|
|
 قناة سنابل السودانية للأطفال.... يا فرحة ما تمت!
|
لما سمعته خبر انه في قناة فضائية سودانية للأطفال، طرته من الفرحة... وبقيت اكابس في receiver عشان أجيبها لأولادي... القناة لسه ما انطلقت، لكن قلت اكتب يمكن يغيروا رأيهم شويه...
المشكلة، انه القناة صعب جدا جدا جدا تنافس القنوات التانية! mbc3 وcartoon network وبراعم... محتاجين تبذلوا جهد اكبر ، ساعدونا شوية نقنع بيها أطفالنا... الجهد ما معناها عايزين كارتون زيادة.. لا، عايزين نكهة مختلفة تخلي الاطفال دي يقتنعوا بيكم...
فيها كم رسوم كده شكلها لزيز... سودانية جداً... منها "طبطوبة" حلاتها، اغنيتها ظريفة وشكلها سوداني ومبغبغة حلاتها وبي شعراتها... المناظر السودانية برضها حلوه شديد، دكّان الحلّة... الشجر واشكال البيوت... جدّو... البنات وهم بلعبوا حجلة...
لكن يا اخوانا ما عايزين لغة عربية فصحى، قناة "براعم" ما مقصّرة... وما عايزين رسوم عالمية (على قولكم)، mbc3 وcartoon network ما مقصرين... امسكوا لينا في اشكال اطفالنا الحلوين، ولهجتنا السودانية... الفصحى دي نهائي ما عايزينها...
للعايزين يعرفوا انا بتكلم عن شنو، ده تردد القناة...
قناة سنابل، في نايل سات، التردد 11677، Vertical، معدل الترميز 27500*
__________________________________
* http://www.delegnt.net/vb/showthread.php?t=33018
|
|
  
|
|
|
|
|
|
|
 Re: قناة سنابل السودانية للأطفال.... يا فرحة ما تمت! (Re: مريم بنت الحسين)
|
| Quote: امسكوا لينا في اشكال اطفالنا الحلوين، ولهجتنا السودانية |
آي والله عايزين لهجتنا بس.
وأظن أن القناة للمبدع معتصم الجعيلي، صاحب قناة هارموني التي لم تستطع الاستمرار بسبب - على ما أظن - قلة الامكانات
وحُسد الجماعة إياهم .
غايتو نتمنى أن تنجح المحاولات الجديدة في قناة سنابل.
تحياتي مريم.
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: مريم بنت الحسين)
|
الأستاذ عبدالحي و الأستاذة مريم
دعوني أختلف معكم هذه المرة في أننا نريدها لهجة سودانية فقط
قبل فترة يا أستاذه مريم سألتي عن كيف نخلي أولادنا يحبو القراية و طبعا دا موضوع أنا اكتشفت ليهو علاج بالصدفة
و لكن العلاج كان واضح جدا بعد اجراء مقارنات تفوق الخمسين أسره (شفتي أنا أخدت الموضوع بجدية قدر شنو؟)
النتيجة كانت أننا قررنا اعتماد اللغة الانقليزية في كل مناشطنا و ترك اللغة العربية لحصتي العربي و الدين و بدون التحرج من الفشل الأكاديمي فيهما
الاختيار للغة اللإنقليزية (و كان يمكن أن تكون الفرنسية لو كنا بنعرف فرنسي و ليست هناك مشاكل تعليم لوجستية في مكان اقامتنا) كان بسبب أن لغة الكتابة و القراءة
هي نفسها لغة التخاطب و لذلك يتساوى نفس الشعور و الانفعال لنفس اللفظ أين ما وجد، أكاديميا أم معاشيا
ستكون سنابل قناة ناجحة إذا اعتمدت الإنقليزية في جميع برامجها و إذا اتيحت لها الإمكانيات يمكن أن توفر برامجها باللغة السودانية و اللغة العربية أيضا و كل واحد يختار
اللغة البتريحو أو كمرحلية إلى لغة واحدة بين الكتاب و المدرسة و البيت
, اتفق معكم لو ح نعملها بالسوداني، نغير الكتب و المدارس و الجامعات للسوداني و إلا سنعاني مما نعاني منه كثيراً
شفتو كيف؟
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: malik_aljack)
|
مريوم سلامات...اها...و احنا???? نشوفها كيف القناة دة?
بعدين يا مغتربين الخليج بطلوا طمع..... شنو ما عاوزنها بالفصحى ???
طبعا لو لقيت شى بالسودانى تمام...لكن بالعربي برضو ما بطال
Quote: ستكون سنابل قناة ناجحة إذا اعتمدت الإنقليزية في جميع برامجها و إذا اتيحت لها الإمكانيات يمكن أن توفر برامجها باللغة السودانية و اللغة العربية أيضا و كل واحد يختار
اللغة البتريحو أو كمرحلية إلى لغة واحدة بين الكتاب و المدرسة و البيت |
عاد يا مالك الجاك...اتلومتا....قناة بالانجليزى دى نسوى بيها شنو???
الله يهديكم...علوزين قناة بالسودانى.....
و بالعدم بالفصحى
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: malik_aljack)
|
سلامات مالك الجاك....
شكرا جزيلا على الرد الوافى المنظم
كلامك صحيح 100 % .لكن...لازم اوضح ان رغبتى فى قناة سودانية بلهجة سودانية (نابعة) من نانية مفرطة. كيف ? انا عايشه فى بلاد الفرنجة. و عاوزع القناة عشان اولادى يصلحوا لهجتهم السودانية و يتعلموا سودانى.
اكيد القناة لو بالانجليزى ح تكون مفيدة جدا لاطفال السودان. لكن اطفال السودان (ذى ما قالت مريم) عندهم اكتر من قناة يتعلموا منها انجليزى. احنا المشردون فى الارض اللى ما عارفين نعمل فى اولادنا شنو!!!
فكرتك برضوا ممكن تكون كويسه لاولانا لو قلنا انهم ممكن يتعلموا منها الثقافة السودانية بالانجليزى. اما العربى و السودانى فربنا يقدرنى عليهم انا
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: smart_ana2001)
|
يا مالك الجاك وسمارت ... انجليزي شنو وفصحى شنو ياخ... ركّزوا معانا شويه...
يا مالك، القنوات بتاعت الاطفال باللغة الانجليزية على قفى من يشيل، لكن تعلّم اللغة والعادات والثقافة عن طريق برامج الاطفال اعتقد انها فكرة رائدة... احنا بنطمع انه اولادنا يتعلموا ثقافتنا وعاداتنا من اي مدخل ممكن... وناس سمارت ديل كمان عايزين اللغة واللهجة زيادة عليها... يا سمارت، القنوات الفصحى مليااااااااااااااانه، ما بتجيكم mbc3؟ او Cartoon network Arabia او قناة الجزيرة للأطفال؟ برضه ناس الجزيرة عندهم قناة اسمها براعم معموله لفئة عمرية اصغر شويه... ده كله فصحى... عندنا واحد صاحب محمود ولدي، يومه كله مقابل القنوات دي، الولد بقى يتكلم فصحى اليوم كله، طبعا اللهجة السودانية بتاعته مافي منها امل خالص...
بالنسبة لسنابل، هي لسه ما انطلقت، لكن لو حريفين يبثوها عبر الانترنت برضه، عشان الناس الزيكم كده...
الفكرة بالجد رائدة، بس ركّزوا لينا على اللهجة السودانية عليكم الله، دايرين قصص "فاطنة" السمحة والغول... وعايزين مسابقات وألعاب شعبية للأطفال...
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: مريم بنت الحسين)
|
سمارت و مريم..
كيفن تقولوا انقليزي شنو؟
طبعا متفهم تأثير القعدة مع الفرنجه و إحساس إنو نحن عاوزين نخليهم مرتبطين بسودانيتهم و أهلهم
و صدقيني...الحكاية دي ما دايره أكتر من إجازة مدارس مرة واحدة في العمر للسودان و الباقي تموهو سكايب و تانقو
لكن الانقليزي دا ما بيجي عن طريق الانتراكشن بسرعه زي الدارجي السوداني
سؤال أخير
إنتو دايرين بالفصحى دي شنو؟...أنا ما دايرها لي أولادي في السن قبل الجامعية
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: malik_aljack)
|
Quote: لكن الانقليزي دا ما بيجي عن طريق الانتراكشن بسرعه زي الدارجي السوداني
سؤال أخير
إنتو دايرين بالفصحى دي شنو؟...أنا ما دايرها لي أولادي في السن قبل الجامعية |
مريم....ما بتصلنا القنوات دى. احتمال القاها فى النت. لقيت دورا بالعربي.
يوم واحد بس و الجماعى دوروا "انا خريطة" ^-^
يا مالك الجاك يا اخى اولادى ما عندهم مشكلة انجليزى. و الفكابلرى بتاعتهم شوية كده و بتبقى احسن منى. مدارس و كتب مدرسة و كتب مكتبة و مناشط خارج المدرسة. حتى فى الجامعه بيرطنوا مع عيال المسلمين التانين بالانجليزى.
العربى و السودانى هو اللى ازمة عدنا.
الفصحة عاوزنها عشان لما يبدوا يقروا و يكتبوا عربى يكون عندهم فكرة عن الحاصل شنو
انت قايل فى سن الجامعة فجاءة كده ممكن يبدوا يتعلموا!!!!
لازم تبدا من بدرى
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: smart_ana2001)
|
أحترم و أقدر وجهة نظركما
نظرتي أكاديمية بحتة و لا علاقة لها بمسألة قبول أو رفض لغة محددة لذاتها
و للعلم فقط فأنا سألت متخصصين اجتماعيين و لغويين و حددت لهم أني عاوز الأولاد يعرفوا انقليزي و الدارجي السوداني
عشان مسألة الارتباط و التركيز على الأكاديميات
و الحمد لله بالاجازات و التواصل اليومي مع الأهل الحكاية لقيتها ظابطة جداً
إمكن أنا تفكيري في فكرة جديدة على الثقافة السودانية و هي ليست معنية بقناة تخاطب segment محدد من المشاهدين
كأولاد السودانيين الما بيعرفوا الدارجي و لكن الفكرة متركزة على عوامل كثيرة تصلح أن تكون بحثا أكاديميا لمن أراد أن يشارك
(بس قروش مافي)
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: malik_aljack)
|
اخونا مالك الجاك، ان شاء الله ما تكون فهمته من كلامي اني مستهونة بي وجهة نظرك... بالعكس، انا بقدّر الفكر المبني على البحث... بس اعتقد اننا بنتكلم عن الامور من زاويتين مختلفات... اولاد سمارت اختي دي بتكلموا انجليزي ما شاء الله عليهم، لكن هي مهمومة بإنهم يتكلموا عربي... أنا ولدي بتكلم الانجليزي احسن من اللهجة السودانية والعربي الفصحى... والسبب المدرسة.. وانا عايزه ليه الاتنين... مبسوطه بالحققه في الانجليزي، لكن عايزاه يجوّد العربي... صح كلامك عن انه اجازه في السودان واحده كافيه إنها تحقق الحاجه دي.. لكن برضه الاستمرار في ربطهم بواقعهم السوداني (لو اتوفر لينا من خلال القناة دي)، ما بناباه... انا في السعودية، وعشان كده هويته كسوداني مهمة بالنسبة لي... لانه القصة هنا ما لغة عربية وبس، بل لهجة وعادات وتقاليد...
سمارت لووووووووووووول، بركاااااااااااااااتك يا ست دورا... طبعا دورا هنا بتعلم الاطفال عربي وانجليزي، حتنفع معاكم خالص... قناة براعم دي كمان روعة... تابعة لقناة الجزيرة... وعندهم app حلو بتاع تعليم الكتابة بالعربي ... شوفي موقعهم
http://www.baraem.tv/
mbc3 هنا هي الtop.. واشترت حقوق بث برامج نيكولودين بالعربي... عندهم SpongBob و Dora و Jenny the Teenage Robot و.... وعندهم البرامج البي العربي... في رمضان كان عندهم برامج جميلة بتحكي عن السيرة النبوية ...
http://mbc3.mbc.net/
Cartoonetwork Arabia بتنافس mbc3 في تعريب البرامج الاجنبية بس ما عندهم برامج عربي زي الmbc3... كلهم برامج معرّبة..
http://www.cartoonnetworkarabic.com/
ان شاء الله تلقي طريقة تشوفوهم هناك عندكم...
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: مريم بنت الحسين)
|
شكرا جزيلا على الرد استاذه مريم
الحفاظ على الهوية السودانية يبدأ بفصل الأولاد عن البيئة المحيطة لو كانت ما سودانية
و أول خطوة عشان تعملي بيها حاجز من التأثيرات السالبة للثقافة المهيمنة في اتك المنطقة هي فصلهم عن لغة الحوار و المخاطبة السائدة
أنا أولادي في منطقة الخليج و من يوم ما اتولدوا لغاية الليله (فيما عدا الاجازات في السودان) ما بيفهموا إلا الانقليزي و بالانقليزي
و بذلك الحمد لله فصلتهم تماما عن البيئة التي لا أعتقد أنها ستضيف لهم شيئا (في الدنيا و الآخرة)
و بذلك أصبح لا تلفزيون، لا أخبار، لا لعب ، لا غنى، لا مديح، و لا أيي شيء يجعلهم يتأثرون بالجو المحيط
في نفس الوقت كنت مركز على موضوع الدارجي بالاجازات من الجانبين فقط لحفظ التواصل بالبيئة السودانية كاملة و لكن بمفاهيم تتجاوز الارتباط العاطفي إلى ارتباط روحي متحد في التوجه
و يمكن سمارت وضعها مختلف...لكن كتير من الناس القاعدين يجونا من محلات زي القاعدين فيها ناس سمارت بيقولوا إنو أولادهم بيعرفوا عربي أحسن من أولادنا
و دا بيفسر إنو تناول الموضوع في سياق و إحداثيات محددة قد يتطلب فكرة مختلفة ...منها إنو سنابل تبث بعد 20:00 GMT بالدارجي بس
يا عبدالحي يا خي نادي لينا الجعيلي دا بي جاي خلينا نناقشو
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: malik_aljack)
|
Quote: الحفاظ على الهوية السودانية يبدأ بفصل الأولاد عن البيئة المحيطة لو كانت ما سودانية
و أول خطوة عشان تعملي بيها حاجز من التأثيرات السالبة للثقافة المهيمنة في اتك المنطقة هي فصلهم عن لغة الحوار و المخاطبة السائدة |
مالك الجاك...و الله حيرتنى. اكيد كل زول حر فى خياراته لاولاده
لكن عاوزه بس اقول انى شايفه ان اى ثقافة يعرفها طفلى كويسه و اضافه ليه...خليجية ...هندية...امريكية.
انا ما ح احاول افصل اولادى من الثقافة الحولهم. فى النهاية هم ح يعيشول فى البلد دى. لكن انا عاوزاهم (برضوا) يعرفوا الثقافة و اللهجة السودانية. عاوزاهم برضوا يعرفوا يتكلموا عربية فصحى و يكتبوها كمان. ما انا امهم بعرف عربى و انجليزى كويس. شنو بيمنعهم هم???
كل معارفى الصينيين و اليابانيين اولادهم بيعرفوا لغاتهم و ثقافتهم تاما.
القناة دة ممكن تكون بالانجليزى اذا كان الهدف منها تعليم اطفال السودان اللغة الانجليزية. و ده هدف فى ليه اكتر من قناة ذى ما قالت مريم.
الهدف من قناة (اظن) ال Entertainment لاطفال السودان بقناة سودانية بحته و بحجات من بيئتهم. و احنا كسودانيين خارج السودان عاوزين نستغل الفرصة نعلم اولادنا السودانى منها
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: smart_ana2001)
|
الاخوة والاخوات الكرام
قرات كل ماسطر هنا واشكر لكم الاهتمام الكبير بقناة سنابل الوليدة ..
وفي تقديري ان هذا النقاش سيثري الفكرة ويضيف اليها.. علي العموم اود طرح ملامح بسيطة عن ماهية سنابل واهدافها
في ايجاز امل الايكون مخلا..
بعد تجربتي السابقة في هارموني(المجمده) حاليا ..لأسباب مختلفة .
بدأت بتنفيذ الفكرة الثانية وهي قناة سنابل للاطفال وكان مفروض تكون قناة هارموني للاطفال في اطار الحلم الكبير
شبكة قنوات هارموني منوعات... رياضة.. اطفال..سياسة
المهم ..ماعلينا
سنابل يفترض بها ان تكون قناة سودانية الملامح والطعم والنكهة مسلحة بتقنيات عالمية في مجال الرسوم المتحركة وبرامج الطفل
وهي قناة.. تعليمية ..تثقيفية.. توجيهية..تربوية
تتوجه للطفل السوداني في الداخل والخارج للتركيز علي كل القيم السودانية الجميله في قالب تعليمي معاصر،
لايزال النقاش حولها مفتوح في ماهو المطلوب منها وكيف تكون متفردة في طرحها..وكيف تنافس مثيلاتها من قنوات الاطفال العربية
وانا تحت امركم ولي عودة.
كل عام والجميع بخير
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: معتصم الجعيلي)
|
الاعزاء والعزيزات
عيد مبارك
استمتع بمتابعة الحوار الهادف فى هذا الخيط ومداخلات الاخ مالك وابنة اخى الذكيه مريم, والسيده الsmart,
Smart ana. بكل أسف فقد فات الوقت لاستفادة ابنائى غسان " 17 عام", ومروان " 14 عام", المولودان فى بلاد اليانكى والربلز, فقد اصبحت الانجليزيه وباللهجه الاميركيه هى لغتهم الاساسيه, ولم يساعد تواجدنا فى بيروت لمدة عامين لتحبيذ او تحفيزهم للغه العربيه سوى فصحة او دارجة سودانيه برغم دراستها فى The American community School of Beirut " ACS". غسان مستمر فى اخذ كورسات Latin المتقدمه, اما مروان فقد اختار الان ان يدرس لغة التنين " الماندرين". اذا كان لى ابناء او بنات فى عمر أصغر, وانا من سودان المهجر/ المنفى فى الغرب, لكنت فضلت برامج مخصصه بالعاميه السودانيه مع برنامج لتعليم العربيه Standard Arabic معتمد على شخصيات ومواضيه من البيئه السودانيه البحته.
وشكرا للاخ معتصم للمتابعة والتعليق
مع ودى وتقديرى
المعز ابونورة
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: Elmoiz Abunura)
|
| Quote: لازم اوضح ان رغبتى فى قناة سودانية بلهجة سودانية (نابعة) من نانية مفرطة. كيف ? انا عايشه فى بلاد الفرنجة. و عاوزع القناة عشان اولادى يصلحوا لهجتهم السودانية و يتعلموا سودانى |
بالعكعس سمارت / مالك الموضوع اكبر من كدة
الموضوع اهمية نشر دارجيتنا لتحتل مكانها وسط الدارجيات الاخرى
ومحاولة الحفاظ عليها
الدارجيات المصرية والسورية والخليجية معقدة اكتر من دارجيتنا او زيها
بالدراما والفن والثقافة بقت مفهومة
نحن محتاجين فن يرسخ للهجاتنا المحلية
معتصم الجعيلي ليه تجارب في الانوميشن من زمن وهي تجارب ناجحة
وانا شخصيا اشتغلت معاه تجربة انوميشن (صوت) مع الفنان صالح عبالقادر
(ده بفرض انو القناة حقته)
وممكن القناة تفتح مساحات ضيقة لدارجيتنا حبة حبة لحدي ماتبقى مفهومة
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: Ahmed musa)
|
غايته الواحد كده دخل في ضفورة... بالله سيد القناة زاتو معانا بي جاي وانا قاعدة انظّر... ان شاء الله ما اكون بأي شكل (وبالتأكيد بدون قصد)، احبطّته او تسببته في اي احساس بالمشاعر السالبة، طبعا واضح من نقاشك انك متقبّل نقدي... لكن بالتأكيد كنت حأصيغه بصورة افضل لو حسيت اني حأصل لأصحاب القرار زاتم....
اولاً خليني يا استاذ معتصم اشيد بالفكرة، والله انا لما قريت عنها فرحته فرح... وما ارتحته إلا لما لقيتها، واضفتها favorites بتاعت محمود وليلى، أولادي... معاها mbc3 وcartoonetwork وبراعم... وبدل ما اتشاكل معاهم في انهم يدوني دوري في التلفزيون، بقيت كل شويه اغيّر واجيب سنابل.... الرسومات جميلة جداً، واعجبتني ملامحنا الحلوه وسمارنا ... وبغبة الاطفال المرسومين وجضومم... انا طبعا الself image من الحاجات البهتم بيها كتير.... عايزين أبطال سودانيين ... وعايزين أميرة حلوه سودانية.. القناة ممكن تقدّم خدمات كبيرة جداً ما تتخيلها... الفصحى قد تخدم ناس امريكا ديل (والنصيحة انا ما كنت منتبهه انهم عايزين فصحى)... لكن في نفس الوقت، كل القنوات التانية بتتكلم فصحى.. بس مافي قناة في سنابل بنسمع فيهم (جدو) او نسمع فيه دلع لبنوته زي طريقتنا (طبطوبه)... دكان الحلة والشارع والرجال اللابسين الجلاليب وقِدرة الفول...
ورينا احنا ممكن نساعد بشنو ... اشرح لينا اكتر عن الاهداف الانت واضعها (حتى لو في صورتها المبدئية)... احنا ممكن نعمل دراسة نجمع بيها آراء الناس... ونشوفهم عايزين شنو... ممكن نعمل brainstorming معاك ونشركك في افكارنا... لاننا مغروضييين في القناة بتاعتك دي....
د.المعز ابونوره.. ما شاء الله تبارك الله... الله يخلي ليك أولادك... محمود عمره ستة سنوات، بتكلم بي لهجة سودانية، لكن فيها شويه بشتنه... لولو لسه ما اتكلمت، وعايزاهم الاتنين يتكلموا سوداني كويس، وموش بس كده، يتربطوا بي ثقافتهم بحد كافي... مع وجود الثقافات التانية طبعا...
أحمد موسى ازيك... رؤية طموحة، نتمنى انه نقدر عليها...
انا سعيدة جدا انه البوست حيوصل صوتنا للقناة... وأحب اهنئك مرة تانية يا استاذ معتصم على الفكرة المميزة..
| |
|
|
|
|
|
|
|
|
|
Re: قناة سنابل السودانية للأطفال.... يا فرحة ما تمت! (Re: مريم بنت الحسين)
|
حقيقة تفاجاة وانا اتجول بين طيات القنوات بهذه القناة الرائعه واشيد بصاحبها الذي عرفت عنه الان معتصم الجعيلي ومن هنا احيه واشيد اكثر بالفقرات الدينيه بالصور التوضيحيه مثل قصص الانبياء والصالحين فقد شاهدت عرض لقصة اصحاب الجنتين اندهشت للحوهر والابداع في النص ومتعة الرسوم المتحركه نعم نحن كبار ولكننا نشاهد هذه القناة الباديه ايضا لانها واضحه تلتمس فيها الابداع حتي تسالت معقوله دي قناة سودانيه وكنت افنكرتها تتبع لتلفزيون السودان للميزانيه الكبيره في الانتاج حتما سيكون لها شان في توعية وتثقيف الاطفال
| |
|
|
|
|
|
|
| |
مريم بنت الحسين
عبد الحي علي موسى
malik_aljack
smart_ana2001
معتصم الجعيلي
Elmoiz Abunura
Ahmed musa
Dr.Saeed Zakarya Saeed
فيس بوك
تويتر
انستقرام
يوتيوب
بنتيريست