هذه واحدة من القصائد الغير متداولة كثيرا لحميد قالها يرثي فيها صديقه محمد اسماعيل الازهري يرحمهما الله في الى النص
اتِّحادي أو رحيق الأزهرية إلى روح الصديق محمد إسماعيل الأزهري ــــــــــــ جايِي آخرَ الليل مهوِّد بالُو مشغُولْين شويَّة مرَّة بي واقِع مسوِّد زي شوارعنا العشيَّة مرّة بالشرخ المدوِّد ضارِبْ أرْنْيق القضيَّة .. يفتح الرادي ... الكوارث ؟؟! ماشي وين الدنيا ديَّا !؟؟ يقفل الرادي ... الهواجسْ ؟؟ يا يتاور شُوق بنيَّة ؟؟ عِيش حياتَك وأمسياتَك بين صحابك وأم رضيَّة أمنياتَه على أمنياتك إنتَ جنّك وطنيَّة ؟!!؟ أصْلُُو بَسْ وارِث مبادئ يا خي أرِحْ رُوحك شويَّة .. وبين وجِيعِك يا بلادي واحتياجات آدميَّة راح مهوِّم جاي وغادي يا الهي .. .. الـ . عـ ـر بيَّة ؟؟ .. خَدرَة كانت هل هي صُدفة ؟ وصُدفة شارعَ المرغنيَّة ؟؟! ... ... ما برد بس جسمو دفَّى بي شُخُبْ دمُّو القضيَّة .. قالت الضفّة المخفّى كان بيتلافى المنيَّة لو لفيف اللفّوا لفَّا ؟؟ دُغري مالك ؟ يا بنيَّ ؟؟! .. يا لبي الحِسْ بالمبادي وسر رحيق الأزهريَّة عاش على طول اتحادي ومات في شارع المرغنيَّة ... مات غمامة سَقَت بوادي أو شِميشي المغربيَّة كان مدندح بالوسامة والبساطة السرمدية وفي ابتسامة كمن ينادي من بنات الحي صبيَّة زرَّعت منُو المبادئ خضرة تشرح بي رويَّة كيف يصير ذات حالة دالة زول لحالُو هوَ أغلبيّة ! ؟... ....؟ كان بتطرح في القبالكُن والفي بالكُن ما شويَّة وهل تهون السكة هادي دون خطاوي الغالبيَّة واحنا في الزمن الرمادي ما الحِزِب ؟؟ ما الطائفيَّة ؟ ومالَه كمِّين اتحادي طالما واحدي القضيّة ؟! ومين معا دي ؟ ومين معا دي ؟ ومين معا دي بعنجهية ؟ ومين معادي ؟؟ شمات مضاضي وياتو لاص ؟؟ داس الوصيَّة ؟ كان بتشرح والأيادي الخضرا تتساءل سخيَّة تعني إيه الطائفية ويعني إيه الاتحادي ؟؟ الاتحادي الجدْ ؟ يا اخيّة .. قام مجاوِب طفلِ عادي إلاَ مليان ألمعيَّة .. (في موالاة آل بيتك من وساويسي الخفيّة يا رسول الله حويتك طمِّن أورادي الوفيّة ليكَ يا وطني الهويتك مرحبابه الطائفية .. وديمة عندي الاِتحادي يعني أول بالتبادي إني زول سوداني عادي عزِّي عارفُو ضَهَر جوادي مادِّي ضرعاتي ومدادي وشَتْ قليبي علي بلادي ... ظنِّي في باكر مبشِّر راضي عنّو وعنِّي راضي ما هُو دا الحاضر مؤشّر من روابي أعزَّ ماضي نحوَ مجْدِك يا بلادي... ..... .. عندي وادي النيل دا وادي وحدة .. حريَّة .. وسلام منَّ أباني الهرمة فاضي تنمية ودائماً أمام بالديموقراطيَّة ماضي .. ومادِّي للدنيا الأيادي ... اِتِّحادي أي اِتِّحادي تعني عالَم وابنِ آدم واعي فاهم بيهو عالِم لي وطن بستاني راسم روعة الشوف بين فؤادي .. دغري .. إنساني .. ومسالم فقري في الحُوبات مصادم جنِّي جِنْ جُورْ الأعادي .. من يقرِّب لي بلادي .... ديني .. ما دين إضطهادي دين محبَّة .. وبِرْ .. تراضي جود.. تسامح نجمو هادي بين لياليك يا بلادي .... ناس سَواسَوا .. جَدْ نبيلة مارقة من كمِّين قبيلة بي مواريثَه الأصيلة بارْقَة جوّاك يا بلادي .... نمشي بالرأي جاي وغادي لمّا نرسَى على القيادي اللُو اضِيني ولا آحادي ومن خيارِك يا بلادي … عازة وين كان راحتَيّا بي كفاحه عليْ وليَّة وفي سماح العامريَّة عِشْتي يا اختي ويا أم ولادي منِّك اتهجِّيت ب لا د ي .... ياكي حلمنا وأم زمانِك و احلالي عليكْ بطانِك ترضَى أو نغضَب عشانِك وانتي شانك .. فوق .. بلادي ..... من ضراعنا الخضْرَا زادْنا اعتمادنا على الله زادنا وزاد بلادنا مروَّة .. قادنا .. في جهادنا الاقتصادي ... البيزرع والبيرعَى في أمانِ اللهِ يسعَى يا جنات واطاتنا واسعة شِن بلا الموية ..؟؟ الأراضي ..؟ الله رقَّدُو في بلادي !؟ ... كُلما تصفى النيّة نقدر نزرع السودان أخضر نروي نيلين واحد أبيض واحد أزرق نرعى يكبر لمّا ينجض وزي قمر بتلألأ أصفر باهي نوَّر للسوادي .... كلُّو ميدِع وفي إيدو صِنعَة مافي محرومين وجوعَى العِلم في بسطو ..رِفعة .. ومِنعَة حرّاس لي بلادي .... في عقابنا في زول ودائماً كان بِعدنا عشان بلدنا تبرد الحارَّات نسايماً نفرد الشوق لي بعضنا .. ما ديناصورية روحنا يي دا حيين ما انقرَضنا أيِّ بوح إنساني بوحنا وإن سَكَتْنا ده حِسْ جلَدْنا .... أمي مما قمتَ .. كانت كل ليل تحكيلي عنّو عن كراماتو اللي بانت تنجد الفوق في مقنُّو افتَكَرْتَها زي تكنُّو عادة الفي شيوخ بظنّوا يوم عركتَ أدركتَ إنّو أمي فاته البعض منُوّ ... سر حزب مسكون كرامات والظلامات الدغنُّو بقَّ ..ضوّاهن سلامات يا طيور الجنّة غنُّوا ... بي كليمات بين بسيمات الشتات في الفات نفنُّوا ويا حلات قُبل الحمامات والطيور لهديله صنُّوا ..... حزبنا الوسطاني بيِّن بالجماهير الوفيَّة سر صموداً ماهو هيِّن ولسّه لا زال بالقضيّة ... قوَّا عودا المن هُو ليّن شال صلاح المرغنيَّة راعى مريُودا الحنيّن بي فلاح الأزهريَّة ... الرياح كِتْرَن عليهُو بالصواقع الأجنبيَّة رد جميل الهندي ليهو فدَّا بالنفس الأبيَّة .... أصلاً العشقو المبادي داري مَهرَها ما شويَّة واليعيش بالذلَّة راضي قبلو وحّدوا دُون هويّة .... ونفسي أموت يا .. اِتحادي يا .. اِتحادي أموت يا اخيّة شان تعيش أبداً بلادي عالي فوق نجم الثريَّا ..... للمراغنة أبداً تحيّة لأزهري الحبّوب نديّة للشريف الهندي ليكن يا ميامين .. هيَّ .. هيَّ ... هيَّا .. ابشْرُوا ومِدّوا ايديكن بالنفوس الصافي نِيّة الوطن .. دا .. حلال عليكن لا يعيقوه ...الأرزقيَّة ؟؟ ...... يُمَّة يا شعبيَّة عِتقِك نرمي ساس العِزْ نعلِّي الوطن مقبُوض في عِشقِك أنزلي .. أنزلي يا تبلِّي .... أحمديَّة .. دوم .. قلوبنا يوت على السودان تملِّي في أريحيَّة ودروبنا شطرِ وين انسان نولِّي .... الجنوب عِزَّة رجالِك المهيرات في شمالِك الشرق أنفة جبالِك الغرب طِيبة رمالِك روعة المقرن قبالِك .. خلِّي بالِك يا بلادي تحكي روح الإتِّحادي .... أصلاً العِشْقًو المبادي داري مَهَرها ما شويَّة واليعيش بالذلَّة راضي قَبْلُو وحّدوا يا هويّة .... ونفْسِي أموت يا إتِّحادي يا اتِّحادي أموت يا أخيّة شان تعيش أبداً بلادي عالي فوق نجم الثريَّا ... يا نبي الحس بالمبادي وسر رحيق الأزهرية عيش على نور اتّحادي وموت تِحِتْ نار القضيّة محمد الحسن حسن سالم (حِمِّيد)
05-06-2013, 11:04 AM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2666
استاذنا واخونا معاوية مشتاقين كيفكم والاسرة بالله شوف الزول ده شعره ينضح كيف بحب الوطن زول ما عادي الله يرحمه ويرحم محمد الازهري فقد افتقدناهما في وقت احوج ما يكون لهما السودان ولكن لا اعتراض على حكمه وله في ذلك حكمة.
حميد زي ما قال عبدالعظيم منصور زي البحر كل يجي يشيل منو ويمشي تحياتي يا هندسه وشكرا علي فتح الموضوع في بيتنا الاول البركل
رثاء للمرحوم من الشاعر خليفه عثمان خليفه
_________________________________
فى الجنه رب العالمين يديكا .. يا ... وطن المداين الفاضـــــــــــــله سكانو انبياء ومامت يا الموتك حياه لقمت عمرك للوطن وآخر شئ لقمتو الحياه أديته روحك للسحاب يسقى الأراضى الميته من قل المياه وجسدك صبح جوزين حمام يا تركة الصالحين والأولياء ....................................... يا حسرة يا أحزان مدد حميد عضم ضهر البلد يا كلنا ويا أى زول يا زول بلد
والله يوم فقدك تقول من أى بيت مفقود .. ولد بيوضة الأحزان وراك برسيمه فى جوفنا إتفرض ضو الفريق ... البقضى للناس الغرض البفتش للعلاج .. قبال نئن من المرض ويوم بوشنا قبال ما نهوش نلقاهو أول زول عرض يا كبير ال الله ما اداهم كبير أبو اليتامى وأبو البلد قابض على جمر الوطن أحد ... أحد ما حدت عن هذا الطريق لمن قبض ودّ اللحد ............................................ بسم الذين تحبهم والفيكا مكتولين كمد صابرين وأبدا ماب نقول حميد رقد
منو العوض وليهو العوض حميد رقد ونضرب يدينا على بعض حميد رقد ما الخير بيمكث فى الأرض ويطفح على السطح الزبد لو غيّب الموت الجسد جوانا عايش للأبد ........................... يا امبراطور يارئيس كل الغلابه ويا زعيم سوينا من إسمك حرز لى عازتك من كل شيطان رجيم مطموره المنى والامانى يا خشم باب النسيم نلقاكا وين نقعد معاك فوق عنقريب تحت الضــــليل الرامى نيم ورحــــــلت ودعت المنافى رقـــــدت عــــافى بين حنايا الارض والوطن الرحيم
وخليت أثر دربك ضياك ذى الصراط المستقيم وكل الرجال عبد الرحيم كل الحريم السرة بت عوض الكريم فاليبقى سفرك يا صميم الرجعة للبيت القديم خبرك تصيحبو الهبوب ريح الشمال ريح الجنوب وين الله ما رفع ـ القدم حين ترفع الفاتحه القلوب يملأ الدمع حتى الجيوب رب العباد مولانا أرحم من رحم بنات نعش نجم الثريا إتحت فى صيوان عزاك ذى البرم القرشى والماظ الهمام واى فارس عنوة فى التاريخ بصم
الكل حضور للهدهد الجاب النبأ و لى حمامات ... الحرم ترهاقا حالف باليمين قدر مقامك يا علم ليك يبنى فى نورى الجريف ريقان طرابيل جم ... جم شاويش معاهو المك صبير لا حسرة فوقن .... لا ندم ومهيره واقفى تعزى فيك دوباى غناويك حافظه صم كانت تنهّر فى حريم كوم الرماد خمنّو .. خم وكرجت سنونه على رجال لطمو الخدود والدمعه دم ونقرت بشيشى على شتم ويديها مليانات ... ختم والموج يصفق والنخيل بى عزه ماد ليك وإنقسم
حميدنا يا الحجر الأصم غناك حاحايه ... الصقور ما ركا .. فوق حيطك .. رخم يا عشا الضيفان و رواب العشـــــــم البركل الشامخ يشابى القومه ليك يا محترم فكيت كتير ريقة الوطن ودرت كم قرمه وخرم يا حبلنا السرى الببخ فى الجوف .......... نغم حب الأرض عشق الأرض يشفى يداوى من أى هم ................................................ يا حبنا ... ويا طبنا يا دوح قلوبنا وبلسما زرقاء يمامتنا التعاين من بعيد حين أصاب شوقنا ...... العمى
جبار خواطرنا ومشاعرنا المجرحه .. ديمه إياك برها ياتو بحرا عرقو ... حامى جزيرتو ما جيت حازمه تربال زرعت قلوبنا حب شتلك قبض والضل رمى حميدنا يا حميدنا سى وريتنا معنى الإنتمى يغسلك الله من اى سئ يا البيك قلوبنا متيمه وطنا يكون ما زيو ذي فى سبيلو روحك سايمه يعرض صبيهو مع النقى بدل الكلاش والراجمه الضبعة سارحه مع الجدى يرون صحارى بعد ظما فرخ ا لقمارى مع الحدى وفيض الأمانى الحالمه
العبره شقت عازة طق أطرح وشيكا وناغمه الابيض الازرق دموع حرقت خدود العاصمة يا غفيرا وكت تنوم من أى هم ما ينهما ما همت غير بى ها الوطن حبك يفوق أرضو وسما ورحلت قبال الأوان يا دوبو عرق الحب نما وقفت على طولا الارض وأداكا تعظيم السما وحبك صبح للناس فرض والنيل فى حضنك ارتمى
يا العشتا بينا ونحن فى وما كنا فى يوم قلت حى على الكفاح شلال دماكا على الارض باكر يفرهد ونحنا فى ولسع نصاح وافكارك أنت بلد .. بلد مختوته فوق كتف الرياح تجى طالع انت مع البذور كون من سماح توزن كمنجات الطيور تعزفك غناك بى إرتياح تفوح أريحيتك زهور مودة ريد وحنان وحب يشفى الجراح وتظل حضور عزّ الغياب شمسا تطل فى كل صباح إراده لى كل الشعوب تهب متل ريح الصلاح ويهدل حمامك فى أمان والكل يقول ... أرضا ســــــــلاح ... أرضا ســــلاح _____________________
شكرا استاذ سيداحمد على الطلة البهية والمرثية العجيبة للشاعر خليفة وصوت ودالنصري حميد الله يرحمه مدرسة كبيرة وبحر ليس له ساحل وعطاء سيمتد اثره مستقبلا. له الف رحمة ونور من رب العباد
Quote: راح مهوِّم جاي وغادي يا الهي .. .. الـ . عـ ـر بيَّة ؟؟
وسبحان الله ياباشمهندس كانما كان حميد يرثي نفسه حيث مات هو ايضاً فى عربية وفى طريق شريان الشمال الذي أحبه وتعلق به كما تعلق ود الازهري بالمرغينية ومات فى طريقها لهما الرحمة والمغفرة وأعلي درجات الجنة
05-09-2013, 05:26 PM
saidahmed shami saidahmed shami
تاريخ التسجيل: 01-08-2013
مجموع المشاركات: 2348
نوري يا أم ترهاقا يا أمِّي يا العليك ما انتاقا هَمِّي بي خيول فشّاقا هِمِّي لمِّي شوقي الطاقة ضمِّي ماب أجُر من فاقة نمِّي عشقِ حُر قد لاقى دمِّي ماب ألِف الطاقة عِمِّي لا أم ألف محّاقة صمِّي وفي شمش حرّاقة حُمِّي وقاطع الفرطاقة عَمِّي من صباح إشراقة نجمي ومن سماح أخلاقه نضمي الحنان جِنِّك تردمي الجنان جَنَّك تقسمي يا أم عِرِق لأعراقه إِمِّي لا مرض لا فاقة وأُمِّي بين قلوب أفراقة أرمي ريدتك الأشواقه ألمِي الأناقي الساقه حلمي من خداره أوراقه ضلمي ما طريتك .. وإنتي إسمي لا نسيتك وإنتي رسمي نوري يا بغر الحواري من بساتينا أم قماري موية ليل ونهاره جاري توَّرت نفس الطواري عبَّت العطرون لواري من خدارك ويا خداري البلل لليلي طاري حس حسونة الديمة ساري مرقة الناس العصاري والبراسيم التراري ما أروع الليل حين تساري لا دواري ولا سواري لا تِوقِّف في كباري الحبيِّب دارو داري في عيونو لقا ووداري تاري يا نفضة غباري من رحيلي وهم سفار نوري رزقاً جاني جاري ولاني حاري ولاني داري ؟؟!
الاخ معاوية سلام وشكر فعلا القصيدة كأنها تعبر عن ذات حميد او كأنها نبوة صدقت. فييها حميد ينعي نفسه ويصف موته. سبحان الله لايدري الانسان الى اين تسوقه الاقدار !! هذه القصيدة واحدة من كنوز حميد المخفية اخي معاوية وما اكثر الكنوز الثمينة عند حميد رحمه الله .
الاخ اسامة نشكرك على الطلة ولك خالص التحايا نعم اليس كذلك حميد حتى وهو يرثي عزيزا فهو يواسي ويزرع الامل ويريح النفوس ويطرد الحزن واليأس نسأل الله ان يثيبه بكل ما ترك من خير
شكرنا الاستاذ سيداحمد شامي ولك الف تحية وانت توثق لهذا التراث القيم وتتناول هذه السيرة العطرة سيرة حميد ونرجو منك المزيد فمثل هذا الادب ربما يساعد في تخفيف ما بنا من احباط وصدمة لما يحدث للوطن . فحميد كان داعية من دعاة الوحدة والسلام ونصير بفنه للضعفاء والمقهورين له الرحمة في انتظار مساهماتك الرئعة الراقية.
الصفّا دمّك وكان سبب في ها الجرح إنشاء الله لا مسى لا صِبِح إنشا الله يا بلدي المَعمَّر بالعَشم من سفَّ خيرنا يكبُّو مِح وإنشاء الله لا فاق لا نصِح باسْبابو ينْكسر العوَجْ والصاح يصِح يا مُنهك إشراق الغناوي إنشاء الله عنّك ما اسْترح يا مُهلك أشواق الحكاوي على أدمى خاذوق تتضح ؟ كلَّ الرّخَم كل الصّقور كل الحِدَي كل النسور كُبْرى الجوارح في المُطور والصاقعة في عز الهَبوب رَحَلَت جنوب تعَزل من الرمم المفقَّعة في حشا الأحْراش مجدَّعة دون قُبور الأرض زيْ يوم النّشور قيزان من النّاس يَتْرعوا بخت الصُّبار بخت الكلاب بخت الصّراصير والْقَعو بخت الضّبابين والباعوض بخت الجنادب وارتعوا يا كل ديدان الأرض ما تشتهي الأنفس هِنا في العَدْ يلوكو العدْ يسفُّوا اليبلعو كبد الزنوج الوارمة لسنات العرب كلو البجا المُو سالمة يا غربان مصارين الحلب فشفاش ولاد النوبة يا ديدان قلوب ناس بحري والجزيرة كيمان العصب زي القصب قطّن كيانه الكان عريس جنضل فطيس الريح يلوج بو يفرزعو رقشة خطوط القرمصيص الدود ينغمش في أصبعوالمقطوع وكان أصبع وتر فوق للمدرس يرفعو كان بس ملاح أمُّو الوحيد الطاعم العد يقطعو يا كفُّو يا المجدوع نقشة الحنِة نُخَّام الطُراش الضرضريرِة المدِّي والزغريتة عُوُوُووووووُُوُع الدارة وطنو التوعُّوا أما الدموم ماب تنفرز ما انساطو وكتين ترعُّوا شهدت سحابة اللت بلد عز الربيع إنو الجميع قبال يموتوا يدمِّعُو مش كلهم طينات غلابة على غلابة ووقَّعو الغبا خرابة فها الحرابة تمن عذابه بلانا مين اليدفعو ساقة قوانين الضهب الزول يعاين الزول مخادعو ويتبعو ؟!؟ كرباً كعب يا الله كيف كان راح يكون حال التعب ديل لو وعوا أن مافي داعي لها العفن وإن ما كضب يسألنا الله عن الوطن قبل أيِّ شي الله ... الوطن مش وزعو وخلق البيفصح والرطن وراهو ما معنى أصبعو وقيمة وشي حتّان نزل دينو الحنيف الشرعوا خلُّوني في رزقي الجحيم واتهنوا بي ذات النعيم واستمتعوا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الشيخ سيد أحمد
ابو يسرا
معاوية محمد الحسن
saidahmed shami
usama Babiker
فيس بوك
تويتر
انستقرام
يوتيوب
بنتيريست