|
|
 هوايل ومقالآت شغلي الجديد ...
|
الضُحى اللعلم، جانا الخبر شايلوا السلك، قالوا في شركة بتدفع 22$ وزقة في الساعة.
أها قلت كدي إتوكلتَ ومشيت قدمتَ. رغم إني عارف حظي كُج، لكن حكمة الله أخدوني.
قلت يا ود المدير بسسس، دا الغِنا لجنا الجنا زااااتو. أها، قلت كي لملمت عِديدتي وشديت
الرحال لمدينة كالقري، رغم كجنتي للمدن الكبيرة. الجماعة في أمِش وتعال، قعدوني
قريب شهر عاطل لآمن الفلس بيّض وفقّس في هديماتي. أها بعد فترة جو قالوا، نمش ناخد
كورس مع شركة المواصلآت التابعة للمدينة. مشيت لقيت أخدوا معاي أربعة تنفار،
خواجية ماااااكنة وثلآثة باكستانيين. ناس المواصلآت تب ما قصروا معانا، وأكرمونا حد
الكرم، اولاً بالتبادي الجبنة مدورة طوّل اليوم، واوّل ما نصل الصباح بيكون مع الجبنة
في طبق فوآكه، وساعة الغدا بيجيبو لينا سندوتشات. اوّل يوم السندوتشات كانت شاورما
بقر وجداد معاها طعمية. أنا بريد الطعمية رحت خاشي فيها قبل الناس ما يجو، والمدرس
والخواجية لهطو باقيها قبل الباكستانيين يجو. أها، الباكستانيين وكت جو لقو اللحمة
والجداد قالوا، ما بناكُلن عشان ما حلآل. قُتلهم أختوهِن بس، وقعدنا فوقِن أنا والخواجات
عدمناهِن نفاخ النار. وآحد من الباكستانيين وكت قرصت معاهو مرق تلفونو وضرب لناس
الكفتيريا سألهم طلعوا لبنانيين، قالوا ليهو اللحمة والجداد اللِتنين حلآل. قالوا، خلآس تاني
بناكُلِن. قتلهم وِلآد الهِرمة ما كان تصوموا.
قضينا تلآتة يوم جبنة وفواكه وسندوتشات وحاجات فرايحية. في اليوم اللآخير جونا ناس
الشركة أخدونا مطعم، أنا قلت كدي نزلّت طلب الجداد المُو خمج، واصحابي الباكستانيين
أكلولُن لغاويساً كدي ما بعرفن كيفنهِن ؟!.
|
|
 
|
|
|
|
|
|
|
 Re: هوايل ومقالآت شغلي الجديد ... (Re: معاوية المدير)
|
أها، بعد دآك قالوا نطلع تدريب مع السواقين القُدام. طبعاً شغلنا دا ترحيل مع ناس الصلآت
الطيّبة. طلعوني تدريب مع مرا من نسوان اللصفر، قالت لي، إنت سوق وانا بوريك تسوي
شنو. أها، بقيت انا سايق والمرا دي تضاير في ناس الصلآت الطيّبة وترفع فيهُن في العربية،
وواحدين منهم فوق كراسي متحركة. فضلنا ننقُل ونفضي، ونفضي وننقُل لآمِن انا دخت من
السواقة، نعمني ماني متعود علي زحمة المُدُن الكبيرة وكترة العربات في الشارع. وكت
الساعة بقت تلآتة انا إنعصرت عصرة شديدة خلآس، أها، قلت كدي إنحرفت من خط السير!.
المرا قالت لي، ماشي وين دا ما دربنا ؟. قُتلها، اصبري بس، وقلت كدي بركنت العربية في
باركن سوق كان قريب مني ونزلت. قُتلها، يا مرا هوي، تعالي سوقي عربيتك دي، إنتو دايرين
تكتلوني واللآ شنو ؟، وضربت للشباب تلفون جو وصلوني البيت.
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
اليوم التاني ناس الشركة أدوني المفتاح وقالوا لي، أركب الظلط براك. قُلت كدي ربطت دحشي في
العربية وبقيت مارق. (الدحش)، الـgps طبعاً ماني عارف التدعك في المدينة ومعتمد عليهو إعتماد
كامل شامل، وهو يختا ويصيب معاي. لخبطت الدنيا كولها وأنا براي إتلخبطت وطشيت زي ستين
طشة، وفضلت لآفي في الشوارع لا قهوة لا أكل لا شراب، وحات الله حتي الحمّآم دا غلبني أصلو،
الكلآم دا من الساعة 5 صباحاً لعِند الساعة 6 مساءً، اليوم التاني نفس الشي، واليوم التالت كذلك.
طوالي مشيت الشركة، قتلهم يا ناس هوي، دايرين تفطصوني ؟. اولاً بالتبادي تدوني يومين إجازة،
ثمّ تانياً اليجي معاي زول يدربني.
أها، قاموا أدوني يومين إجازة وفي اليوم التالت ركب معاي مدرّب، وقلنا كدي خترنا. يومنا دآك
ما خلينالنا زول من جماعة الصلآت الطيبة ما نقلناهو، مشيت البيت بي فلآيت وعضامي ديل كلهن
مرضرضات وجسمي دا كلللللو يسوي في التح.
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
بعد تدريب لمدة يومين تاني أدوني المفتاح وطلقوني براي في الشوارع. نهرت الدحش وقعدت أنقُل
في ناس الصلآت الطيبة، والدحش مرّة يوصلني ومرآت يجهجهني، والحكاية طبعاً مربوطة بزمن،
وانا في المساسقة والجري والشلهتة لا قِدِرت دخلّت لي لُقمة في خشمي لا جُغمة موية لآمن إنتهيت
وقلت سلآم يا أهلي، واليوم التاني نفس الشي.
أها، في اليوم التالت شوية سلَكتَ حتي كمان لقيت لي فرقة إشتريت لي سندوتش جداد معاهو شرايح
بطاطس، وكباية بيبسي كولآ بتلجا. قلت كدي بِسراع بِسراع رميت لي بطاطصايات في حلقي وكشحت
لي فوقن جُغمة بيبسي، وقلت كدي نهرت عربيتي علي الجماعة. مشيت لقيت خمسة منتظرني، أربعة
عاديين ووآحد كرسي متحرك. طبعاً بتاع الكرسي المتحرك دا داير ليهو زمن عشان الوآحد يربطو قبل
يطلع، وانا جعان داير اخلص سريع سريع كان ألحق لي لُقمة. أها، وآحد يبدو عليهو الهدوء التام والعقلآنية،
دا ركب قدآم، ومرتين ووآحد تاني ركبو ورا. بعد تممت عليهم ومليت أوراقي مشيت لبتاع الكرسي المتحرك،
لقيتو زول مانع وكرسيهو مانع زيو. سألتو، يا زول إنت فلآن ؟. قال لي، ايآ. طوالي لزيتو وربِطك ربِطك
ربطتو وداير امشي علي سندوتشي كان جاني وآحد من شركة تانية قال لي، يا زول الزول دا ما تبع شركتكم،
دا تبعنا. راجعت الأوراق لقيت كلآمو صُح. قلت دي شقاوة شنو الوقعت فيها دي ؟. فكفِكك، فكفِكك، فكفكتو
ورجعت تاني أشوف زولي لقيتا مرا. اخدتها، اها ما مشينا ختوتين كان كرعيها ديل إتشنجن وقعدت ترجف !.
قالت لي، أمسك لي رُكبي، أمسك لي رُكبي. بخُلعة شديدة كنكشتلآ في ركبينا. بعد شوية هِدت دفرتها وعلي
العربية، ربطتها ومشيت عشان ادوِّر اطلع. قعدتي في الكرسي وقبل ما ادوّر العربية مديت إيدي عشان
اشيل لي حتة بطاطصاية كان القالكم زولي القلت عاقل ضرب السندوتش والبطاطص ويِجغّم في البيبسي
بمزاج. غضبت جِنِس غضب !، غِضبت جِنِس غضب في الدنيا دي !، وما فضل لي عِلآ اقطّع هدومي
وما عرفت اقولوا شنو زاتو ؟، كان هو عاين لي وبكل هدوء قال لي، الحاجات دي ظريفة، جبتها من وين ؟.
باقي الجماعة في العربية كأنوا ما حصلت حاجة، كانوا عاديين لأبعد حد والموقف لم يهز فيهم شعرة.
قطعّت الحكاية دي في حناني ودورت العربية. وآحدة من النسوان قالت لي، حا تنزلني انا أوّل؟.
ما إشتغلت بيها طلعت طوالي. حسب الجدول العندي نزلّت بتاعت الكرسي اوّل والزعل داير يكتلني.
اوآت دورت العربية المرا سعلتني، الدور الجاي انا ؟.حسب زهجتي إطارشتها، والزول اللكل السندوتش
راكب معاي قدآم وعادي كأنوا ما عمل حاجة، ودا السبب الحماني إتفشا. نزلّت وآحد تاني، اوآت دورت
سعلتني، الدور الجاي انا ؟. طنشتها. نزلّت البعدو، دورت العربية ما قالت شي !. فضلو هي واللكل
السندوتش وفضلنا كلنا ساكتين، وانا موجوع داير اطِق.
محل ساكن اللكل السندوتش دا الدحش طشَّ وأخدلو دقسة، كان الزول اللكل السندوتش قعد يوصف لي !.
قُتلو، إنت وكت عندك معرفة قدُر دي ماكل أكلي مالك ؟، وحركتو دي زادتني مغسة زيادة. قبل نصل
بيتو المرا سعلتني، الدور الجاي انا ؟. بزعل شديد جداً قتلها، حا انزّل الزول دا، وإنت آخر حاجة عشان
نِقتك الكتيرة دي. كان قالت لي، نآن انا والزول دا ما ساكنين سوا .
هههههههههههههههههههههههههه، فقعتها ضحكة كأن لم أضحك من قبل. قتلهم، إنتو يا ناس الصلآت
الطيّبة تفقعونا وتفشونا، الله يديكم العافية.
ود المدير...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
عزيزي ونور عيوني ود المدير
ياخي اول حاجة سلام عليكم
تاني شئ، حرم ليك وحشة
كل سنة وانت طيب وعام سعيد عليك ان شاء الله والاسرة الكريمة
كان هذا العيد مناسبة سعيدة وطيبة جمعتنا في رحاب جدة بالعزيزين حيدر ووليد وطبعاً لم تخلو من سيرتك العطرة .
الفترة الماضية وحتى الان ولمدة اسبوعين اخرين انا مدعوك دعك الصح في الشغل وماسك كمان شغل واحد في اجازة، فما لاقي وقت ادخل المنبر الا امس لقيت لي فرقة صغيرة كده.
للمعلومية
حيدر الزين اشترى توسان موديل 2014 وكاش داون زي ما قال لي، جاب القروش من وين ابى يوريني 
ربنا يبارك ليهو فيها ويديهو خيرها ويكفيهو شرها وما شاء الله تبارك الله.
بجيك راجع بعد ما اشوف الدولار الكندي بساوي كم بالريال ويوميتك بتطلع كم عشان نشوف زكاتك بتكون كم
مشتاقون والله
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
هههههههههههههههههههههه
والله يا ود المدير الله يديك العافية
ضحكتني ضحكاً طوللللت ما ضحكتو والله
لكن بيني وبينك حركة الزول الاكل السندوتش بايخة
بالذات لما الزول يكون جيعان شديد والسندوتش سمح وعاجبو\
تحياتي
وربنا يجعل ايامك كلها ضحك وسعادة
| |
|
|
|
|
|
|
|
|
|
Re: هوايل ومقالآت شغلي الجديد ... (Re: حيدر حسن ميرغني)
|
Quote: حيدر الزين اشترى توسان موديل 2014 وكاش داون زي ما قال لي، جاب القروش من وين ابى يوريني
ربنا يبارك ليهو فيها ويديهو خيرها ويكفيهو شرها وما شاء الله تبارك الله. |
الأخوان ود المدير و ود الفكي و حيدر و هيثم
لكم عاطر التحايا
مبروك العمل الجديد و ربنا يوفقك و طبعاً أنا شاهد على موضوع التوسان لكن يا ود المدير حقيقة ود الفكي مبسوط عشان توسان حيدر بس موجوع شديد في قصة الكاش داون دي
| |
|
|
|
|
|
|
|
|
|
Re: هوايل ومقالآت شغلي الجديد ... (Re: محمد عمر الفكي)
|
Quote: بمناسبة الانبهال دي
عندي شغلة مع ود الباوقة بهناك، لو تمت عييييييييييييك، البسلم علي فيكم بركبو عكاز |
ود الفكي سلام
يا زول عقلك و فطنتك راحت وين؟ الجماعة ديل نظامهم بياكلو براهم ما بدو لي زول فرقة الا كان واحد مغفل نافع يستفيدوا منو و بعد داك يبيعوا و يرمو زي الما حصل حاجة ياخ ديل باعو شيخم الترابي ما يبيعوك انت؟ يا زول اخير ليك ابعد من السكة دي و كان داير ليك فايدة امسك في زول الكاش داون ده بجيهك
| |
|
|
|
|
|
|
|
|
|
Re: هوايل ومقالآت شغلي الجديد ... (Re: ALWALEED ALSHEIKH)
|
| Quote: يا زول عقلك و فطنتك راحت وين؟ الجماعة ديل نظامهم بياكلو براهم ما بدو لي زول فرقة الا كان واحد مغفل نافع يستفيدوا منو و بعد داك يبيعوا و يرمو زي الما حصل حاجة ياخ ديل باعو شيخم الترابي ما يبيعوك انت؟ يا زول اخير ليك ابعد من السكة دي و كان داير ليك فايدة امسك في زول الكاش داون ده بجيهك |
هسع في ذمتك في داعي للاحباط دا؟
كدي باركها يمكن تلفق من جاي لا جاي !!!
يمكن دايرين كوادر جديدة؟
اسمع
ناس المستقلين ديل نظامهم شنو؟ عندي ليهم بدالات عجلة فونيكس جديدة لنج؟ التلجة البتقول انا انا ما بتفط لها فرد خبطة
| |
|
|
|
|
|
|
|
|
|
Re: هوايل ومقالآت شغلي الجديد ... (Re: ismeil abbas)
|
Quote: اسمع
ناس المستقلين ديل نظامهم شنو؟ عندي ليهم بدالات عجلة فونيكس جديدة لنج؟ التلجة البتقول انا انا ما بتفط لها فرد خبطة |
النصيحة يا ود الفكي الناس ديل أنا متابعهم لي 32 سنة يوم واحد ما دفعو لي حاجة يدفعوك بس
لكن الشهادة لله أخوان بنات جد و بتلقاهم في الحارة و خوتهم صادقة و كلامهم و فعالهم سمحة و مكملين الرجالة. الكلام ده كان بقسم معاك مافي مشكلة تعال بدون بدالات بس خليك جاهز للدفع.
| |
|
|
|
|
|
|
|
|
|
Re: هوايل ومقالآت شغلي الجديد ... (Re: ismeil abbas)
|
Quote: يا سلام يا ود المدير ياخي دي شغلانة فيها أجر كبير خلاص و عايزة واحد ود حلال و مفعم بالإنسانية زيّك
مبروك عليهم هم يا زول اللقوك انت
ما تنسى حسبة ود الفكي عشان نشوف الزكاة و الذي منو :) |
الاخ جرجير
مداخلتك مشكورة وتاني ما اشوفك بهنا!!! عندك عندنا شنو؟ وانسانية ود المدير دي ما شفتها الا لمن ربنا فتحها عليهو؟ وكتو الكان صلعتو والنجم خبرو ما بتاخدوهو
اما عجيبة ننحل من ود الباوقة تجينا انت
بس صراحة مدخلك الانساني دا كيفني في طايوقي دا
سمعة
ياخي نورت البوست
| |
|
|
|
|
|
|
|
|
|
Re: هوايل ومقالآت شغلي الجديد ... (Re: محمد عمر الفكي)
|
| Quote: في الحتة دي، احيلك للناس اللعبو معانا حريق وقعدوا في يمين زولك دا |
صراحة أحبطتوني انت و حيدر واحد جاى من الحج و التاني ملازم ليهو حجاج جايين من السودان
و بعد ده يا مسخوتين قاعدين تلعبو ليكم في حريق طاعم
بتوبو متين؟
| |
|
|
|
|
|
|
|
|
|
Re: هوايل ومقالآت شغلي الجديد ... (Re: ALWALEED ALSHEIKH)
|
Quote: حيدر الزين اشترى توسان موديل 2014 وكاش داون زي ما قال لي، جاب القروش من وين ابى يوريني
ربنا يبارك ليهو فيها ويديهو خيرها ويكفيهو شرها وما شاء الله تبارك الله.
|
وانا مستغرب في سر اخفاءو ؤ عدم ظهورو
اتاريهو... خريفو ما كضاب
مبروووووووووك يا ود الزين ياخي تقدقد لساتكا بي ضهب العافية ان شاءالله
يديك خيرا ويكفيك شرها
بس طل بي هنا شوية كمان ما تعملا ظااااهرة كدا ياخي
تحياتي لكم جميعاً
| |
|
|
|
|
|
|
|
|
|
Re: هوايل ومقالآت شغلي الجديد ... (Re: ALWALEED ALSHEIKH)
|
Quote: حيدر الزين اشترى توسان موديل 2014 وكاش داون زي ما قال لي، جاب القروش من وين ابى يوريني
ربنا يبارك ليهو فيها ويديهو خيرها ويكفيهو شرها وما شاء الله تبارك الله.
|
وانا مستغرب في سر اخفاءو ؤ عدم ظهورو
اتاريهو... خريفو ما كضاب
مبروووووووووك يا ود الزين ياخي تقدقد لساتكا بي ضهب العافية ان شاءالله
يديك خيرا ويكفيك شرها
بس طل بي هنا شوية كمان ما تعملا ظااااهرة كدا ياخي
تحياتي لكم جميعاً
| |
|
|
|
|
|
|
|
|
|
Re: هوايل ومقالآت شغلي الجديد ... (Re: Haytham Ghaly)
|
| Quote: و بعد ده يا مسخوتين قاعدين تلعبو ليكم في حريق طاعم |
حزبكم دا رضينا بفلسو اها جبتو ليكم اشانة سمعة كمان؟
يا حيدر
عليك الله الحق ارقع هيثم غالي دا بحاجة، الزول دا شدة ما متضايق بقى يدبل في المداخلات
هيثم
انت اخو بطرس؟
| |
|
|
|
|
|
|
|
|
|
Re: هوايل ومقالآت شغلي الجديد ... (Re: حيدر حسن ميرغني)
|
Quote: عزيزي ونور عيوني ود المدير
ياخي اول حاجة سلام عليكم
تاني شئ، حرم ليك وحشة
كل سنة وانت طيب وعام سعيد عليك ان شاء الله والاسرة الكريمة
كان هذا العيد مناسبة سعيدة وطيبة جمعتنا في رحاب جدة بالعزيزين حيدر ووليد وطبعاً لم تخلو من سيرتك العطرة .
الفترة الماضية وحتى الان ولمدة اسبوعين اخرين انا مدعوك دعك الصح في الشغل وماسك كمان شغل واحد في اجازة، فما لاقي وقت ادخل المنبر الا امس لقيت لي فرقة صغيرة كده.
للمعلومية
حيدر الزين اشترى توسان موديل 2014 وكاش داون زي ما قال لي، جاب القروش من وين ابى يوريني
ربنا يبارك ليهو فيها ويديهو خيرها ويكفيهو شرها وما شاء الله تبارك الله.
بجيك راجع بعد ما اشوف الدولار الكندي بساوي كم بالريال ويوميتك بتطلع كم عشان نشوف زكاتك بتكون كم
مشتاقون والله |
ود الفكي يا فردة.
يا اخي سلآم كيمان كيمان،
أما الشوق فمن هنا لعندك.
يا اخي إن شاء الله متلمين في حضرة المصطفى عليه أفضل الصلآة والسلآم، ويطراكم
رب العباد في ملاء خير.
قلت لي الجنا إشترالو شنو ؟. مِحن والله !.
أها، إنت الزكاة دي واقع تحت ياتو بند فيها ؟، غايتو صاحبك ود الزين مرق منها ومعاهو
وآحد تاني قالوا مسويلهُن بقالآت في اتبرا. والله صحي. اللتنين ديل امرُقُن لي برررا، وكان
فتشتني أنا في بوصة رقبتي دي بتلقاني براي مستحقها.
أمِش شوف زكاة المليارديرات، مالك ومال المُصماص...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: علي محمد الفكي)
|
Quote: يا زول مشيت جاتني عجوز يمكن عُمُرا
خمسين سنة، |
ما عصرت علينا شوية كده يا معاوية ؟
( عجوز ) و عمرها ( 50 ) دى .... غايتو و الله بيبسيك القبيل داك ما يبلعها ...
يمين زى الجريتنا خمسين يا حبيب ...
بنلاقيك في ملف غايتو ...
| |
|
|
|
|
|
|
|
|
Re: هوايل ومقالآت شغلي الجديد ... (Re: يحي قباني)
|
قلنالك دشليونين مره .
أقع دبي وعالم الدفار المتسوبيشي بس أنت رأسك قوي .
صدقني ماهيتك هنا حتروح كباب وحمص HALAL ساكت .
وحترجع الباوقة ضهرك مكردس وصاري عينك . و لا حق تمباك و لا حتي حق بنطون .
والقصة دي يا أخوي ما بعيدة .. كبرنا يا معاوية .. ياخ نحنا من زمن الكمونية بي الضراع .
ولا هسع مطهمين وساكين رهاب الدولار ود ال ك ل ب .
دحين يا زول أرحكاكا نتكامل أهلنا .. ولا أقلو نكون في النواحي وطرف الصحاري ..
الدفار هو الحل .. الدفار وأجب .. وبيني وبينك أنا شايف العمر أتحتحت تب . وما باقي الا أها وعيك .
..
تحياتي
| |
|
|
|
|
|
|
|
|
|
Re: هوايل ومقالآت شغلي الجديد ... (Re: Osman Musa)
|
يا جماعة
إعلان هام
اي واحد فيكم يجيهو المدعو علي محمد الفكي يقول ليهو اديني الدولارات اوصلهن لود عمي ود الفكي، طوالي يسلمه لاقرب عسكري هههههههه
المذكور ما عندي بيهو اي علاقة وما يغشكم بود عمي دي هههههههه
الزول طمعان بس زيو وزي جرجير
يا مدير
انا ابن سبيل وحقنا مذكور في القرآن، عندك محاججة في كلام ربنا كمان؟
| |
|
|
|
|
|
|
|
|
|
Re: هوايل ومقالآت شغلي الجديد ... (Re: محمد عمر الفكي)
|
Quote: الأخوان ود المدير و ود الفكي و حيدر و هيثم
لكم عاطر التحايا
مبروك العمل الجديد و ربنا يوفقك و طبعاً أنا شاهد على موضوع التوسان لكن يا ود
المدير حقيقة ود الفكي مبسوط عشان توسان حيدر بس موجوع شديد في قصة الكاش داون دي |
يا وليد يباركولك جديد وِليداتك إن شاء الله.
وانا موجوع فيهِن اللِتنين يا وليد،
العربي دا في البلد هناك عندو دحش دبزاوي سوالو
سلكة يشكي منها الليل والنهار، فسبحان الذي أعطاه
مُلكاً وعلمه الجلوس علي السرير...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
Quote: يا سلام يا ود المدير ياخي دي شغلانة فيها أجر كبير خلاص و عايزة واحد ود حلال و مفعم بالإنسانية زيّك
مبروك عليهم هم يا زول اللقوك انت
ما تنسى حسبة ود الفكي عشان نشوف الزكاة و الذي منو :) |
ود البشرى يا صديق،
مشتاقين ياخ.
نشكر لكم ثقتكم في شخصنا الضعيف، و إن شاء الله نكون عند حُسن الظن.
ود الفكي بالحسبة التخلي ينكرش ليل نهار. كاتل الجدادة وخامي بيضا
ومضروب في النجمة وبعد دا عندو نفس يكوس للزكاة !!!؟...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: جلالدونا)
|
محمد عمر الفكي
ود عمي
ازيك
ازوول جر شخيت واقيق بعيييد الدولارات الكندية ما بفوته تب
ومحمداني زي ما قالت لي طيبة الوداعية
فشنو اقنع و ما تاخر زمنك وتتعب نفسك
ثم ياخ بي درب الدولارات عاوز تسلم ود عمك التمنة
| |
|
|
|
|
|
|
|
|
 Re: هوايل ومقالآت شغلي الجديد ... (Re: معاوية المدير)
|
أخي أحمد محمد.
لك مني عظيم الشكر علي المدآخلة من نافذة الفيس بوك،
وتجدني آسف اشدّ الأسف علي عدم الرد في حينه، فوالله
مع الشغل الجديد مزنوق لأبعد حد، وبطُل علي البورد في
ايام الإجازات إن وُجدت. صدقني يا أحمد، والله بصلي
الصلوآت فوق دركسون العربية.
يا اخي قصرّت معاك ويا ريت تسامحني.
لك كامل مودتي...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
Quote:
ود المدير
تحياتي يا زول يا جميل
والشغل الجديد ربنا يديك خيرو ويكفيك شرو
ربنا يسعدك البوست اعاد لينا بسمة افتقدناها زمن في حوش بكري |
حياك الغمام يا ود الفكي 2.
اللهُمّ آمين.
والله يا ود الفكي 2 مرّة اضحك ومرّة أبكي.
إبتدرت حديثها معي قائلة، الحقيقة انا أصلاً ما من البلد دي، وراحت تحكي
عن مأساتها حتي قلت ليتها سكتت. لآزمتني عبرة في ذلك اليوم سدّت
حلقي وكادت الدبرسة تقتلني.
تلك اسماء التونسية...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: عبدالعزيز حسين عبدالرحيم)
|
Quote:
ما عصرت علينا شوية كده يا معاوية ؟
( عجوز ) و عمرها ( 50 ) دى .... غايتو و الله بيبسيك القبيل داك ما يبلعها ...
يمين زى الجريتنا خمسين يا حبيب ...
بنلاقيك في ملف غايتو ... |
ههههههههههههههههههه،
هباني يا صديق،
يا اخي ما تفوتا. يعني إنت لهسّع مخنفس وبتلبس الشارلستون،
وتغز الخلآل في الشعر وتخُت المنديل في اللياقة عشان العرق.
بيني وبينك في الحتة دي أنا براي دخلّت نفسي...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
Quote: قلنالك دشليونين مره .
أقع دبي وعالم الدفار المتسوبيشي بس أنت رأسك قوي .
صدقني ماهيتك هنا حتروح كباب وحمص HALAL ساكت .
وحترجع الباوقة ضهرك مكردس وصاري عينك . و لا حق تمباك و لا حتي حق بنطون .
والقصة دي يا أخوي ما بعيدة .. كبرنا يا معاوية .. ياخ نحنا من زمن الكمونية بي الضراع .
ولا هسع مطهمين وساكين رهاب الدولار ود ال ك ل ب .
دحين يا زول أرحكاكا نتكامل أهلنا .. ولا أقلو نكون في النواحي وطرف الصحاري ..
الدفار هو الحل .. الدفار وأجب .. وبيني وبينك أنا شايف العمر أتحتحت تب . وما باقي الا أها وعيك .
..
تحياتي |
يا ود موسى ادِن جاي وارِخ لي اضانك اللقولك الكلآم البيعشر ويلد.
العرب بيقولوا، اعرني سمعك. يا اخوي القلآبات عندنا هنا حارقات
اكتر من المتسيوبيشي، والقلآب بيشتغل 6 شهور بس تسوي فيهِن
مصاري جد، والـ6 شهور الباقيات كان داير تمشي دبي واللآ البلد
بعافيتك. الشغل في الصيف ووكت تبقى اضان دحش تلزم مِحِل
الدفو. والله يا عثمان البلد دي اظنها اكتر بلد فيها كنوستركشن
في العالم. أنا بعد اخلص من ناس الصلآت الطيبة ديل واقع
القلآبات، دحين تعال إتكامل علينا.
مودتي...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
Quote:
ود المدير و ضيفو الكرام ,,, سلام
الحمد لله كلنا فى الهم شرق
اخوك غرقان فى نفس الشغلانة
تخصص هنود حمر بس
اها فى الترانزبورتيشن ياما تشوف هوايل |
جلال يا صديق،
اخوك اليومين ديل متمرد،
واعلنت عصيان عدييييل كدا.
والله صحي...
| |
|
|
|
|
|
|
|
|
|
Re: هوايل ومقالآت شغلي الجديد ... (Re: معاوية المدير)
|
Quote: ود المدير سلامات واشواقات كتااار
ومبروك الشغل الجديد يا عمك
والله خليتنى اضحك زى المجنونة ياخى انت أحلى قلب فى المنتدى دا
شكرا رجعت لينا البسمة
وبعدين عاوزة اقول ليك حاجة
ناس الصلات الطيبة ديل احلى ناس والله العظيم قضيت معاهم فترة
الثانوى فولنتير حلوين وخاصة لو مشيت على ناس السينير هوم
ناس الزهامير 80 وفوق والله ديك كمان عالم غيييير ههههههههههه
ينسوك الدنيا |
سلآمات وضاحة.
والله مشتاقين.
بتاعين الزهايمر ديل مرّة وآحد دخلت العنوان في الـgps قال لي، سيبك من المكنة
دي دا كلآم فاضي سكت. انا بوصف لك. خلّيت العنوان في محلو وقلت كدي نشوف
وصف الزول دا حدو وين ؟. فضل هو مادي اصبعو في إتجاه العربية ماشة، وانا
متابع الـgps بعد وصلنا بيتو قال لي، شُفت، ما قتلك بوصلك ؟، انا إتحسنت شديد.
سبحان الله، عارف نفسو عندو زهايمر !...
| |
|
|
|
|
|
|
| |
معاوية المدير
محمد عمر الفكي
حيدر حسن ميرغني
ALWALEED ALSHEIKH
محمد البشرى الخضر
ismeil abbas
علي محمد الفكي
يحي قباني
Osman Musa
جلالدونا
وضاحة
فيس بوك
تويتر
انستقرام
يوتيوب
بنتيريست