|
Re: *******خرمة الشوووووووووق للوطن ****** توجد مفاجأت . (Re: مني عمسيب)
|
سلام يا منى يا رائعة اسعليني انا القدامك دا اسع انا في بطن بيت البلد والله رغم المعاناة الشديدة ورغم الاحن والمحن الجاتنا من المحنونا ديل بلا اخمهم لكن بلدنا دي احلا منها كلو كلو اسع قبل شوية فطرت بي لقمة بملاح ويكاب لمن وقفت تيوة وعرقي اخرت وقلت للبنية يا بتي سوي لينا شاهي قالت لي سمح يابا واسع منتظرين الشاهي حرم حبوب الدغت لمن حسبتهم لقيت روحي كان بلعت مرتين بس خلال اربعة وتلاتين يوم نسيتو ذاتو ادوبي ساهي حرم واحول في عنقريبي من ضل الضحى لضل العصر اهلا يا حاج اهلا يا حجة اهلا يا ود سفروق اسع الباقي لي اسبوع من الاجازة وقلبي يدق مع كل دقيقة تمر تعالوا ياخ تعالووووووووووووووووووووووووووووا خلاس الشاهي جا والله صحي مع السلامة
| |
|
|
|
|
|
|
Re: *******خرمة الشوووووووووق للوطن ****** توجد مفاجأت . (Re: عبدالله ود البوش)
|
الزول الاصيل الجميل \ ود البوش . والاسرة الكريمة والبنوتة الحديقة البتعمل في الشاهي
بالهناء والصحة والعافية العصيدة المجيهة . وهنيالك يا الحبيب في بيتك وفي وطنك في اللحظة الانا خرمانة لما عندي دوشة لهذا الوطن الجدير بالشوق .
Quote: تعالوا ياخ تعالووووووووووووووووووووووووووووا |
والله يا ود البوش انا مفروض اكون اسه في السودان لاني بنزل كل سنة في شهر واحد ودي اجازتي الثابتة بقعد قرابة الشهرين وبرجع , لكن ود اخوي زواجه في نص السنة اها عشان كده اجلت السفر وانت قال ليك الخرمة دي ساكت ياهو من التأجيل الحصل والخرمة الابت تمرق . ههههههههه . تحياتي ليكم ود امي وللاهل بدون فرز وما تنسي الغبش اهلي انا . اهداء خاص ليكم يا الحبيب ولجميع الحبان بالسودان . الطير المهاجر زينا .
| |
|
|
|
|
|
|
Re: *******خرمة الشوووووووووق للوطن ****** توجد مفاجأت . (Re: مني عمسيب)
|
Quote: سلام يا منى يا رائعة اسعليني انا القدامك دا اسع انا في بطن بيت البلد والله رغم المعاناة الشديدة ورغم الاحن والمحن الجاتنا من المحنونا ديل بلا اخمهم لكن بلدنا دي احلا منها كلو كلو اسع قبل شوية فطرت بي لقمة بملاح ويكاب لمن وقفت تيوة وعرقي اخرت وقلت للبنية يا بتي سوي لينا شاهي قالت لي سمح يابا واسع منتظرين الشاهي حرم حبوب الدغت لمن حسبتهم لقيت روحي كان بلعت مرتين بس خلال اربعة وتلاتين يوم نسيتو ذاتو ادوبي ساهي حرم واحول في عنقريبي من ضل الضحى لضل العصر اهلا يا حاج اهلا يا حجة اهلا يا ود سفروق اسع الباقي لي اسبوع من الاجازة وقلبي يدق مع كل دقيقة تمر تعالوا ياخ تعالووووووووووووووووووووووووووووا خلاس الشاهي جا والله صحي مع السلامة |
ياسلام ياعبد الله باخ مالك علينا ... كتابه طاعمه وصادقه لمن تخلى الزول يتجرس فى ناس تكتب مية صفحة ماتقدر تعبر ى تعبيرك ده .... منمن .. تمنياتى لك بفضاء اجازه سعيده مع الأهل فى مقبل الأيام احترامى
| |
|
|
|
|
|
|
Re: *******خرمة الشوووووووووق للوطن ****** (Re: وضاحة)
|
حباب ود القرشي خوي ... Quote: سلام بت عمسيب ربنا يرد غربتك وتعودي لي وطنك سالمة غانمة وتبلي شوقك مع الاهل والحبان والوطن يااختي مع جراحاتو مافي احلي منو . تسلمي |
جمعآ يا ابن وطني الحبيب ارد غربة الجميع بدون فرز من الاحبة السودانين وما اجمل الاوطان بسلبياتها وايجابياتها ... الف تقدير علي المرور المريح مه اهداء يليق بك .
| |
|
|
|
|
|
|
Re: ******خرمة الشوووووووووق للوطن ****** . (Re: علي محمد الفكي)
|
" جيناك ... زي وزين عاد فارّي الجناح " " شايلو الحنين يسبق رياح لرياح؟ " " والغربة ليل طويل ... لمتين يجينا الصباح"
" جيناكييييييييييييييييييييييي زي وزين "
إلا منى... إنت كنت ساكنة في امدرمان الثورة الحارة التاسعة الشنقيطي؟ وأزيدك من الشعر بيت.... شقيقة الدكتورة رشيدة؟
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
الأخ الكريم \ اسماعيل ..
Quote: " جيناكييييييييييييييييييييييي زي وزين " إلا منى... إنت كنت ساكنة في امدرمان الثورة الحارة التاسعة الشنقيطي؟ وأزيدك من الشعر بيت.... شقيقة الدكتورة رشيدة؟ |
بأين عليك صديق مجهول الهوية موقتآ هههههه . معلومات صاح الصاح . ودكتورة رشيدة اتوفت ربنا يرحمها ما عارفاك عرفت ولا لا . عمومآ كلنا راحلين وبتنمي لو اكون سعيدة زي رشيدة واموت في وطني واندفن بجوارها . تحياتي ليك يا معرفة والتوجه الي الخاص للمزيد من المعلومات لو سمحت .
بالمناسبة حاولت انزل صورة رشيدة لكن فشلت بحاول المرة الجاية انزله والله بقينا نشتاق للشينة لو صعبة زي ما قال الفنان حمد الريح . طبعآ يا صديقي مجهول الهوية لأجل مسمي اسماعيل رشيدة كان فنانها المفضل وردي كدي النهدي ليها في علياها وطولة العمر ليك انت برضو اغنية لي وردي . كانت الاستاذة بتحب ( مرحبآ يا شوق )
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
آآآآآهـ يا منى أحقاً ماتت رشيدة عمسيب؟ ما هذه الآهات والزفرات الحرّى التي تنفث مني؟ ما هذا الكم من الدمع الذي أغالبه واعتصره في مآقيّ المتقرحة؟ ما هذه الصورة الماثلة أمامي التي كلما أمعنت في خيالها أيقنت أن أمثال الدكتورة رشيدة لا يعيش في زمن مهترئ؟ إذاً، ذهبت رشيدة وانتزعت معها الزمن السمح وسمو الروح واللباقة والرشاقة والأنوثة وكل شئ جميل، لأنها جميلة، تلك الرشيدة... جميلة في كل شئ، سمحة في كل شئ... ******************************************* دخلت جامعة الخرطوم قادماً من أقصى جنوب كردفان، من مدرسة أبوجبيهة الثانوية العليا وكانت تلك الدفعة الرسمية الأولي التي تمتحن للجامعة. وعند السنة الثالثة جمعني التخصص في اللغة الإنجليزية مع الأستاذة المنتدبة وقتها (المرحومة الآن) الدكتورة رشيدة. وكان عددنا قليلاً، فجامعة الخرطوم في ذلك العهد لا تخرج في اللغة الإنجليزية أكثر من 15 طالباً في اللغة الإنجليزية. كانت الدكتورة رشيدة متميزة في اللغة وكنت معجباً بالكثير من الصفات التي تتميز بها. وربما أنها لاحظت أن هذا القروي الصامت والبعيد عن المخالطات الذي تخصص في لغة إنجليزية وفرنسية في آن واحد وبالتالي يقضي معظم وقته في مكتبة جامعة الخرطوم، معجب بثمة شئ. أعجبتني في رشيدة أشياء جمة، منها الصراحة وحب الخير للجميع والاهتمام بالجميع، وفوق كل ذلك مشيتها. لم أرَ في حياتي امرأة تمشي وتعد الخطى متزنة وواثقة مثل رشيدة عمسيب. ودارت بيننا الحكاوى البريئة والجلسات العلنية التي كنت أتهيبها وأخافها خاصة من بنات الخرطوم ذوات الثقافة العالية. وفي يوم ما قلت للمرحومة رشيدة. أنني قبل دخولي الجامعة كنت أسكن في الثورة الحارة التاسعة قرب محطة الرومي مع شقيقي وعذابة. فطلبت مني أن أزورها في منزلها الكائن بعد محطة حميدان. فقمت بالزيارة الأولى. استقبلتني رشيدة عمسيب ببشاشتها التي لا تفارقها أبداً. عرّفتني بأفراد الأسرة: الحاجة أم الحسن، الشقيقة بسمات، شاب ابن عم يدعي عمسيب، وشقيقة اعتقد اسمها كوثر ومنى عمسيب وكانت طالبة في الثانوية العليا. ولأنني أحب الفن، لاحظاً عوداً كان على ظهر الدولاب. الزيارة الثانية كانت بدون مواعيد ولكني حضرت احتفالاً بمناسبة عيد ميلاد منى عمسيب...... توطدت علاقات الزمالة برشيدة وكانت صديقة للبروفيسور أليس سودسكي الأمريكية أستاذة الأدب الإنجليزي. وفي يوم من الأيام طلب مني أحد الأصدقاء وهو من معجبي زميلة المنبر الأستاذة نور تاور أن نزور نور تاور. فعزمت المرحومة رشيدة وذهبنا نحن الأربعة: رشيدة وبروفيسور أليس والصديق علي عبد الرحمن وشخصي إلى منزل الأستاذة نور تاور الكائن في أبوروف بعد أن قطعنا كبري بحري-أمدرمان مشياً. وجدنا اللواء/ جوزيف لاقو والأستاذة نور تاور وآخ آخر يتناولون السياسة. كانت رشيدة هي نجمة اللقاء بما تملكه من لغة إنجليزية رصينة جعلت اللواء يأخذ عنوانها لإجراء مقابلة معه. شاءت الأقدار أن نفترق مع رشيدة بعد التخرج باتجهت إلى دول الخليج ولم أسمع شيئاً عنها إلا عند مقابلة بعض الزملاء لاجترار ذكريات الجامعة. في عام 2010م وبعد أن استقرت أسرتي في الحارة 14 الثورة بسبب دراسة البنات في جامعة التقانة، قررت البحث عن رشيدة بعد فراق قارب العقدين. تغيرت معالم الحارة التاسعة ولكني فرغت نفسي يوماً للبحث عن رشيدة عمسيب لمعرفة أحوالها وأحوال الأسرة وهل تزوجت ولها أبناء وهل كبرت وهل حضّت دراسات عليا من عدمه. علمت من صاحب أحد البقالات أن رشيدة مقيمة في الجهة الغربية من شارع الشنقيطي في عمارة بالدور الثاني، وفي تلك اللحظة حضر أحد أقربائها فأعطاني رقم هاتفها. اتصلت على رشيدة وكانت المفاجآة أنها لم تصدق أنني ما زلت حياً. في المساء أصطحبت اثنين من بناتي وذهبت إلى حيث تقيم رشيدة. وفي بهو الشقة استقبلتني المرحومة رشيدة عمسيب استقبال الشقيقة التي فارقت شقيقها لعشرات السنين... كانت لحظة مؤثرة بالجد يا منى....وعرفتني بولدها وابنتها وربما بنت أخرى لم تكن متواجدة وقتها. وعدت رشيدة بالعودة بعد يومين بعد أن سألتها عن أفراد الأسرة فأخبرتني بوفاة الوالدة وسألتها تحديداً عن منى عمسيب فقالت لي أنها في هولندا...... ولكني لم أرجع لرشيدة بسبب قتل الحركة الشعبية (التي تدافع عنها منى) لشقيقي في قريتنا بجنوب كردفان وتحديداً في خورالدليب أثناء ذهابه لصلاة الفجر وصادف غادرة من الحركة الشعبية على القرية.... اتصلت على رشيدة عمسيب من خورالدليب.... فبكت.....
عفواً أحبتي الأعزاء عن الخروج عن موضوع البوست وهو الغربة وأشجانها وعذاباتها وآلامها، ولكن الكلام يأتي بالكلام. فزميلتي في جامعة الخرطوم الدكتورة رشيدة عمسيب شقيقة الأستاذة منى كانت من أقرب الناس إلى شخصي وهي التي عرفتني على أسرة هذه المنى والتي أعرفها جيداً. منى عمسيب زادتني وجعاً بالإضافة إلى وجع الغربة التي قاربت الثلاث عقود. منى عمسيب رسمت على وجهي سحابة سوداء من الحزن والكآبة والكرب عندما أتتني بنبأ وفاة حبيبتي رشيدة عمسيب..... إسماعيل الفضل ببـــــو
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
الاستاذة الفاضلة ابنة عمى عمسيب
لك و اضيوفك التحايا الطيبة و التقدير
انه السودان .. بلد رائع بروعة الشرفاء من أهله و الكرماء من السودانيين ..
لكم هو شرف و مكرمة لنا ان نكون من السودان .. فليحيا السودان حرا كريما ..
بوست رائع بروعة بنت عمى و ضيوفها ..
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
صباح الجمال .. وصباح الأمل ... صباحك يا وطني ..
ومن هنا ومن نافذة هذه الخرمة الوطنية ... بنرحب بالزملاء الجدد بالحوش .
الأخوة الاعزاء الجدد : قصي .. حاتم ... معتصم ...معتزالحلاوين ...
وبنتمني ليكم اقامة سعيدة .. واوقات مفيدة ... ودمتم لنا اضافة حقيقية .
ولكم اهداء ( امونة ) .. بت من شرارة نار الله في الزمن الجليل . كلمات . امين صديق لحن غناء طارق ابو عبيدة .
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
صباحاتكم بيض ... وما اجمل الصباح .. يوم جديد صفحة جديدة ملئية بالمفأجات واسرار الحياة , والتوقعات , والانتظار وصباح الشوق للوطن هو العنوان الرئيسي لاجندة هذا الصباح ... وصباحك يا وطن .
يا غاية الآمال لو دعاك الشوق ... الدعوة حا تكون مننا .
| |
|
|
|
|
|
|
Re: ******خرمة الشوووووووووق للوطن ****** (Re: مني عمسيب)
|
ما أجمل الصباح ... وصباح الجمال والخير عليكم .. وصباح الادعية المستجابة لهذا الوطن المتألم كما تألم شعبه .. معآ لنشر السلام والطمأنئنة المفقودة .. صباحك يا وطن .. في هذا الصباح وبمناسبة اليوم العالمي لجميع نساء العالم .. احي واهنئي جميع نساء العالم وتهنئية خاصة الي نساء وطني المناضلات .. الصامدات رغم المحن .. احي نساء دارفور في جميع المعسكرات ,, ونساء جبال النوبة الصابرات علي ويلات الحرب المجنونة ! ونتمني اليهن غدآ مشرق وحياة افضل .. وندعوا الله ان يستجيب لرفع الظلم عن اهلنا في جميع ربوع الوطن الجريح . ودمت يا وطن تسع الجميع .
***انه صوتي انا ***
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
الي عشقي الي وطني ... صباح الخير والآمال . وصباح الخير علي جميع الاحبة داخل وخارج هذا الوطن المقدر .
وصباح ابتسامة حميد المشرقة ..
رجال في ذاكرة الوطن ... ( حميد )
حلاوة ابتسامة رجولة وشهامة وعزة وكرااامة وقصائد حمامة وغصون السلامة وتعيش يا وطــــن
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
صباح الآمل .. وصباح الجمال ... وصباحات الوطن الدائم ... صباح النجاحات المفرحة للاحبة الزملاء خارج الحبيب الوطن ... كما عهدناكم ايها الاخوة السودانيين رموزآ مشرفة ... ومنكم وعليكم العشم ودمتم لنا رايات زاهية ومشرقة مرفوعة لرفعة هذا المعشوق .
حبيبنا مصطفي ود السني ...اسعد صباحك .... وانت تستمتع بهذا الصوت العريق ..
| |
|
|
|
|
|
|
Re: ******خرمة الشوووووووووق للوطن ****** . (Re: علي محمد الفكي)
|
Quote: وهذا الوطن الجميل يا منى يسعنا جميعاً اذا تواثقنا على حبه بصدق وعلى حب بعضنا البعض واحترام الاخر شكراً لك على هذا البوست المريح |
يا ود الفكي ... اصبحك الله بكل خير .. وطيلة ما انتوا من هذا الوطن الحبيب ماليييييين يدينا وما بتجينا التكتح بأذن الله . تسلم علي الطلة المشرقة .. وصباحك خير انت والمريود الوطن .
ولي قدام ...
| |
|
|
|
|
|
|
Re: ******خرمة الشوووووووووق للوطن ****** . (Re: مني عمسيب)
|
. . ( روِّحوا عن القلوب ســاعة )
العزيزة منى .. هذا الألق وهذا الجمال لا يأتي إلا من روح شفيفة .. نحن في حاجة لأن ننفض ما علق بنفوسنا من رهق ، وأن نمسح ما علق بقلوبنا من شوائب .. تجاوزاً لماضي مُغبَر ، واستشرافاً لصباحات أكثر إشراقاً . البلد ، الأهل ، مراتع الطفولة والصبا ،الوطن الكبير ، كلها منى .. محفورة في شغاف القلب وجِدار الذاكِرة .. ليس لنا منها فكاك مهما طالت غربتنا ، ومهما بعدت بنا الشقة !!
كُل المحبة
| |
|
|
|
|
|
|
Re: ******خرمة الشوووووووووق للوطن ****** . (Re: محمد فضل الله المكى)
|
Quote: البـارِح طِـريت ناسـاً فُراقُم قاسـي كاتِلني الغـرام بحـراً ما ليهو مراسي المواجِع صدَّت واصبحتَ ماسِك راسي يا لحّـاق بعـيد خـابر الدَّرِب ولا ناسي
لزوم ما يلزم |
اشتقت الوطن اهلو وكمان لترابو والناس العزاز الحاشا مو بتسابـو خليت العشم راقــــد حـــدي تيرابو ولا بد من نعود ليك يا المخدر دابو
يا ود دفع الله يحفظ الله ... وكتر خيرك وتلقي الفي مرداك . اها ما انسي لحن الصباح هدية ليك .. ان شاء الله يعجبك .
لحن الحياة منكم يا أهل الحوش الاسرة الجميلة ....
| |
|
|
|
|
|
|
|