مقدمة: ولدنا من الجزيرة اتخرج من الجامعة عاطل اربعة سنوات ولد واحد لوالده مع كمية من البنات مع الحاح والده ووساطة والدتنا توفقنا في الحصول علي فرصة عمل له بالسعوديه مع احد اصدقائنا له شركة وعندما ابلغناهم بالخبر الفرحه عمت الحله (( فيزا مجانا وشغل من اول يوم بامتيازات لا يحلم بها)) حضر للسعودية واصبح من احد المغتربين اصحاب الدوامات كانت هنالك بعض الاشكالات البسيطة والعقبات التي واجهته في التاقلم مع المجتمع هنا والنزاعات مع الموظفين من الجنسيات الاخري وكنت اهرع لمعالجتها رغم عن تكرارها كثيرا . وفي يوم من ايام الشتاء البارد رن الجوال: صاحب الشركة: الو عباس هلا وغلا حيو عباس: مرحب بالشيخ اخبارك والاسرة الكريمه صاحب الشركة: زين والله طولت ما شفناك اسف للازعاج في الوقت المتاخر تري يا عباس الرجال الجبتو هذا فشلك معنا ولو لا غلاوتك لكان لنا قول اخر دحين قررنا ان ننهي خدماته والتسفير نهائي. عباس: تكفي يا الشيخ ما تستعجل اترك الامر لي غدا سوف اكون معكم. مشيت للشيخ لقيتو واقف لمبة زعلان سبب الزعل زولي الجبناهو من السودان كان نائم اثناء ساعات العمل الرسمية احد الشركاء كان مرورا علي الفرع الذي يعمل به والسكن جوار المكتب ذهب لتفقد زولنا وجده في سابع نومه بعد ان ايقظه من النوم وبخه بان هذه ليست بطريقة عمل انتفض زولنا من السرير وبيده اليمين دفر الراجل وقال له (( زح من الدرب انا داير اتسير)) ...... تصدقو!!!!!! (( زح من الدرب انا داير اتسير)) هذه العبارة وخاصة كلمة اتسير المنقرضة في الريف السوداني . اعتبرها صاحب الشركة بانها كلمات اهانة خاصة بعد دفرت اليد. ولمعالجة المشكله وكبداية للحل كان شرح الجملة لهم : زح.....جنب من الدرب...من الطريق انا داير ...انا ابقي اتسير.... اتبول هذا ما يقال له الطقاشة اما الجلاطة: صديق عزيز علينا لدينا قصص طفولة ممتعه وصحبة زمن كامل بالحي الذي كنا نسكن به شاب خلوق مهذب متوسط الوسامه يقدر الحياة الزوجية. حكاية الكرش والجلحات معذبه شويه لم يفتح الله له ببنت الحلال عشان تقفلا عليهو داخل قفص الزوجيه السعيد وهو دائم الزيارة لنا بالمنزل ايام العطلات للدردشه وتناول ما يجود به المنزل من وجبات سودانيه. كنت دائما مهموم بعدم زواجه وفي محاولات دائمه ونقاش معه لاكمال نصف دينه بين فواصل النقاش نطلب من المدام التوسط لايجاد عروسه من معارفها بالرغم من محاولات المدام دائما النتائج كانت سلبيه ومن ضمن المحاولات تم مفاتحت احدي سعيدات الحظ بنية صلاح لخطبتها وكالمعتاد رد ما عندها مانع بس قبل الخطوبه لازم اكون في تعارف وبدأت المساعي الجاده من المدام لاكمال حلقة الوصل . بعد فترة سألت المدام الحصل شنو في موضوع صلاح صاحبي ؟؟؟؟ المدام : البت رفضت أنا : انتي البت دي مجنونه ترفض اليومين ديل في بت تلقي ليها عريس لقطه يشبه صلاح راجل خريج قانون مهذب يقدر الحياة الزوجيه كريم وهو الاهم للمرأة يعني اصرف بس ..... ايوه كريم حكايه والله؟؟؟؟؟ المدام: صلاح قابل البت كم مره كده الزيارة القبل الاخيره جاب ليها كريمات هديه معاهم فازلين قال معطر البت زعلت قالت لي متين اتعارفنا عشان اجيب لي كريمات وفازلين هدية ما جميلة يعني شايفني غبشاء ولا لوني اسود قلت ليها معليش اصلو صلاح رجل عفوي ما بقصد حاجه البت مشتا في الزيارة قاصمت الظهر جاء ليهم في البيت شايل معاهو فواكه انت عارف صاحبك بحب التفاح اغلب كيس الفواكه تفاح. أنا : مقاطعا المدام طيب مالو الراجل كريم بدل امشي يدو فاضيه شايل معاهو فواكه دي فيها شنو البت متحايله بس خليها تلقي ليها عريس هي ذاتا ما سمحه وقت لقت زي صلاح كانت تكنكش فيهوا...... المدام : انت دائما مستعجل تمسك المواضيع من الطرف تقعد تعوس فيها الكلام ما فواكه ولا تفاح صلاح بعد انا ما حليت ليهوا مشكلة الكريمات والفازلين الهديه ،كان بتونس مع البت قال ليها والله الكريمات جابت نتيجه بس بعد ده فضل ليك الرجيم التفاح كويس للرجيم بعدها تخشي طوالي في تقويم سنون.......... صاحبك ما بعرف اتكلم ولا اتونس فكني منو بالله عليك احرجنا مع البت...... بعد فترة من تطرشقت خطوبة صلاح جلاطه في احدي الزيارات العائليه شفت لي بت غير متزوجه سالت منها قالو شغاله في مستشفي بتاعت معامل طبيه متوسطة الجمال بتمشي الحال ، قلت خلاص بتنفع مع صاحبي صلاح نعيد الكره تاني مع المدام بعد نقاش مستفيض تم اقناع المدام بالتوسط بعد الموافقة شرطها اخر مره علي ان يتم منحه كورسات في التعامل مع الجنس اللطيف بلباقة قبل بداية المشروع بعد جلسات متكرره ونقاش مع صلاح اتفقنا الكلام اكون قدر السؤال وعدم الانجراف نحو مواضيع فرعيه لحين انتهاء الخطبه والزواج.... عندما قررت ان استدل بالتصرف الاخير الذي صاحب الفواكه والتفاح امتعض صديقنا وقال : ما تناقش حكاية الفواكه معاي اصلوا انا راجل كريم ما بمشي لي ناس ايدي فاضيه قلت ليهو كان بقت علي الفواكه هينه.... اتفقنا.......... اخطرت المدام باننا جاهزين موية ونور . تم ترتيب المواعيد الامور ماشه تمام التمام سألت كم مره صلاح عن مشروع الخطوبه الجديده قال البت ماشأ الله عليها عال العال قلنا الحمد لله اخونا موضوعوا سلك وشركو قبض.... يوم جمعه صلاح جاينا زيارة معاها غذاء .... اخطرت المدام اليوم صلاح جايينا ماشي اجيب ليكم كسره وملاح من المطعم السوداني.... .....فاجئتني... ما قلت ليك والله نسيت صلاح خطوبتو ما طرشقت.......... أنا : فعلا زعلت شديد ... البنات ديل جنن ولا شنو صلاح ده عليك الله عيبيهو لي كمان العجوزه دي متخرجه ليها خمسه سنين تلقيها تفتش للعرس ما لاقيه بعد لقت عايزه تتعزز في ستين صلاح إنشاءالله إعرس احسن منها مليون مره. المدام : انا ما قلت ليك انت بتجوط المواضيع ساكت تتلب زي ديك العده بعدين صلاحك ده إعرس احسن منها اشنا منها ما بهمني وخلاس لحدي هنا كفاية يا استاذ. أنا : طيب ليه رفضت المدام: اتغيرت الاحداث الرفض جاء من ام البت ما من البت ...... قالوا امها جات من السودان كانت عيانه حجزوها في المستشفي عندها ملاريا انت عارف حاجه صفيه السكري تاعبا صلاح مشي زياره لي امها حاجه صفيه في المستشفي اكفر ليها بتونس مع امها قال ليها الملاريا مع السكري خطره شديد يا حاجه انا بعرف واحد كان عندو ملاريا معاها سكري قتلتو (( جابت اجلوا طوالي للمقابر والبلد دي الله اقبحا الدفن فيها بالحجاره طينه ساكت الواحد اوسد بيها راسو مافي)) حاجه صفيه قالو للصباح ما نامت تبكي في المستشفي قالت الراجل ده ما عايزه تاني تشوفوا خالص.......... دق جرس الباب قلت للولد الصغير امشي شوف ده منو ... الولد طلع في الكرسي عاين بالعين السحريه... يا بابا ده صلاح تفاح.... ضحكت من كلام الولد اتذكرت زميلنا في البنك راجل من اسرة فقيره من قري الجزيره كان جاتنا زميله في البنك اخوها راجل دفعتنا وصانا عليها... زميلنا بفتش ليهو في عروس رشحت ليهو اخت صاحبنا الجديدة معانا قال لي دي ما سمحه.... حسب علاقة اخو البت بينا وكلتني لدعوة الزملاء في رمضان للفطور معاها ، مشينا للفطور الما خمج ( انناس – لحم طير مما يشتهون– الفواكه الرطبه بانواعها ) البيت تحفه المكيفات ضاربه في راسنا الموكيت تحت كرعينا ناس مرتاحة....... بعد الفطور تاني يوم صاحبنا حول الطربيزه جمب البت لصق مكتبو حتي تم الزواج ......... بعد الزواج سكن مع نسابتو في بيت العز.... عندها اخواتا متزوجات كلهم في نفس العماره......زميلنا كل يوم انتهي دوام البنك امشي الغذاء في البيت ........ ناس الجزيره ديل الواحد فيهم قلبوا حار شاف امشي يدينو فاضيات عيب كل يوم بعد ما إطلع امشي سوق الفواكه اشيل معاهو كم كيلو موز المسأله اتكررت كثير يوم هو جاي للبيت اولاد اختا بلعبو قدام الباب في الشارع من شافو زميلنا جاي عليهم شايل الكيس الاولاد الصغار معاهم البنات قعدو اكوركو ويصرخو ،الموز جاء ... الموز جاء ... الموز جاء ... الموز جاء ... الموز جاء ... اخونا ففننننننننننن جداع كيس الموز طلق ليهم بتهم......
12-24-2012, 04:37 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
د. نجاة أنا والزمان من عرفتك ما نسيتك إن لم نكن معا فقلوبنا يضمها بيت علي سحب الاخاء الفسيح اذ البعد كمم احاسيسنا مشاعرنا بين القلوب سفير بالود نختصر المسافة الدرب بين المشاعر قريب البعد حين نحب لا معني له الفضاء حين نحب صغير على صدر الزمن بكتب احاسيس شوقي للموعد تعرف الشوق لو فتشت عن سر لهفتي
Quote: أها ياعبس يالسيس د. نجاة دي دعوتها لاحقة قول لصلاح يستحمى وينوم نوم عريس الصباح يلقاها قدام الباب
- ياخي صلاح ده وديهو (للعزابة))اصحابي عشان يعرف حاجة
حيدر يا وجيه سلام وتحايا زول عمل الخير يا حبيب ما ساهل يا حيدوره واحد سألوه قالوا ليه أعنف إحساس شنو ، قال ليهم لامن تكون متدردق من جبل بتاع أمواس وتقع في بحر بتاع ريحة تبقي علي صلاح الحكاية بتاعت اعنف احساس لو وديتو لي عذابتك
12-25-2012, 06:56 AM
الزبير بشير الزبير بشير
تاريخ التسجيل: 08-11-2009
مجموع المشاركات: 1770
هههههههه يسعد صباحك يا عباس ياخ نحن عندنا الطقاشة يلازمها مصطلح الرواشة.. والفعل أروَش عندنا واحد من اولادنا دا بنطبقو عليهم كلهم .. الطقاشة والرواشة والجلاطة .. قام خطب ليهو بت وتمت الخطوبة وكل حاجة.. اها بعد الخطوبة بي فترة كدة اتوكل علي الله وهدى ليها قطعة ملابس واحدة من فئة معينة كدة خلتها تشوكشو شاكوش بالتلاتة.. غايتو هو ما قال هدى ليها شنو .. لكن العرفناهو انها لما ودى ليها الهدية المنحوسة دي قالت ليهو قالو ليك عريانة ولا اشتكيت ليك من الهوا البارد
12-25-2012, 07:03 AM
Mohammed Ahmed Saeed Mohammed Ahmed Saeed
تاريخ التسجيل: 12-19-2005
مجموع المشاركات: 690
بطريقتك دى بتلحقنا قريبك بطالع فى موضوعك دا ولمن وليدك قال صلاح تفاح الضحكة فكت منى وبراى فى المكتب جنبى الاستاف بيطالعوا فينى بى شك . عموما شكرا ليك you make my day
ثانيا موضوع فساد البنوك خليتو لية دا موضوع كامل الدسم ولو هبشت موضوع الاستيراد بدون قيمة وعمايلو بتنور الناس وخصوصا اظهر عليك اشتغلت فى بيت الكلاوى جوةالجوة ذاتها بالمناسبة بالتجربة اى شخص يجى بى فيزا مجانا من الخريجين الجدد( يعنى فرش ما اشتغل فى السودان ) بيكون متسهتر جدا وبيعتقد انو مؤهلاتو دى ممكن تشغلوا بى وضع أحسن مليون مرة مماهو فية . تماما ذى البنت البتتخرج من الجامعة وعلى طول تتزوج بتكون مارضة راجلها ومغرورة وبتعتقد انو ذيها مافى وانو ممكن تجيب احسن من زوجها لوقعدت شوية ما استعجلت عشان كدة بورة السنة والسنتين بتصلح البنات وبتاهلهم يبقوا ربات منازل ممتازات. ذى صلاحك داالبشوت ضفارى كتار لكين بقع لى فى مرة اكعب منو وربنا يفك بورتو
12-25-2012, 08:15 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
الزبير يا ولدنا سلامات ياخي ناس الجزيرة اهلنا جميلين اقول ليك من المواقف الظريفة بتاعتهم: جماعه عندهم دفارات شغالين بيها شغل خاص الصدفه لمتني فيهم بعلاقة اهلنا ناس الشريف عملته ليهم تعاقدات عمل مع الشركة للترحيل والعلاقة اطورت بينا لزيارة في بيت العذابة . عندهم مشكلتين الاولي استاذ شغال دروس خصوصية عندو مشكله مع سعودي درس اولادو واكل قروشو الثانية واحد قاعد سبعة سنين ما عمل حاجة . يوم قدمو لي دعوة غذاء الجمعه بمناسبة فك ساجور الاثنين مشيت ليهم اول دخلتي الشقة قلت ليهم دعوتكم لو غذاء كبسة خلوني ارجع دقشته المطبخ بالله اشوف ليك حلة ((البني كربو )) بخارها في السماء بي ملاح لبن . دخلته علي الصالة لقيت واحد شايل ليهو باقة بتاعت موية ادق عليها (( طق طق .... أطق أطق... طق طق طق)) والزول السبعه سنين ما عمل حاجة انكز بي عكاز لي فوق . سألتهم: ها جماعة الزول خبارو . قالو لمه قروش البوكس خلاس كيف لماها ؟؟؟؟؟؟؟ قالو عملنا خته واديناهو الصرفه الاولي الا كان ما كرب صلبو واشتغل ودفع حق الخته كل شهر الرماد كال خشمنا. اها والاستاذ السعودي انشاءالله انستر معاهو واداهو القروش ؟؟؟؟؟؟؟؟ اها زول الاستاذ امو داعيه ليهو وجبارتو واقفه عليك امان الله اطارد في السعودي من عام نول والمدارس باقي ليها فرد اسبوع والسعودي كل ما امشي ليهو ادق جرس الشقه تجيهو الشغالة منططه عويناتا زي الصبرة ((بابا مافي يلا روح)) قلنا ليهو ادقش بتاع البقالة اتلحو في رقبتو اوريك الزول بجي متين بالله كلامنا ما وقع واطه الهندي وصف لينا الزول وين قالو في البر بتاع الحرس الوطني دقشنا بي الكنتر البر من الضهريه كان لمينا فيهو المغربيه زولك اشرب في الشيشه في الخيمه قدر ما حاولناهو في القريشات ما لقينا طريقه رضينا بي المال تلتو ولا قتلتو ما لقينا طريقه اها قلته لي زولي نمشي. هوب قمنا من الواطه زولي الاستاذ من الزعله ملي يدو تراب انا قلته اكشحا للسعودي في وشو وبنقي في خروج نهائي وحاو وتر ربك ستر وقت لفينا بي باب الكنتر كشح التراب لي فوق من الزعله ركبنا ودورنا. عليك امان الله بعد كم يوم السعودي جانا اترقط مع السواق الهندي يسأل من الاستاذ . طلع ليهو الاستاذ بالسروال الطويل والفنيله . السعودي دخل يدو في جيبو وطلعا فت اتقول ضربتو عقرب والبنفسجي طلع من جوه خمسميات بعد اداهو قروشو واعتزر ليهو اخذ ليهو صنه ووقفه طويله في الباب طلع لينا بي شيتنا غريب قال للاستاذ . اها بعد اخذت قروشك رجع لي التراب الشيلتو من الخيمه . الزول المطموس قايلنا بتاعين كتابات وفقرا.
12-25-2012, 08:24 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 25108
Quote: قالت ليهو قالو ليك عريانة ولا اشتكيت ليك من الهوا البارد
نادر يا وجيه سلام وتحايا رجعتني بالشريط لايام افندية السودان زميلنا خاطب زميلتنا راجل مهذب يحترم المرأة وعاطفي لدرجة قف نوعية الناس البشم ريحة الفايل في المكتب اقول ليك الله مسكتو حبيبتي بي يدها والفايل اكون جاي من الارشيف الراجل من حبو الكثير لازم امشي للزولة حبيبتو ادنقر ليها بي راسو اتكل كوعو في التربيزة اوسوس معها بمجرد ما ادنقر في التربيزة تلقي باقي البنات اضحكن عليهو صاحبنا مبسوط بي ضحكة البنات اعاين ليهم بي كبرياء عاطفي يعني الود بحب وروميو المكتب ...... تصدق التدنقرة والتكوعه في التربيزة كانت سبب فسخ الخطوبه. الراجل المسكين ما عندو مؤهلات تمسك البنطلون مع التدنقره البنطلون بنصل منو والبنات بضحكن في الكواشف والزول بالو في حتة تانيه.
12-25-2012, 11:17 AM
وضاحة وضاحة
تاريخ التسجيل: 01-16-2005
مجموع المشاركات: 9116
واحد من اصحابنا حظه بايظ هو بين مكاتب الترجمه و النوم ، في يوم واحد قال ليه اقع التدريس القروش بالكوم ، عرض نفسه لهذه الشغلانيه بعد طول عناء وصبر مع العطال ، المقاوله كانت كالاتي : اذا نجح الولد في الانجليزي تاخد 5 ألف ريال ، يوم النتيجه ، ذهب لمنزل الطالب لمعرفه النتيجه في الامتحان ، و من حظه العاثر وجد ان الطالب توفي لرحمه مولاه قبل يومين ، رغم حاله الحزن في بيت المرحوم ، قربنا نقول لوالد الطالب ادينا القروش ، لانو الطالب نجح .
والله هذه القصه صحي صحي
الزبير
12-25-2012, 12:18 PM
Elsanosi Badr Elsanosi Badr
تاريخ التسجيل: 03-29-2008
مجموع المشاركات: 4166
بمناسبة التراب والسوداني، زمان كان عندنا صاحبنا ليبي، عندو بتو عيانه وداها كل المستشفيات وعرضها علي دكاترة من مصر وتونس ما اتعالجت، اها في جماعه قالوا ليهو ادقش الفقرا، زولنا مشا لقي سودانين عطاله وسالهم من الفقرا، اها في جماعة من اولاد الخرطوم قالوا نستنكح الليبي ده ونعمل ليهو نحن فقرا، وفعلا مشو معاهو البيت وجابوا البنية مغطغطه قدامن وقعدو يقرو ويتفو فيها، وزولنا الليبي قاعد معاهم، اها البنية شوية سكنت وابت تتحرك، وماتت، زولنا الليبي نده بتو وما جاوبت جر من تحت الفرش بندقية طويله وبدأ يسأل في الجماعة اتا كنت بتقرأ شنو؟ رد الاول قال ليهو سورة الحمدو، ورد التاني قال ليهو اية الكرسي خلاهو، التالت قال ليهو سورة الاخلاص، الليبي نط وخنقو وقال ليهو انت دا اللخلصت علي البنية!!!!
12-25-2012, 01:03 PM
Nazik Eltayeb Nazik Eltayeb
تاريخ التسجيل: 11-27-2007
مجموع المشاركات: 2357
Quote: استعرضت هذا البوست فوجدت ان البناء الدرامي لهذه القصص لايعوزه تحديد المكان (الجزيرة المفترى عليها) باي صورة كانت. هل نحن امام سيدح جديد؟
العالم يموج من الغلاء و اهل السودان في بحبوحة من العيش
Nazik Eltayeb يا وجيه سلام فطيت كل الناس عشان الحقك وارد ليك المفترع بريء جدا بدون تاويل عشان ما تمسك لي في حكاية ناس الجزيرة بالله ما تجنب بيهو وتفتلو لي ناحية سياسية وبعد شوية ندخل في العنصرية وناس الجزيرة يا الحبيب انا احرص منهم عليك نتكلم عن مسائل اجتماعية ممكن تجدها في اي محل من العالم دخلت في محيط اهلي بحكم تجارب ومواقف لذلك تناولتها ما دخلنا في محل الزول البحب الرقيص كان دقت مزيقة الاخبار انقز فيها. شكرا جزيلا للزيارة
12-25-2012, 01:09 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
بطريقتك دى بتلحقنا قريبك بطالع فى موضوعك دا ولمن وليدك قال صلاح تفاح الضحكة فكت منى وبراى فى المكتب جنبى الاستاف بيطالعوا فينى بى شك . عموما شكرا ليك you make my day
ثانيا موضوع فساد البنوك خليتو لية دا موضوع كامل الدسم ولو هبشت موضوع الاستيراد بدون قيمة وعمايلو بتنور الناس وخصوصا اظهر عليك اشتغلت فى بيت الكلاوى جوةالجوة ذاتها بالمناسبة بالتجربة اى شخص يجى بى فيزا مجانا من الخريجين الجدد( يعنى فرش ما اشتغل فى السودان ) بيكون متسهتر جدا وبيعتقد انو مؤهلاتو دى ممكن تشغلوا بى وضع أحسن مليون مرة مماهو فية . تماما ذى البنت البتتخرج من الجامعة وعلى طول تتزوج بتكون مارضة راجلها ومغرورة وبتعتقد انو ذيها مافى وانو ممكن تجيب احسن من زوجها لوقعدت شوية ما استعجلت عشان كدة بورة السنة والسنتين بتصلح البنات وبتاهلهم يبقوا ربات منازل ممتازات. ذى صلاحك داالبشوت ضفارى كتار لكين بقع لى فى مرة اكعب منو وربنا يفك بورتو
محمد احمد سلامات يا وجيه اخبارك موضوع فساد البنوك متشعب ومنذ بداية ليل الانقاذ الاسود تمسك فيهو شنو وتخلي شنو ما تعرف عدم وجود الوعي المصرفي مشكلة ولخبتت الهيئة بتاعتم بوظت كل انظمة البنوك بنرجع ليهو تاني خلي الارشفة تنتهي . من طرائف شغل البنوك كنا شغالين في تمويل صغار المنتجين والمزارعين في منطقة نيالا وزالنجي وكما معروف المناطق القروية في كل السودان لا توجد ضمانات للتمويل وكانت السياسة التمويليه في تلك الفترة تعتمد علي ضمان الشيخ او العمده وتصحب هذه السياسة التمويليه حملة للتوعيه بدور البنوك والتعامل معها واسترداد الدين ودائرية راس المال بفهم ناس القري البسيط. مشينا لي قرية بعد الزيارة كم مرة واجتماعات مع الشيخ والكلام وقع ليهو كويس جمع لينا كل المرشحين لمنحهم التمويل مع تحديد النشاط وناسك قمة في الادب والاستماع لكلام الشيخ واثناء بداية الاجراءات الورقية وتوزيع القروش سامع الشيخ بتكلم مع واحد رخيت اضاني ليهو لقيت الشيخ بقول للزول الجمبو (( حكومة الله طرطشا زمنا ده كلو تاكل في قروشنا تاني بنرجعو ليهم القروش والله يحلمو)) حكومة الله طرطشا بمعني الله جننه في راسا وخلاها تغلط تدينا قروش.
12-25-2012, 01:44 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
هسي شايفة الايام دى قنع من الجكس بقى يكتب فى السياسة بعد اصيب بحالة فقدان الامل فى الجكس
وضاحة سلام زيارة الدكاترة خير وتفاؤل من دكتورة نجاة لي وضاحة النبي فيك يا وضاحة عدلتي شنو ؟؟ زولي والله كان ما مجبور عليهو كان سفرتو قبل كفيلو انتو حكاية السودانيين كسلانيين عندكم برضو جنننونا بيها السعوديين هنا وعاملين فيها كما بنكتو بيها ببياخة غريبه منهم مرة زميلنا سعودي جاني فرحان عندي ليك نكته خطيرة مرة يا عباس .... قالو في سودانيين شغلوهم في محل اثاث منزلي شغلهم بس انومو في اوض النوم عشان الزبائن اشوفو كيف استعمال غرف النوم في واحد فيهم جاء بعد فترة قال عايز اجازة .............. بالله في زمتك دي بضحك بياخة غريبه طبعا انا رديت ليهو قلت ليهو يا شيخ خلي النكته بتاعتنا انت وقت مشينا كورس لبنان نزلنا المطار قابلتنا اول شيء لبنانيه منتظرة ليها زول جاي لابسه فنيله ورداء زي بتاع ناس الكورة انت ما قلته (( أوفففففففففففففف من هنا بدينا)) اخير كسلنا و ل شغلكم البتسو فيهو. وضاحة شكرا ليك كثير
12-25-2012, 02:47 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
Quote: Nazik Eltayeb يا وجيه سلام فطيت كل الناس عشان الحقك وارد ليك المفترع بريء جدا بدون تاويل عشان ما تمسك لي في حكاية ناس الجزيرة بالله ما تجنب بيهو وتفتلو لي ناحية سياسية وبعد شوية ندخل في العنصرية وناس الجزيرة يا الحبيب انا احرص منهم عليك نتكلم عن مسائل اجتماعية ممكن تجدها في اي محل من العالم دخلت في محيط اهلي بحكم تجارب ومواقف لذلك تناولتها ما دخلنا في محل الزول البحب الرقيص كان دقت مزيقة الاخبار انقز فيها. شكرا جزيلا للزيارة
لا شكر على واجب..... و المفترع ليس بريئا تماما او على الاقل هذا ما يمكن ان نستشفه من هذا البوست الا ان تكون كبوة وهنا يتوجب الاعتذار ويجدر بي ان اوضح الاتي: اولاً هذه المشاركة لتنبيهك ان ماكان مقبولا فى الكتابة في الماضي لم يعد مقبولا اليوم وقد كان ممكنا فعلا ان يكون هذا البوست لطرح تجارب و مواقف اجتماعية و مناقشتها بموضوعية لولا الاصرار على الاستخدام المتكرر لالصاق مواقف فكاهية بجهويات معينة (لقد سئمنا هذا النوع من الظرافة غيرو) ثانياَهذا منبر عام اذا طرحت اي مشاركة من حق الجميع الرد عليها فلا تبتئس بما كانوا يصنعون و طول نفسك . ثالثا: عبارات مثل تجنب بيهو و تفتلو ...الخ لن تجدي عندما تكتب شيئاً يجب ان تتحمل كل الردود التي يمكن ان تاتيك احببتها ام كرهتها رابعاً: احرص مننا كيف ؟ بوستك اوضح عكس الحرص تماما خامساً : قلت (ما دخلنا في محل الزول البحب الرقيص كان دقت مزيقة الاخبار انقز فيها) وقلنا So you think you can dance.
التوقيع نازك بت الطيب
12-25-2012, 03:01 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
ياعبس أسمح لي اضيف من ابداعات اخونا سجيمان في شأن العرس سنة الفين وخمسة فقعنا بالضحك هذا السجيمان من شدة كتاباتو الحلوة
Quote: الليلة غايتو.... يمرقني منك سيدي الحسن يا دا البوست...... العوض ود اب قناية.. ...صاحبنا شديد.... طويل عندو شنب كبير...ما مستعد يتنازل عنو ابدا....حتى لو بدلوهو ليهو بي بيت في المنشية....... ختب....وعرسو بعد شهرين.....جاني من دغش الرحمن.....ودق الباب فتحتو ليهو.....زولي باينة عليهو الخُلعة.....والخوف...... قعد في طرف السرير وشايل هم كبييييير...... اديتو موية شرب..... قال لي يا سجيمان اقعد انا دايرك.... قلت لو سمح...... بدأ ينضم:- "سجيمان انا باقي لي داير انط من العرس.....وما داير اعرس تاني لي يوم القيامة...... يا سجيمان بعد الحصل لي اظني انا والعرس اتفرقنا فراق الطريفي لي جملو..... مشيت بيت البكا البارح يا سجيمان...وكنت بايت هناك..... متل ماك عارف ناس البكا بي يرقدو في الواطا....رقدت في الواطا... قريب من الادبخانة......وانا في عز نومي احلم ويجيني ابكباس.....انا بين نايم وصاحي اشوف سعد الله الطهار..... بتعرفو؟؟؟؟ سعد الله القاعد يطهر الوليدات...... اشوفو واشوف معاهو اتنين... يمسكوني من كرعي واتنين من ايديا.... وسعد الله قعد يطهر فيني. ما بي موس... بي مُنجل يا سجيمان.....وانا يا سجيمان اكورك" سعد الله..... الله يهديك.... سعد الله خاف الله... سعدالله يا زول اصبر... انت ماك مسلم يا زول؟....سعد الشي مو كدي.. الشي ما بيقطعوهو من قعرو......سعد الله خاف ربك انا قدامي عرس..... يا زول انا خاتب.....اهااااااا؟ ..ماشي لي ورا وين يا سعد الله.....؟.. النضم. دا عيب... بعد العمر دا؟.........يا سعد الله اصبر يا زول استهدي بي الله......... يا ابو مرووووووووووووا.... يا ابو مروووووووووووا..... اها مع كوراكي د ا الناس صحت....... وجو صحوني وقالوا لي يا ود ابقناية قول بسم الله........صحيت يا سجيمان لكن برضو حاسي النضم ما اياهاو... برضو في شي بي تنغمش وتصوط جوا....واجري علي الحمام..واملص الجلابية...واملص اللباس..... ويا سجيمان مرقن من اللباس جندبتين.... الجندبات اتاريهن جن من الادبخانة و دخلن في الجلابية ودخلن بي كراع اللباس......وسرحن ومشن هناااااااااك ...وانا نايم......مشن هنااااااااك ...وقعدن يصوطن في صواطتن وينغمشن..... وصادف حلمتي بي سعد الله الطهّار.. انا اشوف الطهّار شغال والجندبات اتاريهن يفرفرن وينغمشن ويصوطن..وانا قايلو سعد الله قاعد يطهر........يا سجيمان انا الفيني كملت طب......وباقي لي قعدت اباطي والنجم......وبعد البشتنة والنضم دا مافضلت فيني شي....دحين من دربك دا تقوم تمشي تكوس البت دي.... ختيبتي ....تكوسا سما واطا.......وتقول لها ود ابقناية قال لك كوسي لك عريس غيرو.......وعافي لك لله والرسول...."......مشيت كوست لي ختيبة ود ابقناية..... شافتني قالت لي" ربنا جابك يا سجيمان... تمشي لي ود ابقناية تقول لو يكوس لو مرا غيري....انا والعرس اتفرقنا"........ اتحيرت في نضم البت......وفي سري قلت يا ربي...... برضو يكونن جندبتين...... صاطن بت الناس دي ولحقنها ختيبا........الجندب دا ما شاف لو شغلة غيري ود ابقناية وختيبتو؟.......
واحد من اصحابنا حظه بايظ هو بين مكاتب الترجمه و النوم ، في يوم واحد قال ليه اقع التدريس القروش بالكوم ، عرض نفسه لهذه الشغلانيه بعد طول عناء وصبر مع العطال ، المقاوله كانت كالاتي : اذا نجح الولد في الانجليزي تاخد 5 ألف ريال ، يوم النتيجه ، ذهب لمنزل الطالب لمعرفه النتيجه في الامتحان ، و من حظه العاثر وجد ان الطالب توفي لرحمه مولاه قبل يومين ، رغم حاله الحزن في بيت المرحوم ، قربنا نقول لوالد الطالب ادينا القروش ، لانو الطالب نجح .
والله هذه القصه صحي صحي
الزبير
الزبير يا حبيبنا سلام المعلمين خاصة الجدد بتاعين ثورة التعليم مشاكلهم كثيرة هنا واحد خريج تربية انجليزي عامل فيها منقطه جاي بي فيزا تربية مواشي بعدين عندو كبرياء غريب لو عايزو اشاكلك قول ليهو مهنتك شنو الجاي بيها قبل ما تم السؤال تلقي علالتكم في السماء قدر ما يدخل ليهو معاينه تطرشق منو. يازول الحاصل شنو في المعاينة ؟؟؟؟؟ اقول ليك اولاد بومبا ((المصريين)) بريحونا اي معاينة تلقاهم زي المطر. الظاهر بقع مع المصريين الجدد ديلاك الواحد اقول ليك ..... يا بيه رباط كزمة ((جزمة)) سعادتك كفتة فرحي .... يا بيه شخابيت اولاد سعادتك في الكراس تخطيط مستقبلنا. عشان أحل ليهو مشكلتو قلته ليهو: امشي اسواق الهرم اشتري ليك بدلة بي 150 ريال للمعاينات وكمان شوف ليك فتيل عطر من بتاعات الخمسه ريال بخها وانت داخل للمعاينة برضو اشتري ليك نيفييا كريم للوجه والشعر عشان الغبشه تروح منك. بعد صنه واسترجاع الكلام قال لي: البدله ما بناباها تب الريحه يا زول زيادة خير كان قلته بروة صابون بالحيل النظافة سمحه الا الكريمات انت داير اقولو علي ما شادي حيلي افو أنا اخوك يا خديجة إن ارجع خايد البحر الكريمات ما بعتب عليها.
12-25-2012, 11:18 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
عباس الدسيس سلامات وضيوفك بوست متعه , لكن مصيبتنا في البوستات الزي دي لازم يجيك خاشي واحد من المثقفاتيه المعقدين ديل وينتف ريش البوست بي جهويه ومحوريه وعنصريه وحنطوريه ,ياخ انتي الاداك الحق منو عشان تتكلمي باسم اهل الجزيره اساساَ .
12-26-2012, 06:50 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
هدية ليكم حكاية سواقين العوائل كتبتها قبل فترة طويلة باحد المنابر وانتشرت عشان ما اجي واحد انطي لي بي حكاية مسروق ممكن كمان تتلقي باسم عباس الشريف للتنويه
رياضة المشي من الرياضات التي تستهوي الجنس اللطيف البكون يومو كلوا ضارب النوم خوفا من السمنه والامراض العصريه ناسا جسما مندي ما زينا كده في الجري وراء الرزق وقت اصل البيت حيلو مهدود يكون عايز ليهو رياضة يوجا للاسترخاء بعدها ياخذ ليهو نومه دي حالتنا احنا بتاعين الدوام في البلد دي . توجد شوارع في الرياض تم تخصيصها لرياضة المشي شوارع متعه تلقي مع كل ناصيه محلات للمثلجات والكوفي شوب كمان مواقف سيارات واماكن جلوس للسواقين مساطب اسمنتيه . انت ماشي شغاله في راسك مكائن مياه البخار البارد فيها نفحه هواء مخلوط بدعاش متعه زي نهاية المطره مع الهمبريب في السودان. كل مره بجي بالشوارع دي بشوف غالبية الناس البتريضو نساء ده كان قبل الزواج افتكرت النسوان ديل بمشو عشان الولاده غالبية النسوان سمان ما كنت بدقق في البطون للانشغال والسرعه . بعد الزواج بفترة خشيت في طلبات البلوم وجع الراس المدام ليها الرغبه في التمشي حست وزنها زاد مشينا لشارع الحمل زي ما مسميهوا انا وبعض الناس الما عندهم علاقه بالحياة الاسريه باعتبار زمان طبعا اكتشفت مافي علاقه بين الاسم والشارع ، يرتاد الشارع من يبحث عن الرشاقة من الجنس اللطيف والرشاقه هي نوع من الجمال . وقفت العربية بتاعتي مع الارهاق حيلي مهدود قلت اشوف لي محل اجلس فيهو مشيت علي سواقين العوائل اتونس معاهم لما بلومتي تخلص المشي. الونسه مع الاسيويين صعبه لعدم الفهم تلقط كلام يحتاج مجهود ذهني ربعو عربي ونصو انجليزي والتمومه اسيوي ربنا هداني علي سوداني قلت احسن شيء ولد بلد قعدنا نتونس سواء: سألني الاخو من وين؟؟؟ قلت ليهو من مدني.... قال لي ها زول أنا من شرق مدني ياكا زولنا لكن ياخوي في ناس كدي تلقي من سابع دليب اقول ليك من مدني كلنا في البلد هنا سواء من وين عليك الله ....... عشان الونسه تكون ساهله قلت ليهو قول من الجزيره، قال لي ... ها زول ها الجابرك علي الكذب شنو كلنا سواقين الحريم ديل الله اقبحم.... بتكلم معاي جات حرمه ماشه نحيفه سكت الراجل بعد فترة قال لي انا شغال مع الماشه دي زي الشهفوفه الحروم السمان بمشو عشان انحفو الداهيه خليقتا تشبه السخل ماشه عشان تبقي شنو قنايه لكن نقول شنو رزقنا نحرسا لما تتم تنططا بي الكبك المتجبصه بيهو تنقذ اتقول صبره بعد تنتهي نمشي لي غرفتنا ارزاق يا ود الاخو ، أها نكسر الزمن يا الاخو بالونسه انت زولتك انشاءالله كويسه معاك. ؟؟؟؟ قلت ليهو والله يعني نص نص.. أسمع إنت وقت زهجان منها ما تخليها الجابرك شنو؟؟؟؟ زولنا اخذ ليهو تململه وقعد كويس قال لي شوف الناس ديل عندهم مزرعه قدر ما حاولت امشي اشتغل فيها مالقيت طريقه كمان عندهم اسواق مواد غذائيه دي جاجيتم فيها لمن الله غفر لي مالقيت طريقه قلت لي زوجها انا زهجت من الشغله دي اديني نقل كفاله ولا اعمل لي خروج نهائي الراجل طيب بس الكلام ما عندوا عند الشهفوفه دي بلد يا رسول الله النسوان مكتفات الرجال تكتفتا صعبه بعد كترت عليهوا الكلام زنيت ليهو في اضانو الظاهر مشي شاور الشهفوفه قال لي خلاص انا عندي فيزة سواق سوداني شوف لينا واحد استلم منك إكون زيك كده انا بوديك الاسواق يعلم الله من الفرحه عايز اطير.... عندنا وليدا لي اخونا شغال في لوري طوب في البلد حالتو بي البلا قلت نجيبو هنا الولد مسكين ابوهو عدمان التكتحو وشغل الضحويات عوج ضهرو رسلنا ليهو والحمد ليك يا الله الراجل جاء مشينا استقبلنا في المطار اتقول مطلعنو من دوكه الليلت عواسه والتفه زي الشيطان والرقيبه ممصرنه بالله تقول تقره ضاربا ابنيني والعيونات مجحرات غاتسات تب من نور المطار الكثير الجنا تقول ابو الرقيع اتصادد من النور بي يدو ، مشينا البيت جيهتو بي الحمام نضفتو وحلقت ليهو التفه بعد ما طلعنا ليهو الاقامه والرخصه انا ودوني الاسواق .عليك امان الله ما قعدته لي شهر الشهفوفه دي اتصلت بي قالت لي تعال الحين... الخرااابه الحكاية شنو!!!! مشيت قلنا نشوف الحاصل شنو ما اكون الوليد ده جاب لينا مصيبه مع الحرمه دي ضقلا اكركب وقتين قابلت الحرمه قالت لي الجبتو ده ما عايزنو....هي يا بت الحلال استهدي بي الله الحاصل شنو قالت يلا روح استلم منوا المفتاح.... مشيت اشوف الحاصل سألت الوليد ياولد انا عايزك تنفع اهلك ابوك كل خريف متشعلق في صفيحه إزبل في اللوضه لما يوم اقع اكسر كراعو جيبناك تشتغل هنا كان تعمل ليك اوضة طوب احمر وتعرس لي روحك المشاكل العملتها شنو؟؟؟ الولد قال لي: بعد اديتني المفتاح كنت بمشي مع السواق الهندي في الشوارع كلامو شتر شتر أهاااااااعرفت اسوق والمحلات البدور تمشي ليها ام عصيبات زولتك ، يوم انا نايم المغربية جاتني تتلوح زي المسواك قالت لي ما تمرق معاي بي لبسك ده لازم تلبس ثوب !!!! قالت افو انا اخوك يا امنه انا البس ثوب عليك الله المرأة دي ما مطرطشه.... عليك الله شوف الجنا ده ها زول المطرطش انت وكمان مطوفش التوب هنا يعني جلابيه يا الاصنج الما بتفهم... هي لكن جماعتك ديل خلوني افهم المرأة أم عصيبات زعلت مشت مني جاني الراجل شايل جلابيه بي لياقه او معاها شيتا كدي بختو في الراس او معاهو حبل اسود قال لي البس ديل بكره قلنا طيب.......... ثاني يوم لبستهن والله الجلابيه وقتين شفتها في المرايه قلته الجماعه في السودان كان شافوني اقولو عثمان ود طه بقي خائب جلابيه بي لياقه وضيقه بقيت زي الصارقيلا ختيت الداهي الاحمر في الراس معاهو الحبل الاسود ها زول بقيت بس زي الطيره ام قدوما احمر قلنا طيب اكل عيش نعديها ليهم بعد يومين جابو لي الداهي ده قالو لي إن اتصلنا عليك تشوف النمره ما ترد علينا كان انت في البيت تطلع لي بره عندنا مشوار يعني الجرس وقت اسوي ررررررررننن انا ابقي لي بره اها ام عصيبات حمتني النوم الليل كلوا ررننننن عليك امان الله زهجت منو رميتوا ليك في الجك الليل المويه ده جمبلغ جمبلغ كضم كضمت حبوبتي ديك او نمت نومي قفلت اللوضه الزي بيت الحمام دي او نمت تاني يوم قايلني طشيت أطش وين عليك الله في بلد الطرش دي كلها لافتات زي لعبة الثعبان وقتين صحيت من النوم جاتني المرأ النجاضه دي تكورك وللل وللل قلت ليها ما تصني راسنا بي كوراكك ده مرقت ليها الموبايل قلت ليها الداهي ده خرب خربااااان يا وليه والله خربان دي فهمتا ليك جري اها ساقوني مشوار بعد رجعت جاتني شايلا ليها واحد تاني قلت في سري الناس ديل نتحلا منهم كيف (( احلني الحلا بله)) لكن والله كان ارمي ليها في الجك تاني عليك امان الله ما قعدنا شويه أنا افكر في الخلاص منهم الداهي ده رن رنننننن لمان جفلته نطيط نطه اتقول عضاني دبيب قالو طالعين تاني طلعنا لي حفله في قصر (( صالة الافراح) وقفت العربيه قدام القصر المرأة أم عصيبات قالت لي انزل افتح الباب قلت امكن الباب عصلج معاها باقي لي لوري حمد ودالزين بتاع الطوب مرات بعصلج نزلت فتحتو لقيتو زي الباسطه الحريم كلهن اعاين لي تاري الباب ما معصلج افو المرأة استقفلتني والله زعلت زعله انا قاعد منتظرم لي الساعة اربعه صباحا قاعدين مع السواقين كاضم خشمي ده بقم ما قالا ما إتونست معاهم من الزعله والسواقين الرطانه في اضاني تقول قعونج، وقتين جو طالعين مع جوطة النسوان وقفت لي زي الصنفور قالت لي افتح الباب!!!! قلت ليها افو انا اخوك يا امنه افتح ليك الباب انا امي دار النعيم في لوري الطوب ما بفتح ليها الباب افتح ليك انتي......... أها ده كلوالحصل. اتملم صاحبنا في القعده من الجلوس علي حجر الاسمنت قال : الوليد طلع انجض مني والله حسي شغال في الاسواق بقي زي التور من اكل الطحنيه وأنا موكح بالمرأة الشهفوفه دي. في اللحظه دي جات المدام بتاعتوا زولنا قام فتح ليها الباب مع السلامه ما قالا لي........
12-26-2012, 08:09 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
شكراً ليك ياخ وانت تتحفنا بهذه الحكاوي الجميلة واصل يا حبيب على ذات النهج
دعوة للقراءة لمن فاته قراءة البوست
يا باش يا وجيه اخبارك شكر ليك انت يا امين للمتابعة كيف بالله فك الكرفته ما عجبتك شوقنا يا باش زمان قريب احساس البعد بالله خلانا التلفون ما نرفعو غايتو بنجابد بي هنا وهناك تحياتي للاسرة الكريمه
12-26-2012, 09:38 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
Quote: عباس الدسيس سلامات وضيوفك بوست متعه , لكن مصيبتنا في البوستات الزي دي لازم يجيك خاشي واحد من المثقفاتيه المعقدين ديل وينتف ريش البوست بي جهويه ومحوريه وعنصريه وحنطوريه ,ياخ انتي الاداك الحق منو عشان تتكلمي باسم اهل الجزيره اساساَ .
ابو القاسم يا وجيه سلام وتحايا عرفته لي زول رائع طبعا ما اروع منك الراجل ثقافتو عالية جدا نوع الثقافة البتخليك مشدوه الذهن الصدف ساقتني لي زيارة في بيتو الراجل عندو مكتبه لو فرشها في السوق اعيش منها كل ايام حياته تعال شوف شي ديالكتيك – الاقتصاد السياسي - أصل العائلة والملكية الخاصة والدولة – راس المال ، باختصار ممكن الزول اكون محاضر في مدرسة كادر للحزب الشيوعي. فعلا كنت مبهور بثقافته وفي احدي ليالي السمر قابنا زول عكليت دخل مع الراجل في حوار العكليت كل ما بين الفواصل يخاطبو بيازميل في النهاية الراجل طلع ما زميل!!!!! قلته والله كنت مفتكرك عضو حزب شيوعي ؟؟؟؟ قال لي شوف يا عباس انا زول مطلع ايوه احب الثقافة ايوه بس حكاية السياسة السودانية الكيمان كيمان صعبه علي بعدين حكاية يا زميل انضبط ومن زول اهبش سجارتي الخضراء بتاعت المزاج فراق الطريفي لي جملو ...... وجه نظر زول شايفه ما كعبه.
ثانيا: اول الانقاذ كان الوالي في مدني اسمو العوض صادف هنالك لاعب باهلي مدني اسمو العوض زول فرفاره جراي جري بلعب جناح الكوره من الباك بطلع بيها بالاوت الجهة التانية والعوض الوالي بحضر مناسبات الكاسات وناس مدني بتاعين محن دخلت الوالي الاستاد الناس تكورك (( العوض – العوض - العوض – العوض)). لينا خال اتحادي مؤثر جدا في الحزب الراجل يحب تصاديق الاكشاك زمن الديمقراطيه بس لو لمو الاكشاش الاتصدقت ليهو تعمل سوق شعبي!!!!! الانقاذ بداياتها كان في ناس مجهجهين يا ربي الناس ديل شنو طلعت اشاعة الوالي العوض اتحادي خالي ومعهم الجماعه حارسين الولاية لمقابلة الوالي والسكرتير اوزع فيهم كل يوم بسبب وعينهم للوالي طالع ونازل فيهم وقت زهجو خلاس يوم الوالي جاء ماشي فيهم واحد منهم عمل ما بعرف الوالي قال ليهو انت شوفتا الوالي بتاعنا رد ليهو ياهو الماشي قدامك ابجعبات دهاك!!!! التفت الوالي ليهم يا علوق القال ابجعبات منو (( علوق استبدلتها ليك عشان المفترع ما امشي الخور)). خالي قال للجماعه هوي الحكومة دي والله حقت كيزان الزول ده طبلية ما بديكم ليها خلي كشك الجماعه ديل بياكلو براهم امشو شوفو شغلتكم. يا الحبيب حكاية المثقفاتية البقشوك بي كرعينهم الاثنين وبتلبو بي ضهرم تبقي معاهم مسي و ل رونالدو. الف شكر يا حبيبنا.
12-26-2012, 11:42 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عباس الدسيس
حيدر حسن ميرغني
الزبير بشير
نادر النور آدم
Mohammed Ahmed Saeed
وضاحة
Elsanosi Badr
Nazik Eltayeb
الامين موسى البشاري
Abuelgasim Mohamed
فيس بوك
تويتر
انستقرام
يوتيوب
بنتيريست