|
|
 من بعض ما تغنى به هاشم مرغني رحمه الله
|
إنت كنت وكان زمان - هاشم ميرغني
إنت كنت وكان زمان
إتلاشت صور الحبيبه
والسنين الباسمه راحت
صدقني ما بقدر اجيبه
ضاع معاك كل الامل
بعدو الاماني بقت صعيبه
لا لقيتني قادر إحتمل
لا لقيتك الفرحه القريبه
وإتكسر المجداف حزين
والريح بكت فوق الشراع
نزلت دموعي تبللو
لما الحلم من عيني ضاع
ما كنت قايلك زي سراب
بموجو يسقيني الخداع
داير افوتك وارتحل
لا زاد معاي ولا متاع
وينو سهري العشتو فيك
ما كنت أسعد من معاك
وريتني أكتب في الألم
واتوسد الاسى والهلاك
فتش عليّ تلقاني فيك
إلا قلبي الما لقاك
تنساني زي ما عرفتني
ما عاش وراك قلباً نساك
***
ما زمان بتقول عيونك - هاشم ميرغني
ما زمان بتقول عيونك
ريده مكبوب كلو ليّ
قلت ليك قلل حنانك
لما شفتو كتير عليّ
قصدي للاحزان تخلي
من فرحنا فرح شويه
عارف الايام صباحه
تاني يرجع لي أسيه
أنا يا غمام ما كنت قايلك
جناتي يوم بتفارقه
وتضيع معاك ايام سنيني
ما إتهنا جنبك باللقاء
إخترت نسيان الفات
وقليبي من قلبك شقا
حتى كلامك عيونك
في عيونك ما بقى
العيون سألتني منك
لما حست بيّ وحيد
طاريه زمن الريده بدري
لما كان الريد أكيد
بقيت أفتش على خيال
بيهو أتخيل وأريد
بيهو أرحل من عوالمي
لعوالم شوق جديد
***
أٌسبوع تمام - هاشم ميرغني
أٌسبوع تمام ...
أنا كنت عايش في الخيال
أنسج حروف سياله
زي دمع الحنين من عيني سال
أُسبوع تمام ...
أنا والنجوم بنسأل الليل الحزين
لو مره طيفِك ليهو طال
نسرد حكاوينا ونصبِّر في العيون
يا ريتنا نقدر نلقى حال
ما حالنا من بعدك عذاب
وفرحنا من بعدك محال
لوشفتي كيف نحن بنشيل كل الأمل
نفرُش طريقٍك بالورود
ولا مره هان لينا الوصال
وفي عينيّ شوقك ياعظيمه
زي السحاب
يناجيني ويتقاطر ليّ فال
ما إنت البشاره في كل عيد
وانا البعيد..لما القمر حكى ليّ قال
قال ليّ إنتي بعيده جنبو
وانا الهناك فوق الجمُر
ببني القصور من الرمال
أشتت الرمل الحزين
واسأل الودِع البيخدع
يقول ليّ جايه
معاي وجودك إستَحَال
أنا اسأل النخل البهاتي
قبِّل وجيهو مني مال
أنا اسأل الله يجيبني ليك
اخجل كتير من السؤال
ما دربي بعدِك ما سارو زولاً
وعينيّ ماشافت جمال
وبخلتي انتي بصوره لي
اساهر بيها ساعاتي الطوال
بس عزاي فوق الزمن
قوم يافرح اسرع تعال
نوِّر بزيناتك ضلامنا
طوف بالبوادي غنا وموال
رقِّص شبابنا الكلو ريد
وافرد ضفايرنا الطوال
ما انتي اول فرحه ليّ
خجلانه من الخجل ولاّ المجال
ما ترُدي قولي بريدك انتَ
ولاّ قولي ليّ كفاي سؤال
أنا أصلي ما سألتك براي..
بتسأل معاي كل العواطف في ابتهال
انا اصلي ما ردتك براي..
رادوك معاي
ناس الأرض وطيبة الأرض وزرع الأرض
قبل الظلال
أنا أصلي ما بشتاق براي..
بشتاق معاي الليل
وسري الدافنو فيهو والإنعزال
ده كلو في اسبوع تمام
صوَّرتك عروس مليانه
بي عطر الارض
ترقص تميل في الإنهدال
واهدل معاك عيني عجب
سبحان الخلقِك ذو الجلال
وخلقني حارسِك بالعيون
حأظل احرسك ياجمال
***
كنوز الدنيا - هاشم ميرغني
لو كنوز الدنيا راحت
صدقيني روحته ما بتخسر
أنا إشتريت بيك عمري كلو
ما في غير فقدك بخسر
لو عجزت النظرات تعبر
خلي الغنا البكاي يفسر
لو وهبتك عمري كلو
تلقيني في ريدك مقصر
أصلي من شوفتك وحاتك
ناوي أبنيلك خميلة
لجمال ما شفنا زيو
لعيون نادرة وكحيلة
خوفي تبقي زي ندرة عيونك
بالوداد دايما بخيلة
تنسجي الأزهار عقودك
وتبقي شوفك مستحيلة
الغنيوه الحلوة ضاعت
والحروف بصعب أقولا
كنت في عيني نجمة
في سماها بعيد وصولها
بقيت في عيني دمعة
لسواك صعب نزوله
العيون ما شايفه غيرك
كفيفة لما يفوته زوله
***
شوف العين - هاشم ميرغني
شوف العين قالت ده لا لا
صدت من تيها ودلالا
ريدتك ساكنة الجوف خلالها
و الاعضاء امتزجت خلالها
براق سنك شق لألأ
سهمك صاب احشاي قلالا
اسباب الغي و العلاله
ضمرته والخصر العلالا
نور في نور ياذا الجلاله
خدانك لمعاً جلاله
في الترنيع ماليك مثاله
علمتي الغصن الرتاله
شوفتك كم عاشق أتاله
وعاد مطعون بسهام قتاله
يانسام أوصف جماله
والقامة السيرك أماله
أوصف لي أسباب كماله
وقول لي أٌم خد هاجراني ماله
النسام شال الرسالة
وفي التوضيح روق رسالها
ذكرني الرطب العساله
وهاج الشوق والدمعة ساله
***
ما مصيرو الحي بلاقي - هاشم ميرغني
أنت أصلك فيني باقي
مهما طال زمن احتراقي
وأصلي راجع لعيونك
ما مصيرو الحي بلاقي
بقيت بغيرك زول بيعيش
في وسط ضباب
حتى الليالي بقت تألم
رسمت على عيوني العذاب
ما مصيرو الحي بلاقي
مهما طال زمن الغياب
ما مصيرو الحي بلاقي
رغم البعد والأميال
رغم البينا من آمال
راجي الدنيا تبسم لي
أكتب فيك كلام ما أتقال
لا سمعوه قبالك
لا أتردد صدى وموال
أزرع بيهو صحاري الريد
من دون مويه لا تربال
ما مصيرو الحي بلاقي
***
أنا وين أدسك - هاشم ميرغني
أقول أشيلك في أحداق عيوني
أخاف النظر يجرح يمسك
أشيلك في حشاشات قلبي جوه
وبرضو الناس تحسك
أنا وين أدسك..
أشيلك في وتر بكاي
أخاف يقروك
في معاني غناي
ولاّ في رنة حزن
لو بح صوت الناي
ويضيع سراً
قايلو عندي براي
أشيلك في مدى الإحساس
يبين شوقي
الأصلو ما بنقاس
واخاف يقروك
في عيوني نعاس
بس قول لي أنا وين أدسك
من عيون الناس
أقول أشيلك في عيوني حنان
أخاف يلقو ريدك
مني وين ما كان
أنا والله صدقني يا إنسان
ما لاقي ليك مكان
***
القلب المعذب - هاشم ميرغني
أديتك القلب المعذب -- قلت لي ألمه بتزيلوا
يبقي في وارف رموشك -- فرحته ولحظات مقيلوا
تبقي نوره - وتبقي فجره - تمنع الدمعات يسيلوا
وهسه لو داير تسيبه -- حتي باقي العمر شيلوا
----------
بي محنه الزول بيلوم -- دمعه في الخدين بتجري
كنت بأمل أنا في سماحه -- الظروف فارقتنا بدري
إنت ما ريدي ومنايا -- وكل لحظه بتضوي عمري
وكنت دايرك يا حبيبي -- لو مره بي آلامي تدري
وهسه لو داير تسيبه -- حتي باقي العمر شيله
----------
في نهاية لومي ليك -- برضي بطمع تاني ترجع
أصلي راجي الدنيا تبسم -- لينا بي أفراحها تجمع
أصلي عارفك يا منايا -- كل لحظه بتصبح أروع
وإنت من طليت عليه -- طرفي ما أظن مره دمع
وهسه لو داير تسيبه -- حتي باقي العمر شيله
***
انتي ما مشتاقه لي - هاشم مرغني
إنتي ما مشتاقه ليه -- ولا ما عارفه العليا
لو خلاص خليتي ريدي -- يكفيني خاتمك في إيديا
----------
ما زمان قبال أسيبك -- قلتي لي أوعك تطول
قلبي دايماً في رجاك -- المحال غيرك يبدل
عشت بعدك كل ذكري -- أمسي بطيفك وأقيل
الليله قلبك لو نساني غير عيونك وين أقبل
---------
ما زمان قبال أسافر -- كان فراقي يصعب عليكِ
شلت جرحي وفت منك -- همي بس كان كيف أجيكِ
سبت شوق الدنيا كله -- داير أحس بشوقي فيكِ
بس لقيت اللهفه راحت حتي عينيك ما عينيكِ
----------
شلت فرحي وجيت أسالمك -- قايلك إنتي تحسي بيه
وإنتي ما إنتي الزمان -- أصلي ما مصدق عينيه
إنتي ما إنتي الزمان -- لا من قليبك بالفرح يحضن إيديه
داير أفوت يا غاليه منك أبكي وأحضن في الأسيه
أبكي وأحضن في الأسيه
***
هسه خايف - هاشم مرغني
هسه خايف من فراقِك - لما يحصل ببقي كيف
زي ورد في عز نداه - خوفه بكره يزوله صيف
-------------
من عِرفِتك -- كنت حاسس الزمن لي ما بيسيبك
كنت حاسس -- رغم حبي إني زي الما حبيبك
والحنان -- البينا ولف لا نصيبي ولا نصيبك
الزمان عارف مصيرنا حقه لي ما كان يجيبك
هسه خايف
-----------
الفرح في دربي عارفه - أصله ما بيطول كتير
زي غمام في سمايا عدي - وسابني في عز الهجير
كم فراشه علي ورده طاله - أصله ما قايله بيطير
فات وراح شايل هناها خوفي من نفس المصير
هسه خايف
-----------
يا زمن علمني أنسي - المحال نسيان عيونه
حتي لو أيامي طالت - ما أظني أعيش بدونه
ما أظن أيامي تاني - زي حنانها تكون حنونه
إنت خوني زماني كله إلا أوعك يوم تخونه
هسه خايف
----------
حقه يا عيني توالفي الصبر قبال فراقه - قبال فراقه
ما إنتي عارفه الجاي بكره وبرضه تغرقي في إشتياقه
كم عيون في الريده غرقت - والزمن من ريده ساقه
ما كتير القلبه حبَ و ياما كم في هواه لاقي
---------
هسه خايف من فراقك - لما يحصل ببقي كيف
زي ورد في عز نداه - خوفه بكره يزوله صيف
|
|
  
|
|
|
|
ايهاب نميري
نادر الفضلى
فيس بوك
تويتر
انستقرام
يوتيوب
بنتيريست