|
|
 من يعرف هذا القائد الجنوبى
|
ألـــــــــــــــــــــــــــــــــــــــــــــــــــــــــــــــيجا
من الذى قتل قائد قوات دفاع الجنوب ..أليجا
هذا الموضوع لم يتناوله الاعلام كثيرا..
وحسب معرفتى اتى بعد إتفاقية رياك مشار
وقد توفى فى احد فنادق الخرطوم مسموما
وحينها كانت الانقاذ سيئة الذكر فى عنفوانها وصلفها ووالغة فى دمائها
|
|
 
|
|
|
|
|
|
|
 Re: من يعرف هذا القائد الجنوبى (Re: قرشى محمد عبدون)
|
بصراحة ! هل تم التحقيق فى هذا الحادث أم لا
لاننى صراحة لا أعرف واذا تم التحقيق ماذا كانت النتائج
شخصيا لم أقرأ عن أى تحقيقات جرت او اى تغطية إعلامية للحادث
رغم قراءتى للصحف انذاك
وضعى المزرى كعامل بسيط فى محل اسبيرات بالمنطقة الصناعية بالاضافة لمحاولتى مواصلة الجامعة فى نفس الوقت
ناهيك عن الوضع السياسى الذى كان يغلى ويشوى الوجوه مثل اشعة شمس منعكسة من زيت مندلق
فى ازقة المنطقة الصناعية والغيظ والحنق والشعور بالقرف لم يجعلنى القى له بالا ولكن الحادث علق فى نفسى لا سباب معينة..
طيب أنا عرفت الانسان دا كيف ؟
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
قبل ما اوريكم عرفتو كيف
ملامحه العامة
قليل الحديث واذا تحدث كان يتحدث بهدوء شديد
كان وسيما بكل ما تحمل الكلمة من معنى
طويل وصلب ورشيق الخطوات يبدو عليه الذكاء
كلاعبى الكاراتيه
كنت انظر اليه كلما يتحدث..كان يتحدث وكأنه
يراقب الاخرين الذين هم خارج دائرة وجوده
اى الناس الحايمين على مد البصر
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
يوم جا فى المحل وكان عربيتو اتصلحت وكان بفتش فى ال( cover) او الحافظة
بتاعت اللستك الاسبير البتربط فى الاندكروز بورا ومتذكر قلبنا المنطقة الصناعية
كلها ما لقينا نفس لون الحافظة القديمة لكن فى النهاية تقريبا كيمو لقاها فى حتة
بالمناسبة كيمو دا على حسب ملامحو من اولاد الزاندى
المهم كان قاعد بتونس مع صاحب المحل لساعات داخل المحل
ومتوقعنو يكتب لينا الشيك او يدينا كاش لفاتورة الاسبيرات الاخدها مننا
قام مرق على ناحية العربية فى الزقاق قبالة المحل وقبل مايرجع صاحب المحل
قال لى قوليهو يدفع او يكتب شيك قبل مايمشى (ما داير يضمن حقو طبعا) قال الكلام دا
لى وهو بيقرا فى وشى عدم الرضى واول ما حس انو جاى على المحل تانى قام طلع براحة
المهم اليجا جا داخل دا يقول مع السلامة..سألنى من صاحب المحل قت ليهو مرق
قام قال لى خلاص كلمو انا بجيهو..قال الكلام وهو يخطو خطوة واحدة خارج المحل وقبل ما يرفع رجلو التانية ..
قمت بهبل عجيب قت ليهو ليك تلاتة اسابيع مما شلت الاسبيرات
والله الانسان دا كان خطوتو التانية قربت تثبت خارج المحل لكن جا داخل المحل بخفة وسرعة النمر
وهو بيقول مافى قروش هسه وعيونو مولعة زى الكبريت الاحمر ..طبعا افتكر كلامى إهانة او تحقير
لحظتها أخوكم طبعا اتجمد مش من كلامو لكن من حركة جسدو وسرعتو
الرجع بيها لجوة الدكان تانى بالرغم من انو فى كاونتر وفيه مدخل ضيق جدا وكتير كنت بتشربك عشان ادخل
يا بقية اللحام يمسك فى بنطلونك يا مرات تتعتر فيهو
لمن عرف انى اتجمدت فى مكانى بدون زيادة حرف تانى ..اعتذر لى بطريقة لطيفة وهو بينفض فى جيوبو
وبقول ياولد انا حتى ما عندى مصاريف هسه وبرسل ليكم الشيك مع السواق..ثم خرج
انا كانى مالى ومال الهجمة المرتدة دى ؟
مغفل :)
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
المهم اعتبرت الحصل بينى وبينو سلام من الداخل..
من داخل الدكان طبعا :)
ما زى سلام الكيزان اللى كان من الداخل..
هذا مع العلم انى لم اعتبر او اشعر
اى انسان جنوبى عدو بالنسبة لى طيلة حياتى
وحتى اليوم بل اعتبرهم إخوة لى إن لم يكونو اصحاب فضل
نواصل ونوريكم كيف عرفت بموتو
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
عبدالله دينق
عبدالله دينق دا زول قصير ومفتل العضلات
ووشو كلو ندوب ومليان اثار جروح قديمة
بالاضافة لانو راجل ثرثار لحد التعب..اصلا ما بسكت بالساهل.وشقى شقاوة ما عادية
وزول ما عندو فرامل نهائى يتكلم مع الناس
كان بيجى يقعد فى المحل يونس ليك صاحب المحل ويحكى ليهو حكاوى
ما انزل الله بها من سلطان.ودا كلو عشان يخفضو ليهو سعر الاسبير لعربيتو طبعا
ياخى عبدالله دا يلقى ليهو بلق قديم مرمى فى الواطة كان بينضفو ويدخلو فى جيبو
يوم قلت ليهو يا عبدالله انت دا شنو الجروح الكتيرة دى
قام قال لى انت شفت حاجة ورفع بدلتو الاشتراكية ورفع بنطلونو
وياللهول ..مصفى قديمة مقلوبة مافى حتة فى جسمو مافيها اثر جروح قديمة
قت ليهو دا من شنو..قال لى دى كلها ضرب ذخيرة..شكل كتير ياخى
وين الشكل ؟.. فى الجنوب
غايتو يومتها اتذكرت المقولة المنسوبة لخالد بن الوليد فى كتب تاريخ الاسلام
ليس فى جسمى موضع شبر الا وفيهو..الخ
تعبان الذكرنا اسمو فوق كان صلح عربية كريسيدا تابعة للمجلس ودايرين منو كم مليون
كان ذائغ..عشان تعبان دا مشيت مجلس التنسيق كم مرة.وشارى ليك صاحب المحل شهور وشهور
قضية ومحاكم .زالعربية تابعة للمجلس وتابعة للمجلس وما ادراك والقضية اتحولت لمدنية وو
وعبدالله دينق المشوطن دا
كل مرة كان بيغش صاحب المحل انو حيساعدو عشان ياخد قروشو
طيب..بعد فترة ليست بالطويلة
يوم كنت بحضر فى برنامج تلفزيونى ما متذكر اسم البرنامج لكن كان عن الوحدة والسلام
وباقى الدغمسة المعروفة وانا بتابع لمن جا وكت التداخل بالمكالمات وبعد كم مداخلة من اشخاص
جات مكالمة..انا عبدالله دينق من امبدة ووووو كلام كتير كدا ونقة شديدة
تخيلو الزول دا فى خلال اسبوعين او تلاتة من يوم البرنامج دخل البرلمان
انا وصاحب المحل قرينا الخبر وبمانشيت عريض فى صحيفة الاخبار على ما اعتقد
قربنا نموت بالضحك..طبعا سبب الضحك إتخيلنا شخصيتو العجيبة
ياربى بيكون وين هسع :) !!
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
عرفت موت اليجا كيف
يوم وفى منتصف النهار كنت واقف قدام المحل
بالصدفة لمحت لاندكروزر اليجا وسط زحمة
عربات المنطقة الصناعية واقفة على بعد 30 متر تقريبا
دخلت المحل وقلت لصاحب المحل شايف عربية اليجا واقفة هناك
قام جا طالع من المحل ولا حظ السواقين الصغار
بتحاومو جمب العربية وبقى يكورك ليهم ياولد ياولد..تعال ..تعال
قربو من المحل وكان شكلهم تعبانين جدا وعلى غير العادة
اول ما وصلو صاحب المحل قاليهم مالكم العربية خسرت تانى ولاشنو
قالو ليهو لا جايين نشيل باقى حاجات من الميكانيكى
وسألهم أليجا كيف
بحزن وبحيرة شديد قالو اليجا ما مات
انا وصاحب المحل فى اللحظة دى الجمتنا الدهشة
قال ليهم كيف يعنى مات ؟ ومن شنو
شرب ببسى ومات
الببسى بيكتل ؟
لا قالو جاه وجع بطن فى الفندق
تخيلوا قالوا الكلام دا بالبساطة دى
وصاحب المحل يحوقل ويبسمل
خشو طيب جو ة عشان تشربو شاى او حاجة باردة
الاولاد..لا لا نحنا مستعجلين وماشين نودى الاولاد الكلاكلة
وفاتو على كدا
دخلنا المحل صاحب وعلامات استفهام وتعجب
وكلمات السواقين البسيطة لافة فى روسينا
الله يرحمو
لم انسى تلك الايام بحلوها ومرها..سخانة المنطقة وزحام العربات وضجيجها
رائحة الكادحين وزيت الفرامل ورائحة الاقاشيه وجرادل الباكمبا والعسلية
وتراب المنطقة المخلوط من سواقط الخشب والحديد والجلد.................................
إنتـــــــــــــــــــــــــــــــــهى
| |
|
|
|
|
|
|
|
|
|
Re: من يعرف هذا القائد الجنوبى (Re: الفاضل يسن عثمان)
|
حبيبنا الأمين سعدت بمتابعتك وقراءتك للبوست
والله صحى
تسلمى أخت صباح حسين وشكرا على
القراءة وشكرا على التشجيع أيضا
مرورك اسعدنى
الأخ الفاضل يسن
سعدت بمرورك ..
فى الحقيقة هذه الحادثة
حادثة غامضة جدا على ما اعتقد ..ربما فى يوم من الايام
قد نعرف كل تفاصيلها و خيوطها
وحقيقة لا أعرف لمن كان يتبع فى الاساس
لكن علمى هو انه جاء من الجنوب
مع رحل السلام من الداخل
تحياتى وتقديرى لكم
هامش :
الموت والقتل أصبح مستشرى وأخذ شكلا وبائيا فى السودان
للاسف بقينا نستقبل اخبار الموت والقتل زى شاى الصباح
وبقت مجرد اخبار مثيرة لبضعة لحظات وهذا المنبر خير دليل
الغريبة حتى هذه اللحظة لم يتداخل احد بمعلومة قوية عن القائد أليجا
الهذه الدرجة موته كان غامضا..لا جنوبى لا شمالى يوضح ما التبس علينا
وما خفى فى عهد الأنقاذ بلا شك أعظم
| |
|
|
|
|
|
|
|
|
|
Re: من يعرف هذا القائد الجنوبى (Re: قرشى محمد عبدون)
|
كختام
من الشخصيات التى لم تفارق ذهنى ..سانتينو الميكانيكى
كان بيجى الصباح بدرى وبايتة معاهو وماسك ناار من أول الصباح
شعر منفوش وببزق اول الصباح لامن يسخن معاهو مع نهار
المنطقة كان بيجى يقعد جمبى فى ضل المحل
المهم كان بيجى قبل معظم الناس..الصباح بدرى .. وبينحنى على الازيار
على يمين المحل..وزى الضبعة كرطع كرطع كرطع بيضرب ليهو زى تلاتة أكواز موية
وبعد داك بيجى يقعد يطلب القهوة ويولع سيجارتو مع رجفة ظاهرة فى اليدين والاصابع
سانتينو انسان نحيف جدا وشكلو ما كان ما ببيت بدون ما يكبها ويشلع ..
صباح الرحمن بيجى يقعد جمبى ريحتو ريحة (دكاى) معمول من بلح دنقلا
اول ما الشغل يبدأ ..بجينى ..يا قُرسيى جيب جهاز هايدروليك كريسيدا وجيب شمبر مقاس 22
يا سانتيو جيب قروشك ياخ انت عارفنى انا مجرد عامل هنا وانت عارف عمك صعب كيف (صاحب المحل)
ياخى عمك انا بتعامل معاهو قبل ما انت تجى هنا ..جيب ياخى
لكن صراحة عرفت انو اخلاقو عالية مع مرور الزمن
مرات كان بيجى يغمز لى ويقول لى ادينى الاسبير الفلانى داك سرعة ..سرعة
وبقوم بشاغلو ..حقى برة يا سانتينو ..
سانتينو : جيب سرعة ياخ!! ولامن اتردد وأحاول استفسر كان بيقول
انت ما قدر الحاجات دى ..فى اشارة على إنى لسع صغير وعودى اخدر
حقى برة يا سانتينو
سانتينو : حقك ؟؟ ..
القروش البديك ليها عمك دا تمشى تاكل بيهو باسطة
والباسطة دى اشارة تانية على انو هو بتاع حامض وبتاع
مزاجات وبمسك نار :)
لمن اسمع كلمة انت ماقدر الحاجات دى
طوالى كنت بتأكد انو عندو ضحية او زبون كارب
وبرغم دا كلو كنت بحبو شديد والله وبجيبو قروش الاسبير بدون نقيص
لوما البوست بوست تساؤلات عن القائد اليجا كنا حكينا عن شخصيات كتيرة
| |
|
|
|
|
|
|
| |
قرشى محمد عبدون
الامين موسى البشاري
الفاضل يسن عثمان
فيس بوك
تويتر
انستقرام
يوتيوب
بنتيريست