبايا ما قطعات نفسنا وبرضو نجري وننجم نشرب موية
تبل ريقنا )
والع الفصاد : هل الفصاد هي الخدود يا صديق أم ماذا لو سمحت
تلفان هذه الأغنية لما أسمعها بتتلف كل عصبة شعرة حسية فيَّ
وطبق الأكتاف علي الأرداف
غريد ونام ...
سُور الأحقاف البقرة وقاف
فوق دي الرام ...
أنت جميل يا صديق لما تغوص في مفردة شيخ الشعراء وجمال لما تقلع بها تحملها بعد أن تجترها
تلفظها ... ويكتما الأبداع فنا مفردة شيخ الشعراء وتفنيت ود الموج
Quote: والع الفصاد والاحور صاد جيداً جام
قبل صاد للبيهن صاد قلباً هام
صاد الاولى بمعنى العين وصاد الثانية بمعنى رجع وصاد الثالثه من اصطاد
غايتو شيخنا ده بجهجه باكات اللغه وباكاتنا بطريقة مذهله وعنده كمية من كيمياء التطريب
بالكلام بعرفها برااااااااهو رحم الله شيخنا ود الرضى،،، |
له الرحمة من الله ... فعلاً أبدع فنا
وإتناعس ونام مِنْ غيرِ منام
عَال يا أنام ...
مِيمين يَا لام الخاتي مَلاَم
للاقدام ....
لك الشكر أجزله يا صديق على هذه المساحة من فن الغوص في المفردة
وجود يا موج
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: يا سلااام يا موج ياخ ذكرتني بوست كنت متابعه متابعه يوميه زمان لأخونا د. احمد القرشي ...
اتذكر تماما وقفت في صاد دي ...
خليتني اكوس و اتذكر يا صديق ... لغاية ما لقيت البوست ...
ده من اجمل البوستات الاتكتبت في هذا المنبر ... |
نعم يا قباني تابعت هذا البوست
وفعلاً كان من أجمل ما كتب في المنبر
الجميل أحمد القرشي لو حدثك عن الموت اشتهيت أن تموت في الحين
وليته يعتر في هذا البوست
تجتمع فصوص العقد في المنبر
لك الشكر يا قباني يحى
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: خالد أخوي سلااام ومعزة كبيرة
لك ولضيوفك الجميلين.......
صباحكم غيم وهرع ونوَّار....
أعجبتني جدا مداخلة محمد ابو العزائم أبو الرّيش
ومداخلات صديق الموج فلهم التحيّة |
ود المقدم القدامي وهمام
كيفك يا راجل وليك حشة في غيابك
سمح الصباح عندك ( غيم وهرع ونور ) جزيت خيراً
Quote: Quote: دَاري وماك مِداري .. ياسمح النحر
قيل أجمل مافي المرأة ماتحت العنق....
مافوق النهد وتحت العنق .... الفريقة الصغيرة دي.....
البكون فيها العقيد والرمَّاي و.......
ما أطراك حِبيبي ... إلا وقلبي فَرْ
"قعدك تطوي قلبي وكل ساعة تفرُّو.... |
اي بالحيل تلك الفريقة فيها من الجمال ما يدهش ويخلي الزووول واقف مقهي
لكن في الحسان .. والله يا ود المقدم لما تشوف سلسلة الدهب متدليه مستقرة دلتها ( القلب )
بين النهدين جوة ( والله تحلف تقول سحلية وداخلة جُحر )
واما فرة القلب دي تحس بي نغزة في قلبك
وآه يا الويح ..
النا بتفارق دربي
وأاخ من نار فلانة
وجرحها النوسر بي
وشِن أسوو
آه أنا الجنيت
وقتَّا هوو ...
Quote: Quote: لَاحم كتفو كفلو ... ماج جيدو الوفر
عمعم ديسو درعو ... في بعضو إنضفر
"لي الصفقة أم رسيس مرقن بنات الحور
مرقت منَّهِن راخية القدم في فتور |
ههههههه
يا ود المقدم
ابيات من الدوبيت سمعتها زمان في صغري وأعجبني هذا البيت منها
اسف لقد تفلت مني الابيات الاربع الأولى وأذكر الذي عجبني
يقول فيه :
كفلك عطلك أمشي البنات فاتنك
Quote: مرقت مِنَّهِن راخيا القدم في فتور
وبِتْوازن رزيز الهزَّة والحنجور
الدّيس جرَّ فوق حِجْلَن رطَنْ معصور
وشُبَّال ام سماح حرَْمان علي البزُّور
تِتمايح فِريع بانة وحرير مجرور
وتتفدَّع تقول دابي وصديرها نفور |
يا سلااام حديثا سمح بالحيل
راخية القدم في فتور
يتقاسم مقاطع في المشي وإتحرن
حيرتنا يا يا ود المقدم
هل الهزة تلفتت الجيد وأهتزاز النهودي
حرّم الشعراء ديل ناس خيالهم أريتو فوق راسي الفاضي دا
للحجل صوت ( رطانة غير مفهومة ) ونزل فوقه الديس العامر عليك
أنظر كيف الزول دا ختا في حديث منظوم شعرا
الله يعمر أعلامنا لكن نحن ناساً في عاميتنا بلاغـــة
تعرف مفردة يموح بتعجبني وفيها أحس حركة اكثر من غيرها ميسان ميلان
تموح تحس بحكة جسد الحسناء يتحرك في تناغم منتظم وأخخخخخخخخ انالي الله وعيشة حمد الله
وتتفدَّع تقول دابي وصديرها نفور
البيت يا المقدم جاب خبري مع اني بقول أنا الككو الفجخ الطين لكن هنا إتفجخت أنا براي
ورقدتَّ هردبيس
Quote: Quote: حَاكي الغيم تنقل ... يا غالي النفر
قُول للوزة غُوري ... في عَنيك ضفر
"رقصة والخلوق مِنْلَمِّي
ومن عين الحسود ينجاها خالق اللِّمي
فندوك البردِّس سيدو ما بشيل عمِّي
وحنجور البكدِّس ماغطس في ألْمِي
محبتي |
ههههههههههههه
كلام حلو كتير
حنجور البكدس ما غتس في ألمي
تسلم يا مقدم وتسلم ايامك صدقتَّ لما قلت ليك رايمك
تحياتي
| |
|
|
|
|
|
|
|
|
 Re: الناحــــر فؤادي ... والنوم إنحجــــــر (Re: خالد علي محجوب المنسي)
|
| Quote: الناحــــر فؤادي ... والنوم إنحجــــــر |
نحر عديل كده الشي شنو جزارة هههههه
يسلم فؤادك من النحر يا مك بتقشمر معاك
والله لكن مبالغة ود الرضى وخاصة فى الحتة دى هبش قلبي شديد
Quote: ما أطراك حِبيبي ... إلا وقلبي فَرْ
أتلظَّى وأكظم ... الغيظ الوَفر
ينعِش رُوحي طيبك ... لَو مَحيك سَفَرْ
زي مابيَّ تفعل ... ذَنبك مُغتفر |
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: وضاحة)
|
Quote: قلبي من غرامك عرضة لكل ضرر
مساء الجمال خالدونا والضيوف |
خليلي قف نبكي بعد الحبيب الضنى
وكان القلب عرضة من غرامه لكل ضرر
وهو يدري وما مداري وساقينا الجًرر
الفاضل خليل
هناك من القصائد السودانية البتخليك مشلهت
اي تألب عليك مواجع ولكن نسمعها
مثل السجارة نعلم كل العلم أنها تؤذينا وندخنها
وقلبي كأنو طيرة
خافق وإنفطر
لك التحية والمودة أخي خليل
وشكراً كتير على الفيديووالفنان الرائع
أمدَّ الله في عمره ومتعه بالصحة
النور الجيلاني
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: Quote: الناحــــر فؤادي ... والنوم إنحجــــــر
نحر عديل كده الشي شنو جزارة هههههه
يسلم فؤادك من النحر يا مك بتقشمر معاك
والله لكن مبالغة ود الرضى وخاصة فى الحتة دى هبش قلبي شديد
Quote: ما أطراك حِبيبي ... إلا وقلبي فَرْ
أتلظَّى وأكظم ... الغيظ الوَفر
ينعِش رُوحي طيبك ... لَو مَحيك سَفَرْ
زي مابيَّ تفعل ... ذَنبك مُغتفر |
وضـــاحة يا شمس المشارق
ونحر الجزار أهوَّن درجات من إن يفطر قلب
فوقع إنفطار القلب أشد ألم من الذبح دوما ( وربنا مايجرح قليب )
لكن بنات حواء خلن الشاعر ود الرضي يقول
خلّونا نحن نتجر حديثه ونواسي نفوسنا علَّ في موت الجماعة عُرس
أبصر طرفي طرفك ... حكى طرفي المطر
وقلبي كأنو طيرة ... خافق وإنفطر
أحذروا يا أحبَّة ... حُب الريم خطر
يكفي البيَّ حاصل ... من حالي الفِطر
شكراً كتير على المرور
وخليك قريبة
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
أدري البيَّ ... يامَن ساقيني الجُرر
إني المن غرامك ... عُرضة لكُل ضرر
شاغل غير شاغل ... بي سُوحك مَرر
عَلِّي أَسمَعَنَّ ... مِن فاهك دُرر
أدري البيَّ يامَن ساقيني الجُرر
هنا يستعطف الحبيب المريود القريب في القلب
والقلب لما يعشق مابعرف يبغض
وزي ماقال الشاعر
قلبي مابعرف يعادي
أصلو مابعرف يعادي
ومهما يبدأ القسوة قلبك
تلقى بي الحنية بادي
مابعرف يعادي
ادري أي شوف انظر لحالي البي يا مِن سقيتني الألم جُررا
وشوف كنت عُرضة لكل ضرر بسبب غرامك الذي دخل دون إنزار وأحتل المكان في فؤاد
وسكن ورحل السكان
ثم عاد وقد أعياه ألم الفرقة وضنى الحبيب يحذر
ويكون مثال لغيره
أحذروا يا أحبّة
حُب الريم خطر
يكفيكم حالي البي حاصل وفيه إنفطر فؤادي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote:
والع الفصاد : هل الفصاد هي الخدود يا صديق أم ماذا لو سمحت |
خالد يا اخوى الشيخ يقصد بوالع الفصاد اى ان الفصدات او الشلوخ التى على الخد
منورة ومولعه والله يا خالد عم عتيق مره قلت ليه ياعم عتيق انتو البنات القلتو فيهم
الشعر الباذخ ده وينن؟ اقل شى تيرابن وخلفتن وينها؟ قال لى يا ابنى الحقيبة دى جاءت
بعد معركة كررى بخمسة عشر سنه وفى كررى فقدنا عشرة الف رجل فى ساعتين
والمرأة السودانية مورس عليها ابشع ما يمكن ان يمارس على إمرأة زعماً على المحافظة
على طهرها وعفتها دقو شفايفها وشلخوها وخفضت فلو ما قلنا فيهن مثل هذا من كان من
الممكن أن يتزوجهن؟
وضحك شيخنا واعقب لكن بينهن واحدات كن اجمل من ما قلنا ووصفنا واقسم انه فى زواج
فى حى البيان بامدرمان كانت العروس ترقص و كانت اخت العروس تحمل الرتينه و انطفأت الرتينه
حلف عمك قال: شاف باقى رقيص العروس بشلوخ اختها التى كانت تحمل الرتينة ، هذه هى الشلوخ التى
يقصدها عمك ود الرضى بوالع الفصاد، فكأن الشلوخ تخزن و تحتفظ بالنور مثل لمبات الطوارى التى تشحن
وتوضع فى المرافق العامة كى تعمل حين ينفصل التيار الكهربائى و بها ما يكفى لدرء خطر انقطاع
التيار المبرمج وغير المبرمج لساعات طوال..
بخصوص كلام المشوطن عبيد ده بجيه براهو..
اما ابيات الدوبيت التى عنيتها تقول:
اصلك جوهرة وجاهرنى لمعان سنك
تمشى وتنتنى يا الجاهلة بانه كأنك
فرع السيسبان من التعب كيفنك؟
كفلك عطلك امشى البنات فاتنك
لكن تأمل قول ود الرضى عن ذوات النهود والارداف التى تحز اوردة اشجع فارس، يقول شيخنا:
تعطــل البارزات ايــابا ** كمان تشحتف عريض تيابا
تهـم بسرعــه رديفا يابا ** الجمــال قال قفلــنا بــابــــــا
اى ان نهداها يصلن اولاً ويعطلن حضور هذه الفاتنه والثوب الذى ترتديها مهما
كان عريض فانه يتضاءل امام ضخامة وفخامة الارداف ويتشحتف ويقصر حتى تبان
السيقان لانه ماخد ليه شهقة او متثاءب عند الخصر و مشدود الى الخلف أوالبيت بعييييييييد
كما يقول السودانيين بلغة الرندوق، وهذه الفاتنه بطبعها هميمة لاستقبال الضيوف وبذل
القرى ولكن هذا الردف الذى تنوء بحمله العصبة اولى العزم يمنعها من استقبال الضيوف
وممارسة هذه الفضيلة..
غايتو يا خالد الزول لا يعرف يقول ليك الله يجزيك ام الله يجازيك لكن فلتكن اقربهم الى التقوى
سلمت والمتابعين،،،
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: صديق الموج)
|
Quote: أن جعل البوست فوق Quote: بدءً نشكر الأخ بكري ابوبكر
أن جعل البوست فوق
هههههههههه
خلاس يامك سموك بخيت
مبروك - ماكان اخير تمسك في المكوكية؟ |
هههههههههههههههه
والما بدورو بسمو شنو ؟؟؟؟
نشكر والشكرة سمتا
والما بقولا مو هولنا
أنا الككو الفجخ الطين
أنا الضب الوقع في العجين
وهييييييع
ومحل رهيفة تنقد
ها زول ها ما تخليني أطمبجا ههههههههههه
بقيت مسنوح ( هدّا فيك مقطوع الطاري )
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote:
لاقول لا تعليق لكي لا نفسد هذا الجمال قولاً منك
لكن تبقى فايت المشوطن شعرا ( ود القمدم لو جبتَّ لي البيت الطاشي مني دا
رمية دوبيت كان يرميها الفنان علي الأمين ود عمر
يقول فيها
طوّلنا خلاس أخبار شندي فوق ما جاتنا
................................
في صدرك مدافع تحتو البرينات راطنا
دا الفرقش كويلنا وطرشق عجلاتنا
الكويل معروف في السيارة
ربي يخدر ضراعك يا صديق الموج |
خالد ابن عمى يبدو اننا نهلنا من نفس المعين لانى من تلك النواحى واستمعت الى الامين
ود عمر و ومحمد خيرقوار وعوض الجوهرة وسليمان قلعه وود النزيهة وحميره و المرحوم كمال
الجاك بادى عم الفنانه ريماز ميرغنى الجاك و اخرين من فنانى المنطقة والمربعه تقول:
طوّلنا خلاس أخبار شندي فوق ما جاتنا
شايلنو الليل نحيب لامن اصبحت واطاتنا
في صدرك مدافع تحتو البرينات راطنا
دا الفرقش كويلنا وطرشق عجلاتنا
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: عثمان بادي في زواج خالي ( جعفر بادي الحسن ) بحكم القرابة ذهب مع السيرة لام درمان ( بيت المال )
تزوج خالي جعفر بنت حبيب الله محمد ( افتكر بتعرفهم أخت هاشم حبيب الله ورشيدة ) هم برضو أخوالنا وخالتنا
بعد نهاية الحفل كان جمع الرجال في بيت خالتنا في ود البنا |
يا ابن عمى سلام
اقصد المرحوم عصام الجاك وليس كمال الزهايمر دخل يا ابن عمى، وكل الذين ذكرت
اعرفهم بلحيل رشيدة عليها الرحمة والدة زميل المنبر والصحفى مامون التلب و شقيقتها
زوجة صديقنا صلاح حامد والمرحوم مرغنى والفنان الطروب هاشم حبيب الله
وحسن حبيب الله واخواتهم..
اها انا زاتى من هناك شرق وغرب والى الان عندنا بيت فى مربع 16 مقابل بوابة القيادة
الشمالية وجدى لامى كان فى اشلاق البوليس الى ان توفاه الله وباقى اهلنا موزعين من المتمة
حتى الصلوعاب وكثير من اهلنا مازالو فى محلاتهم فى سوق شندى وحدباى صاحب اسطول
الباصات خالنا وعييييك..
لا زلت اذكر حفلة حضرناها فى حلة البحر وكانت بقوار والله زمان مايكرفونات خورى
والله الناس بالغرب كان يصلهم صوت قوار الجميل يعبر النهر مثل الكوبرى الان ياسلام
على شندى ومع اننى بحكم عمل الوالد ولدت واتربيت فى امدرمان الا ان اهلنا مازالو موزعين
بين المربعات والثورات وباقى احياء شندى ولى عودة،،،
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
أبصر طَرفي طرفك .. حكى طرفي المطر
وقلبي كأنو طيرة ... خافق وإنفطر
أحذروا يا أحبة ... حُب الريم خَطر
يكفي البي حاصل ... مِن حالي الفطر
أبصر طرفي طرفك
الطرف هو العين وشتان بين الطرفين
حكى طرفي : اي حاكّى
ويقصد من يوم رأيتك ووقعت عيني في عينك لم تقف عيناي من الدمع
ودموع الرجال مقطعة في بطونهم حزن داخلي
وقلبي كأنو طيرة ... خافق وإنفطر
واما قلبي خلي ساكت
حاكّى في خفقانه تلك الاصوات التي تصدر من تخابت جناحي الطير عندما يطير
ويحركها وتضرب في جنبات جسده محدسة صوت الطيران
ويا ريتو لو كان خفقان وبس
إنفطر من قسوة قلبك علي ولم أفز بقلبك الجميل
ثم عاد يحذر رفاقه بعد تجربة مريرة
أحذروا يا أحبة ... حُب الريم خَطر
يكفي البي حاصل ... مِن حالي الفطر
احذروا يا رفاق
حب الريم خطر
والريم يقصد بها الحلوات من الصبايا ويحاكن ويفوقنَّ الريم جمال
ويكفيكم حالي البي وإنتو شايفنو
الجواب يكفيكم عنوانو
وها أنا ذا أكتب هذا الكلام في عشعشت فوق قلبي خيالاً خلقته لها وعشته حبا بحبي لها ولم تنزل فيه
يوما ...
وحالي يحكي حالو قولا
الحال العلي حال العدو المسكين
وحال الكتفوهو وسالَّين علي السكين
وحال الفي البحر حايشنو تمساحين
وحال الفي السِجن ماقدرولو سنين
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: انت عارف يا خالد عمك ود الرضى ده عميق لدرجة الادهاش فى اختيار مفرداته.
ولكأنى به يغسل الحروف قبل ان يضمنها القصيدة او كأنه يستعمل حروف غير الثمانية
وعشرون التى نعرف، فالرجل يخيط الحروف على قدر قدود المعانى.
يعنى غورى دى معناها انصرفى الى غير ما عوده وهى غير تورى وزحى وفوتى
وامشى وامضى واذهبى وغادرى وانصرفى التى كان من الممكن استعمال ايهن
ويستقيم معها المعنى ولكن ود الرضى المشوطن و المفوه اختار غورى بحذاقة بالغة
ووضعها لتوضح المعنى المراد تماماً. |
إنت ذاتك مشوطن يا ود الموج
دي ملاحظة ونباهة ملحوظة منك
ود الرضي نفعتو قراية الخلوة
قالوا الزول دا زمان كان بيقرأ في الخلوة في أم ضوابان
وبيكتب الشعر بالدس
بجوا الصعاليك ديك (ناس العبادي) يشيلوه منو ويدوهو للغنايين
ما عارف مدى صحة الكلام دا
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
لَاحم كتفو كفلو ... ماج جيدو الوفر
عمعم ديسو درعو ... في بعضو إنضفر
حَاكي الغيم تنقل ... يا غالي النفر
قُول للوزة غُوري ... في عَنيك ضفر
لَاحم كتفو كفلو ... ماج جيدو الوفر
وفي نهاية القصيدة وصف رقصة الحسناء وصفاً دقيق وكان كله ليخبر الحضور والمستمع والقارئ
أنها جُمعت فيها محاسن المرأة كلها
قال في رقصتها كانت كتفيها تلامس كفلها ( والكفل عندنا بالعامية بنسمي الصلب )
وفي لغة الشارع يعرف باسم القعر وحديثاً أسموه ( الدش )
أذكر جارتنا وكانت أيامها طفلة صغيرة ولها من الأخوات خمس كلهنَّ جميلات ولكن هذه كان شعرها
قصير ليست مثل أخواتها .. ذات مرة مزحت معها الوالدة عليها رحمة الله وقالت لها تعالي يا أم شعراً
قصار وما تشبهي أخواتك فردت لها تلك الصبية وقالت : يا بت بادي أنا الله شال مني الشعر وأداني القعر
هههههههههه وفعلاً كان
لامس كتفو كفلوا
وماج جيد الوفر
في رقصة البنات وصفاً تميل البنت لتبرز كفلها وتنثني جادعة اليدين للخارج قليل وتتمايل تهز الكفل
وتحرك الجيد ذات اليمين وذات اليسار والوجع الوجيع لما ترمي الشبال وشعرها يرتمي عليك
معطر بأجمل العطور خُمرة عليك الله ما بخلي الزول يقلع وياخد لي سوطين في البطان
عمعم ديسو درعو ... في بعضو إنضفر
عمعم : اي عمى وانتشر
الديس : هو الشعر
ومن أسماء الشعر أيضاً الروبة ومنها جاء الأسم أم روبة
حَاكي الغيم تنقل ... يا غالي النفر
ويطلب منها : ان تحاكي في حركتها حركة الغيم ( مر السحاب لا ريث ولا عجلُ )
وما أحلاها المرأة في مشيتها الموزونة أيقاعا
ويتقسم مقاطع في الشي ويتحرّن
وكما قال ودبادي يصف مشيت البنات لما يقدموهن ليوصلوهم لبيوتهنَّ
قال :اقيس الخطوة بي التاتاي ومشيهن
التاتاي : هو الطفل الصغير اللذي يتعلم يا دوب المشي ويشجع بكلمة تاتّي تاتّي
غالي النفر اي : يا المافي مثيلك وانت غالية ودرة بين أترابك
قول لي الوزة غوري في عينيك ضفر
اي في رقصتك مافي بنت بتحصلك في روعتها وحتى الوز سيد الرقيص اللذي البنات يقلدنه في رقصته
قولي غور وامش كدا شوف ليك شغلة غير الرقيص وما بتلحقني في الرقيص وهذا بشهادة مني أنا الشاعر ود الرضي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: خالد يا منسى كيفك يا جميل
ياخى انا اسير غنا المبدع خضر
شوف صوفية الحب دى
الرحمة للطرف الجافى النوم من الاسراف فى خطيئة الحب
و برضو قالت للخالق احسنت |
هههههههههه
منو القال ليك منسي آ زووول
كيفي عافية درت أنتو عقابكم كيفنهم
والله لا فك أسر وهذا أجمل اسر في كنف المبدع خضر بشير
فن الأعماق
بمناسبة صوفية الحب والفن
ذات مرة في لقاء بين أبوالعزائم وابو داؤود عيهما رحمة الله
قال أبو العزائم للفنان الرائع أبوداؤود
والله يا أبـ داؤود أنت كومة من فن
قلنا ليك غني غنيت
قلنا ليك أمدح مدحت
قلنا ليك سولف أبدعت وأضحكت
يا أبـ داؤود ما دوبي لينا رمية كدي
رد الجميل أبـ داؤود
طيب جيب لي جمل
وساهر طرفي وما نمتَّ
ومن يوم شفتك أعلنت
بأني اسير وسلمتَّ
وبمن سواكَّ أمنتّ
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
بان لي عيني شخصك ... والنوم إنحجر
والمايق تملَّى ... دون خاطر إنفجر
مِن فولاذ قليبك ... وكبدك من حَجَر
ما أحلاك عِندي ... إن زُر أو هَجَر
بان لي عيني شخصك ... والنوم إنحجر
والمايق تملَّى ... دون خاطر إنفجر
وفي بعض الروايات
لاح لعيني طرفك والنوم إنحجر
الحجر هو المنع عنوة ( أجباراَ )
حجر على فلان اي منع من الخروج والحرية
وهنا كان لها وقع أن استخدمها الشاعر البديع المبدع ود الرضي
لم يقول جافني النوم بل قال
إنحجر اي منعوا عنه النوم عنوة والمانع حبها والتفكير فيها ( حكموا عليه بأن لا ينوم )
وصرت أنيس البكاء ( وزي ماقلنا بكاء الرجال في القلب دمعة حزينة ) لكن يقولون العين تبكي
وهو قال المايق
وجرى دمعي بالمايق
جرى دمعي
تملّى اي إمتلئ بالدموع
دون خاطر إنفجر يجري الدمع لفراق ( الفراق هنا أنه لم يفز بقلبها )
قد تكون أحبته لكنهم عاشوا في زمان البت تجبر للزواج
مافي شئ أسمو
اي أبوي انا بحب فلان
فيها رؤوس تطير الكلمة دي
البت لي ود عمها
وبعد داك بشوفوا الباقي وكان طارت السما ما بتمرق من الحلة ولو مرقت تجيها سيرتها بي الكرعين من حلة قريبة
وكان حالهم وعمروا وولدو
ونحن في حبنا وكل ساعة طلاق
ونعلق الهم في حيلتنا الحالة بقت صعبة وهي ما إستحملت
وعيييييييك
مِن فولاذ قليبك ... وكبدك من حَجَر
ما أحلاك عِندي ... إن زُر أو هَجَر
والفولاذ هو الحديد الصلب
ويلين الحجر قلبك ما بلين
وكبد من حجر لم تتفتت لما أعانيه من ألم الحب والسهد فيك
ورغم هذا انت الحلو وكلك حلو
وما أحلاك عندي في قلبي
لو حنَّ قلبك
أو
هجرت
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
كُل أذاي يا طبيبي ... في جوفي انحسر
حُبك خلَّ عَقلي ... والعود أنهصر
مَالي إليك إلا ... قولاً مُختصر
والعند الله أقرب ... مِن لمح البصر
وما أقساه عندما يكون الطيب العلاج عندو ومابي
ويا ناس أنا راضي وهو مابي
وكيف يستوي الأمر
يشكي للحبية هي سبب الجُرح وهي الطبيب المداوي
كُلْ أذاي يا طبيبي في جوفي إنحصر
الفراق بخليك زي فاقدن مذوّذو تجرجر في التراب وهي درجة من الهيام والوله
حُبك خلَّ عَقلي ... والعود أنهصر
من حبك إختل عقلي واصبح مودّر الكلمة بتلافاها
العود : العود هو القوام والقد في الجسم وافتكر ان الكلمة الصحيحة
إنصهر
لكن نتظرلما يفتينا شيخنا صديق الموج في المعنى لو كا إنهصر
مَالي إليك إلا ... قولاً مُختصر
والعند الله أقرب ... مِن لمح البصر
غايتو أنا ماعندي ليكا قول إلا قولاً مختصر وبسيط
أني بقول
العند الله أقرب من لمح البصر
والكاتبا الله في الحجر بتقوم والقسمة لو بقت ما بنحجب مقدور
ونرضى بي المقسوم
والله فوق حن علينا
وبي هواكم إبتلينا
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: وضاحة)
|
Quote: غايتوا يا الككو الشي دا لو ماجبت سيرتوا بطنك دى اصلوا ما بتبرد ههههههههههههههههه
هو شن عرفوا بالنضم السمح دا
دا زول حبش سااااى ههههههههه |
اي بالحيل لازم أجيب سيرتو مقطوع الطاري
غيري زول بجيب خطو مافي
وأنا بريدو ومابريدو
وخلي الأسمع الكلام دا فوقي
أنا البفرتقا
كُلو ما تتلّم
أنا سمع الشين
وعفن الاندريد في الشَم
أنا فجيخ الحنضل الحاتل
نقيع السَم ...
بخُش جواها
وين ما أشم ريحة دم
وهيييييع قولي لي أنا الككو الفجخ الطين
ومحل رهيفة تنقد
أجيبو ليك منسل زي الدابي الضربتو المطر
بالاغنية دي عشقو في الهضبة بدفنو هناك زي جدنا نمر ههههههههه
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
شادي الحفلة طَنَّ ... والأكليل سَفر
والنشاب تواتر ... لللفاطر غفر
ظبي الريم تبختر ... للأساد ظفر
معنى الحفلة كاين ... في واحد نفر
شادي الحفلة اي المغني
والحفلة زمان كان ليها معنى مو زي حفلات اليومين ديل
داب ما تصل الصالة يلاقوك الناس مارقين
البنية حق الكوفير ما ينفشَّ منو ريق أبوها ترجع تنكفي بي في السرير نايمة
زمان الحفلة تبدأ بعد 11 بالليل ودي بتكون بدت بدري
صننننننننننن يصرخ ميكرفون أديب فاخوري يجيب الطاشي وينم الفنان بي رمية
تبدأ الحِسان في الخروج كيمان كيمان
الصيوان مقجوج قجة صح
الكراسي مرصوصة تتوهطها الحِسان واحدين يقولوا أريتني لو كرسي متوهطا السمحة في البنوت
لمبات الزينة
أشي أحمر وأشي اخضر وأشي أزرق وابيض تتلألأ بها فضاء الحلة
وشادي الحفلة طنَّ
اي يبدأ يغني الطرب
الأكليل سفر
اي ظهرت باقات واكاليل من ملائكة ( البنوت الحِسان )
وهنا تظهر وتبدو جلية تعمق ود الرضي في علوم القرآن
والنشاب تواتر ... لللفاطر غفر
اي كل واحد نشب عينيه ومميز ونشن علي سمحة من ذاك الاكليل
النشاب يقصد به سهم القوس
توتر اي استعد للإنطلاق يصيب الرمية صيدا
ظبي الريم تبختر ... للأساد ظفر
لكنه عاد ليعلمنا من ست الحفلة
هي الفتاة التي عناه أنها نحرت فؤاده وأولعت في جوفو حر
ظبي الريم : اي أجملهنَّ
تبختر اي تمايلت وتبخترت في مشيتها نحو الدارة ( ساحة الرقص )
وكانت ردة فعلها ذاك أنها اصابت قلوب كل الأسود التي كانت تناظرها
لي الاساد قفر اي زربها وحاشها ويريد ينقصها قنصا وقد أصاب وظفر وفاز بنزع قلوبهم كلهم
من كانوا يومها في الحفل من الصبيان
وكان جيتو لي الحق
بنقولوا :انه
معنى الحفلة كاين ... في واحد نفر
اي انها كانت كل الحفلة وانظار من في الحفل رجال وقد نبالغ ونقول بعض
من نسوة أعجاب بجمالها متوجه أنظارهنَّ نحوها
كانت هي محط أهتمام من في الحفل يومها
ومعنى الحفلة كاين على واحد نفر
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: إنت ذاتك مشوطن يا ود الموج
دي ملاحظة ونباهة ملحوظة منك
ود الرضي نفعتو قراية الخلوة
قالوا الزول دا زمان كان بيقرأ في الخلوة في أم ضوابان
وبيكتب الشعر بالدس
بجوا الصعاليك ديك (ناس العبادي) يشيلوه منو ويدوهو للغنايين
ما عارف مدى صحة الكلام دا |
أخي بدر الدين
الكلام السمح دا بسوي لصديق الموج وزة من النوم
عشان كدا بقى يزوغ
صديق الموج مسوعة في قص وتفنيد قول هولاء القوم اللذين تحتاج مفردتهم
التي يستخدموها معاجم
من ناحية أن ود الرضي درس خولاوي فهذا صحيح وغالبية شعراء الحقيبة
ومن ناحية أنه كان محارب في قول الشعر
هذا أيضاً صحيح
لكن يبقى قول ان الجماعة كانوا بجوا ويشيلوا منو القصائد ويعطوها للفنانين
دا يفتينا فيه صديق الموج
لك تحية وتقدير على المرور
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
Quote: شادي الحفلة طَنَّ ... والأكليل سَفر
والنشاب تواتر ... لللفاطر غفر
ظبي الريم تبختر ... للأساد ظفر
معنى الحفلة كاين ... في واحد نفر
|
شوف مفردة "طنَّ" ، مع الشَّادي بقت ليها تومة
والنشَّاب او الطرف الكحيل مع فاطر السَّمحة....
"البرق البِوَلْوِل قبلي يرسم ويمحه
عشان مايشيلُّو من فرَّة فويطرك لمحه
مع الدّغشية سارق وجاب دعاشتن سمحة
قلبي الغاوي شارف وشاشا ليك يا السَّمحه"
ومفردة الرَّيم بالفتح وبالكسرة كليهما ، بخلنك تآخذ قومة وتجبد نفسك
الرِّيم الغزال .....
والغزال الذي يرهب السِّباع، بطرفه الحور، دي إلاَّ عند المشوطنين..!
والرَّيم بالفتح دي الدِّعاش البارد المصحوب برائحة المطر..
"الرَّيم البِفك بعد الهجوع حسَّافِك
قطر إسنا البشيل ألبل رحيل عطَّافك"
محبتي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: عبيد الطيب)
|
Quote: شوف مفردة "طنَّ" ، مع الشَّادي بقت ليها تومة
والنشَّاب او الطرف الكحيل مع فاطر السَّمحة....
"البرق البِوَلْوِل قبلي يرسم ويمحه
عشان مايشيلُّو من فرَّة فويطرك لمحه
مع الدّغشية سارق وجاب دعاشتن سمحة
قلبي الغاوي شارف وشاشا ليك يا السَّمحه"
ومفردة الرَّيم بالفتح وبالكسرة كليهما ، بخلنك تآخذ قومة وتجبد نفسك
الرِّيم الغزال .....
والغزال الذي يرهب السِّباع، بطرفه الحور، دي إلاَّ عند المشوطنين..!
والرَّيم بالفتح دي الدِّعاش البارد المصحوب برائحة المطر..
"الرَّيم البِفك بعد الهجوع حسَّافِك
قطر إسنا البشيل ألبل رحيل عطَّافك"
محبتي |
ود المقدم سلااام
دا حديثاً بخلي الزول زي ما قلت ياخد لي قومة ومعاهاتبة لما يشرط مركبو
وشادي الحفلة طنَّ
وطنة شادي الحفلة حفزت غزالة لكي تتمختر وتعرض ما تملك من سامان ( هههههههههههههه )
وظبي الرِيم تبختر ولي الاساد غفر
ومعنى الحفلة كائن على واحد نفر
"البرق البِوَلْوِل قبلي يرسم ويمحه
عشان مايشيلُّو من فرَّة فويطرك لمحه
مع الدّغشية سارق وجاب دعاشتن سمحة
قلبي الغاوي شارف وشاشا ليك يا السَّمحه
دا كلام حلو كتير يا ود المقدم وقلبي الغاوي شارف وشاشا ليك يا السمحة
أحي انا ...
بنموت يوم في عشق الحديث في صبية سمحة
لك المودة والتقدير ود المقدم
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
ورَّينا النشاهد ... لي دارة القمر
وأتكي في المبنى ... ولوليبو الثمر
والجيدالمحزز ... نسّفبُو العَمر
مّرة ومرة أجدعو ... في طي الضَّمر
يخاطب الشاعر ظبي عندما تبختر ونزل في الدارة
ووترت نظرتها لتصيب كل صاحب قلب رهيف وكان سلاحها مشهور تحرسه تغفره دفاعاًفاطر يروي البرق
مسلطا
ورينا وخلينا نشوف لقمر مكمل في ليلته الاربعتاشر
اتكي وميل في المبنّى ( ويقصد بها الجسد اللذي انعم الله به عليه وهو خير البنايين )
لولي الطفل اي هزه لكي ينام وهنا يخاطبها اتميّل المبنّى ( الجسد ) تلولي به النهدين ( هزات ) تودي الناس في داهية
وهييييييع والخلا ولع
الجيد المحزز
والجيد المحزز برمي الول علي قفا زي ما قال ود المقدم يغرق السلسل بين طياته
والعمر : هو الشعر الغزير العامر
مرة مرة كدي اجدعي في رقصتك في الضمير المخصر الشوية تقول مديّن
وما أبدع الضمير عنما يكن يعلوه صدراً يحمل النهدين مدافع وكفل يخلي الشادي يقول
كفلك عطلك أمشي البنات فاتنك
بتكون لوحة تخلي أمثال الشاعر ود الرضي يقول ما نرضى به عنه
لله درك يا ود الرضي
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: عبيد الطيب)
|
Quote: خالد أخوي
سلاااام ومعزة |
Quote:
سلااام مطبوق يا ود المقدم جاك
وعلك عافية ونعمة درت
Quote: ورَّينا النشاهد ... لي دارة القمر
وأتكي في المبنى ... ولوليبو الثمر
وعن القمر الذي يشبه طلتها....
يقول الصديق الشاعر حنفي حاج الطيب:
طلع وجه أم سماح شقَّ الغمايم فاج
رجع عشقن قديم لي نمتي البي مزاج
أعزِّل في الكلام وانضم نجوم في تاج
أجمِّل بيهو مين الزّولة ما بتحتاج"
وجه ام سماح هو القمر...... |
تعرف يا ود المقدم أهل اوروبا يشبةن وجه البنت الحلوة بالشمس
ذات مرة والممرات كثيرة
بعد حرب البوسنة اهلك السعوديين وقع عرس في حريم البوسنة شئ بنية الطلاق وشئ
زواج مسيار رتعوا زين بجي الواحد من هناك يصل الليلة بكرة يعقدوا لي (وتركوا سيرة سيئة للعرب هناك )
في واحد وصل اليوم بكرة إتزوج ومابعرف ولا نص كلمة باللغة الصربية عشان يتكلم مع زوجته
المهم ذهبوا لمكان أقامتهم البنية جالسة في حياء تنتظر زوجها يزيح الخجل بكلمة وعمك ساكت مو عارف اقول شنو
المهم يومها القمر كان باهر قمر اربعطاشر ساق الزوجة وطلع بيها للبلكونة وقال ليها ( you ) وعند ذات
وأشار للقمر ( same ) مشيراً بأصابعه وظل يفهم فيها مسافة من زمن لما فهمت قالت :
( تي سي بودالا ) وتعني أنت واحد مجنون ابله
طلع وجه أم سماح شقَّ الغمايم فاج
تعرف يا ود المقدم هولاء الشعراء بعرفوا كيف يبثوا المؤاثرات ( مفردة ) في قلوبنا تلهب مشاعرنا
ونسبح في كلمهم الطيب
شوف كيف أختار حنفي تلك المفردتين ( شقَّ ... فاج ) فيهما من موسيقى المفردة والعمق مكانا
أغزِّل في الكلام وانضم نجوم في تاج
يغزل وينضم وفيهما حنين للماضي والحبوبات في أوقات الفراغ
Quote: Quote: و الجيدالمحزز ... نسّفبُو العَمر
مّرة ومرة أجدعو ... في طي الضَّمر
وعن الجيد المحزَّز والخصر المطوي طيْ
يقول الصديق الرائع العمدة حمد محمد حامد
عُمدة قبيلة الرواحلة من فخوذ الكبابيش:
شَبَهِك في البتارين بي عناية مغزَّز
صدرك طِيْ حِجَاب عُنقك طويل ؤمحزَّز
ابو جرحَن مغوِّر لا إنفتق لا نزَّز
ويني ووينو حت طيفو البزورني إتعزّزَ
محبتي للجميع |
وشوف عمك ود الرضي لما يغلبوا اليسوي بقول شنو
قصدت أن اكتب لك هذه الابيات لتجاريها شعراً مما تحفظ
لفطاحلة البادية في ربوعك
المريود تعال زيد النار شِعال
خلينا النشوف فشيق في فعال
قام متخلصاً إيدهو إتملَّصن
مال حتى كشف الكون صَنْ
زوزا وجاني ماشي صِرنا في إندهاش
حاكى بُو الصدير مَروحة القماش
بتعرف طبعاَ مرحة القماش لكن نشرحها لي الما سمع بيها
هي قطعة مستطيلة من قماش او شوال تربط في السقف وتحرك بواسطة
حبل يتدلى من وسطها لتحريك الهواء ويقوم بذاك الفعل صبي صغير
وعادة كانت تستخدم في المتاجر
| |
|
|
|
|
|
|
|
|
|
Re: الناحــــر فؤادي ... والنوم إنحجــــــر (Re: خالد علي محجوب المنسي)
|
الكتف المهدّل ... والجِسم إنتبر
والصاد والمزمزم ... والغيم والتبر
والضهر المتنّى ... والتيه الأبر
دا الخلاني ساهر ... ماء عيني تَبَر
الكتف المهدل لانه اكيد يحمل ديس وافر عمر
عنق طويلة محززة وهي جمال في المراة إنهل الشعر أي نزل
والجسم إنتبر
أملس ما تجد فيه ترهل وهناك لفظ مدبور وهذه تستخدم للساق يقال مدبور الساق
اي ساقها ملئ باللحم ويغطي العراقيب والعرقوب البارز صفة غير جميلة في المراة
المرأة أم عرقوب مذمومة
والصاد والمزمزم ... والغيم والتبر
الصاد يقصد بها العين وشبهها بحرف الصاد ( رسم الحرف في الكتابة بالذات لو كتبه طفل صغير فتكون
دائرة الصاد في الرسم كبيرة والعين الكبيرة صفة حميدة في العيون )
المزمزم : هو الفم دلالة على صغره الفم الصغير ايضاً محبوب زمزم الشئ أي لمَّ اطرافه
ويعني انها فها صغير وملمومة أطرافة ( ماهي جلوقا وشلاليفا واقعات )
الغيم يعني به الشفاه داكنة اللون ( من اللعس )
والتبر : يقصد بها الاسنان والتبر هو نبات ينمو في الخلاء وثمرته ناصعة البياض
الضهر المتنّى : كناية عن أنها نمت في بيت عز وترف ومغذية جيدا
والضهر المتنى حايداني سمح وبندار
فكانت مرأة جامعة لكل مناحي الجمال وتفوقت في جمالها على أترابها وأندادها
دا الخلاني ساهر ... ماء عيني تَبَر
وكل هذا الجمال هو الذي طيّر النوم من عيني وفرق الرمش من بعضو
وخلّى عيوني تملا من الدمع وتفرغ
وتبر معناها : إمتلا وفاض
| |
|
|
|
|
|
|
| |
خالد علي محجوب المنسي
abas
يحي قباني
محمد أبوالعزائم أبوالريش
عبدالعزيز الفاضلابى
بدرالدين بابكر مصطفى
صديق الموج
عبيد الطيب
BALLAH EL BAKRY
khaleel
وضاحة
Osman Musa
جلالدونا
فيس بوك
تويتر
انستقرام
يوتيوب
بنتيريست