|
|
 ســـــــــاعدونا عـلى الاجـابــه!!!!!!!
|
صديقتى جميله… احبها جدا فهى ضحوكه و تحب الغناء مثلى ولطالما ترنمنا معا و عندما تضيع كلمات الاغنيه نكسو اللحن كلمات جديده… فرقتنا الايام و عدنا فاجتمعنا نتشارك الفرح و الاغنيات.. الهموم والاوجاع و ما اكثرها و قد اتخذت النيل ضفائر… هى تعشق الفاصله التى يأتى بعدها التأنيث تناقشنا حولها كثيرا ..وتسألت يوما: لما هم يأتون قبلها ونحن من بعد...تبسمت صديقتى..فهى جمليه.. و ما اجمل الجمال حين يبتسم وقالت: يابت الحلال البركه فى اتكاءة الفاصله و العافيه درجات شيلى الصير... نغزنى حديثها فانا اعلم الناس بها... اتانى شيطانى متسلاحا سهمه قلت: عاجبنى صبرك!!!... ضحكت ... فهى جميله... و ما اجمل الجمال حين يضحك...قالت: والله عرفتى لى!! و تنهدت هى... عندها تمترست انا خلف الانتظار...توثبت كقطه فاطلقت عليها نظرة الاشاره للقفز فوق الجدران... تسألت بين اسنانها انتى ليه ما سألتينى انا ضربت ليك تلفون عشان تجينى ليه؟ كنت اعلم ان هذا السؤال ليس للرد.. فابتسمت كمغفله... و اصلت: اصلى كنت عايزه اسألك كلمة نورمل دى معناها شنو؟ تجمع و جهى عند انفى مشكلا الاستفهام.. صرخت فى استفاهمى: شنو مالك عجنتى لى وشك ذى المتخلفه كده؟ وبالطبع هذا سؤال اخر ليس للرد..... طيب اترجم ليك؟ I am asking what is the meaning of NORMAL? اتنحنح لطرد اثار الصمت عن حلقى و يدى تبحث عن ما قد يتخذ كساتر على اريكتها... قلت بهدوء. معناها نورمل... لملمت شجاعتى و رفعت نظرى اليها ...فرأيت كل علامات اللغة العربية و ترقيماتها و قد تلبستها... اذدادات اعتدالا و جلست قبالتى مباشره... قالت: طيب تأملى هذه المشاهد و افهمى السؤال يا....؟
مشهد اول:
انا(هى): ياخ انا عاوزاك تتكلم مع و ليد ده بقى ما بسمع الكلام اليوم كله عاوز يلعب كوره فى الشارع و انت عارف مصل السحائى مافى.. انا اقترحت عليه يلعب بعد المغرب لكن كأنى بتكلم مع حيطه..
هو: مـــا نــــــــورمــل.. ده ولد
مشهد ثانى:
هى: المدرسه ح تفتح بكره ممكن توصل الاولاد انت عشان شغلك فى يدك. لانو تجهيزهم بياخد منى وقت و انت عارف مواعيد شغلى كيف.
هو: مـــا الـــنورمــل انك توصليهم انتى لانك بتطلعى بدرى
مشهد تالت(محاوله للونسه):
هى: صدق امى لسه مصره على انى امشى الجمعه اقيل فى بيت البكاء قدر ما حاولت اقنعها بأنه نحن جيل مختلف و بظرف مختلفه لا تسمح بالتكسر (بكسر التاءو الكاف) فى بيوت البكيات و انه بنحمد الله الف مره لما نقوم بالواجب و نعزى.
هو( متلفلف جوه الجريده): مـــا نــــورمـل كل الامهات بيفكروا كده.
(اسدل الستار على الونسه المرتقبه بقتل التسخينه)
مشهد رابع:
هى: ياخ انت عارف انو انا الايام دى ما طايقه روحى بالله ما ممكن تكون عاوز تعزم ناس فى نفس الوقت ممكن تخليها يومين كده..
هو: مـا نــورمـــل انك تكونى زهجانه و انا ما بقدر أأجل لانو الاسبوع ده كله ارتباطات.
مشهد خامس:
هى: واجبات المدرسه كتيره خلاص كميه من الحفظ مبالغ فيه.. التعليم بقى اعتماد 100% على البيت.. حفظ الدين ده انا عاوزه نتقسمه انت امسك وليد وانا بمسك ايهاب لانو لسه صغير و بعذبك
هو: مــا نــورمـــل انك تحفظيهم الاتنين لانو انتى عارفه انا ما عندى صبر و بعدين الحكايه كلها بتعتمد على ذكائك فى التعامل معاهم عشان يتعاونو معاك وبعدين كل الامهات بعملو كده ( اطول جمله اسمعها بعد "مــا نــورمـــل".. يا ترى السر شنو؟؟ مجرد سؤال برئ ..سهام).
و مشاهد سادس و سابع و....و..............قصـــــه ما عندها أخر
يا ســــــلام على كلمة اوكى التى بعثها عضم لسانى مدفوعا من كل عضمه فى جسمى ومن اكثرهم تأمرا عضام ضهرى.. كررتها تأكدا و تأكيدا
كالمشدوهه توقفت عن الاسترسال كانت اوكى الخطيره كصفعه تعيدها للوعى.. شهيق ..زفير ..شهيق..زفير استعدنا وعينا سويا...لحظيا غفرت للانجليز نهبهم للقطن وسياسة فرق تسد.........
نهضت شاهقه وزافره (ما كمان نحن ناس ازمه) قلت لها و انا فى طريقى للمهرب انشألله ما ح اقصر و سوف اشحذ كل طاقات عقلى و منطق فكرى للو صول لمعنى نورمل و اننى لسوف استعين بجندريات و جنرييى هذا البورد ( و الله يكضب الشينه ).. و سأستعين بغيرهم من لهم علاقه بعلوم النفس و الانسانيه و اننى ان شاء الكريم لن اوفر جهدا و لا وقتا فى سبيل ايجاد تعريف علمى واضح و محدد لهذه المــا النـورمــل... خرجت و انا متبوعه بتوصياتها و اقتراحتها و وعودها بتزويدى بكل المعلومات والمشاهد الممكنه.. قلت مشــــــاهد تــــــــــــــــــــــــانى.... لا شكرا اعتقد ان الموجود عندنا كافى للبحث ..و الا شنو يا جماعه؟؟؟؟؟).
و عندما تأكدت من خروجى تماما من بيتها و أمنت على نفسى و انا ارى اكوام من اجساد عمال البناء متحلقه حول صحون الفول و لمزيد من الاطمئنان تلببت الدريكسون و نهرت المكنه قلت لها: تعالى يا أختى زولك ده ..المـــا عــــــــــــــــــادى مالها.. و انطلقت
|
|
 
|
|
|
|
|
|
|
 Re: Outcast wa Hala wa Siham zata (Re: Siham Elmugammar)
|
إزيكن انتن التلاتة
وإزيكن دي ما نورمل أبدا.
(أوتكاست إزيك دي شايلاها ليك من البوست الهناااااك العجبني فيه تعليقك البيشبه موضوع البوست ده....)
إزييييييكن
إيمان يا سهام، ووحيات الله مشتاقييييين
(النبي فيك ما تسأليني إيمان منو..
غايتو بس اعرفي وخلاس)
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: الجندرية)
|
الجندريه
اهلا بيك و مرحب.....
من نزلت البوست ده و انا فى انتظار اطلالتك.. و العزيزه ندى.. لكن الظاهر شهر العسل لسه ما خلص.... او مـــا نـــــــورمــــــل دورت معاها..... ربنا يستر
بس ما فهمت لووووووووول الى عادل عثمان دى شنو باقى ياختى انا لسه جديده على البورد و بعض لغات الحوار فيه...... و طبعا البعض التانى محل بكب الزوغه عديل
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: hala guta)
|
النبى فينى يا أيمان أسألك ايمان منو و النبى فينى اصلو ما خلاس
و الله صدقت يا هاله يا بت امى افتكر بعد سؤال اخونا عووضه ده اخير نفتح البوست ونسه و سلامات و اشواق و اهم حاجه نعرف ايمان احمد دى منيها (منيها دى بالشايقى)
الاخ عووضه ما فهمت سؤالك ده للاجابه و الا من نفس نوع اسئلة صديقتى الجميله!!!!!!!
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
سهام عديل كدا - حافي حالق
| Quote: الاخ عووضه ما فهمت سؤالك ده للاجابه و الا من نفس نوع اسئلة صديقتى الجميله!!!!!!! |
والقال ليك انا فاهمو منو ؟؟ انا زاتي اكان فهمتو انشاء الله انقصى
طبعا ياستي نحنا ناس اهل عديل كدا -انا من الغابة - وغير انو اهل اشتغلت مع والدك الله يرحمو في سونا -- وقبل دا كلو دفعة عصام و هشام في الجامعة
عشان كدا انا ولي امرك هنا ( هوي بهزر ساكت ما يجو ناس الجندرية وهالة قوتة ناطين ويفتحو بوست جديد عنوانو لماذا لا تكون المراة ولي امر الرجل ووو كلام من النوع دا)
بمناسبة هالة قوتة -- حمدا لله على السلامة -- الجابك يجيب اختك الاسمها صعب داك --
اها خموا صروا --ما قلتوا حولتوا البوست لي ونسة
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: عثمان عووضة)
|
سهام طه ..شفتك وابتهجت ..وين ياخ بفتش ليك في الحارات وفي داك الوقف مازاد ..البركة باللقاء ..
الشوق مطر عديل
واخ من النورمل وملحقاته ..
وللقال طلقوهم اقول مع التو ليت ..تووو ما كو فايده علي قول اخوانا الخليجيين ..واها مراكبنا ماشه بي النورمل والإعتيادي القاتل ..والموجه معانا ..هيلا هيلا
والتحيات ميات يابت المجمر يا دهب..
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
سهام ....
عاااادى
تذكرت و انا بقرا فى طرطشتك (الحكيمه) دى مقولة صاحبناع.ع. اطال الله عمره و ادام ظرفه، قال و هو يعلق على فشل زواجه بعد قصة حب جامعيه طموحه : نحن ضحايا الزواج الماركسي فى التمانينات !!! البعض سيسحب الماركسي و يحشر مكانها اى مفرده اخرى والمعنى حيكون لافق برضو، بعض اخر سيكتفى ب: ضحايا الزواج .. واكثريه ب: ضحايا
انا و فى موقع من لا يتحمل تبعات اي شئ، لانو ما عندى شئ عندو تبعات، حاقول ليك زى عادل : طلقوهم او احسن : عرسوا ليهم تانى، عشان يزيدن عليهو (حسب شكوى طارق ابوعبيده كتهنئه لزوجته قبل اكتمال العام الاول للزواج) يزيدن الاسئله و النقه والنقاشات والمراسيل ، حيعملوا شنو يعنى !!!!
تلغرافات سريعه والباقى بالميل :
- ياسر يا .... يعنى انا و بشتونى نعمل ليك شنو؟؟
- شايف العفافيض حايمين فى البورد، الله يستر.
- ايمان احمد دى بتاعت ناسات ، ما تشتغلى بيها.
سلام لكل الاحباب طرفك
كيف الجراده؟؟
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
سهام المجمر:
بعد ما فصلوني من الطيران المدني للصالح العام -حسب إدعائهم- ضمن صحبة ورفقة من أفضل موظفي ومهندسي الطيران المدني ، كان منهم قريبك مهندس صلاحية الطائرات المجمر ، ذهبت إلى البيت محموقآ، أول من قابلني حرمنا المصون ، رشيدة ، سألتني : سجمي مالك مبوز كده ؟ قلت ليها والله سجمنا كلنا ، الكيزان فصلوني من العمل. ضحكت وقالت لي ك { عااادي ، وإنت كنت قايل حا يخلوك؟! أجبتها: عااادي زي الزبااادي وضحكنا ضحك طفلين معا!!!!
تحياتي للمهندس المجمر { يا أخوك يا ود عمك} ولأستاذي في الثانوي العام مصطفى المجمر ، وزميلي في نفس المرحلة والفصل ، المحامي عادل محمد عثمان المجمر .
- في الثانوي كان عندي جيتار نورمال لازمني قترة وكان نورمال جدآ ولم يتسبب قي أي مشكة!
- الأمثلة الفوق كلها شايفها ما نورمال
برقيات سريعة
- ياسر يا.... أنا وعصام جبرالله وحسين بشتوني ، ما بنسالك!
- الحريم الفوق قلبوا الموضوع سلامات وإشتياقات وحب وأعياد وتخصيمات بالنبي ، و نورمال ويزدوم
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: mekki)
|
يااااااااااااااسر حااااااااااااااااامد و ين انت و جاي متين؟ نفسنا هافانا على ايسكريم انا و دوبى
بعدين يا ود حامد رهافة لغة شنو انت ما قاعد تقرأ لحبيب نوره و الا شنو... انت عارف الزول ده انا لما اقرأ البوست بتاعه مع نفسى ما قاعده اتكلم
أنشألله يا ود عووضه ما تنقصا وانت جارنا من الغابه وقصتك قصه شغل مع الحاج رحمه الله و زميل دراسه لاتنين من اخوانى عاد اقول ليك شنو غير كدى!!!!!!!! لكن انت ما معاى عدم فهمك للسؤال ده كمان عنده قرابه دم او جوار مع نــــــــــــورمــــــــــــــل.......... يا هلا بيك
ابو ساندرا اهلا بيك محمد مجمر ود عمى سلام ليك ولى ساندرا
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
الأستاذة سهام المجمر
تحية نورمال جداً
يبدو أنه من النورمال الناس تتجاوب مع بوست الزول البيعرفوه أو البيقربو ليه أو ود جيرانم زي حالة أخونا عثمان عووضة!!! يعني ياعووضة اخوان سهام زملاك ديل جدود الآن؟؟؟ هاها///// ها!!
لكن ياسهام نورمال جداً أنا أعمل مداخلة في البوست بتاعك دا لأن أخوك أسامة المجمر صاحبي. رأيك شنو؟؟؟
أما موضوغ النورمال و ألأب نورمال فظني وبعض الظن إثم.... أننا ورثنا بعض المسلمات التي نتعامل بها دون نقاش!!! ومنها النورملات الكثيرة التي يلوكها الشخص في بوستك الجميل وغيرها!!
نورمل جداً المرأة تغسل العدة!! ونورمال جداً المرأة هى آخر زول ينام في البيت ويتأكد أن كل زول في سريرو والانوار انطفأت. ونورمان جداً أن المرأة تكون زهجانة من الحاجات النورمال الكتيرة في الرقبتها!!! في حاجات أبنورمال بس الرجل بشوفها نورمال جداً لأنها في مصلحتو-- المرأءة مكانها البيت ودي زي النورمال لكن بشوفوها أبنورمال الناس الجربوا الزواج من المرأة العاملة.
على أي حال الحوار في البوست عموماً شئ أبنورمال --- لانو النورمال في العادة معظم النساء المتزوجات لا يجدن من يرد عليهن حتى بكلمة نورمال - لآنهن ليس من النورمال أن يسألن حتى لكي يسألن عما وراءها!!!!
لكن ياسهام ألا تتفقي معي أن المؤسسة اللي في بالي قائمة كلها على مسلمات لا تقوم على أساس متين!!! وهي قائمة فقط لانو نورمال الواحد يقتنع بيها حتى إشعار آخر!!!!
شكراً
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
سهام وشلة الأنس
أنا لو عارف إنو كل الجندريات بيجتمعوا هنا كنت جيت من زمان ،، بس افتكرت السؤال ممكن يكون عن الكمبيوتر أو الإنترنت ، وأنا دخولي إلى مثل تلك الأسئلة يكون أبنورمال ،،
الموضوع مهم ، وأقترح أن يدخل الجميع إلى حوار جاد بعد هذه الونسة الظريفة ،، وأنا أصلا ( الغم ) عندي شئ نورمال ، عشان كده عايز أنقلكم إلى مرحلة الغم بعد أن أنهي عمدا مرحلة الإنبساط في هذا البوست ،، ما هو برضو نورمال إنو الناس تنبسط شوية وبعدين تنتقل لشوية غم ،، ما هي الحياة كده ،، ودي طبعا برضها زي حكاية نورمال ،، وهناك أيضا ( النسوان كلهم بيعملوا كده ) ويقابلها ( الرجال كلهم بيعملوا كده ) ،، وهناك أيضا ( دي مسئوليتك إنتي كمرة ) ويقابلها ( دي مسئوليتك إنت كراجل ) ، و ( هنا يجي دورك ) ،،
نحن الذين نصنع القوانين ، وليس العكس ، و( نحن ) لا أقصد الأفراد ، لكن المجموع ، وهذا المجموع ( للأسف ) يكون خاضعاللسيادة الممارسة عليه ، والسيادة في المجتمعات الإنسانية لا تقوم إلا على السيطرة عن طريق القوة ( ليست القوة الجسدية ) إنما القوة الاقتصادية التي تنتج قوة سياسية واجتماعية تفرض سيطرتها على المجتمعات الإنسانية ، ومن ثم تفرز قوانينها ولوائحها بما يتناسب ومصالح الطبقة ( أو المجموعة ) المسيطرة ، وتصنع هذه الطبقة أدوات الحماية اللازمة لاستمرارية الوضع ، فتحدد الحلال والحرام ، والعيب ، وأسس الفضيلة ، وتوزع الأدوار ( المسئوليات ) على الفئات والأفراد ، فتجعل بعض الناس أسيادا ، وبعضهم عبيدا ، وبعضهم أجراء ، وبعضهم مالكين ، وربما تنتج عن ذلك مبررات ميتافيزيقية عندما يعجز العقل عن الإتيان بالمبررات العلمية ،،
ومن هذه القاعدة العامة ، قاعدة المصلحة والقوة المساندة وإنتاج القوانين ، نتج القهر التاريخي الذي مورس على فئات إجتماعية محددة ، وكان من ضحاياه الفقراء والعمال والكادحين ، والنساء ، والسود والملونين ،، وما زالت القوانين السائدة التي تنتج عنها النورماليتي التي نشتكي منها ، هي قوانين مفروضة علينا ، تتم ممارسة القهر عن طريقها على فئات عديدة ،، وبالطبع لا يمكن الخروج على هذه النورماليتي هكذا فجأة وبجرة قلم ،، لا ولا حتى بعد إنجاز ثورة ما، فإن بعض القوانين التي تم ترسيخها عبر القرون لا يمكن أن تختفي فجأة لتحل محلها قوانين إنسانية عادلة ،، لكن البشر مطالبون فقط أن يكونوا إنسانيين بالدرجة الأولى ، ولفترة قد تطول لابد من التنوير وتعريف الناس على حقوقهم ، وكيفية حصولهم عليها ،،
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: ودقاسم)
|
سهام المجمر وبقية الجندريات سلام
والله عندكم هموم الهناء ويا ريت الهموم كلها زي همومك ,, انت عارفه يا سهام همومنا زي شنو ( فلانة طلقوها ) لكن الاجابه نورمل كمعني لكن كلغة اقرب مره تقول ليك ( ما نورمل الطلاق جبل الحرات )
عموما يا سهام والله عن جد انا بحسدكم علي مشاكلكم حتي هي مشاكل جميلة ومدغده تسر النفس ... وقولي لي يا سهام ليه انت وصحباتك رافضين تمشوا بيوت البكاء يعني كان ممكن يكون ارحم للبورد بدل تتكسروا هنا وتنقلوا لينا ونسة البكاء في البورد
والمره دي مشكلة ما نسوان بس معاكم رجال ( لكن ما نورمل)
حافظ
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
العزيزة سهام
لكي وللاخرين مواصلة لهذا الموضوع الهام الذي لا يحتاج للمناقشة فقط وانما للاجابة الواضحة لماذا يجري كل هذا؟؟؟؟
السيناريو:-
هي:- اشعر بفتور في جسمي ودوار لذلك ارجو ان تساعدني في ترتيب البيت
هو:- دي حاجة (نورمال) من تغيرات الجو وكدة - ثم انا مافاضي لاني جاي تعبان من وقفة الصباح (علما بانها هي ايضا شغالة)
هي:- ذهبت للطبيب وعلمت باني مصابة بمرض السكر يعني الفتور كان من علامات المرض
هو:- دي حاجة (نورمال) لانو في عائلتكم عندكم السكري وراثة - بس حافظي في الاكل والمسائل بتمشي
هي:- عليك الله جيب معاك من الصيدلية سكر فواكه عشان بساعدني في مسالة المحافظة وكدة لانو السكر العادي ما كويس
هو:- لا (نورمال) انو تاخدي سكر عادي بس نص ملعقة او بدون اذا شعرتي بفتور - لاني انا محصل لي عقد ما بقدر اغشى الصيدلية.
لا تعليق البتة.....
تحياتي سهام وسلام للعيال ولمجتبى
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: أم سهى)
|
يا اهلا ببنات و اولاد المزاد....و يا اصحاب الاخوان و اولاد الاعمام ...واخ خالد ما نــــــورمل انو الواحد يفتح بوست الزول البعرفو و لتخيل لى الضغط على الماوس بتكون عفويه لاقصى الحدود...مداخلتك اعجبتنى جدا و انت تنبه لخطورة المسلمات فى تشكيل وعينا و سلوكنا فى الحياه. وتأتى هنا روعة البورد بمداخله ود قاسم و فيها الكثير من المخارج لكسرة سطوة الموروث و المسلم به..سلمت يا ود قاسم والله يفرج همك و غمك...
اهــــــــــــــــــا يا ود الجمام امبارح مشيت بكاء ناس عمك عوض الساكن جنب الطاحونه والله كان عليهم جنس بشتنه موبتهم حاره و شاييهم ما مظبوط سمح و ومرقوا لينا كبابى عثمان حسين ططمموا لينا بطونا المهم ربك رب الخير عوضنى ببكاء ناس خالتى علويه حال الهنا ديك يا موية التلج التكسر السنون وداك يا اشاى المظبوط بكبابى البيركس الماخمج وكل الكبابى مويه على شاى مبخره بالمستكه و الكوندشنات ديل ضاربه تحميك القومه والنسوان ديل محنانات حنن رهيبه رهيبه.. اها انا هسه مستعجله لانو حفظت لى شكل و الحنانه جايانى تعملو لى لو ما كده والله الواحد ما كان بتلوم معاك و يدس عليك شمار بكاء ناس حاج احمد... و لغاية ما حنتى تشيل عليك الله حاول تكتب لينا عن همومك الجاده و الما جميله يمكن فى بكاء ناس بنت رقيه (باقى هى عيانه شديد و مستحضره ) اقشر بيها!!!!!!!!!!.........
اهلا ام سهى الله يكفينا السكرى كان كدى...سلام كتير
| |
|
|
|
|
|
|
|
|
|
Re: ســـــــــاعدونا عـلى الاجـابــه!!!!!!! (Re: Siham Elmugammar)
|
الاخت سهام المجمر
تحيه ليك كتير علي اثارة هذا الموضوع وان كان الرجالة كلهم كابين الزوغان من الموضوع.تعلمنا في السودان ان كل ماهو خاص بتدبير المنزل من شان النسوان بالبلدي,ولكن جينا هنا في غابات الاسمنت في بادي الامر ظننت اني متحضر اشارك في كل شي, ترتيب البيت الهوفر قي نهاية الاسبوع , المكوة الغسيل الشوبنق , لكن ياختي من ما جوا الشفع تراها الكلمة دي نورمال جات عندي,وده شغل نسوان والله الليلة البروفسر ماليني شغل , تقول ماشة مع الاولاد الحديقة انا اقول نورمال, جلسة الوالدين في المدرسة وانا اقول ايوه دي شغلك نورمال. لكن عرفت لي كويس في نورمال بقت تخليني ثلاثة يوم مع الاولاد وتمشي زيارة لي امها وانا اضرب ليها تلفون يا زولة الشفع ببكوا تقول لي نورمال ,طيب الحاجات ديك وين نورمال تفتشها في البيت انا ما شلتو معاي
| |
|
|
|
|
|
|
| |
Siham Elmugammar
اساسي
zola123
Adil Osman
Outcast
إيمان أحمد
الجندرية
عثمان عووضة
أبو ساندرا
mekki
خالد فضل
ودقاسم
معتصم ود الجمام
saif massad ali
فيس بوك
تويتر
انستقرام
يوتيوب
بنتيريست