الحادث المريب الذي لم نجد له تفسيراً حتى الأن !!!

(عدل بواسطة محمد علي البصير on 04-20-2014, 09:14 AM)

Quote: وأمن المطار ما عارف يحدد موقع مسافر بعدما وزن عفشه ومسافر كان معاه أطفال ولا معتقلينها وعاملين رايحين !!

Quote: معليش يا ود البصير .. نسيت أسلم عليك سلام مربع حقو كنت تتصل بالخبير صلاح غريبة قالوا متخصص في الحالات الغريبة وكان جاكم حل ليكم المشكلة وفتح بيها بوست هنا

Quote: سلام الأخ/ محمد ... الأمر لا يعدو من كون المرأة قرر زوجها تسفيرها نهائياً لوطنها لظروف اقتصادية تكمن في عجز ولي الأمر من توفير متطلبات الحياة الضرورية لهم خاصة التعليم وغيره ... ويبدو أن الزوج أتفق معها على السفر والعودة وهي تعلم تماما مكره وأنه لا يريد إرجاعها ... هنالك عملية مشابهة لأسرة كان وضعها متأزم جداً في مدينة صنعاء ولكن من قام بذلك هو رب الأسرة ... الرجل ... الذي أرهق العباد وكلما تحل مسألة تسفير الأسرة تجده ينسل من بين صالة المغادرة الى خارج المطار دون أن يشعر به أحد الى أن تم تسليمه للشرطة التي تتبعت أمره حتى ركوب الطائرة .... اليمنيون هنا متساهلين نوعا ما وكثيرا متعاونيين مع السودانيين .... أما عندكم لا أدري عاقبة مثل هذا الأمر ... هل يعد دخولاً غير شرعي لللفرد بعد أن تمت اجراءات خروجه من البلد التي كان مقيم فيها ....؟ هل سيعرضها للسجن ؟ ... هنا تكمن الكارثة ... ربنا يلطف ..

Quote: سلامات يا صاحب البوست ياخي سودانير دي انا مره عملتا معاي بصورة غريبة جدا وصلت السودان لظروف وفاة وبمواعيد ضيقة جداً وكمان اكلت الاجازة وقلت اسافر في اخر يوم من الاجازة اوصيت صديق له علاقات باحد الوكالات ليحجز لي تذكرة فاذا بي اتفأجأ قبل السفر بيومين ان الطيران هو سودانير وهنا الجقلبة حصلت مني غايتو الراجل اقنعني انو الشركة انتظمت رحلاتها واجرت عدد من الطائرات اتيت في اخر يوم للتاشيرة الى المطار وموعد طائرتي السابعة صباحا فإذ بي اتفأجأ قبل السابعة بدقائق ان طائرتنا الميمونة ضربا صقر اي والله صقر واجلت الرحلة ليوم كامل كمان غايتو بعد تعب وجرجرة لقيت تذكرة طواري ووصلت في اخر دقائق تاشيرتي ومن ديك وعيك

Quote: امحمد لا حولاااااااااااااااااااااااااااااااااا انت الوداك محل ابوريالين شنووووووووووووو؟؟؟؟؟؟؟؟؟؟؟؟

Quote: الأخ محمد علي البصير, زمان المصريين كانوا بسموا سودانير ستهم, قالوا بتمشي علي كيفها وبتجي على كيفها, وقيل أن الإرهابيين ما بحاولوا إختطاف سودانير لأنها غير منضبطة وممكن تفشل ليهم المحاولة بصورة غير متوقعة. نسأل الله أن يجمع بأم الأطفال ويفرج كربتهم. بس إنت ما ذكرت كنت ماشي من ياتو مطار وفي ياتو مدينة؟ عشان نعمل حسابنا.

Quote: أخي محمد 00 تحياتي طبعا الأطفال مضافون مع والدتهم لم تخبرنا ماذا حدث للأطفال ؟؟ لا اعتقد انهم لن يواصلوا الرحلة بدون جواز سفر فمن المؤكد ان الجواز مع والدتهم الشيء الغريب ان السلطات السعودية حينما تعمل تاشيرة المغادرة سواء من المطار او الميناء فلا يسمح للشخص بالرجوع مرة أخرى الا اذا كانت هناك مشكلة يستعصي معها مغادرته وقد حدث معي بالباخرة حينما اشتريت سيارة مشئومة من أحد السودانيين وهو سوداني من النادر ان يسلم عليك واشتريت منه السيارة لحاجتي الماسة للسفر بها للسودان ضاعت منها كاميرا قيديو باكثر من 6 الف ريال وكذلك شنط وملابس ومجوهرات والسيارة كلها بـ 8 الف ريال تم كسرها بجدة وسرقة كل محتوياتها في لحظة دخولي للبحث عن فندق واكمال الاجراءات بالغرف حمدنا الله وتم شحنها واتوهطت بالباخرة وكنت على وشك النوم فاذا بالمايكرفون لاينده الا اسمي وذكروا لي ان هناك خطأ في رقم الهيكل تقول انا الكتبت رقم الهيكل وان السيارة لابد ان ترجع لاعادة رقم الهيكل عشان كنت عامل مغادرة عليك امان الله البص القدر يوم القيامة دا ركب فيهو عمكم ابوحراز فقط لاغير وركب بجواري عسكري وكأنني فجرت قاعدة امريكية في افغانستان فالخروج صعب للغاية 00 وقاموا بالغاء التاشيرة من الكمبيوتر ومن ثم تم اطلاق سراحي لأجد السيارة المشئومة في انتظاري بعتها بـ 4 الف ريال وسافرت بالطائرة يمكن عن طريق الأبناء ان تصل الشرطة الى مقر عمل ابيهم لكن السؤال 00 كيف خرجت هذه السيدة بعد اكمال الاجراءات ؟؟؟

Quote: لااتوقع انها خلت اولادها ومشت ..خاصة هي تعلم انهم مضافين في الجواز ..............فتشتو الحمامات لانو هي المسكينة بتكون اتذكرت حمامات مطار الخرطوم بشكلها المعفن داك وقالت ماتقع في المقلب الوقع فيهو الكتيريين ...مضطر تدخل لانك ح تنتظر لحدي ماالشنط تطلع ولحد مالسير العجيب داك يتحرك والجوازات الابوابها مصنوعة من الصاج تحمل حساب البنطلون وانت مارق من الجوازات ولا بتاعين الامن اللابسين شباشب ديل واقفين يحمرو في الناس ................

Quote: الأخ محمد علي البصير سلام المثل بقول: (نملة ولا خاتي .. خاتي بنى لي في بيتو). يا أخي تبني بيتك فوق بيت النملة وتجي تشتكي تقول النملة قرّصت عيالك .. يمين إنت غلطان 60 غلطان. أولاً بالتبادي الودّاك تحجز وتسافر بسودانطير شنو؟ عشان كده لا تلومن إلا نفسك. وأوعك تكرر هذه المحاولة مرة تانية وتكون المؤمن الذي لُدِغ مرتين من جحر سودانطير. تحياتي كبـّاشي الصـّـافي

Quote: يا جماعة الخير مسكتوا في الفرع وتركتم الأصل. الزوجة حُرّة تسافر ولا تقعد .. مخيّرة هي وراجلها وعيالها .. لكن لم يتكرم أحدكم بالحديث عن الناقل الوطني إلا بالقدح! لم يطرح احدكم فكرة شركة مساهمة من المغتربين لتعمل في خطوط سودانير التي وقفت بتعطل سودانير؟ كم عدد المغتربين القادرين على شراء أسهم شركة طيران منهم وفيهم وبهم ولهم؟ يستخدمونها لرفع علم الوطن عالياً.. يحققون أرباحاً لأنفسهم.. وذلك بركوبهم طائرتهم يعني زيتهم في بيتهم. شركة لا دخل للحيكومة ولا جهاز المغتربين فيها لا صرفاً ولا عدلاً. قد يقول قائل التكلفة كبيرة .. نعم كبيرة وكبيرة جداً.. لكن التمويل حتى نصف مليار دولار أميركي متوفِّر من بيوت التمويل العالمية... الكوادر السودانية المؤهلة لقيادة سفينة الشركة لبر الأمان متوفرين في أركان الدنيا الأربعة.. متخصصون في كل مجالات الطيران من وزن العفش وقطع التذكرة وحتى صيانة المحركات والإير فريم. أها رأيكم شنو في مقترحي للبدء في تنفيذ هذا المشروع؟ نريد أرائكم... والعوج راي والعديل راي. تحياتي كبـّاشي الصـّـافي