قالوا مهمد صاله جاء الى الخرطوم عند واحد قريبه صاحبنا قعد كم يوم كدا مع قريبه ثالث يوم قريب (مهمد) صاله قال ليهو ارح نفسحك شوية ونوريكـ الخرطوم دي اها طلعوا مع بعض ومهمد صاله كل ما يشوف ليهو عماره سمحة يقول لقريبو البتاعة دي حقت منو؟ قريب مهمد صاله زاتو ما ناقش ابو النوم اها لما تغلبو ليك الاجابة يجاوب على سؤال مهمد صاله كما يلي العماره دا اشتراهو صلاح ادريس .. ..
مهمد جنن ليك قريبو وكل شوية يسألو ليك العمارة دا حقت منو؟ قريبو: دا اشتراهو صلاح ادريس ياخ مهمد صاله لامن زهج من اجابات قريبو فكر كدا وقال لقريبو مهمد صاله: صلاح ادريس دا ما كان يشتري المشروع الحضاري ويريحنا ياخ
05-07-2012, 10:34 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
صاحبنا سك ليك ناس الوكالات في السودان لغاية ما عمل تأشيرة العمرة يوم السفر دا الحلة كلها شرفت في المطار اها صاحبنا في امان وصل ليكـ جدة وعمل عمرتو بعد ما لقى اولاد حلتو الما قصروا معاهو تب صاحبنا قاعد في الشقة اسبوع اصلو ما مرق بره مو خايف من الكشه بالكتير كدا يكون طلع الحوش ولا السطوح جماعتو كل يوم اجيبوا ليهو كيس تمباكـ ماكن خلاص طبعا ونسة اولاد حلتو كلها كانت البيكـ والمراعي وكورن فليكس اها هو قايلهم بتكلموا انجليزي من التسطيح الحاجة التي تكررت على مسامعه كل ما واحد ينزل البقالة التاني يقوم يقول ليهو : اسمع جيب لي تايد معاكـ عليكـ الله زولنا طبعا ماهو عارف التايد دا شنو اها بعد اسبوع كدي قال النفتح خشمي مع الجماعة ديل ياخ وفجأة كدا قال لاولاد حلتو: انتوا وحاة الله لقيتو التايد دا تضربوا فيهو ساااي تاني ما بترجعوا الحلة
05-07-2012, 10:38 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
قالو في مسطول طالع من الدكتور وبعد ما طلع قعد يكلم نفســـه :
ضب في صحن؟ .. لا... لا سحليه فى جك؟ .. لا... لا قعونجه فى جردل؟ .. لا... لا تمساح فى بانيو؟ .. لا.. لا كــلــب في خور؟.. لا ... لا ...ياااااااااخ رجع للدكتور تانى وســألو: إنت يا دكتور قلت لي عندي شنو؟؟ .. ..
.. ..
.. ..
.. ..
.. ..
____ الدكتور : عندك سرطان فى الحوض
05-07-2012, 10:46 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22554
ناس الحلة زهجانين ليكـ من امام الجامع جنس زهج الامام ماسكهم ليكـ في كل صلاة البقرة آل عمران وهكذا بطوّل ليهم في الصلاة اها قاموا احتجوا للعمدة وقالوا ليهو: آآآآ العمدة ياخ زولك حمانا الشغل نجي نصلي عنده يمرقنا من الصلاة بعد ساعة وساعتين فدحين يا تغيروا لينا ولا كمان تاني ما بنصلي معاهو العمدة : خلاص يا جماعة بشوف لكم اماماً تاني .. ..
العمدة فتش ليهو امام لامن عتر ليهو في واحد ما شاء الله واتفق معاهو قال ليهو: تعال صلي بالناس دي 3 جمعات كان ارتاحوا ليك بنعينك امام لجامع الحلة دي الامام : عوجه مافي يا عمدة ابشر بالخير
جات الجمعة والحلة تتحدث عن الامام الجديد دا الجاي الحلة امامنا صعد المنبر وسلم عليهم المأذون رفع الاذان بين ترقب المصلين لسماع صوت الامام الجديد قام الامام وقال ليهم : يا ايها الناس اتقوا النار التي وقودها الناس والحجارة وشرح ليهم والاية في حكاية زي 3 دقائق ثم قال: قوموا الى صلاتكم يرحمكم الله آآآ زول والله ناس الحلة اتبسطوا جنس انبساطه وشكروا العمدة وقالوا ليهو : بس ياهو دا امامنا من يوم الليلة دي العمدة: آآآ ناس اصبروا عليكم الله انا اتفقت مع الزول يخطب فيكم 3 جمعات كان عجبكم خلاص وكان ما عجبكم نشوف غيرو ناس الحلة : آآآ زول من هسي دي عاجبنا
الامام جاهم الجمعة التانية واول ما صعد المنبر قال ليهم: عارفين قصة سيدنا نوح؟ ناس الحلة : بلحيل عارفنها الامام : طيب ماف داعي نكررها قوموا الى صلاتكم
05-07-2012, 11:04 PM
خالد المحرب خالد المحرب
تاريخ التسجيل: 01-14-2007
مجموع المشاركات: 5705
عبد العزيز وعبد السلام كانوا قاعدين بي يشربوا في البتاع، في اللحظة دي جا حمل ماشي بجنبهم قاموا مسكوه ضبحوه صلحوا بيهو القعدة وبعد شوية نظر عبد العزيز للجلد والراس وسأل عبد السلام عبد العزيز: إنت يا عبد السلام دحين دا مو حمل محمد أحمد؟
عبد السلام: أيوا ياهو داير بيهو شنو؟
عبد العزيز: لا حول ولا قوة، والله محمد أحمد دا حقو أصلو ما يخليه، غايتو مصيبة وقعت علينا عبد السلام: حق شنو!، إنت كان مسكت خشمك دا وأنا مسكت خشمي بيعرفنا من وين؟
عبد العزيز: أنا بقصد الحساب يوم القيامة عبد السلام: إنت يا عبد العزيز حساب يوم القيامة دا كيفنو؟ عبد العزيز: يوم القيامة يجيبوني ويجيبوك ويجيبو محمد أحمد ويجيبو الحمل،
عبد السلام: مقاطعاً، محمد أحمد بجيبو! عبد العزيز: أيوا عبد السلام: والحمل ذاتو بي يجيبوهو !عبد العزيز: أيوا
عبد السلام: طيب الحساب في شنو، ما يسوق حملو و يمشي.
__ منقوووووووووووووله للامانة
05-08-2012, 07:29 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
جزاك الله خير يا شيخ عماد حسين كلامو صاح يا البشاري هترش زي ما تهرش لكن بعيد بعيد من الامور الدينية أقبل النصيحة وقول لشيخ عماد بارك الله فيك بدون أئ كاني ماني . . اها هاك الهترشة دي : Logic الولد اهلو رسلوهو ألمانيا يقرأ طب قرا سنة اولى وتانية وغلبتو قراية الطب الصعبة قام غير فلسفة كمل الاربعة سنة ... قالن كم ؟ ستة ورجع البلد الزول مو زول حلول الزغرت ضربن والشربات دور وبكرة الضبيحة وملاح اللحم وملاح الرز والسلات الجنا مو دكتور اها بعد الجماعة اتفرقوا ابوهو شال معاهو كباية ليمون ومشا عليهو ختاها قدامو وقال ليهو اها يا ولدي بتشتغل في اسبتالية الخرتوم ولا بتكون في الرد بجاي قام الجنا قاليهو يا يابا انا ما قريت طب قريت شنو يا البخيت بالله ؟ قريت فلسفة فلفسة دي شنو كمان يا كافي البلا كمان الفلفسة بقروها ؟ الفلسفة دي يابا هي علم المنطق يعني بعلم المنطق دا الزول يقنع ائ زول تاني بالمنطق خاصة في السياسة يعني مثلا القدامنا دي مش كباية ليمون واحدة انا بعلم المنطق ممكن اقنعك بانها كبايتين طوالي ابوهو شال الكباية من قدامو وفوووو كتحا وقال ليهو خلاس اشرب التانية ات
05-14-2012, 09:44 AM
عماد حسين عماد حسين
تاريخ التسجيل: 06-11-2011
مجموع المشاركات: 7066
Quote: جزاك الله خير يا شيخ عماد حسين كلامو صاح يا البشاري هترش زي ما تهرش لكن بعيد بعيد من الامور الدينية أقبل النصيحة وقول لشيخ عماد بارك الله فيك بدون أئ كاني ماني
تسلم يا ود البوش
الله يجزيك خير
أهــأ... هترشوا بعافيتكم
05-14-2012, 10:02 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
اصلو ما بنخليك تمش فاضي يا شيخ عماد كنا في الحلة بنهترش زي كدي وكان بيننا اخونا جبريل دفع الله ( بتعرفو - انصاري سنة ) نكتة من هنا ونكتة من هناك وكلها نكات ممجوعة وقديمة لم تتجاوز ضحكاتها باب الديوان انعدل جبريل دفع الله وقال نكاتكن دي كلها قديمة انقول ليكم النكتة الجديدة دي واحد صحى نص الليل شاف حرامي في البيت طوالي ضرب الكوراك حرااااامي حرااااامي يا ناس حرااااامي حرااااامي جاره انصاري سنة رفع راسو بالحيطة وقاليهو اذا استعنت فاستعن بالله فضحكنا كان لم نضحك من قبل مسك دقنو وطلع وقال دي الفتها اسع في قعدتي دي
05-13-2012, 03:57 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
قالوا في واحدة بايركس لامن بهناكـ قطرها فات وغنايها مات اها عندها واحدة صاحبتها في مدني اصغر منها برضو بايركس قاموا خطبوها وخلاص عايزين يعملوا عرسها قامت عزمت ليكـ بايركستنا دي القاعدة في الخرتوم يلا يا زول قامت صاحبتنا مشت عديييل للسوق الشعبي وقطعت التذكرة عشان تمشي مدني تحضر عرس صاحبتها اتحركت الحافلة وفي الطريق كده اخدتها ليكـ نومة صغيرووووونه ومع النومة دي والعقل الباطني حقها الكل همه انها تعرس قامت حلمت ليكـ إنها خطبوها والعريس جاب قولة خير الما خمج والبنوت يزغردن سااااي وحددوا معاد العقد والعرس وعيييييييييييييييييييييييييييك فيلم طويل لغاية ما وصلت انوا الليلة خلاص يوم العقد المعازيم حضروا وناس الحلة وخلاص عايزين يبدأوا مراسم العقد وبس في اللحظة سمعت ليكـ ضاااااااااخ طراااااااخ طااااااااااخ صاحبتنا قامت مخلوعة من النومة وبدون ما تشعر قالت للزول الجنبها: البايركس : أها عقدوا الراكب الجنبها : لا والله طرشـــق ... ...
.. ..
__ طبعا الزول بقصــد انو اللستكـ طرشــق وصاحبتنا فاكره طاااخ دي صوت الجبخانة بتاعة العقد والله صحي
05-13-2012, 04:34 PM
قرشى محمد عبدون قرشى محمد عبدون
تاريخ التسجيل: 08-24-2008
مجموع المشاركات: 1767
بعد المداخلة دى اتوقع بوستيك دا يكون فيهو كمية من الفتاوى والتفسيرات لوول
عندى صحبى ابوه الله يرحمو كان من ناس التكفير والهجرة..ولدو الصغير اشتغل فى الشرطة الشعبية كان مسميه جند الطاغوت..الليلة تبقى جند طاغوت مع نكتة (اللوجيك) دا
وطبعا صحبى ذاتو كان مجننو ..كل يوم يجيه ويقول يا ابنى ما تدخل الإسلام المهم ارجى الراجيك
واصل يا حبيب وبالله كتر لينا من ناس مهمد صاله دا بالذات
05-13-2012, 04:39 PM
قرشى محمد عبدون قرشى محمد عبدون
تاريخ التسجيل: 08-24-2008
مجموع المشاركات: 1767
Quote: بعد المداخلة دى اتوقع بوستيك دا يكون فيهو كمية من الفتاوى والتفسيرات لوول
عندى صحبى ابوه الله يرحمو كان من ناس التكفير والهجرة..ولدو الصغير اشتغل فى الشرطة الشعبية كان مسميه جند الطاغوت..الليلة تبقى جند طاغوت مع نكتة (اللوجيك) دا
يا قرشـــي ما تحرش باللاي ياخ
أما بالنسبة لناس الفتاوي ديل فسيبكـ منهم
حدهم معاي تشغل ليكـ كمنجتين وعود بشتتوا من البوست دا
والله صحي ()
بالمناسبة دي أنديكـ واحدة على الطاير كدا:
عندنا صاحبنا في الجامعة نوع البخلط البنت 18 ساعة داكـ
أنا المحيرني بقولوا في شنو ما عارف؟
المهم يوم من الايام خالط الجكسوية بتاعته في الجخانين البين
كلية الهندسة المعمار ومكتب السكرتير الاكاديمي (جامعة الخرطوم)
المهم كانوا قاعدين في حته ميتة شديد والحركة فيها ضعيفة جداًفي الامسيات
أها واحد من ناس الأمر بالمعروف والنهي عن المنكر ديل لمه ليكـ فيهم
وشبكهم ليكـ : يا اخوان ما اجتمع رجل وامرأة الا وكان الشيطان ثالثهما
صاحبنا دا زعل زعل شديد وقال ليهو :
يا زول أمشــي عليكـ الله
نحن قاعدين هنا لينا زي 6 ساعات ما شفنا لينا شيطان
الا بعد جيت أنت
05-14-2012, 09:55 AM
عماد حسين عماد حسين
تاريخ التسجيل: 06-11-2011
مجموع المشاركات: 7066
Quote: عندنا صاحبنا في الجامعة نوع البخلط البنت 18 ساعة داكـ
أنا المحيرني بقولوا في شنو ما عارف؟
المهم يوم من الايام خالط الجكسوية بتاعته في الجخانين البين
كلية الهندسة المعمار ومكتب السكرتير الاكاديمي (جامعة الخرطوم)
المهم كانوا قاعدين في حته ميتة شديد والحركة فيها ضعيفة جداًفي الامسيات
أها واحد من ناس الأمر بالمعروف والنهي عن المنكر ديل لمه ليكـ فيهم
وشبكهم ليكـ : يا اخوان ما اجتمع رجل وامرأة الا وكان الشيطان ثالثهما
صاحبنا دا زعل زعل شديد وقال ليهو :
يا زول أمشــي عليكـ الله
نحن قاعدين هنا لينا زي 6 ساعات ما شفنا لينا شيطان
الا بعد جيت أنت
أهــا,,, هاك دي يا الامين
من صاحبك الشيخ محمد مصطفى عبدالقادر
مرة في ركن حلقة علمية في الجامعة، دخل عليهو واحد، وقال ليهو:
يا شيخنا؛ كيف تقول ما خلا رجل بامرأة إلا وكان الشيطان ثالثهما؟! أنا هسع أخلط عادي، وأقعد مع أي بنية 3 ساعات وبراااااااااااااانا وما قاعد أشعر بي أي حاجة
قام شيخ محمد مصطفى قال ليهو:
لكين الرسول صلى الله عليه وسلم قال: (ما خلا رجل).. فاهم يا أخونا رجل رجل... يعني الحديث ده مقصود بيهو الرجال، مش أي زول :)
05-14-2012, 03:32 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
هاك دي يا المدير فنان كبير "متوفى" الله يرحمو كان قدام بيتو في كوم رملة، نص الليل يقوم ينبطح في الرملة ويضرب سيجارته، يوم مرق لقى ناس السواري متبطحين في الرملة ، سلمو عليهو وشبكوه ازيك يا استاذ وما ادراك، الزول دخل البيت وقعد شوية وقال النمرق اشوف الناس دي اتخارجت ولا لسه، مرق لقاهم قاعدين ، رجع تاني واخد قعدة ومرق برضو لقاهم قاعدين، عاين فيهم ودخل البيت تاني وجاهم مارق شايل جردل وكوريق، قال لهم "يا جماعة عن اذنكم دايرين ندخل الرملة دي جوة"
05-19-2012, 09:39 AM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الامين موسى البشاري
طارق جبريل
خالد المحرب
عبدالله ود البوش
أميرة فاروق عبد العال
عماد حسين
قرشى محمد عبدون
رشا احمد
Abdlaziz Eisa
الشفيع وراق عبد الرحمن
محمد عمر الفكي
فيس بوك
تويتر
انستقرام
يوتيوب
بنتيريست