محل ما تحل الناس ضاجه بالشكوى العيال تعبونا ...شوفت الولد قال شنو؟؟؟!!! شقت البت عملت شنو؟؟!!! قصص لا ليها حد و لا عد و بعديها طوالى الاكليشيهات : والله ده جيل عجيب .. نحن ما كنا كده... والله كان كنا تعبنا اماتنا كده ما كان ولدوا العدد ده... ياخى ابواتنا ذاتو كان كنا بنطلب منهم قدر ده كان خبرنا الليله مقطوع... اها ياها الحاله محل مافى لمه.. كدى اغلط اسأل ليك زول اولادك كيف... تفتح لنفسك باب ما بنقفل... انا غايتو مجتهده فى انى ابطل السؤال ده ...المشكله فيهو انو سؤال لزمه فى سلامنا .. يعنى الواحد يكون مدور اهلا ..كيف الحال بالله ...انشاءالله طيبين..والله زمن..الله يسلمك ..بالله عاملين شنو.. الحمدلله.. انشأكل كويسين.. الحمدلله.. و الاولاد كيف .... ا للللللل ااااا لله تلقى نفسك طبيت و جبتو لرقبتك
اها قولكم شنو.. تعالو ادلو بدلوكم من حديث الخبره و الخبيرات ..الى انزال دراسات .. مرورا بفش المغسات و سرد الحكايات
----------------------------------------- الاخ كمال كرار اهاا طبعا لينا 4 يوم كده قاعدين نتعازم انا و انت و نتخاسم بالله و الرسول عشان زول افتح الموضوع ده بعد ما البكر غاده طنشتنا ...اهااا الليله بعد الكلام السمعتو الصباح من محمد (8 سنوات) حزمتها بحكى ليك قصته لقدام
افتكر عدد الكلمات اكتر بكتير مما اتفقناالسماح
09-03-2007, 09:58 PM
Hussein Mallasi Hussein Mallasi
تاريخ التسجيل: 09-28-2003
مجموع المشاركات: 26230
والله يا ندى ما كنا كده...و بالذات انا و عندى شهاده موثقه من الوالد رحمه الله و موجوده فى نفس المكتبه المشى جماعة د.منصور و د. عبدالله الزمن اتغير و العلاقات بين افراد الاسره بقت شائكه و مناطقها ملغمه الاولاد الحاليين دائرة معارفهم متسعه بلا حدود .. زمان ما كنابنفكر فى الاساليب التربويه المتبعنها اهلنا هل هى سليمه و الا ح تسبب لينا مشاكل نفسيه لمن نكبر ( طبعا يا ندى ده حصل لكن لاسباب اخرى ) القصه ما كانت تأدبنا فقط و لكن الظروف المحيطه بينا كان ليها اثر.. نحن ذاتنا ما كنا فاضيين .. كانت لنا عوالم طفولتنا الخاصه .. و حرياتنا فى الحركه لم تكن محدوده... و الله انا اشفق على ابنائنا ..مافى لعب فى الشارع مافى حاجه اسمها ماشى ابيت مع عمى و الا خالتى ..مافى لعب مع الجيران ذاتهم كان ما تحت عيونا.. الخوف من المصايب البقت حايمه فى رأسنا و عدم الثقه فى الاخرين خلانا نحد من حريتهم فى الحركه خوف مما قد يتعرضوا لها من اساءه ... لعب الكوره ..سكج بكج.. بنات العاب.. البلى.. المديد الحاره العابنا حليل اولادنا منهاساهمنا نحن انفسنا فى انقراضها و من ثم فى انحسار تأثيرهاالايجابى فى تشكيل وعى صغارنا الاحتماعى و الثقافى فلجأو للفضائيات يقضو بيها وقت فراغهم و يتسمرو من عرض لعرض غريب عننا و عن ثقافتنا( لاحظى نا ما هم) و هم يستقبلونه كصفحات بيضاء .. اها نجى نحن نجقلب و ننظر عن الاستلاب الثقافى و الهويه..
و نواصل كل ما امكن
09-05-2007, 06:02 AM
سجيمان سجيمان
تاريخ التسجيل: 10-03-2002
مجموع المشاركات: 14875
نحن ما قاعدين نربي اولاد...قاعدة تربي فيهم القنوات الفضائية.... الشافع طول النهار وانا من الليل وهو مصاقر التلفزيون وماسك الريموت في يدو ..سبيس تون....اطفال الديجتال....دا من عمر سنتين لحدي عمر اتناشر سنة... بعد كدا يخبر درب القنوات اللبنانية والهشك بشك....لحدي عمر تلاتين سنة.... بعد كدي يمشي علي قناة الجزيرة والام بي سي....وكل ما لقى غفلة من الناس اتجه غربا ناحية الهوت بيرد.. وقنوات الخرمجة المنظمة... اها دي يباريها لحدي ما سيد الوداعة ياخد وداعتو.....
09-05-2007, 06:11 AM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
Quote: لكن الموضوع شدة ما صعب ما عارفين الواحد يبدأ من وين!!!
و الله صحى نبدأ من وين؟؟؟؟ كدى نحكى قصة البوست ده
قمت من الفجر عشان اصحى الجماعه للمدرسه و اسأل الله يساعدنى بالقوه و مفردات جديده للتحنيس اها قوم يا محمد (8 سنوات) انت يا يمه يهديك و يغطيك و اعفى لى و... المهم قام.. على شلاقتى قلت ليهو ما تنسى الليله تمشى تسأل الاستاذه من سعر هدوم الرياضه عشان افرها ليك لبكره ..اها على حسب باقى النعسه قال لى حاضر (كان مفروض اضبح اللحظه ديك طوالى لكن ... الله اراد انو الصدقه ما ترد القضاء) قال كدى دخل الحمام و نعنش و جانى مارق اسمعى ياماما انا افتكر بمشى المدرسه دى عشان اقرأ مش عشان اشترى هدوم لو عاوزه تشترى لى امشى براك..... طبعا بهت الذى لم يضبح (اللهو انا)
طوالى قررت اسجل دخول بالمناسبه وين ناس المتخصصه يجو يحللو لينا و يرشدونا
سلامات يا سهام للتحية ليس الا اتمنى ان تتناولى الموضوع ايضا من وجهة نظر علمية اسالك سؤال؟ ما هى تنمية الطفل؟ تربيتنا احنا على ايدى امهاتنا كانت شىء مختلف على الرغم من عدم استصاحبهم للمعرفة العلمية فى التربية( تقول انا مجربة ولا حاجة) شوق كتير بالمناسبة الاولاد كيف؟ نجلاء الماحى
09-06-2007, 07:24 AM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: اتمنى ان تتناولى الموضوع ايضا من وجهة نظر علمية اسالك سؤال؟ ما هى تنمية الطفل؟
يا نجلاء يا عزيزه ما هى قصة التناول العلمى دى ذاتها الخلتنى افتح البوست حتى يدلو المتخصصين برأيهم و يمدو يدا العون لناو يساعدونا فى انوايجاد السبل السليمه للتعامل مع اطفالنا و فى نفس الوقت كيف نعلمهم الاستفاده من امكانياتهم و تطويرها
يعنى مثلا محمد ده قصصصه كلها و تعليقاته بتعكس لى انو طفل بيفكر بطريقه منطقيه .. و لذلك هو الاكثر جدالا و معتد جدا برأيه و بدافع عن بشده مدهشه ... اها انا كأم احس بأنى احيانا افقد الاتجاه فى التعامل معه دعك عن توجيهه بشكل جيد... كثير ما ارجع ده ... لانو نحن دوما بنرجع للطريقه الا تربينا بيها نحن و سلوكنا كأطفال على انها مقياس ريختر لدرجة الادب و قلته ..ذى لا حوله ده شنو ده و الله انا لو كان كسر رقبتى ما بقول كلام ذى ده لأمى... يلا امشى من قدامى هسه ...
يا نجلاء ياختى مسئوليتنا جسيمه ... ديل ناس نحنا لينا الدور الاكبر فى تشكيل و عيهم بذاتهم و اسرهم و مجتمعهم... نحن البنقرر ياتو قيم عاوزينهم يقومو عليها و يتبنوها و تبقى مرجع لسلوكياتهم... و حديثينى ما القيم!!!
ولله يا صديقي مهما تكون جني.. ومهما تصبح سهام جنية.. ما أظن نحصل الجن البسوو فيه العيال.. يا أخي ديل شدة ما جنهم مشاتر.. الجن ذاتو قال: يا أخوانا ما تلموا جنياتكم ديل!!! قلنا ليهو ليه؟ قال: أنت ما عارفين ديل ما جننوا بوبي..
09-06-2007, 10:46 AM
saif basheer saif basheer
تاريخ التسجيل: 11-29-2004
مجموع المشاركات: 1426
بعد التحية والسؤال عن الاولاد والصحة والحاجات دي كلها...
اعتقد انو اولادنا (بناتنا في حالتي) اذكى مننا بي كتير.. وساهمت عوامل كتيرة في الموضوع دا منها ربما الالعاب المتاحة ليهم حالياً، التلفزيون والبيئة المحيطة اختصاراً.. ولذلك بيطلعوا زي محمد
Quote: طفل بيفكر بطريقه منطقيه .. و لذلك هو الاكثر جدالا
..
نسمة، البنت المتوسطة - حالياً سبع سنوات وفي السنة الثالثة - كانت في نهاية السنة الاولى ونحن راجعين يوم من الايام للبيت قالت (للأسف بالانجليزي إذ أنها الوحيدة التي تتحدث "عربي جوبا" وبصعوبة بينما تتحدث نبته "الكبرى" ونالا أصغرهن عربينا السوداني زي اللبلب):
(dad, do you know that christians can have children without marriage but muslims have to marry first then have children; do you know why, because Ms Walden has two daughters and she is not married, but every muslim who has children i know is married )
"تعرف يا بابا إنو الكريستيانز "هي فاهمة انو الانجليز كريستيانز بس" ممكن يكون عندهم اطفال بدون ما يتزوجوا لكن المسلمين لازم يتزوجوا حتى بعدين يكون عندهم اطفال، لأنو مس والدن عندها بنتين وهي غير متزوجة لكن أي مسلمين عندهم اطفال نحن بنعرفم بكونوا متزوجين"...
الشاهد في الموضوع:
امكانية استخدام العقل والتفكير المنطقي هي المحمدة من الهيلمانة دي كلها، وربما يكون هذا ما كنا نفتقده ونحن صغار، إذ جُبلنا على التلقين والتقيد بالاوامر حتى في التحية للضيوف (قوم يا ولد سلم على عمك دا أو خالتك ديك ... وهكذا)...
والتفكير المنطقي دا هو الذي يجبرنا أن نكون أكثر حذراً عند التعامل مع الاطفال، مثلاً:
قبل سبع سنوات، كنت أدخن في حديقة المنزل الخلفية، فاتتني نبته - كان عمرها 6 سنوات بالتمام - ودار بيننا هذا الحوار:
- بابا؛ مش التدخين ضار بالصحة وبسبب السرطان ومرض الشرايين والقلب - نعم - طيب نحن ما عايزنك تموت...
كانت تلك آخر سيجارة دخنتها رغم حبي الشديد للتدخين (لحدي هسع خرمان) لكن ما حا أدخن تاني... طبعاً إقلاعي عن التدخين لم يكن بسبب الخوف من السرطان والقلب وكدا، بل حفاظي على الـ "role model"... فلا يستقيم أن أكون مربياً "مقنعاً" وأنا ارتكب خطأ مثل التدخين مع علمي بمخاطره، قطعاً سأرسل الرسالة الخطأ لنبته واخواتها...
وهكذا...
الموضوع طويل جداً ... اطول مما تتصوري... ومعقد!
09-06-2007, 08:01 PM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: اعتقد انو اولادنا (بناتنا في حالتي) اذكى مننا بي كتير.. وساهمت عوامل كتيرة في الموضوع دا منها ربما الالعاب المتاحة ليهم حالياً، التلفزيون والبيئة المحيطة اختصاراً.. ولذلك بيطلعوا زي محمد
Quote: طفل بيفكر بطريقه منطقيه .. و لذلك هو الاكثر جدالا
..
والله يا سيف اسمح لى اختلف معاك شويه فى فى قصة اذكى مننا دى ... انا بفتكر انو العوامل الانت ذكرت بعض منها دى فقط ساهمت فى تعليمهم يعبروا عن رأيهم و كمية افلام الكرتون سواء باللغه العربيه او الانجليزيه ذادت جدا من حصيلتهم اللغويه فصارو اكثر قدره على التعبير و تانى بجى دورنا نحن كجيل جديد من الاباء و الامهات فاكثرنا يستمع لاولاده اكثر مما كان يستمع لنا اهلنا... فشجعناهم على الكلام من غير خوف من المركوب الطاير او قرصة الورك بالبلح..
بعدين يا سيف تقول لى نبته انتقدت التدخين بالمنطق و خلتك تقلع و تحافظ على صحتك انا بتى قبل شهرين قالت لى I need my space اها انا لليله ضغطى مرتفع ..
09-07-2007, 11:17 AM
saif basheer saif basheer
تاريخ التسجيل: 11-29-2004
مجموع المشاركات: 1426
يا أخي فعلا..ده جيل مولود بسنونو... أنا أديك واحدة حصلت لي أمس تقريبا فيها وجه مقاربة مع قصة بنتك الظريفة...
إبني معاذ..لاحظت بعد رجوعه من المدرسة إنو صوتوا متغير .. قلت ليه يا معاذ أعمل حسابك ما تشرب موية باردة ولا تأكل أيس كريم.. عشان حالة صوتك ما تتفاقم.. رده كان يا أبوي انا ما عندي حاجة يمكن عشان عايز أبلغ صوتي أتغير.. لأنو أنا قريت إنو صوت الأولاد بيتغير عند البلوغ!!!!
تخيل والشافع المفعوص لسه من البلوغ.. أها ده يقولوا ليهو شنو.. أنا غايتو جاوبتو وأنا بكتم الضحكة وقلت ليهو جايز...بس بالله لمن بلوغك يتم كلمنا.. وأخوه الكبير كان قاعد يموت من الضحك.. وأنا لا عارف أضحك ولا أبكي
09-06-2007, 08:19 PM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: انتى يا سهام وصلوك مرحلة تكونى قاعدة براك وتكوركى يا ولد اقعد ساكت يابت اترزعى هنا! عشان تسمى نفسك جنية
بالله هو جنى دى جايه من كده و الله كان كدى ليك حق
كمال كرار تسلم اها شوف جنس بلاويك دى.. دى اسمها صور مقلوبه ودى توريك مدى الاختلاف فى شوف الاولاد لاهلهم و كمان شوف الاهل لاودهم انا فعلا اولادى بفتكرو ا نو فى حاجات كتيره نحن مابنعرفهاو ما بنفهمها حتى و لو حاولنا و انا اتقال لى الكلام ده عديييييل من بتى .. يعنى قصة ولدك افترض انك ما عارف انو هو فى ياتو مرحله و كمان انك ما عارف اعراضها و تبرع يشرح ليك دى ما حاجه عابره دى حاجه بيشتركوا فيها كلهم كجيل و هو عكس ما كان الحال زمان و هو نحن كنا بنفتكر انو مافى حاجه اهلنا ما بعرفوها..
Quote: وأنا لا عارف أضحك ولا أبكي
داير كلامى اخير ليك تضحك فشر البلية ما يضحك و نحن عندنا بلاوى متلتله
09-06-2007, 09:29 PM
jini jini
تاريخ التسجيل: 02-05-2002
مجموع المشاركات: 30716
ولله يا صديقي مهما تكون جني.. ومهما تصبح سهام جنية.. ما أظن نحصل الجن البسوو فيه العيال.. يا أخي ديل شدة ما جنهم مشاتر.. الجن ذاتو قال: يا أخوانا ما تلموا جنياتكم ديل!!! قلنا ليهو ليه؟ قال: أنت ما عارفين ديل ما جننوا بوبي..
قالوا فى المثل البيلد الجن يلوليهو! ونحن ما جنينا من اللولاى والهدهدة! لمن بقينا هداهد جمع هدهد! جنى
سلام الاعزاء الاخت سهام المجمر والاخ العزيز كمال كرار وكل الاخوة والاخوات المتداخلين مشاركتى ليكم حتكون تهدئة اعصاب وتذكرة بى رباية اهلنا الكبار وان شاء الله نقتدى بيهم فى تربية الجيل الجديد
القصيدة دى سميتها رباية الكبار وطوااااالى عرض فيها اخونا البعيو يعنى ان شاء الله تسمعوها قريب منه لكم التحية بعمق الوطن وامنياتنا لابنائنا ويناتنا بمستقبل واعدان شاء الله
***
رباية الكبار.. ترباية ما بتنقاس من طينة بحر.. بسندو فوقو الراس لينة طبع .. رضعت حكر مو كاس عزة وفضيله.. وسادة للفراس شدة و حزم.. ترس الدميره الساس مشهود بالكرم.. ما بنخرو الوسواس سند التواقى واسوق مع المتراس مطمورة الدرت سيف الضهارى وفاس سباق اللوارى سقف الاهل كدباس بطوف بالديار.. حشاهو من حراس ابواب القبيلة .. اوتاد بلا حباس قنديلها البضاوى. دليل برا اجراس ضى برق الشرق فى وميضو فايت الماس يطمن الحارى.. ويرحمن المحتاس
اسماء الجنيد/ مسقط
09-07-2007, 11:38 AM
غادة عبدالعزيز خالد غادة عبدالعزيز خالد
تاريخ التسجيل: 10-26-2004
مجموع المشاركات: 4806
والله ما طنشتكم، أنا موضوع التربية ده بتحسس فيهو رجلي وما عارفه لحدي حسة أختها وين. المهم، أنا كنت بدأت أكتب البوست أمبارح ولكن سأضع مادتي هنا ونتناقش مع بعض
غادة البكر واللايوقة
09-07-2007, 11:40 AM
غادة عبدالعزيز خالد غادة عبدالعزيز خالد
تاريخ التسجيل: 10-26-2004
مجموع المشاركات: 4806
أول الكلمات التي ينطق بها شهاب بعدما يستيقظ عادة. وأرد عليه تحية الصباح
-صباح الخير يا شهوبي..
أما هاشم، فيأتي يسبقه صخبه ويقول ضاربا رجله في الأرض بقوة وكأنما يريد أن يثبتها
ماما.. صباح الخير!
وتكون هذه اللحظات المليئة بالسلام والتحايا هي أجمل لحظات اليوم و(أقصرها)، فسرعان ما ينتهي شهر العسل (وعينك ما تشوف إلا النور). فتبدأ سريعا الصرخات ويزداد العناد، والمشاغبات بين الأبناء تبدأ، والمناوشات، ثم المعارك الضارية رحاها، وبعدها تروق وتهدأ لتعود بعد دقائق وسرعان ما تشتعل. وأحاول أن (أشيل) الصبر.
-يا شباب قولو بسم الله، هو اليوم زااااتو متين بدأ.
وأسمع (أحيانا) صوت شيء ينكسر أو من مكانه يقع.
-يا ولد، ده منو فيكم؟
ويتهم كل منهما الآخر.
-يا ماما، ده شهاب
-لأ، ده ما أنا. ده هاشم
وأذكر في تلك اللحظات نجم الكوميديا الأمريكي (بيل كوسبي) الذي قال في أحدي برامجه أن الأب أو الأم لطفل واحد فقط لا يعتبر نفسه أبا أو أما بعد فلا بد من انتظار الثاني لنفس السبب. وأحتار، هل أعاقبهما (موت الجماعة عرس)، هل أعاقب أحدهما وأظلم الآخر، أم هل أتركهما.
. . .
09-07-2007, 11:42 AM
غادة عبدالعزيز خالد غادة عبدالعزيز خالد
تاريخ التسجيل: 10-26-2004
مجموع المشاركات: 4806
وما يشغل بالي دوما هو معاملة الأطفال عندما يرفضوا أن (يسمعوا) الكلام. ومتى نصر عليهم أن يسمعوه ومتى نتركهم لاختيارهم ونسمع كلامهم نحن. في أحدي البرامج التلفزيونية تقوم الأسر التي تعاني من أطفالها وشقاوتهم الشديدة بطلب العون من مربية تأتي إلى منزلهم وتوضح للآباء الأخطاء التي وقعوا فيها في تربيتهم أبناءهم وتضع المعايير التي من شأنهم أن يتبعوها من أجل تربية أبناءهم التربية المثلى. وفي إحدى الحلقات كان هنالك صراع شبه (يومي) بين الأم وأبنها الذي يرفض لبس كل ما تقدمه الأم له ويصر على اختيار ملابسه بنفسه بينما ترفض الأم وتقول له
-أنا الأم هنا وأنا أسن القوانين وعليك إتباعها
وتتواصل طوال اليوم رحلة البكاء، وتتواصل أعصاب الأم في التوتر والتعب
قالت لها المربية أن من حقه اختيار الرداء الذي سيخرج به والذي سيعزز ثقته بنفسه في إمكانيته الاختيار واتخاذ القرار، ونصحتها أن لا تصر على الملابس التي تريدها لأبنها ارتدائها فهذه النقطة سوى الضيق والتوتر لن تولد شيئا آخر.
إن موضوع تربية الأبناء موضوع معقد وملغم من كل جنب. القرار الصحيح في لحظة واحدة قد يسهم في تغير مسار الابن أو الابنة للأبد. هذه هي المساحة خلقت من أجل التشاور، و(فك) الضيقة والتحاور في تربية الأبناء، بعد انتهاء فترة شهر العسل أو بمعني آخر، (روقانهم)!
غادة
. . .
09-08-2007, 07:46 AM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: ما بعرف ادخل الاوشاش البعملوها ناس خدر وغيره
)
نصيحه اطلب معونة نبته بتجيهك تمام التمام.. و الله ما طالبنى حليفه انا ديدى هى العلمتنى كيف انقل اللينكات .. و محمد المفعوص هو العلمنى كيف انزل حاجات اليوتيوب!!!! هاك الوش ده
اقعدوا عافيه جميعا بجيكم راجعه بعد الشغل
09-08-2007, 03:09 PM
jini jini
تاريخ التسجيل: 02-05-2002
مجموع المشاركات: 30716
Quote: جنى .. ذكرتنى هشام مجمر اصلو كلمة هدهد دى محكره فى قاموسه هو و جمال بروتين
تذكرى هشام وجمال بروتين وتنسى جنى اللبمشى وسطهم! ا والله بروتين يهدهد النعامة ذاتا! ديل شنو ديل اللا بتجيبهم لا عمرة لا حج! غايتو الا الاولمبياد يعملوهو فى مكة حتين يجوا! ولو جو حيجوا لا بسين تريننج سووت! جنى
09-08-2007, 03:38 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
سهام العزيزة امى عليها الرحمة كانت بتقول كل زمانا بخدموه رجالو ونحنا ما من الزمن دا تعرفى العيال هنا فى امريكا مثلا عيال مختلفة شخصيا عاجبنى جدا اقول ليك ليه ؟ اولا شى مهتمين جدا بالمعرفة عموما وقرايييييييييييييين قراية لمن تفرحى لكن لقيت العيال فى السودان القراية دى ما داخلة قاموس حياتهم ويا دوب قراية المدرسة امكن لانهم ما متوفرة ليهم الكتب لكن الفصاحة والشطارة لو وجدوا قليل من الاهتمام عباقرة والفصاحة مرتبطة بالمناهج مرة واحد من عيال اخواتى قال لاخته ـ انتى انعكاس الضو دا ناتج من شنو ؟ ودا زول عنده سته سنين قامت اختى قالت لى ـ سلمى الشيخ انتى كلمة انعكاس الضو دى سمعتيها وعمرك كم سنه؟ طبعا ما سمعتها لانى ما درست فيزياء او علوم مش لانها ما كانت فى المدرسة لكن لانى غالبا بكون (داكة) ورافضة للعلوم والرياضيات المهم انه العيال دى لو لقت اهتمام وانتباه من الاسرة وحات ابوى العبقرية على اكمل وجوهها واعجابى بيهم تانى من انهم نقاد بالفطرة ما اى حاجة بتفوت عليهم وما اى حاجة بتمشى دون تبرير واسئلة تدل على مقدرات ذهنية عالية وفهم عميق بالجد كل يوم بزداد ايمان انه العيال ديل كان اديناهم من الوقت الكافى وتابعناهم بالصورة المفروضة حيكون عندنا ناس فى المستقبل عظمة على عظمة
09-09-2007, 09:01 AM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: وما يشغل بالي دوما هو معاملة الأطفال عندما يرفضوا أن (يسمعوا) الكلام. ومتى نصر عليهم أن يسمعوه ومتى نتركهم لاختيارهم ونسمع كلامهم نحن
عارف يا غاده اكثر شىء بنفتقده هو ال consistency فى تعاملنا مع ابنائنا.. نفس التصرف ما بلقى نفس رد الفعل فى كل مره عشان كده الرساله التربويه بتاعتنا ما بتكون واضحه و لا مفهومه من الاساس لطفلنا... اها فى محاولة ايجاد العذر لانفسنا... ( فى اطار السردبه من الاحساس بالذنب الذى كثيرا ما نتشارك فيه كامهات و ده موضوع طويل لا مانع من نقاشه لما له من انعكاست سلبيه) انو نحن كثير مجهدين فكريا و جسديا... يعنى المسلسل الروتينى بتاع كثير من امهات جيلى ... الصباح تجهيز المدارس .. الف شكله و الف احتجاج .. تمشى الشغل و فى نصه تصلك من 3 الى 4 تلفونات طلبات و شكاوى تجى راجعه لو محظوظه 4 و انتى راجعه تغشى تجيبى النافص من المويه للخضار ..اها الاتغدا منو من الحردان ... الما غير هدوم المدرسه من الغير .. بسم الله تبدأ التحانيس و شويه شى للاكل شى للتغيير بعداك تجى الواجبات المدرسيه و حديثينى و احدثك عن ما ابذله و تبذليه من طاقه عشان الناس تلزم الجابره و تبدأ... ما تنسى النقه الفى النص لمختلف الاشياء و الطلبات ..موال العشاء.. و النوم ده براه فيلم نختصره للانو نفسنا قام... يلا فى نفس الوقت الام دى ذاتها مهمومه بالحاجات حقت الناس الكبار... الهموم الخاصه ... الماديه... المدارس (بالبولد عشان لى لها عوده).. اللالتزامات الاجتماعيه.. الحكومه.. الجندر... الجرايد المغس العام بأختصار...
اها ضغوط ضغوط من كل حدب و صوب الام تلقى نفسها بتتعامل مع المشاكل مرات كتيره على حسب درجة غليانها الداخلى .. و قرتها اللحظيه على الاحتمال ..
فى اى حاله بتاعة روقه و مراجعه للموقف طوالى تلقى نفسها بتعضى بنان الندم على طريقتها الحلت بيها المشكله و يبدأ الاحساس بالذنب اتجاه الطفل الجات على راسه يذيد ويتمدد فى روحها و تبدأ الوعود لا لا لا اصلو تانى ما بعمل كده ... يجى بكره بنشيدو اليومى و...
محبة النيل و العميرى سلمى سلامه لكى الموده و المتابعه لانو كل زمانو بخدمو رجالو(و نسوانو) كمان بخدومو علمه العلم بقى ماشى ماشى بلاحدود عشان كده الحاجات النحنا كنا بناخدها فى العالى و خصوصا فى مادة العلوم و الرياضيات اولادنا بياخدوها فى الابتدائى... العجب ناس المنهج البريطانى ديل مافى طريقه تذاكرى معاهم ذاتو... طبعا حالى و حالك واحد
09-10-2007, 01:22 PM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Siham Elmugammar
Hussein Mallasi
nada ali
سجيمان
Kamal Karrar
jini
saif basheer
غادة عبدالعزيز خالد
سلمى الشيخ سلامة
فيس بوك
تويتر
انستقرام
يوتيوب
بنتيريست