|
|
 نـــــــــــورا
|
نـــــــــــــــــــــــــــــــــورا
سموها نورا
عشان يوم الوضوع
وكان في السبوع يوما تنين
برقت نيازك قبل ما يمرق
يفج نور الصباح
من جوة احشاء الانين
صدحت مآذن الحلة
واعلنت اليقين
بنية زي طمي الدميرة
وزي
ريحة تراب الضفتين
زي نيلنا ساعات العصاري
وما في زي نيلنا ساعات العصاري
وكيف حنين
يانورا
يا وعد السنين القادمات
يامزنة حضور الامنيات
سمبر تفاؤل شلتو في سفري الضنين
جيتيني في لحظة فزع
حين غطى كابوسا لئيم
كل البيوت في الحلة
من تحت الدقون
وقال لينا دين
واحترنا يا نور القلوب من دين جديد
ما فيه دين
كنا بنعرفو سماحة واخلاق
ثم في الاصل العزوف
عن دنيا فانية
وعن عرض زايل اكيد
لكن ده وين؟
خليني احكيك عن وجع
جوف المواني الشايلة االام السفين
ما اصلي يانور الهوى
ادمنت عطر اليود
واحزان المرافي
وعشت اوجاع
غربة السفر المهين
ما اصلي منك واصلي ليك
ولمن اجيك شايل فرح فال الغيوم
النادية ليك
ترجع معاي كل القماري
الشاردة من ظلما مكين
يانور قلوب كل اطفال الحواري
الجارية تسعد
في غبار الحلة
لمن تضحك الفرحة المخبية في البيوت
راجياك بين عيدين
وبين
الرحمتات
والحارة اتدست سنين
ناس العمارات الجداد
ما بعرفو قيمة الرحمتات
يانوراا
يا زمن القلوب ما فيها شين
خلينا نرجع بالزمن
خلينا نتقاود سوا
خلينا نمشي على مهل
نبراه قيف النيل
نزيل حزن الضفاف من الضمير
الما امين
خلينا ندي الموج براح
يتمد فيها الضفتين
يانورا ياروعة حروفي المابتبين
وبس
|
|
 
|
|
|
|
|
| |
د.محمد حسن
وضاحة
باسط المكي
فيس بوك
تويتر
انستقرام
يوتيوب
بنتيريست