وهمة أولى : ظهرت في الفترة الفاتت موضة روابط معجبي الفنان فلان أو الفنانة فرتكانة ..كل 17 نفر عندهم بنطلون أو إسكيرت أسود مع قميص أو بلوزة بيضا بيعملوا ليهم رابطة معجبين للفنان أو الفنانة .. ثم لا يكلف الأمر بعد داك سوى قلم شيني وورقة فلوسكاب يكتب فيها بالخط الشين إسم الفنان أو الفنانة ..مع بوستر بوسترين بي الأدوب فوتو شوب فيهو صورة الفنان أو الفنانة .. ثم يظهر في المايك مع المذيع وفي أسفل الصورة يتكتب النعيم حمدن الله رئيس رابطة معجبي الفنانة فرتكانة .. والحق يقال وش النعيم حمدن الله بيوحي إنو الزول ده ما حافظ ولااا اغنية لي الفنانة فرتكانة ثم يعلل وببساطة قيام هكذا حفل جماهيري لإتاحة الفرصة لجمهور الفنانة فرتكانة للتواصل معها والإستماع لجديدها ..
القصة : قبل يومين شاهدت إعادة حفل قيل إنو جماهيري بالمسرح القومي للفنانة نانسي عجاج نظمته رابطة معجبي الفنانة .. قررت متابعة الحلقة وقبل ما تبدا نانسي في الغناء كان قاعدين معاي اصحابي الصغمبروتيين محمد وصلاح عمر الفاروق..قمت قلت ليهم تعالوا أحكي ليكم الحفلة دي ح يحصل فيها شنو بدياة من الوردة ال ح تمسكا الفنانة مروراً بي الحوامة في المسرح ختاما بترتيب ترديد الاغنيات .. بحمد الله لم تخذلني نانسي عجاج وإن خذلتني في شئ فهو الإكستينشن حق الشعر المرة دي مااا كان مظبوط وظهرت تسريحتها منكوشة .. المهم في الموضوع وما يليني هو طريقة غناء نانسي عجاج .. نانسي عجاج بدت وكانها بدأت العد التنازلي وقررت تكتب وتحرر شهادة وفاة فنانة وإنو خلاص حتت الأتو وكييسا بقا فاضي .. صوت نانسي عجاج ما إتطور ..نفس المحدودية في الصوت.. نفس الإصرار على إستخدام طريقة ( النياصة ) في الصوت بدلاً من إخراج الصوت الطبيعي ..مع الإصرار على إخراج بحة الصوت في أي زمان ومكان كما موبيتل ..بحة مصنوعة صناعة ..بحة باهتة..كترتها مسخت علي الغنا .. مازالت نانسي عجاج تصر إلحاحاً إنها تجبر الناس يتفاعلوا معاها غصباً عن ابو حنانهم في أغانيها الغير مسموعة وغير مهضومة وهي تمد ليهم المايك وتصر عليهم يرددوا معاها مقاطع لي أغنيات تقيلة في اللحن غريبة في الكلمات غنتها نانسي في البومها الاخير وعلى الرغم من إنو الفترة طالت إلا إنو حتتتى رابطة المعجبين وضح إنها ما حافظة الاغنيات دي وما اتفاعلت معاها إلا بي أوامر من نانسي عجاج .. وهنا ظهر الفارق في التفاعل العفوي في اغنيات الغير واللي رددها الجمهور بعفوية رغم من إنو برضو نانسي مصصرة تصطنع التفاعل الجماهيري بالإجبار ..وواصلت نانسي إصرارها على إنو بعض الاغنيات للفنانين الكبار صارت ملك حر ليها ..
تخريمة : ثبت شرعاً إنو نانسي عجاج مدّعية في قصة تجاوبها مع الجمهور ..وظهرت في لقطة وهي بتواصل في حركتها البايخة بتاعت الحوامة في المسرح إنو جاتها طفلة من وراها كانت عايزة ترقص معاها ..الطفلة بي عفوية لمست نانسي من يدها بي ورا ..نانسي في لحظة يبدو إنها فكرت ده معجب فتعاملت بي ردة فعل عنيفة و لوهلة معاها صرة ..وما إن إلتفتت ولقتها طفلة خجلت من روحها وإفتعلت إبتسامة باااهتة مصطنعة ثم رقصت مع الطفلة وبرد الجو ونزل المطر وفرح الأهل ورقصت أمل وهتف بدر..
03-30-2013, 09:46 AM
أحمد ابن عوف أحمد ابن عوف
تاريخ التسجيل: 04-26-2010
مجموع المشاركات: 7610
تحديدا مافي زول داير يقول ليها الكلام دا، بل بالعكس، يبدو ان من حولها مصرين انو كلامك دا هو المنقا زاااتا في الغنا بتاعها
Quote: صوت نانسي عجاج ما إتطور ..نفس المحدودية في الصوت.. نفس الإصرار على إستخدام طريقة ( النياصة ) في الصوت بدلاً من إخراج الصوت الطبيعي ..مع الإصرار على إخراج بحة الصوت في أي زمان ومكان كما موبيتل ..بحة مصنوعة صناعة ..بحة باهتة..كترتها مسخت علي الغنا ..
فول استوب
03-30-2013, 09:52 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا الأمير: انا من مااا طلحة شبكني ليك ما بهدي للناس الكبار قنعت ليك من خيراً في الفنايل.. أصلاً انا كمان عكس طلحة أولادي ديل بحب اهدي ليهم انا ما اي زول تاني واقبل الهدايا البتجيني لاني غير مستطيع :)
03-30-2013, 10:11 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: نا الكلام الانت قلتو ده كلو كان حايم جواي وعامل لي قلق
يا أم مؤيد سلام الله يغشاكِ الكلام دا كلنا حايم جوانا وحامينا النوم بس مقطعنّوا في حشانا .. وخائفين نجرح مشاعر حبيبنا طلوّح وأميرتو دا+ مأملين في كتابة عمود في جريدتو ...بس مادام رئيس التحرير كشحها ليها في وشوا والكلام هيلو هو أهو نفضفض ونعبّر عن شعورنا ـــ أبو حتوت كدي أفقد لينا تنظير دا.. حسي بيكون غمران ود الفاروق ولا رحمّوا ختّاها ليهو في نص الجبهة على قول الشوام جابوا أكتاف
03-30-2013, 10:23 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
واحد صاحبنا درج على إبداء رايه الساخط .. كلما ما جات سيرة نانسي كتاحه .. وطلعوها في كفر الغنا في الآونة الأخيرة .. وانشرارها في المهرجانات والأجهزة مرئيها ومسموعها وفي كافة الوسائط االحديثة .. يقول ليكـ هسه امانة في ضمتكـ دي .. الغنا البنعرفو كلنا داير ليهو جلع قدر ده .. الجلع البتسوي فيهو نانسي في بطن غناها ده مكانه حتة تانية ...... فعين السخط تبدئ المساويا يافاروق يا اخوي ...... وزولنا ده ساخط أكتر منكـ ..... على هلامية نانسي عجاج التي تغني بي سماحتا .. ويرى صوتها ضعيفاً وبهاراتها الوحوحانية تفسد طبخة الغناء .. بل يراها نموذج أكثر ايغالاً في غرائزية مستمعي الغناء في السودان .. ومن جيلنا جيل الشباب على وجه الخصوص .. فلا زال لهواة سلاطين الطرب موطئ قدم في خارطة مستمعي الغناء .. وإن تقاصرت هذه المساحة وتقلصت كثيراً من هجمات أمثال نانسي عجاج .. وزي طقة السر قدور وفتياته لامعات الخدود فارهات القدود .... مع الفرز يعني .. فمنار أراها غنايه شديد حسب وجة نظري .. أها زولي ده كثيراً ما استفزني وهددني بالاستماع بعمق لنانسي عجاج كما أفعل .. أمام أم العيال .. فكنت الوذ بالصمت المطبق او الضحكـ المغلف .. لعلمي بمحاولتة اثبات وجهة نظره عبر وسائل قد تتعارض وقانون حماية الأسرة ..
يعجبني غناء نانسي .. لمقدرتها العالية على التطريب .. وماقاعد أسمع بي عيوني أو بي غرايزي يافاروق يأخ .. بطل سباحة عكس التيار فمعجبي هذه الكتاحة .. ومن يتأوهو لآهاتها كتاااااااااار .. وكل زول بيتأوه من الحتة الواجعاهو .. ونانسي تغني والكل يبكي على ليلاه .. فهناكـ من يبكي في نانسي في عضمها .. وهناكـ من يبكي لروعة غناء نانسي .. وفي النهاااية كلو عن العرب صااابون ..
أمسكـ عندكـ يافاروق ود الصايم ده واحد من الناس البتسمع بي عيونا ...... ثم ثانياً الزول القاعد جمب طلحة ما الجمبي .. أكيد الكلام الدراش الفي نانسي ده ما حيرضيهو ..
03-30-2013, 06:08 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18007
بالعكس يا أمير عمر الفاروق دا كويس إنو يكتب لينا بى طريقة الهرجلة دي في الصفحة الفنية بتاعت ناذر الخليفة عشان بيني وبينك مرات بكاء الجرايد بحرروا أهلو .. ومال إتا قايل الشكل والمنابيذ القاعدين يفتعلوها رؤوساء التحرير وكبار الكتاب مع بعضهم دي لشنو ؟؟؟ ما عشان السوق بتاع الجريدة ينفجط .. بس أهم حاجة إنو أبو عمير دا يكون عندو نفس طويل ولياقة ذهنية ومعنوية للهبت والخبت الممكن يحصل ليهو في حال عاس زي العواسة الفوق دي في الجرايد ..
من جهة تانية أفتكر مرة قلتا إنو أبو عمير دا من أكوس الناس البكتبوا في الفن والرياضية إذا راق في بطن الواطة دي وخلا هرجيهو دا حتي كمان كلمة (هرجيهو) دي ختيتا بين قوسين .. يا عمر الفاروق روووق .
03-30-2013, 06:14 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
اخوك من زمااان ما بنطلي عليهو (هكذا) صوت و قلته كلامك دا بمئية طريقة و لما قلتو كان عشمي انو الزولة دي تتصلح لانو صراحة عندها الموهبة لكن و اضح انو هي خلاص افتكرت نفسها و صلت (تب) و اتوهطت عشان كدا ما عندها الأستعداد انها تسمع اي كلام . بداية النهاية البتقوله دي يا عمر هي بدت بيها و مستمره فيها فاظن انها الأن كل القصة مسألة و قت ليس إلا. الزولة دي عايزة تلعب في المستطاع ليها فقط و ما عايزة تغامر في الحتات البتصنع الفنان جد جد .
يا عمر يا صاحبي كنت عايز اضرب ليك مثل بالعملو (صاحبنا)- ربي يرحمو و يتقبلو- و خلاهو فنان لا يمكن أن يتكرر أبداً بس صراحة خايف افتح سيرة دا ما وقتو أني افتحه .
المهم سلامي لك ولا صحابك الصغار .
03-30-2013, 11:27 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
سلامات لي كل الناس الجات بي جاي.. وزي ما بيقول استاذنا زمان في حل مسائل الدوائر الكهربية نشتغل بي نظرية كش من ورا :) أها يا يا جماعة خلوني ابدا ارد عليكم من اخر مداخلة لي حبيبنا عزيز .. عارف يا عزيز مرات النصح براهو ما كافي ..نحن مرات بننصح زول مجاملة ليهو مع إنو مفروض بدل ننصحو بي التطوير مفروض نكون صريحين معاهو في إنو الشغلة دي ما شغلتك أو ممكن نقول ليهو اووكي انت واصل فيها لكن ما بي مسمى إنك فنان رسالي وصاحب مدرسة ..انت زول بتغني وبس .. نانسي ونهى عجاج صناعة فنية غصباً عننا قامت على أساس العلاقات في مقامها الأول.. نوعاً ما أحترم رسالة نهى عجاج وخطها الواضح بالرغم من ضعف إمكاناتها الصوتية إلا إنها متحدثة لبغة وبتطرح الرؤية الفنية حقتها بي وضوح وماشة فيها .. انا يا عزيز عندي مشكلة كبييرة مفادها إنو الفنان عندي في المقام الأول صوووت..ثم صوووت ..ثم صوووت.. قصة رسالي ومدرسة وعلم وما ادراك ما كلمات والحان دي ما بتدخل ضمن اهتماماتي وبتجي في مراحل متاخرة.. اها نانسي صوتها ضعيف ..وامكاناتها الصوتية ضعيفة..انا بعتبر نانسي ومن قبلها طارق اللمين لعبوا على النفسية السودانية كويييس جداً ودخلوا لي قلب المستمع السوداني عن طريق عيونو ما اضنينو .. وهي نفس السياسة البيستخدمها بتاع نجوم الغد بابكر صديق وهو بيفرض علينا ناس افراح عصام .. فنانة منذ ظهورها ولحددددي اللحظة دي مازالت عايشة على اكتاف اغنيتين لا ثالث لهما شقي ومجنون ويرضيك الله يخليك ..وما بينهما من اغاني الجمهور بيكون بياكل في تسالي او بيتونس..
قدمت لنناسي نصيحة في بداية العام 1999 فى منزلي بعد ان غنت أكثر من اغنية برفقة والدها الفنان بدر الدين عجاج رحمة الله ولم تهتم بها!!
كل من يعتقد بانه وصل القمة فاليتحسس موقعه في القاع.
النجومية في السودان تخضع لمقومات ليس للإمكانيات الفنية صلة بها!! ويشترك في ذلك الكثير من النجوم والنجمات!!
وجدت الحفل في قناة النيل الأزرق والجميل ان الرموت ما زال في يدى فواصلت رحلة التوهان في القنوات.
لكم الود
عزيز ياعزيز البت دي عجبتني مره واحده في اغنية شقي ومجنون التي تخص الراحل المقيم صديق الكحلاوي فناني المفضل قلت ياربي عشان تعاملت معاها بنفس النظيرية بتاعتي السابقة التي ارفقتها هنا في سودانيز اون لاين واثبت لكم صحتها وهي ( الخيال السمعي ) وهي ممكن اي زول يغني بس لازم تسرح مع صاحب الاغنية الاصل دا لو فعلا عايز تعيش الاغنية وتستمع هسه لمن تغنيها نانسي انا ممكن ابكي واجعر عديل كدا عشان بتذكر الفنان الكحلاوي وهو طريح الفراش الابيض بمستشفي بحري ...
انا ارى نانسي نجحت في اغنيتين، رفقة و بلداً هيلي أنا
نانسي في رأيي المتواضع علثيها ان تلتزم بأغانيها فقط، ويا حبذا لو لحنتها براها هنا الصوت ح يركب صاح، لكن بصوتها الحالي ما بنفع يركب على لحن صمم لصوت آخر
03-31-2013, 12:18 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: بالمرة يا حبيب اقنع لينا عمك السر قدور يرجع لينا اسرار بابكر من هسي
طارق جبريل .. أسرار بابكر برضو صوت نسائي تقليدي .. عارفكم ح تهيجو فيني وتقولوا عمر الشناف ده لا بيعجبو هيثم مصطفى لا الصيام في رجب :) انا الإستاندرد حقي في الاصوات النسائية عالي شوية وشروطي فيهو صعبة للإقتناع بي إنو ده صوت زولة فنانة مش مغنية مؤدية والسلام.. ولازلت مصر إلحااحا جداً إنو كان يا مكان في قديم الزمان بت إسمسها ملاك الأمين شقيقة الكندي الأمين وصلاح الأمين واللي بالرغم من إنهم طارحين نفسهم أسرة فنية فقد وأدوها مبكراً ومنعوها الغنا ..
03-31-2013, 12:26 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
نابري يا سفيان.. والله وما أكضب عليك بقت عندي مشكلة عويصة وانا عارفا غلط في حق تقييم الاخرين لكن والله وزييي ما قلت إنت بالضبط أو زي ما فهمت إنك ح تكون فهمتني غنو مشكلتي الاساسية بقت في إني بقييس أييي فنان أو فنانة بي محمود عبد العزيز ربنا يرحمو ويغفر ليهو ..هذا الحووت بدأ كما يبدأ الحاليون من فنانين وفنانات ردد غنا الغير لكن عمرو ما إستلموا أو وقف عليهو ..نفض اغاني حقت ناس ماف زول كان لا عارف اغانيهم لا عارفهم هم فيي روحهم ..بعكس الفنانين الحاليين بيغني اغنية الغير البتكون اووول ريدي اغنية شاربة في السوق وسييدا اصلا فنان مشهور.. هذا الحوت تسمع صوتو في 87 وتسمع صوتو في 95 بتعرف كيف إنو الزول ده كان ماشي في السلم التصاعدي والتطوور الغنائي الرهييب وبرضو بي الفطرة ما بي أيييي تنظير ولا علم.. وحتتى بعد ما مرض محمود وصوت محمود لكن صوت الحوت ما مات وكنت في أي لحظة بتتفاجأ بي حاجة في هذا الكائن الخرافي.. فعلاً يا نابري عندي مشكلة مقارنة خشششتني كده وكل ما اقول احاول اسمع لي زول أو زولة تعوضني محمود بصاب بي إحباااط
03-31-2013, 12:41 PM
garjah garjah
تاريخ التسجيل: 05-04-2002
مجموع المشاركات: 4702
Quote: محمد اسماعيل وفيصل الصحافة والخالدي والطيب مدثر وعمار السنوسي ديل ناس مركز جنوب كانو مهججين في فترة من منتصف التمانينات وحتى منتصف التسعينات
صحي شفت ديل فعلا اولاد مركز جنوب محمد اسماعيل دا ياخ حكايه مشكلته الوحيده ماكان مجتهد وعمل شغل خاص اما الخالدي رحمة الله عليه مااااااااااااااافي كلام ابدا اها اضف للناس ديل كمان في فنان جاهم من دنقلا في تلك الفتره اسمو محمد عبد الله دا عذب ليك محمد وردي عديل كمان في غناهو
03-31-2013, 01:04 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
طبعاً يا وليد عارفك بقيت تخاف مني في قصة إني بعرف أي زووول دي ..لكن مشكلتك بتختار ناس انا بعرفهم شدييد ما عارف دي صدفة ولا شنو.. محمد إسماعيل راجل نسيبنا وكده ..ولمن اقول ليك نسيبنا فهي علاقة نسب من الدرجة الأولى ..
سلامات وليد (المبارك، عبد اللطيف) ياخ الشاب أمير حاجة مدسوسة كدا ومشروع بتاع غنا راقي ورايق بعيد من جوطة الربع وفناني الكيبورد طبخة بتستوي على نار هادية وتجيك منها ريحة التوابل والبهارات تجبرك تدخل الـ (الكمشة) في الحلة وتغرف غرفة بغرض الضواقة وتستمر تغرف إلى أن تفاجأ بنهاية الحلقة وتجري تخش النيت تفتش عن تسجيل في النيت
يا فاروق يا عمر ياخ نانسي خلال الأسبوعين الفاتوا ديل عندها حضور في القنوات التلفزيونية ما حصلوا إلا علي عثمان نائب الرئيس قبلها في اغنيات من البرامج المذيعة قاعدة مبتسمة بتشوف في نانسي واهاتها وبحة صوتها ماعارف المذيعة كانت معجبة بالأغنية ولا بي طريقة الأداء ولا مجبورة كانت خادم الفكي على تقديم البرنامج نانسي زي ما ذكر الكتيرين صناعة
Quote: انا الإستاندرد حقي في الاصوات النسائية عالي شوية وشروطي فيهو صعبة للإقتناع بي إنو ده صوت زولة فنانة مش مغنية مؤدية والسلام..
أبو عمير قول كه .. وبعد تقول كه ادخل هنا إلى الأميرة نانسي عجاج .. أنا آسف جدا والله شوف رأي خبراء الصوت والموسيقي والفن قالوا شنو في الأميرة .. وبالمرة كدا في رابط بتلقاهو في البوست لمعجبي الأميرة أعفصو معاك تنوبك دهشة من كمية الخلق المكسرين فيها .. يعني بالمختصم العنيد: إتا بالنسبة لمحبي ومعجبي فن الأميرة نقطة صغمبوتة ربما لا تري بالعين المجردة في محيط واسع شديد . أبو عمير .. إتا ما بتؤولش كه ليه ؟ مش تؤول كه .. فيها إيه يعني لو أؤولت كه ؟
03-31-2013, 01:28 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: طبعاً يا وليد عارفك بقيت تخاف مني في قصة إني بعرف أي زووول دي ..لكن مشكلتك بتختار ناس انا بعرفهم شدييد ما عارف دي صدفة ولا شنو.. محمد إسماعيل راجل نسيبنا وكده ..ولمن اقول ليك نسيبنا فهي علاقة نسب من الدرجة الأولى .
كدا خوفتني زيادة محمد اسماعيل ياسلام لنا معه ايام جميله وليالي وصديقه الحلفاوي هشام محمود محمد طه ( بيتي ) وقرناص
03-31-2013, 02:01 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا طلحة ..من ناحية عندها معجبين انا لا أشكك في كده ..ومن ناحية عندها معجبين تحدييداً عشان صوتها برضو مقتنع..لكن مقتنع أكتر بي إنو زمرة المكسرين فيها بي عقلية السوداني البيشوف ليهو بت وبيعتقد إنها سمحة وتقوم تغني وتلبس موضة وتفك شعرها فديل كمييية كبيييرة من معجبي نانسي.. برضو يا طلحة بقول ليك حاجة تانية ما عارفا صاح ولا لأ لكن انا عندي مشكلة مع العلم في امور كده متعلقة بي الذوق والإحساس ..اها الغنا والموسيقى واحدة من الحاجات دي ..بشوف إنو العلم ممكن ينافي للواقع المعاش ونظرياً غير عمليياً .. يعني انا متأكد إنو علمياً كده الموصلي بيقول ثمان مصطفى من أعظم الأصوات ودي حقييقة لكن واقعياً عثمان مصطفى صوت لا يطرب الكثيريين.. ف شنو قصة انا اسمع رأيي موسيقي وامشي عليهو فيما يخص نانسي فدي صعبة وعليه ما اظن أعفص على لينكك ده..
03-31-2013, 02:52 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: صوت نانسي عجاج ما إتطور ..نفس المحدودية في الصوت.. نفس الإصرار على إستخدام طريقة ( النياصة ) في الصوت بدلاً من إخراج الصوت الطبيعي .. مع الإصرار على إخراج بحة الصوت في أي زمان ومكان كما موبيتل ..بحة مصنوعة صناعة ..بحة باهتة..كترتها مسخت علي الغنا ..
أراحكـ الله في الدارين
03-31-2013, 03:25 PM
خالد عبد الله محمود خالد عبد الله محمود
تاريخ التسجيل: 11-28-2004
مجموع المشاركات: 5393
ود الفاروق زماااااااان لمن قلنا انو نانسي ما عندها إمكانيات صوتية طبيعية جا عضو معانا بلعنا كلامنا وشبه دورا شكلة!!! نانسي عجبني أداءها في أغنية "اندرية" لأنو غنتا بطريقة عادية ما اخنق فطس وكان شبه بديت أغير رائي فيها لكن اتراجعتا لمن طلحة اصبح من معجبيها :)
03-31-2013, 04:22 PM
عزيز عزيز
تاريخ التسجيل: 04-12-2002
مجموع المشاركات: 3290
خخخخخخخخ يعني يا عمر الفاروق يقولوا ليك خلق الله مكسرا فيها تقول لا ديل نصهم عشان لابسا سلسل دهب وفستان الدهباية وعاملا ميج وما عارف شنو ؟ يقولوا ليك عشان صوتا وامكاناتا وابداعا متفقين فيها النص التاني من المعجبين والكتير جدا من الخبراء وعلماء الموسيقي والصوت والفن تقول لا ديل أنا ما بقتنع بكلامهم النظري وما عارف شنو ؟ والله بعد كدا إلا نوديك الحلاق بتاع صحبك تامبا .. عشان يحلق ليك مايكل جاكسون ويعمل ليك قطعية في النص . وبالمناسبة : إتا آخر واحد تنتقد حتة الاعجاب بالفنانة عشان مظهرا... لأنو اتا أكتر واحد لما يتكلم عن أية فنانة بتقول كلمة ونص عن صوتا وابداعا وتتم الباقي عن توبا وشعرا المنكوش وجزمتا الضيقة ومكياجا البمبي.. هسسسسس
يا سارة ممكن أجمد ليك اعجابي بالأميرة مؤقتا على بال ما تأخدي راحتك في الاعجاب بيها .. يعني أديك فرقة معاي .. وانتي عاملة إيه يا سارة ياخ ؟
03-31-2013, 04:40 PM
moaz elsir moaz elsir
تاريخ التسجيل: 09-13-2008
مجموع المشاركات: 1652
تمام ياعمر انت كدا صاااح بس فعلاً مشكله كبيرة و ح تخت البقية في حته ضيقه برضو شايف في زول قال انو انبسط من نانسي في (بلداً هيلي انا و اندريا) و عز الانبساط دا لانها دي اغاني حقته و ملكه هي انا شخصياً بقول للزميل دا السبب الرئيسي هو انو نانسي في الاغنيتين ديل اشتغلت على ايقاعات سودانية (الدليب و الدوباي - الجابودي) ببساطة اكبر الايقاعات دي حقتنا و بتهبشنا رسمي عشان كدا الأغنيتين ديل فعلاً كل ال(كنته) بتاعتهم هي الإيقاع اللحني .
سلام يا عزيز خطاب يا صديقي كيفك ياخ ؟ نانسي يا عزيز عندها الموهبة لكن ما عندها روح المغامره (انت سيد العارفين) بتاعة الفنانين و هي عايزة تلعب في حتت السليم و بي كدا عمره ما حتتجاوز مكانه الهي فيهو هسي. يا عزيز خطاب ياخ ارجع الرابط الجابو معجب الأميرة طلحة و شوف كلام الناس الاعتمد عليهو و تعال احكم أنا بقتنع بحكمك باعتبارك معلم و متخصص في علم الصوت الموسيقي .
اي يا جماعة قطع شك عندها معجبين بس صدقوني المعجبين ديل اكتر ما عاجبهم هو الإستايل بتاع نانسي نفسها و ليس صوتها.
يا ناس هسي رايكم شنو صوت نانسي و لا هاجر ؟!
03-31-2013, 10:50 PM
عماد شمت عماد شمت
تاريخ التسجيل: 12-02-2004
مجموع المشاركات: 3857
الفنانه نانسي عندها هنات مصطنعه وهي بتحاول تكتر منها عشان كده بتخلي الصوت و الاداء مافي محله .في صاحبنا دائما بقول (الكتره من الشي بتمشي في الاتجاه المعاكس )
لكن لو غنت عادي وخلت التصنيع اعتقد انها حتواصل المشوار بامتياز ,وضعف الصوت ماعيب للشخص
المتمكن في الغني,لانه بقدر يعرف كيف يوظف صوته في كل الاماكن الصعبه ويقدر يختار الغني المناسب لصوته
ياكابتن وليد عبداللطيف اخبارك ياخ ..محمد عبدالله وردي الصغير كان معانا في مركز شباب السجانه وما كان عنده اي ارتباط بنادي جنوب الا
الاصدقاء لكن اوافقك الراي بانه كان في نفس تلك الفترة ..الزمن الجميل داك حليلو..
اخونا عزيز خطاب الفنان كيفنك اخوي ان شا ء الله رجعت والاسرة بخير ...ياخي النصيحه في الزمن ده غالي بس للانسان البعرف قيمة
النصيحه ....انا بعيد شويه من البلد لمن ارجع بديك تلفون ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
أحمد ابن عوف
محمد البشرى الخضر
جمال ود القوز
محمد عبد الماجد الصايم
طلحة عبدالله
وضاح عبدالرحمن جابر
سفيان بشير نابرى
طارق جبريل
عزيز
وليد عبد اللطيف
عمر الفاروق عبد الله الشيخ
garjah
وضاحة
عمران حسن صالح
خالد عبد الله محمود
سارة علي
moaz elsir
عماد شمت
فيس بوك
تويتر
انستقرام
يوتيوب
بنتيريست