|
|
 م.ت.س.ك.ع ..........................
|
(الجزء الأول)
+ يا ولدى أنت لسه ما تعبته من الرقاد و مبارات الضللة. ما تمشى تفتش ليك شغل!!!
- أهااا يا حجـة تانى رجعنا للسيرة العاضـة دى؟؟
يا حجـة خليك مستنيرة ياخ... الشغل داير دوافع!!
حاجة كدة ذى الحوجة الملحة أو العروس الشديدة الساكيها النحل!!
أهاا العروس بقت أبعد من الكلاكلات ذى ما بقولوا.... بلاى تتصورى يا حاجـة "وداد بت بتول" قالت شين و عاطل!!!
+ كلامها صحى!!! و لى ماااك عاطل؟؟
- طيب الشنا رايك فيها شنو يا تفتيحة؟؟
أى نعم النخرة كبيرة شوية و الصلعة بقت "out of control" لكن قالوا ممكن تِزّرِع !!!
+ ما لا الزراعة؟؟، ما عمل شريف!!!
- يا حجة أنا بتكلم عن زراعة الصلعة!! أصحى يا بريش!!
خلينا فى المهم.. أها قوتلى شين شديد يعنى، بينى و بينك؟؟
+ شين فى وش الموت!! هى وداد ذاتها شن طعما ؟!؟! وشها ذى القراصة البايتة!!
- لكن شديدة برضو يا حجة!!
آآخخ أنا من القراصة البايتة ذاتوو!!!
و ذى ما قولتا ليك الخير كتير برضو يا تفتيحة....
+ وينوا الخير البتكلم عليهو ده؟؟
- أهو الكهرباء ما مقطوعة و الدقيق راقد و السكر و الشاى لسة فيهم روح. على العموم الدنيا موسم مناسبات " أحب الولائم!!"...
و الناس برضو ما مقصرة!! قاعدة تتزاحم على المقابر و المستشفيات.. لكن عضة البكيات بقت بيش اليومين دي.. أحسن الزول ياكل مع المرحوم قبل ما يموت!!!
الحال ماشى ياحجة، ما تكسرى راسك بى موضوعى!! عشان ما اضايقك فى المعاش!!
+ الشغل مهم حتى و لو كان الحال ماشى ذى ما بتقول!!!
و برضو الحال قدر مشيهو!!! زمن ما شفتك اشتريت كيس صعوت، و شغال " لو سمحته جيب سفة" لمن كرهته الناس حياتم!!
- بالمناسبة أنا بدفع فتورة الناس ديل!!
+ كيف يا الفالح؟؟؟
-أن خليت الشغل/
+ قول رفدوك يا الفالح!!
- يا حجـة أنا جاييك ما تخليك شفقانة!!
أنا رفدونى قالوا لى صالح الناس ديل مش؟؟ عشان كدة دى التضحية!!
+ أنت كنت أشطر زول فى البلد دى!!
- و هسع ده زمن البُلدة!! ثم ثانياً " أنا أعمل لأحيا .. و غيرى يحيى ليعمل" تفرق كتير يا ستهم!!
+ ما فاهمة حاجة من كلامك ده!!
- نحن قومٌ لا يستعبدنا المال!! يكفى ان نراه ضئيلاً فى نظران و قليلاً فى جيوبنا لندرك ما هية الحياة...
+؟؟؟؟!!!!!!
عند فكرة يا المبروك!! التاج ود حاجة حرم قالوا بقى مسئول كبير فى الخرطوم و عمارتوا فى المنسية.. جاى يشوف أهلوا و يشترى نخل أولاد تاج السر..
أنا بكلم حاجة حـرم تكلموا ليك و لى أنت بلاك كلموا، هو ما كان صاحبك فى المدرسة؟؟!!
- صاحبى!! يا حاجة تجتج أبو دنانة دة، لا كان صاحبى و لا حاجة!!
أنا لمن كنت بجى الأول، تجتج ده لو كتلوهو ما بخلى الطيش لى زول!!
+ يا ولدى الدنيا إتغيرت، و بقولوا " لكل مجتهد نصيب"...
- لكل منو؟؟!! شنو ؟؟!! الله يجازى محنك يا حجة!!
زولك ده أنا ما عارف الشغلوا منو!! و لى شغلوا شنو!! تقولى شنو ما بتدى حريف!!!
+ ياولدى الزول ده قالوا عندو شركات و بتكلم بالدولارات، أريتوا يرضى يقابلك يا المبروك!!
أها أنا بمشى ليهم يوم الخميس، قالوا عاملين وليمة كبيرة لى ناس الحلة يوم الجمعة.. أهو نمشى نشتغل مع حاجة حرم و اكلما ليك!!
- يا حجة ما قولتى عندهم تلاتة فلبينيات و لى شنو ما عارف، تشتغلوا شنو معاهم؟؟
+ يا ولدى دى ما حركة ساكت نحنا بنمشى نشرب الشاى بالكيك و ندور الونسة، شغل شنو!!
- بقيتى ثعلبة كبيرة!!!
+ ما كلو منك يا سجم الرماد!!!
- أه يا تفتيحة انتى!!!!
+ لمن تمشى يوم الجمعة حتلقى حاجة حرم كلمته ليك، أمكن أيلقى ليك شغل معهم فى العاصمة يا ولدى، خليك ملحلح!!
- بنتلحلح يا فردة و نشوف " يجعل سرو فى أبلد خلقوا!!!"
|
|
 
|
|
|
|
|
|
|
|
Re: م.ت.س.ك.ع .......................... (Re: Abuzar Omer)
|
- قوود مورنيق ياهجة!!
+ مورنيق شنو يا المميسيخة!!!
( عاملة عينك ذى الحصاية، يا ربى لا تبشتنا و لا تضيق عيونا)...
حاجة حرم وين!!!
- كم إن!!! أدخلى!!
+ إزيك يا حاجة حرم!!
- الحمد لله، كما ينبغى!!!
+ ؟؟؟؟؟؟
حمد الله على سلامة التاج!!
- الله يسلمك!!
التاج و وفد من كبار المسئولين وصلوا الآن للبلد!!!!
+ أيواا عشان كده الصيوان الكبير و العربات الكتيرة دى!!!
- أها ما لازم نكرمهم؟؟!!
+ أنتوا أهل الكرم يا حاجة!!
لكن شوفتى الحاجات بقت غالية كيف!!! كلوا من الحكومة دى!!!
إإشش!!!!
التاج معاهو وزراء و محافظين و بعدين مالا الحكومة ما عمرت لينا البلد!!!
+ هيى سكتنا!!!
بس أنا و ولدى مافى زول عمر لينا حاجة!!!
- أحمدى الله يا حجة و الخير بجى، بس الصبر...
+ صبرنا يا حاجة صبر أيوب، و لا فى شغل و قروش!!!
- مالك يا حجة !! أسع دى التاج ما حل ليكم مشكلة معاش الحاج الله يرحموا!!!!
+ كتر خيروا، لكين المعاش ما بعمل شئ!!!
و الله يا حاجة لو التاج لقى لى شغل لى صاحبه ده أنا مادايره حاجة تانى!!!
- مافى مشكلة أنا بكلم التاج و هو قادر و عندو علاقات كتيرة!!
و نشوفكم تانى كان تنبزوا الحكومة!!!
+ ما ننبز و لا حاجة!!
- لكين ولدك ما بنقدر!!!
+ ولدى مسكين، كتر عليهو!!!
- ده كلوا من الكلام الكتير و الفلقصة فى الفارغة!!!
حقوا تعرسى ليهو عشان يسكت ، باقى عدم العرس بخلى الزول مزوزى!!
+ ولدى عاقل و أكتر زول فاهم، بس يشتغل نشوف ليهو ست بنات البلد!!!
- الله يهون!!!
| |
|
|
|
|
|
|
|
|
|
Re: م.ت.س.ك.ع .......................... (Re: Abuzar Omer)
|
صلّحْتَ طاقيتي الحرير
واتنَحْنَح الحشا بالكلام
ورميتُو من حلقى الوصَل
قُتْ ليهو يا عُمدهْ اختشى
مسئول كبير في الدنيا غير الله اِنْعَدَم
ما شُفْنا زول رضّع صغار
ما شفنا زول نجّح بَهَم
ما شفنا زول لمْلَم رِمَم
لا صِحِينَا عاجِبنا الصباح
لا نُمْنَا غطّانا العَشَم
والحِلَهْ من كلَّ الجِهات محروسَهْ
بالخوف والوهم
وماضينا من زمناً قديم-يا عُمدهْ-مرْسوم انتحار
الموت مُباح
والحب نِطاح
والصِدقِ من جِنس الزِّنا
العافية مولودَة سِفاح
والرغبة مكسورةَ جناح
الحلم والوعد النبيل
الطفلة والأم ، النخيل
الرنه في الوتر الأصيل
تلقاهَا في قاموس نكاح
يا يُمَّه واح..يا حِلَّهْ واح
***
يا سعاد تعالى ولمي من كل البيوت
عِدَّة السَفَر الطويل
زخرفي الفجر النهار
شخْبِطي الضُحى والليل
المَغْرِب .. الفجر.. النجوم.
في صُرَّهْ وارمِيها البحر
خلِّينَا فوق الشك نَعُوم
والعُمدَهْ فاض
العُمدَهْ صار مليون عُمَد
العُمده فيل
جبلاً تقيل
لبْوَهْ وأسد
حَسَنَهْ وغَصِب
جُمْعَهْ وأحَد
بقّيتْ قزازتى
مرقْتَ عِن طرف البلد
وسكْرتَ جَد
وأنا جايي راجِع أجهجهو
لاقاني هو
سايق العساكر والكلاب
رامى بين عيني وعينو
ك ل ب وتَكْشيرهْ وحُراب
ضاقت نِعالى من الزّعل
من تحتهَا اتْمَلمل تُراب
الغيم سكب ضُلو ومشَى
والدنيا غيما سراب سراب
والحِلهْ زى بلداً بعيد
زوَّد بُعاد وقُرُب سُعاد
اتجمَعَت كلَّ البيوت فى راحتَا
زى بِت لِعاب
مجنونَهْ تصرخ فى الزوال
ممزوجَهْ فى الدم واللُعاب
عينيَّ ضاقت نظْرَتهْا
والجوف يطقْطِق بالكلام
قُبَّال يقولوا لي سلام
اتلمُوا حولى بلا نِظام
شال وعِمَّهْ
توب وغُمَّهْ
فاس وطوريَّه وحزام
شالونى بى كُل إحترام
ورمونى فى قَعَر السجن
حصلّنى قبل اليوم يِتم
جارنا المدرِّس ودْ خدوم
قال ليَّ
لا زول قام هتَف
لا كف مشَت بتلاقِى كَف
والعُمدَهْ زى هَمْبول وقف
يا صمت أُف
يا دنيا تُف
| |
|
|
|
|
|
|
|
|
|
Re: م.ت.س.ك.ع .......................... (Re: Abuzar Omer)
|
( الجزء الثالث)
+ أهلاً أخونا و صديقنا التاج و أهلاً بالضيوف الكرام!!!
- أهلاً يا مسعود ياخ و كتر خيرك على الجية!!
- (بالمناسبة مسعود ده جارنا فى الحلة!!)
+ أيوه و كمان زميل دراسة و كان بجى الأول، أقصد كنتا بجى الأول و التاج أخوى ده كان... ولى مافى داعى!! هاهاها هو!!
- إتفضلوا على الأكل!!!
+ و الله يا التاج ريحتك دى مبالغة ياخ!! !!
بلاى دى اسمها شنو؟؟؟
- ((همساً)) ...اسمها بابرى!!! يا مسسعود!!!
+ ((بى أعلى صوت)) .... و الله بربرى الزمن يا التاج أخوى!! تتذكر أيام المدرسة الإبتدائى .. و أستاذ عبود؟؟؟!!! هاهاها هو!!
- بعد إذنكم عندى عندى مكالمة!!!
((همساً)) يا مسعود بلاى مافى داعى لى سيرة أستاذ عبود ده بالذات!!!
- ياخى أمشى أقعد مع ناس الحلة!!!
+ ياخ خلينى أونس ليك الضيوف!!!
- خلى الضيوف ياخدوا راحتهم، عندهم صفقات و مشاريع مهمة للبلد!!!
+ مافى مشاكل يا تاج ياخ!!! بس...
- بنتفاهم يا مسعود!!
| |
|
|
|
|
|
|
|
|
|
Re: م.ت.س.ك.ع .......................... (Re: Abuzar Omer)
|
+ أنت نسيت يا تاج ياخ.. أخوك خريج و أفهم من ناس كتار فى البلد دى!!!
- ممكن بس تساعد فى إكرام الضيوف الجو ديل من ناس الحلة، ياخ أنت ما ود البيت!!!!
و مافى داعى لى القصص القديمة قدام الضيوف ياخ!!!
+ حاضر يا تاج ياخ!!!
و برضو إن شاء الله الموضوع فيهو تحلية و كدة!!!
- أكيد!!! الحاجات أنا جبتها معاى من العاصمة.. بالهناء يا سيد و إن شاء تعجبك!!
+ يا جماعة تفضلوا بالهناء و أنا و التاج أخوى ده تحت أمركم!!!
تعرف يا التاج ياخ دى أجمل وليمة أكلها فى حياتى.. بس ورونا النعمة دى كلها من وين!!!
- هذا من فضل الله!!
+ فضل الله بتاع الخضار!!! هاهاها هو!!!
ياخ ما تدونا نظرة!!؟؟
- الوالدة ذكرت أنك فى حوجة للتوظيف.. و أنا حأكلم مدير أعمالى، يقعد معاك بعد صلاة المغرب!!
+ لى شنو يعنى مدير أعمالك!! و لى دى وهمة فى شكل/!!!
- لانو هو المسئول عن التعيين فى مجموعة الشركات و حيشوف مؤهلاتك
و يعمل ليك إنترفيو صغير عشان يحدد الوظيفة المناسبة ليك!!!
+ كلام ذى **** النحل!!!
- عن إذنك لازم أقعد مع لضيوف شوية!!!
..
..
+ أها يا الضيوف أى خدمة؟؟؟
- تشكر يا شيخنا!!!
+ شيخكم وينو؟؟؟ أكلوا الدودو!!! ها ها ها هو!!
... و يستمر الحديث : مشاريع التنمية... بيئة الاستثمار.... المنهجية!!!
+ المنهجية مهمة جداً و خصوصاً إذا تعلق الأمر بالتحلية!!!
دايرين زيادة يا شباب؟؟؟ شباب فوق الستين !!! ها ها ها هو!! الخير كتير!!
- شكراً ياخ كتر خيرك //
نواصل ما انقطع من الحديث..
+ بالمناسبة أنا كنت بجى الأول و كنت أشطر زول فى الحلة دى!!!!
- يا نور الدائم !! ممكن تقعد مع أخونا مسعود و تتعرف على إمكانياته!!
لا نو نحنا دايرين نضمو لى كوكبة مشاريع التنمية!!
= تفضل يا مسعود على الجانب و خلينا نتحدث!!!
+ و التحلية دى تروح ساى كدة ما تصبر يا أبو الشباب!!!
التحلية ملحوقة بس تعال و خلينا نتكلم و ندى الضيوف فرصة فى مواصلة المفاكرات!!!
+ ياخ البلد دى كلها ما فيها زول بيفكر!!!
- تعال يا شيخنا بى هنا الله يرضى عليك!!!
+ ياخ جينا ما تفكها فينا!!!
| |
|
|
|
|
|
|
|
|
|
Re: م.ت.س.ك.ع .......................... (Re: Abuzar Omer)
|
( الجزء الرابع)
= أها يا أستاذ مسعود حديثنا عن نفسك شوية!!
+ إنتوا منو ؟؟
= ياخ حدثنى أنا عن نفسك!!
+ ياخ التاج المدير ده دفغتى و هو عارف أنا كنت بجى الأول و ...//
= ياخ أنا داير أعرف مثلاً وين درسته الجامعة و بتين إتخرجته و حاجات ذى دى!!!
| |
|
|
|
|
|
|
| |
Abuzar Omer
aydaroos
فيس بوك
تويتر
انستقرام
يوتيوب
بنتيريست