|
|
|
 Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
نجيكم لحكاية ( السيرفا ) ...
كل ما اقراها من بكري ... اتذكر زمااان ...اول دراستنا للانجليزي كانت في اولي عام
انحنا طبعا دفعة محي الدين صابر حقة السلم التعليمي ....
يعني لما بدينا الانجليزي كنا رجال كبار بالغين ... واتعلمنا شويه القندفة و الصعلكة...
تدريس الانجليزي كان ...يجي الاستاذ ... يكتب الكلمة في التختة ... ويقولها ( بي نُطقُه ) هو ...
وانحنا بي وراهو ( كما الطير ) ...
وكانت هناك طريقة معينة لنطق الكلمات البتنتهي بحرفي ال ( إي و الآر ...)
يعني chair .. ينطقها الاستاذ ( chiah )
وكلمة NEAR بدل ما ننطقها ( NEER ) يقوم يخلينا ننطقها ( NEYAH )
اها الكلمة كانت ( نيا ) دي زاتها ...
هو يقول ....
نيااا
وانحنا الطيور بي وراهو
نيااااا
تاني ....
نياااا
وانحنا
نياااااااا
في وسط الزحمة كان صديقي ياسر حسن عثمان ( النسناس ) ...واللواء فيما بعد ...
يردد مع الزحمة و يقول ....
طحنية ...
انحنا ...نياااا وياسر مردف معانا ...طحنيااااا
الاستاذ غلبو يعرف منو البقول طحنية ده ...
سألنا واحد واحد ...نكرنا كلنا ...
قرر يدق الفصل كلو ...
وجات فروع النيم العجيبة ... وكل ما الاستاذ يرفع السوط لي فوق ..
يردد ....طحنية !!!! طحنية يا صعاليك .... طحنية عند اليمانية ...
وتااااااحححح ....
| |
  
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
اما ( حكايات جدي التاريخ )
اتهمني احبائي سيف الدولة كامل ...محمد ابوالعزائم ابوالريش و عاطف عمر ... ( اولاد الدفعة وماجاورها )
بأن لي ذاكرة حديدية ... وانا سعيد بهذا الاتهام .... ولكني اسركم جميعا بان بعض التفاصيل بدأت تسقط من الذاكره
والذاكره مليئة بالاحداث و الذكريات ... وكان صديقي الراحل المقيم ابدا في دواخلي عالد خليفة ( السبلوقة )
كان يحلو له مناداتي ب ( جدّي التاريخ ) ... وكلنا او بعضنا يعلم من هي تلك الشخصية في برنامج جنة الاطفال
والاستاذة صفية الأمين
و السبب في ذلك ...ان لي خصلة لا ادري من اين اتيت بها ... فكلما يحدث شي ... تتوقد الذاكره عندي ... واتذكر قصص
من الماضي ... و كم هو ملئ ذلك الماضي ...
وهنا قررت ان اقوم بسرد ذكرياتي ...المضحك منها ... والمبكي ...
حتي لا تخرب الذاكرة ... وتذهب تلك الحكايات في مهب الريح ... فالعمر يتقدم ... والمخيخ يتقلص ...
سأحاول اخفاء الاسماء التي قد تزعج اصحابها ....
و اقول لمن سيحاول مقاضاتي ... ان القصص سقطت عنها التهم بالتقادم ... فلا جدوي ...
تحياتي لكم جميعا ... واتمني ان تذهبوا معي في رحلة مع
حكايات جدّي التاريخ ....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
Quote: والله يا عمو يحي انت احلى زول فى المنتدى دا
غايتوا ضحكتنى لما شرقتى
كان بعلموكن بالله بنيم هههههههههههه
تستاهلوا تكونوا كنتوا مجننين الاساتذة |
وضاحة الفصيحة يا فجر المشارق ...
احلي منك قايله بلقي ... ولا غيرك أنتي ببقي ...
تعرفي يا وضاحة ... النيم ...وبعدين اتطوروا وجابوا خراتيش الموية للجلد ...
بس كنا حرفا بنجي مردفين من البيت ...
كتاب و مغلف بي قماش عشان ما يعمل صوت ...
انا كنت بفضل ( الكشكول و سلاح التلميذ ) في الترديف ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
(1) حكاية البيرة المتلجة ...
حدثت سنة 1981
لكني اتذكرتها عام 1997 وقتما عدت من كندا الي السعودية
لتنفيذ مشروع سكني هناك ...
كنا ساكنين مجموعة في مجمع سكني ... وكان يوم الخميس ما زال ( صفقة ورقيص ) لبعض الاخوان هناك
رغم صعوبة الاشياء هناك ...
المهم كنا قاعدين و انا وقتها خلاص خليت حاجة اسمها شراب من ايام شريعة الامام جعفر نميري
واختصرت البهدلة علي رقبتي ...
المهم الشباب قاعد يسنسن ... وكعادة السودانيين ... الكلام مشي سياسة ... وحال السودان و مشاكلو ...
والبهدلة و قطع الكهرباء ... وحتي التلج الناس ما لاقياهو ...وهنا صاحبنا قام اتمطي و رمي ليهو مكعبين تلج كبااار في كاسو ...
وقال الله يعز المملكة و يعز اولاد عبد العزيز ...
انا قاعد قمت اتذكرت قصة البيرة المتلجة دي ... بقصص قطع الكهرباء ...
سنة 81 قطع الكهرباء كان جزء من حياتنا ... الكهربا بتقطع اكتر من ما بتجي ...
قمت بديت احكي ليهم القصة ...انو انا وزميلي ( درش ) ... ماشين المطار نستقبل اخوهو جاي من الخارج ...
قام ( درش ) قال لي ياخ ما نغشي بارات نمرة 2 دي ...نشيل لينا علبتين بيره بارداااات لغاية ما نصل المطار ...
اها ناس البارات الحُرفا عشان قطع الكهربا قامو ابتدعوا حكاية انهم يجيبو فريزرات ...يجمدوا فيها البيرة
عشان لو حتي الكهربا قطعت ...تظل البيرة بارده ...
المهم شلنا العلبتين ... وانا سايق ...( درش ) فتح علبته ... ما قالت ( تتاااححح ) ... قام طوالي فتح النور و عاين ...
لقي البيرة عاملة تلج من جوة ... قال لي لف ارجع للزول المستهبل ده ...
رجعنا ... شرحنا القصة ... سيد البار اعتذر و شرح ظروف قطع الكهربا و الفريزرات
و عشان يحل القصة ... قام ادانا فتيلين كونياك ...قال كبوهم في البيرة بقوم التلج ده يسيح طوالي ....
صاحبي الخته التلجتين في كاسو ... ودعا الله يحفظ الممكلكة داك ...
عاين لي باعجاب شديد ... و عاين لبقية الاخوان و قال ...
( بالله شوفوا السودان ده مشاكله كانت بسيطة كيف ) ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: سامى عبد المطلب)
|
سامي يا جميل ...
كتر خيرك ياخي علي الكلام الجميل ...
ذكرتني بكلمة طاعم دي ...
طلبة في جامعة الخرطوم ... ساكنين البركس ...
وكان صديقي الجميل من اولاد مدني الباشمهندس عاطف الزبير ...
كنا ساكنين في داخلية واحده و كان عند واحب من اصحابو من مدني
لما يجي الخرطوم في شغل بينزل عند عاطف اليومين و يرجع ...
انحنا كنا بنحب الكنكان و بنلعب الحريق المجاني ...
و صاحبنا البجي من مدني كان بيلعب مطعم ...
وطبعا منقط الحريق نقيط .... لكن قدر ما نحنسه ...يافلان ياخ عشره واااحده بس ...
كان يقول لي ... يا قباني ياخوي حريقكم المجاني ده ... تجر الكرت من الصندوق ...تقيييل زى الجاري ليك لوح زنك ....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
كان العم احمد مختار جبره
والد صديقي الجميل عمر يعتقد في صداقتي لابنه عمر ... وكنا قد تعارفنا في مدرسة الخرطوم القديمة الثانوية
العم احمد مختار كان لواء في الجيش رحمه الله و تاجر فيما بعد
وهو عم الموسيقار يوسف الموصلي أيضاً ...
كان العم احمد يثق في شخصي الضعيف و يعتبرني طالب مهذب و من عائلة معروفة وعليه فان صداقتي لعمر ستكون مضمونة ومأمونة ...
كان للعم أحمد سيارة فولجا تشبه الدب القطبي ... بها كمية حديد لو صهرت لانتج منها 15 سياره هيونداي
العم احمد كان روتينيا جداً ... يرجع مساء الساعة 9 الي المنزل
يضع سيارته أمام البيت من جهة الحوش الأمامي و كان مكان نومه الحوش الخلفي المجاور لبيت العم ( ابارو )
كنا نتسلل انا و عمر و نقوم ( بدفر ) ذلك الدب القطبي من الفسحة المقابلة للمنزل و حتي اول شارع السوق ثم نقوم بعدها باستخدام المفتاح الاسبير ( الضائع منذ زمن ...)
نجوب ال شوارع و نرب العاصمة ربة ... و نتابع حفلات البلوستارز ... نتشارك ب ( كب ) عدة ( خطوط ) من البنزين ... ثم نعود ادراجنا قبل صلاة الفجر بقليل و نضع كل شئ في مكانه
كنا نعتقد أننا أنجزنا بشيطنتنا كل ذلك
الآن حينما افكر في الماضي أقول لربما كان العم احمد يعرف و يغض النظر لحكمة ما في نفسه
تخرجنا انا و الجميل عمر من كلية الهندسة أنا في عام 83 و عمر في عام 84
لربما كانت الحكمة أكبر من أن نفهمها
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
غنم سيدي
كنا طلبه في جامعة الخرطوم وكان الشاب ده زميلنا
لم نكن نعرف له أي ميول سياسية
كان يتحاشي الكلام في أي مواضيع سياسية
الي أن شاهدته يوم في ليلة كان فيها محمد عثمان الميرغني يتحدث
وبعد نهاية الحفل رأيت صديقنا يهم بتقبيل أيادى مولانا !!!!
رايته بعدها و قلت له ياخي انت رجل متعلم و تحمل ارفع الشهادات
كيف تعمل كده !!!
قال لي إحنا في أسرتنا ده العرف و لو تاني اتكلمت معاي في المسالة دى انا بخسرك
لفت السنين و قابلته ... ولسه المسالة حارقاني
وداير أنكش الموضوع القديم
قلت ليهو سمعت النكتة دي
قالو واحد عنده حواشة ... يوم كسر عليهو قطيع كامل حق ( غنم )
وبدو يأكلوا وسيد الحواشة جا طاير يكورك وداير يطرد الغنم
اها الراعي المع الغنم ثبته ليك وقالبهو يازول انت عارف دي غنم منو؟
قال ليهو مين ما كان!!!!
الراعي قال ليهو يا زول ... دى غنم سيدي محمد عثمان
ترعي محل ما ترعي
سيد الحواشة سكت ووقف لغاية ما الغنم شبعت
وبدو يطلعو بره الحواشة و سيدها يعاين ليهم و يقول للغنم
( ما بدري يا خلفا ) عليكم الله قيلو معانا
ضحك صديقي وقال لي تعرف يا قباني
اكل العيش و الشفع نسوني الدنيا كلها مش سيدي بس
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: وائل فاروق)
|
| Quote: توقاماسين عديل كده ؟ أنتو الوقت داك الكودة كان وين ؟؟؟؟؟ |
الدنيا كانت سهلة ياوائل ....
وما تحتاج فيها لأي ( موانع ) ...
حتي لما خوفونا بحاجة اسمها ( الدِشْ ) ...
ما خفنا ... لكن عملنا حسابنا وطواقينا كانت في جيوبنا طوالي ...
اها اتذكر ليك قصة صاحبنا المشي مع الشباب ( الحلة ) ... واكتشف في آآآآخر لحظة انو ما معاهو طاقية ...
ووكتها داك اشاعة ( الدِّش ) مالية البلد ... اتلفت قال يا شباب في واحد منكم عنده طاقية زيادة ؟؟
الناس كلها نكرت ...حتي العندو 3 ... بفتكرهم ما كفاية ...شباب و احلام طبعا ...
المهم صاحبنا لما ما لقي فايدة ... حسب حساباتو ... وقرر انو الشي العندو ده ما بتفوت ...
وقام طبقها ليك من ايدها و قال ( غايتو عليك يا الله ) ...
_____________________________________________
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
تاج السر و السؤال الفقهي عن العادة السرية ...
تاج السر كان مشاغبا لحد الفكاهة ... يسخر من كل شي ....
كان مجنن الاساتذة في الخرطوم الثانوية القديمة بالعربي كده ... وكانت له القدرة علي اصدار اصوات ..تُسمع ولا يعرف مصدرها ...
كان يجلس في ركن الفصل بالضبط ... و بجاوره الجميل المهندس صلاح سلمان ...
اذا سال الاستاذ عن كراس القواعد ...ياتي صوت من مكان ما قائلاً ( ما ادونا ) ...
يلتفت الاستاذ قائلا " انا بسأل عن الكراس ...
ياتي صوت آخر ( طبعا برضو تاج السر ) قائلا ... ما صرفو لينا .... وهكذا ...
جاءنا في يوم استاذ جديد للتربية الاسلامية في السنة الثالثة ... ( طردني من المدرسة 60 يوما قبل الجلوس لامتحان الشهادة ... وهذه قصة أخري ..)
الاستاذ صالح كان قصير القامة ... فأساء تقديره أخينا تاج السر ... ولم يكن يعلم ان القصر يا حكمة يا فتنة ... وكان الاستاذ صالح ( خاتف لونين )
كانت الحصة عن مبطلات الصيام ... و القضاء و الكفارة ...
والحصة ماشه في امان الله ... واستاذ صالح استوعب كل الما أدونا و ما صرفوا لينا الآتية من تاج السر ... وكلها لم تؤثر علي مسار الحصة ...
لم يعجب تاج السر هذا الحال الرتيب ... فقرر ان يرفع يده و يسال السؤال القاتل ( في نظره )...
وقف تاج السر ... وكان يوجه سؤاله للاستاذ ... وينظر الينا بابتسامة الفاتح ...
وكان السؤال :
يا أستاذ ... لو في واحدة بت ... مارست العادة السرية بي ( موزة ) في نهار رمضان ...
هل ذلك يستوجب القضاء ... ام القضاء و الكفارة معا ً .؟؟؟؟
انتهي السؤال ...
ابتسم الاستاذ ( قصير القامة ) ...الداهية ... و هَمَّ تاج السر بالجلوس بعد ان رمي قنبلته ...
وقال استاذ صالح .... لا لا يا تاج ... خليك واقف ... ده سؤال مهم وصعب ولازم ارد عليك بي حرص ...
و أردف ... اعتقد يا تاج السر ... والله أعلم ... لو كانت الموزة ( مقشّره ) ... فعليها القضاء فقط ...
اما لو كانت بي قشرتها ... فده يستوجب القضاء و الكفارة معاً ....
تاج السر بلعته الواطة و اتصبب عرقاً ... ولم نعد نسمع منه طول السنة الدراسية ...
وبعدها قال الاستاذ صالح ...
دعونا الان نتحدث قليلا عن قوم ( لوط ) ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
صديقي الباشمهندس الميكانيكي ( الآن ) مجدي ...
كان من عشاق الافلام ...
كنا من سكان داخلية النشر في السنة الاولي في كلية الهندسة و المعمار ...
اكتشف مجدي ان هناك شجرة عالية جدا من أشجار اللبخ ... تقع خلف الحمامات
و تطل علي سينما النيل الازرق من الناحية الغربية للشاشة ...
كان لمجدي جلابية سمنية ... يحب ان يكفكف اكمامها ... وهي قصيرة بعض الشي فكانت تساعد علي تسلق تلك الشجرة ...
كان يرتديها ... وفي جيبه علبة بنسون ( مليانة ) وكبريته ...
كان مجدي من هواة الدور الاول ... لانه ايضا من هواة النوم بدري ... لا يشرب ...و لا يفعل الاشياء الاخري ...
فقط سجارته و كباية شاهي حمراء تقيلة ... هذا ماكان يظبط رأسه ...
مشكلته انه يحجز افضل مكان في تلك الشجره ... وكان الجميع يحترم ان ذلك المكان هو ( اللوج ) الخاص بمجدي ...
مشكلة اخري ... لو اعجبه الفلم ... يقوم بمشاهدته يوميا حتي ينتهي العرض ... وبذلك نحرم نحن من مشاهدته من اللوج ... ونجلس علي غصون الشعب ...
الي ان اتي فلم Jaws ...
وكان حتميا ان مجدي قد ينصب خيمة في ذلك الفرع المتين ... حتي ينتهي عرض الفلم هناك ...
ولكنه Jaws !!!
قررت في ذات ليلة ان امتطي تلك الشجره من العصر ... و ان اكون واحدا من الذين ذكروا في كتاب ( ثقلاء السودان )
و قلت في نفسي الليلة با حياة يا موت ...
وجاء الباشمهندس مجدي في بداية المناظر ... وبدأ في الصعود الي ( اللوج ) الخاص به في تلك الشجره ...
ووجدني ( متنحاً ) ... مساء الخير يا قباني ... وين يان يابو الأمجاد ... انت حتشوف الفلم يا قباني ...؟
لا يا مجدي جيت اسخن ليك الفرع بس لانو الدنيا شتا ... طيب انا حاخليك تتفرج علي المناظر يا قباني
...لا بالله ... انت يا ولد ما اتفرجت علي الفلم ده already خمسة مرات يا مجدي ما كفايه ؟؟؟
انت دافع لي من جيبك يا يحي .؟؟؟ اسمعني يا حبيب انا الليله ما نازل ... الداير تسويهو سويهو ...
قال طيب ... نزل تحت ...وضع كباية الشاي في مكان امين ... و شمّر جلابيته ... وجينا نتصارع
تاخ تراخ ...مصارعة هزار طبعا لاننا اصحاب ... قوم يا مجدي ( أقع جوة السينما ) ...
وحياتكم ... قام اتنفض ... وجرا كرسي و قعد ... ا
نتهت المناظر ... وقف بي جلابيته ديك ...قال لي اجدع لي طرادة جيبي مافيهو قروش
خليني اجيب لي قزازة بزيانوس و ساندوتش ...
________________________________________________________
1978-1979 يا ليت ذلك الزمن الجميل يعود يوما
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
حكاية كورة القماير و الدباغة
____________________
يا 81 يا 82 ما بتذكر التاريخ ... لكن كنا ( كالعادة ) مقيلين
في الصالون البراني حق ناس جلال صالح ... ضربنا ملاح الشرموط ( الأصلو ما بنطال )
حق الحاجة فتحية ... وصينية الشاهي و سرويس كنافه ( هوم ميد ) برضو ... والحريق يقول يا ليل ....
كنا انا و جلال و مبارك ابراهيم ( باجوري ) و حاج عوض ابوزيد ... وكان مخمسنا رحمة الله عليه فاروق حامد الحكم ...
لما جات الساعة 3 فاروق ساكن قصاد ناس جلال ... انسحب ومشي لبس الردا الاسود و القميص الاسود ... وجاء في ايده كفر ...
وقال يا شباب ارحكم وصلوني الميدان ...الكورة كانت ملعوبة في الميدان المجاور للقماير خلف ابروف اعتقد ميدان ( الحُفَر ) علي ما اذكر ...
وعادة فاروق رحمه الله بيمشي بي عربيته ... استغربنا ... لكن قلنا خلاص ...و قلنا لي جلال امشي وصلو وتعال ...قال لا لا ... دي كورة حارة جدا ولازم تحضروها ...
القماير لو اتغلبت حتنزل درجة رابعة ... والدباغة لو اتعادلت نفس الشي ... فحتكون غيامة قايمة ... فتعالو بالله ..عشان كمان لو حصلت اي مشاكل ...
ايواااااااا ...مشاكل !!!! وانحنا جنب القماير ؟؟؟
المهم وقفنا العربية بعيد و ( ترجلنا ) حتي الميدان ... والكورة من قولة تيت ..عجاجتها في السما ...
الدقيقة 35 من الشوط الاول الدباغة جابت قون .... انتهي الشوط الاول الدباغة الدباغة غالبة 1 صفر
الهاف تايم مشجعي القماير نزلزا قمايرهم و اختفو ... وفاروق ماسك كفره و واقف معانا ... مع بداية الشوط التاني ... طلعو ناس القماير و كل واحد معاهو عكاز في ايدو ...
وغالبا بعضهم اداها عبار عبارين ... وبدت المبارة تاني ... والقماير قدر ما ضغطت ... اصلو غلبهم يجيبو قون ...
الدقيقة 80 من عمر المباراه جانا فاروق قريب من خط التماس ... قال لينا اسمعو دوروا العربية و خلوها مقبله علي ابروف ...
وحياتكم الدقيقة 85 ما جات ...الكورة طلعت كورنر جنب العربية بالضبط ... فاروق الله يرحمه جا ماشي بي ثبات شديد ... ومسك الكفر ...
وصفر شييييييت وكراعو واحده جوة العربية و التانية بره .... ويابو مروة بعد داك ...
________________________________________________________________________
رحم الله صديقي فاروق حامد ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: الطيب شيقوق)
|
عزيزى يحى
سلامات من جبال السلسلة الزرقاء , كارولاينا الشماليه
| Quote: المهم الشباب قاعد يسنسن |
عبارة خرطوميه/ امدرمانيه من الزمن الجميل. رغم اننى خريج 69 من نفس المدرسه الرائده, الخرطوم الاميريه الوسطى وكان ذلك اسمها قبل انقلاب القائمقام النميرى, وانتكاسة د. محى الدين صابر التعليميه, الا ان الاجواء
نفس الاجواء, وبعض الاسماء من دفعتك اسماء اخوة, واصدقاء لاولاد دفعتى.
اكتب ياقبانى عن ذلك الزمان الجميل.
وبالمناسبه, وين اولاد جامعة الخرطوم, اقصد اولاد اساتذة واداريين الجامعة فى الاميريه, والخرطوم القديمه?
مع ودى وتقديرى
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
برامج التلفزيون زمان قصصها كتيره
وعلي رأسها طبعا قصة حرام عليك حقة محمد سليمان في دنيا دبنقا و قصة الجمل أبو سنامين حقة برنامج فرسان في الميدان ...
المهم كانت معظم البرامج فيها مسابقات و جوائز ...
مرة قاعدين قدام التلفزيون في الرياض انا و الصديق العزيز مزاحم
واولادي علي أولادو كانو في السودان
وكانت الدنيا صيف حر مبالغ فيهو
انا و ( زحمة ) قاعدين في صالة البيت و كل مكيفات البيت تهدر هدر ... البلاط ما بنهبش من البرودة .. وشغلنا تلفزيون السودان وكانت السهرة يا لقطات فريد عبدالوهاب يا تحت الأضواء حمدي بولاد ما بتذكر
المهم انحنا مرخمييين بي عراريقنا ونتفرج ... وبدت السهرة طبعا الناس في السودان حالتهم حالة فترانين و مغبرين .. وقاعدين في الاستوديو حرانين اتهببوا ساااكت
اها بدت فقرة المسابقات ... وجا مقدم البرنامج يعلن عن الجوايز ... و بي ابتسامة عريييضة قال :
الجائزة الأولي ... و أداها صنة كده ... وبعدين قال: تدكرتين سفر علي متن الخطوط الجوية السودانية ... الخرطوم - أنجمينا - الخرطوم ..!!
أتلفت علي مزاحم في اللحظة ديك متسائلا :
وده إذا حالفك الحظ ؟؟؟؟
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
أظهر لينا يا جدي التاريخ ............... لا حولاااااا
Quote: اتهمني احبائي سيف الدولة كامل ...محمد ابوالعزائم ابوالريش و عاطف عمر ... ( اولاد الدفعة وماجاورها )
بأن لي ذاكرة حديدية ... وانا سعيد بهذا الاتهام .... ولكني اسركم جميعا بان بعض التفاصيل بدأت تسقط من الذاكره |
تعرف يا قباني ... كنت زيك كده .. بس لكن بتذكر الحاجات القديمة أكتر من الجديدة ... لما الحكاية دي بقت تجيب لي الكلام، وبدا حتى أولاد دفعتي والأكبر مني يتهموني بالـ(جلكنة)، كبيت الزوغة وبقيت ود أمبارح.
أدخل لينا زيادة في الخرطوم القديمة، شايفك جبت سيرة الأستاذ صالح الطاهر وأستاذ عصام .... امشي لينا شوية على شعبة الكيمياء وشوف لينا جرجس محارب وأستاذ مصطفى بوستي عليه رحمة الله. كمان ما تنسى عمك حسن عبيد عليه الرحمة ومن شعبة اللغة العربية غير صالح الطاهر في برضو مولانا السمح ومولانا الشين.
على ذكر حسن عبيد، طبعاً وكتها كان وكيل وكان البعبع بتاع المدرسة. في الفسحة كنا بنمشي مدخل البركس في الطريق الماشي لمستشفى العيون، لزوم التدخين وكده ... لما نجي راجعين نلقى حسن عبيد واقف ويمسك واحد واحد ويشم إيدو بحثاً عن ريحة السجاير. أخوك كان يمسك السجارة بالشمال .. ولما يجي حسن عبيد يمد إيدو اليمين بكل براءة.
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: عبد الله فقير)
|
ابو الريش يابو الريش ...
يا حليل القديمة يا حبيب ... و يا حليل الزمن الجميل ....
حكايات القديمة كتيرة ... وعمك جرجس محارب عنده معاهو حكاية عجيبة جدا ً ...
كنا في سنة اولي عمر ... وكان جرجس هو استاذ الكيمياء حقنا ...
طبعا كان عمك جرجس راجل مقرف جدا ...و كان عنده تيشيرت واااحد لونه كبدي ...ما كان بيغسله نهائيا ...
وريحته نحاس نحاس ... يجيك راكب عربيته الفلوكسواجن موديل 50 ديك ...
المهم اليوم داك كان عنده نزلة شديدة وعمك جرجس عنده منديل واحد برضه ما بيغسله ...ويشيل اليوم كله و ينفنف فيهو ...
المهم اتلفت اقول حاجة لي جاري ...قوم يا جرجس فك فيني المنديل بي عفنه داك ...
وقوم يا يحيي شيل الدرج حقك وفكو في جرجس محارب ...
اولي عمر كانت جمب مكتب حسن عبيد الشايقي وعمك جرجس قام جاري لي مكتب حسن عبيد و انا بي وراهو ...
وطبعا كانت اول طرده في الثانوي العالي ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
اسماعيل الطهّار ...
________________
ناس امدرمان جميعا عارفين الاسم ده ...
عمك اسماعيل الطهار ... كان عنده شنطة حديد ... عندها ريحة دواء غالبا ريحة ديتول ولا حاجة ...
كانت في ذاكرتنا و احنا اطفال مرتبطة بالحُقن ...فكنا فاكرنها دي ريحة الحقنه ...
الريحة مميزة جدا ... بيتنا في ودارو كان في نفس صف بيت الأزهري و قبال ما تصل التقاطع الفيهو
محطة محجوب خال العيال و كشك الفول البقي توتو كورة فيما بعد ...
كنا نشم ريحة الحقنه من ما يصل عمك اسماعيل التقاطع داك ... فنعرف انو في الحلة في شافع حيطهرو ...
طبعا وانحنا شفع لما يجي الطهار بيقومو يلمو شفع الحلة كلهم القدر بعض الجاهزين للطهارة ... والرجفي يدور و الجري ...
البيلبد في برج الحمام ... البخش قفص الجداد ...و المحظوظ يطلع راس البيت ... وطبعاً القلب يدق زي الهبابة ...
اول مرة جا اسماعيل ...قالو ده الطهار قمنا جارين وانا قمت لبدت ليك في اوضة جالوص كانت مخزن ...
لغاية ما اتأكدت انو عم اسماعيل فات ... لما جيت مارق ... لقيتهم بيضحكوا علي ... قالو لي ياود انت جاري مالك ...انت ما طهروك في بورتسودان زمان ...
قلت ليهم لغاية ما يتاكد مني ... يكون طهرني تاني مع زحمة الشفع دي ...
____________________________________________________
عمك اسماعيل كان ايضا يقوم بعمليات التطعيم ... الله يرحمو حيا كان ام ميتا ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
ميز الموظفين
______________
زمان في السودان كل مصلحة حكومية عندها فرع في جميع مدن السودان ...وكل فرع بيتبعه بيت للموظفين او ميز كما كان يسمي ...
اكبر اخواني الله يطراهو بالخير كان مفتش ضرائب في كوستي في السبعينات ... وكان عزابي ...فساكن هو وكل الشباب الموظفين في مصلحة الضرائب في الميز ...
المن الخرطوم ...المن مدني ...المن الفاشر ... المهم كلهم عايشين في ذلك الميز وبرامجهم معروفة ...
كشاتين ...والذى منه ...
المهم في نهاية فترة خدمة اخوي ... كان العرف انو المفتش الجديد يجي ...وتكون فترة تسليم و تسلم شهر علي الاقل ...
وبما انو المفتش الجديد عزابي قام نزل مع المجموعة في الميز ...وصل كوستي يوم الأربعاء بالليل ...والجماعة منتظرنه ...قاشين حوشهم
مفرشين سرايرهم ... وراشين الضفرة ... وراجين زولنا ... المهم وصل ..وكان رجل سكوت ...قالو ليهو داك دولابك ..وهداك سريرك ...
صاحبنا جاي تعبان رقد نام طوالي ...
صبحو الخميس ماشين علي المكتب ... قال هو تعبان من السفرية فحيرتاح الخميس و يبدأ العمل من يوم السبت ...
جماعتنا مقلقين داير يعرفو مويتو شنو ... وصلو البيت الساعة 2:30 صاحبنا راااقد في سريرو ...
المهم سوطك سوطك عملو الغدا صاحبنا ما مد يده بالمساعده ..لكن قعد اكل و فات سريره تاني رقد ...
اها بعد شراب الشاي قال ليهو ...يا استاذ الليلة في كورة حارة جدا بين الوطن و الرابطة ...تمشي معانا ... ؟
قال لا شكرا والله انا ما عندى قضية مع الكورة دي ...
رجعوا من الكوره ... لقوهو رااقد في سريرو ... قال ليهو والله الليلة في فلم عالمي في السينما تمشي معانا ؟
قال لا شكرا ...والله انا ما عندي قضية مع السينما دي ...
رجعوا الشباب بعد السينما شدوا حلتهم ( ما الدنيا خميس ) ..ودفرو اخوي قالو ليهو ما تشوف لينا لو الراجل ده بيفضل العرقي ولا نجيب ليهو شرى ؟.
أخوي قام سألو قال ليهو كيف شرابك ؟
قال لا والله ... انا ما عندي اي قضية مع الخمرة دي ...
شدو تربيزتهم ... وقالو ليهو وست ولا حريق ؟
قال والله انا ماعندي قضية مع الكشاتين دي ..!!!
لما بقت الساعة 10 قالو ليهو ياخي في شابات ظريفات كده بجو يتونسوا معانا ... تحب نكلمهم يجيبوا ليك واحده زيادة ...
قال لا والله انا ما عندي قضية مع الأشياء دي ...
اها جماعتنا قالو بسسسس ...صاحبنا أظنو مولانا... لا كشتينه لا كاس لا سينما لا كورة ... بس ياهو مولّانا ...
قامو يوم الجمعة من بدري ...غسلو جلاليبهم وكوو عممهم ...
و مشو لي صاحبنا قال ليهو اجهز عشان نمشي صلاة الجمعة من بدري ونقعد في الصفوف الأمامية ...
صاحبنا في اتكايتو الفي سريرو قال ليهم ...لا والله انا ما عندي اي قضية مع الصلاة دي !!!
الجماعة اتلفتوا علي اخوي مخلوعين ...
يضحك اخوي قاليهم ...
انا نقلوني ...لكن الزول الجابو ليكم ده اظنه ( شيطان ما بني آدم ) ...حلو ( قضيتكم ) معاهو بي طريقتكم ...!!!!
______________________________________________________________________
الحياة كانت بسيطة و جميلة يا ناس ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
المصران ... مرض السودانيين ...
___________________
جيت كندا في العام 94 واول حاجة بيقولوها ليك ...لازم تعمل ليك طبيب ( فاميلي دكتور )
قلنا خير ...لقينا دكتور مصري متربي هنا شكلو ... لكن بيتكلم عربي لا بأس به ...
اول سؤال سألني بعد ما عرف انو انا سوداني ...قال لي...
انت عندك اعراض القولون برضو ؟
قلتوا ليهو نعم ...لكن ليه برضو يعني ؟ منو تاني جاك بيشتكي ؟؟؟
قال لي تاني ؟؟ ( ده كل السودانيين تقريبا ونفسي اعرف السبب )
قلت ليهو لو عندك وكت الان انا بوريك السبب ...
قال لي انا في عرضك ...بس افهم ...
قلت ليهو انا اديك مثل حي واقف قدامك هنا ... انا شخصيا ...
انا مشيت المدرسة عمري 6 سنوات ... اولي كتاب في مدرسة مدني الشرقية
المدرسة كانت جنب سوق البصل ... وكانو كمان بيدققو البهارات و الشطة وخلافه ...
وهناك دخلنا الي عالم عجيب جدا اسمه ( الدُقّه )... تباع داخل قرطاس ... خليط منقي من افخر انواع الشطة و الشمار و الملح
نقطع قعر القرطاس ... وتبدا في اكل الدقة من اسفل ...
تانية كتاب ... مدرسة بحري الشعبية ... عالم اخر تعرفنا عليه ...عالم اكل ( التِبِشْ ) بالشطة والليمون ...
تالتة اوليه ... كبرنا و كبرت احزاننا ... و دخلنا الي عالم سلطة الاسود المقلية و الشطة الخدرا ...
وكان دوما علي التوازي لا تفارقنا قراصة النبق ...التي لا يعلم سر فتفتة النبق و تلصيقه هكذا الا رب العالمين ...
واستمرت الحكاية حتي وصلنا الي عالم الكوارع ... و العِكو ...
و عوالم ام فتفت و المرارات و الشواشو و صحون الدكوة الحمراء اللون من كتر الشطة ...
ثم كسودانيين في اغلب الاحيان ... تتوج الامور بقليل او كثير من المشروبات ( المكحلة ) ...
و في تلك الظروف يا دكتور ...يكون العشاء ما يسمى بالقطر قام ...ّّّ
كل ما تقع عليه عينك في المطبخ يوضع في حلة القطر قام ...
وتظل تلك الحلة ( تنغنغ ) في النار حتي تتركز الدهون و البهارات ... وشرط ان تاتي من نارها في حلتها ... وتؤكل هكذا ...
وبعد الشربه و المنغنغة يا دكتور ....
تجئ صينية الكنافة او الباسطة لزوم الحلو ( ده علي اساس انو المؤمن حلوي ) وطبعا احنا السودانيين من بني هاشم و احفاد الرسول لزم ...
اها يا دكتور ... بعد ده كلو شكلك لازم تعمل لي منظار .. ولا شنو ....
قال لي يا بشمهندس ... اه ... لاني شوية كده و كنت حاوديك الكرنتينة ....
______________________________________________________________
بالله العظيم كان في واحده بتبيع ملاح شرموط في المنطقة الصناعية الخرطوم جنب مستودعات القموسيون الطبي ... تاخد عليهو علامة ISO 9001
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
يا باشمهندس ...... الكلام الفوق ده كلو ... أنا محيراني فيهو حاجة واحدة.
ذكرتني بي أخونا رأفت ميلاد الله يطراهو بالخير ....
يجيبو سيرة بورتسودان .... إنت طهّروك في بورتسودان
يجيبو سيرة مدني ........ إنت (من أرض المحنة ومن قلب الجزيرة)
يجيبو سيرة أمدرمان ..... إنت (ود قلبا)
يجيبو سيرة الخرطوم ..... إنت ود نمرة (2) والزهور.
يجيبو سيرة بحري ..... إنت سايط المزاد بي عود.
حبيبنا رأفت زاد عليك بي إنو ضايقنا في (بري) حقتنا دي.
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: محمد أبوالعزائم أبوالريش)
|
تعرف يابو الريش ...
انا مولود في بورتسودان ... و الحاج الله يرحمو لو كان قدمني شوية ... كان لحقت واو و الفاشر زى اخواني ...
______________________________________________
عارف يابو الريش ... كمية التمربونا و العنكوليب والقضيم الاكلتها في مدني تفتح سوبرماركت ...
كنا بالجلاليب ياحاج و عندنا خرتاية تعلقها في كتفك خلف خلاف كده نخت فيها الكراس ...
ويا بستلة يا عمود دورين تشيل فيهو فطورك ...
كان عندنا واحد في المدرسة بيبيع الباسطة الغرقانة عسل ديك ...صينية كبيرة وسكين معجون بشيل بيهو الباسطة ...
القطعة كانت بي تعريفة ... واخر الصينية الباقي كلو بي قرش ...
القرش كان حاجة كبيرة جدا ... ما جاب أخرته الا النميري من بدا قرش محاربة العطش
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: حبيب نورة)
|
| Quote: وكمان طلعت بتاع بنقو يا عم الحاج ؟ |
حبيب نوره ...
لو عاد بي الزمان الي سنوات ( الضياع ) ... لجربته ...
اقرب ما وصلت اليه من ذلك المدعو ( البنقو ) اني انسطلت بالريحة في جلساتي مع بعض الاخوان المنصقعين ...
وكنت منبهرا من قدرة احدهم بلف السجارة تلاتة كرت ... و كان يدعوها العروس ...
كان حريفا و سريعا ...ولا يخطئ في تلك العملية بتاتاً ... و كانما خلق ( بُنْصُرُه ) و لسانه لعملية اللف تلك ...
كنا يا حبيبها نجلس تحت شجرة الليمونة امام سينما النيل الأزرق ... جلسات غنائية مبهرة
وكان منا من يأتي من اجل الانس و البهجة ... ومن يأتي لشرب كاسين ... ومن يدخن تلك الملعونة ...
اذكر قصة بطلها احد الزملاء ...
كان يدخن البنقو ( إسكتو ) ..... ويشرب الوسكي ( إسكتوا ) ايضا ...
جاء الي جلستنا ... وكانت الاغنية هب النسيم يا ظبية لعثمان حسين ... و الليل أنس و الهواء عليل ...
وعند انتهاء الاغنية قرر الشباب ان يتباري في رمي القوارير الفارغة في النيل ... لمعرفة من سيرمي ابعد ...
وكان صديقنا ( الإسكتو ) رجلا انيقا هادئا ... ولكن فيما يبدو مع نسمة هواء عليل ربطت اموره بعضها ببعضٍ ...
قرر ان يتنازل و يتباري معنا ...
وقف صديقنا وقفة الفارس ..و سينما النيل الأزرق من خلفه و النيل الأزرق امامه ... والدنيا ليل ... فقط القمر الساطع ينير صفحة المياه المسرعة ...
برم صاحبنا يده ممسكا بزجاجة ...و طوح بها بكامل قواه ... وكلنا ينظر نحو النيل ... ننتظر مستقرها ...
وفجأه نسمع ...( كشلووووو ) ...تكسرت الزجاجة ... وابتسم صاحبنا وقال ...ناس بحري جاهم بلا ...
ما زلنا نضحك ... فالزجاجة طارت الي الخلف وتكسرت في شارع الزلط امام السينما ....
| |
|
|
|
|
|
|
|
|
 Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
Quote: كنا في سنة اولي عمر ... وكان جرجس هو استاذ الكيمياء حقنا ...
طبعا كان عمك جرجس راجل مقرف جدا ...و كان عنده تيشيرت واااحد لونه كبدي ...ما كان بيغسله نهائيا ...
وريحته نحاس نحاس ... يجيك راكب عربيته الفلوكسواجن موديل 50 ديك ...
المهم اليوم داك كان عنده نزلة شديدة وعمك جرجس عنده منديل واحد برضه ما بيغسله ...ويشيل اليوم كله و ينفنف فيهو ...
المهم اتلفت اقول حاجة لي جاري ...قوم يا جرجس فك فيني المنديل بي عفنه داك ...
وقوم يا يحيي شيل الدرج حقك وفكو في جرجس محارب ...
اولي عمر كانت جمب مكتب حسن عبيد الشايقي وعمك جرجس قام جاري لي مكتب حسن عبيد و انا بي وراهو ...
وطبعا كانت اول طرده في الثانوي العالي ... |
والطردات دي يا ود قباني كنت بتشرحها كيف لوالدك؟؟
يعني بتقول ليه شنو وإنت ما بتمشي المدرسة؟؟
ذكريات جميلة والأجمل منها ذاكرتك القوية..
تحياتي..
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: Muna Khugali)
|
Quote: والطردات دي يا ود قباني كنت بتشرحها كيف لوالدك؟؟
يعني بتقول ليه شنو وإنت ما بتمشي المدرسة؟؟
ذكريات جميلة والأجمل منها ذاكرتك القوية..
تحياتي. |
مني يا جميلة ...
من نعم ربنا علي عندي اخ اكبر مني بي 8 سنوات ... وهو من خريج الخرطوم اقديمة عام 70
وكان هو ولي أمري ( المستعار ) طوال فترة الدراسة ...
اذكر يا مني في سنة تالتة انطردت أخر شهرين و نص من نهاية العام الدراسي
وكنا ممتحنين شهادة ..
اخوي جا كالعادة وسمع الكلام البايخ حق وكيل المدرسة ... ووقع الورق ...
وقال لي انا وقعت لكن بشرط ... كل يوم الصباح تلبس الزي المدرسي و تمرق كانك ماشي المدرسة ...
وتجي تمشي ال BRITISH COUNCIL وتقعد تذاكر طول اليوم و تقابل زملاءك اخر الحصص تشوف الجديد شنو ..
وقد كان ...وزدتها كمان جدية كنت بمشي احضر حصص في مدرسة الخرطوم الجديدة مع اصحابي ...
ومرة مرة احضر حصص المعامل في القديمة لانها كانت بعيدة من مكاتب الأساتذة ...
عارفه يا مني حارجع احكي ليك قصة كتاب الكيمياء العضوية الأشتريته من معرض السفينة لوقوس المعرض الكان بيقام في ابو جنزير
كتاب كيمياء عضوية بالنجليزي ...كان سبب دخولي جامعة الخرطوم هو وطردتي القعدتني في البريتش كاونسل شهرين ونص
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
لما إنعربت بينا القلبية ..راحوا مني كرتة و شنطونتين !!!!
______________________________________
فوضي السودان العجيب ...
كنت شغال في مكتب هندسي فى عام 1984 هو مكتب عبدالوهاب و عبود ...او كاربلن الاستشارية
كانت عندي عربية داتسون 140 واي ...بيضاء اللون ... كنت أرب بها العاصمة ربا ...
اذكر ذلك اليوم العجيب ...كالعادة كان يركب معاي زميلي في المكتب الباشمهندس المعماري بابكر شمس العُلا ...
كنت عادة بوصله اقرب موقف مواصلات وهو بيكمل لي مكان سكنه في بحري لاني كنت اسكن الخرطوم ...
قلت لبابكر ...يا حبيب انا ماشي جامعة الخرطوم نتائج التخرج ظهرت وداير اطمئن علي اصحابي الاتأخرو مننا سنة ...
معتصم الهكر ... ابوصالح ...خيري ... عمر أحمد مختار ... قال لي بمشي معاك اتونس ما وراي شي ...
دززززز ...وقفت قدام الجامعة الساعة 4 تقريبا واطمئنيت علي الشباب ... وقمنا دورنا تاني ... رجعنا بالشارع البين كلية الهندسة و بين القموسيون الطبي ...
وماشين جهة القيادة العامة ...بابكر قال بينزل هناك عندو زول شغال في القيادة بمشي معاهو بحري ...
في تقاطع شارع البلدية مع الشارع الانا ماشي فيهو ...كمية من شجر اللبخ و الشمس تجيك رقراق كده ...
اقوم آكل الأستوب قال ...وما اشوف ليك الا عربية مرسيدس من جهة اليمين محل ماراكب بابكر تجي لابسه فينا ...انقلبنا 3 مرات والعربية مع القلبة التالتة وقفت حيلها ...
انا وبابكر الاتنين كنا بنلبس نضارات ... مع الوقفة عاينا لي بعض ما شايفين كويس ... اتاري النضارات طارت و لقيناها بي صعوبة جنب القزاز الوراني ...
فوضي السودان العارمة ... اصلوا ما جابو لينا اسعاف ...وكنت انا الغلطان ... سألني بوليس الحركة ... انت كويس قلت ليهو والله ما عارف ...
قال لينا طيب اركبو معاي ...
وحياتكم ...كمان دززززززز ...ماوقف الا قدام الحركة في الخرطوم غرب ... ودخلنا للضابط المناوب ... و قالو ابيت في حراسة الحركة ...ويعرضوني علي القاضي تاني يوم ...
يعني لو كان في نزيف داخلي كنت اروح شمار في مرقة ...
المهم ضابط الليل كان رجل فاهم و قال لي حتبيت هنا في مكتب الضابط المناوب ...
الصباح جاء الرجل الصدمني كان من ناس صباحي ...مترجم في السعودية وخريج لغة انجليزية من اداب الخرطوم ...
رجل فاهم ...المشكلة كانت في الزول الجاء معاهو ...وكان راكب معاهو وقت الحادث ...من اولاد ( ابو اهلو ) تقريبا ...وعندو محل اسبيرات في المنطقة ...
طبعا شبكني ليك ( الساسيه ) حق ( المارسدس ) انفتل .... و القبينة اتعوجت ... وسمع لي الدكشنري حق المنطقه كلو ...
وقال لي نعمل تسوية بي 5000 جنيه ... طوالي اتذكرت نكتة الراجل الختف الديك ...
المهم في انتظار القاضي ... جرّت الونسة مع صاحب العربية ... وقمت سألته ياخي انت الجابك بالشارع ده شنو ؟
قال لي تعرف يا باشمهندس ...انحنا اصلا كنا بنزور زول في مستشفي الخرطوم ...وقريبي ده واحنا مارقين راجعين الدروشاب
اشتري دستة ( برتكان ) من واحد فارش قدام الاسبتالية ... و مشينا طوالي بي شارق القيادة لما وصانا مزلقان بري ... قريبي عده البرتكان الفي الكيس لقاهم 11 برتكانه
قال لي لف ارجع للزول الحرامي ده ...!!!! وفعلا رجعنا ... و شلنا البرتكانة الناقصة و قررنا نرجع بي شارغ البلدية !!!
قلت ليهو وقلتو بالمرة نكتل لينا زول في السكة طالما برتكانكم تمه !!!!
المهم الراجل كتر خيرو قال لي بتنازل ...ويجي القاضي و نقفل الملف و انت كمان تطمئن علي رقبتك ...
وحياتكم العربية 3 شهور بيستعدلو فيها في المنطقة جنب دكان ( وزة ) لاعب المريخ ...
_________________________________________________________________________
عارفين القاضي طلع منو ؟؟؟ مولانا عادل سمير ....
آيي ...عادل سمير عضو المنبر شخصياً ... ودي حكاية براها ....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
حادثة ود الزبير في داخلية ترهاقا 1983
_________________________
غرفة رقم واحد كانت ملتقي الونسة ... حيث معتصم الهكر ... و ود الزبير ...
وكانت الغرفة رقم 1 تتصل بالغرفه رقم 3 يفصلهما حمام مشترك للغرفتين ...
ذات مساء ... كانت الكلية مشغولة بمعارض و ندوات ... ولا يوجد احد تقريبا في الداخلية ...
ولكن القدر ارسلني للداخلية لا اذكر ما السبب ... ولكني اتيت ...
ميزة الغرفة رقم 1 انها علي مدخل ترهاقا تماما ... فلابد من المرور عليها ...وتعودنا علي مشاغلة معتصم الهكر ... و حرمانه من النوم الذي يعشقه ...
مررت امام الغرفة من الخارج في طريقي الي غرفتي ولاحظت ان الغرفة مظلمة ...لم استغرب فالجميع في الجامعة ...
وفجاة سمعت أنين ...شخص يتالم ... والصوت يأتي من بين الغرفتين ...
دلفت مسرعا الي الغرفة ...دخلت ...واذا بالصوت آتٍ من ( بيت الأدب ) كما كان يقول كبارنا ...
طرقت الباب بقوة ... وصوت الالم مازال يأتي ... دفعت الباب بقوة ... واذا بود الزبير ... جالسا علي المقعد البلدي ...يتصبب عرقا ولا يقوي علي الوقوف ...
اسرعت بكوب من الماء ...وامسكت به ... ( مالك يا زول ...خير في شنو ...انت كويس ؟ )
قال لي ..وبصعوبة ...جيت الحمام ...وقعدت عشان ( افضي ) ...وقبال ما اي حاجة تنزل سمعت حاجة قالت ( دججججج ) ... ولي ساعة ما قادر اتحرك من الالم ...
ساعدته بهدوء ... وهنا اتي الهكر ايضا .... وسندنا ود الزبير ...من حسن حظنا انني كنت اقود سيارتي ال 140 واي ..وكانت معي في الداخلية في ذلك المساء ...
ادخلناه في المقعد الخلفي ... وانطلقنا الي حوادث الخرطوم ...
وفي شارع المستشفي تذكرت ان الدكتور البروفسير شوقي المصري له عيادة بها وحده جراحية صغيره و مناظير ... وحتما سيكون الكشف اسرع ...
دخلنا الي عيادة ( مستر ) شوقي المصري وحكينا الموقف بالتفصيل ...
دخل الدكتور و مساعده ومعهم ود الزبير الي غرفة عمليات العيادة ...
مرت تلت ساعة تقريبا و انا و الهكر في حالة انزعاج لا ندري ماذا اصاب الحبيب ود الزبير ...
وفجاه سمعنا البروف شوقي يصرخ ...
وجاءنا وفي يده شي يشبه المقص ...وفي طرفه عضم طوله تقريبا 10 سنتيميترات ...
وسالني ...يا ابني انتو اتغديتو سمك في الداخلية ...؟؟؟ قلت ليهو نعم بس ده كان امبارح يا بروف...!!!
طيب لو في واحد منكم بينوم مع الاخ ده في غرفة واحده ...ينتبه لانو ممكن يبلعو !!!!
وبالله فهموهوا انو في حاجة اسمها مضغ ...والهضم بيبدا من هناك ... مش بلع علي طول !!!!
ضحكنا ...واتي ود الزبير ... وهنا شكرت الدكتور ...وخرجنا نسال من الحساب ...فذهب الممرض لدكتور شوقي ...وجاء صوته ...
حساب ايه يا اولاد ... انتو التعملو ( حسابكم ) من التمساح ده ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
الحسابات الخاصة في سويسرا
العام 89 كنت اعمل مهندسا ثم مديرا للقسم الهندسي في السعودية في شركة يملكها احد أفراد العائلة المالكة ( ود عبد العزيز لزم ) ...
وبحكم نوعية العمل كنت علي علاقة مباشرة مع صاحب السمو الملكي شخصياً
هذه العلاقة القريبة ليست من الضروري أن تكون مريحة ... كنت كثير السفر معه و بدونه ... مطالبه لا تنتهي و كلما كان راضيا عنك و عن عملك أراد أن يراك دائماً
كانت من أتعس الأوقات التي لا احب أن أكون قريبا منه أوقات ( السفر ) بضم السين و فتح الفاء ...
أكلهم دسم و صعب الهضم ... ولكنه شر لابد منه
وبحكم وجودي الدائم حوله كنت اسمع و آري و اعلم أشياء كثيرة
وكان أكثر شئ معروف عنه علاقته الحميمة بالبنوك السويسرية ككل المليارديرات في العالم
وكان ( أطال الله عمره ) يسافر سنويا الي أوروبا و/ أو أمريكا كل صيف و عادة يتوقف أولا بمدينة جنيف للاطمئنان علي ( تحويشة العمر ) ...
أيضاً كانت هناك عادة لكل موظف يعمل في ( معية ) الأمير قبل أن يسافر ذلك الموظف في اجازته السنوية أن يأتي للسلام علي ( طويل العمر ) ثم يستلم ( شرهة السفر ) يعني يغمت ليهو الأمير مبلغ في ظرف كهدية لزوم الإجازة و بعدها يسافر الموظف ... ناس مصر و ناس السودان و ناس الهند و ناس السند وهلم جرا ...
كنا علي طاولة العشاء في تلك الأمسية وكان الطباخ الرئيسي في مطبخ طويل العمر يدعي ( جابر ) مصري من أسوان ... طباخ ما جابته ولادة ... وكان خفيف الظل و صاحب نكته ...
كان جابر يستعد للسفر في اليوم التالي ... و كان العشاء الأخير له ... ونحن في السفره ... و بعد التحلية أتي جابر لوداع الأمير ... و معروف انه أيضاً سيستلم ظرف به ألفين ريال أو تلاته حسب المتبع للطباخين عند السفر ...
جاء جابر و معه خفة دمه و ابتسامته و لكنته الاسوانية الجميلة
فقال الأمير خلاص حتسافر يا جابر و نرتاح من أكلك المسيخ شهرين ... رد جابر ( الملح ) مش كويس علشانك انت مش صغير ...
قال الأمير وانت ولي امرى ؟؟ قال لا طال عمرك بس انت ( بتهب ) تعيش و الملح رح يتعبك ...
ضحك الأمير و حضر الظرف أبو ألفين ريال ... وقال يا جابر مسافر باكر إنشاء الله ...
رد جابر ... نعم طال عمرك ( نروه ع المتار من بدري ) انشالله
فقال الأمير : ورايح علي أسوان علي طول ؟
فرد الملعون جابر ساخرا :
لا والله طال عمرك ، ( انا راح نمر علي سويسرا في الأول نطمن علي الدولارات ) بعدين ننزل أسوان
ضحكنا كمن لم نضحك من قبل ... و قام الأمير بسب و لعن جابر بكل أنواع السب و الشتم
وحكمة ربك انتفخ ظرف الألفين و تضاعف المبلغ أكثر من ضعفين
وسافر جابر وهو يضحك ...
________________________
جابر اصبح صاحب مطعم صغير الآن في نيويورك نيويورك
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
كتب أخونا أمير في بداية البوست
Quote: يا جماعة بالله لو سمحتو ما تضايقوه بمشاركتكم خلوهو يتسلسل لينا في الحكاية لاننا متابعين وبشده ما تقطعو لينا حبل افكارنا يا اخي ..
لك التحية يا قباني |
و احد الصديقات قالت لي أنها تتابع البوست ولكنها لم تعقب أو تعلق حسبما قال الأخير أمير هنا
كل الود للأخ أمير و الصديقة العزيزة ولكن حقيقة المداخلات مطلوبة
و خصوصا أنها في اغلب الأحيان تسترجع بعض الحكايات التي قد تكون منسية
رافقونا تجدوا ما يسركم
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: Balla Musa)
|
Quote: واصل واصل
زمان لما تطلب واحد فول وعيشة والفول يكمل قبل العيشة تطلب وصلة عشان تكمل بيها العيشة
أها ياحبيب نحنا عيشتنا دى زى رغيفات المسيح وسمكاتو مابتكمل
فكل مرة بنجى نصفق يدينا ونقول ليك وصلة بالله! |
مواصلين بالحيل يا دكتور ...
| Quote: قبانى بالله السر شنو الناس لما تشرب العرقى بتنفخ؟ |
الخطة يا ملك كان لازم تكون عامل فرشة ... و تختم بي تبريدة ....
وتان يوم اول ما تصحي تشرب ليك كورة لبن قبال ما تقول آتني بالصبوح يا بهجة الروح ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
و هناك في شارع كم مش عارف ...
_______________________
الدعارة ... اقدم مهنة في تاريخ البشريه
لغة اجتمع عليها شعوب العالم جميعا ... و اتفقوا علي سن قوانينها و تنظيمها ...
كان السودان تحت الاحتلال البريطاني لفترة معروفة ... وقام الانجليز بانشاء تلك البيوت
وسماها الانجليز بإسمها المعروف لديهم وهو ( BOTHEL )
و تُنطق ( بروثيل ) ... ونطقها السودانيين في مراحل ما بعد الانجليز بال ( بروسل )
ثم اختصرت الي ( بروس ) الكلمة التي ظلت متداولة لزمان طويل ...
والتي اطلقت عليها نكات كثره ...لعل اهمها الشاب الذى اغترب حديثا وكان لا يعلم ان اهل
السعودية يسمون شوايات الدجاج بال ( بروست ) او ( بروستد ) (broasted chicken )
وكان صاحبنا جديد لنج في السعودية ... وفي ظهر ذلك اليوم اتي من كان ينزل معهم من عزابة من ( دوامهم الأول )
وبما انهم عزابة .. قرروا ان يحضروا غدا جاهز لضيفهم الجديد ...
فقام واحد منهم و قال ( يا فلان ما تجي تمشي معانا البروســـت ) ...!!!
اندهش صاحبنا ثم قال : طيب ياخوانا ما تخلوها ( تَفَلّــل ) شوية و بعداك نمشي كلنا ...
______________________________________________________________________________
كانت وقت وجود كل بيوت الدعارة من ( ابو صليب ) ... و ماشاكلها ... جرائم الاغتصاب من الجنسين شبه معدومة
اغلقت البيوت ... و بدأنا نسمع العجوز الذي اغتصب طفله عمرها 3 سنوات ....
______________________________________________________________________________
ادي قفل البيوت الي ظاهرة خروج من تطلب الشهوة او المال او الاتنين معا الي الشوارع ... و تعتمد علي وقوف السيارات ( لخطفها ) كما سميت تلك العملية
حورت بالدارجي الي ( الخَتِف ) ... وتباري الشباب في افتناء السيارات الملفته للنظر للإيقاع بالحسان من بائعات الهوي ...
اما من كان لا يستطيع اقتناء سيارة فعليه بمصادقة من لديهم ( فارهات ) ...
اما عديم الحظ ليس امامه ان يفعل سوي ما فعله ذلك الشاب الذي وقف في الشارع ماداً يده اليمني
و رافعا ابهامه في اشارة الي انه يريد ( توصيله ) علي طريقة ( الأوتوستوب ) ... فوقف له شخص ( لا يعرفه بالطبع ) و لكن كان ذو سيارة لامعة ...
و بعد عدة امتار راي صاحبنا ( صاحب الاوتوستوب ) حسنائين علي قارعة الطريق فالتفت الي صاحب السيارة و قال :
( حريـــف نَختـِــف يا ابن العم ؟؟؟ )
_______________________________________________________________________________
وهناك في شارع كم مش عارف ...
البيت الناصية ... أشجار و زخارف
و عربات تتلامع ... لمبات و رفارف
كانت هيصة ... وربّة تولول ...
ناس بتسوي الردحي الجد ...
وناس في الردحي رقيصها هزار ...
وناس بتدق كاروشة و ظار ...
وناس بتقول يا رفاعي مدد ....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
Quote: زمان لما تطلب واحد فول وعيشة والفول يكمل قبل العيشة تطلب وصلة عشان تكمل بيها العيشة
أها ياحبيب نحنا عيشتنا دى زى رغيفات المسيح وسمكاتو مابتكمل
فكل مرة بنجى نصفق يدينا ونقول ليك وصلة بالله!
قبانى بالله السر شنو الناس لما تشرب العرقى بتنفخ؟ |
بالضبط كده .... بيقولوا عليها (وصلة) وفي ناس بيقولوا (إنسانية).
حكاية الناس البتنفخ لما تشرب العرقي دي ذكرتني، في منتصف السبعينات كنت في رحلة مع أصدقاء في ربوع كردفان، وفي إحدى مدنها كان ألأحد كبار القوم (سناً ومنزلةً)، يحكي عن أيام الشباب ويبدو أنه كان من فرسان الشراب ....... أردت أن أمازحه فقلت له: يا عم فلان، ليه الناس البيشربوا لما الواحد يبلع الكاس، أثناء عملية البلع بيكرفس وشو وينفخ. الراجل عاين لي بي قعر عينو وقال: والله ما عارف .... ما كُنّا بنسوي كدي.
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
كستليته من عند مورؤص ( مرقص ) ...
_____________________________
في اخر سنة في المعمار كان مشروع التخرج حقي متحف و مركز ابحاث و قبة سماوية ( planetarium )
ورغم انو كل المعلومات ممكن تجي من المراجع ... لكن قلت دي فرصة ذهبية اكل لي اسبوعين من الجامعة و اضمهم لإجازة نص السنة
و امشي لاصحابي البيدرسو هناك ... اصيع كم يوم وكان ربنا سهلها امشي ازور القبة السماوية الموجودة في الاسكندرية ...
و ده كان العذر الأفنعت بيهو البروف االمشرف علي مشروع التخرج ...
وصلت القاهره ..الدنيا شتا ... ومصر شتاها فيهو مطره ( زمان طبعا ) حسي ريقها نشف ...
يوم والتاني وتلّبتَ عند صديقي الفردة سامي وكان بيدرس في طب المنصورة ... كان يسكن في شقة نائية ...بس قريبه من كلية الطب .ِ..
سامي كان من أولاد ( الأقباط ) ... لكن طبعا زمنا داك مافي حاجة اسمها مسيحي و مسلم و قبطي و سلفي والكلام الغريب حق اليومين ديل ...
( حيجيني واحد يقول لي : مادام ماكان في زي ما قلته ...جبت سيرة انو مسيحي ليه ؟؟ حقول ليهو شيل الصبر لي نهاية القصة ) ...
قضينا يومين حلوين و اكلنا ( الخُشاف ) الخرافي حق المنصورة المافي احلي منه هناك الا بنات المنصورة ...
ركبنا القطر بعد يومين انا و سمسم متجهين الي طنطا لحضور حفله في الجامعة و حننزل عند فردتنا التالته محمد ( قبنوش ) ...
الاتفاق كان انو نحضر الحفلة و نرجع المنصورة تلاتتنا و من هناك نمشي اسكندرية ...
ساهرنا و كانت ليلتنا ليلية ... الشباب لازم يكرموك هناك بي كل انواع الكرم الطلابي ...
الظاهر الكرم كان زيادة حبتين فنمنا تان يوم لحد الضهر ... وقلنا خلاص نمشسي لانو ( سمسم ) مُصّر يلحق الانتخابات حقة اتحاد الطلبة ...وقال بس يصوت ونمشي من هناك ..
علي بال ما صاحبنا ادلي بصوته ... فاتنا القطر و اضطرينا ناخد قطر ( قشاش ) لي طنطا و من هناك نمشي اسكندرية ...
كل الهيصة دي و ما اكلنا الا اليوم القبالو ... جوعة امها بت عم ابوها ... قلنا مع المساككه دى بس نصل عند صاحبنا الفي الاسكندرية
و الكان متفق معاهو ( قبنوش ) انو يدينا شقته كم يوم لانو مسافر السودان اسبوع و جاي ...
كان الصاحب ده طالب في كلية طب الاسكندرية ... وقرا معانا في القديمة و الاميرية ...بس كان قدامنا بي سنه واحده ... واول حرف من اسمو ( عمر شدو ) ...
وصلنا محطة الرمل ( زي ما بيقولوا ) الساعة 7 في الليل ... برد و مطر ... وجوووووع ...
وصلنا العمارة ... واذا بالبواب يزف الخبر انو ود شدو سافر امس ...طيب يا عم ماسبش معاك المفتاح ؟؟
قال لا ...بس هو كان قالي انو في جماعة سودانية هييجووو ... اعتذرلهم اني سافرت فجأه ؟؟؟!!!
يعني عارفنا جايين ؟؟ طيب بيعتذر لينا ليه ؟
المهم ...
سامي قال انا عندي شباب من اولاد الاقباط ديل ساكنين في سموحة ولا وين ما بتذكر ...... طلبة برضو ...نمشي عليهم ...
هم كتار قال و شقتهم علي قدرهم ...
الدنيا فللت و الجوع كتلنا ...قررنا نركب تكسي ونمشي للشباب ...
ما قصرو والله ...وقابلونا بي ترحاب ...وبدينا مشروع الحمام ...سامي قال هو بيستحما بعدين و لانو حيساعد الشباب يحضروا لينا ... العشا ...
وانا ومحمد بدينا الحمام بالدور ( شقه حمام واحد طبعا ) ...خشيت اول ...ومحمد كان في الغرفة الفضوها لينا بيجهز جلابيته و عدة الحلاقة ...
والمطبخ يكركب ...وبديت وانا جوة الحمام أشم ليك ريحة التحمير ...بطني خلااااص ....المهم شوية ومحمد جا يخبت الحمام ...ياخي اتخارج العشا شكلو قرب و انا ما بحب اكل الا اكون مستحمي ...
( ما جوعة بت علي ...وداير يتوهط ليها ...و القبنوش إذا توهط ... تحاسب علي اصابعينك ... )
مرقت انا ... لااابس عرقي و سروال ... ومتريح اخر بهجة ... ومشيت علي التربيزه الحيجيبو فيها المطايب ...
وفعلا بدو يحضروا ... وجاء واحد من الشباب اسمه فريد شايل ليهو صينية فيها زي 50 ريشة كستليته محمرة بانية بالبيض و العيش .... وصحن سلطة ...
قلت انا الليله رب ضارة نافعة ... ود عمك شدو شرانا لي خير ...
فريد خت الكستليته و قال لي يازول انتو ميتين من الجوع تلاقيكم ...مد يدك ما تستني انحن اتعشينا وده ليكم انتو ... بس استعجل صاحبكم الفي الحمام ...
ضربت الريشة الاولي ... قبنوش جاي علي العشا من جهة الحمام .. وسامي جاي من المطبخ شايل صحن شطة و رغيف ...
ومع القرمة الاولي من الريشة التانية ... و محمد بيمد في يده في صحن الكستليته ... سامي قال الله يا شباب دقيقة دقيقة ....
وقام سأل فريد .... قال ليهو انت دي كستليته ضاني ولا خنزير ؟؟ قبل ما فريد يرد ...نط واحد من المصريين كان ساكن معاهم ....
قال لي سامي : امال ايه ...خنزير طبعا ... ومن عند مرقص من مصر ...حاجة مافيش بعد كده ؟؟؟؟؟
ختيت نص الريشة الفي يدي .... ومحمد اتبلم ...!!!
قال لي يا حبيب الرأي شنو ؟؟؟ قلت ليهو دي كمان فوقها رأي ؟؟؟؟
قال طيب ما انحنا علي سفر ؟؟؟ قلت ليهو يازول السفر اصلو ما عنده علاقه باكل لحم الخنزير ده ...
قال لي طيب انت ما اكلت ريشتين ؟؟؟ ... قلت ليهو لا ريشة و نص ... .وما كنت عارف ...
قال لي والله انا زاتي من اُضطّرَ غير باغٍ ... ابعد لي من الريش دي ...
____________________________________________________
انتهت الليلة ...وانا و صديقي القبنوش ...كان عشانا كباية شاي وكل واحد زي خمسه رغيفات حاف ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
Quote:
إنا لله ....
يا زول أنا غيرت رأيي .... لا صاحبي ولا بعرفك.
ده النوع البطق الطير عين يرميهو من السما ...
غايتو .. نسوي شنو .... الحكي فيهو طعم الأيام الجميلة ... ما عندنا غير نتابع. |
عين شنو يابو العزائم
بدر التوم يبكون اكل ليهو حواشتين و حوض حقين فول مسافة ما اتخرجنا
ومافي أي عين مشت فوقه....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
العربية ال M M
_______________
في الخرطوم الاميرية سنة 72-73 كانو في تلاته انفار بيسوقو عربات ...
مولانا عادل سمير كان عندهم عربية انجيليا , ولا برلينا ما بتذكر ...كانت حمراء ..
واصلا احنا من ما فتحنا عيونا عادل سمير ده بسوق رغم انو قدامنا بدفعه واحده
التاني كان منصور الطاهر المقبول ... وطبعا اولاد المقبول بيسوقوا عربات قبال ما يتعلموا المشي ... ( كان جنهم عربات )
وكانت اقل سرعة عندهم ... زمن الزول بيقول في السودان كنت ( طاير ) بي ستين ...كان ناس منصور و عصام و صالح بيسوقو بي 500
اصلي ما بنسي يوم صالح الطاهر قطع بينا كبري امدرمان بالجناح الراجع ...راكبين لاندكروزر راسو قطعوها اولاد المقبول ...
الساعة كانت 3 صباحا جايين من عرس في امدرمان ... وصالح ( ما بيشرب ) لكن بيسكر بالعربات ...قرر انو يدخل في الجناح الجاي امدرمان ....
وقطعنا الكبري بسرعة 150 كده ...يعني لو لاقتنا اي عربية جاية من الخرطوم ... كان نكون بقينا سماد للدلتا حسي ...
اما الزول التالت فكان مجدي حسن ( ابدرق ) صديقي و فردتي ... وكان عايش مع جده في الخرطوم غرب ... وجده كان عنده موريس ماينور ( هَكَر ) زى الفي الصورة التحت دي ...
جدك عثمان علّم مجدي السواقه من الكُتّاب ...
المهم مجدي قرر يعلمنا السواقه في ال موريس ماينور ( الــ M M )
طلعنا انا و هو و سامي ( زول الكستليته حقة مرقص ) ...وضربنا الخلا ( كان خلا ) حق الطايف ... ومجدي قال احسن شي نسوق في الخلا داك ..
وطبعا ماسكانا فرحة مبالغة ... وبدينا نسوق ...مره تبطل ...ومرة تنط ... والموريس عربية حنينة ... لكن تقيلة جُلّه ...
المهم الواطة بدت تعصر كده ... مجدي قال لازم نرجع عشان جدو بيمشي السوق ....
قمت قلت ليهو بس كده برمه اخيره .... وقوم قال ادوس الابنص لغاية الصاج ...متأمل انو العربية ( تطير ) وهي سرعتها 45 اكتر شي ...
بس مع الدوسة ديك ....طققق ابنص البنزين راح واقع ليك وعمل ( ميت ) ....
اهااا ...دى ورطة ولا شنو ؟؟؟
مجدي قال بس لو جا زول سايق ( عجله ) ... امورنا بتتسهل !!!!
عجله ؟؟؟ كيف يعني ؟؟؟؟
المهم بعد ربع ساعة جاء شاب ظريف ...مجدي وقف اتكلم معاهو ... والراجل جاء متطوعا ... وبدوا يفكو في فرامل اليد حقة العجلة ...
وجابو ليك السلك ( الكيلومتر ) حق الفرامل ... وفتحنا كبوت الموريس ... وهنا كانت اول مره اعرف انو بدال البنزين مربوط مع الكربريتور بي سلك
بيتعشق في عصفورة البدال ( زي مشقبية ) كده ...ونفس الشي مع الكاربريتور ...
ربطنا ( سلك ) البنزين ... ورفعنا عجلة الشاب فوق راس العربية ... ومشينا الخرطوم ...وفكينا السلك رجعناهو للعجلة ...
انطلق الشاب الي مشواره ... ومجدي كان عندة ( سلك ) في البيت جابو ربطو ... وكان شيئا لم يكن ...
كل ده ...ورجعنا قبال ما جدك عثمان يمرق للسوق في مواعيده ...!!!
________________________________________________________________
علي القسم يوم داك عربية البيت عملت ريحة ... ومروحتها بقت شغاله بي سبب و بدون سبب ...
وديتها الوكالة ... قعدت يومين ...قالو السوفت وير حق العربية دايرين يعملوا ليهو ابلود تاني ؟؟؟؟ واصلو البلو تيك بيعمل كده ...!!!!
سوفت ويير ؟؟؟ و بلو تك ؟؟؟؟
قلت في سري ....يا حليل ال M M
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
سَموم ( الرياض ) في مطار الملك خالد
_______________________________
نزلت في مطار الرياض القديم زمان ...لكن معظم سفرياتي اثناء فترة عملي في الرياض ( السعودية )
كانت عن طريق مطار الملك خالد ...
وانا الحمد لله قضيت فترة من اجمل ما يكون هناك ... شغل ناجح لا يخلو من المشاكل ...
زملاء في العمل كويسين وايضا لا يخلو الامر من حفرة حفرتين ... لكن تجاوزناهم ...
يعني البلد نقدر نقول ادتنا خيرها و كفتنا شرها ....
انا كمهندس معماري ... كانت بالنسبة لي الامل المنشود في تنفيذ كل الافكار المعمارية الفي الراس و الخيال ...
واتوفقت في ذلك لاني اشتغلت في مكان ...صاحبه هوايته ( العُمران ) ... وميزته حب الجخ و ميزانيته مفتوحة ..
يعني انا شخصيا ما كنت اتخيل اني حأصمم و انفذ فيلا .. مقاس الصالون فيها 22 متر في 26 متر ...
ليه لأنو ( طال عمرو ) عنده سجادة ايرانية شغل يد ...فصلوها في سنتين ( 24 شهر عديل ) ...وداير يختها في الصالون ده !!!!
22 غي 26 دي قطعة واطة في السودان ...يتنبني فوقها بيت أمو بت عم ابوهو ...
المهم ...الامور من الناحية دي كانت ( ألسطة ) ... نو كومبلينز ...
مشكلتي الما قدرت اصلو اتخطاها ... اني لما اكون جاي راجع الرياض من سفره من اوروبا او امريكا ...
وانزل مطار الملك خالد ... ورغم انو الطيارة ملصقة تماما مع ال chute البيودى لداخل المطار ...
لفحة السموم العجيبة ديك ...البتنزلك ارض الواقع ... ديك اللحظات البتقول فيها ...انا الجابني شنو هنا !!!
وخطوتين كده ... كمان تبدا تشوف الغتر والعقالات ...بس تتشهد و تقول عليك يا الله ...
_________________________________________________________________
مره جاي راجع من لندن ... طيارتنا نزلت معاها رحلة جاية من القاهرة ... و السعودين يعجبوك مع المصرين ...
انحنا وقفنا صفنا عادي ... وبدقائق وصلو ناس طيارة مصر .... وجنهم جري ومكابسة دايرين يخلصو ...
عسكري سعودي حق جوازات ...نحييييف كده ... طلع فوق الكاونتر حقه و عاين ليك ليهم ....
قال ليهم ما في واحد منكم حيدخل لو ما اتنظمتو ....عايزكم صف واحد بس ... وابغي اشوفكم زي السبحة ...
المصريين حبايبي نفذوا زى الماحاصل شي ....
_________________________________________________________________
في نص التسعينات كده ... مرة تانية كنت ( كسرت ) الخروج والعودة ... وناس الشغل عملوا لي الفيزا و ختوها لي في مطار الملك خالد ...
وانا راجع من كندا ... في مطار لندن الخطوط السعودية فرملوني وقالو تأشيرتك منتهية ...
شرحت انو في واحده تانية في المطار ... المهم تلكسات و خلافه ...ركبت الرحلة ...
نزلت مطار الملك خالد الساعة 1 صباحا ... مشيت لواحد من ظباط الجوازات شرحت ليهو ...قال لي تعال المكتب اعتقد انا شفت تأشيرتك دي قبيل في بداية الوردية ...
قلنا خير ... وصلنا لقينا ظابط تاني ...قال ايوه هي مع النقيب احمد ...بس مقفوله بدرجه ... (إسترح يا باشمهندس ) النقيب راح يجيبلنا عشا وجاي ...
طيب ...استرحنا ....
الساعة بقت 2 ...يا شباب هو سعادة المقدم بيرجع متين .... قالو هو نقيب نقيب ... اعتقد انو راح يجيب الاكل من العليا ...انت تعرف مافي شي قريب ... !!!
الساعة ...يا شباب ... هو سعادة العقيد ما اتصل عليكم ؟؟ ...قال نقيب هو نقيب يا باشمهندس ...بس لا والله ما اتصل ... ...بس احتمال يكون ميل هنا و لا هناك ...
وحياتكم وصل سيادتوا الساعة 3 ونص ... وشايل الشاورمة و الصواريخ واخر بهجة ... شرحوا ليهو الشباب ...قال لي انشالله ما انزعجت ...والله اسف مريت علي الربع الله يهداهم
اخروني ..عندهم هيصة بالاستراحة ... اتفضل اتعشي معانا ...
قلت لا معليش بس اخلص ... عشان مسافر من امس ...
قال علي الطلاق مانت برايح الا متعشي ... لا يزعل مننا بعدين ( معذبك ) ...
قلت ليهو انا باكل ما عندي مشكله ...لكن سؤال واحد ...
انت الفيزا دى قفلتها في درجك ليه ؟؟؟
قال اي درج ... مين قال ... هدول مهابيل ... الفيزا في الدرج اللي في الصالة بره ... بس انا حطيت منها صوره هنا و سكرت درجي ...!!!!
_________________________________________________________________________________
حي الله خادم الحرمين
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: حسين ديقول)
|
Quote: إنت عارف يا يحي ... قلم الـ(بيك) بيشتغل في الشريط أحسن من قلم الرصاص؟
بس وحاتك، أطفالنا بعد شوية ما حيعرفوا الشريط زاتو. |
تعرف يابو الريش ...
مرة اولادى مشو السودان مع امهم و رجعو ... وانا موصي امهم تجيب لي لالوب و قونقليز و قراصة نبق ....
وبالفعل جابتهم ...
يوم قاعد ( بمصمص ) لي في لالوبة شحمانة كده و آخر مزاج ...
ولدي بعاين لي ... قال لي انت حتكون كويس لما تاكل الحاجة دي ؟؟؟
قلت ليهو انت لو داير تجربها هاك واحده !!!
قال لي نوو ... انا خايف انها تعمل ليك حاجة ... قلت ليهو انا ماخايف الا من حاجة واحده ....
كان فعلا جاتني حاجة و مشيت الحوادث ... انو واحد فيكم يمشي يقول ليهم انا اكلت شنو ...
الكنديين العورا ديل لو شافو اللالوب و قراصة النبق ديل ممكن يودوني الكرنتينة ....
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
1- العرس مع الجماعة عرس ..
2- واحد ( شايل ) عروسه والتاني فرحان ..
_________________
ديل مقولتين اخترعتهم قبل دقيقة ...
زمان كانت الحاجات دي عندها خصوصية ....
الان لقيت اشياء كتيره بقت علي المكشوف ...
الزول يعرس فهمنا !!
الزول كمان يهللو ليهو لأنهم فرحانين ليهو ...او ( بناء علي طلبه ) ... برضو فهمنا ...
لكن تفاصيل العروس شكلها شنو ...ووزنها كم ... ولابسة شنو ... ولا العريس عنده كم ...ولا دفع مهر كم ...
ده كلام عجيب ... ما كان متداول ...
يعني ( مثلاً ) لما الواحد يلقي بوست عن صورة العريس او العروس مفروض يقول شنو؟؟
يا سلاااام والله العريس قيافة؟؟؟.
ولا يقول بالله مش بخته ...عاينو العروس سمحة كيف ؟؟؟؟
حسي فرقنا شنو من النكتة حقة العرس الجماعي الزمان ديك ...
في العرس الجماعي بكون في زى 50 عريس و عروس في الاستاد بيعقدوا ليهم سوا ...
لتقليل عبء المصاريف عليهم ... والدولة بتتكفل ...
اها قالوا في عروس سممممحة و عريسها جنبها ...قام واحد من ( المتفرجين ) في الاستاذ قال
بالله شوفوا العروس دي سمحة كيفن ... منقة ...سكر عديل كده ده ...
العريس حمر ليهو وقال ليهو ياخي ( اختشي ) ...
قام زولنا رادي عليهو ...وقال :
أختشي ليه ...(هي ) حقتك ؟ ما حقة الحكومة ...!!!!
________________________________________
حبوبتي ما نادت جدي بي أسمه لغاية ما ماتت رحمة الله عليهما ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
غناء الداخليات ...
___________
من 78 و حتي 83 ...خمس سنوات قضيتها في سكن داخليات جامعة الخرطوم ...
بدأً من داخليات النشر ...مرورا بجبل مره و التاكا ...حي انتهينا بترهاقا ...
رغم اني من سكان الخرطوم ... الا انني قضيت جميع ( خِمسانِي ) في الداخلية ...
وكانت امسيات بهيجة و بديعة ...
كانت من أميز ما يميز تلك الخِمسان ...انو معظم زملائي الساكنين معاي في نفس الغرفة ...
بيمشوا بيوتهم خميس و جمعة ...الا من رحم ربي ...
انا كنت احب الحوامة في الليل ... وكانت غالبا تأتي بعد زرة و قعدة حارة علي ( بورد ) الرسم المعماري ...
وفي الاغلب تبدأ بعد منتصف الليل ...
كنت ادمن الحركة بعد منتصف الليل فاذهب لي تلك الداخلية لمشاغلة اولاد الاداب الغلبناهم في الكورة ....
ثم اعرج الي تلك الداخلية للاطمئنان علي واحد كان عيان ... او اخر ادوهو شاكوش ... وهكذا ...
كانت من اجمل اللحظات في تلك الحوامة سماع الأغنيات الآتية من الغرف المغلقة بإحكام ...
قعدات و قعدات ...هنا و هناك ... كانت تبدا غالبا بالغناء و الدندنة بصوت خفيض ...
فتجد صعوبة في اختلاس السمع .... ولكن بعد ( الكاس ) الخامسة ... الداخلية كلها ممكن تشيل معاهم ...
كان غرفة ناس ( فلان ) ...جنهم اغاني عثمان حسين ... مره شجن ... ومره اذكريني .... لكن بشرط فقط ابو عفان ...
كانت هناك غرفة ناس ( علان ) كلهم شيوعين ... مدورين غنا و هتاف ( حسب نوع المشروب ) مره مايو انقرض ومره يا والده يا مريم ...وهكذا ...
اما غرفة ناس فرتكان ...فما كان عندهم اي احساس غنائي مرهف او موجّه ... عندهم فرمالة وااااحدة ...بس مدورين الليل كلو
واحد يقول : دشكا دشكا دشكااااا...والجماعة بي وراهو ...اووووه دشكا ...
انحنا ما صعاليق ...اووووه دشكا ...
حاجة كانت مملة ...لدرجة اني قربت اقتحم غرفتهم و اقول ليهم ارحمونا شوية ...
لكن ربك رب الخير ... واحد من الأخوان ما بعرفه كان بيقعد وين ...ولكنه انضم ليهم ... وهنا انقلبت موازين الغناء في تلك الغرفة ...
وجاء التجديد ...باحلي ما تغني بها اهل الفن في السودان ( او هكذا ) ظنينا ...
كان الشباب يبدأ بـ ...
احرموني ولا تحرموني ...
سنة الاسلام السلام ...
وفجأه يدخل صاحبنا ( الضليع العتيد ) بي كسرة غنائية بديعه ... ويبدا ...
عسلية حوا و خميسها
بالزبيب و التين ما بقيسها
والعجب عسلية نفيسة
بالقلوب الضالة و تعيسة
البيها نسكر و نطشم دوام
عسلية حوا و خميسها
من شرابك انا ياسلام
يوم مشينا لي ناس البنية
الاعيسر قال لسه نية
والجعيّص قال ما عليّا
كبو لينا وخلوالكلام
عسلية حوا و خميسها
من شرابك انا ياسلام
يوم مشينا لي ناس أمينة
شلنا لحمة كتيره و سمينة
والجرادل طلّعنا دينها
في دقايق خلصت قوام
عسلية حوا و خميسها
من شرابك انا ياسلام
و لذيذ شرابك ...انا يا سلام
الشراب شرابك انا يا سلام
______________________
ثقافة اصبحت منعدمة في هذا الزمن ...
و في هذا الزمن ... تُف يا دنيا تُف
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
انما الإسلام قوة ... شبابٌ و فتوة ...
______________________
لو صحيت صليت الفجر ايام الجامعة ...وشالت كرعيك للميدان الغربي
المجاور لكلية الهندسة و المعمار ... بتلقي ( رجال ) صدقوا ما عاهدوا الله عليه ...
مليشيات ( الكيزان ) ...الجناح العسكري ...يؤدون تدريبلتهم العسكرية ...ورياضة الصباح لحفظ اللياقة ...
كان من ضمنهم بعض الزملاء ... منهم معنا في المعمار ... وكان هذا نشيدهم ...
انما الإسلام قوة ... شبابٌ و فتوة ...
وكاننا ( البقية الباقية ) كفار ... من كفار قريش ... وهؤلاء سيقضون علي الشرك و المشركين ...
الاغرب ...وما كنت لا افهمه ...كانوا بعضهم رغم شراسته في الالتزام بقوانين ( الجماعة )
كانت لهم شخصيات مختلفة تماما ...
كانت مجموعة منهم تسكن في غرقة دائمة الاغلاق ... ولا يختلطون مع ( بقية المشركين ) ...
كنا لا ندري ...هل كانت صلوات مغلقة ؟؟ ... هل كان اعتزال و تقرب من الله ؟؟؟
الي ان اتي ذلك الخميس الغريب ... وكنت وحيدا حيث ذهب بقية زملائي في الغرفة الي منازلهم ... علي ان نلتقي مساء اليوم التالي ...
وكنت جالسا في غرفتي ... اذكر تماما كنت اسمع ( شريط ) لعركي ... وجاء ذلك ( الكوز العتيد ) ...وطرق الباب ...
سلامات ادخل ... وين يا حبيب ... الحق يقال لم يكن فظا في تعامله ابدا مع كل ابناء الدفعة ...
لا نري تلك النظرة المنفرةالا حينما يكون مع ( الجماعة )
جلس ...وقال لي ياخي عندى طلب لو ما يزعجك ؟....
اتفضل يا حبيب ...
قل لي ياخ ممكن اشيل منك ( جوز ) كشاتين ؟؟؟
صمت رهيب .....
قال لي ...عندكم جوز زيادة ... ولا الشباب جايين ... ومحتاجين ليها ...
قلت ليهو لا ... مافي زول جاي ... وهدي الكشتينة ....
لكن يافلان القصة شنو ؟؟؟
قال لي ابدا ... اتشاكلنا وواحد احمق قطع لينا الكشتينة ....
قلت ليهو ...وانتو بتلعبو حريق و لا كنكان ؟؟؟
قال لي حريق مولع نار !!!!
قلت ليهو ( بالشي ) ...يعني مطعم ....
قال لي استغفر الله يا راجل ده كلام شنو ؟؟؟؟
قلت ليهو يعني قطيع الكشتينة ... و الشكل ... وحريقكم مجاني ؟؟؟
ضحك ...
قلت ليهو صحي ( شبابٌ و فتوة ) ....
________________________________________
هم كيزان الامس ... وحكام البلد اليوم ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
اعذروني علي بعض الكلام الشين
________________________
فكرت اوقف كتابة في البوست ده ... لانو شكلها ذكريات عجايز ساكت ...
ونقنقت كده لواحد من اصحابي متابع جيد لبوستي ده ... قلت ليه ياخي البوستات كترت و المنبر بقي زحمه ...
ساعتين تلاته البوست يغتس ... بوستات الناس الكتيره بتعمي البصر ...
قال لي ياخي الداير يشوف بيشوف ... وبعدين يا قبقب ماانت زاااتك الحكيت لي نكتة الراجل الواقف بيتفرج علي الكورة
لما جا واحد ( اتلصق ) فيهو في حركة ( قلة أدب ) ...وصاحبنا البتفرج اتضايق ... واتلفت عليهو وقال ليهو :
يا ابن العم بطل ( التلصق ) ده و خلينا نتفرج في الكورة ياخ ...!!!
رد عليهو ...وما اتحرك سنتي لي ورا ... وقال ليهو ما تتفرج انا اصلوا ( لاصق ) في عينك !!!!
____________________________________________________________________
خلاص نعمل شنو ... مزاحمننا ... لكن ما لاصقين في عيون القراء ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
تربية كلاب ...
_____________
وجود كـلـب في البيت كان من المسلمات ... لزوم الحراسة ... وكتر الحرامية وتليب البيوت ...
منذ نشأتنا ... وعينا و الكلاب في حيشانا ...
قصصي مع الكلاب لا حصر لها ..
لعل اهما كانت في سنة 1967 ..كنت ما زلت طفلا لكن لا انسي هذا الموقف علي الاطلاق ...
كنا نسكن في مدني بحكم عمل الوالد رحمه الله في وزارة الاشغال ... وكان ( بيت الحكومة ) كما كان يطلق عليه
في الحي المعروف قديما ( بالحي البريطاني ) ...كان يسكن امامنا المهندس فوراوي وزجته الانصارية البديعة السيدة اسيا الجاك ...
وجارنا الملاصق كان منزل القمندان وكان وقتها ( ابورنات ) ...
وعند تعدية الشارع الكبير كان بيت المحافظ والذي كان من قبل بيت الحاكم البريطاني ... وكان المحافظ وقتها سليمان وقيع الله ...
من الناحية التانية كان يسكن الاستاذ عبد الحي محمود ... والد الشاعر المرحوم محمد عبد الحي ... وكانت بيننا و بينهم صداقة اسرية حميمة جدا ...
كان له اخين ...فوزي ...وسعد عبد الحي الذي كان يدرس معي في مدني الشرقية و يسبقني بعامين ...
كانت والدتهم الحاجة ( عزيزة ) من اقرب الاصدقاء لوالدتنا ... وكانت تزورنا شبه يوميا ... وكان الشي المميز في زيارتها تلك ...ان لهم
( كـلـبة ) تُدعي ... ( لاتو ) ... كـلـبة بلدية ...ليس لها اصول عائلية معروفة ... كانت تضع في الحمل الواحد اكثر من 7-8 ( جريوات )
وهي علامة علي عدم تأصيل الكلــبة ...
كانت لاتو ...تتابع سيدتها في اي مشوار ... وبالتبعية كانت زيارات السيدة الفاضلة ( عزيزة ) ...ومعها الآنسة ( لاتو ) .. غير مستغربة ...
كان لنا كـلـب شبه بوليسي يدعي ( روي ) ... كان وسيما و صاحب جبرة ... وايضا كانت لنا كـلـبة وولف اسمها ( ريتا ) ...تيمنا بالممثلة العالمية ( ريتا هيوارث )
نشأت العلاقة حميمة جدا بين ( لاتو ) وبين كـلـبينا ...
واصبحت لاتو جريئة ...وباتت تبادر بالزيارات الغير مخططة لكلابنا .. واستمرت تلك الصداقة عام و نصف العام تقريبا ...
الي ان اتي ذلك اليوم ...والذي جمعنا فيه ( حاجياتنا ) هامين بالرحول الي العاصمة المثلثة حيث انتهت فترة عمل الوالد بالجزيرة المروية ...
حزمنا الحقائب .. وحملت اللواري ... وفي احد اللواري كان مُستقر الاستاذ ( روي ) و الانسة ( ريتا ) ...
كانت لاتو تنظر حزينة لذلك الوداع ... وكذا كانت اسرة الشاعر محمد عبد الحي ...
وانطلقنا الي الخرطوم ...
كانت الحصاحيصا ... محطة واستراحة هامة لكل المسافرين علي ذلك الطريق ...
وقرر الوالد وقوف الركب اولا للاطمئنان علي ان كل شي في مكانه ...ثم لشرب الشاي و القهوة ... واللقيمات الرهيبة ...
وكانت المفاجأه الكبري ...
في خلال دقائق فقط من وقوفنا ...كانت هناك كـلـبة تركض اتية ... تعبة ..منهكة ... واذا بها ( لاتو ) اتخذت القرار الشجاع
استقبلها الجميع بفرحه غامره ...وتهللت اسارير ( روي ) ... وامتعضت ( ريتا ) قليلا ...الا انها هللت بزيلها مرحبة ايضا ...
هنا قرر الوالد رفع ( لاتو ) في نفس اللوري مع اصدقائها ...
وعاشت معنا ( لاتو ) بعدها 17 عاما وتنقلت معنا من ( بحري ) فود أرو ...ثم الخرطوم الي ان ماتت ... بعد ان انجبت عشرات ( الجرويات ) ...
_____________________________________________________________
وفاء قل ما تجده في الانسان ... بالاخص في هذا الزمن العجيب ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
أُخُد العزوم
________
1978 جلسنا لامتحان الشهادة السودانية ...
وكانت امتحاناتنا في مدرستنا ( الخرطوم القديمة ) ...
والمراقبين معظمهم اساتذتنا ...
فقط كانت الادراج و الكراسي موزعة بي مهل ... بحيث انو اقرب طالب ممتحن للتاني الجنبه مسافته كافيه لعدم ( الغش ) ...
كنا ممتحنين علمي رياضيات ... وكان الإمتحان ( ميكانيكا ) ... و (ظبطونا ) امتحان ميكانيكا ( امو بت عم ابوهو )
كان فيهو مسأله ما حلاها الا صديقي باشمهندس نواري ...
مركب كده مربوطة بي حبل في طرف الموية ... والتيار ما بعرف شنو ... المهم ... اول ما شفناها الرجفيبه حصلت ...
قدامي علي اليمين كان احد الزملاء ( اللذيذين ) جدا .. ومن اصحاب النكته ...
كان كويس جدا دراسيا ... لكن هو والميكانيكا ما اصحاب ... الدخلو رياضيات شنو انا زاتي ما عارف ...
بعد ربع ساعة كده من الإمتحان اتلفت علي ... و باشاره من يده فهمت انو داير مساعدة ...
المهم رغم خطورة المسألة دي ... قلت ليهو باشارة من يدي ( نمرة كم ؟ ) ...
قال لي المرة دي بي صوت منخفض ...: اي واحده ...!!!!
الله ... امانه ما وقع راجل الليلة ...
المهم ...انا كنت عاينت للامتحان وعرفت البيهو والعليهو وحددت انو اسهل واحده المسأله نمرة 5 ...
قمت اشرت بي يدى ( خمسه ) ...
قال لي بي ايده ( اعمل شنو ؟ )
قلت ليهو ( اخد العزوم ) ...
وطبعا اخد العزوم في مسألة الميكانيكا زي بسم الله الرحمن الرحيم البنبدا بيها قراية القران ...
صاحبنا رد علي ... وقال : اخدها كيف ...؟؟؟
وحياتكم ما اتكلمت معاهو تاني ... الي ان لفت الايام و السنين ...
وكنت مسافر في رحلة بي طيارة ... والقي ليك صاحبي شغال مضيف علي نفس الرحلة ...
سلامات و احضان و حق الله بق الله ...( ما اتقابلنا سنين و سنين ) ...
بس لي شلاقتي سألته ... انت شغال مضيف من زمان ...
قال لي طبعا ... ما لوكنت وريتني العزوم بياخدوها كيف ...كان علي الاقل اكون سايق الطيارة دي ....
__________________________________________________________________
الدنيا و عجايبها ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
والله بوستك دا لاصقوا لينا في عيونا الاتنين...
قدر ما نزح جاي جاي نلقاهو قدامنا :)
غايتو مع الحكاوي دي كمّلنا العنب والنعناع وما باقي لينا الا الزغلول
وكل يوم مساهرين معاهو ... اها كان شالتنا نوما ورفدونا كمان
تشوف لينا شغلة في touch less ... شفتا الشربكة دي كيف؟
تعرف كل ما اتذكر زولك بتاع الميز بضحك زي المجنون في الحمام
في الشغل اثناء الصلاة...
كدي حاول احكي لنا قصة صاحبك بتاع امتحان الرياضيات البقى مضيف طيران والتاني البقى طيّار..
اسمع دي...
في الهند كانت بتمر بينا ايام فلس بت لزينة الواحد كان بشوف ورقة الروبية الصغيرة زي المصلاية..
في واحدة من الفلسات دي والشباب كلهم منتظرين شيكات العلاقات الثقافية وكانت بتجي في شكل خطابات مسجّلة
لمن تسمع فلان جاهو اخطار بانو عندو خطاب مسجل من السودان معناها دا شيك 400 -500 دولار
البلد كلها تعرف واي صاحب حاجة بكون جاء لبد معاك في الشقة اوغرفتك في الداخلية وطبعا الحالة
كانت واحدة بين الشباب يعني صاحب الشيك بشوف اكتر زول محتاج وبحل ليهو مشكلتو كان رسوم
امتحان او تجديد اقامة او خلافو - المهم مرت بينا فترة كدة الشباب الفي الشقة لونهم بقى اصفر من اكل
العدس المسمى ميسوري دال والحركة في الشقة بطيئة لانو الشباب ما عندهم طاقة يادوب الواحد ياكل
او يشرب العدس (حسب مستوى العدس في الحلة) ويرقد بالجنبة يقرا ليهو كتاب ولا يلعب ليهم عشرة
حريق وهم راقدين بالجنبة:)
المهم جانا شاب بالبشارة انو محمد الامين عندو رسالة مسجّلة في الكلية وفجاة دب النشاط في الشقة بشكل
ما عادي والناس باركت لبعض وشي ضحك واحضان زي يوم العيد بالظبط وقضينا ليّلتنا مسرورين
وفي الصباح الشباب استحموا واتريحوا واتحركوا بمعية العريس محمد الامين للكلية وكان في منهم اتنين
ما شافوا الشارع ليهم اسبوعين لاننا ساكنين في الطابق الرابع والسلالام دايرة طاقة ونفس مفتوحة..
المهم مشينا الكلية وزول دخل الكلاسات مافي قاعدين في الكنتين بتاع الجامعة في انتظار ساعي البريد
وشيك الخلاص...بعد انتظار جا بتاع البريد .. مــــــهمد امــــين .. صاح الرجل المبروك.. فقز محمد ودفّر
ليهو كم زول وهو يكورك .... يـــس ... يــس ... اي ام هير... المهم استلم محمد الظرف السمين وابتسامة
عريضة تعلو وجهه ... قعد في الطاولة وهو يملّس الخطاب بيديه الاتنين وطرقع باصابعة الشمال اَمراََ صاحب
القهوة انو ينزّل شاي للشباب...المهم محمد فتح الجواب وطلّع ورق كثير وبدا يقلّبه يمين شمال ما شايف الشيك
رجع تاني للورق الختاهو في الطاولة راجعو ورقة ورقة الشيك مافي ... رفع نضارتو في راسو وعصر الظرف
بيده الشمال وهو ينظر بداخله عسى ولعل يكون ملصق في الظرف برضو مافي.... محتويات الخطاب شهادة
سودانية واحدة بالعربي والتانية بالانجليزي وخطاب طويل مكتوب بخط جميل ....بدا محمد في قراءة الجواب
وهو يرجف من الغضب - بعد السلام والتحيات شرح صاحب الرسالة لمحمد رغبته بالدراسة في الهند
وفي اخر الرسالة ومحمد يقرا بصوت عالي قال له الراسل " ارجوك يا محمد ركز على المجالات العلمية
وابعدني من الدراسات الادبية" هنا وفي حالة هستيرية امسك يا محمد بمحتويات الخطاب وشرطك شرطك
وهو يردد " ابعدي من الدراسات الادبية !! انا حابعدك من البلد دي خـــــــــــــــــالص:)
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
علبة الكعك ...
_________________
كانت فترة الداخليات من امتع مراحل الحياة التي قضيناها ...
مليانة بالحكاوي ..والمواقف و الطرائف ...
زنقة شغل ...كشاتين ... قعدات ... مساطيل ... سياسة ... شعر ...
يو نيم إت ...
وكانت ايام العودة من الاعياد خاصة عيد الفطر ... من اميز تلك الايام ...
نعود جميعا ... محملين بعلب الخبيز ... والحلاوة بانواعها ...
فنضمن وجود تموين ( بيتي ) جميل لشراب الشاي و القزقزة لفترة طويلة تغنينا عن شرب الشاي بالرغيف الناشف ...
كان الجميع يأتي بنوع الخبيز الذى يحبه ... ولكن كان الخبيز المشترك و الذي في الغالب يأتي به كل افراد الشلة ...
هي علبة ( الكعك ) ...المصنوع بالسمن البلدى ... والمرشوش بالسكر الناعم ... البعض يضع فيه السمسم و البعض
يجلبه كما يجب ان يكون ...
كان منا من لا تكفيه فترة اجازة العيد للسفر الي بلده ... ولكن الاسرة ايضا كانت تهتم و ترسل الخبايز لابناءها الطلبة مع الآتين الي الخرطوم ...
حضرنا جميعا ... وجلسنا مساء ذلك اليوم علي براد شاهي فاخر جدا ... وقدمت انا من علبة الكعك خاصتي ...
وكان الكعك ناعما نعومة ( ناعومي كامبل ) ... يذوب وجدا داخل الفم ... ( الحاجة كانت خطيره في الخبيز ) ...
وكان جالسا معنا بالصدفة صديقينا احمد ... وهو من منطقة تبعد ايام و ليالي من الخرطوم ...
وابراهيم وهو من ابناء الجزيره ... وكانا يسكنان ( سوياً )
وكانت العادة ان ياتي الجميع ( بعلب خبيزهم ) و يضعونها علي الطاولة ...للمشاركة ...
وبالفعل جلب الكل تموينه ... وذهب ابراهيم و اتي بخبيزه ...
عدا احمد ...لم يذهب لغرفته لجلب اي شيئ و ايقنا لربما لم يصله التموين بعد...
اخذ احمد قطعة من الكعك خاصتي ... و مع ذوبان الكعكه في فمه ...لم نسمع منه اي كلمة في تلك الجلسة ...
و انتهت الامسية ... واستمر احمد صامتا ...
ذهب احمد و ابراهيم الي غرفتهم ... و عند منتصف الليل ... اغلقو الانوار و ذهب الكل لينام ...
ابراهيم كان من النوع القلق ... لا يحب النوم ... ورغم سكون الغرفة الا انه ظل مستيقظا ...
كان ينام في الدور العلوي للسرير في غرفتهم بداخلية ( النشر ) ... وكان بجوارة مفتاح النور ...
قال لنا ابراهيم في اليوم التالي وهو مسخسخاً من الضحك ...
انقروا امس حصل شنو ؟؟؟
بعد ما نمنا ... اسمع ليك احمد بيتسحب و مشي فتح دولابه و قعد يكركب يكركب ...
عرفت انه جعان او شي و بيفتش لو عندو حاجه ياكلها ....
وفجأه سمعت ليكم .... كعععععععععععععععع ...
فتحت النور ... والقاهوا ليكم ماسك ليهو كعكة من علبة قاااعده في دولابو ...
فقلت ليهو ده شنو يابوحميد ...يعني تموينك وصل وداسيهو ...
طيب اها ده شنو القرمتو لامن قال كععععععععععععععععععععععععع ...( وضحكت )....
ما تقولي كعك ...( طبعا ضاربين الكعك الناااعم قبيل ) ...
قال ليهو ...هيهيهي يا كبير ...
آآآي كعك ... لكن كعك حق رُجال ....
______________________________________________________
كم اشتاق الي خبيز الحاجة ... وكم اشتاق لتلك الايام البديعة ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
صاحبنا الأنيق ... لا يسف
__________________
ازمات السجاير في عهد النميري البائد كانت طاحنه ...
وكنا كطلبة لا نتحمل اسعار السوق السوداء للسجاير ...
فكان من الطبيعي ان تمر علينا ايام ...( نخمس ) فيها السجاره الواحده مع الطابق كلو في داخليات البركس ...
فكانت شماتة معتادي التمباك بائنة و مشينه ...
كانو ( يدنكلون ) سفتهم كدقار اللواري بعد عشوة ( ماكنة ) لا يستطيع الفرد بعدها ان يتعشي و يتدشي
الا بسجارة ( بنسون ) صنعت خصيصا للسودان ... ومن لا يستخدم ود عماري ... فالسفة بعد الشبعه
مثيرة للغثيان ... وقد تصل الي حد الاستفراغ ....
كنا في جلسة ( وِسْت ) ...مولعة ...نار حمرا ... الاسنافيك حايمة ...زي نكير ...
كانت ازمة السجاير في اوجها ... و كان الجميع خرمان حد الجنون ....
جلس متفرجا صديقنا ( ابو علوة ) ... و رمي امامه ( باهمال ) حقته المليئة بالسعوط ...
و كانت ( الحقة ) عبارة عن علبة لدخان الكدوس الذي يستخدمه هو ايضا ...
من ماركة ( امفورا ) ... وهي علبة تشبه ( زي ) المريخ العظيم ... الاحمر و الاصفر البرتقالي ...
لفتت نظري الالوان ... وكانت الخرمة قد وصلت الي الراس ... و الوست من زنقة الي زنقة ...
قلت له ...ده سعوط و لا تباكو ؟؟؟
قال لا ...تمباك من ( بنيش ) ...حاجة فاخرة ...
قلت ليهو ...انت مش هلالابي ...شايل علبة المريخ دي ليه... ما تخت سعوطك ده في علبة نيفيا ؟؟؟
اصلو انتو الهلالاب ( ملسلسين ) زي النيفيا ...
قال لو داير تسف وخرمان ... شيل و ما تخجل ...
عاينت لابو الزمل ( صفصف ) ...وكانت خرمته مضروبه في عشرة ... قلت ليهو حريف نجرب ؟؟؟
قال جيب ...
فتحت العلبة بعناية حتي لا ( يتفتفت ) علي ملاية الكشتينه ... والتي هي غالبا ملاية ( نصر الدين عبده ) نستخدمها عقابا
له لكثرة ذهابه الي الجريف غرب ... بمناسبة و بدون مناسبة ...
امسكت بالعلبه ...وقدمت (لصفصف ) ... اخذ منها شي بسيط ... وتبرجل و تكركب في كيفية ( تكويرها ) ووضعها داخل فمه ...
ثم اتجهت الي ( حمادة ) ...الشاب الانيق ... فقال لي ...لا شكرا انا ما بسف ...!!!
قلت ليهو يا ( حمااادة ) ... ده انتو الاخترعتو التمباك !! ... حلف ...اصلو ما عندو شغلة مع التمباك ...
قفلت العلبة ... و استمر اللعب سجال ... وعمدا تركت العلبة بجانب ( ابو حميد ) ...
و مع زنقة عالية في التسمية ... والخوف من السيك ... سرح ( حماده ) في ورقه ... وبدا لسانه في تلمس ( شلاليفه )
وهي الحركة التي تسبق البحث عن علبة البنسون ثم التدخين ...
ولكن هيهات ... لا يوجد سجاير ...
وفجأه و بدون مقدمات ... و حمادة مركزاً ... امتدت يده الي ( حُقّة ) السعوط ...
ونقرها بابهامه اليمين ... ثم فتحها ... و قام باستخدام غطائها في أخذ كمية من السعوط ...
قام بكشحها داخل فمه .... كشح العارف بها ... و بحركة من شخص متمكن ...و شبه بهلوانية بلسانه ...
استقرت تلك الكمية ( المكشوحة ) من السعوط اسفل لسانه ...
_______________________________________________________________
احد اصدقاءنا الزمان ... سأل حماده ... قال ليهو والله انت زول ظريف
انا ليه ما شفتك ابدا في الخرطوم القديمة ؟؟؟ ...
فرد حمادة قائلا ... تشوفنا بي وين و احنا السنة كلها ماشين بي وراك ...
| |
|
|
|
|
|
|
|
|
|
Re: سيرفا ...؟ سيرفا يا صعاليك !!! ( حكايات جدّي التاريخ ) (Re: يحي قباني)
|
ميرغني الشايب - الفقد بحجم وطن ...
_______________________
بعد الرضاء بقضاء الله ...
و بعد خالص دعواتي بالرحمة علي الرجل الجسور ميرغني مالك ...
احب ان اتذكر ( مواقف ) و ( محاسن ) من رحلوا عنا ...
ميرغني ... من القلائل الذين قابلتهم في حياتي ... متواضع حد الاستغراب ...
وهو رجل قانوني ضليع ...وكان صاحب منصب في الهيئة العربية للاستثمار يحسده عليه الكثيرين في ذلك الزمن ...
جمعتني معه محاضرات و ندوات في حب الوطن ... والكل يعرف ماذا كان يعني الوطن لميرغني الشايب ...
ولكني لن انسي تللك ( اللمه ) البديعة في منزل شقيقي الدكتور حسن ابراهيم القباني ...وكان اليوم خميس ...
تغدينا وكان الحضور الراحل ميرغني مالك ... والاستاذ السر سيد احمد ...واخي الأكبر أحمد ..وانا وبالطبع صاحب المنزل اخي حسن ...
وحينما يجتمع السر سيد احمد و ميرغني الشايب قطعا الونسة سياسة ... تتخللها سياسة ايضا ...
السر سيد احمد بمهنته الصحفية يجيد الاستماع و الانصات لدرجة ترهبك ... فيسمع و يسمع و يسمع ...
ثم يرد بعد ان يكون قد هضم كلما قيل ... و يحدثك بلسان الصحفي الماهر ...
الراحل ميرغني مالك ... بحكم مهنته القانونية ... يجيد الكلام ...وحباه الله بالمقدرة علي الحديث باسهاب ...
لا توجد متعة اكثر من ذلك في نظري ... تجلس و تتأدب و تستمع الي جهابذة ..
ولكن في تلك الأمسية ...وكان ميرغني رحمه الله ... في نشوة عامرة يتحدث عن تجربة ما ...
واسهب ميرغني في الحديث ...
وبعد فتره ... ياتي مثلا في مستعرض حديثه كلام عن دارفور ... فيوقف تسلسل كلامه في الموضوع الاساسي
ويقول ...وموضوع دارفور ده ..بس اخلص كلامي بجيكم ليهو راجع ...
و يعاود الحديث في موضوعه الاصلي ...
و يبحر ...ثم تأتي جمله عن حركة 71 الباسلة ... فيتوقف ...
ويقول ...وطبعا حركة 71 دي اشياء كتيرة لازم نتحدث عنها ِ.. فبجيكم راجع بس اخلص
الموضوع الاساسي ...وموضوع دارفور ...
اهاااا ... القصة استمرت بالطريقة دي ... والمواضيع كترت علينا ...
وفجأه قام السر سيد احمد ... قال ليهو يا ميرغني ياخي ...
ادينا فرصة نتكلم معاك ...الكلام كتر في راسنا و ما قادرين نتكلم ...
وانت ليك ساعتين شغال تتكلم ... و ( تحجز ) للموضوع البعدو ...
_________________________________________
رحم الله ميرغني مالك رحمة واسعة ...
فقد ...لا يعوض ...
| |
|
|
|
|
|
|
| |
يحي قباني
وضاحة
فيصل محمد خليل
أمير محمد ادريس
سامى عبد المطلب
محمد عوض السيد
الطيب شيقوق
Elmoiz Abunura
حسين نوباتيا
محمد أبوالعزائم أبوالريش
عبد الله فقير
حبيب نورة
Muna Khugali
تيسير عووضة
جميلة ابراهيم السيد
saidahmed shami
نافع الكوماوي
حسين ديقول
فيس بوك
تويتر
انستقرام
يوتيوب
بنتيريست