ابوكم مين؟ .. نميررررري .. .. في الوقت الذي كنت مهموم فيه بتجميع اكبر عدد من الحصوى .. التي تصدر ضجيجا عاليا وربكـة في مؤخرة البص الأصفر الذي يغادرك وهو يتنفس دخانا لا يساهم باي حال من الأحوال في تهتك رئتيك او النفاذ إلى الشعب الهوائية محدثا فوضى .. عكس بصات الوالي وقبلها بصات النقل التعاوني وبعدها رقشات وامجاد الولايـة التي ما ذالت تثبت ان الولاية بلا امجاد .. ولا أمــة .. ولا اشتراكية .. ولا مية المية ولا اي حاجة .. .. عندما استدار الابورجيلـة نصف دورتـه تلك وتسيد العادم الموقف .. وتسلطن سائقه .. كان ميدان ابو عنجـة مغطى بسحابات من الدخان الكثيف .. تعلن ان البص في طريقه إلى حدائق مايو .. او استاد الخرطوم أو إلى اي جهة كانوا يخبرونها جيدا تحاك فيها المهرجانات بشكل جيد يتصالح فيه الجميع مع انفسهم .. شيبهم وشبابهم صبيانهم وبناتهم .. ويستمعون لحديث الرئيس القائد .. وهو يحكي لهم في خطابه الجماهيري الموجه للامـة والذي ما كنا نفهم ما فيه سوى .. تكرار كلمة الثورة والتي يستميت فيها الرئيس القائد لغويا بان يخرج لسانـه بشكل يعبر عن عنفوان شباب هذا الرجل ومحبة الشعب لـه .. وتتوالي الزغاريد من موقع الحدث او من امام شاشات التلفزيون في المنازل . خمشت ما تيسر من الحصاء البلدي من .. تراب البلد .. نفست فيه من اشجاني مرات .. حسبت بدقة متناهية المسافة التي يمكن من خلالها ان اتسلل بالزقاق الضيف والذي كنا ندفن فيه سوءتنا أو كل ما زاد من حاجتنا عينيا ونقديا .. قذفت بخمشة الحصوى كما هي .. في مؤخرة البص .. تدحرجت ذرات الحصوى .. علقت في المسافة ما بين سير المروحـة وما بين مساره المخصص .. توقف البص عن التنفس واصدر اصواتا مزعجـة .. حينها انطلق الجميع من خلفي يهتفون .. ابوكم مين .. نميري .. ؟؟ ابوكم مين ؟؟ .. نمييييري .. وافرغوا البص من كل اللالوان التي كانت بداخله .. من طلائع الثورة بالاخضر والكشافة بألوانها المختلفة والمرشدات .. والمليشياء وحملة اللوحات الخلفية .. وفي لمح البصر .. تدخل باص آخر وحمل كل الاصوات وهي تهتف .. ابوكم مين .. رئيسكم مين ..؟ حبيبكم ميـن ..؟ (نميييييررري) ... ملحوظـة: في الوقت الذي كنت مشغول فيه بقراءة بعض الهتاويل والتهاويم التي تاتي من تجاه الفيس بوك في شكل اماني .. وامنيات ثورية يبثها الثوريين والثوار في آن واحد ليضحضها العقل العادي .. وذلك عن اخبار يحملونها بتشنج ويوزعونها عن غزو .. واحتلال .. وقلع .. وفقع اعين .. ستقوم به الجماعات التي ستحررنا من دنس الانقاذ .. وتعود بنا إلى عصر ما قبل الانقاذ .. ومن ثم إلى عصر يطاردون فيه الرخ .. والعنقاء والماموس في حواري قاردن سيتي والمعمورة .. والخرتوم اتنين .. لينتهوا بقبض الديناصور وذبحـه الكديسة له في عفراء مووول .. وسط الهتافات التمجيدية ، التي تصدر من حلاقيم انصاف المثقفاتية وارباعها .. لفت نظري وقتها صديقي .. المثقف الجد جد .. حاتم الياس .. هو في الحقيقة ليس صديقي مباشرة انما صديق اخوي الاصغر مني لكن لو سالتوني عرفت من متين .. فهو عرفت نت ساااي .. لفت نظري وهو يعلن عن انجازاته الثورية والتي تمثلت على جد قوله في : 1- انه من قبل قام بفرتقت تلاتة حفلات على التوالي .. 2- انه قام بتكسير تلاتة ازيار خاصة بقسم الشرطة أو الشرطة الشعبية ايها اقوى لا ادري .. 3- كما قام بتحريض ابناء الحي وذلك بان لا يقوموا بتجميع جلود الاضاحي ووهبها للجنة الشعبية بالحي .. اعجبني هذا الحماس الثوري .. من حاتم وبصمت بالعشرة لثوريته .. لانو حركتو دي والله ما يعمله إلا ثوار مايو .. والذين هم ابناء الرئيس القائد جعفر محمد نميري .. الذي تغنى له ثوار ومناضلي اليوم .. وكل فنانئي السودان من قبل .. ايدناك بالروح والدم ايدناك في كل مكان .. الجنيات بشرو وليك البنات زغردن .. يا حارسنا وفارسنا ويا جيشنا ومدارسنا قائد الشعب يا نميري .. يا امل الشعب يا نميري .. .. المهم .. المسالة حسع دي لقوها باردة واحدين يقولو ليك تعال اقلعه بالبندقيـة .. والتانيين يقولو ليك بنقلع بيوتكم .. واولاد نميري الزمان بتاعين الطلائع والرواد تدق الواحد فتاشـة .. يقوليك انا جبهـة ثورية وعندي جواز امريكي ..
05-25-2013, 11:29 AM
أمير محمد ادريس
أمير محمد ادريس
تاريخ التسجيل: 01-17-2013
مجموع المشاركات: 1248
Quote: بالمناسبة .. داوم علي شراء الانتباهة .. في زول بسرق في بوستات امدرمان دي ..
والله يا حميده دا كلام عجيب جدا .. طبعا عادي جدا الزول البجازف دا بيكون فرحان بي الحركة بتاعت امدرمان دي .. المهم حسع دي انا الليلة اتنفس انفاس الحرية بالنسبة لعيد ثورة مايو وكدا .. بكره طوالي نعمل فرش متاع بالنسبة للقصة بتاعت الانتباهة دي ... يا عملنا جمعية مضادة نوازي بيها الاحداث .. يا كمان انتظرنا الجبهة الثورية تجيب لينا حقنـا .. ..
05-25-2013, 12:23 PM
tmbis
tmbis
تاريخ التسجيل: 10-19-2002
مجموع المشاركات: 24862
الله يسلمك يا امير .. عاملين كيف الفترة الفاتت دي مع الثوار ..؟ اهو الواحد قال يجي يطل في عيد الثورة المجيدة دي .. ويعمل فرش متاع للناس .. عشان ما تنسى اليوم الخالد دا .. شكرا يا امير .. والف مرحب بيك
05-25-2013, 11:35 AM
garjah
garjah
تاريخ التسجيل: 05-04-2002
مجموع المشاركات: 4702
Quote: قذفت بخمشة الحصوى كما هي .. في مؤخرة البص .. تدحرجت ذرات الحصوى .. علقت في المسافة ما بين سير المروحـة وما بين مساره المخصص .. توقف البص عن التنفس واصدر اصواتا مزعجـة .. حينها انطلق الجميع من خلفي يهتفون .. ابوكم مين .. نميري .. ؟؟
قصدك
مايو علمتكم الشفتنة
موش براك
وناس الجبهة الثورية كمان
حليل مايو يا تمبس ليتنا لم نثر عليها
05-25-2013, 12:33 PM
tmbis
tmbis
تاريخ التسجيل: 10-19-2002
مجموع المشاركات: 24862
Quote: قصدك مايو علمتكم الشفتنة موش براك وناس الجبهة الثورية كمان
قرجة يا لذيذ ..ازيك ياااخ ..؟ والله نحن مايو دي كان نقشنا فيها حاجة يا اكلنا لينا فيها خريفين تلاتة .. والله حسع دي العاملين فيها شفوت احزاب ومثقفاتية منابر الكترونية ، وعضلات حركات مسلحة ديل .. كان عرفو حاجة .. واهو زي ما شايف الكانو مفتحين عين واحده بس زمن مايو .. عاملين ليك فيها هم العارفين اي حاجة .. لكن داسين قصة مايو دي .. ومكبرين اللفة للدين .. واديك ميزة تانية .. احتمال كبير جدا حسع دي يجيك واحد راكب ليهو منطاد يشبكك يا بتاع مايو .. ويا شنو كدا ما عارف .. ويوقع ليك تحت بالاحرف الاولى ( ح ش ) يا (ج ث )
05-25-2013, 11:40 AM
Frankly
Frankly
تاريخ التسجيل: 02-05-2002
مجموع المشاركات: 35211
التحية لابعاد البطل .. في مرقده الابدي .. عليه الف رحمة ونور .. ..
Quote: أهم مرحلة في مراحل أب عاج هي مرحلة استئصال الفكر التكفيري الجمهوري المتخلف
يا فرانكلي .. البطل جعفر نميري .. انجازاته عديدة جدا من اهمها .. ايضا ، القضاء بالكامل على فلول الشيوعية .. بالرغم من تسجيل اعجابي من ثبات الذين تم اعدامهم من ضباط ولشجاعتهم النادرة .. التي عرفت عنهم وقتها .. نفس تلك الشجاعة التي واجه بها الشيخ محمود حبل المشنقة.. ولو كان نميري بنفس عنفوانه موجود غلى تاريخ هذا اليوم بيننا .. لما تطاول احدهم على شبر من اراضي السودان .. ولما تطاول احدهم على شعب السودان .. لكـن انه الترابي .. راس الافعى السامة
05-25-2013, 12:51 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
حمدالله على السلامة يا تمبس وكيفك وكيف الزميلة عساكم بخير يا تمبس نميري لم يكن شيطانا نعم لكنه كمان لم يكن ملاك وولغ في دم السودانيين سواء أكان شيوعيين ولا كان أنصار ولا غيرهم يحمد له اتفاق اديس أببا الحقن الدماء مع الجنوبيين لكن يحسب عليه ايضا نكوصه عنه و تسببه في اندلاع تمرد 83 أخطاء نميري كثيرة وكبيرة و محاسنه كذلك لكن بالمحصلة ومقارنة بمن اتى بعده - وأعني الإنقاذ تحديدا - ففعلا ابونا مين ... نميري
05-25-2013, 01:08 PM
tmbis
tmbis
تاريخ التسجيل: 10-19-2002
مجموع المشاركات: 24862
Quote: يا تمبس نميري لم يكن شيطانا نعم لكنه كمان لم يكن ملاك وولغ في دم السودانيين سواء أكان شيوعيين ولا كان أنصار ولا غيرهم يحمد له اتفاق اديس أببا الحقن الدماء مع الجنوبيين لكن يحسب عليه ايضا نكوصه عنه و تسببه في اندلاع تمرد 83 أخطاء نميري كثيرة وكبيرة و محاسنه كذلك
ازيك يا ابو ترتر .. عساك بخير وعافية .. نحن الحمد لله كلنا بخير والزميلة ايضا .. تعرف يا ود البشرى .. مسالة حكم رشيد دي ومن غير دم .. إلا تكون في (الشطرنج) .. الاختراع بتاع معركة بدون دم .. يا كمان زمن سيدنا عمر .. عدل وانصاف .. وتوزيع حقوق .. حسع انت ما شايف البرير مكنكش فيها كيف .. والهلال واااقع في الحفرة .. ويجي يقوليك انا جيت بالديمقراطية وواحدين لحدت الآن بيهتفوا ليهو .. لــــذلك .. الاحداث السياسية وقتها مقارنة بعمر السودان وقته كانت كل العوامل تتشكل لدولة ، فكانت النفاجات فيها مفتوحة من كل الاتجاهات .. بعدين الناس زاته ما فتحت وقتها ولا كان في فيس بوك ولا سودانيزاونلاين .. عشان كدا الضرب كان تحت الحزام .. احداث الجزيرة ابا .. حسن حسين 71 76 وإلخ .. إلخ .. مثلها مثل جميع امواجهات التي قابلت ما يوازيها من تصرف يستلزم .. وغلى تاريخ هذه اللحظـة .. ابونا نميري ، واكلس من مر على سدة الحكم بالسودان ..
05-25-2013, 12:55 PM
جمال الباقر
جمال الباقر
تاريخ التسجيل: 12-14-2008
مجموع المشاركات: 2237
ازيك يا دكتور ..؟ والله لو اديته بحيت كا واستبيانات ونظام احصاء .. ح تلقى الناس دي كلها تحتها خط بالذات بعد المشروع الحضاري دا .. الواحد تجيب ليهو سيرة نميري .. يرجع لي ورا كدي ويدخل ليهو قشة فبين سنونو ويقوليك يا اااحليل ابعاج ..
05-25-2013, 01:56 PM
جمال الباقر
جمال الباقر
تاريخ التسجيل: 12-14-2008
مجموع المشاركات: 2237
Quote: من شاكلة ابوكم مين وقايدكم مين وما أرداك .. والتي بلا شك انها كانت من نسج اؤلئك الأغبياء من حوله
ما كمان يا داش دي الاكسسوارات الرئاسية تبع البرتكولات لازم تلقى ليك كم واحد كدا يهتف وكم واحد يشجب ويندد ويدين وإلخ إلخ .. بعدين بي صراحة ماف زول ما بيحب الهتافات والمجد وكدا .. حسع خليك من الرئاسية عاين البورد دا فوقو كمية بتاعت برتكولاتيين قدر كيفن ..؟ .. عاين يا زول عليك الله يا داش ما تدخلنا اتحاد الكتاااب دا ,,, خلينا في نضالنا الثوري دا عليك الله حسع دي يا داش منبر بكري دا براهو ما قصة قصيرة .. ومسرح وفلم هندي ؟ قصة الغسال انا ذاتي رايحـه مني والله يا داش .. منبر بكري دا بقى ما بقبل إلا كتابات ثورية يا داش واشاعات
05-25-2013, 02:33 PM
طلحة عبدالله
طلحة عبدالله
تاريخ التسجيل: 09-14-2007
مجموع المشاركات: 18044
في الوقت الذي يتنفس فيه تامبا دررا وإبداعا وكلام ملان يأتي مين كدا جرجير أو ود البشرى أو أيا كانت كنيته ليتنفس فينا فقاعات صابون وحنابيك وتنظيرا وغلاطا ومكابرة ووررروك ما تديك الدرب .. حمد لله ع السلامة يا تامبا وقوم لف يا زول هوووووي اتا بلا شيطان بلا ملاك بلا بتاع سجاير معاك . كرهتونا المنابر ياخ .
05-26-2013, 01:18 PM
tmbis
tmbis
تاريخ التسجيل: 10-19-2002
مجموع المشاركات: 24862
Quote: ليتنفس فينا فقاعات صابون وحنابيك وتنظيرا وغلاطا ومكابرة ووررروك ما تديك الدرب .. حمد لله ع السلامة يا تامبا
قلت لي كيف يا طنظير ..؟ والله نحن الحمد لله على ما يرام انتو عاملين كيفنكم..؟ .. طبعا يا تنظير صاحبك بتاع الفقاقيع دا مفروض كان يعصر على الحته بتاعت ابونا نميري دي .. ويبصم بالعشرين .. لكن زي ما قلته ملاها لينا فيري وتايد .. ياخ وحيات ابتسامتك عمك ابعاج لو كان قاعد لحدت الان .. خليك من ناس الدكتور منو والكوموريد منـو .. والله ناس قريمان ديل وناس صيام العايزين يفتحوا الخرتوم ديل ماف واحد فيهم قال بغـم .. لكن تقول شنـو بس ما بتدي حريف ولا اي حاجة ..
اهـا الأميرة اخبارة شنو فجاتن كدا ؟؟
05-26-2013, 08:37 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: بيني بينك ما يشوفني ود البشري عشان يجي يقول لي ولغ وما ولغ .....يا حليل ابعاج .... والله الاسي ديل ولغو جنس ولغ في دم السودانيين وعضامن كمان
والله يا دكتور اكان ولغ واللا ما ولغ .. الشغلانة واضحة زي الشمش .. البدتو الانقاذ ومن قبلها الاحزاب السياسية في التفريط اهو قاعدين يتمو لينا فوقو (ابطال) الحركات المسلحة بالعرقيـة .. على الاقل زمن نميري كان في وحدة وطنية .. او ما يشابه وكان دم الواحد حرام على دم اخوهو .. لكن حسع دي .. على اقل تقدير كل تلاتة اربعة انفار ركبو ليهم جيب يا لاندكروزر عايزين يدخلو الخرتوم فاتحين .. قالعين ناهبين .. لكأنما النهب الاقليمي داك والدم وبقر الناس وحلالم ما كفاهم .. تقول لي ولغ ..؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة