|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: بشرى مبارك ود السقاى)
|
حسب ما أوضحت لكم بدأت كتابة الرثاء بالسقاى وواصلته ببيرمنجهام فقلت :
نترحم نترحم عليك والمولى شال لى أمانتو ما قصّر فى واجب فرضك تجيب لى كفايتو واصال للبعيد تحضر جديدو جديدو سمايتو عملك ..عملك فيهو واقف تاميهو حتى نهايتو أتعلمنا .....أتعلمنا منّك بيان بالعمل فى بدايتو ماك ماك نقّال حديث وما بتجييب لى وشايتو ************************** النوم ما بتعرفو ما بتعرفو والقرآن قرييت بدوايتو والجيش والجيش من شبابك وريتنا أحلى حكايتو شُقت صغيير زراعتك وقادوسك عرفت سقايتو وعاصرت (خريستو ) ومعزاك همييم فى سعايتو *************************** دعو لييك الإلوف وصلونا وصلونا أدوا الواجب من كل القرى والمدن ناس الامين الامين والعاقب كم ذرفوا الدموع الدموع ملت الرموش والحاجب منّهم الزميل منّهم النسيب وحتى صاحب الصاحب ندعو للكريم للرحيم ما يشوفو أصلو أصلو متاعب ونرصّ لى صفوفنا صفوفنا الكاعب جوار الكاعب وتتهوّن تتهوّن إمورنا ما نلقى أصلو أصلو مصاعب **************************** وصلونا الاهل وعزونا عزونا لزمو فراشك عشان كنت بتواصل معروف إصولك وساسك من زمن الجيش عزيز كنت كنت المكرّب قاشك وفى أمر المكارم .. المكارم مافى زولاً حاشك كنت صبور صبور مرض لو دمّك يكب من شاشك ما بنسمع جذع ما بنسمع جذع وكم كم ورم فشفاشك ما بقتل مرض ما بقتل مرض بس تكمل عدد أنفاسك ****************************** ذكرووك بالمحاسن والعييوب حاشاك ودعو لييك كتيييير والرحمة تتغشاك كم فى درب المساجد مشيينا فى ممشاك وجلسنا فى مكانك والرحمة الرحمة تتمساك *******************************
قاد البص مع الفاتح أخو ود عمو ناس الجيلى مبسوطين عليهو اتلمو ما اتأخر عليهم وليهو طب ما ذمو أخوانو الصغار بقو يلدو عليهو يسمو ******************************** سلمنا الامانات وشغلك لقينا صحييح يا كتال دوابى كان ليها طول وفحيح كنت بتنجد الملهوف قبُل ما يصييح معروف بالصبر لو دمّك قلب لون قييح ********************************* يوم جانى الخبر فى غربتى ألمنا وكان سلوانا أنّك إنت من علمنا الجود والمكارم تسليم عدييل سلمنا يارب يا كرييم أرحمه زييد أرحمنا ********************************** أخوانك بكوك ناس حسن الشريف بكونا أعمامك أولاد مضوى ندعو لييك وصونا قاعدين فى الفُراش أصلو أصلو ما فاتونا وخايف لو كتبت كتبت يقولو ناس فضونا والبقدر البقدر أقولو الناس جموع عزونا *********************************** دموعنا ما بتقييف نزولا حالو صبييب يا رب يا كرييم تنزل عليك ترطيييب وفى قبرك قبرك هناك تبقالك سند وحبييب يا رب يا رب يا كرييم سائل دعاى ما يخييب ************************************* أخوان التلاوة التلاوة والامام دعو لييك كنت حضور مساجد وكايس رضى والديك يا رب يا كرييم بالدعاء الدعاء نواليييك فى أعلى الجنان أعلى الجنان عاليها فوق عاليك ************************************** ود زين العابدين حاج على عصر البرش ما فاتنا وفى أمر النسب الحسب ورانا أقوى أقوى صلاتنا شارك فى الدعاء فى الدعاء وحضر لكل صلاتنا يا رب يا رب يا كريم ناخذ الحقوق الحقوق فى فلاتنا وكل جموعى جموعى يفرح ونزيد غلا فى غلاتنا ودايماً نجتمع ننبسط نملأ القدور نملأ القدور بسلاتنا ودائماً نجتمع ننبسط نملأ القدور نملأ القدور بسلاتن
| |
|
|
|
|
|
|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: بشرى مبارك ود السقاى)
|
الاخوان الكرام تحيات طيبات لكم وأرجو أن لاتنسو والدنا مبارك إدريس بابكر عليه الرحمة من الدعاء له ولكل موتى المسلمين ونقول اللهم أغفر لهم وأرحمهم وأسكنهم الجنان وألحقنا بهم فى الفردوس الاعلى آميين
مواصله فى الحديث التوثيقى للوالد مبارك إدريس عليه رحمة الله رأيت أن أشرح بعض الابيات التى وردت فى قصيدة الرثاء الاخيرة أو القصيدة الاولى التى كتبتها فى حياة الوالد عليه رحمة الله . قلت فى بيت : أخوانو الصغار بقو يلدو عليهو يسمو
بهذا البيت كنت أقصد العم عبدالرحمن إدريس وهو فى الترتيب الرابع فى الابناء أكبره العم محمد إدريس ثم الوالد عليه رحمة الله ثم العم عبدالله إدريس والذى كانت وفاتة عليه الرحمة فى العام 1995م ، العم عبدالرحمن سمى قبل 30 سنة أو تزيد قليلاً سمى أحد أولاده (مبارك ) وسبحان الله كان مبارك مايل للسمره أكثر من أخوانه والسمره أو اللون (الاخدر ) كما يحلو للسودانيين قول ذلك هو لون الوالد مبارك إدريس ، ترعرع مبارك ووجد أمامه عمه مبارك إدريس فبحمد الله أخذ الكثير من صفات الوالد فى المروة وخدمة الناس والصبر وعدم الشكوى وطوله البال ، الاخ مبارك تخرج من جامعة النيلين كلية التربية قسم الرياضيات وهو أستاذ الرياضيات بمدرسة الكواكب الثانوية الخاصة بالسقاى منذ العام 2009م وعلمت أو تابعت عند حضورى فى العزاء تقديمة لمدرسة حجر العسل الثانوية بولاية نهر النيل وهذا هو رأى الاخ والاستاذ محمد حسين العربى كبير أستاذة الانجليزى بالمدارس الحكومية بوزارة التربية السودانية صاحب الخبرات الطويلة والتى أمتدت الى 28 عام بين السودان (كريمة الثانوية ) ثم معاراً الى اليمن ثم الى السعودية ثم متعاقداً الى السعودية والعودة أخيراً للمدارس الحكومية ولاية نهر النيل وزميل إبن عمنا عماد محمد إدريس أستاذ الانجليزى ومدير مدرسة الكواكب الخاصة بالسقاى وزميل محمد حسين العربى منذ دراستهم سوياً بجامعة الزقازيق بمصر فى بداية الثمانينات من القرن المنصرم .
على العموم أسأل الله أن يوفق الاخ مبارك عبدالرحمن فى حياته العملية والاسرية وأن يحذو حذو الوالد عليه رحمة الله. الاخ مبارك عبدالرحمن إدريس متزوج من إحدى كريمات أهلنا من الكباشى وكنت ألاعب بنته الصغيرة (4 سنوات ) فى سفرى الاخير للعزاء قبل إسبوعين فذكروا لى أنها عندها (رآى فى السقاى ) !!!!!فقلت لها السقاى ماله ؟؟!!!؟؟؟ فقالت لى السقاى كعبه ؟ لى شنو ؟ قالت ما فيها لحم زى الكباشى !! فقلت لها فى دى صدقتى وما أظننا فى السقاى نلحق ناس الكباشى فى اللحم ( وجييييب اللحم يا رهودا !! زى ما قال أخونا أبراهيم محمد يوسف عبدالرحمن الكباشى شقيق اللواء شرطة ناصر محمد يوسف الكباشى رئيس قسم السجل المدنى زميلنا منذ الكباشى المتوسطة حتى الشرطة ونحية وكانت المناسبة أننا حضرنا له فى زيارة فى العام 1983م لتوصيل خبر زواج الاخ عبدالمحسن الشيخ فحلف علينا أن نبقى للغداء فذبح كبشاً وقدمه كله وكنا خمسه لا أكثر !!! نحيى الاخ أبراهيم محمد يوسف وكل أهلنا بالكباشى وأسأل الله أن يوسع على الاخ مبارك عبدالرحمن إدريس حتى يشبعنا كلنا لحم وكذلك أسرته الصغيرة )
| |
|
|
|
|
|
|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: أمير محمد ادريس)
|
اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار . اللـهـم عاملة بما انت اهله ولا تعامله بما هو اهله . اللـهـم اجزه عن الاحسان إحسانا وعن الأساءة عفواً وغفراناً. اللـهـم إن كان محسناً فزد من حسناته , وإن كان مسيئاً فتجاوز عن سيئاته . اللـهـم ادخله الجنة من غير مناقشة حساب ولا سابقة عذاب . اللـهـم اّنسه في وحدته وفي وحشته وفي غربته. اللـهـم انزله منزلاً مباركا وانت خير المنزلين .
| |
|
|
|
|
|
|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: أمير محمد ادريس)
|
ارضاً ضمت اعظمك والله جد كسبانة بي فخر الاصل جايباهُ من دُكانة بي عز التراب مشتاقة بل ولهانة مع سيد الانام نومة وكمان رضوانا ----------------------------------- تبكيك البلود غرباً وشرق الوادي ود ادريس ابوي للفارقة تب موفاضي يغشاك العفو من الله رباً راضي ومن سيد الخلق ياسين وسيد اسيادي ----------------------------------- الزم للصبر ياالبشرى وكتر ليهو للدعوات عموم وللصدقة قدمليهو ياها الفاضلة ليك والرحمة تذهبليهو وفي جنات عدن مرتاح وياربي اقبلبيهو
الاخ الباشمهندس الشيخ إدريس المبارك من أهلنا بالجزيرة إسلانج ويعمل فى مصفاة الجيلى حضر فى صباح الاربعاء بعد ساعات من حضورى من بيريطانيا وعندما قرأت على اللبس مصفاة الجيلى عرفته وسلمت عليه بالاسم وشكرته على حضورة والاخ الباشمهندس الشيخ إدريس المبارك صاحب تنفاس قوى بينى وبينه فى المواضيع والشعر والرياضة فى منتدى الجزيرة إسلانج خاصه أنو مريخابى !!!أنتهز فرصه غيابى الاخير من المنتديات وظروف سفرى للعزاء فكسحنى بأكثر من 500 موضوع وأصبح فى المركز الثانى وقريباً سوف يكتسح صاحب المركز الاول فمبروووك للأخ الباشمهندس الشيخ إدريس المبارك وعقبال وصول بترول الجنوب الى محطة الجيلى لانو يا دووووب فى هجليج .
| |
|
|
|
|
|
|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: بشرى مبارك ود السقاى)
|
عندما وصلت فجر الاربعاء الى السقاى أتصل على بعد العاشرة صباحاً الاخ الزميل العميد شرطة معاش صلاح أحمد عبدالله معزياً وذكر لى أن هناك عدد مقدر من الزملاء سوف يصلوك اليوم إن شاء الله بعد الثانية ظهراً حسب إتفاقنا معهم وبالفعل وصلنا فى الثانية والنصف عدد مقدر من الاخوان وحتى أشكرهم وأدعو لهم بالتوفيق والسداد وأن تكون خطوات فى ميزان الحسنات رأيت أن أذكرهم فى هذا التوثيق لكى أعطى كل زى حق حقه مع عدم لومى لكل من حرمته الظروف ولم يصل أو يتصل وحتى الذين لم يصلو أو يصلو سوف أواصلهم هاتفياً طالما معى دليل هواتف الدفعة وبالعفل بعد وصولى هاتفت الاخ المقدم شرطة معاش الفاتح بشير سراج النور بجدة لاننى وجدت هاتفة أرضى والذى أبحث عنه عند كل زمييل أو صديق لانى عندى 5000 دقيقة فى الشهر مع شركة الهاتف الانجليزية (BT) وأدفع الرسوم الشهرية أستعملت هذه الدقائق أو لم أستعملها ومنذ سنتين حتى هذه اللحظة لم أصل الى 3000 دقيقة فى الشهر . نرجع لموضوعنا كان الحضور يتقدمة صلاح أحمد عبدالله والنور مرحوم خيرى بثلاثة حافلات تخص إتحاد ضُباط الشرطة المتقاعدين والزميل والاخ صلاح أحمد عبدالله عضو مجلس إدارة الاتحاد الاخير المنتخب ورئيسة سعادة الفريق أحمد محمد بحر . مع الاخوان صلاح أحمد عبدالله والنور مرحوم كان الحضور من : العميد شرطة بالزى الرسمى عصام قسم السيد أحمد . اللواء شرطة صديق عثمان محمد حمدنالله (صديق العيلفون ) العميد شرطة معاش فضل التوم أبراهيم (الاخ فضل التوم أبراهيم ) حضر قبل هذه المجموعة بساعات لوحده ، الاخ اللواء شرطة معاش نبيل معتصم محمد على (الطلبة نبيل كما يحلو أن ينادية الزملاء ) . ثم الاخ عثمان محمد أحمد (أبوالهول ) وحاولت عدم إستعمال كلمة أو لقب أبوالهول المشهور وقلت لهم لم أستعمله من قبل !!فقالوا لى الزملاء وعلى رأسهم من هو أقرب منى الاخ نبيل معتصم يا بشرى لو ما قلت ليهو أبوالهول ما بتلفت عليك !!!. الاخ شمس الدين سعيد السنارى والاخ حامد أحمد الهادى والاخ الفاتح كامل محمد سعيد وقد ذكر لى أنه ترك الامارات نهائى وأستقر بالسودان منذ 8 شهور وودع الغربة الى غير رجعه !!!نسأل الله له التوفيق الاخ عبدالله الزين الطيب والاخ حسن عبدالله مبروك والاخ عبدالنبى كليكر كودى . بقوا الاخوان معنا مشكورين وأصرينا أن يتنالوا الغداء معنا رغم ظروف عمل بعضهم ولكن أستجابوا لطلبنا مشكورين .
حضر فى نفس اليوم الاخوان الطاهر عثمان جادالله والاخ على أبوبكر أحمد جمعة وتوالى حضور الاخوان فحضر الاخ سليمان العبيد أدم جمعة بالجمعة ورغم أنه مكث وقتاً طويلاً معنا ولأن بينى وبين الاخ سليمان العبيد ذكريات أيام العمل الاولى ونحن فى رتبة الملازم جُداد لنج بجوازات مطار الخرطوم وأننى لم أقابله منذ مغادرتى السودان فكان للحديث شجون كنت أرغب أن تتواصل الى ما بعد صلاة الجمعة ولكنه أعتذر ووعد بالحضور إذا سمحت الظروف . ثم كان حضور الأخوان حمد النيل محمد حمد النيل والاخ نافع محمد أحمد خير السيد ومعهم زميل من الدفعة 45 طار الاسم منى للأسف وكلفت الاخ صلاح أحمد عبدالله لكى يسأل الاخ حمد النيل محمد حمد النيل وأعتذر له عن النسيان بسبب زحمة الاسماء والحدث والعزاء . كان بالمساء حضور مجموعة مقدرة أميرهم وقائدهم من (غير إهمال ) سعادة اللواء شرطة معاش عماد سعيد سيد صالح ومعه خالد عبدالله شريف وعثمان محجوب أبراهيم وإسماعيل النور عسيل وعمر محمود شين وكنا قد عملنا سويا بجوازات مطار الخرطوم (عماد وخالد وعثمان محجوب أبراهيم وشخصى وأيضاً إسماعيل النور عسيل بالشرطة الامنية وقتها ) . أيضاً كان حضور الاخ اللواء شرطة عبدالله محمد حقار خميس مدير دائرة جوازات الاجانب ومعه للمرة الثانية الاخ النور مرحوم والاخ عثمان محمد عباس وقد تكفل الاخ اللواء شرطة عبدالله محمد حقار بموضوع تجديد بطاقتى الخاصه بالسودانى الحاصل على جواز أجنبى وكانت قد أنتهت قبل شهر من حضورى وتم حجز جوازى بمطار الخرطوم ومشكورين الاخوان والزملاء حقار والنور بأنهم سلمونى البطاقة مجده عند حضورى لمكتب الاخ عبدالله محمد حقار وقابلت الاخ سليمان العبيد ومن الدفعة 37 الاخ أحمد المصطفى فى مكاتب المغتربين التى أكملت فيها مع الاخ النور مرحوم إجراءات بطاقتى . أيضاً كان حضور سعادة اللواء ناصر محمد يوسف الكباشى فى نفس يوم الوفاة أى قبل حضورى بارك الله فيه وأيضاً الاخ اللواء مصطفى يوسف المصطفى حضر بعد حضورى مشكوراً وأيضاً العميد شرطة معاش إبن الاسرة الرشيد على مساعد وكذلك العقيد عوض المفتاح المباحث ولاية نهر النيل .
لكل هذا الحضور وغيرهم من أتصل من الخارج الاخوان بأمريكا والسعودية والدوحة والامارات وغيرها ومن أتصل بالداخل أكثر من مره وحتى من نوى الحضور والاتصال ومن لم يصله الخبر أشكرهم جميعاً وأسأل الله أن لايُرهم مكروه فى الاسرة أو الاصدقاء ونسأل الله أن يتقبل موتانا وموتى جمييع المسلمين وأن يتقبل والدى مبارك إدريس بابكر وأن يتغمده برحمته وأخر دعوانا أن الحمد لله رب العالمين .
| |
|
|
|
|
|
|
Re: فى رثاء الوالد مبارك إدريس بابكر بعد مرور شهر على وفاته عليه رحمة (Re: أسامة البلال)
|
شاورتو ليعمل خارج الأوطان قال لا مانع لدي وللسفر صرمان في شرق الحجاز قاد شاحنات أطنان وبعد سنتين كفاح قال يرجع السودان
البيت الثانى وردت كلمة (صرمان ) وهذه الكلمة معناها (مغرود أو محتاج ) ولا يستعملها هذا الجيل من الشباب وصراحة إستعمالى لها سببه حوار دار بين الغائب رد الله غربتة خالد فرح أبوسنينة شقيق زوجتى خالدة فرح الاكبر وبين خاله الراحل فقيد الشباب والرباطاب والاسواق الحرة فى مجدها وكان عليه الرحمة عند وفاته فى العام 1995م يشغل منصب المدير التجارى للأسواق الحرة ونائب المدير العام ونترحم عليه ونقول اللهم أغفر له وأرحمة وعافه وأعف عنه وأكرم نزله . كان خالد فرح يستعمل فى حديثة (كلام بلدى جداً كثيراً ما يجعل المك على أبوسنينة يرسل ضحكته المجلجة التى عُرف بها ). وفى هذا الحوار طلب خالد من خاله وهو يجلس معه فى سكن الاسواق الحرة فى الخرطوم 2 طلب من خاله طلب وقال ( يا المك والله أنا مصرووم لى فى بدله عندى معانية للعمل فى أحد البنوك !!؟؟) فضحك المك عليه رحمة الله وقال لخالد فرح يا خالد الزول بقول (مصروم لى ) فى عراقى أم مكربوب !!لكن البدله دى بقول محتاج لى بدله . وصراحة عندما أتيت بهذه الكلمة كنت مستحضراً لذلك الحوار الفكاهى بين خالد فرح وخاله المك عليه رحمة الله ورأيت بهذه المناسبة أو أذكره لمزيداً من الشرح ولكى نترحم على الاخ المك على فرج الله أبوسنينة والذى كان عليه الرحمة قبل وفاتة (نوارة وعمود وركيزة آل أبوسنينة ) وقد تأثروا كثيراً بفقده خاصه زوجتى خالدة فرح أبوسنينة .
| |
|
|
|
|
|
|
|