يا أهلنا في كل وادي في البنادر وفي البوداي القلوب ليكم تنادي
البوست دا محجوز لسرد القصص عن السودانيين في الغربة بالجد أنا مبسوط 24 قيراط بإني سوداني وبحب كل السودانيين على وجه العموم وبحب السودانيين في الأمارات والمهندسين على وجه الخصوص وسأسرد بعض القصص عن وقوف وتكاتف السودانيين معي في الإمارات وياريت كل واحد يحكي عن هذا الشعب العظيم يكفينا فخراً بتنوعنا (الزرقة والعرب والشنقيطي والحمريطي والعريان ميطي - كما قال الشاعر) أن نعيش في أي بلد ومع أي جنس ومع أي دين ولا نحس بالغربة
03-29-2013, 08:14 AM
رحمه فضل المولى عجك رحمه فضل المولى عجك
تاريخ التسجيل: 08-21-2012
مجموع المشاركات: 525
اخى النزير نجن نفخر بالسودان وبانتماءنا له . ولكن بعض السودانيين يجعلك تشعر بالعكس . اذكر عندما كنت فى لبنان اعرف مجموعه من السودانيين يعملون فى شركات البناء مع مجموعة جنسيات عربيه وغير عربيه . فحدثنى ابن خالى كان له علاقه قويه مع ابو محمود. وهو رجل كبير فى السن من سوريا وقد كان فى شبابه يعمل مع السودانيين فى الخليج وقد وجد اشياء كثيره لم تعجبه فى هولاء الاشبال فقال لابن خالى . ليش ها دولى السودانيه هيك ؟ فساله شو فى يا ابو محمود ؟ عم بكذبوا يا زلمى. كيف يعنى ما فهمت ؟ يا زلمى بالزمانات السودانى يلبس الدشداشه ويعنى الجلابيه والعمى والعصى ومعه الحرمه لابسه التوب السودانى والله ما احلاهم , كل العالم تتفرج عليهم . وربما ابو محمود كان لديه الكثير يريد ان يقوله ولكن لما شعر ان صديقه كشر له الانياب فاختار مبدا السلامه . يا اخى نحن نحمد الله على كل حال .
03-29-2013, 08:26 AM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
سلام يا النذير حجازي وضيوفه الكرام طالما ما الأمر عن الخليج، نهدي ليك دي نقلا عن الشرق السعودية:
الكاتب السعودي ورئيس القسم الرياضى الاسبق بصحيفة الوطن السعودية يتحدث عن االسودانيين حديث العارفين ..
السودانيون في الخندق السعودي
يتسع صدر الوطن السعودي الكبير لكل جنسيات العالم التي أتت بحثا عن لقمة العيش الكريمة، وتتسع قلوبنا كسعوديين لكل القادمين إلينا على اختلاف مشاربهم، ومع هذا فالصورة الشاملة تعطينا مدلولا واضحا وصريحا عن تميز بعض القادمين إلينا، فالبعض يعيش ويتعايش بهدوء وبدون ضجيج، وجنسيات أخرى تنشر الرذيلة وتبيع كل شيء وتمارس أي شيء. دعوني أتوقف عند الجنسية السودانية بالذات التي ساهمت في تطور وبناء هذا الوطن منذ أكثر من خمسة عقود وكانوا وما زالوا بيننا وينتمون إلينا بمشاعر صادقة ومختلفة عن بقية الشعوب التي أتت إلينا للعمل. أتت هذه الصور الجميلة بعد كتابتي عن موقف الجالية الهندية ومشاركتها لنا في احتفالية اليوم الوطني بالتبرع بالدم، وتذكرت أن أشقاءنا السودانيين سبقوا كل الجاليات فهم يشاركوننا كل أفراحنا وأتراحنا ولهم رابطة الإعلاميين السودانيين برئيسها عوض أحمد عمر وأمينها العام محمّد خير عوض الله، وهي تقدم صورة جميلة آخرها تعبيرهم عن فرحتهم ومشاركتهم الشعب السعودي في مناسبته الكبيرة باليوم الوطني، وتعودنا من أشقائنا السودانيين على مر مراحل البناء السعودي الصدق والنزاهة وهم دائما مثل الذهب الذي لا يصدأ أبداً حتى لو أنهكهم التعب. تشرفت أنا وجيلي بالتعلم والتربية على يد عدد من السودانيين، وتشرفت بالعمل مع زملاء وإخوان من السودان، وفي مجمل المشهد يظل الإنسان السوداني من أفضل الجنسيات التي عاشت وتعايشت في بلادنا ومن النادر أن تسمع بقضية طرفها سوداني وهذا سلوك ثقافي نتاج أسبقيتهم المعرفية ونتاج عقليتهم المتسمة بالوقار والشفافية ونقاء السريرة، ولا أبالغ إذا قلت إن الأشقاء السودانيين ثوب ساتر لعيوبنا وثقوبنا الاجتماعية وهم معنا في كل الظروف وفي خندق واحد إن لزم الأمر.
المصدر.. صحيفة الشرق السعودية.
03-29-2013, 08:27 PM
سمير شيخ ادريس سمير شيخ ادريس
تاريخ التسجيل: 01-14-2009
مجموع المشاركات: 1162
كنت ح تلتزم بالمواعيد - كنت ح تدفع فاتورة المحامي او الطبيب قريبك - كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد - كنت حتنطق حرف ال (ق) و ال) غ) كما ينبغي وما كنت حا تقول للتسعة تزعة - كنت بطلت تسف ساعوط - كنت صرت متخصص وعالم في مجالك - كنت حتلبس شيك جدا عند خروجك أمام التلفاز وأجهزة الاعلام - كنت تتحدث بطلاقة وإنسيابية بدون أ أ أ أ أ أ– ولو ما كنت سودانى كنت عرفت ان باللدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالزات يعنى اخنق فطس.. كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل زي قدر الله بدون حتي ماتدق الباب وتدقو ليه؟؟مش في سلك تجرو وتدخل!!بدون مراعاة لحرمة البيت ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري....كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!!واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ..والطامة الكبري لو كان عندهم حوض سمك ... و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية... كنت ح تتردد في إعطاء رقم تلفون أو عنوان شخص ما.. دون إذنه او حتي سؤاله اذا كان عندو رغبة يتواصل مع الناس ديل أو مفهمم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجر والده او والدته ولمن يحصل حادث الحبيب ياكلها لا لذنب جناهو سوي انو اهلو سودانين!!...كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!!ولو ما كنت سوداني ...كنت ح تخلي الصغار في البيت عندما تكون المناسبةمناسبة كبار..-كنت اتونست بصوت معقول, خصوصا' عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت...كنت امتنعت عن التدخين في منزل شخص اخر, او على الاقل استأذنت قبل ما تولع...كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس..كنت امتنعت عن زيارة احدهم في مكتبه , للونسه او مناقشة امور لا صله لها بالعمل كنت خجلت من عدد المسكولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله الفيك اتعرفت'.....كنت حا تقعد فى صالون الناس بدل تلوص فى البيت كلو..كنت حا تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك( لو كان فى يعنى) ..كنت ما حا تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج ..اصلا انتو البوديكم شنو مستشفي الولادة؟؟ عشان تودو نسوانكم اوكي آمنا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله ... ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش..لو ما كنت سودانى ما كنت اكلت ميراث اخوانك الصغار واستوليت على بيت ابوك لى يوم يبعثون عشان بس انت الكبير!!ولو ما كنت سودانى كنت إبتكرت فى خريطة بيتك بدل تشف حقت صاحبك بالكربون وكنت استثمرت فى حاجة غير الركشة !! ومحلات الاتصالات !!لو ما كنت سودااااااااااانى ما كنت سوقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بى دهب البيت كلو ولابسين الاحمر والاخضر والترتر وزفة الوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركو ويتساككو ده غير التحنيس والدناءة عشان يمشو ليك الوزن !!! ولو ما كنتو سودانين كنت قعدتو محترمين فى الطيارة وما قرفتو المضيفات بي الطلبات والاصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والاصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الاحزمة ووقفتو قبل الطيارة تنزل. .لو ما كنت سودانى ما كان ممكن تدخل فى زول شمال وتقول ليهو راتبك كم؟؟؟؟ولو ما كنت سودانى ما كان ممكن تفكر انك تمشى عرس بتاع ناس وتقيف بكل بجاحة تصور العروس بى موبايلك وانت ما بتقرب للعروس ولا حتى بى حواء وآدم بدون ما تسأل نفسك منو الاداك الحق ده في إختراق خصوصيات الناس ومنو السمح ليك تدخل وتتعشي وتصور!!!! ..ولو ما كنت سودانى ما كنت طلعت من شغللك ولمدة تلاتة ايام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع ######## ما بياخد اكتر من عشرة دقايق!!! لو ما كنت سودانى كنت استفدت من غربتك وامنت مستقبل اولادك وقدمت استقالتك ورجعت بلدك بي كرعينك مش بالصندوق..لو ما كنت سودانى ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير ..ولو ما كنت سودانى مستحيييييييييييييييل تدى اخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو اهلك زااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بي ازمة نفسية!! صدقنى لو ما كنت سودانى كانت حياتك مشت بى اريحية ونظام ورااااااااحة كانت مجاملاتك حا تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!..كنت نمت لما تحب وتصحى لمن تحب..كنت انت القررت مشروع زواجك بمن تحب بدل القبيلة كلها تقرر معاك..ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ انا ما عارف!!!!!. كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!! .كنت استمتعت باجازتك وبى وقتك وحياتك بدل كل واحد يديك الفتوي الفى دماغو..لو ما كنت سودانى كنت حا تكون سييييييييييد نفسك وووووووووووووو.
03-29-2013, 08:49 PM
صلاح عباس فقير صلاح عباس فقير
تاريخ التسجيل: 08-08-2009
مجموع المشاركات: 5482
شكراً لك أخي النذير على هذا البوست المهم، خاصة في المرحلة الحرجة اللي بنمر بيها، نحتاج نتذكر حاجاتنا الجميلة، عشان نستعيد ثقتنا بأنفسنا، وما ذكره الأخ سمير شيخ إدريس من رصد للسلبيات، هو كذلك مهم، وما أظن واحد من اللي دخلوا البوست ده، قصد أننا نتغافل عن عيوبنا وأخطائنا! لكن حقيقةً هناك ظاهرة ملاحظة، وهي ظاهرة ثناء الآخرين على السودانيين وأخلاقهم! بل ظاهرة تميز السوداني في الوسط الذي يعمل فيه! أنا حقيقة لمست هذه المسألة بوضوح من خلال دراستي بالمملكة المغربية، ومرة ذات بوستٍ ما سجلت هذه الظاهرة، وهي التفوق الأكاديمي الواضح للسودانيين عموماً على غيرهم من زملائهم من الجنسيات الأخرى، باختصار: الطلاب المغاربة يبدؤون المذاكرة من أول العام، وعلى طول تلقى الطالب شايل كراسو بقرأ حتى وهو ماشي، لأنو نظامهم التعليمي صعب، المهم السودانيين في لعبهم ولهوهم ومرحهم، والله تجدهم في ساحة الحي الجامعي في فاس، بس تقول البلد بلدهم، ما يشتغلوا بالمذاكرة إلا لما تُعلق جداول الاختبارات، ثم تكون المفاجأة بعدين أنهم يتصدرون قوائم الناجحين، لدرجة أن الطلاب المغاربة بعضهم شكك في نزاهة الدكاترة، خاصة وبعض الدكاترة كانوا مصريين وسوريين وكدة، فردوا عليهم: أن السودانيين بفهمو وإنتو بتحفظو! وأذكر مرة أخ سوداني درس في مصر، عبر لي عن نفس الانطباع! فهل نحن متميزون حقاً!
03-30-2013, 01:12 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7159
سلام يا شباب، وشكراً على تفاعلكم مع الموضوع قدحاً ومدحاً والله جاري مع الحياة أم قدود وبجيكم راجع فرداً فرداً
بس خلوني أرد على سمير شيخ إدريس
يا سمير أي زول بشوف السودانيين والسودان على حسب مجتمعو وبيئتو اللي عايش فيها، وعلى حسب طبائعه وتمثيله لنفسه، تخيل الحاجات اللي كتبتها ( أو بالاحرى نقلتها فلقد نزلت قبل كدا في المنبر دا من غير أن تشير إلى المصدر، وعملت فيها حبة تعديلات لكن هو جهد غيرك، على العموم دي ما نقطتنا هسى) ما تنطبق على السودانيين!! وزول بكتب كلام زي دا سطحي ولا يعرف السودانيين زي سطحية بعض السعوديين اللي بقولوا السودانيين كسالى وهسى منظمة الصحة العالمية كشفتهم وطلعوا تالت أكسل شعب في العالم والسودانيين ليسوا في قائمة العشرين الأواخر!! والموضوع دا نزل في قناة العربية السعودية.
سأعود في حين ميسرة للتمة الموضوع
أرقد عافية
03-30-2013, 01:49 AM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
والله الواحد بعد ما احتك بشعوب تانية، بقيت على قناعة إنو ما في شعب احسن من شعب، لكن في زول او زولة ممكن تكون احسن من زول او زولة تانية بصرف النظر عن جنسيتهم.
طبعاً أي شعب حيشوف نفسو هو الأحسن.
تجربتي مع السودانيين فيها الصالح والطالح، وبرضو مع الارتريين نفس الشئ ومع المصريين، ومع الامركان.
لكن أنا كسوداني بيعجبني جداً لمن اسمع لي عن موقف بطولي او نبيل كان وراءهو سوداني او سودانية بحكم سودانيتي، وبتمنى لو السودانيين كلهم بقوا كده وبرضو باقى الناس لانو العالم كان حيكون أجمل.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
النذير حجازي
رحمه فضل المولى عجك
عبدالله عثمان
سمير شيخ ادريس
الصادق اسماعيل
فيس بوك
تويتر
انستقرام
يوتيوب
بنتيريست