|
|
 يا زول ابوكرشولا دي جبتها براك ...مالك عاوز تجيب لينا (الهوا).
|
وان طال السفر | محمد عبدالماجد :: اللجنة دي هدف عكسي من (بلة جابر) ممكن يفرتكها
كل اسبوع بي لجنة المريخ في (21) يوم قادته (3) لجان
< سيد احمد لجان زول صعب ما بلبس (نعال). ولا بجامل في الحتة دي...(اخلاقو شايلها في نخرتو).
< تسألو بسمعك الف كلمة فارغة.
< عشان كدا ما تشتغلوا بيهو كتير.
< عليك الله هسع لو ما ساي كدا لو ما عاوز ليك سبب ، دخل (النعال) بالموضوع دا شنو؟.
< نفسي اعرف علاقة (النعال) بالصعوبية شنو؟.
< الحكاية دي زي واحد قام الصباح لقى (المعجون) قطع ...مشى الدكان ...(موش من الطبيعي ، والمفترض ، والمنطقي انو يجيب ليه معجون).
< تتخيلوا جاب شنو من الدكان؟.
< جاب ليه (بسكويت)..وجاء (عصّر) ليك المعجون المنتتهى دا يا (سلك).
< المعجون من الضغط والعصر ..بقى يكب (صديد) بتاع بوهية.
< بكب (معدن) عديل كدا.
< زولكم نفسو صغيرة...مشى الدكان للمعجون ـ شاف البسكويت ..نفسو ضعفت قدام (البسكويت).
< اها العلاقة بين انك ما تلبس نعال وبين الصعوبية ..زي علاقة معجونكم ينتهي ..تقوم تجيب ليك (بسكويت).
< اشرحها ليكم ...ما فهموتني..ظاهر عليكم ..(ما تقعدوا تشابحوا لي ساكت).
< احلف عليها ..انكم ما فهمتوني.
< يعني على حسب رأي (بابكر سلك) ..معجون فيصل العجب ينتهي ..يقوموا يجيبوا عليه معجون تاني.
< معجون هيثم مصطفى.
< لا....
< اقصد بسكويت هيثم مصطفى.
< خلينا المعجون.
< يا جماعة تابعوا معاي ما تسرحوا ..ما تخلونا نفك ليكم (العمود) دا.
< في حكاية تانية ..ممكن تقرب ليكم (الكيمياء) دي.
< والله اعلم ..(عشان بعدين لو ما قربت الحكاية ما تقعدوا تزاعلوا فينا زي الحركات المسلحة).
< انا قلت حركات المسلحة.
< ابدا.
< معليش ..طلعوا لي (الحركات المسلحة) دي من الجملة السابقة ، لو انا قلتها.
< لو جات براها كمان دي ما مسؤوليتي.
< خلونا نتم العمود دا بي سلام.
< اصلو نحن اي حاجة عندنا بي نظام حتى (النعلات).
< ايام ازمة الغاز (الله لا عادها) ..قالوا ليك راجل زوجتو قومتو ليك من (النباه الاول) وقالت ليه الانبوبة قطعت.
< قال ليها بتقطع من النباه الاول دي (ابنوبة) وإلا مكرفون.
< المعنى (غاز) وإلا (صوت).
< دي حلمانة وإلا شنو؟.
< الراجل قام عاين للانبوبة الساعة اربعة صباحا في المطبخ رفعها لقاها خفيفة.
< تتخيلوا بعد (المعاينة) دي ..الراجل عمل شنو؟.
< الراجل ركب الموبايل في الشاحن ..ورجع نام ..(يعني عاوزنو يعمل ليكم شنو في الوقت دي؟).
< ما تتفألوا لي.
< الراجل دا ذاتو لو (قلبو حار) مفروض يخلي (الانبوبة)..ويشيل زوجتو من البيت ..يوديها بيت ابوها طوالي.
< الساعة اربعة صباحا يجيب ليكم (انبوبة) غاز من وين؟.
< الساعة اربعة صباحا دي إلا ضربة امريكية او ضربة اسرائيلية او تفجيرات في نفق او محطة مترو.
< غير كدا اصلو ما عندي ليها حل.
< والله لو صحوني اربعة صباحا - انبوبة (اوكسجين) ما اجيبها ...خلي انبوبة غاز.
< نسوان ما عندهن رأس.
< يقطع الغاز ..يعملنها ليك كلها (مسلسلات) تركية.
< المهم يا جماعة هسع دا ما موضوعنا.
< نحن موضوعنا لو بتذكروا (سيد احمد لجان).
< سيد احمد لجان كان بتصدر اي موضوع في الحلة في الشغل في اي حتة بطلع ليه (ورقة وقلم) ويقول شكّلوا لجنة.
< لذلك سموه (سيد احمد لجان) وذلك كان بسبب اللجان المنبثقة من شخصه الكريم.
< يمسك ليك في الشي يلجنها ليك طوالي ..ويلاحقها ليك بي لجان منبثقة لمن ينشف ريقها.
< الحياة عند سيد احمد عبارة عن (لجان)...وهو مؤمن ايمان قاطع بها ..وبفلسف حياته دائما بقول مآثور منه كل ما يلاقيك بقول ليك (هي الحياة شنو غير لجنة بتتكون؟).
< وقت تسكها معاه يقول ليك لجنة بتتكون وتنبثق منها لجان..زي (الخروع).
< على بالمين ..(وانتوا ما طالبني حليفة الخروع ما عندو اي دخل بي لجان الزول دا).
< لكن (اللجان) اصلها بتلخبط الحاجات كدا ..فوق تحت.
< وحتى ندعم كلامنا هذا ونؤكده ..رأيكم شنو نشوف لينا (لجنة) تكتب ليكم العمود دا ..وتناقش بالمرة كدا موضوع (اللجان) دي بصورة علمية.
< سيداحمد لجان دا ...عندو (4) بنات ....سألوه مرة قالوا ليه عندك شنو من الابناء؟.
< قال ليهم عندي اربعة لجان.
< بنتو الكبيرة اتزوجت وجابت ليه (حفيدة)..طوالي صلّح كلامو وقال ليهم عندي (4) لجان ولجنة منبثقة واحدة.
< يوم قاعدين ...(والله الدنيا ما كانت خريف)...لكن مع ذلك هطلت امطار غزيرة.
< امطار حسبها الوالي امطار (معارضة) كدا.
< سيد احمد لجان دا طوالي قام ..قال يا جماعة في زول فيكم الليلة حضر النشرة الجوية.
< قلنا ليه النشرة الجوية عاوز بيها شنو؟...هي النشرة الجوية المطرة في (الخريف) ما بتعرفها ليك ...عاوزها تعرفها ليك هسع في (الصيف) دا.
< ديل (المطرة) وقت تنزل وتغرق الخرطوم ما بجيبوها في النشرة ..عاوزين يجبوها ليك قبل ما تجي.
< ناس النشرة الجوية حركة زي دي ما بعملوها ليكم.
< سيد احمد لجان ..حاول يتصدر الموضوع ...قام طلع ليه ورقة وقلم ..وقال يا جماعة نحن (المطرة) دي ما نفوتها ساكت ...لازم نشكّل لينا (لجنة).
< زولكم شكّل اللجنة وقت المطرة وقفت كان عندنا (7) لجان و(19) صالون واقع و(58) حيطة دقت الدلجة..كل لجنة اتحركت في اتجاه.
< سيد احمد لجان دا ..تكون قاعد معاه ...يقوم واحد من الجماعة يقول عاوز اعرس.
< سيد احمد طوالي بشكّل لجنتو.
< لجنة للصيوان ..ولجنة للتلج ...ولجنة للاستقبال ..ولجنة عليا تتابع كل هذه التحركات.
< الزول لو كان جادي في موضوع العرس بعد تشكيل هذه اللجان ..العرس يطرشق.
< عارفن بطرشق ليه ...(والكلام دا يا جماعة ما يطلع من العمود دا).
< بطرشق عشان لجنة التلج بتختلف مع لجنة (الاباريق)..والغسالات ..اي عضو في تلك اللجان بقول في تداخل بين اللجنتين ..ولجنة التلج بتتغول على صلاحية لجنة الاباريق.
< لجنة الاباريق قلبهم حار ما برضو الحقارة ..(تقول جايبنهم من كرري على التو كدا)...من المعركة دخلوا اللجنة عدل.
< شفتوا كيف؟.
< عشان تفهموا بس.
< يا ناس المريخ انا ماشي عليكم ..اصبروا انتوا بس ...ما تضيقوا على رزقكم.
< سيداحمد لجان ...مرة كنا عزابة ..قلنا نعمل لينا (حلة) في الجمعة دي ...نتقطع فيها ..ونطلع شوية من طبائخ النسوان الكلها زيت دي.
< جبنا الحلة ...سيداحمد لجان ثبتنا ليكم ...قال دقيقة اول حاجة نشكّل ليها لجنة.
< وقفنا على حيلنا.
< قلنا ليه يا سيد احمد هي حلة وإلا بنطون العاوز تشكّلها لجنة دي ...كلها كدا (الحلة) دي فيها (ربع كيلو) لحمة ...لجنة شنو العاوز تشكلها ليها ...انت عاوز تعمل ليك (سد).
< بعدين الجماعة الما مضمونين ديل ..يشوفنوا شكلنا (لجنة) للحلة دي ...يقولوا لينا (الحلة) دي فيها شنو؟.
< تجيب لينا التهم ساكت.
< ما بعيد ناس الحكومة يقولوا لينا (الحلة) دي فيها وثيقة وإلا قطعة ارض ...البتخيلكم تعملوا ليها (لجنة) دي.
< عليك الله يا سيد احمد ..طلع لينا (اللجان) دي من الحلة حقتنا دي.
< تقوم تعمل ليك لجنة للحلة ...تقوم اللجنة تأكل (اللحمة) قبل ما تدخل النار نحن كمان ما بنعرف شغل اللجان.
< موش (الحلة) دي فيها (ربع كيلو) ضان ...والله تعمل (لجنة)..(عضم) ما تلقى فيها.
< يا زول ارحمنا ..بلا لجنة بلا لخمة بلا لحمة معاكم.
< نحن (المدرسة) القلنا نشجرها قبل 15 سنة الي الان (شتلة) ما غرسناها فيها.
< عارفين ليه؟.
< عشان كونوا (لجنة).
< اعضاء اللجنة شالوا (الشتل) زرعوه في بيوتهم ....مع ذلك تتخيل في اخر السنة بنجي نكرمهم بي وشاحات.
< السيد رئيس اللجنة وشاح.
< السيد نائب رئيس اللجنة وشاح.
< السيد مقرر اللجنة وشاح.
< السيد عضو اللجنة وشاح.
< السيد رئيس اللجنة المنبثقة وشاح.
< اي زول (يتلجن) كدا بنديه ليك (وشاح) في رأسو.
< عشان كدا ..نحن الزول من نقنع منو بنكرمو ليك بي (وشاح).
< في يوم مختلف ...(ما عندو اي علاقة بالايام الماضية ديك).
< قاعدين كدا ..جبنا سيرة (الموية) ...في واحد فينا قال تصوروا يا جماعة الليلة اليوم السابع والموية قاطعة من الحلة.
< سيداحمد لجان طوالي جر ليه ورقة وقلم ..وقال شكّلوا لجنة.
< قلنا ليه لجنة شنو البنشكلها...يمين يا سيداحمد لجان نكوّن لينا لجنة (الكهرباء) ذاتها تقطع مع الموية.
< موش ديل دمجوا فاتورة الموية مع فاتورة الكهرباء.
< اها ما بعيد يدمجوا (القطع) ذاتو.
< احسن خلوها كدا على الموية ..خلوه عليكم الله بدون (لجان).
< نحن ما ناقصين.
< اواصل ليكم مع سيد احمد لجان دا ..وإلا الرسالة وصلت.
< كفاية سيداحمد لجان ...(ارحمنا يا ود الناس).
< ناس المريخ.
< ايوا ..من قبيل تلف وتدور وتدخل وتطلع عشان تقول لينا ناس المريخ.
< ناس المريخ مالهم؟.
< قاعدين كدا زي (الكوتشينة) الما فيها (جواكر).
< ناس المريخ ديل في (21) يوم دقوا الرقم القياسي في اللجان.
< السيول والفيضانات والامطار ..وام روابة ذاتها ...ما عملوا ليها (لجان) قدر اللجان العملوها للمريخ دي.
< عليك الله يا ود الناس ام روابة دي طلعها لينا من الحتة دي هي وام دوم.
< يا زول انا هسع جبت سيرة ام دوم ...انت براك ركبتها لينا.
< بس لو سمحت لا ام روابة ولا ام دوم ولا أبو كرشولا.
< يا زول ابوكرشولا دي جبتها براك ...والله انا ما جبت سيرتها.
< مالك عاوز تجيب لينا (الهوا).
< المهم يا زول اللجان الاتكونت هناك (في المعارك ديك) ...ما قدر اللجان الاتكونت في المريخ.
< ناس المريخ ديل كل اسبوع عندهم لجنة.
< اللجنة بي اسبوع.
< تاريخ صلاحية اللجنة (اسبوع).
< اسبوع بس.
< يطيروا من البطولة الافريقية من دور الـ (32) المجلس يتسقيل ...ويشكلوا ليهم (لجنة).
< الشيء الغريب اللجنة البتشكل بتكون من نفس المجلس الاستقال.
< يقوم بلة جابر ..يجيب ليه قون عكسي في المريخ ...يقوم يشيلوا اللجنة القديمة ..ويجيبوا ليهم لجنة جديدة.
< والشيء الغريب برضو ...اللجنة الجديدة تشكل من نفس اعضاء اللجنة القديمة.
< شفتوا كيف؟.
< ناس المريخ طبعا ما بكونوا لاحظوا للحكاية دي...ولا بكونوا نقشوها.
< اثبتها ليكم.
< اطبقها ليكم عديل كدا.
< اول شيء المجلس بتاع جمال الوالي (الظهر هسع دى في اللجنة الاخيرة) استقال في البداية قبل (5) شهور.
< قاموا عملوا شنو؟.
< عملوا مجلس من نفس المجلس.
< احلها ليكم كيف؟...اشرحها من وين؟.
< زي الزول الما عندو شعر ..رأسو صلعة وبمشي الحلاق.
< او زي العريس ..البتلقي يوم عرسو بلعب (وست).
< المجلس المنحل كان بتكون من ناس عبدالله حسن عيسي وعصام الحاج ...ومتوكل وخالد سيد احمد.
< والمجلس الجديد بتكون من نفس الناس.
< زي كأنك تمشي ليك لي بتاع دكان تقول ليه : اديني بصل.
< يقول ليك بصل مافي.
< تقول ليه خلاص اديني (بصل).
< يعني مجلس الجديد هو ذاتو المجلس القديم.
< المجلس طار اقصد المريخ طار من بطولة الاندية الافريقية.
< المجلس بتاع ناس عبدالله حسن عيسي وعصام الحاج اليوم التاني طوالي استقال.
< قاموا عملوا شنو؟.
< شكلوا لجنة.
< قالوا دا لجنة (تسيير).
< قلنا ليهم (تسيير) شنو في (التعسيير) دا.
< مشي.
< لجنة تسيير فيها منو؟.
< فيها عبدالله حسن عيسي وعصام الحاج وخالد سيد احمد.
< طيب ديل موش استقالوا اول امس.
< مشي بس.
< يقوم بلة جابر يجيب ليه قون عكسي في المريخ.
< يقوم يحصل شنو؟.
< لجنة التسيير بتاعة ناس عبدالله حسن عيسي وعصام الحاج وخالد سيد احمد تستقيل.
< في الحالة دي بحصل شنو؟.
< بحصل فراغ.
< يقوم الوزير مشكور يكون (لجنة) جديدة.
< المرة دي يغيّر النظرية شوية ...يسمي اللجنة (لجنة تصريف).
< تصريف وقرش ما عندهم.
< لكن المفارقة هنا..هو ان الوزير جاء بنفس اللجنة السابقة حقت (التسيير) في اللجنة الجديدة حقت (التصريف).
< غيّر اسم (اللجنة) بس.
< فهمتوا حاجة.
< والله الكلام دا حصل.
< الكلام دا عملوا الوزير ذاتو.
< الوزير لجانو البعملها بنسفها ليك تاني يوم.
< الوزير (حق الرياضة) دي ...موش مفروض يشوف (مدينتو الرياضية) الحاصل عليها شنو؟.
< يشوف ام روابة.
< تصوروا الوزير (حق الرياضة) خلى شغلتو كلها وقعد صاقر المريخ.
< الوزير يضرب لي جمال الوالي.
< عشان شنو عشان يحنسو.
< جمال الوالي يوافق.
< يقوم عصام الحاج يزعل.
< الوزير يضرب لي عصام الحاج.
< يقوم شنو؟.
< يقوم جمال الوالي يزعل (يقول ما داير).
< الوزير يرجع لي عصام الحاج يشدها معاه.
< عصام الحاج يرخي.
< الوالي يرجع.
< عصام يزعل.
< الوالي يرفض.
< الوالي يقبل.
< الوالي يشترط.
< الوزير (يمسكل) هنا ..ويضرب هناك.
|
|
 
|
|
|
|
حامد الغبشاوي
فيس بوك
تويتر
انستقرام
يوتيوب
بنتيريست