رواية الأخ أحمد الملك، سبعة غرباء في المدينة، في معرض أبو ظبي للكتاب

Quote: الكتاب سيكون موجودا في جناح أوراق في معرض البحرين 27 مارس ومعرض أبوظبي في 30 أبريل .

Quote: الكتاب سيكون موجودا في جناح أوراق في معرض البحرين 27 مارس ومعرض أبوظبي في 30 أبريل

Quote: عليكم الله لو ما عرستوا لي الشافعة دي !. مخطوبة والله يا النور. اشتهر في الحلة أن كراعه (خدرة)، ما أن يشاهد فتاة ما في احد الاعراس ترقص مثل عود من البان حتي يهجر النوم عدة ليال قبل ان يطلبها للزواج ليعرف اما انها : مخطوبة، او انها : تريد ان تقرأ، ويعني ذلك انها لا ترغب في الزواج منه وبعد ايام ينطلق صوت الزغاريد فيتساءل: دة عرس منو؟ دة عرس فلانة. فيقول وبراءة الاطفال في عينيه: ما قالوا دايرة تقرأ! لا يعرف أحد كيف سيمول زواجه، لا يملك دخلا او عملا، يصرف مافي الجيب وما في الغيب

Quote: على المستوى الشخصي لم أقرأ له سوى ما تفضل به الأخ عبد الحميد ...وأتمنى له مزيدا من النجاح

Quote: أحمد الملك الوزارة و(الحمارة) الوزارة و(الحمارة) 03-04-2014 01:52 PM بدأت رياح الشتاء الباردة المحمّلة بالغبار تغزو العالم. قال الطاهر بعد صلاة المغرب في المسيد: السنة دي البرد الظاهر حيكون شديد! قال شيخ النور: البرد حيكون أقل من السنة الفاتت وأقل من القبلها. لكن نحن ضعفنا.والجوع كتر، عشان كدة أقلّ هوا تشعر بيه في عضمك. ما شايف الناس دي ماشة في الشوارع زي السكارى! الواحد بقى زي المركب الشراعي، يحدد مشواره على حسب إتجاه الريح! الا في ناس ماشة عكس الريح! ومين غير الحكومة وناسها يقدر يمشي عكس الريح؟ وكأنه تذكر شيئا على ذكر الحكومة فقد نظر بإتجاه فارس النائم على حصير الصلاة وقال : أها حتعمل شنو السنة دي. بتقدر تاني على الزراعة بعد ما بقيت مسعول كبير والوزارة كانت (قاب قوسين أو ادنى) زي ما بيقولو في الاخبار؟ ضحك الطاهر وقال: هو وكت كان مزارع عديل ما قدر ينتّج حاجة. خليته يزرع معاي عشان خاطر والدته جات إتكلمت معاي. قالت لي الولد دة مشى عرّس ليه بت من الشرق وهسع قاعد ساكت الناس خايفة ما يلتزم في الزراعة، رفضوا يخلوه يزرع معاهم. أها أول يوم ليه معاي. مشيت الحواشة بدري لقيته متلفح في بطانية، وكت شفته من بعيد قلت الزول دة خلي بالك ما عنده عوجة ما دام بيقدر يصحى بدري كدة. أها قلت ليه مالك بدّرت شديد كدة ولا عشان أول يوم؟. قال لي أول يوم آخر يوم ما بيفرق معاي. لكن أنا جيت إستحميت في موية البابور الدافية!. قلت أهظر معاه شوية، قلت ليه مالك مستحمي بدري كدة، زنيت ولا شنو؟ قال لي: أيوة! أنا ما كنت متوقع اجابته دي. قلت ليه مش عيب تزني وأنت عندك زوجة؟ قال لي: ما معاه هو ذاته! صمت الطاهر برهة، ثم شرب من كوب الماء بجانبه، وسعل، وقال: أنا قلت الزول دة يمكن مخه ما تمام ربنا يستر على الموسم ويتستر معانا. لكن اشتغل كويس، الزول ماشا ءالله نصيح، يخبط الطورية في الواطة العطرون القوية، يقرب يصل الموية من ضربة واحدة. بعد اسبوعين قاعد شغال في أمان الله سمع صوت صفارة البص. عجبته الصفارة. قال لي دقيقة بجي راجع. تاني ما شفته الا بعد تلاتة سنين!. وكت رجع بعد التلاتة سنين. جاني أنا في نفس المحل أقرع الموية. سلّم عليّ وقعد جنبي ما جاب سيرة لحكاية ان خلاني في نص الموسم وسافر ولا أنا سألته. بيني وبينكم أنا خفت اسأله يبقى لي في رقبتي يقول داير حقه! مع أنه هو اشتغل معاي اسبوع بس لكن طبعا زول فتوة. فطر معاي وشرب الشاي وساعدني كمان شوية في الشغل. بعد الفطور سألني: ما ماشي العمرة؟ قلت ليه العمرة فتحت؟ قال لي : أنا فتحتها! ضحكت وقلت ليه: انت بقيت وزير الشئون الدينية والأوقاف ولا ايه؟ قال لي: لأ، لكن شغال مع زول عنده وكالة سفر وبنعمل للناس اجراءات العمرة والحج! قلت أشوفه يقول شنو. قلت ليه: أنا داير أمشي الكويت! إتحيّر شوية وقال لي : ما متأكد لو في عمرة للكويت لكن ممكن أسأل الزول بتاع الوكالة! أنا كنت قايله زول مدردح وقرأ شوية، لكن اكتشفت ان ما ناقش حاجة! ضحك سليمان الاعرج وقال: مشى لحاج محجوب غشاهم قال ليهم بسفركم الحج، قالوا ليه نحن مشينا وقفنا في الصفوف وفي النهاية ما لقينا طريقة والاجراءات خلاص قفلت. قال ليهم قفلت للناس المساكين لكن نحن عندنا سكة بي ورا مع الوزارة بندخّل ناسنا. أها أدوه حق التذاكر مع الجوازات والرسوم، وشال منهم كمان مصاريف سفره، و قال ليهم استعدوا للسفر خلال اسبوع. وركب البص. أها حاج محجوب وزوجته مساكين استعدوا للسفر وجهزوا الحاجات واستلموا الجوابات والوصايا للمغتربين. زولك كالعادة رجع بعد ست شهور، كانوا الحجاج سافروا ورجعوا والناس قاعدين يستعدوا لحج السنة الجديدة. يوم واقف في الشارع منتظر لي زول، البص وقف. وزولك نزل، مانع تقول بياكل في الخرطوم دي مع عمايا. تحلف تشوفه ما تقول الزول دة قاعد في بلد الجوع دي، تحلف تقول نحن مافي زمن الانقاذ. الناس كلها وجبة واحدة بس في اليوم. قلت ليه وينك يا زول الناس ديل ما منتظرنك للحج. جة ماشي علي يقدل، عاجباه صحته وقوته. قال لي: ربنا ما رفع كراعهم، أرفعها بالقوة! ضحك فارس وقال: والله أنا عملت المستحيل، لكن اتضح لي بتاع الوكالة زول مستهبل، كوز كبير بيقدر يسفر الناس لكن لازم تدفع ليه قروش تقيلة. قال الطاهر: هسع بقى في حج فاخر كمان! قال شيخ النور: حتى في الحج فرزوا الناس! هو الحج حكمته اصلا الناس دي تتساوى غني وفقير. هسع عموما الناس تساوت، في الظلم. طبقة فوق الجماعة الطيبين الكيزان وناسهم. وطبقة كبيرة تحت، ياه الشعب كله. وحتى الفقر ذاته درجات، ناس ما لاقية تاكل وناس نست الأكل، أملها كله النهار يعدي وما تجي بفوقهم طيارة ترمي براميل البارود فوق رؤوس أولادهم. قال الطاهر: أها يا فارس تجي تزرع معاي ولا منتظر ليك حاجة! بس قدّام الناس ديل لو زرعت معاي نعمل كونتراكت، والناس ديل يشهدوا، تكمّل الموسم لغاية نشيل المحصول. لو جة بص وضرب بوري، لو جة لوري لو جات طيارة ما ليك دخل بيهم! فكّر فارس قليلا قبل أن يقول: لأ ، الزراعة ما بتنفع معاي، أنا بقيت زول أفندي. معقول بعد كنت قريب من الوزارة أرجع تاني للحمارة! أنا كنت منسق الشرطة الشعبية في المنطقة دي كلها، معقول أرجع تاني تربال! داير أرتاح شوية من الشغل ، لو الناس ديل سلموني مكافأة نهاية الخدمة داير أعمل لي دكان وأقعد قدامه. - قدامه ولا وراه. انت ما زول عمار، حيجوك العذبات حتديهن السكر بالدين وبعد شوية حتقفل الدكان، لكن ما مشكلة يمكن لغاية ما تفلس ، يمكن تلقى ليك فرقة تاني مع الجماعة. قال سليمان الاعرج: أنا رأيي انت عملت خبرة في شغل الشرطة الشعبية، ودة المجال الوحيد النجحت فيه، عشان كدة افضل حاجة تعمل ليك نقطة بوليس حقتك وتشتغل براك! اصلها البلد غابة، القوي ياكل الضعيف. أحسن تعمل قانونك براك! رد فارس: قبل فترة قالوا قبضوا جماعة عاملين نقطة براهم، قبضوا ناس وغرموهم وحاكموهم. قال شيخ النور: أكيد بيكون عندهم شوية رحمة أكتر من الحكومة. غراماتهم معقولة وبيعاملوا الناس كويس ومافيش ضرب وتعذيب . فكر فارس وقال: والله فكرة كويسة لكن أخير نشتغلها من منازلهم، لأن الحكومة دي لو فكرت تنافسها في الشغل البتقلع بيه قروش الناس ما بتخليك. خلوني أجرب السكر والشاي والصابون. لو الدكان خسر بشوف ناس البنك يدوني سلفية أو توكيل أبيع السماد. -أها ولو قروش البنك خسرت! قال الطاهر: السماد ما بيخسر، مافي نسوان بيشترن السماد عشان كدة ما حيضطر يبيعه بالدين! - لو قروش البنك راحت، حاشتغل بنظرية يا الحمار مات يا السلطان مات. يا الحكومة اتقلبت، يا البنك اتحرق يا أنا ذاتي مت! ولو دة كله ما نفع؟ بمشي الجهاد! قالوا لو مشيت الجهاد الجماعة بيدفعوا ليك ديونك. انت نايم وين؟ الجنوب انفصل، لكن الجهاد برضه ما وقف، إتحول علينا نحن المساكين! قال فارس: يا زول الجهاد ما بيقيف، ممكن يغيرو اسمه، لأن الحكومة دي بدون حرب ما تقدر تقعد! ولو الجهاد وقف في حاجات تانية. زي شنو؟ نعمل اسبوع تضامن مع رمز السيادة ضد اوكامبو! نأجر لينا مكرفون وننادي الناس هنا في المسيد ونعمل لينا شوية يافطات: ندين ونشجب. حيجوا الجماعة يدفعوا لينا! ضحك شيخ النور وقال: يدفعوا ليك من وين؟ البترول وراح، هسع القروش من شدة ما بقت شوية، ما بتقضي جيش الجماعة الكبار والمؤلفة قلوبهم، عشان كدة الجماعة رقدوا سلطة في بعضهم.

Quote: أود ان أرسل شكري العميق لكل الاخوة الأعزاء. الذين شرّفوني وأسعدوني بكلماتهم الطيبة. الاخ محمد علي طه الملك والصديق العزيز عبد الحميد البرنس شاكرا له إهتمامه الكريم . والاخ علي عبد الوهاب والاخ كبر والاخ حسن مكاوي والاخوة عيسى وعبدالعزيز عثمان والفنان خالد كودي وابراهيم فضل الله. لكم جميعا كل محبتي وتقديري وأتمنى أن نكون دائما عن حسن الظن بكم. أحمد الملك

Quote: الخريف يأتي مع صفاء عفيف إسماعيل الحوار المتمدن-العدد: 963 - 2004 / 9 / 21 - 09:25 المحور: قراءات في عالم الكتب و المطبوعات الخريف ياتي مع صفاء: رواية عربية المؤلف: الروائي السوداني: أحمد الملك الناشر: المؤسسة العربية للدراسات والنشر-بيروت تصميم الغلاف والأشراف الفني: شايب لوحة الغلاف: جولياو سارمنتو/ البرتغال عدد الصفحات:262 من القطع المتوسط الطبعة الأولي:2003 "موقف الطاغية، هو موقف ذلك الذي يقطع الشجرة لكي يقطف ثمرة" مونتسكيو يفتتح الروائي احمد الملك روايته بمجتزاء من نص "غناء العزلة ضد العزلة" للشاعر الصادق الرضي،ويشكل هذا النص ملمحاً لا يغيب عن الذاكرة الثقافية السودانية حيث يعتبر واحداً من اهم النصوص الشعرية في العقدين الاخرين من نهاية القرن العشرين، وتحفل جمل النص وصوره الشعرية بجمالية تصورية فائقة الدقة لخلق التصورات عن الحلم والواقع وتستشرف أفق غد يحمل جينات وراثية من الماضي، ويعج النص بنبواءت مازالت تعتمل،وذاك احد شفرات هذا النص التي جعلت تمدده مستمر في كمون الواقع السياسي والاجتماعي السوداني وأزماته المستديرة. وقد خلق أثراً جديداً في العمل السياسي الطلابي في التسعينات فصار أحد ادوات التعبئة الإحتشادية للندوات السياسية في الجامعات والمعاهد العليا السودانية، مشكلاً ذاكرة جديد بعيدة عن شعر الجهارة الثورية الذي يخص هذه التظاهرات السياسية. وكثيراً ما تجد مجتزاءات من هذا النص المدهش مزينة بالرسوم والالوان علي جرائد كل القوي الديمقراطية وبطاقات تضامنهم ودعمهم الشعبي. وحصافة الروائي احمد الملك جعلتة نافذتة الأولي للقاري لكل يطل إلي عالم المشير الدكتاتور في عزلتة وفراغه الروحي الرهيب. يتقصي الروائي احمد الملك في خيوطة روايتة سيرة المشيرالدكتاتور الذي جثم علي انفاس شعبه لعقود متتالية، عبر ثلاثة ازمنة من عمر المشير ، فترات الدراسة وطفولة، اوج الاستبداد بالسلطة، الوحدة والفراغ الروحي والنسيان.هذه الأزمنة ليس بهذه التراتبية التصاعدية المذكورة، إنما تتداخل بين خيوط السرد المحكم لتبني نسيج الرواية في تناسق يتركز علي سيرة الدكتاتور في اوج قمعه وجبروته، وفي وهدة فراغه الروحي والنسيان، وتتقاطع أزمة الدراسة، والطفولة بينهما لتعمق ترابط السيرة الزمني. وهي سيرة تتكئ السيرة علي احداث واقعية سياسية يعرفها كل أهل السودان، للوهلة الاولي قد تلمح بين السطور ميل نحو التأرخة لكنة يتجنب ذلك ببراعة حرفية بخلق شخوص جديدة ينحو بها نحو أسطرة هذا الواقع المهيمن، ويستلهم في ذلك كل المخزون الأسطوري السوداني الثقافي المتنوع مثل "الأميرة مينيساي التي تتحول الي ريح،وتختفي تماما كما حدث لجدها الملك نيكانج العظيم، والعقيد خليفة أحمد بركات الذي تحول الي كجور ذو مقدرات خارقة فقد استطاع ان يخرج من يد المشير وهو يصافحه ثلاثة أحجار وعصا صغيرة من الأبنوس ومجموعة من العظام النخرة والفردة اليسري لبوت عسكري وعنكبوتاً صغيراً ولي هارباً بمجرد ان خرج من جسد السيد المشير،العصا التي ارسلها الي السيد المشير الشيخ الحسين ود الضرير لكي تحمية من الرصاص..." عبر سرد متزامن تتشكل ملامح الرواية لسيرة المشير الدكتاتور وفظاعة ممارسته للسلطة، وتنكيله بكافة خصومه بشهوة عارمة في التقتيل، والاستلذاذ بمشاهدة الاعدامات، ويصدر اوامره علي حسب مزاجه الدموي ودرجة إقتراب الانقلاب العسكري من إقتلاع سلطته، احياناً شنقاً حتي الموت وحينا رمياً بالرصاص، والارامل والثكالي صرن نصف سكان الوطن،فبين كل إنقلاب وانقلاب مذبحة بشرية، وأجهزة امنه تمده بالاكاذيب المستمرة وتزيف له ما يحدث في الواقع، يتحدثون عن الرخاء بينما المجاعة تأكل كل أطراف الوطن وسكان الريف هجروه بعد ان نفقت ماشيتهم وجف زرعهم وصاروا يشكلون أحزمة للفقر تطوق المدن الكبرى، يدبجون التقارير عن مشاريع التنمية التي تعمل بكفاءة بينما العنكبوت والغبار يغطي جدران تلك المصانع،والصحافة الرسمية تنسج الأكاذيب لم يعد احد يشتريها فقط باعة السندوشات لكثرة عدد ورقها وقلة ثمنها، يقولون الأمن مستتب، وقبل ان يكمل قراءة التقرير يسمع دوي الرصاص، فيعرف انهم بصدد دحر محاولة إنقلابية اخري الذي يليها مزيداً من الدماء والسجون التي اكتظت بالمعتقلين مما حدا بالسيد المشير با ن يصدر قراراً بالافراج عن كل اللصوص والمجرمين حتي يتسني له حشر خصومه السياسيين فيها. يتجول الروائي احمد الملك عبر سياحة تاريخية جغرافية فلكلورية تراثية في خارطة السودان، مما اعطي الرواية طقسها السودانوي المميز كما اشار الي ذلك د. الصاوي يوسف في مقدمة الرواية. وهذه السياحة تستهلم المكان بذاكرة شاهد العصر لسلطة المشير وهو يغرق يوماً بعد يوم في الاستبداد وفي وحدته وعزلته ووهدة النسيان التي صارت تسيطر علي كافة أوقاته، وهو الزمن الممتد الذي من خلاله تتداعي ذاكرة المشير لتكون تفاصيل هذا النسيج الممتع وهو في تلك الحالة المزمنة ينسي حتي القرارت التي يصدرها، لقد اضمحلت ذاكرته فهو يقول فجأة اثناء أجتماع مجلس الوزراء :" انا متأكد أنني وضعت ذلك الحذاء فوق المنضدة. او يقول فجاة أثناء إجتماعة مع الوزير الياباني لتسلم دعم دولته لضحايا الجفاف والتصحر:" اليوم فقد زوج من الجوارب، يبدو ان لصاً استطاع الدخول إلي البيت وسرقهما!!أو يعين وزير قبل ان يقيل خلفه، او ترشيح الموتي للوزارت، وابرز تمظهرات النسيان ذهابه الي قريته للتعرف علي بيت اسرته فيخف سكان القرية لإستقباله وهو غارق في دوامة معرفة الرموز القديمة التي كان يعرف بها بيتهم وعبر سبع ليال يحكي لهم عن كل المآسي التي مارسها خلال توليه السلطة بمزاج معتدل وليس برغبة التطهر بذكر تلك الحقائق الدامية الموجعة التي تبين بأن كل ما اهّله لتولي السلطة ما يمتلكة من ماضي ملاكم استطاع ان يحول وطنه إلي حلبة كبري هو وحده المنتصر فيها وتنال لكمته حتي مقاعد المتفرجين. تظل صفاء ذلك الحلم المورق له وجاء بإبيها الفاقد للذاكرة ايضاً،ويعلق اللافتات التي تحدد وجهته، وعيّنه وزيراً للرعاية الاجتماعية واقترح عليه ان تكون الدكتورة صفاء بنته سكرتيرة له والتي تنثر مظاهرالخريف المبكر بقدومها للقصر مقر الوزارة، ويقوم باعتقال خطيبها المحامي وتصفيته بعد ذلك ، وكان يظن بان هذا هو الطريق الي قلبها، وتختفي صفاء فجاة بإرادتها لتشكل ذاك الارق المزمن الذي استعان بكافة جبروت سلطته للبحث عنها ثم بالمشعوذين والدجالين، لكنه فشل إيجاده وتظل هي الرمز أن قوة السلطة مهما كان صلفها وغرورها بان تنال بطغيانها كل من تريد يستطيع ان يهزمها اي فعل يتم بارادة واعية. "الدكتورة صفاء التي ذابت في الوطن كانها لم تكن موجودة أصلاً، والتي بسببها تم أحصاء سكان الوطن ثلاثة مرات خلال عام واحد لكي يتسني لرجال الآمن البحث عنها في كل بيت في الوطن.عثروا علي كل سكان الوطن، عدا الدكتورة صفاء، عثروا علي لصوص هاربين، وموتي منسيين من قبل اشتعال الحرب الاهلية الأولي،وتجار ومزارعين مختبئين منذ سنوات من ملاحقات البنوك والضرائب، وشيوعيين وحزبيين قدامى". لا ينس الروائي احمد الملك ان يتذكر اشراقات الوطن عندما يقدم تلويحة زكية للروائي الطيب صالح عندما يتذكر المشير عمله كبحار في مركب انجليزي في فترة وجيزة من صباه يحكي في أحد الليالي مقابلته للدكتور مصطفي سعيد في لندن ووصفه بدقة للتفاصيل ملامح الفتاة التي كانت برفقته وهي" جين مورس" وايضاً تلويحتان للفنان مصطفي سيد احمد ، الاولي عبر السياحة الجغرافية والثانية التي يفيد بها الانتقال من زمن الي آخر عندما يتسال المشير في وهدة فراغة الروحي ونسيانه : لمن هذه الجنازة العظيمة؟ فيأتيه الجواب: إنها لفنان الشعب مصطفي سيد احمد.عبر هذا الرصد التاريخي الكارثي لأهوال الوطن الانسانية السياسية والبيئوية والاقتصادية ويتجول الروائي ليس بقصد التأرخه بل بتحديد موقفه من هذا التاريخ باسلوبه الساخر من كل هذا العبث. "الخريف ياتي مع صفاء" رواية لها خصوصويتها السودانوية،ببراعة اسلوبيتها الساخرة الممسكة بخيوط وشروط الدقة الفنية سوف تجد مكانها بسهولة في المكتبة العالمية بين "السيد الريئس" لـ استورياس و"خريف البطريك" لـ غبريال غارسيا ماركيز. بيرث 20/9/2004

Quote: شكرا عمر ومبروك لصديقك .. أخي الأصغر أحمد الشاب الخلوق شهادتي فيه مجروحة .. أما أحمد الروائي الذي بدأ يقتحم العالمية بتؤدة .. فقد أبهر قراؤه من غير القارئين بالعربية بتعبيره الذكي .. وأسلوبه الساخر الذي ينتزع منك الضحكة ومآقيك تزرف دمعها حزنا على وقائع الحكاية .. يبقيك بانتقالاته المتسارعة مأسورا بين أوراقه تطويها طيا حتى تجد نفسك قبالة الوجه الآخر من غلاف الكتاب. . لم اطلع بعد على هذه الرواية .. وليت احد الإخوة ممن تتاح لهم فرصة الإطلاع على الرواية مدنا بانطباعهم .

Quote: أكرر شكري وتقديري العميق للأخ الكريم المفضال حسن مكاوي. وإعتذر بشدة للأخت منى عمسيب التي كانت أول من رحّب بصدور الرواية لكن لسبب لا أعرفه سقط إسمها من المداخلة التي أرسلتها للأخ عمر دفع الله. فلها العتبى حتى ترضى والشكر مرة أخرى لكل الأصدقاء الأعزاء وللصديق الأخ عمر دفع الله ولكل من قد أكون سهوت عن ذكر إسمه. أحمد الملك