أيهما أفضل: بناء منزل أم شراء منزل جاهز؟

Quote: أعتقد أن البناء أفضل من الشراء لانك بتبني المنزل بالطريقة الانتا عايزها ، شكل البيت ، عدد الغرف ، الخارطة وخلافة. بس عشان تبني لازم تكون موجود حتى تتابع برنامج البناء ، المواد والأسعار و جودة وسلامة التنفيذ. أما إذا إنت غير موجود فأحسن تشتري عشان ما تحصل ليك قصة المغترب أللي بيرسل قروش لقريبه عشان يبني ليه البيت وقريبه بيضرب نص القروش ويبني بالنص التاني والموضوع جاري لحدي ما أخونا المغترب فقد عمله. ضرب المسكين لقريبه في السودان وساله البناء واقف وين؟ قريبه قال ليه مترين والعرش، صاحبك المسكين قال ليه أعرش على كدا أنا جاي.

Quote: ما عندي تجربة شخصية .. ولكن على حسب ما يتناوله البعض .. الأفضلية لشراء منزل جاهز ... والسبب: تكلفة أقل

Quote: شوف ناذر الخليفة يااشرف ممكن يدك النجيضة ..... تحياتي .......

Quote: اشرف مشتاقيين نصيحة من أختك بعد عانت مع والدها ما عانت من املاكن فى السودان لا تشترى ولا تبنى فى السودان لو عندك فلوس ابنى فى اى بلد فى العالم ماعدا السودان حا ياكلوك لما تقتنع ظاااااااااااااتوا لو بنيت ول اشتريت ما تضمن البيت يكون مبنى بمواصفات جيدة وبعدين ياخى السودان شنو الفيه هسي مشجع علشان تبنى وانت عايش فى السودان الحين انا بندهش لى العقول البتفكر بطريقة دى انت حياتك فى انجلترا واسرتك هناك وما افتكر يوم حا ترجع تعيش هناك ليييييييييييييييييييه ترمى فلوسك فى بيت علشان تمشى مرة فى السنة عالم غريب نحن بنبيع فى املاكنا فى السودان فى الخرطوم 2 الخرطوم شرق الخرطوم 3 الخرطوم 1 وجبرة والصحافة والرياض لو عاوز بيت ولا شقة قول لى عوووووك بس ترسل لى دولار ابو صلعة فى الحساب شرط اساسي

Quote: انا ما عندى تجربة وما عندى قروش عشان اجرب ولو عندى قروش ما حابنى بيت وحاشترى لى قطعة صغيرة المساحة وابنى فيها عشرة دكاكين واقوم بتاجير الدكاكين افتراضا بعشرين مليون واستاجر بيت بمليونين واعيش بجزء من الباقي واستثمر الباقي فى بناء شقق علوية للسكن لاحقا ويا دار ما دخلك شر! خلونا نحلم

Quote: وزي ما قال ابوعركي (تجربة خطيرة جد و.....)؟؟؟

Quote: سلامات للجميع البيوت الجاهزة غير مضمونة المواصفات خاصة وأنه فى الفترة الأخيرة اتجّهت معظم إستثمارات رأس المال نحو شراء الأراضى ... البناء فيها ثم بيعها جاهزة ... وبالقطع الربح يكون مُنشارياً... وغالباً مواصفات البناء تكون questionable وحتى لو سلِمت فإن التجهيز الـ Finishing يكون تجارياً للطيش ... أفضِّل القيام بالبناء ... وقد ابتكر المغتربون سياسة جديدة: تجى شايل قروشك ... تبدأ البناء حسب (قروشك/ زمن إجازتك) ... وترجع وقروشك فى جيبك ... لتفادى المقالب .... لن تتأثر بإرتفاع الدولار أو زيادة سعر السيخ/ الأسمنت لأنك مُقيم خارج السودان... الأهم: سيكون متاحاً أمامك الإستثمار ..... ثم تجهيز المنزل بالمواصفات التى كنت تحلم بها( طبعاً أقصد الحكومة)....

Quote: أمسك في كلام الطيب دا قوي ! أغلب البيوت الجاهزة المعروضة للبيع تكون من تنفيذ تجــار ، قد يكون شكل المنزل جميلا والخرطة جميلة .. لكنك لا تضمن المواد المستخدمة ، وطريقة البناء .. صدقني لو قلت ليك إنو أغلب البيوت دي بيتم تنفيذها ، وتشطيبهاتماااما في أقل من شهرين ! بعدين أغلب المشاكل بتكون في حاجات اساسية .. الكهرباء ، والسباكة ! .. توصيلات السباكة المواسير المستخدمة ، طريقة حفر البئر ، السابتنك ...الخ ،، دي روح البيت وممكن تفقدك البيت كلو !! أنا عندي تجربة شخصية في الحالتين .. صدقني أحسن ليك تبني براااك .

Quote: إذا كنت خارج السودان و ما في حوجة للمنزل الأن فلا تشتري بيت جاهز و لا تبني بالمراسلة. القروش الداير تشتري بيها البيت الجاهز أشتري بيها كم قطعة أرض كده (بشرط تكون شهادة بحث). الكم قطعة أرض ديل بيحفظو ليك قيمة القروش و أسعارهم بتتضاعف مرات حسب وضع السوق لكن ما بخسروك كلو كلو. متي ما قررت العودة النهائية و الإستقرار في السودان، أجر أحسن شقة لمدة سنة، خلال الفترة دي بيع واحدة من القطع و حتبني بيت علي أحسن ما يكون و أهم شي بتكون متابع كل شي بنفسك. أما إذا كنت متواجد بالسودان فالأفضل تبني بيتك بنفسك و ما تشتري بيت جاهز إلا من زول بتضمنو و يكون بناهو لنفسو عشان يسكن فيهو و لظروف معينة داير يبيعه. Good Luck, you will need it

Quote: البيت ذاتو جليهو ... قول لي ليه؟ -اشترى ارض فى حتة بعيدة كدة - 50 مليون ..عشان الناس تسكت منك... -وابدأ اسكن فى الرياض بالايجار = شفة ب 2 مليون * 12 شهر = 24 مليون* 20سنة = 500 مليون - بعد عشرين سنة قطعتك تكون فى قلب البلد سعرها يساوى = 500 مليون - عشرين سنة = ساكن مجانى لو داير تشتت من السودان بعد 20 سنة - قيمة البيت الحاتشتريوهو او تبنيهو فى الرياض = 2-3 مليار - افرض انك سودانى ساكت...يعنى كسلان وكدة = ختها فى البنك الاسلامى الفلاني كصكوك *10%= 200 مليون كل سنة ربحانة معاك ...والا ماربحانة؟

Quote: الاخ اشرف والأخوة المتداخلين الكرام رغم اهمية السؤال الا ان الواقع يقول بانه لا يمكن الاجابة بشكل علمي ومؤسس على مثل هذا السؤال في السودان الان ليست هناك اي أسس علمية ومبررات تجعلك تفضل الخيار الاول خيار الشراء او ترجح الخيار الثاني خيار البناء كل شئ ماشي بطريقة ضربو رماه ممكن تكون محظوظ تحصل قطعة ارض في مكان كويس تحصل مقاول ود ناس بكل تحمل الكلمة وتدخل في مشروع بناء ناجح وتبني وتخلص وممكن العكس وتشوف نجوم النهار الى ان تخلص ده لو خلصت من اصلو وايضا ممكن تحصل فرصة لقطة وتشتري بيت جاهز ويكون تمام التمام وممكن برضو تتورط في مصيبة تقصر باقي عمرك في السودان كل الخيارات مفتوحة كل الاحتمالات واردة انت وحظك لو بقيت محظوظ لمن تجر على السبعة لتؤكل وسويسرا البقولو ليك الهامك

Quote: انا بشوف انو الواحد يشوف ليهو قطعة ارض ويبنيها بي نفسو وبي مزاجو احسن وافضل وبرضو اقل تكلفة .. لأنك ما بتضمن انو البيت الجاهز البتشتريهو ده يكون ما فيهو غش في المواد .. تشتري وبعدين تتجهجه وتسف التراب .. ابني في سنة ولا سنتين ولا حتى خمسة سنين الاهم انك تبني بيتك بي نفسك .. الله يعينك والله ..

Quote: أيهما أفضل: بناء منزل أم شراء منزل جاهز؟

Quote: الأفضل دون شك - أن تشتري قطعة أرض حسب إمكانياتك ورغبتك - أن تعهد بالتصميم لمكتب إستشاري ذي خبرة فيصمم لك المنزل حسب متطلباتك ويضفي عليه اللمحات المعمارية حسب علمه وخبرته - أن تتعاقد مع مقاول معروف لتنفيذ الأعمال تحت إشراف المكتب الإستشاري المصمم / الإثنان خاضعان لمتابعتك الشخصية أو من ينوب عنك على المستوى الشخصي ورغم إزدحام مفكرتي بأسماء مهندسين زملاء وتلاميذ في المهنة يعملون في سوق الإنشاءات في الخرطوم إلا أنني قد نفذت منزلى بنفسي بطريقة مولانا أبوبكر أبو القاسم - على مراحل في الإجازات - مع جزيل شكري لكل الزملاء والأصدقاء المهندسين الذين قدموا لى المساعدات الكثيرة مثل ترشيح العمالة الماهرة ، تأجير المعدات ، تعريفي بتجار المواد ، ........... ___________________ الخلاصة الإستثمار العقاري في السودان أمامه سنين ضوئية طويلة ليصبح إحترافياً

Quote: تراي مي ...!! منزل الشقلة .. 45 يوم التنفيذ والتسليم !!

Quote: هل أنت مستعجل للبيت؟؟ هل هناك شخص متفرق لك فى حالة غيابك ومؤتمن؟ وإذا أردت أن تذهب بنفسك لابد أن تعمل مسح للسوق لكل المشتريات والعمال. عدم ألأستعجال لحاجاتك أو إشعار العمال بأنك مستعجل لحاجتك على طول بزودوا ليك الحاجة. هناك متغيرات فى ألأسعار يجب وضع هامش سعر لها. مراعاة المواسم التى تريد أن تبنى فيها..مثل الخريف الطوب بزيد... ربنا يوفقك ويسعدك ويهنيك وتحياتى للجميع.

Quote: عمار دا نسي مغايص المستأجرين وكسيرهم وهروبهم بدون سداد؟؟؟

Quote: الأخ الكريم أشرف موضوع شراء البيت يجب أن يخضع إلى مواصفات فنية ورأي إستشاري فني بحت ومن ثم يتم تقييم العقار بعض الناس يشتروا البيت ولكن تكون هنالك أحوال طبيعية غير منظورة unforeseen phiscal conditions مثل وجود بئر مياه ولذلك يتعين أخذ مشورة فنية من جهة ثقة وبالأضافة إلى التأكد من الوضع القانوني للعقار موضوع الشراء والبيع ومن الناحية العملية قد يكون البيت الجاهز تم بيعه لإضطرار البائع للسيولة distress sale ولا توجد به عيوب إنشائية كقاعدة عامة شراء العقار يتطلب التالي : 1- الجانب القانوني والتأكد من شهادة البحث وصفة البائع والمشتري وأهليتهما وخلو المبيع من الموانع القانونية ( ورثة , حق شفعة , نزاع قانوني سابق , هبة الخ ) 2- جانب فني يتمثل في خريطة البناء وعقد البناء مع الإستشاري والمقاول مع المالك الأصلي 3- جانب تجاري يتمثل في معقولية السعر مقارنة مع مثله من العقارات وكل هذه الأمور تتطلب ثلاثة أضلاع ( وجود المشتري أو وكيل ثقة ووجود رأي فني لتولي الجوانب الهندسية والإنشائية ووجود محام للامور القانونية وسمسار عقارات يعرف الأسعار جيدا وبالبركة إنشاء الله

Quote: ابو الشروف ..... حليل ايام المؤتمر ليك وحشه وشوق والله من اللقاء العابر ذلك ولم نسعد بالتواصل .. عساك بخير واسرتك الطيبة طيبة. تجربتي الشخصية تركت الاراضي التي امتلكها علي شاطئ النيل واشتريت شقة جاهزة حتى أتفادى كل ما ذكره الأخوة من مخاوف ووجع قلب ورأس. اشتريت من شركة الفيصل العقارية في مشروعها السكنى الاول ( برج الفيصل الاول ببري) وهو في موقع ممتاز ويطل على شارعين كبيرين مع معرض الخرطوم الدولي وكنت قد علمت بالمشروع عبر معرفة خاصة وهذه الايام بدأ الاعلان عن البيع ( مساحات معتبرة ومصعدين وجراج سيارات تحت العمارة ومولد كهربائي وبئرين للتصريف) شوف الرابط أدناه http://www.alfaisalrealestate.com/studio.php?...0&totalRows_elbum=30 توجد ثلاث نماذج بمساحات مختلفة. ربما كانت خيار ونسعد بجيرتك كامل مودتي والأمنيات عبدالعزيز خطاب

Quote: النجيضة يا أشرف كـدا ووب .. وكـدا ووب

Quote: بناء منزل يعتبر مشروع ضخم لابد من دراسة حقيقية تحدد فيها بالضبط ما تريده من ذلك المشروع. وبالحسابات المادية البحتة ستخسر اذا بنيت او اشتريت جاهز لان العائد لن يتم استرجاعه في اقل من 40 عاما علي الاقل (منزل من طايق واحد لوود بيرنق في اي حي وسط (جبره - الفيحاء - الحلفايا ) في حدود 800 الف جنيه مثلا, ايجاره لن يتجاوز 1500 جنيه يعني 18 الف في السنة 720 الف في 40 عام) اما اذا كانت هناك حسابات اخري مثل الاستقرار فالافضل ان تبني لوحدك اذا كان في امكانك المتابعة الشخصية, اما اذا لم تستطيع المتابعة فالافضل ان تشتري جاهز وابعد من التجار, ومن اي منزل لم يكن صاحبه من قام بمتابعته بصورة شخصية. الموقع مهم جدا لكنه يتحدد حسب حوجتك انت ( مكان عملك المفترض, القرب من الاهل) لانو لو بنيت بعيد من مكان عملك او اهلك فستعاني معاناة لا اول لها ولا اخر مع زحمة الخرطوم وشوارعها السيئة وبنزينها الغالي. (معاناة شخصية بطلع من الفيحاء الحاج يوسف المغرب عشان اصل الوالدين في الثورة بسلم واقف وبرجع البيت 11 او 12 مساء ) عموما الكلام الاتقال من الشباب الفوق ده كلو صحيح ومحتاج تقراهو مرة ومرتين وتلاتة وبرضو تحسبها مرة ومرتين وتلاتة

Quote: وناذر الخليفة بيقول ليك شوفني هنا وشوف تجارب و بيوت البورداب الاشتغلو معاي

Quote: عن تجربة شخصية كلام الطيب الجاك ده أحسن كلام لانو حتى لو انت بنيت البيت في اجازاتك بالقطاعي عوامل الزمن و البيئة تؤدي الى اهلاك المنزل كما أن تقنيات البناء و أساليبه تتطور كل يوم عشان كدة احسن تحفظ القروش في اراضي و لما تبقى على البنا تبيعهم و تبني أحسن بناء تحت اشرافك المباشر على كل كبيرة و صغيرة